Sabunçu Rayon Məhkəməsində hakim Tahirə Əsədovanın sədrliyi ilə Seymur Quliyevin Milli Məclisin hazırkı deputatı Əliabbas Salahzadə, onun həyat yoldaşı Xatirə Allahşükür qızı Salahzadə, deputatın atası, sabiq deputat Hacı Qalib Salahzadə və digər şəxslərə qarşı iddiasına baxılır. 1 il əvvəl məhkəməyə təqdim olunan şikayət üzrə bu günə qədər 3 məhkəmə prosesi keçirilib.

Seymur Quliyev deyir ki, məhkəmənin uzadılması qarşı tərəfin maraqlarına uyğundur. “Qalib Salahzadə özünü Sabunçu Rayon Məhkəməsinin sədri kimi aparır. Sabunçu Məhkəməsinə şəxsi notariat kontoru kimi baxır. Nə iddia versə, iddiasında nə tələb etsə, istədiyi kimi möhürləyib özünə qaytarırlar. Özü, oğlu, gəlini məhkəməyə gəlmirlər. Hər dəfə bir bəhanə ilə vaxtı uzadırlar. Mən sevinirəm ki, Prezident Administrasiyasının Vətəndaş Qəbulu Mərkəzi açılıb. Ora da gedəcəyəm. Bu günə qədər üz tutduğum ünvanlarda vətəndaşların qəbulu, şikayətlərinə baxılması haqda qanuna saymazyana münasibət görmüşəm. Sanki Azərbaycan qanunları Hacı Qalib Salahzadəyə münasibətdə gücsüzdür. Adam dövlət orqanlarını özünün feodal düşüncəsinə tabe etdirə bilir. Buna son qoyulmalıdır”, - deyə Seymur Quliyev bildirib.

Qeyd edək ki, Seymur Quliyevə məxsus Bilgəh qəsəbəsində 20 sot torpaq sahəsi zəbt olunub, ərazidəki 2 və 3 mərtəbəli evləri talan edilib və özülünə qədər sökülüb. Seymur Quliyev bu cinayətin törədilməsində Milli Məclisin sabiq deputatı Qalib Salahzadəni, onun oğlu, hazırda deputat olan Əliabbas Salahzadəni, onun həyat yoldaşı Xatirə Salahzadəni günahlandırır. Deyir ki, əmlakını dağıdan Qalib Salahzadə olub. Əmlak saxta sənədlərlə Qalib Salahzadənin oğlu Əliabbas Salahzadə, gəlini Xatirə Allahşükür qızının adına rəsmiləşdirilib. Seymur Quliyev deyir ki, 2003-cü ildə alqı-satqı yolu ilə əldə etdiyi torpaq sahəsinin, orada tikdirdiyi evlərin zəbt olunması, sökülməsi, əlində mülkiyyət hüququnu təsdiq edən sənədlər olduğu halda, həmin ərazinin son illər avtodayanacaq kimi istifadə olunur. İddiaçı bildirib ki, son 10 ildə bu problemlərlə əlaqədar dəfələrlə məhkəmə çəkişmələri olub. Əlində onun haqlı olduğunu sübut edən 13 fərqli məhkəmə qərarı var.

O vurğulayıb ki, qeyd olunan ərazidə onlar yaşadıqları halda, Xatirə Salahzadənin adına çıxarış alınıb: “Halbuki həmin vaxt 10 il idi orada biz yaşayırdıq. Əlimizdə də öz ”kupça"mız var idi. Uzun məhkəmə çəkişmələrindən sonra məhkəmədə biz haqlı olduğumuzu sübut elədik. Buna baxmayaraq, Qalib Salahzadə qoçu kimi bizi yaşadığımız evdən zorla çıxartdırdı. Evlərimi sökdürdü". Seymur Quliyev deyir ki, məhkəməyə iddianı təqdim edərkən torpağın koordinatları haqda məlumat olan sənədləri də əlavə edib. Lakin hakim Tahirə Əsədova əraziyə şəxsən baxış keçirmək istədiyindən həmin sənədlərə istinad etmir: “Yerli baxış keçirildi. İndi də Əmlak Komitəsindən sənədlərin verilməsini yubadırlar”.

