ABŞ prezidenti Co Bayden Polşaya səfəri zamanı ABŞ əsgərlərinin Ukraynaya gedəcəyini bildirib.

Zamantv.az xarici mediaya istinadla bildirir ki, aşağıdakı videoda dövlət başçısının ABŞ-ın 82-ci Hava Desant Diviziyasının hərbi qulluqçuları ilə necə danışdığını görə bilərsiniz. Bayden Ukraynadakı vəziyyətdən danışıb və əsgərlərə qəribə bir ifadə ilə müraciət edib. Deyib ki, ora çatanda özünüz görəcəksiniz.

Prezidentin sözlərinin birbaşa təfsiri o deməkdir ki, ABŞ qoşunları Ukraynaya göndəriləcək. Bununla belə, Bayden tez-tez ağzından söz qaçırır və bunu nəzərə almaq lazımdır.
ABŞ rəhbərinin bəyanatı ilə bağlı Ağ Evdən hələlik rəsmi açıqlama daxil olmayıb.

Fransada prezidentliyinə namizəd Erik Zemmurun paytaxt Parisin şimalında narkomanların tez-tez toplaşdığı Porte-de-lya-Villet parkına səfəri zamanı ona içərisində su olan butulka atılıb.

Erik Zemmur CNews telekanalının “Morandini” adlı canlı proqramında olub. Proqram canlı yayımlanır və prezidentliyə namizədlərin Fransaya səfərlərini izləyir.

Belə ki, Zemmur izdihamın arasında olarkən ətrafdakı sakinlərdən biri ilə söhbət edib. Bu zaman ona tərəf hansısa əşya atılıb. Zemmur baş verənlərə “Görürsən, bura Parisdir, bu gün Fransa belədir” deyib.

Proqramın aparıcısının daha sonra dediyi kimi, bu, içərisində su olan butulka olub. Parisin polis prefekturasından bildirilib ki, Zemmura butulka atan şəxs saxlanılıb.

Ukraynanın Xarkov vilayətində insanların toplaşdığı əraziyə raket düşməsinin görüntüləri yayılıb. Bildirilir ki, sakinlər humanitar yardım növbəsində olublar.

Hadisə nəticəsində altı nəfər həlak olub, 15 nəfər xəstəxanaya yerləşdirilib.

Qeyd edək ki, hadisə martın 24-də baş verib, ancaq kadrlar bu gün yayılıb.

Rusiya limanları vasitəsilə neft tranziti qismən Aktau limanından keçən marşrutlar, Bakı-Tbilisi-Ceyhan (BTC) boru kəməri və ya Çin və ya Özbəkistana dəmir yolu daşımaları ilə əvəz edilə bilər.

“Report”un məlumatına görə, bu barədə “Argus” agentliyinin icmalında deyilir.

Martda Xəzər Boru Kəməri Konsorsiumunun (CPC) Novorossiysk yaxınlığındakı dəniz terminalında neftin yüklənməsi qəzaya görə dayanıb.

“Bazar iştirakçıları hesab edirlər ki, Xəzər regionundan neft tədarükçülərinin Rusiya limanları vasitəsilə tranzit imkanları sanksiyalarla əhəmiyyətli dərəcədə məhdudlaşdırıla bilər. Bundan əlavə, yükdaşıma tarifləri artıb, fevralın sonundan bəri Novorossiyskdən neftin daşınması xərcləri isə müharibə riski ilə əlaqədar əlavə sığorta haqqını nəzərdə tutur”, – “Argus”un analitikləri hesab edirlər.

2021-ci ildə Rusiya ərazisindən xammalın ümumi tranziti 67,1 milyon ton təşkil edib. Onların böyük əksəriyyəti (64,3 milyon ton) Qazaxıstan nefti, 1,8 milyon ton Türkmənistan, 1 milyon ton Azərbaycan neftinin ixracatçılarının payına düşüb.

