Avropa İttifaqı Ermənistana texniki missiya göndərəcək. Aİ Ermənistanla təhlükəsizlik sahəsində də əməkdaşlığı inkişaf etdirmək barədə öhdəlik götürüb. Bunu Avropa İttifaqının (Aİ) Ermənistandakı Nümayəndəliyinin rəhbəri Vasiliq Maraqos deyib. Avropa Xarici Fəaliyyət Xidməti və Avropa Komissiyasının nümayəndə heyətlərinin Ermənistana səfərini nəticələrini şərh edən diplomatın sözlərinə görə, Brüssel Ermənistan Silahlı Qüvvələrinə humanitar formatda yardım göstərməklə bağlı konkret təkliflər hazırlamaq üçün cari ilin sonu və ya gələn ilin əvvəlində Ermənistana texniki missiya göndərəcək.
Politoloq Natiq Miri "Sherg.az"a açıqlamasında bildirib ki, Ermənistanın "təhlükəsizlik sisteminin möhkəmləndirilməsi" adı altında həyata keçirilən layihə İrəvanı bəzi proseslərdən sığortalamaq məqsədi güdür. Ekspert vurğulayıb ki, bu layihənin maliyyələşməsi Avropa Sülh Fondu tərəfindən reallaşacaq:

"Kimlərsə düşünür ki, Ermənistan konkret maliyyə çərçivəsində hansısa silahlar alacaq. Bu, absurddur. Avropa Rusiyanı Cənubi Qafqazdan və Ermənistandan sıxışdırmağın bədəli kimi üzərinə öhdəliklər götürüb. Qərb gələcəkdə bu istiqamətdə riskləri də nəzərə alır. Rusiya heç də özünün təsir dairəsi saydığı coğrafi ərazidən, öz geosiyasi maraqlarından Qərb dünyası istədi deyə asanlıqla vaz keçməyəcək. Moskva Cənubi Qafqazı özünün təsir dairəsi olaraq görür. Ermənistanın gözlənilən təhdidlərə qarşı daha immunitetli olması üçün orduda müəyyən islahatlar aparılır. Orduda rusyönlü zabitlərin aşkarlanaraq xidmətdən uzaqlaşdırılması, yaxud da cinayət məsuliyyətinə cəlb olunması prosesi gedir. Əlbəttə, prosesin gedişində Ermənistanın işğalçı təfəkkürlə yenidən revanş götürmək cəhdləri də müşahidə oluna bilər. O baxımdan Qərbin Ermənistanı silahlandırması təkcə Rusiya yox, həm də Azərbaycana qarşıdır. Bu məsələ tərəflər arasında gələcəkdə toqquşma riskini də gündəmə gətirir".
Analitik diqqətə çatdırıb ki, Avropa Birliyi bölgədə sülhün bərqərar olması yönündə addımlar atmaq əvəzinə, Ermənistanı silahlandırmaqla, hərbi toqquşmalara təhrik etməklə məşğul olur: "Fransa konkret bununla məşğul olur. Bu da potensial təhlükələr deməkdir. Rəsmi Bakı sülh danışıqlarında bu məqamları nəzərə almalı və İrəvan hökuməti ilə müzakirə predmetinə çevirməlidir. Eyni zamanda Aİ ilə danışıqlar aparmalı və Avropanın enerji təminatı fonunda Azərbaycanla bağlı ciddi təminat alınmalıdır. Əgər Avropa Azərbaycanla əməkdaşlıqda maraqlıdırsa, hansısa ölkəni bizə qarşı silahlandıra bilməz".

NATO-nun baş katibi Yens Stoltenberqlə son müsahibə alyansın uğursuzluğa görə Ukrayna prezidenti Vladimir Zelenskini günahlandırmaq qərarını nümayiş etdirir.

Bu barədə Fransa Vətənpərvərlər Partiyasının rəhbəri Florian Filippo bildirib.

