Elvin Məmmədov Bərdə rayon Soğanverdilər kənd sakinidir.

İkinci Qarabağ müharibəsində iştirak edib və müharibə veteranıdır. Bir müddət müalicə olunsada sağlamlığı tam bərpa olunmayıb.

Əliliklə bağlı müraciətlərinə isə müsbət cavab verilmir.

Toplum TV

"MAZARİNA TRADE COMPANY" MMC mhkəməlik olub.

Şirkət barəsində İXM-nin 485.2-ci maddəsi ilə (Gömrük Qaydalari Əleyhinə Olan Inzibati Xətalar) protokol hazırlanıb.

Hazırlanmış protokol Bakı Şəhəri Nəsimi Rayon Məhkəməsinə təqdim edilib.

Bildirək ki, nizamnamə kapitalı 1000 AZN olan "MAZARİNA TRADE COMPANY" MMC-nin qanuni təmsilçisi QƏDİR MƏMMƏDOV ŞİRSOLTAN OĞLUdur.32gun.az

Fazil Qurbanov Ağstafa rayonunun Qırlı kəndində cörəyini torpaqdan cıxaran fermerlərdəndir. Bu il fermer 15 hektar günəbaxan, 3 hektar yonca və 5 hektar taxil əkib. Fazil Qurbanov deyir ki, ümumilikdə 23 hektar əkin əkərək 20 min manata yaxın xərc cəkib, amma suvarma suyunun olmaması səbəbindən məhsul batıb.

Fermer su problemi ilə əlaqədar Rayon İcra Hakimiyyətinə şikayət edib. Rayon rəhbərliyindən nümayəndə gəlib əkin sahələrinə baxış da keçirib, problemlə yarində tanış olub. Amma o, çıxıb gedəndən sonra da heç bir tədbir görülməyib. 6 hektar sahəsinə heç ümumiyyətlə su dəyməyib.

“Mənə ekskovator verdilər ki, arxını təmizlət, sənə su veriləcək. Mən də təmizlətdim, amma əziyyətim özümə qaldı, yenə su verilmədi” – deyən Fazil Qurbanov deyir ki, üç övladının ikisi 1-ci qrup əlildir: “Əlil uşaqlarıma verilən sosial müavinəti torpağa qoyuram ki, sabah ehtiyacımı ödəyə bilim. Amma mənə o şəraiti yaratmırlar. Yalandan baş qatırlar. Xahiş edirəm, aidiyyəti qurumlar bu məsələ ilə əlaqədar ölçü götürsünlər. Hər il eyni vəziyyəti yaşayıram…”

Onu da qeyd edək ki, Qırlı kəndində ili zərərlə başa vuran təkcə Fazil Qurbanov deyil, bir cox fermerlər suvarma vaxtı bol su olsa da belə, suya həsrət qaldıqlarını bildirilər. Fermerlərdən Altun Nağıyev də deyir ki, su dərdindən 12 hektar sahədə əkdiyi taxıl batıb. Ardından günəbaxan əkib, onun da yarısını suvarıb, yarısına su ala bilmədiyindən yanıb.

Maraqlı məqam odur ki, il ərzində əkin sahəsini bir dəfə belə suvara bilməyənlərlə müqayisədə Sudan İstifadə Edənlər Birliyinin rəhbəri Elman Kazımovun əkin sahələrə yam-yaşıldır. Fermerlər deyirlər ki, suvarma suyu təsərrüfatı sanki ona xidmət edir.

Ümumiyyətlə, Qırlı kəndi rayonun ən cox əkinciliklə məşğul olan kəndi sayılır. Fermerlər bildirdilər ki suvarma dönəmində kəndə 700 — 1000 litr arası su verilir ki, bunun da çoxu Birlik rəhbərinin təsarüfatına ötürülür. Bunu Elman Kazımovun il ərzində bir neçə dəfə biçilən yonca sahələri də deməyə əsas verir.

Hazırda Anbardan suyun verilişi 20 gündür ki, dayanıb. Ağstafaşay Su Anbarından bildirdilər ki, bir aydan sonra payız suvarması başlanıldığı vaxt suyun verilişi başlayacaq. Suvarma Sistemləri İdarəsinin bazasında yaradılmış su birlikləri əhali ilə yaxın təmasda olaraq suyun bölgüsünü də özləri aparır. Lakin görünən odur ki, nəinki bölgü əsasında su verir, hətta fermerlərin əkin sahələri quruyub yandığı halda birlik rəhbərinin əkin sahəsi bolluca sudan istifadə edir.

