Avropa İttifaqının (Aİ) üzvü olmayan və dünyada baş verən bir çox böhran, münaqişələrdə bitərəf mövqedə qalan İsveçrə Rusiyanın Ukraynaya qarşı təcavüzünə cavab olaraq Rusiyaya qarşı sanksiyalar tətbiq etmək qərarına gəlib. Zamantv.az Bizimyol.info-ya istinadla xəbər verir ki, İsveçrə hökumətindən verilən açıqlamada, “Rusiyanın Ukraynaya qarşı hərbi müdaxiləsini nəzərə alan Federal Şura 28 fevral tarixli qərarı ilə AB-nin fevralın 23-də açıqladığı sanksiya paketlərini tətbiq etməyi qəbul edib",- deyə bildirilir.

Məlumata görə, sanksiyalar dərhal qüvvəyə minəcək. Bundan əlavə İsveçrənin Rusiya prezidenti Vladimir Putin və digər yüksək vəzifəli şəxslərə qarşı maliyyə sanksiyaları tətbiq etmək qərarına gəldiyi bildirilir. İsveçrə banklarında Rusiya məmurlarına və biznesmenlərinə məxsus vəsaitlər də dondurulacaq.

Qeyd edək ki, Avropa ölkələrinin hava məkanını Rusiyaya bağlamasına paralel olaraq İsveçrə də bu gündən etibarən hava məkanını Rusiya üçün bağlayıb. Həmçinin şura, Rusiya vətəndaşları üçün vizaların verilməsini asanlaşdıran 2009-cu il müqaviləsini də qismən dayandırıb.

Xatırladaq ki, sanksiyaların nəticəsində Rusiyada 1 dollar 77 rubldan 109 rubla qalxmışdı. Amma Rusiyada bu qiymətə də dollar almaq mümkün deyil. Qara bazarda heç 200 rubla da dollar tapmaq olmur. Həmçinin Rusiyanın istehlak bazarında bir çox məhsulların qiyməti kəskin artıb. Hava məkanının bağlanması üzündən hava daşımaları iflic olub. Bundan başqa xaricdə təhsil alan Rusiya vətəndaşlarının da Avropada oturum hüququ ləğv edilir. Ölkənin bank sektoru çöküb. İnsanlar pul vəsaitlərini dollar olaraq nağdlaşdırmağa çalışırlar. Ölkədə narazılıqlar artsa da, bu ana qədər polis qüvvələri etirazları boğa bilirlər.

Son olaraq Zelenski Rusiyanı BMT Təhlükəsizlik Şurasının daimi üzvlüyündən çıxarmağa çağırıb. Qeyd edək ki, BMT Təhlükəsizlik Şurasının 5 daimi üzvü var - ABŞ, Çin, Fransa, İngiltərə və Rusiya. Qurumun fəlsəfəsinə görə, onlar dünyanın təhlükəsizliyinə zəmanət verirlər. Amma Rusiya artıq neçə illərdir qonşularına qarşı təcavüz nümayiş etdirir. Hazırda isə Ukraynanı işğal etməyə qalxıb. Zelenski bildirib ki, başqa ölkəlkərə təcavüz edən bir ölkə dünyanın təhlükəsizliyindən sorumlu ola bilməz.

Türkiyə Prezidenti Rəcəb Tayyib Ərdoğan da "dünya 5-dən böyükdür" deməklə BMT Təhlükəsizlik Şurasının tərkibinə dəfələrlə etiraz edib. İndi baş verənlər Türkiyə liderinin haqlı olduğnu bir daha ortaya qoyur.

Qarabağda mənzillənmiş erməni separatçıları davamlı olaraq Moskvaya üz tuturlar. Zamantv.az JAMAZ.İNFO-ya istinadla xəbər verir ki, Arayik Haruityunyan, David Babayan və digərlərindən sonra, sözügedən terrorçulara müxalif olan David Qalstyan və dəstəsi də Rusiyada olublar.

Özünü “ədalət partiyası”nın rəhbəri kimi təqdim edən Qalstyan bildirib ki, onlar Moskvada QHT rəhbərləri, siyasətçilər və mədəniyyət xadimləri ilə görüşüblər. Əsas görüşləri isə Rusiya Federasiya Şurasında olub. Onun sözlərinə görə, səfərdən sonra Qarabağda Rusiya ilə əlaqələri daha da dərinləşdirmək məqsədi ilə yeni QHT yaratmağa hazırlaşırlar.