"Zelenski üçün pis günlər başlayır. NATO rəhbəri Yens Stoltenberqin Almaniya telekanalına müsahibəsində dedikləri həqiqətən də ağlasığmazdır. NATO ölkələrinin uğursuzluğuna görə Zelenski "kuklası"nı günahlandırmağın vaxtı çatıb. Dərin dövlət həmişə etdiyi şeyi edir. Bir kukla yaradır və sonra onu içəri atıb məhv edir. Fransa Kiyevə pul və silah göndərməyi dayandırmalıdır", - Filippo vurğulayıb./teleqraf.com

HƏMAS hərəkatının hərbi qanadı İzzəddin Əl-Qəssam Briqadası Təl-Əvivə raket zərbələri endirib.

Bu barədə HƏMAS-ın hərbi qanadı açıqlama yayıb.

“Əl-Qəssam Briqadası sionistlərin mülki əhalini qətlə yetirməsinə cavab olaraq Təl-Əvivə raket zərbəsi endirib”, - məlumatda qeyd edilib.

Noyabrın 23-də Minskdə keçirilən KTMT sammitindən sonra Belarusun xarici işlər naziri Sergey Aleynik bəyan etdi ki, sammitdən sonra KTMT Baş katibi İmanqali Tasmaqambetov Ermənistana səfər edəcək və sammit zamanı qəbul olunmuş qərarları Ermənistana gətirəcək ki, Ermənistan da onları imzalasın. Sammitin başa çatmasından bir həftədən çox vaxt keçsə də, Tasmaqambetov Ermənistana səfər etməyib. Əldə etdiyimiz məlumata görə, Ermənistan hakimiyyəti Tasmaqambetovla görüşmək niyyətində deyil.

Bu sözləri erməni ekspert Avetis Babacanyan qeyd edib.

O bildirib ki, KTMT-yə üzv dövlətlər, ümumiyyətlə, çıxılmaz vəziyyətə düşüblər:

“Bu da Ermənistanın mövqeyi ilə bağlıdır. Bir tərəfdən KTMT-nin nizamnaməsində üzv dövlətin çıxarılması proseduru nəzərdə tutulmayıb, çünki Ermənistan KTMT-nin həmtəsisçisidir, məsələn, Rusiya kimi, digər tərəfdən Ermənistan KTMT-dən çıxa bilər, amma bunu etmir, ancaq təşkilatın fəaliyyətini boykot edir.

KTMT-də qərarlar konsensusla qəbul edilir. İndi KTMT-nin Belarusda keçirilən sammitində Ermənistanın razılıq vermədiyi, imzalamadığı qərarlar qəbul edildi. KTMT bu məsələni başqa cür həll etmək qərarına gəlib: Tasmaqambetov həmin sənədlər paketini Ermənistana gətirəcək, Nikol Paşinyan isə Ermənistanda imzalayacaq və onlar qanuni qüvvəyə minəcək. Amma Paşinyan Tasmaqambetovu qəbul etməkdən imtina edirsə, bu o deməkdir ki, o, həmin sənədləri imzalamağa hazırlaşmır, bununla da nəinki həmin konkret sənədləri, ümumiyyətlə, strukturu qeyri-legitimləşdirir. Ermənistan hakimiyyətinin bu cür davranışının səbəbi nədir?

Əvvəldən belə bir fikir var idi ki, Nikol Paşinyan Ermənistanı KTMT-dən çıxarmaq məsuliyyətini öz üzərinə götürmək istəmir və Ermənistanla bağlı KTMT-də hansısa qərar qəbul etmək istəyir”.

Onun sözlərinə görə, Paşinyan Ermənistanı daha təhlükəli oyuna sürükləyir, o, KTMT-ni legitimlikdən çıxarmaq, gülüş obyektinə çevirmək üçün hər şeyi edir:

“NATO-Rusiya qarşıdurmasının indiki mərhələsində Paşinyan Rusiyanın nə qədər qeyri-ciddi və nüfuzsuz olduğunu, onun rəhbərlik etdiyi blokun hətta hüquqi qərarlar qəbul etmək iqtidarında olmadığını, həmin blokun üzvlərinin də o bloka qarşı çıxdığını öz davranışı ilə göstərir.