Məsələ ilə bağlı Su Birliyinə etdiyimiz müraciət cavabsız qaldığından, üz tutduq Ağstafa Rayon İcra Hakimiyyətinə. Rayon rəhbərliyindən bildirdilər ki sakinlərin şikayətindən xəbərdarıq, qısa müddətdə məsələ araşdırılacaq, məsil şəxs cəzasını alacaq.

Deryaz.az

Vəkillər Kollegiyasının üzvü Cavid Əliyev məhkəmədə vətəndaşa bəraət hökmünün çıxarılması üçün 20 min manat rüşvət almaqda ittiham olunur.

DİA.AZ-ın Gununsesi.info-ya istinadən xəbərinə görə, bu barədə Aytən Mahmudova bildirib.

Məlumata görə, işlə bağlı Nəsimi rayon məhkəməsinin hakimi Solmaz Mustafayeva Aytən Mahmudovaya bəraət versə də Bakı Apellyasiya Məhkəməsinin hakimi Habil Məmmədov bəraət hökmünü ləğv edib.

Aytən Mahmudova isə öz növbəsində vəkil Cavid Əliyevdən ona verdiyi 20 min manatı tələb edib.

Aytən Mahmudova vəkilə pulu qaytarması üçün ona Watsapp üzərindən mesajları yazıb.

Məsələ ilə bağlı Gununsesi.info-nun əməkdaşı vəkil Cavid Əliyevlə əlaqə saxlayıb.

Cavid Əliyev “Yalan deyir, böhtan atır” deyərək, telefonun dəstəyini asıb.

Mahmudovanın sosial şəbəkələrdə yaydığı mesajları təqdim edirik:

Dünya bütün sürəti ilə inkişaf edir, "kosmos əsri" anlayışı isə demək olar ki, ən son mərhələsini yaşayır. İnsanlar Marsa ayaq basılacağı günü səbrsizliklə gözləyir, ayın səthindən ərazi kirayə götürüb, göy göyərti əkir, başqa planetlərdə yaşam işıltısının olub-olmadığını parniklər vasitəsilə yoxlayırlar. Bəli, insanlığın artıq göyə balonlarla yox, kosmosa raketlərlə uçduğu bir dövrdə - kosmos dövründə Azərbaycanda mövcud olan "sovetdanqalma" yerli icra hakimiyyətləri özlərinin neolit dövrünü yenicə tamamlayaraq, texnologiya anlayışını mənimsəməyə can atırlar.
Məsələn, bir neçə gün öncə temperaturun insanı buxarlaşdırdığı bir vaxtda həyət qapısı döyüldü. Çıxdım bayıra, gördüm orta yaşlı bir kişi. Adətən qoltuğunda gəzdirdiyi sənədləri başına tutaraq gözlüyünün arxasından mənə baxır. Danışa bilmirdi, bir qurtum su istədi, suyu içəndən sonra gəlişinin səbəbini dedi. Bildirdi ki, Binəqədi Rayon İcra Hakimiyyətinin əməkdaşıdır və zibilpullarının yığılması üçün yerli sakinlərlə görüşür. Soruşdum ki, bu istidə nə qaçaqaçdır? Olmazdımı ki, günortadan sonra, hava sərinləyəndə gələsiniz? Dedi yox, bu vaxt hamı evdə olur deyə, indi gəlirik ki, sakinlərlə danışa bilək. Bundan sonra aramızda belə bir dialoq yaşandı:

- Buyurun, eşidirəm sizi, hara ödənilməlidir?

- Sizə mənə ödəyəcəksiniz, mən də sizə qəbz verəcəm.

- Adətən belə ödənişlər üçün xüsusi proqram təminatları, yaxud hesab nömrəsi və sair kimi vasitələr olur, ya da hər ev sahibinin əlaqə nömrəsinə aylıq ödənişlə bağlı mesaj gəlir. Yəni müasir üslubda kommunal xidmət borcu bu şəkildə həyata keçirilir, sizin icra hakimiyyətində bunlar yoxdur?

- Yox, biz evlərə yaxınlaşıb, ödəniş qarşılığında da qəbz veririk.

- Axı indi 21-ci əsrdir, internet dövrüdür, pulu şəxsə ödəyib, qəbz almaq ötən yüzillikdə qaldı...

- Haqlısan, amma bizdə hələ ki, vəziyyət belədir. Bəlkə gələcəkdə bu problem də müasirliyə qovuşar, bizim də canımız dincələr. Bizə də xoş deyil ki, bu istidə qapı-qapı düşüb, pul yığmaq.

