Sabirabadın Məmişlər kəndində tövlə tikdirən Səxavət Əhməd oğlu Bədəlov 8 ildir ərazini sənədləşdirə bilmədiyini deyib.

Xalqxeber.az bildirir ki, o, bu barədə Meydan TV-yə müraciətində bildirib.

“2015-ci ildə bələdiyyəyə 35 min manat ödəyərək ərazi almışam və 3500 kvadrat ərazidə 900 baş heyvan üçün tövlə tikdirmişəm. Həmin vaxtdan indiyədək ərazinin sənədlərini ala bilmirəm. Nə vaxt sənəd tələb etsəm, tövlənin sökdürüləcəyi ilə hədələnirəm”, – kənd sakini deyib.

S.Bədəlovun sözlərinə görə, Məmişlər kəndində 70 iribuynuzlu heyvanı, 200 qoyunu var. Ərazini keçmiş bələdiyyə sədri Nazirağa Quliyev işlədiyi dövrdə alıb, tövlənin tikintisinə 200 min manat xərləyib:

“Sonradan bildim ki, sənədləri öz oğlu Rövşən Quliyevin adına rəsmiləşdirib. İndi deyirlər ki, guya ərazini mənə icarəyə veriblər. Kim icarəyə götürdüyü yerə 200 min manat xərcləyər? Əlaqədar qurumlardan köməklik göstərilməsini istəyirəm”.

Şikayətçi söyləyib ki, sənədləşdirmə məqsədilə bir il ərzində 35 min manat ödəyib, bundan başqa, 7 min manat da əlavə xərclər üçün verib. Ərazidə tikinti işləri aparıb, amma sənədlər hazır olmadığından yarımçıq saxlayıb və heyvanları tövlədən çıxarıb.

“Ot doğrayan avadanlığım, traktorlarım, əkin üçün avadanlıqlarım vardı. Ukraynada işləyirdim, pandemiya başladı, get-gəl çətinləşdi. Kəndə geri dönəndə 40 min manatlıq avadanlığımn satıldığını bildim. Qoyunlarımı aparmışdılar, polisə şikayətdən sonra 3 qoyun əskik olmaqla qaytardılar”, – S.Bədəlov bildirib.

Şikayətçi deyib ki, hüquq-mühafizə orqanlarına müraciət edib:

“Kəndin stadionunu, köhnə tikililəri də satılıb. Şikayətimizə baxılmır, məhkəməyə də müraciət edəcəm”.
Digər kənd sakinləri də örüş torpaqlarının satıldığını deyiblər:

“Kanal qazıblar, amma mühasirəyə alıblar, kəndlilər istifadə edə bilmirlər. Kənd sakinləri adama 2-3 manatdan yığdıq, yol saldırdıq, onu da gəlib qazıblar ki, heyvanlar keçib gedə bilməsin. Örüş sahələrindən istifadə edə bilmirik”.

Kəndlilər deyiblər ki, məhkəməyə verərək həmin ərazilərin örüş sahələri olduğunu sübut ediblər:

“Mal-qaranı otlaq sahəsinə buraxmırlar, çətinliklə üzləşirik. 50 hektar örüş sahəsi zəbt olunub. 28 hektar ərazi birinə verilib, 13 hektar yer vardı, onun da 3 hektar yarımını götürüblər. Kənddəki örüş sahələri onsuz da kənd əhalisinin tələbatını ödəmir, üstəlik onu da tutub əlimizdən alıblar”.

Məmişlər Qaralar Kənd Bələdiyyəsinin inzibati ərazisinə daxildir. Kənd bələdiyyəsinin sədri Niyaməddin Məmmədov deyib ki, Səxavət Bələdov həmin kəndin sakini deyil, ərazi üzrə mübahisə isə iki nəfər arasındadır, bunun bələdiyyəyə aidiyyəti yoxdur:

“Həmin ərazi bələdiyyənin mülkiyyətindədir, hərrac vasitəsilə 15 illik icarəyə verilib. Sənədlər R.Quliyevin adına illər əvvəl sənədləşdirilib. Tərəflərin mübahisəsinə bələdiyyə müdaxilə edə bilməz, bizə təqdim edilən sənəd əsasında danışa bilərik”.

Bələdiyyə sədri digər kənd sakinlərinin örüş yerləri ilə bağlı narazılıqları ilə razılaşmayıb. Bildirib ki, örüş yerləri satılmayıb, yalnız həyətyanı sahələr satışa çıxarılır:

“Örüş yerləri satıla bilməz, deyilənlər yalandır”.

N.Quliyevə məxsus olduğu deyilən telefonlara isə zəng çatmayıb.

Bakının əsas prospektlərindən sayılan Heydər Əliyev prospektində sürət həddi endirilib.

