Milli Məclisin deputatı İqbal Məmmədovun “Lerik broyler”lə bağlı yalanı üzə çıxıb.

Lerik rayonunun Piran kəndində yerləşən “Lerik broyler”də kəsilən toyuqların qanının çaya axıdılması narazılığa səbəb olub. Sosial şəbəkələrdə bildirilib ki, bu, təbiətə düşmən kəsilməkdir. Sadə vətəndaş etsəydi, məsələ heç ictimailəşməmiş cəza tədbiri görülərdi. Bunu hansısa məmura, deputata yaxın şəxs edəndə isə yüngül cərimə ilə “canını qurtarır”.

Bu broyler şirkətində də eyni hal yaşanıb. Üstəlik İqbal Məmmədov mətbuata açıqlama verərək iddiaların həqiqəti əsk etdirmədiyini bildirib. Həmişəki kimi… Mövqeyə diqqət edək:

“Bir neçə gündür ki, sosial şəbəkələrdə və saytlarda mənim və iş adamı olan qardaşım haqqında həqiqəti əks etdirməyən, yalan məlumatlar yayılmaqdadır. Çox təəssüf edirəm ki, bu xəbərləri tirajlayan mətbuat işçiləri istehsal prosesini görmədən, nə vaxtsa orada işləmiş, işində dələduzluq etmiş və işdən qovulmuş insanların paylaşımına istinad edərək iş adamının işgüzar fəaliyyətinə xələl gətirən yazılar dərc etməklə ictimaiyyəti çaşdırmağa çalışırlar. Bir daha diqqətə çatdırmaq istəyirəm ki, Lerik rayonunda 200 nəfərə qədər işçisi olan, illik 5000 ton istehsal gücü ilə tanınan, ən müasir istehsal modelləri ilə təmin olunmuş quş əti istehsal edən “Lerik Broyler” MMC fəaliyyət göstərir. Bu da Lerik rayonunda özəl olaraq dövlət dəstəyi ilə inşa olunmuş yeganə böyük müəssisədir. Müəssisənin inşasından bu günə kimi bütün fəaliyətini dərindən bilən şəxs olaraq reallığı sizə bildirməyi özümə borc bilirəm və bu günə kimi bütün mətbuata istehsal prosesini canlı olaraq görməkdən ötrü qardaşım Çingiz Məmmədovun adından hər birinizi müəssisəyə dəvət edirəm. Şəkildəndə görunür ki, 10 il qabaq çəkilmiş bu feyk videoda axıdılan su, kol-kos olmayan və qırmızı rənglə montaj olunmuş bir səhnədir. Real şəkil isə 2023-cü ildə Ekologiya və Təbii Sərvətlər Nazirliyinin nümayəndələri tərəfindən növbəti yoxlama zamanı çəkilmiş qrunt sularının borulardan axan şəklidir. Yazılanların əksinə olaraq bildirmək istəyirəm ki, Toyuq kəsimi zavodunun bütün bölümlərində əmələ gələn tullantılar atqı hovuzuna axıdılır və buradan da xüsusi pompalar vasitəsi ilə Ekologiyanı qorumaqdan ötrü, Azərbaycanda ilk olaraq “Lerik Broyler” MMC tərəfindən idxal olunmuş ən yeni texnologiya ilə quraşdırılmış Rendrinq sexinə ötürülür. “Lerik Broyler” MMC-yə məxsus Kəsim zavodunun istehsalat prosesində yaranan qan, qan vannasından xüsusi pompa vasitəsi ilə paslanmaz çənə yığılır. Yığılmış qan, xüsusi pompalar vasitəsi ilə rendrinq sexinin bişirmə qazanına ötürülür. Kəsim zavodunun tullantıları (toyuq başı, ayağı, tükü, içalatı və istifadə edilmiş su) xüsusi pompa vasitəsilə rendring sexinin separatorundan keçirilərək xüsusi rezervuara (70 ton tutumu olan bunkerə), oradan isə helezonlar vasitəsi ilə bişirmə qazanına ötürülür (5 ton tutumlu). Rendring sexinin bişirmə qazanında yüksək təzyiq (6 bar) və temperatur (860 dərəcə) altında tullantılar və qan qarışdırılıb bişirilərək un halına gətirilir. Kəsim zamanı istifadə olunmuş su və orqanik maddələrin tərkibində olan su yüksək temperatur nəticəsində buxarlanır. Hazır olunmuş un məhsulu öncə qarışdırıcı bunkerə, sonra helezon vasitəsilə metal detektordan keçirilir və sonra pres qurğusuna ötürülür. Müasir texnologiyalar əsasında istehsal prosesindən keçərək alınmış məhsul xüsusi presdə sıxılaraq yağı çıxarılır və sonda toyuq yağı və toyuq unu əldə olunur. Yağdan ayrılmış un helezon vasitəsilə soyuducuya ötürülür. Soyuducuda tempetatur aşağı salınandan sonra helezon vasitəsilə qırıcı-dəyirmana ötürülür. Qırıcı-Dəyirmandan keçmiş un helezon vasitəsilə torbalama bunkerinə ötürülür. Torbalanmış un və əldə edilmiş yağ, balıq yemi istehsalında yüksək proteinli məhsul kimi istifadə olunur. Bişirmə prosesindən yaranan buxar, əmələ gələ biləcək iy və qoxunun qarşısının alınması üçün xüsusi kompressorlar vasitəsilə çox pilləli atsorbentlərdən keçirilir. İstehsalda istifadə olunan buxar ilk öncə siklon tankından keçir, oradan isə 2 ədəd soyuducu kondisionerdən və atsorbenlərdən keçirilir. Bu proses vasitəsilə buxardan alınmış suyun içində olan qoxu neytralaşdırılır. Su borusu vasitəsilə 3 ədəd çökdürücü şambodan keçir. Kəsim sexinin yerləşdiyi ərazi, kəndin qalan ərazisi nisbətində çökəkdə yerləşdiyindən, kənd ərazisində olan bütün qrunt sular, süni kanallar və dərələrdə olan sular Kəsim sexinin ərazisi istiqamətində hərəkət etdiyindən, ərazini qorumaq məqsədilə kəsim sexinin ətrafında drenaj sistemi quraşdırılıb. Drenaj sistemi vasitəsilə kənd ərazisində olan və kəsim sexi istiqamətində toplanan qrunt sular, kanallar və dərələrdən yığılıb gələn sular boru vasitəsilə çaya yönləndirilir. Bildirmək istəyirik ki, sözü gedən borudan çıxan suyun həmin müəssisənin Kəsim sexinin istehsalatına heç bir aidiyyəti yoxdur. Bütün bunları yazmaqda əsas məqsədimiz Lerikdə yerləşən Toyuq kəsimi zavodunun Ekologiyamıza heç bir mənfi təsirinin olmamasını izah etməkdən ibarətdir. Ekologiyamızı qorumaq hər birimizin borucudur”.

Deputatın sözlərindən belə məlum olur ki, müəssisədə heç bir nöqsan aşkarlanmayıb. İndi isə Ekologiya və Təbii Sərvətlər Nazirliyinin tabeliyində olan Dövlət Ekoloji Təhlükəsizlik Xidmətinin rəsmisi Bəhruz Məhəmmədovun mətbuata açıqlaması ilə tanış olaq: “Lerik rayonunun Piran kəndi ərazisində fəaliyyət göstərən “Lerik Broyler” Məhdud Məsuliyyətli Cəmiyyətində (MMC) ətraf mühitin mühafizəsi haqqında qanunvericiliyin tələblərinə riayət olunması vəziyyəti Dövlət Ekoloji Təhlükəsizlik Xidmətinin əməkdaşları tərəfindən yerində araşdırılıb. Araşdırma zamanı “Lerik Broyler” MMC-nin fəaliyyəti ilə əlaqədar bir sıra çatışmazlıqlar və nöqsanlar aşkar edilərək aktlaşdırılıb. Hazırda araşdırma materialları aidiyyəti dövlət orqanları ilə birlikdə təhlil edilir və təhlillərin nəticəsindən asılı olaraq “Lerik Broyler” MMC barəsində qanunamüvafiq tədbirlər görüləcək”.

Avqustun 1-də məlumat vermişdik ki, “Lerik Broyler” Məhdud Məsuliyyətli Cəmiyyətinə cərimə protokolu yazılıb. MMC-yə müvafiq qurum tərəfindən yazılan protokol İnzibati Xətalar Məcəlləsinin 233.1-ci (Ətraf mühitə atılan, axıdılan və ya basdırılan zərərli maddələrin miqdarının yol verilə bilən normativlərdən artıq olmasına görə vəzifəli şəxslər iki min beş yüz manatdan dörd min manatadək məbləğdə, hüquqi şəxslər on min beş yüz manatdan on iki min beş yüz manatadək məbləğdə cərimə edilir) maddəsinə əsasən tərtib olunub. İş Lerik Rayon Məhkəməsinin hakimi Atabəy Kiçikbəyovun icraatında olub.