Belə anlaşılmaz və qəribə dialoqun ardınca, zibilpulunu həmin şəxsə ödəməyəcəyimi bildirdim və sağollaşdıq.

Son vaxtlar bu "pulyığma kampaniyası" getdikcə artıb. Hər həftə bir icra hakimiyyəti əməşdaşı gəlib, məhəllədəki evlərin qapılarını döyür və zibilpulu tələb edir. Görəsən, icra hakimiyyətlərini əlimyandıda qapı-qapı düşüb pul toplamağa hansı ciddi səbəb vadar edir? Beş manat zibilpulu istənilir, versən də sağ ol, verməsən də. Tutsa qatıq, tutmasa da ayran. Onsuz da hansı evin ödəyib-ödəmədiyini də bilmirlər, candərdi nə aldılarsa, odur.

Hər şey bir kənara, bir insanı beş manat pula görə yayın bu istisində küçə-küçə, məhəllə-məhəllə salıb, pul yığdırmaq özü bir zülmdür, insafsızlıqdır. Binəqədi rayonunun yüzlərlə problemi var - yol keçid nişanları, dağılmış məhəllədaxili yollar, işıq xətləri, kanalizasiya... Daha hansını sayaq? Bütün bu problemlər qalıb bir kənarda, o boyda icra hakimiyyəti düşüb beş manat zibilpulunun arxasına, özü də müasir ödəniş üsulları ilə də yox, "ortada qaldı" oyunu ilə...

Mətin Şükürlü, Bizimyol.info

Qaçqınların və Məcburi Köçkünlərin İşləri üzrə Dövlət Komitəsi qeyri-hökumət təşkilatına (QHT) 800 min manata yaxın vəsait ödəyəcək.

Komitənin elan etdiyi tenderdə “Azərbaycan İcma İnkişafı üzrə Araşdırmalar Təlim və Resurs Mərkəzi” İctimai Birliyi qalib olub.

Tender müqaviləsində əhalinin bərpa və yenidənqurmadan sonra doğma torpaqlarına qayıdışı, ərazilərdə dayanıqlı icmaların yaradılması və onların yeni yaşayış şəraitinə adaptasiya olunması üçün reinteqrasiya tədbirlərinin təşkili nəzərdə tutulur. Bununla bağlı QHT-yə 769 085 manat vəsait ödəniləcək.

Qeyd edək ki, “Azərbaycan İcma İnkişafı üzrə Araşdırmalar Təlim və Resurs Mərkəzi” İctimai Birliyi 24 fevral 2014-cü ildə qeydiyyata alınıb. Birliyin qanuni təmsilçisi Dadaşov Yasin Şirin oğludur.

Yasin Dadaşov həm də təşkilatın sədridir.

Xatırladaq ki, 2021-ci ildə Yaponiyanın Azərbaycandakı səfirliyində “Mədəniyyət üzrə Ot Kökləri Layihələri üçün Qrant Yardımı” çərçivəsində “Azərbaycan Dillər Universitetində Yaponiya araşdırmalar mərkəzinin avadanlıqlarla təmin edilməsi” layihəsi üzrə qrant müqaviləsinin imzalanma mərasimi keçirilib.

Bu mərasimin iştirakçılarından biri də Yasin Dadaşov olub. O, rəhbərlik etdiyi təşkilatı təmsil edib.

Bəzi iddialara görə isə Yasin Dadaşovun sədrlik etdiyi təşkilat millət vəkili Mahir Abbaszadəyə yaxındır. Lakin M.Abbaszadə əməkdaşımızın sorğusuna cavab olaraq həmin təşkilatın onunla heç bir əlaqəsinin olmadığını bildirib.KONKRET.az

Goranboy rayonu, Baxçakürd kənd sakini Əsgərov Əlişir Yusif oğlu tərəfindən Hurriyyet.az saytının redaksiyasına şikayət məktubu daxil olub. Şikayətçi iddia edir ki, qaraciyər sirrozu, Hepatit C xəstəsi olan bibisi Əsgərova Afət Sarı qızı həkim səhlənkarlığı nəticəsində əziyyət çəkir:

"Mən, Əsgərov Əlişir Yusif oğlu, yazaraq sizdən xahiş edirəm ki, bizim şikayətimizi ictimailəşdirin. Biz savadsız Rauf həkimin əlindən təngə gəlmişik. Goranboy Rayon Mərkəzi Xəstəxanasının həkimi Rauf bütün xəstələrlə kobud davranır. Bu həkim öz vəzifəsini layiqincə yerinə yetirmədiyindən, mən ondan şikayətçi olmuşam. Bu səbəbdən də, mənim xəstəmə zülm verərək, onu öldürməyə çalışır.

