Fransa prezidenti Emmanuel Makron Rusiyanın Ukraynaya hərbi müdaxiləsi ilə mübarizə proqramı çərçivəsində ölkəsində qeydiyyatda olan sanksiya siyahısındakı rusiyalı oliqarxların əmlaklarının yoxlanılmasını və inventarlaşdırılmasını tələb edib.

Bu barədə Fransanın İqtisadiyyat və Maliyyə naziri Bruno Le Mer məlumat verib.

Onun sözlərinə görə, Fransa rəsmiləri Rusiya hakimiyyətinə bağlı və Fransada aktivləri olan şəxsləri müəyyənləşdirəcək. Bundan sonra isə onların villaları, yaxta və lüks avtomobillərinə həbs qoyulması məsələsinə baxılacaq.

Böyük Britaniyada da simmetrik addımlar hazırlanır. Kralllığın xarici işlər naziri Liz Trass artıq Britaniyada sanksiya siyahısında olan rus oliqarxlarına məxsus daşınmaz əmlaka həbs qoyulacağını bəyan edib.

Mənbə: focus.ua

Ukraynada teleqüllənin raketlə vurulması itkisiz ötüşməyib. İlkin məlumatlara görə, hadisə nəticəsində beş nəfər ölüb.

Ölkə mediasında yayılan məlumatlara görə, insident nəticəsində daha beş nəfər yaralanıb.

Mənbə: rbc.ua

20:04

Ukraynanın paytaxtı Kiyevdə teleqüllənin atəşə tutulması nəticəsində bəzi telekanalların yayımı dayanıb.

B barədə Ukrayna Daxili İşlər Nazirliyi məlumat yayıb.

Bildirilib ki, yaxın saatlarda kanalların bir hissəsinin yayımı bərpa olunacaq.

19:23

Ukraynanın paytaxtı Kiyevin teleqülləsi Rusiya qüvvələrinin atəşinə məruz qalıb.

Bunu Ukrayna daxili işlər nazirinin müşaviri Anton Geraşenko teleqramda bildirib.

Raket zərbəsi nəticəsində teleqüllədə yanğın başlayıb. Hazırda yanğının davam etdiyi bildirilir.

Türkiyə prezidenti Rəcəb Tayyib Ərdoğan Avropa Birliyinə müraciət edib.

Dövlət başçısı Ukraynanın AB-yə daxil olması üçün göstərilən səyləri təqdir etdiyini bildirib.

“Bəs niyə hələ də Türkiyəni Aİ-yə qəbul etməkdə tərəddüd edirsiniz? Eyni həssaslığı Türkiyə üçün də göstərin”, - deyə Ərdoğan tanınmamış Kosovo respublikasının prezidenti Vyosa Osmani ilə birgə mətbuat konfransı zamanı bəyan edib.

O, Aİ rəsmilərini qeyri-səmimilikdə günahlandırıb.

“Yoxsa kimsə müharibə elan edib Türkiyəyə hücum edəndə ölkəmizin üzvlük məsələsini gündəmə gətirəcəksiniz? Onlar səmimi deyillər. NATO üzvləri və Aİ üzvləri sadəcə boş sözlər danışırlar. Türkiyə onları gözləmir. Türkiyə hər zaman mövqeyini qoruyan bir ölkədir”, - Türkiyə prezidenti vurğulayıb.

Mənbə: “Haber Global”

“Anonymous” hakerlər qrupu növbəti dəfə Rusiyanın dövlət resurslarına kiberhücum təşkil edib.

Bu barədə qrupun sosial şəbəkə səhifəsindən məlumat yayılıb.

Bildirilb ki, hakerlərin budəfəki hədəfi Rusiya İqtisadi İnkişaf Nazirliyi olub.

Məlumata görə, kiberhücum nəticəsində nazirliyin məlumat bazası “sındırılıb”.

Qeyd edək ki, “Anonymous” Ukraynaya hərbi müdaxiləsi səbəbindən Rusiyaya müharibə elan edib.

ABŞ-ın Azərbaycandakı səfirliyi Ukraynaya dəstək verib.

Belə ki, səfirliyin binası Ukrayna bayrağının rəngləri ilə işıqlandırılıb.