Bu faktlar kifayət etdimi deputatın dediklərinin həqiqətəuyğun olmadığını üzə çıxarsın. Bu ilk belə hal deyil.

Xatırlayırsınızsa, İqbal Məmmədov 2019-cu ildə də “Relax” istirahət mərkəzində baş verən hadisədə, hətta videokadrlar ola-ola deyirdi ki, yalandır, oğlu vergi xidmətinin işçilərini döyməyib.

Sonradan oğlu Mirhəmid Nərimanlı və digərləri saxlanıldı, müvafiq tədbir görüldü.

“Bir deputata bizneslə məşğul olmaq qadağandır” kimi müzakirələri isə açmaq niyyətində deyilik. Çünki bununla bağlı kifayət qədər etiraz, irad bildirilib, amma nəticə yoxdur. Burada isə söhbət bir deputatın həqiqəti deməyə meyilli olmamasındadır. Axı siz həm də seçiciləri təmsil edirsiniz. Açığı bilmirik, onlar İqbal Məmmədova inanır, ya yox…Pravda.az

Ucar rayon sakinləri Vətən müharibəsi Qaziləri tərəfindən ölkə rəhbərliyinə müraciət ünvanlanıb. Bir nüsxəsi də DİA.AZ-a daxil olan müraciətdə deyilir:

"Bu şikayət ərizəmizdə yazıb Sizə bildiririk ki, Yevlax Qeydiyyat İmtahan və Texniki Baxış İdarəsinin rəisi Cavanşir Vəliyev vəzifəsindən sui-istifadə edərək korrupsiya əməlləri ilə məşğul olur.
Belə ki, biz özümüzə məxsus avtomobili 17 avqust 2023-cü il tarixdə qeydiyyata aldırmaq üçün Yevlax Qeydiyyat İmtahan və Texniki Baxış İdarəsində olduq.Bizdən avtomobili qeydiyata almaq üçün 200 manat məblğində pul alsalarda qəbz təqdim etmədilər.Həmdə biz orada 5 saatdan çox gözləməli olduq.Çünki ilkin olaraq bizdən 400 manat pul istənilmişdir.Həmin pulu verə bilməyəcəyimizi dedikdən sonra bizi 5 saatdan çox orada gözlətdilər.Hansı ki, şəhid ailələri və Qarabağ müharibəsi əlilləri növbədən kənar qəbul edilməlidirlər.
Biz hər ikimiz Vətən müharibəsində yaralanıb əlil olmuşuq.Dövlətin verdiyi təqaüd bizim müalicələrimizə və dərmanlarımıza güclə çatır ancaq Yevlax Qeydiyyat İmtahan və Texniki Baxış İdarəsinin rəisi Cavanşir Vəliyev bunu nəzərə almadan korrupsiya əməlləri ilə məşğul olur.
Qanuna müvafiq qaydada Mersedes markalı 90 RF 783 nömrəli avtomobil aşağı rüsümla qeydiyata alınmalıdır.
Aidiyyatı mərkəzi orqanlardan xahiş edirik şikayətimizi obyektiv araşdırıb vəzifəsindən sui-istifadə edib korrupsiya əməlləri ilə məşğul olan Yevlax Qeydiyyat İmtahan və Texniki Baxış İdarəsinin rəisi Cavanşir Vəliyevin barəsində qanunu tədbirlər görəsiniz".

İddia olunanlarla bağlı olaraq qarşı tərəfi də dinləməyə hazırıq...

Diqqətli oxucuların yaxşı yadında olar. Ki, cənab Prezident İlham Əliyev Bakı Beynəlxalq Dəniz Ticarət Limanının tikintisinin gedişində meydana çıxmış problemlər barədə çox kəskin danışmışdı və demişdi: “ Bəzi icraçılar bu məsələyə çox laqeyd yanaşmışlar, baxmayaraq ki, dövlət vəsaiti ayrılıb, bu, dözülməzdir. Ona görə, əgər o məsuliyyəti dərk etmirlərsə, dövlətin verdiyi sifarişi yerinə yetirməyə laqeydlik göstərirlərsə, bundan sonra dövlət sifarişlərindən məhrum ediləcəklər, qoy bunu bilsinlər. Ələt Beynəlxalq Dəniz Limanının birinci mərhələsi bütün avadanlıqlarla, kranlarla təmin edilməlidir, əks halda özlərindən küssünlər".
Bəli, cənab Prezident öz çıxışında “Evrascon” ASC-yə kəskin iradlarını bildirmişdi. İndi gəlin görək, Prezidentin “özündən küssün..” dediyi "Evrascon" ASC (Əvvəlki adı "Azərkörpü" ASC) kimindir?
Azərbaycan mətbuatı dəfələrlə yazıb ki, bu şirkət sabiq baş nazirin müavini Abid Şərifovun ailə şirkətidir. Ancaq “Evrascon" ASC-nin icraçı direktoru uzun müddət Manaf Şirinov olub. Qısa məlumat üçün bildirək ki, 1968-ci ildə Bakı şəhərində SSRİ Nəqliyyat Tikintisi Nazirliyinin nəzdində yaranmış «Körpütikintidəstəsi-100» kimi fəaliyyətə başlayan qurum 2001-ci ildə keçirilmiş özəlləşdirmədən sonra “Azərkörpü”yə çevrilib, Açıq Səhmdar Cəmiyyəti statusu alıb.
2013-cü ildə isə “Azərkörpü” ASC rebrendinq elan etdi və öz adını Avro-Asiya İnşaat Korporasiyası “Evrascon” adı ilə əvəz etdi. Manaf Şirinovun mətbuata dediyinə görə, guya adın dəyişməsinin səbəbi şirkətin yaxın və uzaq xarici ölkələrdə gördüyü mühüm işlərdir. Manaf Şirinova deyən yoxdur ki, təkcə Qazaxstanda gördüyünüz tikinti işlərində milyonlarla maxinasiyalar olmuşdu. Budur, sizin uğurunuz..?
Bəli, Manaf Şirinovun şirkəti Qazaxıstanda, Özbəkistanda, Moldovada, Rusiyada, Ukraynada gördüyü bütün tikinti işlərində həmişə ciddi maxinasiyalara yol verib. Çoxları düşünə bilər ki, Manaf Şirinov bu layihələri necə əldə edib..? Əslində, biz həmişə yazırıq ki, böyük şirkətlərin arxasında iri məmurlar olmasa, həmin şirkətlər 1 ay da ayaqda dayana bilməz. Və həmin layihələri də Abid Şərifov öz əlaqələri vasitəsilə əldə edirdi. Bəlkə Qaradağda limanın tikintisini, yaxud Kür çayı üzərindəki körpünün tikintisini Manaf Şirinov özü əldə etmişdi..?
Manaf Şirinova Kür çayının üzərində tikdiyi körpünün bir neçə ay sonra təmirə dayanmasını xatırlatmaq lazımdır. Manaf Şirinov təkcə dövlətə deyil, həm də Azərbaycan təbiətinə milyonlarla ziyan vurmuşdu. Manaf Şirinov uzun illər milyonlarla vergidən yayınıb və Abid Şərifovun hesabına canını ödəmədiyi vergi borclarından qurtara bilib.
Vaxtilə Manaf Şirinov maşın, avadanlıq, texnika almaq adı ilə milyonlarla manipulyasiya edib. Hətta Almaniyada yaşayan polis rəisi qardaşının işlərinə də yarayıb. Bu, başqa bir yazının mövzusudur.
Bir sözlə, Abid Şərifovun ailə şirkəti hesab olunan "Avro-Asiya İnşaat Korporasiyası Evrascon” ASC kifayət qədər dövlət vəsaitini mənimsəyib. Hətta Manaf Şirinovun bir müddət həbsdə saxlanılması barədə də mediada xəbərlər yayılıb. Amma sonradan Abid Şərifovun hesabına onu sərbəst buraxıblar. Manaf Şirinovun əməlləri barədə yazmaqla qurtaran deyil.
Hazırda Manaf Şirinov şirkətini başqa adla, "İNTER TEXNİKA" MMC adı ilə işlədir. Şirkəti isə onun oğlu Samir Şirinov idarə edir.
Samir Şirinovun müavini isə Azad Qasımovdur. Azad Qasımov hər yerdə deyir ki, Samir Şirinov kimdir ki, şirkətin əsl sahibi mənəm. Azad Qasımov deyir ki, Samirin tikintidən, inşaat işlərindən başı çıxmır, amma mən...
Bəli, Azad Qasımov restoranlarda pul səpir və fəxrlə dosatlarına deyir ki, Füzuli Hava Limanını mən tikmişəm, Qarabağın, Cəbrayılın bütün abadlıq və tikinti işləri mənə tapşırılıb. Azad Qasımovdan soruşan yoxdur ki, restoranlarda səpələdiyin dollarları necə və hansı yolla qazanmısan..? Azad Qasımovun gecə klublarında kimlərin harasınasa soxduğu dollarları görəndə adam düşünür ki, belələrinə Qarabağın, Cəbrayılın, Laçının quruculuğunu etibar etmək olarmı..?
Bax, əsas məsələ budur. Bir də yaxşı olar ki, cənab Abid Şərifov bu susqunluğa son qoyaraq məsələyə münasibətini bildirsin.

