“Polşa Ukraynadakı münaqişədə tərəfi deyil və öz təyyarələrini ora göndərməyəcək”.

Bu sözləri Polşa Prezidenti Andjey Duda NATO-nun baş katibi Yens Stoltenberqlə görüşdən sonra bildirib.

“Biz öz təyyarələrimizi (Ukraynaya - red.) göndərmirik, əks halda bu, NATO-nun münaqişəyə daxil olması demək olardı. Alyans münaqişədə tərəf deyil. Təyyarələrimiz hazırda Ukraynaya uçmur”, - deyə Polşa Prezidenti vurğulayıb.

Mənbə: RİA Novosti

“Xerson şəhəri tam mühasirədədir. Dünən saat 05:00-dan başlayaraq Rusiya hərbi karvanı qərb istiqamətindən şəhərə daxil oldu, genişmiqyaslı hücumu başladı”.

Bunu APA-ya açıqlamasında Ukrayna Xerson Azərbaycanlıları Diaspor Təşkilatı Ağsaqqallar Şurasının sədri Əlimərdan Kərimov bildirib.

Ə.Kərimov deyib ki, şəhərdə bir məktəb və bir çoxmərtəbəli bina raket zərbəsinə tuş gəlib, hazırda şəhər daxilində döyüşlər gedir.

Şəhərdən təxliyənin təhlükəli olduğunu vurğulayan Ukrayna Xerson Azərbaycanlıları Diaspor Təşkilatı Ağsaqqallar Şurasının sədri azərbaycanlı əhalini evlərində qalmağa çağırdıqlarını söyləyib:

“Düzdür, əhali minimum müddət üçün ərzaq toplayıb, telefonlar hələ işləyir, elektrik var. Bəzi yerlərdə telefon xətləri qırılıb, ancaq əksər yerlərlə telefon əlaqəmiz var. Ancaq mağazalarda ərzaq məhsulları da tükənir. Şəhərdə dünən gəzmək mümkün idisə, bu gün artıq gəzmək çox təhlükəlidir, faktiki mümkünsüzdür. Ona görə də soydaşlarımızı “WhatsApp” qruplarımızda, sosial şəbəkələrdə evlərində qalmağa çağırırıq. Soydaşlarımız arasında yaralanan və həyatını itirənlər yoxdur. Ancaq artıq evdən çıxmaq təhlükəlidir, təhlükəsizlik üçün ilk növbədə evdə qalmaq lazımdır”.

Ə.Kərimov Xersonu tərk etmək üçün müraciət edən soydaşlarımıza da evlərində qalmağı tövsiyə etdiklərini söyləyib:

“Çünki şəhərdən təhlükəsiz çıxış faktiki mümkün deyil”.

Qeyd edək ki, Xerson şəhər meri İqor Kolxayev “Facebook” səhifəsində yazıb ki, şəhər atəş altındadır:

“Yaşayış evləri və şəhərdəki digər mülki obyektlər yanır. Mən hazırda öz yerimdəyəm. Mənim indi vəzifəm Xersonda Ukrayna bayrağının dalğalanmasını, mülki vətəndaşların həyatının qorumasını təmin etməkdir. Şəhər yaşamalıdır, küçələrə çıxmayın. Mən Rusiya hərbçilərinə və onların rəhbərliyinə müraciət edirəm. Siz istədiyinizi almısınız. Bizim şəhəri tərk edin, mülki əhaliyə atəş açmanı dayandırın”.

Cenevrədə tərksilaha dair beynəlxalq konfransda Rusiyanın xarici işlər naziri Serqey Lavrovun çıxışının yayımı zamanı bir sıra Qərb nümayəndə heyəti boykot əlaməti olaraq zalı tərk edib.

Bu barədə “Frans-Press” agentliyi xəbər verib.

“Diplomatlar Lavrovun öncədən lentə alınmış çıxışının əvvəlində nümayişkaranə şəkildə zalı tərk ediblər”, - deyə məlumatda bildirilir.

Agentlik əlavə edib ki, rusiyalı naziri dinləmək üçün konfrans zalında qalanlar arasında Yəmən, Əlcəzair, Venesuela, Suriya və Tunisdən olan nümayəndə heyətləri olub.

Dünən Ukraynada azərbaycanlı gənc Əziz Haqverdiyev əsir götürülüb.

Əsir götürülən şəxs haqqında bir sıra iddialar səsləndirilib. Belə ki, onun Rusiya ordusuna qatılaraq Ukrayna əleyhinə vuruşduğu və ya evlərini tərk edən ukraynalıların evlərindən oğurluq etdiyi deyilir.

Əzizin qardaşı Elçin Haqverdiyev səsləndirilən iddialarla bağlı azxəbər.com-a müsahibə verib.

Həmin müsahibəni təqdim edirik:

- Əzizdən yeni bir xəbər var?

- Hələlik heç bir yenilik yoxdur.

- Rusiya ordusunda Ukraynaya qarşı döyüşdüyü deyilir.

- Bu necə ola bilər axı? Əziz tələbədir, o Ukraynada, FHN akademiyasında təhsil alır. 10 gün içərisində necə Rusiya tərəfə keçə bilər? Neçə ildir Ukraynada tələbə olan Əziz necə belə addım ata bilər? Son dəfə fevralın 21-i anamla danışıb və ona pul göndərmişik.

- Boş evlərdən oğurluq etməsi iddiaları ilə bağlı nə deyə bilərsiniz?

- Boş evdən nə oğurlaya bilər ki? Uzağı çörək götürə bilər. Camaat acından ölür orada. Hamı zirzəmiyə yerləşdirilib. Kart sistemi, bankomat işləmir. Bu zaman çörəyi haradansa götürməlisən. Düzü heç ona da inanmıram.