Qeyd edək ki, Qarabağdakı “müxalifət”in davamlı olaraq Rusiyaya üz tutması səbəbsiz deyil. Son zamanlar, separatçıların rəhbəri Arayik Harutyunyanın istefa verəcəyinə dair xəbərlər yayılıb. Hətta Arayikin yaxın adamları da bunu inkar etmirlər. Belə olan vəziyyətdə onun yerini tutmağa çalışanlar arasında David Qalstyan da var. Elə Qalstyan və dəstəsinin Moskvaya getməsi də Kremldən bu razılığı almaq məqsədi güdə bilər.

Xəbər verdiyimiz kimi, dünən Prezident İlham Əliyev Mehdi İldırım oğlu Səlimzadənin Göyçay Rayon İcra Hakimiyyətinin başçısı vəzifəsindən azad edilməsi haqqında Sərəncam imzalayıb. Zamantv.az -ın məlumatına görə, qaynarinfo-ya açıqlama verən icra başçısının birinci müavini İkram Vəliyev bildirib ki, hazırda rayona rəhbərlik ona tapşırılıb: "Hələlik icra başçsının vəzifələrinin icrası bir neçə günlük mənə tapşırılıb”.

İkram Vəliyev deyib ki, Mehdi Səlimzadə vəzifəsindən azad olunacağını heç özü də bilmirmiş: "Bir yerdə işimizin başında idik. Vəzifədən azad olunması ilə bağlı sərəncam imzalandı. Yəqin ki, özü bunun səbəbini yaxşı bilər. Mənim isə ətraflı heç bir məlumatım yoxdur”.

Qeyd edək ki, Mehdi əlimzadə bu vəzifəyə 2016-cı il iyunun 10-da təyin olunmuşdu.

Belarus Prezidenti Aleksandr Lukaşenko Belarusun Rusiyanın Ukraynaya hərbi müdaxiləsində iştirak etmək istəmədiyini söyləyib. Zamantv.az APA-ya istinadən xəbər verir ki, o, Belarus Ordusunun hərbi əməliyyatlarda gələcəkdə də iştirak etməyəcəyini əlavə edib.

“Bundan əlavə, Rusiya rəhbərliyi hərbi əməliyatlarda iştirak etməklə bağlı qarşımıza tələb qoymayıb. Biz gələcəkdə də Ukraynadakı xüsusi əməliyatda iştirak etməyi düşünmürük. Belə bir ehtiyac yoxdur.

“Ukraynanın paytaxtı Kiyevdə vəziyyət gərgin olaraq qalır. Rusiya işğalçıları bütün Ukraynada mülki infrastrukturları məhv edir, raket zərbələri endirirlər”.

Zamantv.az “Report”a istinadla xəbər verir ki, bu barədə Ukrayna Müdafiə Nazirliyinin feysbuk səhifəsində məlumat yayılıb.

“Rusiyanın hərbi-texniki karvanı paytaxt ətrafında xaotik hərəkət edir. Müdafiə qüvvələri Kiyevin müdafiəsi üzrə tapşırıqları yerinə yetirirlər. Rusiya hərbçiləri texnikaları buraxıb. “NLAW”, “FGM-148 Javelin” və “Bayraktar” havadan daha çox atəşə tutublar”, - deyə Ukrayna Quru Qoşunları komandanı, Kiyevin müdafiəsi komandanı general-polkovnik Aleksandr Sırski bildirib.

Bakının Xəzər rayonunda 1962-ci il təvəllüdlü Kazım ailə münaqişəsi zəminində qardaşının arvadı Ədilə və onun kürəkəni Elbəyə (adlar şərti verilib – red.) xəsarət yetirib. Zamantv.az demokrat.az-a istinadən xəbər verir ki, Kazım 29 iyun 2021-ci ildə, saat 22.30-da Türkan qəsəbəsində Dəniz kənarı küçədə Elbəyin evinin həyətyanı sahəsinə gedib. Orada ucadan səs-küy salıb, Elbəyin narahatlığına səbəb olub.

Elbəy Kazımdan həyətini tərk etməsini tələb edib. Kazım isə oranı tərk edərkən söyüş söyüb, evin qarşısındakı küçədə Elbəyin ondan nəyə görə söyüş söydüyünü soruşduqda, onun sol qaşüstü nahiyəsindən yumruqla vurub.

Daha sonra Kazım Elbəyin yaxasından tutaraq itələyib. Elbəy yerə yıxılıb, xəsarət alıb.