Ekologiya naziri Muxtar Babayevin başı hara və nəyə qarışıb...? Ulu Öndərin illər öncə təbiətimizlə, meşələrimizlə, ümumiyyətlə, ağacların qırılması, təbiətə münasibətlə bağlı dediyi “Bu ağacları kəsənlər elə bil mənim balamın başını kəsib” kimi ən sərt fikirlərə baxmayaraq bu gün də təbiətimizə qarşı qəddar və amansız münasibət davam edir. Ulu Öndər təkcə ağacdan, koldan bəhs etmirdi ee...
Ümumiyyətlə, TƏBİƏTƏ münasibətdən bəhs edirdi. TƏBİƏT təkcə ağaclar deyil, meşələrdir, göllərdir, dənizdir, dağlardır, çaylardır, torpaqdır, havadır, sudur və s. Dənizi hasarlayıb özü istədiyi kimi istifadə edir, dənizə tullantı axıdır, dənizin qumunu aparıb maşın-maşın satır... Yaxud dağların üstündə daş karxanası qurub min illik dağları doğrayıb mişar daşı eləyir və satıb pul qazanır... Yaxud meşələrdəki min illik ağacları doğrayıb mebel sexlərinə satır... Yaxud çayların yatağındakı qumu, çınqılı, xırda daşları maşınlara yükləyib Bakıya gətirib satırlar...
Sözün qısası, təbiətə bu amansız münasibətə görə, bir gün təbiət bunun qisasını bizdən alacaq. Ona görə də, Ulu Öndər o dərəcədə sərt və kəskin formada deyirdi... Bəli, bu gün min illik çayların məcrasını-yatağını dəyişib qum-çınqıl karxanası işlədənlər var. Kimlərsə milyonlar qazanır, amma itirən Azərbaycan təbiəti olur.
Neçə illərdir ki, Ekologiya və Təbii Sərvətlər Nazirliyi, guya, bu problemlərlə bağlı mübarizə aparır. Amma hamısı görüntü xatirinədir. Uzun illər Ekologiya naziri olan tarix müəllimi Hüseynqulu Bağırov təbiətimizin hesabına milyonlara sahib oldu, özünün, bacısının və oğlunun hotelləri, universiteti, beton zavodları və daha nələri...
Ondan sonra Ekologiya naziri olan Muxtar Babyev də eyni yolla gedir və öz sərvətini artırmaqla məşğuldur. Arada özlərini elə göstərirlər ki, guya, bu qanunsuz daş, qum, çınqıl karxanalarına qarşı mübarizə aparırlar. Amma... Əmması odur ki, bir müddət əvvəl mediada oxuduq ki, Ekologiya və Təbii Sərvətlər Nazirliyinin (ETSN) Dövlət Mineral Xammal Ehtiyatlarından İstifadə Agentliyi İmişli rayonunda çay məcralarında yerləşən qum-çınqıl karxanalarının fəaliyyətinin monitorinqini həyata keçirib.
İmişli rayonunda yerləşən qum-çınqıl yataqlarının ərazilərində keçirilən yoxlamaların nəticəsində məlum olub ki, yerin təkindən istismar qaydalarına riayət olunmaması nəticəsində Araz çayının müasir məcrasının dəyişməsi, yaxınlıqda yerləşən yaşayış məntəqələrində yeraltı suların səviyyəsi aşağı düşmüş, minerallaşma dərəcəsi isə dəyişmişdir. Hətta karxanaların fəaliyyəti nəticəsində Araz çayının yeni məcrasında çayın sağ və sol kənarlarında “oyuq”lar əmələ gəlmiş, çayın müasir məcrasından kənarda isə süni göllər yaranmışdır.
Bir sözlə, ərazilərdə ekoloji tarazlıq kəskin pozulub. Nəticə nə oldu..? Heç nə, karxana sahibləri cərimələndi... Görəsən, Ekologiya Nazirliyi İmişlidə karxanalarda monitorinq keçirəndə niyə
“Karyer Ülviyyə” kimi tanınan xanım iş adamının təbiətimizə vurduğu ziyanı görmədi..? Bəli, Ülviyyə neçə illərdir ki, Ekologiya Nazirliyindəki şərikləri ilə əlbir olub İmişlidəki qum-çınqıl yataqlarını müxtəlif ünvanlara 1 tonu 5 manata satır. Təsəvvür edirsiniz, 1 tonu 5 manata...
Və bununla da torpağın ən məhsuldar qatını məhv edir. Bilməyənlər üçün qeyd edək ki, torpağın məhsuldarlığından, istər meşə, istərsə də meyvə bağlarından danışanda, "humus" qatını bilmək vacib şərtlərdəndir. Bir çoxları "humus" qatı haqqında məlumatsızdır. "Humus" torpağın ən münbit qatıdır. Əkinçilikdə bu olduqca böyük əhəmiyyət daşıyır. Bir sözlə, "humus" qatı zəngin olan torpağın məhsuldarlığı da yüksək olur. Və "HUMUS" qatı az qala 100 ilə yaranır. Ülviyyə kimiləri isə 100 ilə yaranan bu torpaq qatının 1 tonunu 5 manata sataraq təbiətimizə öldürücü zərbə vururlar.
Bəs görəsən, ekologiya naziri Muxtar Babayevin başı hara və nəyə qarışıb..?
Muxtar Babayevə deyən lazımdır ki, qohumların, qaynın Nabran meşələrini zəbt ediblər... Söhbət təkcə Nabrandan getmir, Balakən, İsmayıllı meşələri də məhv edilir...
Bəli, cənab nazir Sumqayıtda sənaye müəssisələrində etdiyi əməlləri indi də Ekologiya nazirliyində davam etdirir. Yeri gəlmişkən, Muxtar Babayev nazirlikdəki təcrübəli kadrları işdən çıxarıb Sumqayıtdan gətirdiyi dostları ilə əvəzlədi və bu gün nazirlikdə peşəkar ekoloq demək olar ki, yoxdur. Ona görə də, ixtisaslı kadrların olmadığı bir təşkilatda yüksək nəticə əldə etmək qeyri - mümkündür.
Biz demirik, kimsə hansısa bəstəkarın övladıdırsa, hökmən bəstəkar olmalıdır. Kimsə hansısa fəhlənin övladıdırsa, hökmən fəhlə olmalıdır. Biz istəyirik ki, xalqımızın övladları gələcəkdə bir ağac taparaq kölgəsində sərinlənsinlər. Amma Muxtar Babayev belə başlayıbsa, nəinki ağac, heç gələcəkdə diş qurtdalamağa çöp də tapmayacağıq.
Məşhur bəstəkarlarımızdan olan İzolda Babayeva Şamo Arifin sözlərinə belə bir nəqarət yazmışdı:
Susuban durma, boynunu burma,
Bu yanan cana min yara vurma,
Bu odlu baxış, de, kimə baxmış,
Aman, o gözlər, de, kimi gözlər.

Sözün qısası, təbiətimiz məşhur mahnının sözlərində olduğu kimi, Muxtar Babayev, səni gözləyir. Səni gözləmir ki, adamlarını göndərəsən ağacları qıraraq yerində hansısa bir istirahət mərkəzi tikələr. Səni ona görə gözləyirlər ki, Qaxda, Balakəndə, Şəkidə əsrlərlə yaşı olan ağaclarımıza düşən xəstəliklərin müalicə metodunu tapasan.
Bəli, biz ürəyimizdə olanları qələmə aldıq, yerdə qalanlar isə sizin düşüncə tərzinizdən asılıdır. Gələcək bizim adımızla bağlıdır. Gəlin adımızı qoruyaq. Adımız - tariximizdir. //gundelik-baku.com//

Azerinfo.az xəbər saytına verilən məlumata görə, hazırda Lerik meşələrində qanunsuz olaraq kütləvi qırıntı işləri gedir.
Beləki, qırma adıyla meşə quldurları meşələrə divan tutur, traktorlarla guya meşələrə yol açılır, halbuk o yollardan əsas "qara " məqsədlərlə istifadə olunur.

Mənbə onu da əlavə edir ki, nazir müavini Vüqar Kərimovun iki yeni təyin olunmuş kadrları- 13 saylı meşə dolayı Aslan Həşimov, 7 saylı meşə dolayı Eldəniz Zamanov meşələrə divan tutur.