Seymur Quliyev deyir ki, Qalib Salahzadə onun torpağını zəbt edərək gəlini Xatirə Allahşükür qızının adına keçirib. İddiaçı Bilgəh qəsəbəsi, keçmiş A.Salahzadə (indiki Qələbə) küçəsi, 21-ci döngədə yerləşən və ona məxsus olan 2 saylı evin və torpağının boşaldılması, dağıdılmış daşınmaz əmlakların əvvəlki vəziyyətinə qaytarılmasını, bağ sahəsinə gedən yolun açılması, torpaq üzərində olan dəmir darvazanın, şlaqbaumun, parklanma avadanlıqlarının götürülməsi vəzifəsinin cavabdehlərin üzərlərinə qoyulmasını, vurulmuş mənəvi ziyanin 2 milyon manat və maddi zərərin əvəzi kimi (manatın devalvasiyası və inflyasiya nəzərə alınmaqla) 3 milyon manat cavabdehlərdən pul tutulmasını istəyir. Habelə, xüsusi mülkiyyətində olan evin yerləşdiyi torpaq sahəsindən dayanacaq kimi istifadə edilməsinə görə beş il ərzində əldə edilmiş 450 min manat, daşınmaz əmlaklar sökülərkən dağıdılmış daşınar əşyalara görə (stol-stullar, mebel, soyuducu, qabyuyan, kondisionerlər, televizor və digər ev əşyaları) 96 min manat təzminat istəyir. Seymur Quliyevin şikayəti əsasında DİN-in Baş İstintaq və Təhqiqat İdarəsində CM-in 186 (özgənin əmlakını qəsdən məhv etmə və ya zədələmə), 188 (torpaq üzərində mülkiyyət, istifadə və ya icarə hüququnu pozma), 320 (rəsmi sənədləri saxtalaşdırma və ya saxta sənədlərdən istifadə etmə) və 322-ci (özbaşınalıq) maddələri ilə cinayət işi başlanıb, Qalib Salahzadə dindirilib. İstintaq belə nəticəyə gəlib ki, Salahzadənin əməlində CM-in 186 və 188-ci maddələrindən başqa, 308 (vəzifə səlahiyyətlərindən sui-istifadə etmə), (vəzifə səlahiyyətlərini aşma) və 222-2 (müvafiq icazə almadan mühafizə zonalarında tikinti və ya quraşdırma işləri aparma) maddələrinin də tərkibi var. Çünki hadisələr baş verəndə Qalib Salahzadə deputat idi. Bu maddələrlə istintaq aparmaq isə prokurorluğun səlahiyyətindədir. Yaxud da prokurorluq ayrıca razılıq verməlidir ki, daxili işlər orqanlarında istintaq davam etdirilsin. DİN-in Baş İstintaq və Təhqiqat İdarəsi həmin maddələrlə istintaqın davam etdirilməsinə razılıq almaq üçün prokurorluq qarşısında vəsatət qaldırıb, 14 may 2020-ci ildə cinayət işinin materialları Baş Prokurorluğa göndərilib. O vaxtdan da cinayət işinin icraatı dayandırılıb. Seymur Quliyev deyir ki, Prezident Administrasiyasının Vətəndaş Qəbulu Mərkəzinin necə işlədiyini də yoxlayacaq. Ümid edir ki, mərkəz feodal düşüncəni deyil, Azərbaycan qanunlarını üstün tutacaq.
“Yeni Müsavat”

Rusiya-Ukrayna müharibəsinin ərzaq qıtlığı, bahalaşma ilə müşayiət olunacağı son günlər ən çox müzakirə olunan məsələdir. Çörəyin qiymətinin bahalaşacağı ilə bağlı da məlumatlar dolaşır. İddia olunur ki, çörəyin qiyməti 1 manatadək yüksələ bilər. Məlumatlara görə, bəzi çörək zavodlarına unun qiymətinin bahalaşacağı ilə bağlı xəbərdarlıqlar olunub. Bu məlumatlar əhalini də təşvişə salıb. Hətta bəziləri un tədarükünü öncədən görür və bunu artım olacağı ilə əlaqələndirirlər. Bəzi ekspertlərin fikrincə, insanların əvvəlcədən tədarük görməsi, piştaxtaların boşalmasına, qıtlığa, qiymət artımına səbəb olacaq.

Nəzərə alınsa ki, Rusiya dünyada taxıl ixrac edən ölkə kimi birinci yerdədir. Ukrayna ilə Rusiya müharibə apardığı dönəmdə Rusiyaya qarşı sanksiyalar tətbiq edilir. Bu sanksiyalardan sonra bu ölkə də bu il taxıl satışını dayandırdığını bildirib. Daha bir taxıl idxalçısı Ukraynanın dəniz hövzələrinə çıxışı əngəlləndiyi üçün dünya bazarında taxılın qiymətinin sıçrayışla qalxması mümkündür. Çörəyin qiymətinin nəinki 1, hətta 2 manata yüksələ biləcəyi haqda iddialar var. Ölkəmizdə çörəyin qiymətinin bahalaşacağı gözlənilirmi? Bunun qarşısını necə almaq olar?