Belə bir şəraitdə Rusiyanın Ermənistana qarşı siyasətini günü-gündən sərtləşdirməsi qəribə deyil, baxmayaraq ki, açıq iqtisadi müharibə elan etmir. Rusiya və ölkə rəhbərliyi Nikol Paşinyanın dekabrın sonunda Sankt-Peterburqda keçiriləcək Aİİ və MDB liderlərinin qeyri-rəsmi toplantısında iştirak edəcəyinə ümid edir. Rusiya Prezidentinin müşaviri Yuri Uşakov hətta İrəvandan Paşinyanın onlarda iştirak edə biləcəyi ilə bağlı müsbət siqnallar aldıqlarını bildirib. Amma Paşinyanın açıq antirusiya siyasəti onun Rusiyaya getməyəcəyinə heç bir şübhə yeri qoymur, çünki onun nə Rusiya hökumətinə, nə də Aİİ üzvü olan ölkələrə deyəcək sözü var. Məsələn, Rusiya prezidenti Ermənistan hakimiyyətinin bu cür açıq-aşkar antirusiya davranışının səbəbini soruşanda, nə cavab verməlidir və ya Rusiya hakimiyyəti Ermənistandan KTMT-dən çıxdığını elan etməyi tələb edərsə, nə cavab verəcək?”

Mən Vladimir Zelenskinin yenidən prezident olmasını istəmirəm. Bu, mümkün deyil.

Bu sözləri Ukrayna liderinin həyat yoldaşı Yelena Zelenskaya “Ekonomist” nəşrinə müsahibəsində deyib.

“Ola bilsin ki, gələcəkdə yeni nə isə düşünə bilərik”, - deyə Zelenskaya bildirib.

Qeyd edək ki, Ukrayna Ali Radası 2024-cü ildə prezident seçkilərinin təxirə salınması ilə bağlı qərar qəbul edib.

Türkiyədə qəza keçirərək həlak olan boksçu Görkem Kaynarın ürəyi azərbaycanlı tələbəyə köçürülüb.

Bu barədə Türkiyə mətbuatı məlumat yayıb.

Avtomobil qəzasında ölən 24 yaşlı idmançının orqanları ailəsi tərəfindən ehtiyacı olanlara bağışlanıb.

Boskçunun ürəyi isə Akdeniz Universitetinin Xəstəxanasında 6 ildir ki, ürək çatışmazlığına görə müalicə alan Fərid Əzimli adlı azərbaycanlı tələbəyə köçürülüb. Əməliyyat 4 saat çəkib. Tələbənin vəziyyəti hazırda yaxşıdır.

Qeyd edək ki, Görkem Kaynar noyabrın 20-si Isparta – Eğirdir yolunda qəzaya düşmüşdü. O, 4 gün sonra xəstəxanada vəfat edib.

Rusiya Federasiyasının Ali Məhkəməsi cümə axşamı Ədliyyə Nazirliyinin beynəlxalq LGBT hərəkatının ekstremist kimi tanınması ilə bağlı iddiasını təmin edib.

“Beynəlxalq ictimai LGBT hərəkatını ekstremist təşkilat kimi tanıyın və onun Rusiya ərazisində fəaliyyətini qadağan edin”, - hakim Oleq Nefedov qərarı elan edib.

Məhkəmə iclası bağlı qapılar arxasında keçirilib.
Bildirilib ki, məhkəmə qərarı vətəndaşların şəxsi həyatın toxunulmazlığı hüququna təsir göstərmir və heç bir mənfi hüquqi nəticələrə səbəb olmayacaq. Məhdudiyyətlər LGBT təbliğatı, reklam, cəlbetmə və LGBT hərəkatında iştirak qadağasına riayət etmək zərurəti ilə bağlıdır.