Bu iki meşəqıran, özləri meşədağıtmağla yanaşı öz yaxın qohumlarına (bibi və xalası uşaqlarına) belə meşələrdən işlik material çıxartmaq üçün münbit şərait yaradıblar.
Ağaclar kəsilərək "Sekaşon" adlı yerdə şpal halına salınır və sonra isə Masallı və digər bölgələrdəki sexlərə daşınır.
Yaxşı bəs yerli ekologiya işçiləri, baş mühafizə mühəndisi, mühafizə mühəndisi və meşəbəyi hara baxır?!
Məgər onların bu boyda özbaşnalığdan xəbəri olmaya bilərmi?!
Əlbəttə ki, yox.
Çünki bu cinayətlərin başında onların rəhbəri ekologiya nazirinin müavini Vüqar Kərimovun durduğu söylənilir.

Digər bir mötəbər məlumatda o da bildirilir ki, Lerikdə meşə ərazisində olan "Qələvin-2" şəlaləsində Vüqar Kərimovun göstərişi ilə iş gedir. Qayalıqlar ağır texnikalarla yarılır, təbii bərpa məhv edilir. Görünür gələcəkdə sözügedən yerdə hər hansı bir tikinti işlərinin gedəcəyi nəzərdə tutulur. Bu barədə araşdırmamız gedir və yaxın günlərdə izləyicilərə ətraflı məlumat verəcəyik. Odur ki bizi izləməkdə davam edin.

Qarşı tərəfin mövqeyin dinləməyə hazırıq.

Ölkədə Qida Təhlükəsizliyi Agentliyi var. Niyə?! Çünki ölkədə qida təhlükəsi var. Yəni təhlükəli qidalar. Bu deməkdir qida təhlükəsizliyi. Bir də bu AQTA dediyimiz özü dönüb qida təhlükəsi olursa...
Yox, qidaları AQTA daşımır, pizzaları da AQTA bişirmir. Evlərə, ofislərə də yemək-içmək daşıyan AQTA deyil, başqalarıdır. Bax, o başqalarında biri Woltdur. AQTA-nın "başqa" gözlə baxdığı Wolt!

Kontrastlar, qəribəliklər məmləkətində yaşayırıq; AQTA-Wolt qovğasında bunu bir daha anladıq, gördük. Xəbərlərdə eşitdik və oxuduq ki, AQTA Wolt-u bağlayıb. Həm də necə bağlayıb?! Deyib ki, Wolt camaata yeməkdən başqa nə desən daşıyır? Deyib, Wolt-çular qaydaları pozur, sağlamlıq testindən keçmirlər və sair və ilaxır. Yeməklərin fiziki temperaturundan kuryerlərin psixoloji tempramentinə qədər çox problem sadaladılar və dedilər ki, Wolt-dan yemək gözləməyin, dayandırmışıq.

"Dayandırmışıq" deyib durub AQTA, amma Wolt dayanmayıb. Daha doğrusu, "dinc" dayanmır; deyir: "Biz işləyirik". Bəs AQTA deyən... Cavab da elə qarşılıqlı iddiaymış: Wolt deyir ki, AQTA şirkətə "təzyiq etmək üçün əsassız açıqlama yayır". "Əsassız açıqlama", bilirsiniz də nə deməkdir?! AQTA yalan danışır deməkdir. Belə olunca ağla gələn ilk fikir: iki qurumdan biri yalançıdır. Ya da bəlkə elə hər ikisi. Ancaq Wolt-dan fərqli olaraq, AQTA-nın yalanı rəsmi yalandır; axı AQTA dövlət idarəsidir. Dövlət yalan danışmaz axı. Danışa bilməz. Yalan danışan varsa, o dövlət deyil. O halda, deməli, konkret məmurlar dövlət adından yalan danışıb. Öz maraqları üçün.

AQTA: "Wolt-u yoxlayıb bağlamışıq" deyir. Amma, baxırsan, küçələr Wolt-un mopedləri, kuryerləri ilə qdoludur.

Belə olanda gərəkdir ki, dövlət də AQTA-nın bu açıqlamasını yoxlayıb söhbəti bir nəticəyə bağlasın. Yoxsa camaat çaş-baş qalacaq: rəsmi məlumata inansın, yoxsa, Wolt-un gətirdiyi pizzanı alıb yesin?! Siz anlaşıb dil tapana qədər kuryerin gətirdiyi yemək soyuyur axı.

Nəhayət, bir qərar verin, lütfən!

Seyid Əhmədli, Bizimyol.info

Azərbaycan səhiyyə sistemi acınacaqlı gündədir. Konstitusiyamızın 41-ci maddəsinə görə, hər kəsin sağlamlığını qorumaq və tibbi yardım almaq hüququ olsa da, çox az adamın bu hüquqdan yararlanmaq imkanı var. Bunun bir səbəbi insanların aldığı maaşla tibbi xərclər arasında böyük fərqlərin olmasıdırsa, digəri ölkəmizdə səhiyyə xidmətinin yararsızlığıdır.

Vətəndaşlar adi bir sağlamlıq problemi üçün bir illik maaşlarını sərf etsə də nəinki sağala bilmirlər, əksinə mübtəla olduqları xəstəliklər getdikcə böyüyür, bir çox hallarda ölümlərlə nəticələnir. Məhz bu səbəbdən hər il Azərbaycandan xarici dövlətlərə müalicəyə gedənlərin sayı durmadan artır.

Səhiyyə sistemimizin bu hala düşməsinin ən mühüm səbəbi onu şəfaverici qurumdan çox pulkəsən aparat kimi xidmət göstərməsidir. Heç kimə sirr deyil ki, ölkəmizdəki bir çox klinikalar və həkimlər bəzən sırf pul qazansınlar deyə, xəstələri ehtiyac oldu-olmadı əməliyyat masasına yatırır, onlara bahalı dərman yazır və bunun müqabilində əczaxanalardan öz haqlarını alırlar.

Dərd burasındadır ki, bunlar hələ xırda maxinasiyalardır. Səhiyyə Nazirliyinin müxtəlif strukturlarında çalışan idarəçilərin müxtəlif vasitələrlə böyük korrupsiya əməllərinə qurşanması faktları da az deyil. Üstəlik, bu maxinasiyaların başında səhiyyə sisteminin ən yüksək postunu tutanlar dayanır.

Bəllidir ki, Azərbaycanda Səhiyyə Nazirliyinə ən uzun müddət rəhbərlik edən şəxs Oqtay Şirəliyev olub. Sələfi Əli İnsanovun 2005-ci ildə həbsindən sonra onun kreslosuna əyləşən Oqtay həkim 2021-ci ilə qədər öz yerini heç kimə qapdırmayıb. Nəticədə 16 il sərasər nazir adı daşıyıb və ictimaiyyət arasında ən məsum, heç kimə zərəri toxunmayan məmur kimi tanınıb. Amma onun dövründə Səhiyyə Nazirliyində baş verən maxinasiyalarla tanış olduqca ataların “suyun lal axanı” ifadəsi yada düşür. Ən təəccüblüsü isə budur ki, Oqtay Şirəliyevin himayədarlıq etdiyi maxinasiyaları nazir postundan sonra da davam edir. Hər halda Azpolitika.info-nun bir müddət əvvəl yayımladığı bir araşdırma yazısı belə düşünməyə əsas verir.

Ovqat.com-un məlumatına görə, “Elsəvər Ağayev və qudasının şirkətləri “səhiyyə bazarı”nda...” sərlövhəli yazıda bildirilir ki, “uzun illərdir Səhiyyə Nazirliyinin tibb avadanlıqları və ləvazimatlarının alınmasında "favorit” şirkəti "Arash Medical Company”dir. Nazirlər dəyişsə də, sözügedən şirkətin nazirliyin tenderlərindəki qalib mövqeyi dəyişmir”.

Nəşr qeyd edir ki, "Arash Medical Company” bu gün belə təsadüfən "tender kralı” hesab olunmur: “Bu şirkət ləğv olunan "Araş Medikal” MMC-nin aktivləri əsasında təsis edilib. Şirkətin 2011-ci ildə yaradıldığı deyilir, amma hələ 2010-cu ilin müsabiqə reyestrlərinə əsasən, Tibb Unversiteti yeni adı ilə ondan 917 173,54 manatlıq tibbi avadanlıqlar satın alıb.

Ümumilikdə isə "Araş Medical” MMC və "Arash Medical Company” həmin il xüsusilə Səhiyyə Nazirliyi və digər qurumlardan 13 398 507,06 manat dəyərində 46 tender qazanıb. Təkcə bir ildə İnnovasiya və Təchizat Mərkəzinin xəttilə 7 399 455,98 manatlıq tender udub. Azərbaycan Tibb Universiteti də "Arash Medikal Production LTD” adlı şirkətdən 8 099 515,79 manatlıq Tədris-Terapevtik Klinikasının inventarlarını satın alıb.