- Əzizin Rusiyaya münasibəti necədir?

- Əziz namazqılan, tərbiyəli, mədəni oğlandır. O, niyə Rusiya tərəfdən döyüşməlidir? Bu variantı mən heç cür qəbul edə bilmirəm.

- Bəs Azərbaycana gətirilməsi ilə bağlı hansı işlər görülür?

- Xarici İşlər Nazirliyinə ərizə ilə müraciət etmişik. Hazırda Qızıl Aypara Cəmiyyətindəyik. Başqa əlimizdən heç nə gəlmir.

Qeyd edək ki, Əziz adlı şəxs əsir düşərkən ev ünvanını açıqlayıb və anasından onu bağışlamasını istəyib.

Prezident Volodimir Zelenski Avropa Parlamentinin iclasında onlayn çıxış edərək, Avropanı Ukraynanı dəstəkləməyə çağırıb.

Zamantv.az Ukrayna KİV-ə istinadən xəbər verir ki, Zelenski çıxışında Avropa İttifaqına ölkəsinin üzvlüyünün sürətləndirilməsi üçün müraciət edib.

"Bizim çox motivasiyalı xalqımız var, biz hüquqlarımız, azadlığımız, həyat üçün, yaşamaq üçün mübarizə aparırıq. Biz Avropanın bərabərhüquqlu üzvləri olmaq üçün mübarizə aparırıq. İnanıram ki, bu gün biz hamıya göstəririk ki, Avropa İttifaqı bizimlə mütləq daha güclü olacaq. Əks halda Ukrayna tənha olacaq. Biz öz gücümüzü sübut etdik. Biz sübut etdik ki, ən azı sizinlə eyniyik. Bizimlə olduğunuzu sübut edin, bizi buraxmadığınızı sübut edin. Sübut edin ki, siz həqiqətən avropalısınız, onda həyat ölümə, işıq da qaranlığa qalib gələcək. Ukraynaya eşq olsun”, deyə Ukrayna prezident bildirib.

Ukraynanın Azərbaycandakı səfiri azərbaycanlıların Ukrayna üçün topladığı humanitar yardım və dəstəkdən bəhs edib.

Zamantv.az xəbər verir ki, bu barədə Vladislav Kanevski "Facebook"dakı hesabında yazıb.

"Azərbaycanlılar Ukraynaya humanitar yardımla dəstəyin verilməsində fəal iştirak edirlər. İnsanlar təcili lazım olan hər şeyi gətirirlər. Son 24 saat ərzində 3,5 tondan çox yük toplanıb ki, bu yardım tezliklə Ukraynada olacaq. Qardaş Azərbaycan xalqına təşəkkür edirik! Müharibəni birlikdə dayandıracağıq!", - səfir qeyd edib.

Belarus qoşunları Ukraynanın Çerniqov vilayəti ərazisinə daxil olub.

Zamantv.az xəbər verir ki, xəbəri “Şimal” ərazi müdafiə qüvvələrinin regional idarəsinin nümayəndəsi Vitali Kirillov təsdiqləyib.

Bildirilib ki, Belarus qoşunları yerli vaxtla saat 11.30-da Mixaylo-Kotsyubinski qəsəbəsindən keçib.
Hərbi texnikalar arasında mobil rabitə əlaqəsinin itdiyi qeyd edilib.

Şagirdlərin məktəbəqədər təhsil müəssisələrinə qəbuluna yay aylarından başlanılacaq.

Zamantv.az xəbər verir ki, bunu təhsil naziri Emin Əmrullayev brifinqdə bildirib. Onun sözlərinə görə, artıq sentyabrda məktəbəqədər təhsil müəssisələrinə şagirdlərin qəbulu yay aylarından onlayn qaydada keçiriləcək:

“Bu isə əsaslı şəkildə xoşagəlməz halların aradan qaldırılmasına səbəb olacaq. Bu il bağçalara işə qəbulla bağlı vakansiyaların elan edilməsi və qəbulu müəllimlərin işə qəbulu vasitəsilə olacaq. Bununla bağlı nümunəvi sual və sualların mahiyyəti Novruz bayramından sonra açıqlayacağıq".

"Son məqamda Rusiya taktiki nüvə silahından istifadə edə bilər. Çünki son dərəcə çıxılmaz vəziyyətdir. Əgər Rusiya geri çəkilsə, daha pis vəziyyətlə üzləşəcək. Hesab edirəm ki, ən qorxulu məqam taktiki nüvə silahının tətbiqidir". Zamantv.az bakupost.az-a istinadla xəbər verir ki, bu fikriləri hərbi ekspert Azad İsazadə deyib.
Ekspert qeyd edib ki, bu, faktiki olaraq III Dünya Müharibəsinin başlanması deməkdir:
“Rusiyaya qarşı sanksiyalar tətbiq olunur, ona qarşı ciddi təzyiqlər var. Ancaq buna baxmayaraq, Rusiyanın Ukraynaya qarşı işğalı davam edir. Rusiya geri çəkilən deyil. Rus ordusundan illərdir ki, ağzı dolu danışılırdı. Amma Ukraynadakı hadisələr göstərdi ki, rus ordusu özündən on qat zəif Ukrayna ordusuna heç nə edə bilmir və rus ordusunun imici dağılır. Əldə nüvə silahı var və belə getsə, onu ortaya çıxarmalı olacaqlar”.

Peskov Kiyevin Avropa İttifaqına daxil olmaq ərizəsinə münasibət bildirib. Zamantv.az Ölkə.Az-a istinadən xəbər verir ki, bu barədə "RİA Novosti məlumat yayıb.

"Bu, hərbi-siyasi blok deyil, ona görə də mövzu strateji təhlükəsizlik məsələlərinə uyğun gəlmir" - Peskov söyləyib.