Mənbə: İnterfaks

“Kontakt Home” mağazalar şəbəkəsindən may ayında kondisioner alan vətəndaş peşman olub. Alınan gündən problemi olan kondisiner dəfələrlə rəsmi servisə göstərilsə də problemi aradan qalxmayıb. Mağaza isə vətəndaşa satdığı yararsız məhsuldan boyun qaçırır.

Tribunainfo.az-a yazan şikayətçi Ziyad Hüseynov bildirib ki, mağaza satdığı məhsula görə məsuliyyəti boynundan atır:

“29 may 2023-cü il tarixdə “Konta

kt Home” mağazalar şəbəkəsinin Azadlıq prospektində yerləşən mağazasından həyat yoldaşım Hüseynova Vəfanın adına Birkartla dəyəri 1549,99AZN olan bir ədəd LG markalı 60m² – lik kondisioner aldıq. Dükan işciləri kondensioneri quraşdırdı. Yay mövsümündə işləyən zaman kondisionerdə arabir titrəmə səsi gəlirdi. Bunun qarsısını almaq üçün çöl blokun kronşteynə bağlanan yerlərinə rezin qoydum, lakin heç bir köməyi olmadı.
Soyuqlar düşdükdən sonra mən onu isti rejimdə işlətməyə başladım, bu zaman çöl blokdan mənzilin içərisinə sirayət edən uğultu səsi eşidilirdi. Bu səs bizim üçün narahatlıq yaradırdı.
“Kontakt Home”un servis xidmətinə müraciət etdim,tələb etdim ki, problemi aradan qaldırsınlar. Həmin servisdən gələn əməkdaşlar dedilər ki, bu hava süzgəcindəndir, süsgəci təmizləyib yerinə qoydular, lakin heç bir effekt vermədi.
Bir neçə gündən sonra servisdən yenə gəldilər və dedilər ki, quraşdırma vaxtı səhvə yol verilib, çöl blokla iç blok arasındakı birləşmə boruları qısadır. Çoxsaylı müraciətlərdən sonra mağazadan gəlib boruları uzadıb getdilər, amma yenə heç bir effekt vermədi. Mənim təkrar müraciətimdən sonra “Kontak Home” rəsmi srvisin əmakdaşları gəlib mikrofonla səsin səviyyəsin öçdülər və qeyd etdilər ki, mənzildə kondisionerdən gələn səsin səviyyəsi norma daxilindədir və uğultu səsi eşidilir. Bununla bərabər dedilər ki, bu inentor tipli kondisionerlər belə işləyir və getdilər. Bu cavab əlbəttə məni qane etmədi, uğultu səsi davam edirdi!
Mağazanın Emil adlı vətəndaşına yaxınlaşıb bildirdim ki, ya problem aradan qaldırılsın, ya da məhsul yenisi ilə əvəz edilsin. Bundan sonra bizə yenə servis əməkdaşı göndərdi və onlar təsdiq etdi ki, problem var. Bunun anormal olduğunu bildirdi və akt yazdı. Dəfələrlə olan müraciətlərimə ğazadan bildirdilər ki, mənə heç bir köməklik edə bilməyəcəklər. Bu mağazalar şəbəkəsinin dələduzluğuna son qoyulmalıdır”.(Tribunainfo.az)

Xəbər verdiyimiz kimi, Qarabağdan qovulmuş separatçıların “keçmiş müdafiə naziri” Samvel Babayan dünən Ermənistan parlamentinin 44 günlük müharibə şəraitini araşdıran İstintaq Komissiyasında ifadə verib.

Modern.az xəbər verir ki, “Hraparak”ın məlumatına görə, Samvel Babayan 3 saata yaxın davam edən dindirmə zamanı Qarabağdan qovulmuş separatçıların rəhbərləri əleyhinə danışıb.

Belə ki, o, komissiya üzvlərini inandırmağa çalışıb ki, qondarma "Artsax"ın sonuncu başçısı Samvel Şahramanyan separatçıların keçmiş rəhbərləri vasitəsilə Ermənistanda planlaşdırılmış “hakimiyyət dəyişikliyi”nin həyata keçirilməsinə razılaşıb.