Xahiş edirəm, bu həkimin özbaşınalığına son qoyulsun. “Kasıbın pulu yoxdursa, ölməlidir”, - deyə bir qanun yoxdur. Amma Goranboyda tibb işçiləri arasında “həkimə verməyə pulun yoxdursa, ölməlisən” deyə bir “qanun” var".

Məsələ ilə bağlı Goranboy Rayon Mərkəzi Xəstəxanası ilə əlaqə saxlayaraq Rauf həkimlə danışmaq istədiyimizi bildirsək də, onun əlaqə nömrəsini bizə vermədilər.

Şikayətçinin redaksiyamıza göndərdiyi video müraciəti olduğu kimi təqdim edirik:

Redaksiyadan: Qarşı tərəfin mövqeyini dərc etməyə hazırıq.

Su tələb edən Ağdam sakini Ağcabədi Rayon İcra Hakimiyyətinin başçısı tərəfindən həbs etdirilib.

Bu barədə Yenicag.az-a Ağdam rayon sakini Həsənov Nazim Çingiz oğlu məlumat verib.

Şikayətçinin sözlərinə görə, torpaq sahəsini suvarmaq üçün Ağcabədi Rayon İcra başçısına şikayət üçün gedib, ancaq onun özünü 5 sutkalıq həbslə cəzalandırıblar:

“Ağcabədi rayon Sarıcalı kəndində qardaşımın 5, mənim də 5 hektar bələdiyyə torpağımız var. Müqavilə ilə ildə min manat da vergi veririk.

Qarabağ kanalı vasitəsi ilə torpağımızı suvarırdıq. Ağcabədi Rayon Su Kanal İdarəsinin nümayəndəsi Ağayev Ceyhun bizə su vermirdi. Dəfələrlə ona haqsızlıq etdiyini demişəm.

Özlərinə məxsus olan torpaqları suvarırlar, ancaq bizə su vermirlər. Bir neçə dəfə də deyib ki, arxamda icra başçısı durur, sənə su verməyəcəm. Yeri gəlmişkən, Ceyhun Ağayev Sarıcalı kənd icra nümayəndəsi Ağayev Arifin əmisi oğludur”.

Nazim Həsənovun sözlərinə görə, Ağcabədi Rayon İcra Hakimiyyətinin başçısı Rafil Hüseynov qəbulda ona “rayonunuz işağldan azad olunub, rədd olub gedin öz rayonunuzu əkin” deyib:

“Su istəmək üçün Ağcabədi Rayon İcra Hakimiyyətinin başçısı Rafil Hüseynovun qəbuluna getdim. Ona dedim ki, torpağım susuzluqdan yanır.

Su istədim. Problemləri onun nəzəriə çatdırdım. İcra başçısı məni nəzərdə tutaraq göstəriş verdi ki, mənimlə kobud danışır, ona 5 sutka həbs verin.

Dediyi kimi də oldu. Mənə 5 sutka həbs verdilər. Mənimlə prinsip aparırlar. İcra başçısı üzümə qarşı dedi ki, torpağınız işğaldan azad olunub, rədd olub gedin öz torpağınızı əkib-becərin, imkan verin kənd sakinləri o torpaqdan istifadə etsin”.

Nazim Həsənov ölkə rəhbərliyinə müracət edərək, haqsızlığın aradan qaldırılmasında yardım istəyib.

Qarşı tərəfin mövqeyini işıqlandırmağa hazırıq.