Bundan başqa, Kazım həmin gün saat 23.45-də Türkan qəsəbəsində əsas yoldan 500 metr aralıda olan küçədə dayanmış Ədilədən yolda niyə durduğunu soruşub. Ədilə isə evə getdiyini bildirib. Bu zaman Kazım onu da yolun ortasında döyüb.

İstintaq orqanı tərəfindən Kazımın barəsində Cinayət Məcəlləsinin 221.2.1-ci (bir qrup şəxs tərəfindən və ya təkrar xuliqanlıq) maddəsi ilə ittiham elan edilib.

Cinayət işi üzrə təqsirləndirilən şəxs qismində ifadə verən Kazım ona elan olunmuş ittiham üzrə özünü təqsirli bilib. O bildirib ki, Ədilə onun vəfat etmiş qardaşının arvadıdır: “Elbəy isə Ədilənin qızının həyat yoldaşıdır. Onların heç biri ilə heç bir ədavətim yoxdur. İyunun 29-da, saat 22.30-da qardaşım Həbib ilə birlikdə dəniz kənarına gedərkən Elbəyin evinin yanından keçdikdə onun həyətinə daxil olduq. Biz sərxoş olduğumuz üçün səsimizin tonunu idarə edə bilmirdik. Həmçinin, mən bir az ağır eşitdiyimdən Həbib ucadan danışırdı. Bu zaman Elbəy evindən çıxdı, bizim yanımiza gələrək aşağı tonda danışmağımızı və onun həyətini tərk etməyimizi tələb etdi. Bundan əsəbiləşərək ünvansız söyüşlər söydüm, Elbəyin həyətini tərk etdim. Elbəy söyüş söydüyümə görə irad bildirdi. Mən isə bundan əsəbiləşdim, Elbəyin üz nahiyəsindən yumruqla vurdum və əllərim ilə onun yaxasından tutaraq itələdim. Nəticədə Elbəy yerə yıxıldı. Bundan sonra biz oranı tərk edərək getdik”.

Təqsirləndirilən şəxs deyib ki, bir qədər sonra əsas yolun yaxınlığında Ədilənin tək dayandığını görüb: “Ona yaxınlaşaraq gecə vaxtı burda nə etdiyini soruşdum. Ədilə evə getdiyini və bunun mənə heç bir dəxli olmadığını bildirdi. Bundan əsəbiləşdim, Ədiləni söydüm. Onun üz nahiyəsindən 3 dəfə yumruqla vurdum. Kənarda olan tanımadığım bir şəxs müdaxilə edərək bizi ayırdı. Bundan sonra evə getdim”.

Cinayət işi üzrə zərərçəkmiş şəxs qismində ifadə verən Elbəy bildirib ki, iyunun 29-da, saat 22.30-da həyətində Kazım tərəfindən döyülməsi ilə bağlı qayınanası Ədiləyə zəng edərək məlumat verib.

Zərərçəkmiş qismində tanınan Ədilə isə bildirib ki, dərhal Elbəyin evinə gedib və onun bədəninin müxtəlif nahiyələrində xəsarətlər olduğunu görüb: “Elbəy mənə Kazım və Həbibin sərxoş vəziyyətdə evinin həyətinə gələrək səs-küy saldıqlarını, buna görə də onlara sərxoş halda evinin həyətinə gələrək səs-küy salmalarına irad bildirdyini, onu vurduqlarını bildirib. Mən də Daxili İşlər Nazirliyinin “102” xidmətinə zəng edərək bu barədə məlumat verdim. Polis əməkdaşları mənimlə əlaqə yaradaraq gəldiklərini bildirdi. Polisləri qarşılamaq üçün əsas yoldan 500 metr aralıda yerləşən küçəyə çıxdım. Burada Kazım mənim qarşıma çıxdı. Kazım məndən hara getdiyimi soruşdu. Kazıma evə getdiyimi bildirdim. Bu zaman Kazım məni söyərək yumruqla sağ üz nahiyəmdən vurdu. Mən də büdrədim. Kazım təkrar olaraq sol üz nahiyəmdən və burnumdan yumruqla vurdu. Yerə yıxıldım. Bu zaman tanımadığım bir şəxs məni Kazımın əlindən aldı. Kazım uzaqlaşaraq getdi”.

Ədilə deyib ki, Kazım ilə barışmaq fikri yoxdur, ondan şikayətçidir.

Bu cinayət işinə Xəzər rayon Məhkəməsində baxılıb.