Həmin illərdən başlayaraq, şirkət səhiyyə sistemilə bağlı demək olar bütün böyük tenderləri qazanıb. Özü də təkcə tibbi avadanlıqların, ləvazimatların satışı və quraşdırılması deyil, xəstəxanaların tikintisi və təmiri ilə bağlı satınalmalar da bu şirkətə verilib. Bunun nəticəsi olaraq, şirkət təkcə 2019-cu ilə qədər ümumilikdə 250 milyon(!) manatlıq tender qazanıb. Sonrakı illərdə də eyni temp saxlanılıb. Təkcə ötən il şirkət 27 tender udub. Bu, hər aya 2-dən artıq tender deməkdir. Bu ilin əvvəlindən də tenderlər üst-üstə qazanılmaqdadır və onların dəyəri ilk 3 ayda artıq 1 milyon manata yaxınlaşıb. Ötən il bu məbləğ 4.5 milyon manata yaxın olub”.

Bəli, bəli, bu araşdırma yazısı 2023-cü ildə qələmə alınıb. Oqtay Şirəliyevin yarıtmaz fəaliyyəti nəticəsində nazir postundan uzaqlaşdırıldıqdan 2 il sonra.

Sual edə bilərsiniz: Bəs, bu şirkətin Oqtay Şirəliyevə nə dəxli var?

İlk baxışdan şirkətin Oqtay Şirəliyevlə heç bir bağlantısı görünmür. Amma “Araş Medikal”ın yarandığı və ən çox tender qazandığı dövrlərin Oqtay Şirəliyevin nazir olduğu zamanlara düşməsi insanın beynində bəzi şübhələrə yol açır. Məlumatlar təsdiqləyir ki, müxtəlif zamanlarda gah "Araş Medical” MMC, gah "Arash Medical Company”, gah da “Arash Medikal Production LTD” adıyla əldə etdiyi tenderlər hesabına qaz vurub qazan dolduran şirkət uzun illər Oqtay Şirəliyevin xeyir-duası ilə fəaliyyət göstərib.

Hərçənd bir çox nəşrlərdə onun gerçək sahibinin Oqtay Əsədov olduğu göstərilir. Zənnimizcə, bu yanılma da əslində Oqtayların adının qarışdırılmasından qaynaqlana bilər. Üstəlik, şirkətə 2018-ci ilə qədər rəhbərlik edən şəxsin də soyadı Əsədov olub – Cavid Əsədov. Görünür, bu ad və soyad bənzərliyi media orqanlarını çaşdırıb və hər kəs Oqtayın ayrı Oqtay olduğunu düşünüb. Bəlkə də ona görə ki, Oqtay Şirəliyev ictimaiyyət arasında əlindən heç bir iş gəlməyən, ancaq kabinetində zamanı milçək qovalamaqla yelə verən nazir kimi tanınıb. Onun adaşı Oqtay Əsədov isə maşallah, maşallah, kanalizasiya müdirliyindən tutmuş parlament spikerliyinə, hətta Moskvada adı dillər əzbəri olan bar sahibliyinə qədər müxtəlif biznes sahələrində silinməz izlər buraxıb. Deməli, məntiqlə, şirkətin gerçək sahibi Oqtay Əsədov olsaydı və Cavid Əsədovla onu hansısa qohumluq əlaqələri bağlasaydı, onda adını çəkdiyimiz ikinci şəxs bu günə qədər öz vəzifəsini qoruyardı.

“Azpolitika” da öz yazısında bu ehtimalın üzərində dayanaraq yazır: “Mətbuatda gedən bəzi məlumatlarda göstərilirdi ki, şirkətin sahibi Milli Məclisin sabiq sədri Oqtay Əsədovun qohumudur, Lakin əslində, Cavid Əsədov Oqtay Əsədovun yox, digər sabiq millət vəkili Hadı Rəcəblinin qohumu, daha konkret desək, bacısı oğludur. Sözsüz ki, bu amilin də "Arash Medical”-ın "uğurlarında” əhəmiyyətli payı var”.

İddialara görə, şirkətin formal sahibi Şamo Fərzəlibəyov adlı biri iş adamıdır. Şamo Fərzəlibəyovin bundan əlavə “Caspian International Hospital” və “BADAM MEDICAL CENTER” klinikaları da var. Azərbaycan reallığında bu qədər geniş imkan alın təriylə və halal zəhmətiylə çörək pulu qazanan sadə vətəndaşa qazandırılmazdı. Həmin sadə vətəndaş bir balaca “tüklənən” kimi yolunar, ətcə cücəyə çevrilərdi. Maraqlıdır ki, Şamo Fərzəlibəyov isə günü-gündən “tüklənib”. Bəs, bu qeyri-adi böyümənin sirri hardan qaynaqlanır?

Müxtəlif media orqanlarının iddialarına inansaq, Şamo Fərzəlibəyov sabiq səhiyyə naziri Oqtay Şirəliyevin müavini Elsevər Ağayevlə qudadır. Görünür, əsl himayədar ilə “sadə vətəndaş” arasındakı münasibət də bu ortaq dostluqlardan yaranıb.

Maraqlıdır ki, Elsevər Ağayev Səhiyyə Nazirliyində Oqtay Şirəliyevdən əvvəl iş fəaliyyətinə başlayıb. Şəxsi tərcümeyi-halına nəzər salsaq görərik ki, nazirlikdəki iş fəaliyyətinə 1999-cu ildə başlayan Elsevər Ağayev ilk dəfə sabiq nazir Əli İnsanovun müavini olub. 2005-ci ildə nəinki nazirlikdəki, hətta bütün səhiyyə sistemindəki insanovçuların təmizlənməsinə start verilsə də, E.Ağayevə toxunan olmayıb. Beləcə, E. Ağayev Əli İnsanovun olduğu kimi, yeni nazir Oqtay Şirəliyevin də ən yaxın adamına çevrilib. Bəlkə də onun bu toxunulmazlıq statusu qazanmasında şəxsi keyfiyyətəri qədər, “təchizatçılıq” qabiliyyətləri də rol oynayıb. Mediadakı iddialara inansaq, onun “təchizat” sahəsində arxalandığı əsas şirkət isə “Araş” olub. Həmin sehirli çubuq vəzifəsini icra edən “Araş” isə yenə sabiq nazir Oqtay Şirəliyevin dövründə təsis olunub. Şirkətin indiyə qədər səhiyyə sistemindəki bu avantajlı mövqeyini itirməməsi də həm Elsevər Ağayevin, həm onun qudasının “işgüzar” təcrübələrindən, həm də Oqtay Şirəliyevin himayədarlığından qaynaqlana bilər.

Növbəti sual ortaya çıxır: “Araş” şirkətini bu qədər güclü qılan nədir?