Syolun 110 km/saatlıq hissəsində 90 km/saata, 90 km/saatlıq hissədə isə 70 km/saat olaraq dəyişdirilib.

Qeyd edək ki, bir neçə gün öncə Bakı Nəqliyyat Agentliyinin sədri Vüsal Kərimli paytaxt ərazisində yol nəqliyyat hadisələrinin qarşısının alınması məqsədilə 14 yolda sürət hədlərinin endirilməsi ilə bağlı təkliflər hazırlandığını açıqlamışdı.
Heydər Əliyev prospektindən sonra mərhələli şəkildə digər küçə və prospektlərdə də sürət həddinin endirilməsinə dair müvafiq yol nişanları quraşdırılması nəzərdə tutulub.

“Qafqazinfo”

Emin Qasımov Şabran rayon sakinidir. O deyir ki, ailəsininin ehtiyaclarını təmin etməkdə çətinlik çəkir.

Şikayətçinin sözlərinə görə ünvanlı sosial yardım almaq üçün Dövlət Sosial Müdafiə Fonduna müraciət etsə də, ona bir cavab verilməyib.

Dövlət Sosial Müdafiə Fondu Toplum Tv-nin sorğusuna cavab olaraq bildirib ki, yaxın vaxtlarda maddi-məişət şəraitinin müayinəsi aparıldıqdan sonra ailəyə ünvanlı sosial yardımın təyin olunması ilə bağlı müvafiq qərar qəbul veriləcək. //Toplum Tv/

Oğuz rayonunun Ərmənət kəndinin yolu uzun illər təmir olunmadığından yararsız vəziyyətə düşüb.

Bizim.Media-nın yerli bürosunun məlumatına əsasən, məhz buna görə də, Xalxal-Ərmənət kənd yolu sakinlərin gediş-gəlişində böyük problemə çevrilib.

Oğuz-Xalxal yolundan Ərmənət kəndinə gedən yolun uzunluğu 3 km olsa da, qısa olduğu qədər bu yolu qısa müddətə getmək mümkün olmur.

Çala-çuxur yollar həm insanların vaxtını alır həm də cibindən pulunu. Sakinlər deyirlər ki, yolun bərbad olması üzündən avtomobilləri tez-tez sıradan çıxır. Kənd sakini Ramil Əzizov deyir ki, Ərmənət kəndi turizm üçün cəlbedici olsa da yolların bərbad olması üzündən kəndə gələn yoxdu.

Qışda palçıq, yayda toz...

Sakinlər Xalxal kəndinə və Qaraməryəm-İsmayıllı-Şəki magistralına tək çıxış olan kənd yoluna bu vaxta qədər bir dəfə də olsun asfalt döşəmədiyini bildirirlər. Qeyd olunur ki, daşlı-kəsəkli yolda yaranan çalalar avtomobillərin rahat hərəkətinə maneə yaradır. Yağış yağdıqda isə palçıqlı yol daha keçilməz olur. Kənd sakini Malik Məlikov deyir ki, yolun təmiri həmişə özlərinin ümidinə qalır....

“Öz pulumuzla yola çınqıl tökdürürük. Asfalt vurulmadığı üçün yağış, qar yağan kimi dağılır. Hər il bu xərci çəkirik”.

Yoxa çıxan icra nümayəndəsi və bələdiyyə sədri

Kənd icra nümayəndəliyindən bildirilib ki, 3 km-lik yolun 1 km-i onların, 2 km-i isə yol istismar idarəsinin balansındadır. Həmin 2 km-lik hissəyə bişməmiş asfalt örtüyü sonuncu dəfə 90-cı illərdə döşənib. Yolun bərpası ilə bağlı aidiyyəti üzrə məsələ qaldırılıb. Ona görə sakinlər hər il kənd daxili 1 km-lik yolu öz vəsaitləri hesabına bərpa etmək məcburiyyətində qalırlar.

Kənd sakini Aydın Babayev deyir ki, hər dəfə məsələ qaldırılanda kənd icra nümayəndəsi və bələdiyyə sədri yoxa çıxır.