Kazım 5 ay 28 gün müddətə azadlıqdan məhrum etmə cəzası təyin olunub. Onun barəsində seçilmiş polisin nəzarəti altına vermə qətimkan tədbiri dəyişdirilib, barəsində həbs növündə qətimkan tədbiri seçilib. O, məhkəmə iclas zalından dərhal həbs edilib.

Kazım cəzasını ümumi rejimli cəzaçəkmə müəssisəsində çəkməsi müəyyən edilib.

“Azərbaycanlılar Ukraynaya humanitar yardımla dəstəyin verilməsində fəal iştirak edirlər. İnsanlar təcili lazım olan hər şeyi gətirirlər. Son 24 saat ərzində 3,5 tondan çox yük toplanıb. Bu yardım tezliklə Ukraynada olacaq”. Zamantv.az “Report”a istinadla xəbər verir ki, bunu Ukraynanın Azərbaycandakı səfiri Vladislav Kanevski feysbukda yazıb.

“Qardaş Azərbaycan xalqına təşəkkür edirik! Müharibəni birlikdə dayandıracağıq”, - diplomat vurğulayıb.

Ukrayna Prezidenti Volodimir Zelenski bu gün Avropa Parlamentində çıxış edəcək. Zamantv.az “Report”a istinadən xəbər verir ki, bu barədə Ukrayna mətbuatı məlumat yayıb.

Çıxış saat 13.00-dan sonraya planlaşdırılıb, lakin dəqiq vaxt məlum deyil.

Qeyd edək ki, dünən Zelenski Ukraynanın Avropa İttifaqına daxil olması üçün ərizəni imzalayıb.

Rusiyanın Ukraynaya müdaxiləsinin beşinci günündə, Rusiya prezidenti Vladimir Putin müdafiə naziri Sergey Şoyqu və Baş Qərargah rəisi Valeri Gerasimovla görüşdən sonra Rusiya Nüvə Qarşıdurma Qüvvələrinə yüksək döyüş hazırlığı əmri verib. Zamantv.az bizimyol.info-ya istinadla xəbər verir ki, aradan qaldırıldığı güman edilən “nüvə təhlükəsi” Putinin eyhamlarından sonra yenidən gündəmə gəlib. Rusiya liderinin getdikcə “gözlənilməz” olması ilə dünyanın ən böyük nüvə silahından istifadə təhlükəsi xüsusilə ABŞ və NATO müttəfiqləri üçün son dərəcə narahatedici həddə çatıb. Britaniya mediası iddia edirdi ki, Putinin Ukraynaya müdaxiləsi zamanı üzləşdiyi müqavimət onu daha çıxılmaz və qorxulu tədbirlər görməyə sövq edə bilər. Yəni bu şayiələr doğru ola bilərmi? Avropanı hansı kabus gözləyir?

Britaniya mətbuatına görə, Putin tamamilə hər bir ssenariyə hazırdır. Britaniyanın “The Sun” qəzeti yazır ki, Putinin sərəncamında orta hesabla 5977 nüvə başlığı var, onlardan 1600-ü yerləşdirilməyə hazırdır və bu başlıqlar qurudan, sualtı qayıqlardan və təyyarələrdən buraxıla bilər.

Bundan əlavə olaraq qəzet yazır ki, Rusiyanın güclü uzaqmənzilli raketlərə döyüş başlığı kimi buraxıla bilən strateji nüvə silahları var. Onların arasında İngiltərəyə cəmi 20 dəqiqəyə, ABŞ-a isə 30 dəqiqəyə çata bilən qitələrarası ballistik raketlər var. "Şeytan" kimi qəsdən qorxunc adları olan bu strateji silahlar bütün şəhərləri məhv etmək üçün nəzərdə tutulub. Lakin bu cür silahlardan istifadə Putin üçün böyük risk deməkdir. Çünki ABŞ, İngiltərə və Fransanın ümumilikdə 5428 döyüş başlığı olduğu məlumdur. NATO qüvvələrinin də eyni dərəcədə ölümcül ehtiyata malik olduğu düşünülür.

Müstəqil “Novaya qazeta”nın əməkdaşı Pavel Felgenhauer isə Putinin öz silahlarından istifadə edə biləcəyi qənaətindədir.

"Onun üçün bir seçim Avropaya qazın kəsilməsidir. Başqa bir variant isə Şimali dəniz üzərində, İngiltərə ilə Danimarka arasında bir yerdə nüvə silahını partlatmaq və nə baş verdiyini görməkdir”, -deyə Felgenhauer bildirir.