Zənnimizcə, bu sualın ən yaxşı cavabı da “Azpolitika”nın adını çəkdiyimiz araşdırma yazısında gizlidir. Sayt yazır: “Arash Medical”-ın tenderləri necə "udduğuna” dair daha dolğun və faktlara əsaslanan nümunə kimi Azərbaycanda fəaliyyət göstərən "Qardaşlar Mebel” QSC-nin ölkə başçısına, Səhiyyə, İqtisadiyyat və digər nazirliklərə, eləcə də hüquq-mühafizə orqanlarına məktubunu göstərmək olar. Məktubda deyilir ki, "Qardaşlar Mebel” QSC 2021-ci ilin sonunda Səhiyyə Nazirliyinin 3 böyük tenderini udsa da, onu qalib elan etməyiblər və milyonlarla dollarlıq tenderlər şişirdilərək başqa şirkətlərə, daha doğrusu məhz "Arash Medical”a verilib: "Şirkətimiz tərəfindən dəfələrlə bu məsələ ilə əlaqədar Səhiyyə Nazirliyinə ünvanlanan müraciətlərimiz təəssüf ki, cavabsız qalmışdır. Belə qənaətə gəlmək olar ki, həmin müsabiqələrdə nəzərdə tutulan şirkətin qalib olmaması Səhiyyə Nazirliyini çox narahat edir. Bundan irəli gələrək Səhiyyə Nazirliyi həmin müsabiqələrin nəticələrinin gələn ilə keçməsini və ayrılan vəsaitin dövlət büdcəsinə qaytarılmasına nail olaraq həmin tenderlərin ləğvini istəyir. Eyni zamanda bu müsabiqələrdə simvolik qiymət təklifi təqdim edərək kənarda qalan, amma bütün proseslərə özünün kənardan dəvət etdiyi "SEM-AZ” MMC şirkəti üzərindən həyata keçirən "ARASH” firması "ARASH MEDİCAL” MMC şirkətinin törəməsidir. "ARASH MEDİCAL” MMC-nin faktiki rəhbərinin isə Səhiyyə Nazirinin müavini və nazirliyin tender komissiyasının sədri Ağayev Elsevər Məmməd oğlu cənabları ilə yaxın qohumluq əlaqəsi vardır. Buna sübutu Səhiyyə Nazirliyinin Dövlət Satınalmalarının Vahid İnternet Portalının "Keçirilmiş müsabiqələr” bölməsinə daxil olmaqla görmək mümkündür. Həmin bölmədə nazirliyin bu tip satınalma predmeti üzrə keçirdiyi müsabiqələrin qalibinin yalnız "ARASH MEDİCAL” MMC olduğu qeyd olunub. Həmçinin həmin müsabiqələrdə ikinci şirkət olaraq hər zaman "SEM-AZ” MMC iştirak edir. Məhz buna görə də satınalan təşkilat üç müsabiqə üzrə yüksək, yəni 13736908.52 (on üç milyon yeddi yüz otuz altı min doqquz yüz səkkiz manat əlli iki qəpik) manat qiymət təklifi vermiş "SEM-AZ” MMC-ni qalib seçmək niyyətindədir. Eyni zamanda qalib olduğumuza baxmayaraq, Səhiyyə Nazirliyi müxtəlif yollarla müsabiqədə təqdim etdiyimiz qiymət təklifindən imtina etmək üçün bizə təzyiqlər göstərir. Üç müsabiqə üzrə qiymət təklifimiz 8580934.28 (səkkiz milyon beş yüz səksən min doqquz yüz otuz dörd manat iyirmi səkkiz qəpik) manat təşkil edir. Göründüyü kimi, qiymət təkliflərimizin qalib seçildiyi təqdirdə 5155974.24 (beş milyon bir yüz əlli beş min doqquz yüz yetmiş dörd manat iyirmi dörd qəpik) manat məbləğində vəsait dövlət büdcəsinə qaytarılacaq. Qənaət olan vəsaitin hesabına 44 günlük müharibədə düşmən tərəfindən dağıdılmış ərazilərin tezliklə bərpasına töhfə verilə bilər...”

Doğrudur, bu müraciətdən sonra sözügedən tenderlərin nəticələri ləğv olundu və həmin tenderləri "Arash Medical” uda bilmədi. Əslində, bu da gerçək rəqabət şəraitində şirkətin nəyə qadir olduğunun, qalib gələ bilmədiyinin bariz nümunəsidir.

Ancaq maraqlı olan həm də budur ki, həmin müraciətə əsasən "Arash Medical”-ın arxasından daha bir ad, özü də dəfələrlə korrupsiyada hallanan ad çıxır. Söhbət 1997-cü ildən Səhiyyə Nazirliyinin "Əczaçılıq və Tibb Sənayesi” EİB baş direktoru, 1999-cu ildən ötən ilin fevralına qədər, yəni 23 il(!) isə Səhiyyə nazirinin müavini vəzifəsini daşımış, nəticədə Azərbaycanın az qala ən imkanlı oliqarxlarından birinə çevrildiyi bildirilən Elsəvər Ağayevdən gedir.

Məktubdan belə məlum olur ki, E.Ağayevin də "Arash Medical”-ın "tender qələbələri”ndə ciddi rolu var. Əldə etdiyimiz məlumata görə, məktubda qeyd olunan, ancaq adı çəkilməyən "Elsəvər Ağayevin qohumu” isə Şamo Fərzəlibəyov adlı şəxsdir. Şamo Fərzəlibəyov Elsəvər Ağayevin qudasıdır. Heç yerdə adı keçməyən bu şəxs həm "Caspian International Hospital” və "BADAM MEDICAL CENTER” klinikalarının sahibidir.

Yeri gəlmişkən, istər "Arash Medical”-ın, istərsə də Elsəvər Ağayevin qudasının yuxarıda adı çəkilən "Caspian International Hospital” və "BADAM MEDICAL CENTER” klinikalarının qazandıqları milyonların qarşılığında vergidən yayınması ilə bağlı da bəzi iddialar var. Ancaq yəqin ki, bu və digər iddialar və açıq görünəın faktlar yalnız "Arash Medical” və buna bənzər şirkətlərin dövlət satınalmalarını, tenderləri necə "udduqları” və necə "tender kralları”na çevrildikləri üzə çıxarılan zaman araşdırılacaq. Bu isə kifayət qədər çətin görünür”.

“Azpolitika”ya nə qədər inandırıcı görünməsə də artıq “Araş” şirkətinin fəaliyyətinin yoxlanılmağa başlanıldığı barədə bəzi məlumatlar mediada yer almağa başlayıb. Valyuta.az-ın məlumatına görə, ““Arash Medical Company” QSC barəsində İnzibati Xətalar Məcəlləsinin 430.4-cü (Avans yolu ilə ödənilmiş valyuta vəsaitinin müqabilində müəyyən edilmiş müddətlərdə müvafiq mallar idxal edilmədikdə, işlər görülmədikdə və ya xidmətlər göstərilmədikdə ödənilmiş valyuta vəsaitinin xaricdən geri qaytarılmaması) maddəsi ilə inzibati iş açılıb.

İş baxılması üçün Nəsimi Rayon Məhkəməsinə göndərilib.

430.4-cü maddəyə əsasən, vəzifəli şəxslər inzibati xətanın bilavasitə obyekti olmuş valyuta vəsaiti məbləğinin 10 faizindən 20 faizinədək məbləğdə, hüquqi şəxslər inzibati xətanın obyekti olmuş valyuta vəsaiti məbləğinin 20 faizindən 30 faizinədək məbləğdə cərimə edilir.

“Arash Medical Company” QSC 22 iyun 2011-ci ildə qeydiyyata alınıb. Nizamnamə kapitalı 2000 AZN olan şirkəti hüquqi ünvanı Bakı şəhəri Nəsimi rayonu, Abdulvahab Salamzadə küçəsi, ev 26-da yerləşir. QSC-nin qanuni təmsilçisi isə Məmmədov Kamran Abid oğludur”.

Düzdür, açılan bu iş inzibati xətalarla əlaqədarla bağlıdır. Amma o da istisna deyil ki, şirkətin fəaliyyətində iddia olunan maxinasiyalar təsbit olunarsa, bu işi cinayət qanunvericiliyinə görə araşdırılması da baş tuta bilər.