Naxçıvanın yeni hakimiyyətinin yürütdüyü siyasətin bölgə insanında hansı təsəvvürlər yaratdığını hörmətli canişin əfəndinin nəzər-diqqətinə çatdırmaq üçün bir qahablıdan aldığım məlumatı olduğu kimi yayımlamışdım. Ümid edirdim ki, canişin əfəndi bu çılpaq həqiqətlərin ifadəsindən düzgün nəticələr çıxaracaq və öz ətrafına yenidən nəzər salacaq. Amma o mənə “xan”dan qalan trolları ilə cavab verdi. Bununla da öz siyasi “yetkinliyini” bir daha ortaya qoymuş oldu.
Bəri başdan deyim ki, canişin əfəndinin yürütdüyü siyasətin Naxçıvanda çox sayda insanın Vasif Talıbovun atasına rəhmət oxumasına yol açması məni ondan daha çox narahat edir. Ən azı o səbəbdən ki, həmin insanlar sözlərini canişin əfəndiyə çatdıra bilmədiklərindən mənə zəng edib rəhmətlərini də mənim üzümə oxuyurlar. Bununla da sanki Naxçıvanda yaşanan problemlərdən məni sorumlu tuturlar. Halbuki, dəfələrlə təkrar etdiyim kimi, Naxçıvandakı dəyişikliklərdə mənim xidmətim digər jurnalist dostlarımla bərabər bişirilən xörəkdə bir damcı duz qədərdir. Bu dəyişikliklər ilk növbədə regionumuzda gedən geosiyasi proseslərdən irəli gəlirdi və Prezident İlham Əliyev Vasif Talıbovla qarşıda dayanan çağırışlara cavab verməyin mümkünsüzlüyünü anladığından onun daha ağıllı, Qərb və Türkiyə təhsilli adamla əvəz olunmasına qərar verdi. Odur ki, Vasifin atasına rəhmət oxuyanlar buyursun, ya bəyənmədikləri dəyişikliyin əsl sorumlusu kimi Prezident Administrasiyası binasının, ya da Ali Məclisin qarşısına toplansın və hamısı bir ağızdan “Allah Vasif Talıbovun atasına rəhmət eləsin” deyərək etiraz aksiyası keçirsin. Bəlkə bu yolla Naxçıvan əhlinin ahu-naləsi öz ünvanına çatar.
O başqa məsələdir ki, Vasif "xan"ın əzizlərinə rəhmət oxuyanlar da haqlı deyillər. Hər halda Naxçıvandakı mövcud vəziyyət “xan” rejimində olduğundan daha dəhşətli deyil və bunu mən də qəbul edirəm. Bununla belə, etiraf etməliyik ki, sözügedən reallıq heç də bəzilərinin düşündüyü kimi canişin əfəndinin xidməti sayəsində ərsəyə gəlməyib. Onun əlində zərrə qədər imkan olsaydı, bəlkə də Vasif Talıbovdan daha betər rejim yaradardı. Hər halda son 7-8 ayda Naxçıvanda həyata keçirilən siyasətlər bu cür düşünməyə əsas verir.
Amma Azərbaycan hakimiyyəti Naxçıvanda ikinci “xan” təhlükəsinin ortaya çıxmasının qarşısını almaq üçün MR-də fəaliyyət göstərən güc strukturlarını onun tabeçiliyə vermədi və birbaşa paytaxta bağladı. Güc strukturlarının önəmli vəzifələrinə bütün təyinatlar da birbaşa paytaxtdan edildi. Beləcə, canişin əfəndinin Naxçıvanı tamamilə özününküləşdirmək imkanı qalmadı. Və hesab edirəm ki, həmin güc strukturları canişin əfəndiyə öz cızığından çıxmadığı müddətcə tabe olacaqlar. Səlahiyyət cızığına yaxınlaşan kimi, ona aid olduğu yerə göstərəcəklər. Və artıq gözü ayağının altına görməyən bu adam kosmik qara dəliyin cazibəsinə yaxalanmış ulduz kimi böyük sürətlə həmin sərhədə yaxınlaşır (Görünür, “ulduz xəstəliyi” buna deyirlər). Onu yoxoluşa aparan “qara dəlik” isə öz qonşu kəndliləri olan keşmiş “xan” əyanlarıdır.
Odur ki, kimsə “Vasif Talıbovun vaxtında Naxçıvan kölə kimi yaşayırdı, canişin əfəndi gəldi, vəziyyəti düzəltdi” deyib, ağanın uğurunu canişinin ayağına yazmasın. Canişinin gücü “xan”ın tör-töküntülərini başına yığıb, bir gün Qahabda, o biri gün Cəhridə toplantı keçirməyə və sakinlərin şikayətini dinləməyə çatır ki, o da bunu çox səbatsız şəkildə yerinə yetirir və istər-istəməz bölgə insanlarının təsəvvüründə özü barədə yerlibaz imici formalaşdırır. Nə yazıq ki, Naxçıvanın inkişafı üçün ayrılan dövlət vəsaitlərini belə, yalnız öz yaxın bildiyi bölgələrə yönləndirməsi də bu təsəvvürləri möhkəmləndirir. Bununla da əslində özü böyük həvəslə “qara dəliyin” cazibə mərkəzinə can atır.
Səmimi deyim, məni ən çox narahat edən də budur. Qorxuram ki, canişinin özü barədə bilərək, ya bilməyərək yaratdığı təsəvvürün ictimai rəydə formalaşdırdığı qənaət Bakının da səbr kasasını daşırsın və ona məşhur rəvayətdə deyildiyi kimi, “üç məktub” yazmaq tövsiyə olunsun.
P.S. Hörmətli canişin əfəndi, “xan”dan qalma trollarınız ya onlara nəzarət edə bilməməyinizdən, ya da sizin əmrinizə uyğun olaraq, mənim iddialarıma cavab yazırlar. Xətircəm ola bilərsiniz ki, onların “çürük” arqumentlərinin hamısına mənim də cavabım olacaq. Sadəcə, indi beynimin qızğın vaxtı onlara cavab vermək istəmirəm. Niyyətim vəziyyəti daha mürəkkəbləşdirmək deyil və soyuq ağılla polemikaları davam etdirmək istəyirəm. Əgər mürəkkəbləşmə baş verəcəksə, ilk addımı atan siz olun. Ümid edirəm ki, sələfinizin siyasi səhvindən nəticə çıxaracaq və öz trol dəstənizə tərbiyə həddini keçməməyi tapşıracaqsınız.