Samvel Babayan qondarma “Artsaxın keçmiş prokuroru və dövlət naziri” Qurgen Nersisyanı “yalançı”, “fırıldaqçı” və “axmaq” adlandırıb. O, “Artsax prokurorluğu”nda dindirildiyi barədə Nersisyanın iddialarını rədd edib.

Nersisyan isə Samvel Babayanın ittihamlarını eşidəndən sonra onu “yalançı” adlandırıb.

Qurgen Nersisyan deyib ki, Babayan dindirilib və buna dair faktlar var: “Babayan ümid edir ki, biz həmin cinayət işinin materiallarını tamamilə yandırmışıq. Amma yanılır, həmin materialların elektron, rəqəmsal variantları da mövcuddur. Mən onları rəqəmsallaşdırmışam. Əminliklə deyirəm ki, Babayan dindirilib”.

Nersisyanın sözlərinə görə, S. Babayan 44 günlük müharibə və 2020-ci il noyabrın 9-da imzalanmış üçtərəfli bəyannamə ilə bağlı başlanmış cinayət işi çərçivəsində qondarma “Artsaxın təhlükəsizlik şurasının keçmiş katibi” kimi dindirilib. Nersisyan Babayanın ifadəsindən diqqət çəkən epizodu danışıb.

“44 günlük müharibə zamanı o, “təhlükəsizlik şurasının katibi” olub, Babayanı dindirməyə çağırmışdıq. Müharibə bitəndən sonra ağlına nə gəldi danışırdı. O, hər şeyə görə günahı başqalarının üzərinə atıb”.

Nersisyanın sözlərinə görə, separatçıların ordusunun cənub qanadı keçirilən əməliyyatlarda uğursuqıluğa düçar olubsa, burada Samvel Babayanın da böyük məsuliyyəti var. O, Babayanı Hadrut və Şuşanın itirilməsinə görə də günahlandırıb.

C. Nersisyanın fikrincə, S.Babayan “təhlükəsizlik şurasının katibi” kimi Paşinyana və Arayik Arutyunyana deyə bilərdi ki, cənub istiqamətində aparılan əməliyyat fəlakətlə nəticələnə bilər, səhvdir, bunu etməyin.

"Dindirilmə zamanı Babayandan soruşduq: “Siz o əməliyyatın qarşısını almaq üçün nə etmisiniz? Deməyə səlahiyyətiniz var idimi ki, dostlar, səhv edirsiniz?". "Təhlükəsizlik şurası"nda çox məsələlər müzakirə olunur, o, fikrini müharibədən sonra, hər şey əldən gedəndə deyil, elə o vaxt deməli idi.
Cənub cinahının müdafiəsi və əks-hücum üçün hazırlanmış əməliyyat nəticəsində biz “Artsax”ın bütün cənub qanadını itirdik, azərbaycanlılar Hadrut ərazisinə daxil oldu, irəlilədi. Sonra Şuşa şəhərini tutdu. Bu günə qədər o uğursuz əməliyyata görə heç kim məsuliyyətə cəlb edilməyib”.

Sumqayıtda güllələnmə hadisəsində yaralanan Türkiyə vətəndaşı bu gün ölüb.

Ötən ay Sumqayıtda silahlı basqın zamanı yaralanan Türkiyə vətəndaşı Sərkan Karakaş bu gün xəstəxanada vəfat edib.

S.Karakaş ötən gün axşam saatlarında Türkiyədəki xəstəxanalardan birinə köçürülmüşdü.

Xatırladaq ki, oktyabrın 28-də saat 05:50 radələrində Sumqayıt şəhərinin Corat bağları yaşayış massivində yerləşən fərdi yaşayış evlərindən birində odlu silahdan açılan atəş nəticəsində 2 nəfər - Susana Karakaş və Dağbəyi Fərəcov ölüb, 4 nəfər isə xəsarət alıb. Susana Karakaş Sərkan Karakaşın həyat yoldaşı idi.