Məsələ ilə əlaqədar Avtomobil Yolları Dövlət Agentliyinin (AAYDA) 11 saylı Yol İstismar İdarəsindən bildirilib ki, 3 km-lik Xalxal-Ərmənət yolunun 2 km-i onların balansındadır və mütəmadi olaraq təmir-bərpa işləri aparılır. Sadəcə havaların əlverişsiz keçməsi nəticəsində Ərmənət kənd yolunda müəyyən çalalar yaranıb. Həmin yol 2023-2025-ci illərin İnvestisiya Planına salınıb və əsaslı bərpası nəzərdə tutulur.
Bizim.Media

Azərbaycan Avtomobil Yolları Dövlət Agentliyində rəhbər vəzifə sahibi olan şəxslərin korrupsiya əməllərindən aktualxeber.az saytı dəfələrlə tənqidi məqalələr vermişdir. Bu gün də həmin dövlət qurumunun bir növ ailə biznesi mərkəzinə çevrilməsindən bəhs edəcəyik. Diqqət yetirək ki, bir tərəfdə ölkə rəhbəri kadr, struktur, siyasi və iqtisadi islahatlar həyata keçirir, mühüm dövlət postlarına cavan, enerjili, savadlı kadrlar təyin edir, dələduz məmurları vəzifələrindən uzaqlaşdırır, bəziləri həbsə göndərilir, korrupsiya hallarının qarşısını alınması istiqamətində ciddi addımlar atılır.
Məmmədov Saleh Ərşad oğlunun rəhbərlik etdiyi qurumda isə, fərqli ab-hava hökm sürməkdə davam edir, AAYDA-nın ailə biznes mərkəzinə çevrilməsi bir kimsədə şübhə doğurmur.

Orada rəhbər vəzifələrə təyin olunan şəxslərin tam əksəriyyətinin ya S.Məmmədovla qohumluq əlaqələri var, ya da ona bu və ya digər yollarla bağlı olan şəxslərdir. Adicə bir faktı qeyd edək ki, Agentlik sədrinin qudası olan və Avtomobil Yollarının Təmiri və İstismarı baş idarəsinin rəisi vəzifəsini daşıyan Əflatun Qasımov, onun digər qardaşları Yaqub Qasımov və Ərəstun Qasımov bir sözlə bu Qasımov qardaşlarının məxsus olduqları var-dövlətin sərhəddini müəyyən etmək heç cür mümkün deyil. Bir anlığa diqqət yetirək ki, bu şəxsin Balaxanı qəsəbəsində bir asfaltzavodu, Qaradağ rayonu ərazisində dəyəri milyonlarla qiymətləndirilən 4-5 ədəd gizli zavodu, Novxanıda gözəgəlimli villası, restoranı və s. kimi daşınan-daşınmaz çoxsaylı əmlakları var.

Sözsüz ki, Ə.Qasımovun belə bir həcmdə var-dövlətə sahib olmasının kökündə, məhz onun Saleh Məmmədovla quda olması, eyni zamanda rəhbərliyin “qara kassası” funksiyasını uğurla yerinə yetirməsidir. Onu da unutmaq olmaz ki, baş idarə rəisinin sahib olduğu var-dövlətin varlığı, onun övladlarına da öz təsirini göstərir. Yəni, hazırda Əflatun Qasımovun oğlunun Abşeron RPŞ, Mehdiabad polis bölməsinin rəisi olduğu bildirilir. Başqa bir məqamı da qeyd edək ki, Ə.Qasımov təkcə daşıdığı vəzifəsinin imkanlarından yararlanmır, hətta o, “Körpü-Bina Tikinti” MMC-nin rəhbəri Xəlil Göyüşova himayədarlıq etməklə də, kifayət qədər qazanc əldə etməyi bacarır. Yəni, o, daşıdığı vəzifəsinin imkanlarından, daha çox Saleh Məmmədovla quda olmasından sui-istifadə edir və tikinti işləri ilə bağlı həyata keçiriləcək ən böyük layihələri, məhz Xəlil Göyüşovun rəhbərlik etdiyi MMC-yə həvalə etdirir. Bütün bunlar onu subut edir ki, baş idarənin rəisi Əflatun Qasımov qudasına söykənərək hər cür hoqqalardan çıxmağı bacarır.

Bu şəxsin baş mühasib Müseyib Həmzəyevlə qurduğu işbirliyi də, olduqca sensasion məlumatları əldə etməyə imkan verir. Redaksiyamıza daxil olan başqa bir məlumatlarda isə vurğulanır ki, Qasımov soyadını daşıyan bu şəxs yaxın qohum-əqrəbasını AAYDA-nın sturuktur vahidlərində işlə təmin etdirməyi də unutmur. Belə bir səbəbdəndir ki, hazırda yol istismarı idarələrində bu şəxsin qohum-əqrəbası daha çoxluq təşkil edirlər. Məsələn, Əflatun Qasımovun qohumlarından olan 14 №-li Xüsusi Yəyinatlı Yol İstismar MMC-nə rəhbərlik edən Araz Bəndəliyev, adı çəkilən bu şəxsə arxalanaraq aparılan tikinti işlərinə lazımınca nəzarət etmir. Belə bir səbəbdən də, həyata keçirilən tikinti işlərində ara-sıra faciəli hadisələr baş verir. Xatırladaq ki, keçən il 14 №-li Xüsusi Yəyinatlı Yol İstismar MMC tikiti işlərində çalışan şəxs texniki təhlükəsizlik qaydalarına əməl etmədiyindən yerə yıxılıraq dünyasını dəyişmişdi. Bu və buna bənzər hadisələr indiyi kimi bir neçə dəfə baş versə də, baş idarənin rəisi yaşanan faciələrə gözucu baxır.