“Argus”un qiymətləndirməsinə görə, Xəzər regionundan neft tədarük edənlər ixrac üçün ən böyük həcmdə xammalı Qazaxıstanın Aktau limanı vasitəsilə göndərə bilərlər (layihə gücü ildə 11,6 milyon ton olan limandan hazırda 2,1 milyon ton xammal ötürülür).

“Qazaxıstandakı iri layihələrin səhmdarları Aktaudan əsas alternativ ixrac marşrutu kimi Bakı-Tbilisi-Ceyhan neft kəməri üzrə tədarük imkanlarını nəzərdən keçirirlər”, - analitiklər qeyd edirlər. Onun layihə gücü ildə 60 milyon tondur, keçən il faktiki yüklənməsi isə 26 milyon ton olub.

Həmçinin Qazaxıstan təchizatçıları layihə gücü ildə 12 milyon ton olan Batumi Neft Terminalı (BNT) istiqamətində xammalın dəmir yolu ilə daşınması imkanlarını nəzərdən keçirirlər. Ötən il bu kompleksdən 1,5 milyon ton neft və neft məhsulları keçib.

Analitiklərin fikrincə, Qazaxıstan son illərdə Çinə xammal ixracını yalnız Qazaxıstan-Çin boru kəməri vasitəsilə həyata keçirib. Onun əsas seqmentləri Kenkiyak - Kumkol (ildə 10 milyon ton) və Atasu - Alaşankoudur (ötürmə qabiliyyəti - ildə 20 milyon ton). “Argus”un qiymətləndirməsinə görə, Qazaxıstan və Rusiyadan Çinə ildə 11 milyon ton tədarük edildiyini nəzərə alsaq, ikinci məntəqənin gücü Çinə ildə daha 9 milyon ton neft nəql etməyə imkan verir. Xammalın bir hissəsi ona dəmir yolu ilə çatdırıla bilər. Analitiklər həmçinin hesab edirlər ki, əlavə 3-5 milyon ton neft Qazaxıstandan Çinə dəmir yolu ilə Dostık-Alaşankou və Altınkol-Xorqos sərhəd keçidləri vasitəsilə çatdırıla bilər.

Agentlik qeyd edir ki, dəmir yolu ilə Özbəkistana çatdırılma Qazaxıstan ixracatçıları üçün başqa bir istiqamət ola bilər. Agentliyin mənbəsinin qiymətləndirməsinə görə, bu istiqamətdə daşımaların həcmi çətin ki, ildə 1-2 milyon tonu keçsin.

Bundan əlavə, bir sıra Qazaxıstan istehsalçıları əvəzetmə sxemi çərçivəsində İrana Trans-Xəzər neftinin tədarükünü bərpa etmək imkanını nəzərdən keçirir. Onlar İslam Respublikasına qarşı sanksiyaların yumşaldılmasından sonra mümkün olacaq.

Xatırladaq ki, martın 22-də ən böyük səhmdarları “Transneft” (24 %) və Qazaxıstanın “KazMunayQaz” (19 %) şirkətləri olan Xəzər Boru Kəməri Konsorsiumu (CPC) fırtına zamanı vurulan ziyanın aradan qaldırılması məqsədilə Novorossiysk yaxınlığındakı dəniz terminalında üç uzaqdan yanalma qurğusundan ikisinin işini dayandırıb. Energetika nazirinin müavini Pavel Sorokin bildirib ki, CPC terminalına ciddi ziyan dəydiyi təsdiqlənərsə, onu bərpa etmək üçün 1,5-2 aya qədər vaxt lazım olacaq. Eyni zamanda, potensial olaraq daşınmanın 80 %-i və ya gündə 1 milyon barelə qədər həcm itiriləcək.

Daha sonra CPC-nin Baş direktoru Nikolay Qorban bildirib ki, şirkətin Novorossiysk yaxınlığındakı dəniz terminalında neftin yüklənməsi tamamilə dayandırılıb. Boru kəməri ilə xammalın qəbulu baş verir, lakin rezervuarın tutumu sona çatır. Onun hesablamalarına görə, mart-aprel aylarında CPC terminalında neft daşımaları 5 dəfə azala bilər.