Bununla bağlı məlumat ABŞ-ın Azəbaycandakı səfirliyinin “Facebook” səhifəsində paylaşılıb.

Avropa Parlamentinin deputatları yekdilliklə Rusiyanın Ukraynadakı hərbi əməliyyatını pisləyən və Moskvaya qarşı sərt sanksiyaların tətbiqinə çağıran qətnaməni təsdiqləyiblər.

Avropa Parlamentinin deputatları Aİ-ni Ukraynaya birlik üzvlüyünə namizəd statusunun verilməsi üzərində işləməyə çağırıb.

Parlamentarilər Rusiyadan neft və qaz idxalını məhdudlaşdırmaq və bütün limanları Rusiya gəmiləri üçün bağlamağı təklif ediblər.

Onlar qeyd ediblər ki, Rusiyaya qarşı sanksiyalar genişləndirilməli, iqtisadiyyat və strateji hərbi-sənaye bazasının zəifləməsinə yönəldilməlidir.

Həmçinin, qətnamədə Avropa Parlamenti Aİ-ni Rusiya və Belarusu SWIFT-dən tamamilə ayırmağa çağırıb.

Birlik ölkələrində Rusiya Federasiyasının diplomatik və konsulluq nümayəndəliklərinin sayının azaldılması təklif edilib.

Bununla yanaşı, sənəddə iqtisadiyyatı dəstəkləmək üçün Ukraynaya çox milyard dollarlıq yardım göstərmək planı hazırlanması planı irəli sürülüb.

Mənbə: TASS

Ukrayna prezidenti Volodimir Zelenskini aradan götürmək istəyən “Kadırovçular” zərərsizləşdirilib.

Bu barədə Ukrayna Təhülkəsizlik və Müdafiə Şurasının katibi Aleksey Danilov telemarafon zamanı məlumat verib.

O, bildirib ki, dəstə barədə məlumatları Ukrayna tərəfinə Rusiya Federal Təhlükəsizlik Xidmətinin (FSB) müharibə əleyhinə olan əməkdaşları ötürüb.

Elit qrupun Qostomel yaxınlığında məhv edildiyi bildirilib.

Mənbə: novyny.live

Milli Məclisin martın 4-də keçiriləcək plenar iclasının gündəliyi açıqlanıb.

"Zamantv.az" xəbər verir ki, iclasın gündəliyinə 11 məsələ daxil edilib. Bunlar aşağıdakılardır:

1. Azərbaycan Respublikasının İnsan hüquqları üzrə müvəkkilinin (ombudsmanın) illik məruzəsi haqqında.

2. “Normativ hüquqi aktlar haqqında” Azərbaycan Respublikasının Konstitusiya Qanununda dəyişiklik edilməsi barədə Azərbaycan Respublikası Konstitusiya qanununun layihəsi (üçüncü oxunuş).

3. “Tibbi sığorta haqqında” Azərbaycan Respublikasının Qanununda dəyişiklik edilməsi barədə Azərbaycan Respublikası qanununun layihəsi (üçüncü oxunuş).

4. “Gəncə şəhərinin inzibati ərazi bölgüsündə qismən dəyişiklik edilməsi haqqında” Azərbaycan Respublikası qanununun layihəsi (üçüncü oxunuş).

5. “Bələdiyyələrin əraziləri və torpaqları haqqında” Azərbaycan Respublikasının Qanununa əlavə edilmiş “Azərbaycan Respublikasında bələdiyyələrin siyahısı”nda dəyişiklik edilməsi barədə Azərbaycan Respublikası qanununun layihəsi (üçüncü oxunuş).

6. Azərbaycan Respublikasının Şəhərsalma və Tikinti Məcəlləsində dəyişiklik edilməsi haqqında Azərbaycan Respublikası qanununun layihəsi (üçüncü oxunuş).

7. “Qida təhlükəsizliyi haqqında” Azərbaycan Respublikası qanununun layihəsi (birinci oxunuş).

8. “Lisenziyalar və icazələr haqqında” Azərbaycan Respublikasının Qanununda dəyişiklik edilməsi barədə Azərbaycan Respublikası qanununun layihəsi (birinci oxunuş).