Çünki, Əflatun Qasımovun qudası, özünə “arxa-dayaq” hesab etdiyi Saleh Məmmədov hələ də vəzifə başındadır. Bəzi çevrələrdə isə belə bir söz-söhbət dolaşır ki, baş idarənin rəisi ara-sıra “levı işlər”lə məşğul olmağı da imkan tapır. Bu haqda hər kəsə növbəti yazılarımızda ətraflı məlumat verməyə çalışacağıq.

Aktualxeber.az

Gəncədə işıq dirəyi qəzalı vəziyyətdədir.

DİA.AZ bildirir ki, bu haqda Dunyaninsesi.Az -a 23 mart tarixində məlumat daxil olub.

Sözügedən hal şəhərin Azərbaycan bayrağı küçəsində müşahidə olunur. Burada sakinləri elektrik enerjisi ilə təchiz edən dirək əyilib və qəzalı vəziyyətdədir. Bu hal bir müddətdir davam edir.

Ərazidə dördmərtəbəli binalar və fərdi yaşayış evləri yerləşir. Sakinlərin sözlərinə görə, işıq dirəyinin aşma təhlükəsi var.

“Qorxuruq ki, qarşısındakı evin, ya da yoldan keçən piyada və ya maşının üstünə aşar. Yeni dirək basdırıb xətlərin onun üzərinə keçirilməsini istəyirik”, – deyə burada yaşayan əhali bildirir.

Naxçıvan Muxtar Respublikası Ali Məclisinin keçmiş sədri Vasif Talıbovun tutduğu vəzifədən azad edilməsindən sonra onun yaxın çevrəsinin də neytrallaşdırılmasına start verildi.

Xatırladaq ki, Vasif Talıbovun oğlu Seymur Talıbov Naxçıvan Dövlət Universitetindən tutduğu prorektor vəzifəsindən uzaqlaşdırıldı, qızı Baharxanım Talıbova "Naxçıvanbank” ASC-nin Müşahidə Şurasının üzvlüyündən çıxarıldı və s. Bundan başqa, keçmiş Ali Məclis sədrinə yaxın bəzi vəzifəli şəxslərin, o cümlədən Sədərək Gömrük Postunun rəisi Nicat Mahmudovun karyerasına son qoyuldu.

Nicat Mahmudovdan sonra belə təəssürat yaranmışdı ki, prosesə ara verilib. Lakin Ordubad rayonunun icra başçısı Elşad Məmmədovun işdən çıxarılması göstərdi ki, Muxtar Respublikanın Talıbov və onun adamlarından təmizlənməsi davam edir.

Məlumat üçün deyək ki, Elşad Məmmədov 2013-cü ildə Ordubadın icra başçısı təyin olunmuşdu. Ondan əvvəl bu vəzifəni Elşad Əliyev tutub. O, 2013-cü ildə Vasif Talıbovun sərəncamı ilə Muxtar Respublikanın kənd təsərrüfatı naziri təyin edilib. Bu təyinatdan sonra Elşad Məmmədov Ordubadın rəhbərliyinə gətirilib və bunda Vasif Talıbovun xüsusi rolub olub.

Ümumiyyətlə, Naxçıvanla bağlı məlumatlı olan şəxslər deyir ki, Muxtar Respublikada yüksək vəzifə daşıyanlar Vasif Talıbova yaxın ətrafına daxil olan kadrlar olub. Bu baxımdan, Naxçıvanda təmizləmələrin davam edəcəyi şübhəsizdir.

İddialara görə, paralel olaraq Talıbovun 27 illik fəaliyyəti də araşdırılır. Naxçıvanda onun adamları vəzifələrdən uzaqlaşdırıldıqdan sonra keçmiş Ali Məclis sədrinin fəaliyyətinə hüquqi qiymət verilməsi məsələsi gündəmə gələ bilər. //Qaynarinfo//

“Dövlət Miqrasiya Xidməti sahibkarlıqla məşğul olmaq istəyən əcnəbilərə süni maneə yaradır”.

DİA.AZ-ın pravda.az-a istinadən xəbərinə görə, bunu miqrasiya konsaltinq fəaliyyəti ilə məşğul olan Vüqar Zeynalov bildirib.

Onun müraciətini təqdim edirik:

İddia olunanlarla bağlı dia.az olaraq bütün maraqlı tərəflərin mövqelərini işıqlandırmağa hazırıq...