Rusiya Baş nazirinin müavini Aleksandr Novak xəbərdarlıq edib ki, terminalın bərpası zamanı bazarlara müəyyən miqdarda neft verilməyəcək və bu, onlara təsir edəcək.

Ukraynada xüsusi əməliyyat zamanı 1351 rusiyalı hərbçi həlak olub.

Bu barədə RF Müdafiə Nazirliyi məlumat yayıb.

“Təəssüf ki, xüsusi hərbi əməliyyat zamanı döyüş yoldaşlarımız arasında itkilər var. Bu günə kimi 1351 hərbçi həlak olub, 3825 nəfəri yaralanıb”, - deyə Rusiya Silahlı Qüvvələri Baş Qərargah rəisinin birinci müavini general-polkovnik Sergey Rudskoy bildirib.

Qeyd edək ki, fevralın 24-də Rusiya Prezidenti Vladimir Putin Ukraynada genişmiqyaslı hərbi əməliyyatların başlandığını elan edib.

Mənbə: TASS

Rusiya Silahlı Qüvvələri Ukraynanın 14 şəhərinin merini əsir götürüb.

Bu barədə Ukrayna Baş nazirinin müavini İrina Vereşçuk məlumat verib.

İrina Vereşçuk xatırladıb ki, Rusiya Federasiyası əsirlərin yalnız paritet şərtlərlə mübadiləsinə razılıq verib.

“Rusiya bu məsələdə paritet tələb edir, deyirlər ki, sərhədçini sərhədçi ilə, matrosu matrosla dəyişək və sair. O zaman mənim məntiqli bir sualım var: Rusiya artıq 14 Ukrayna şəhərinin başçısını girov götürüb, onları kim ilə dəyişəcəyik? Hələlik biz bu problemi beynəlxalq səviyyədə həll edirik” - Ukrayna Baş nazirinin müavini vurğulayıb.

Mənbə: Segodnya

Bir neçə gün əvvəl Rusiya İstintaq Komitəsi tanınmış jurnalist Aleksandr Nevzorova qarşı Cinayət Məcəlləsinin 207.3-cü maddəsi (Rusiya Federasiyası Silahlı Qüvvələrinin hərəkətləri haqqında qəsdən yalan məlumatların etibarlı xəbərlər adı altında ictimaiyyətə yayılması) ilə cinayət işi açıb.

Ona qarşı açılan cinayət işinə münasibət bildirən tanınmış rusiyalı jurnalist yuxarıda qeyd olunan maddənin Rusiya Federasiyası Konstitusiyasının yeni KİV haqqında qanununun 29-cu maddəsi ilə necə əlaqələndirildiyinin anlaşılan olmadığını bildirib.

Tanınmış jurnalist, teleaparıcı, publisist, Rusiya Federasiyası Dövlət Dumasının sabiq deputatı Aleksandr Nevzorov Oxu.Az-a eksklüziv müsahibəsində qeyd edib ki, o, öz fəaliyyətində “Müdafiə Nazirliyinin göstərişlərini rəhbər tutmamaqda” ittiham olunur.

-Bu, gülünc və anlaşılmaz bir məsələdir. Onların nöqteyi-nəzərindən bir həqiqət var, o da Müdafiə Nazirliyinin hesabatlarıdır. Bu xəbərlərlə razılaşmayanları isə sürgün yaxud da 15 illik həbs cəzası gözləyir. Qoy, onlar cəhənnəmə getsinlər, mən nəyi uyğun görürəmsə, onu da edəcəyəm. Mən fədakarlıqla və heç bir təmənna güdmədən mübarizə aparıram. Aydındır ki, indi mənimlə sövdələşmək istəyib, maddəni ağırlaşdırmaq və ya yüngülləşdirməyə çalışacaqlar. 15 ilin əvəzinə 10 il, bəlkə də 5 il cəza kəsəcəklər (gülür). Amma gedib işləri ilə məşğul olsunlar. Mən onlarla heç bir sövdələşməyə girməyəcəyəm.