Ovqat.com

Bu günlərdə əldə etdiyimiz məlumata görə, Baş Prokuror yanında Korrupsiyaya qarşı Mübarizə Baş İdarəsi Ali Attestasiya Komissiyasında əməliyyat-axtarış işlərini AAK əməkdaşlarının əksər hissəsinin məzuniyyətdə olmasına görə intensiv şəkildə davam etdirə bilmir. Amma çoxsaylı şikayətləri nəzərə alaraq Korrupsiyaya qarşı Mübarizə Baş İdarəsi sentyabr ayında yoxlamaları yenidən bərpa edəcək. GundemXeber.Az-ın əldə etdiyi digər məlumata görə isə, AAK sədri Famil Front oğlu Mustafayev bu günlərdə ən yaxın adamlarının yanında bildirib ki, onun çox yuxarıda adamı var və buna görə ona heç kim heç nə edə bilməyəcək. “Yuxarıda adam” deyəndə görəsən Famil Front oğlu kimi nəzərdə tutub? Prezident Aparatında bu sahəyə dolayısı ilə nəzarət edən Humanitar siyasət, diaspora, multikulturalizm və dini məsələlər şöbənin müdiri Fərəh xanım Əliyevanımı? Bildiyimizə görə, F.Əliyeva rüşvət və korrupsiyadan uzaq xanımdır, Azərbaycan xalqının qürur duyduğu bir kişinin-professor Şirməmməd Hüseynovun qızıdır, onun adının rüşvət, korrupsiya qalmaqalında çəkilməsi ədalətsizlik olar.
Famil Front oğlu bəlkə Azərbaycan Respublikası Prezidentinin Administrasiyasının Dövlət nəzarəti məsələləri şöbəsinin müdiri Kərəm Həsənovu nəzərdə tutur? Çünki o, 1996–1999-cu illərdə Azərbaycan Respublikası Dövlət Əmlak Komitəsində şöbə rəisi vəzifəsində çalışıb və Kərəm Həsənovla hədsiz yaxın münasibətləri olub. Ona görə də Famil Front oğlu keçmişdə Əmlak Komitəsində işləyənlərə, xüsusən K. Həsənova yaxın şəxslərə Elmi ad və dərəcələr verilməsində “xüsusi güzəştlər” tətbiq edir. Çünki vaxtilə komitədə də ona belə güzəştlər edilib. O, K. Həsənovun himayəsi altında vaxtilə Dövlət Əmlak Komitəsindəki vəzifəsindən bəhrələnərək dövlət əmlakında xüsusi paya sahiblənib.
İrəlidə bu məsələyə geniş toxunacağıq. Amma burası da var ki, indi Famil Front oğlu özünü K. Həsənovdan daha güclü hesab edir. AMEA alimlərinin Prezidentə müraciətində onun hələ AAK-da sədr əvəzi olarkən Mikayıl Cabbarova güvəndiyini və onun hesabına tezliklə AAK-ın sədri olacağını yaxın adamlarının yanında dilə gətirdiyi bildirlir. Amma inanmaq olmur ki, yuxarıda adı çəkilən bu adamlar Famil Front oğlunun rüşvət və korrupsiya maxinasiyalarında adlarının hallanmasını istəyələr.
Famil Front oğlu Mustafayevin Azərbaycan dövlətinə ən böyük zərbəsi gənclərin elmə gedən yolunun qarşısını almasıdır. O, bu göstərişin ona Prezident Aparatından verildiyinə dönə-dönə işarə edir. Sanki bununla o, Prezidentlə gənclər arasında uçurum yaratmağa çalışır, AAK-ın bütün imtina məktublarında 2019-cu ildə Prezident tərəfindən təsdiqlənən “Əsasnamə”ni xüsusi vurğulamaqla ölkə başçısının adını qəsdən mənfi mənada dövriyyəyə gətirir. Belə çıxır ki, Prezident bilərəkdən belə bir Əsasnamə hazırlatdırmışdır ki, gənclərin elmə gedən yolunun qarşısını kəssin. Halbuki cənab Prezident bütün çıxışlarında və əməli fəaliyyətində gənclərə meydan verilməsinə, onların irəli çəkilməsinə çağırış edir. Möhtərəm Prezidentin gənclərə qayğısı ilə bağlı 1 fevral 2019-cu ildə Gənclər günündə etdiyi çıxışdan iki cümləni burada xatırlatmaq yerinə düşər: “Mənim tövsiyəm ondan ibarətdir ki, gəncləri dövlət təşkilatları önə çəksinlər. Çünki gənclərin həm potensialı, həm fəallığı, həm də məsələlərə yeni baxışları cəmiyyət üçün çox lazımdır”.
Etiraf edək ki, Famil Front oğlu birmənalı şəkildə Prezidentin bu tövsiyyəsini inkar edir və gənclərin elmə, tədqiqata gələn yolunu bağlayır və fəxrlə deyir ki, AAK bir ildə 246 elmi işdən imtina edib. Həm də həmin işlərin böyük əksəriyyəti xırda texniki problemlə bağlı geri qaytarılıb. Onu da qeyd edək ki, bu məsələdə Elm və Təhsil Nazirliyi onun əsas köməkçisinə çevrilib. Həmin nazirliyin bir nəfər əməkdaşı bizimlə söhbətdə açıq şəkildə bizə bildirdi ki, Elm və Təhsil Nazirliyinin bəzi əməkdaşları AAK-la birgə müəyyən korporativ maraqları bölüşdüklərindən vətəndaşların haqlı şikayətləri təmin olunmur və sonda bütün ittihamlar Prezidentə yönəldilir. Əks halda, AAK-ın 2019-cu ildə qəbul etdiyi Əsasnaməni geriyə, 2018-ci və ondan əvvəlki illərdə doktoranturaya qəbul edilmiş gənclərə tətbiq etməsi ilə bağlı yol verdiyi qanunsuzluqla əlaqədar gənclərin Elm və Təhsil Nazirliyinə müraciətləri başdansovdu cavablandırılmazdı. Yaxud vətəndaşa bir cavab, AAK-a başqa bir cavab göndərilməzdi. Azərbaycan Respublikasının Konsititusiyasının 149-cu maddəsinin VII bəndində açıq-aydın deyilir ki, “normativ hüquqi aktların qüvvəsi geriyə şamil edilmir”. Vətəndaş yuxarıda qeyd edilən normativ-hüquqi aktın qanunsuz olaraq geriyə, yəni Əsasnamənin qəbul edildiyi tarixdən əvvəl doktoranturaya qəbul olumnmuş şəxslərə tətbiq edildiyini bildirdikdə, ölkə qanunlarını və konsititusiyasını qorumaq birbaşa vəzifəsi olan nazirlik məsələyə tam aydınlıq gətirməli idi. Təbii ki, nazirliyə gələn məktubların hamısının nazir tərəfindən oxunduğunu və nazirin özünün birbaşa onlara cavab yazdığını güman etmək sadəövhlük olardı. Bunun üçün nazirlikdə yüksək əmək haqqı alan aparat işçiləri var. Cavabları da onlar hazırlayır və nazirə imzalatdırırlar. Əlbəttə, həmin məktubu hazırlayan, nazirə imzalatdıran şəxslər qanunu pozduqlarının fərqində olmalıdırlar. Digər tərəfdən, NBA üzrə magistr diplomunda nazirlik tərəfindən açıq-aşkar yazılır: “bu diplom növbəti pillədə təhsili davam etdirməyə icazə verir”. Nazirlik bu ifadənin həmin şəxslərin yalnız “iqtisadiyyat” üzrə müdafiə etməsinə icazə verdiyini deyir. Onda bu halda konkret yazılmalı idi ki, “bu diplom iqtisadiyyat üzrə növbəti pillədə təhsili davam etdirməyə icazə verir”. Amma belə yazılmayıb. Qanun qadağan etmirsə, niyə icazə olmamalıdır?
Gənclərə qarşı 2019-cu il “Əsasnamə”sindən istifadə edərək onların yolunu bağlayan AAK sədrinin bəs öz fəaliyyəti necə, əsasnaməyə uyğun olubmu? AAK dakı rüşvət və korrupsiya faktından, elmi ad və dərəcələrin şıdırığı alverindən, AAK-ın Ekspert Şurasının üzvü və katibi professor Şəfa Əliyevin bu yaxınlarda Baş Prokuror yanında Korrupsiyaya qarşı Mübarizə Baş İdarəsi tərəindən rüşvətlə yaxalanması məsələsindən demək olar ki, ölkə mətbuatı hər gün yazır. Bu, görünür, AAK-ın fəaliyyət prinsipidir. Bəs rəhbərin özünün fəaliyyət prinsipi?
Famil Front oğlu kimdir? O, hansı yollarla AAK-ın rəhbərliyinə gəlib çıxıb? Onun AAK-ın səhifəsindəki tərcümeyi-halı ilə real tərcümeyi-halı arasında xeyli fərqlər var. AAK-ın səhifəsində onun 1992–1994-cü illərdə Azərbaycan Respublikası Dövlət Antiinhisar Siyasəti və Sahibkarlığa Kömək Komitəsində şöbə rəisi, Sahibkarlığa Kömək Milli Fondunun direktor müavini, 1994–1996-cı illərdə “Azərbaycan İnvestisiya Şirkəti” SC-nin vitse-prezidenti, prezidenti, 1996–1999-cu illərdə Azərbaycan Respublikası Dövlət Əmlak Komitəsində şöbə rəisi, Milli Depozit Mərkəzinin icraçı direktoru, prezidenti, 1999–2000-ci illərdə Azərbaycan Respublikasının Prezidenti yanında Qiymətli Kağızlar üzrə Dövlət Komitəsində Milli Depozit Mərkəzinin prezidenti kimi vəzifələrdə işləməyi göstərilməyib. Çünki, bu vəzifələrin heç birisi ona Azərbaycan elminə rəhbərlik etmək səlahiyyəti vermir. “Kupçanın”, “qiymətli kağızların” elmlə nə bağlılığı? Yəqin ki, Famil Front oğlu özü də bunu başa düşüb, ona görə də elmə dəxli olmayan bu vəzifələri AAK-ın səhifələrində sadalamayıb.
Digər tərəfdən, Famil Front oğlu, guya, 1998–2002-ci illərdə Bakı Dövlət Universitetinin Hüquq fakültəsində hüquqşünaslıq ixtisası üzrə təhsil alıb və universiteti fərqlənmə diplomu ilə bitirib. Halbuki həmin dövrdə (1999–2000-ci illərdə) o, Azərbaycan Respublikasının Prezidenti yanında Qiymətli Kağızlar üzrə Dövlət Komitəsində Milli Depozit Mərkəzinin prezidenti olub. Onun vaxtı və imkanı vardımı ki, gedib BDU-da tələbəlik etsin? Özü də guya fərqlənmə diplomu alıb! Çox ehtimal ki, bu diplomu Abel Məhərrəmov bir elli kimi ona hədiyyə edib. Onun həmin dövrdə necə təhsil alması ilə bağlı universitetə artıq sorğu göndərilib. Famil Front oğlunun təkcə hüquq diplomu şübhəlidirmi? 2019-cu ildə AMEA-nın alimləri Azərbaycan Respublikasının Prezidenti İlham Əliyevə müraciət edərək AAK-ın sədr əvəzinin (o zaman F.Mustafayev AAK-da sədr əvəzi vəzifəsində çalışırdı) professor diplomunun saxta olduğu barədə geniş yazı ilə çıxış etmişdilər. Moderator.az saytı vasitəsi ilə yayımlanan həmin müraciətdə deyilirdi: “Möhtərəm Cənab Prezident! AAK-ın sədr əvəzi Famil Mustafayevin professor diplomunun verilməsində AAK-ın “Elmi adlar və elmi dərəcələrin verilməsi qaydaları haqqında” Əsasnamənin 6-cı bəndinin 45-ci maddəsi kobud şəkildə pozulmuşdur. Belə ki, maddəyə əsasən kafedra üzrə professor elmi adı almaq üçün elmlər doktoru diplomu təsdiqləndikdən 4 il keçdikdən sonra AAK-a professorluğa sənədlər təqdim edilə bilər. Famil Mustafayevin isə “Elmlər doktoru” dərəcəsi 24 iyun 2011-ci ildə təsdiq olduğu halda, “İqtisadi nəzəriyyə” kafedrası üzrə professor elmi adı 06 iyun 2014-cü ildə təsdiq edilmişdir. Yəni, heç 3 il keçməmişdir. Əgər nəzərə alsaq ki, sənədlər AAK-da 4-5 fq ekspertiza olunur, deməli, təxmin etmək olar ki, müddətdən 2 dəfə tez olaraq Famil Mustafayevin sənədləri qəbul edilmişdir. Onda adam dəhşətə gəlir!!! Bu qədər də prosedur pozuntusu olarmı?! Olar! Famil Front oğlu Mustafayevə olar! Bu adam yuxarıların onun arxasında dayandığını deyirsə, demək ona hər şey olar! Bu yuxarı kimdir? Bunu F. F. Mustafayev birbaşa niyə dilinə gətirmir? Müraciət müəlliflərinin yazdığına görə, həmin dövrlərdə Famil Front oğlu Mustafayev AAK-ın İqtisadiyyat üzrə Ekspert Şurasının sədri olub: “Deməli, Famil Mustafayev həm də həmin dövrdə vəzifə səlahiyyətlərindən sui-istifadə edərək, Əsasnaməni kobud şəkildə pozmuşdur. Əsasnamə isə gördüyünüz kimi dəqiq, mütləq 4 il müddətini hamı üçün qeyd-şərtsiz zəruri edir. Hər bir halda F. Mustafayevin bugünki professor diplomu legitim deyildir, prosedur pozuntusuna yol verilmişdir və deyə bilərik ki, SAXTADIR!”.
Famil Front oglu onlarla gənc alimin yolunu məhz həmin “Əsasnamə” ilə kəsmişdir. Amma özü həmin “Əsasnamə”ni hamıdan çox pozub. Bunu biz demirik AMEA-nın Prezidentə müraciət etmiş alimləri yazır: “Əsasnamənin 9-cu “Elmi dərəcələrədən və elmi adlardan məhrumetmə və onların bərpa edilməsi” bölməsinin 54-cü maddəsində yazılır ki, elmi dərəcə və ya elmi ad bu Əsasnamənin tələbləri pozulmaqla verildiyi halda, həmin şəxs elmi addan məhrum edilir. Deməli, birmənalı şəkildə Famil Mustafayev professor diplomundan məhrum olmalıdır! Çünki saxtakarlığa yol verilmişdir! Həm də o, məsuliyyətə cəlb olunmalıdır, vəzifə səlahiyyətlərindən sui-istifadə etdiyi üçün”. Həqiqətən adama təəccüblü gəlir, bu qədər qanun pozuntusuna yol vermiş şəxs sonradan mükafatlandırılır, ona AAK sədri vəzifəsi verilir??? Famil Front oğlu əvəllər çalışdığı vəzifələrdə də bu cür saxtakarlıqlara yol vermişdir. O, 90-ci illərdə Əmlak Komitəsində işləyərkən dövlətin əmlakını da Bakı Mexaniki Təmir zavodunu bu yolla özününküləşdirmişdir. İndi həmin zavod “Konteks” MMC adı altında fəaliyyət göstərir. O, çox böyük var - dövləti də saxtakarlıq yolu ilə əldə etmişdir. Port-Bakuda ən bahalı mənzillərə sahibdir.
Bundan əlavə, AMEA əməkdaşları öz müraciətlərində Famil Mustafayevin doktorluq dissertasiyasının da plagiat məsələlərinə toxunmuşlar. “Famil Mustafayevin dissertasiyası, əsasən 1998-2002-ci illərdə Rusiyada müdafiə olunmuş dissertasiyaların birləşməsinin tərcüməsindən ibarətdir”-, deyə alimlər yazır. Yaxşı, bu qədər saxtakarlığa yol vermiş insan niyə indiyə qədər heç bir cəza almamışdır. Əksinə, vəzifə pillələri ilə sürətlə irəliləmişdir. Bu gün onun toxunulmazlığının səbəblərindən biri kimi DTX rəisinin bacısı Mahirə xanım Nağıyevanın AAK-da Famil Front oğlu tərəfindən filologiya üzrə ekspert şurasına sədr təyin edilməsi göstərilir. Amma biz hörmətli Əli müəllimin dövlətçilyin, milli-mənəvi dəyərlərin keşiyində ləyaqətlə dayandığını yaxşı bilirik, çox ehtimal ki, bu faktı Famil Front oğlu özü qəsdən dövriyyəyə gətirir ki, toxunulmaz olduğunu göstərsin.
Yazını AMEA əməkdaşlarının bir cümləsi ilə tamamlayıram: “Ali Attestasiya
Komissiyasının nüfuzunu alverçi təfəkkürlü şəxsin deyil, yalnız nüfuzlu alimin rəhbərliyi ilə qaldırmaq mümkündür!”.
(Davamı var)