DİA.AZ

Məlumdur ki, Prezident İlham Əliyevin tapşırığına əsasən Füzuli şəhərinin ərazilərinə keçmiş məcburi köçkünlərin qayıdışı bu günlərdə də davam etdirilib. Sonuncu köç karvanı avqustun 21-də baş tutdu ki, həmin köç karvanı Bakı şəhərinin Qaradağ rayonundakı “Qobu park-3” yaşayış kompleksindən yola salındı. Bu mərhələdə Füzuli şəhərinə daha 24 ailə, yəni — 68 nəfər köçürülür. Düzdür, köçürülmələr həyata keçirilsə də, sakinlərin yaşam tərzi, üz-üzə qaldıqları çoxsaylı problemlər və s. bu gün də insanlarda ümidsizlik, kütləvi narazılıq hissi yaratmaqdadır. Məsələn, gundemxeber.az-a daxil olan məlumatlara görə xeyli müddət bundan öncə Füzuli rayon mərkəzində 7 mərtəbəli yaşayış binası inşa olunur və həmin binanın 4-cü mərtəbəsi 16 ailəyə, yəni təqribən 90 nəfər şəxsə verilir. Amma, 4-cü mərtəbənin sakinləri içməli su, mavi qaz, elektrik enerjisi və s. kimi problemlərlə üz-üzə qalırlar. Belə bir problemlərin aradan qaldırılması ilə bağlı sakinlərin Füzuli RİH-nin başçısı Alı Alıyevə ünvanladıqları müraciətlər, etdikləri çoxsaylı xahişlər heç bir nəticə vermir. Elə ki, 4-cü mərtəbədə yerləşdirilən 16 ailənin sakinləri bu gün Prezident İlham Əliyevin Fizuli rayonuna səfər edəcəyi haqda məlumatlı olurlar, o halda onlar ölkə rəhbərini üz-üzə qaldıqları problemlərin varlığı haqda məlumatlandırmaq qərarına gəlirlər. Düzdür, sakinlər belə bir qərarlarını verirlər, amma RİH-nin başçısı Alı Alıyev isə fərqli qərarını verir. Yəni, rayon rəhbərliyi vəzifə səlahiyyətindən sui-istifadə edib, güc sturukturlarının köməkliyi ilə 16 ailənin 35 nəfər aktiv üzvünü məcburi qaydada MRX-na yerləşdirir və xəstəxananın giriş qapılarını tam şəkildə bağlatdırır. Rayon rəhbərliyinin belə bir addımını atmaqda əsas məqsədi o olur ki, həmin sakinlərin narazılıqları haqda ölkə rəhbərinə heç bir məlumat çatdırılmasın. Bununla da Alı Alıyev sakinlərin Prezidentə edəcəkləri şikayətlərin qarşısını almağa çalışır. Amma, o, onu unudur ki, 35 nəfər şəxsi “girov götürmək”lə, yaxud da onlara hansısa formada təzyiq göstərməklə, baş qaldıran kütləvi narazılıqların qarşısını almaq heç mümkün olmayacaq. Çünki, cənab Başçı bilməlidir ki, yerin də “qulağı var”.
Mövzu diqqətimizdədir.
Dəryaz.az