-Gəlin, Liberal Demokrat Partiyasının lideri Vladimir Jirinovskidən danışaq. Siz öz “Telegram” kanalınızda yazmısınız ki, “Kreml hələ Jiriklə bağlı qərar verməyib... “Yazığı o tərəf-bu tərəfə çəkirlər”. O, gah ölür, gah sağ qalır...

-Cəhənnəm olsun! Nə fərqi var? İndi bunun heç bir fərqi yoxdur. Bu ziyafətdə daha bir vampirin olması, yaxud əksinə, olmaması – heç bir fərq etmir. Artıq başa düşdük ki, biz mütləq ölümsüzlərlə, zombiləşmiş, mənasız məxluqlarla qarşı-qarşıyayıq. Ona görə də bir daha təkrar edirəm: Nə fərqi var? Bir Jirik çox olsun və yaxud əksinə. Öz “Telegram” kanalımda yazdığım kimi, ola bilsin ki, orada sadəcə kiminsə məzarını isidir və onu ora-bura dartırlar.

-Gəlin, Ukraynadakı hadisələrdən danışaq. Müharibənin başlamasından bir ay keçdi, Ukrayna və Rusiya nəyə nail oldular?

- Ukrayna dünyanın bir nömrəli dövlətinə çevrildi, onun rəhbəri dünyanın bir nömrəli ən xarizmatik və nüfuzlu prezidentinə çevrildi. Ukrayna hamı tərəfindən nüfuz və hörmət qazandı. Qələbədən sonra ölkə investisiyalar, biznes, inkişaf, real siyasət üçün çox cəlbedici olacaq. Təkrar edirəm, Ukrayna öz qəhrəmanlığı sayəsində bir nömrəli ölkə olmağı bacardı. Rusiya isə rüsvayçılığa, dağıntıya və deqradasiyaya uğradı. Əgər tapşırıq bu idisə, o həll edildi, hər şey əldə edildi.

-Bəs siz müharibə başa çatdıqdan sonra dünyanın gələcəyini necə görürsünüz? Çoxları dünyanı gözləyən aclıq təhlükəsindən, digər dəhşətlərdən danışır...

- Hər şey mümkündür. Mən beş naməlum tənliyin həllinin tərəfdarı deyiləm. Hər gün hər şey dəyişir, hətta ən gözlənilməz dönüşlər də mümkündür. Üstəlik, son müharibə ilə bağlı (Qarabağdakı 44 günlük hərbi əməliyyatları nəzərdə tutur - red.) mövqeyimin timsalında göründüyü kimi, mən o qədər də yaxşı analitik və peyğəmbər deyiləm. Mən o zaman Ermənistanı dəstəkləməklə səhv etdim. İndi isə etiraf edirəm ki, haqiqət, üstünlük, güc, sonsuz cəsarət Azərbaycanın tərəfində idi. Lakin o zaman mən bunu doğru qiymətləndirə bilməmişdim.

Nair Əliyev

"Ukrayna Prezidenti Volodimir Zelenski bu həftənin əvvəlində Rusiya qoşunlarının çıxarılması, atəşkəs və Ukraynanın təhlükəsizliyinə zəmanət müqabilində rəsmi Kiyevin NATO-ya üzv olma öhdəliyini müzakirə etməyə hazır olduğunu bildirdi. Bu, kifayət qədər əsaslı təklifdir, lakin görünür, bu, Ukrayna dövlətinin məhvinə, onun tamamilə Rusiyaya tabe edilməsinə və ya qismən mənimsənilməsinə can atan Rusiya Prezidenti Putinin məqsədlərinə uyğun gəlmir". Zamantv.az xəbər verir ki, bunu Publika.az-a açıqlamasında Milli Məclisin deputatı Rasim Musabəyov deyib.