Güney Nəsirov
GUNDEMXEBER.AZ

Mədəniyyət Nazirliyinin Qarabağ Regional Mədəniyyət İdarəsindən şikayət var.

Bu barədə sosial şəbəkədə paylaşım edilib.

Bildirilib ki, bu yaxınlarda idarəyə yeni təyin olunan rəis Qalib Həsənov işçilərin məzuniyyət hüquqlarını pozur.

Eyni zamanda, iddia edilib ki, yeni rəis idarənin tabeliyində olan müəssisələrin əməkdaşlarının məzuniyyətə çıxmağına icazə vermir, iyul ayının əməkhaqları da ödənilməyib. Halbuki, artıq dövlət müəssisələrində avqust ayının maaşlarının ödənilməsinə başlanılır.
Məsələ barədə Mədəniyyət Nazirliyi ilə əlaqə saxladıq.

Nazirlikdən Oxu.Az-ın sorğusuna cavab olaraq bildirilib ki, yayılan məlumatlarla bağlı araşdırma aparılacaq.

Oxu.Az

"Bakı Metropoliteni" Qapalı Səhmdar Cəmiyyəti (QSC) qurumun avtonəqliyyat parkında mövcud olan nəqliyyat vasitələrinə servis və təmir işlərinin satın alınması ilə bağlı tenderə yekun vurub.

DİA.AZ qaynarinfo-ya istinadla xəbər verir ki, tenderin qalibi "Yurd.MR” MMC seçilib. Tərəflər arasında bağlanacaq satınalma müqaviləsinin maliyyə dəyəri 2 790 865,56 AZN-dir.

İqtisadiyyat Nazirliyi yanında Dövlət Vergi Xidmətinin reyestr məlumatlarına görə, "Yurd.MR” MMC 16 avqust 2021-ci ildə qeydiyyata alınıb. Nizamnamə kapitalı 10 AZN olan şirkətin hüquqi ünvanı Bakı şəhəri, Səbail rayonu, Mərdanov qardaşları, ev 34, mənzil 4-də yerləşir. MMC-nin qanuni təmsilçisi Məmmədov Rafiq Kərəm oğludur.

Şirkət yarananda isə qanuni təmsilçisi Məmmədov Ruhin Rafiq oğlu olub. O, 11 avquts 2023-cü ildə Rafiq Məmmədovla əvəzlənib.
Ətraflı

Açıq mənbələrdə bu şəxslər barəsində heç bir məlumat yoxdur. Şirkət haqqında da hər hansı məlumata rast gəlinmir.

Dövlət satınalmalarının elektron portalında yerləşdirilən məlumatlardan aydın olur ki, "Bakı Metropoliteni” QSC ilə bağlanan satınalma müqaviləsi "Yurd.MR” MMC-nin qalib gəldiyi ilk tenderdir. Hər halda şirkətin bundan başqa tenderdə qalib gəldiyi barədə heç bir məlumat yoxdur.

"Bakı Metropoliteni” QSC-nin sədri Zaur Hüseynovdur. O, 2014-cü ildən bu vəzifədədir.