Böyük Britaniyanın mühafizəkar deputatı Tom Tugendhat da Putinin nüvə silahından istifadə edə biləcəyini düşünənlər sırasındadır. O, “The Sun”a açıqlaması zamanı deyib: "Rusiya ordusuna nüvə silahından istifadə etmək əmri verilməsi həyəcan verici, lakin qeyri-mümkün deyil".

Bəzi mütəxəssislər isə bunun hiylə ola biləcəyinə inanırlar. Məsələn, Böyük Britaniyanın köklü təhsil müəssisələrindən biri olan UCL-dən professor Endryu Vilson mövzu ilə bağlı açıqlamasında “Putin bir az dəli rolunu oynayır. Nəzəri olaraq o, düşünür ki, əgər insanlar mənim onlardan istifadə edəcək qədər dəli olduğumu düşünürsə, bu mənim xeyrimədir”,-deyə bildirib.

Rusiyaya tətbiq edilən beynəlxalq sanksiyalar Avrasiya İqtisadi Birlyini çökdürə bilər.

Yaranmış böhranın adıçəkilən ittifaq çərçivəsində Rusiya ilə sıx iqtisadi bağlılığı olan ölkələrə ciddi təsiri qaçılmaz olacaq. Belarus AİB-in üzvü olmaqla yanaşı, həm də Rusiya ilə İttifaq Dövlətinə daxildir. Ona görə də ən ağır iqtisadi probemlərlə Berlarusun üzləşəcəyi gözlənilir. Üstəlik, Belarus Ukrayana qarşı hərbi əməliyyatlarda Rusiyaya dəstək verdiyinə görə sanksiyalara məruz qalıb. Hətta Belarusun beynəlxalq SWIFT sistemindən çıxarılması təklif olunur. Bu isə Belarusun iqtisadi çöküşünü sürətləndirə bilər. Ermənistanın da iqtisadi böhrana yuvarlanacağı gözlənilir. Çünki bu ölkənin iqtisadiyyatı Rusiyadan tam asılı vəziyyətdədir. Rusiyanın beynəlxalq ödəniş sistemindən çıxarılması Ermənistanla ticarət əməliyyatlarına ciddi problemlər yaradacaq.

Ermənistan Rusiya ilə ticarət əməliyyatlarını dollarla apardığı üçün konvertasiya prosesində əngəllərlə üzləşəcək. Qazaxıstan özünü sanksiyalardan qorumaq üçün Rusiya ilə birlikdə hərbi əməliyyatlarda iştirak etməkdən imtina etsə də, iqtisadi böhranın təsirləri ilə qarşılaşacaq. Qeyd edək ki, 2021-ci ildə Rusiya və Qazaxıstan arasında ticarət dövriyyəsi 19 milyard dollar təşkil edib. Ona görə də sanksiyalar Qazaxıstan iqtisadiyyatında ciddi hiss olunacaq. Zamantv.az -ın məlumatına görə, iqtisadçı-ekspert Cümşüd Nuriyev “Cümhuriyət”ə bildirib ki, Rusiyaya qarşı sanksiyalar nəinki Avrasiya İqtisadi Birliyinə daxil olan dövlətlərin iqtisadiyyatını zərbə altında qoyacaq.

Hətta bu böhran AİB-ə üzv olmayan ölkələrə də təsirsiz ötüşməyəcək. Sanksiyalar AİB-in və Gömrük İttifaqının dağılmasına da gətirib çıxara bilər:

“Rusiyada inflyasiya 70 faizə çatıb. Yəni gözlənilməz inflyasiya baş verib. Belə davam edərsə, Rusiya hiperinflyasiya ilə qarşılacaq. Ona görə də Avrasiya İqtisadi Birliyinə üzv olan ölkələrlə yanaşı, Azərbaycan da özünün maliyyə təhlükəsizliyini təmin etmək məcburiyyətindədir. Avrasiya İttifaqına daxil olan ölkələrdən Belarus tam çökəcək. Çünki Belarus İttifaq Dövlətinə daxil olan ölkə kimi Rusiya ilə bütün maliyyə əməliyyatlarını rublla aparamaq məcburiyyətindədir. Mən başqa dövlətin özünün milli valyutasını Rusiya rublu ilə bağlayacağına inanmıram. Əks təqdirdə, həmin ölkə ciddi iqtisadi problemlərlə üzləşə bilər. Sanksiyaların Rusiyaya təsiri yalnız SWIFT-dəki hesabının bloklanması ilə yekunlaşmayacaq, Rusiya də 3 trilyon dollara yaxın vəsait itirəcək. Bu məbləğin 1 trilyonu artıq ABŞ-da dondurulub. Onun 2 trilyon dolları da Britaniya və Avropa banklarındadır. Yəni Rusiyanın maliyyə resursları qalmadı. Rusiyanın borclarını da nəzərə alsaq, ümumi daxili məhsul dollarla müqayisədə dəyərdən düşdüyünə görə iqtisadi çöküş baş verə bilər. Xüsuilə də aprel və may ayları Rusiya üçün çox çətin olacaq. Rusiya ehtiyatlarını həm müharibəyə xərclədi, həm də xərcləri artıb. Ona görə də yaxın iki-üç ay ərzində Rusiyanın iqtisadi cəhətdən çökmək ehtimalı çox yüksəkdir”.