Deputat bildirib ki, Vladimir Putinin Fransa Prezidenti Makronun mülki əhalinin müharibə zonalarından çıxarılması üçün humanitar dəhlizlərin yaradılması məqsədilə atəşkəsə dair təkidli çağırışlarından xəbərsiz olması da bunu sübut edir:

"Türkiyə prezidenti Ərdoğanın vasitəçilik səyləri həm də Putinin Ukraynaya qarşı tərəflər arasında razılığa gəlməyə və müharibəni dayandırmağa mane olan qeyri-konstruktiv, hətta absurd tələbləri ilə də qarşılaşır. Bəzi əlamətlərə görə, Rusiya hərbi komandanlığı qüvvələrin yenidən toplanması və ehtiyatların çıxarılması üçün verilən qısa fasilədən sonra Ukrayna Silahlı Qüvvələrini məğlub etmək, Mariupol, Xarkov və Ukraynanın digər iri şəhər mərkəzləri üzərində nəzarəti bərqərar etmək üçün yeni kütləvi hücuma hazırlaşır. Beləliklə, müharibə, nə qədər kədərli görünsə də, ən azı daha bir ay yarım davam edəcək. Rusiya Prezidenti Vladimir Putin başa düşür ki, “qələbə” kimi qəbul oluna biləcək nəticələrə nail olmadan heç bir təbliğat hiyləsi onun gücünü və bəlkə də həyatını xilas etməyəcək. Ona görə də Ukrayna və onu dəstəkləyən beynəlxalq ictimaiyyət uzun mübarizəyə hazırlaşmalıdır".

Deputatın fikrincə, Varşava Müqaviləsinin keçmiş üzvlərinin arsenalında qalan S-300 komplekslərinin, MİQ-29, Su-25 təyyarələrinin Kiyevə təhvil verilməsi kifayət etməyə bilər: "Mən istisna etmirəm ki, hansısa mərhələdə NATO Ukraynaya yardım etmək funksiyasını kənara qoya və müharibədə birbaşa iştirakçıya çevrilməyə məcbur olacaq. Yeri gəlmişkən, Vaşinqton ilk dəfə olaraq bəyan edib ki, ABŞ-ın Ukraynadakı hərbi əməliyyatlarda iştirakını istisna etsələr də, Şimali Atlantika Alyansının ayrı-ayrı üzvlərinin Ukraynaya birbaşa dəstəyinə icazə verirlər. Üstəlik, silahlı qüvvələrinin sayını iki dəfə artırmaq qərarına gələn Polşa qətiyyətli addımlara hazırlaşır. Göründüyü kimi, vəziyyət təhlükəli trayektoriya üzrə inkişaf edir. İnanmaq istərdim ki, tərəflər dünyanı nüvə raket apokalipsisinin uçurumuna atmaq təhlükəsi yaradan xətdə dayanmaq üçün kifayət qədər ehtiyatlı davranacaqlar".

Kiyev vilayətinin Borispol şəhərində yaşayan 11 yaşlı Maksim gecə evdən qaçaraq özünümüdafiə dəstələrin qərargahına gəlib. Zamantv.az lent.az-a istinadən məlumatına görə, bu barədə könüllülərin komandanı Aleksey Kovtun özünün İnstagram səhifəsində bildirib.

Məlumata görə, Maksim ukraynalı döyüşçülərə əlindən gələni köməyi etmək istədiyini deyib. Uşağın bu hərəkəti döyüşçüləri çox təsirləndirib. Onlar Maksimə minnətdarlıqlarını bildirərək valideynlərinə qaytarıblar. Onlardan isə xahiş ediblər ki, evdən xəbərsiz getdiyinə görə, Maksimi danlamasınlar.

Rusiya Silahlı Qüvvələrinin Ukraynada itirdiyi qüvvələrin yeni sayı məlum olub. Zamantv.az "Report"a istinadla xəbər verir ki, bu barədə Ukrayna Silahlı Qüvvələrinin Baş Qərargahı feysbukda məlumat yayıb.