9. “Dövlət rüsumu haqqında” Azərbaycan Respublikasının Qanununda dəyişiklik edilməsi barədə Azərbaycan Respublikası qanununun layihəsi (birinci oxunuş).

10. “Dövlət əmlakının özəlləşdirilməsi haqqında” Azərbaycan Respublikasının Qanununda dəyişiklik edilməsi barədə Azərbaycan Respublikası qanununun layihəsi (birinci oxunuş).

11. “Antiinhisar fəaliyyəti haqqında”, “Yeyinti məhsulları haqqında” və “Dövlət sirri haqqında” Azərbaycan Respublikasının qanunlarında dəyişiklik edilməsi barədə Azərbaycan Respublikası qanununun layihəsi (birinci oxunuş).

“Polşa Ukraynadakı münaqişədə tərəfi deyil və öz təyyarələrini ora göndərməyəcək”.

Bu sözləri Polşa Prezidenti Andjey Duda NATO-nun baş katibi Yens Stoltenberqlə görüşdən sonra bildirib.

“Biz öz təyyarələrimizi (Ukraynaya - red.) göndərmirik, əks halda bu, NATO-nun münaqişəyə daxil olması demək olardı. Alyans münaqişədə tərəf deyil. Təyyarələrimiz hazırda Ukraynaya uçmur”, - deyə Polşa Prezidenti vurğulayıb.

Mənbə: RİA Novosti

“Xerson şəhəri tam mühasirədədir. Dünən saat 05:00-dan başlayaraq Rusiya hərbi karvanı qərb istiqamətindən şəhərə daxil oldu, genişmiqyaslı hücumu başladı”.

Bunu APA-ya açıqlamasında Ukrayna Xerson Azərbaycanlıları Diaspor Təşkilatı Ağsaqqallar Şurasının sədri Əlimərdan Kərimov bildirib.

Ə.Kərimov deyib ki, şəhərdə bir məktəb və bir çoxmərtəbəli bina raket zərbəsinə tuş gəlib, hazırda şəhər daxilində döyüşlər gedir.

Şəhərdən təxliyənin təhlükəli olduğunu vurğulayan Ukrayna Xerson Azərbaycanlıları Diaspor Təşkilatı Ağsaqqallar Şurasının sədri azərbaycanlı əhalini evlərində qalmağa çağırdıqlarını söyləyib:

“Düzdür, əhali minimum müddət üçün ərzaq toplayıb, telefonlar hələ işləyir, elektrik var. Bəzi yerlərdə telefon xətləri qırılıb, ancaq əksər yerlərlə telefon əlaqəmiz var. Ancaq mağazalarda ərzaq məhsulları da tükənir. Şəhərdə dünən gəzmək mümkün idisə, bu gün artıq gəzmək çox təhlükəlidir, faktiki mümkünsüzdür. Ona görə də soydaşlarımızı “WhatsApp” qruplarımızda, sosial şəbəkələrdə evlərində qalmağa çağırırıq. Soydaşlarımız arasında yaralanan və həyatını itirənlər yoxdur. Ancaq artıq evdən çıxmaq təhlükəlidir, təhlükəsizlik üçün ilk növbədə evdə qalmaq lazımdır”.

Ə.Kərimov Xersonu tərk etmək üçün müraciət edən soydaşlarımıza da evlərində qalmağı tövsiyə etdiklərini söyləyib:

“Çünki şəhərdən təhlükəsiz çıxış faktiki mümkün deyil”.

Qeyd edək ki, Xerson şəhər meri İqor Kolxayev “Facebook” səhifəsində yazıb ki, şəhər atəş altındadır:

“Yaşayış evləri və şəhərdəki digər mülki obyektlər yanır. Mən hazırda öz yerimdəyəm. Mənim indi vəzifəm Xersonda Ukrayna bayrağının dalğalanmasını, mülki vətəndaşların həyatının qorumasını təmin etməkdir. Şəhər yaşamalıdır, küçələrə çıxmayın. Mən Rusiya hərbçilərinə və onların rəhbərliyinə müraciət edirəm. Siz istədiyinizi almısınız. Bizim şəhəri tərk edin, mülki əhaliyə atəş açmanı dayandırın”.