Ekspert bildirib ki, hazırda Rusiyanın 263 milyard maliyyə resursu var:

“Rusiyanın qızıl ehtiyatı daha çoxdur. Lakin onu dünya bazarında alan olmayacaq. Artıq Sinqapurda Rusiya ilə ticarət əməliyyatlarını dayandırdı. Rusiyada ən təhlükəli proseslər başlayıb. Tayvan Rusiyaya mikrociplərin ixracatını dayandırdı. Bundan başqa, Çin Rusiyadan neft idxalını dayandırdı. Rusiyaya ən böyük zərbəni isə İrlandiya vurdu. Rusiyadakı “Boeing” təyyyarələrinin hamısının lizinqi İrlandiyaya məxsusdur. İrlandiya lizinq sifarişini ləğv etdiyinə görə Rusiya şirkətləri təyyarələri qaytarmaq məcburiyyətindədir. Bu isə Avropa Birliyinin sanksiyalarından daha ağırdır. O zaman Rusiyanın ağır vəziyyəti başlayacaq. Mən inanmıran ki, Avrasiya İqtisadi Birliyinə daxil olan ölkələr Rusiyanın yükünü öz üzərinə götürsün. Çünki bu ölkələrin indiki şəraitdə Rusiyanın yükünü daşımaq imkanı yoxdur. Ona görə də təşkilata üzv ölkələr Rusiyanı dəstəkləsə, çox ciddi iqtisadi problemlərlə qarşılaşacaq. Azərbaycan üçün də problemlər yaranacaq. Çünki 2021-ci ildə Azərbaycanla Rusiya arasında ticarət dövriyyəsi 3 milyard dollardan artıq olub. İndi dollar və avronun rubla nisbətən məzənnəsi rubla nisbətən hər gün bahalaşır. Əgər Azərbaycan Rusiya ilə rublla ticarət aparsa bunun iqtisadiyyatımıza ciddi mənfi təsirləri olacaq. Yəni ölkənin maliyyə təhlükəsizliyi üçün təhdidlər yarana bilər”.

Cümşüd Nuriyev bildirib ki, Avrasiya İqtisadi Birliyinin dağılması prosesi başlayıb. Rusiyaya tətbiq edilən sanksiyalar bu prosesi sürətləndirə bilər:

“Avrasiya İqtisadi Birliyi yanvar ayından dağılmağa başlayıb. Rusiya Ermənistanın əli ilə Qazaxıstana müdaxilə etməklə bu qurumun müəllifi olan Nursultan Nazrbayevi də sıradan çıxartdı. Eyni zamanda, Rusiya öz aləmində Mərkəzi Asiya ilə də sədd yaratdığını düşündü. Azərbaycanla imzalanmış “Müttəfiqlik Qarşılıqlı Fəaliyyəti” haqqında Bəyannamə də ölkəmizdən arxayın olmaq niyyəti güdürdü. Çünki burada həm də Türkiyə amili var. Ona görə də Ermənistan özünü “dar ağacına” aparır. Ona heç kim kömək edə bilməyək. Ermənistanın başqa yolu da yoxdur. Çünki Rusiya Ermənistanı siyasi və iqtisadi cəhətdən tam asılı vəziyyətə salıb. Ona görə də Avrasiya İqtisadi Birliyində ən faciəli vəziyyətə düşəcək ölkə Ermənistan olacaq. Qazaxıstan Prezidenti də Rusiya xüsusi xidmət orqanlarının agentidir. Qazaxıstandakı son hadisələr də bunu təsdiq etdi”.