Bildirilib ki, indiyədək 16 100 hərbçi zərərsizləşdirilib.

Bundan başqa, hücum edən tərəfin 561 ədəd tankı, 1 625 ədəd zirehli döyüş maşını, 291 ədəd artilleriya sistemi, 90 ədəd havadan müdafiə sistemi, 49 ədəd zenit kompleksi, 115 ədəd hərbi təyyarəsi, 125 ədəd helikopteri, 1 089 ədəd nəqliyyat vasitəsi, 5 ədəd gəmi/kater, 72 ədəd yanacaq çəni, 53 ədəd dronu, 18 ədəd xüsusi texnikası məhv edilib.

“Məlumatlar daha dəqiq olur. Hesablama hərbi əməliyyatların yüksək intensivliyi ilə çətinləşir”, - məlumatda vurğulanıb.

Xatırladaq ki, Rusiya 2014-cü ilin fevralında Ukraynanın Krım Muxtar Respublikasını ilhaq edib. Bundan sonra Ukraynanın Donbas bölgəsində hərbi əməliyyatlara başlayıb. Nəticədə Donetsk və Luqansk vilayətlərinin böyük hissəsi separatçıların nəzarətinə keçib. Döyüşlər Ukraynanın Silahlı Qüvvələri və Rusiyanın dəstəklədiyi qondarma Donetsk və Luqansk respublikalarının silahlıları arasında gedib. Rəsmi Moskva döyüşlərdə iştirakının olması ittihamını rədd edib.

Daha sonra 2020-ci ilin sonundan başlayaraq Ukrayna və Rusiya arasında münasibətlər daha da gərginləşməyə başlayıb, Donbasda təmas xəttində atəşkəsin pozulması mütəmadi xarakter alıb. ABŞ başda olmaqla Ukraynanın müttəfiqləri hərbi və maliyyə cəhətdən rəsmi Kiyevə yardım etsə də, münaqişəyə birbaşa müdaxilə etməyəcəklərini vurğulayıblar.

2022-ci ilin fevralın 21-də Rusiya Prezidenti Vladimir Putin xalqa müraciətində Ukraynanın Donbas ərazisində yaradılan iki qondarma respublikanı tanıdığını bildirib. O, bununla bağlı fərman imzalayıb.

2022-ci ilin fevralın 24-də Rusiya Silahlı Qüvvələri Ukraynanın “denasifikasiya və demilitarizasiyası” (nasizm ünsürlərindən təmizlənmə və silahsızlaşdırılma), habelə Donetsk və Luqansk “respublikalarının ərazi bütövlüyünün” təmin olunması məqsədilə ölkəyə şərq, cənub (Krım) və şimal (Belarus) istiqamətlərdən hücuma başlayıb. Rusiyada “xüsusi hərbi əməliyyat” adlanan bu müharibədə indiyədək Ukraynanın bir sıra şəhərləri, o cümlədən Xerson, Melitopol şəhərləri işğal edilib. Minlərlə dinc sakin həlak olub, milyonlarla insan yurdlarından didərgin salınıb. Müharibənin ilk günlərindən Qərb Rusiyaya qarşı ən sərt iqtisadi sanksiyaları işə salıb. Nəticədə ölkənin milli valyutası rubl çöküş yaşayır. Bu sanksiyalar ilk dəfə olaraq humanitar sahələrə də toxunub.

Bundan başqa, Beynəlxalq Cinayət Məhkəməsində (Haaqa) Rusiyanın Ukraynaya qarşı təcavüzü ilə əlaqədar insanlığa qarşı cinayətlərin araşdırılmasına başlayıb.

Qeyd edək ki, Azərbaycan daxil olmaqla, BMT üzvlərinin mütləq əksəriyyəti Krım yarımadası və Donbası Ukraynanın ərazisi olaraq tanıyır.