Yeri gəlmişkən, bu ilin yanvar ayında ölkəmizdə ərzaqlıq buğdanın, unun və çörəyin qiyməti qalxmışdı. Antiinhisar və İstehlak Bazarına Nəzarət Dövlət Xidməti məlumatında qeyd edilib ki, topdansatış məntəqələrində hazırda unun 50 kiloqramlıq kisələrdə topdansatış qiyməti 35,2-35,9 manat təşkil edir. Xidmət eyni zamanda un istehsalçılarının topdansatış mərkəzləri və məntəqələri, topdansatış qiymətləri, habelə iş vaxtı və əlaqə nömrələrinə dair siyahını da yaymışdı. Dia.az xəbər verir ki, mövzunu iqtisadçı alim Vüsalə Əhmədova “Yeni Müsavat”a belə şərh edib: “Rusiya Federasiyası 2021-ci ilin fevral ayından yüksək ixrac rüsumları tətbiq etməyə başladı, bu səbəbdən də ölkəmizə idxal olunun ərzaq buğdasının qiyməti 2019-cu illə müqayisədə təxminən 58% bahalaşdı. Hazırda idxal qiymətləri və emal xərcləri nəzərə alınmaqla, 50 kiloqramlıq bir kisə unun topdansatış qiyməti - 35.9 manat, 500 qramlıq ənənəvi çörəyin pərakəndə satış qiyməti 50 qəpik, 650 qramlıq ənənəvi çörəyin pərakəndə satış qiyməti 65 qəpikdir. Azərbaycanın illik ümumi buğda idxalı 1.365,1 min ton təşkil edir, hansı ki, bunun 1.349,8 min tonu Rusiyanın, 14,9 min tonu Qazaxıstanın, 0,4 min tonu digər ölkələrin payına düşür. İdxalda Rusiyanın payı 98.88% təşkil edir, yaxın qonşu ölkələrin bu miqdarı qısa müddətdə əvəzləyə biləcəyi real görünmür. Çörəklə bağlı qısamüddətli qiymət artımı ehtimalı var. Hazırda Rusiya və Ukraynadan taxıl idxal edən bütün ölkələr alternativ bazar axtarışındadırlar. Düşünürəm ki, alternativ bazarlar kimi Asiya ölkələri, o cümlədən dünyanın ən iri buğda istehsalçılarından biri olan Pakistan gözdən keçirilə bilər. Dünyanın digər ən iri buğda istehsalçıları Çin, Hindistan, ABŞ, Kanada və Avstraliyadır ki, bu ölkələrdən yükdaşıma və logistika xərcləri yüksək olacaq. Belə olan halda, çörəyin qiymətində kəskin bahalaşma yaranmaması üçün hökumət subsidiyalar tətbiq etməlidir”.

Ekspert qeyd edib ki, Azərbaycanın digər ölkələrdən asılı vəziyyətə düşməməsi üçün qida təhlükəsizliyi, ən başlıcası isə taxıl təhlükəsizliyi təmin olunmalıdır: “Göründüyü kimi, ani geosiyasi dəyişikliklər gözlənməyən nəticələrə gətirib çıxara bilir. Ölkədə 600 min hektarlıq əkin sahəsində buğda əkilir, ancaq məhsuldarlıq çox aşağıdır. Dənli bitkilər üzrə məhsuldarlıq 31,8%-dir, buğda üzrə məhsuldarlıq 31,7%-dir. Qarşıya qoyulan əsas məsələ məhsuldarlığı yüksəltməklə daxili tələbatı 100% ödəmək olmalıdır”.

İqtisadi Resursların Öyrənilməsi Mərkəzinin sədri Ruslan Atakişiyev də “Yeni Müsavat”a mövzu ilə bağlı fikirlərini açıqlayıb: “Konkret tədbir görülməsə, qiymət artımı qaçılmaz olacaq. Rusiyadan taxıl ixracı dayandırılır, Ukraynanın özündə qida məhsullarına ehtiyac duyulur. Başqa ölkələrdən isə taxıl məhsullarının gətirilməsi baha başa gələcək. Sahibkar subyekti orada nə qazanırsa, istər-istəməz gətirdiyi malın üstünə rüsum pulunu qoyacaq. Bu da bahalaşmaya gətirib çıxa bilər. Ona görə də vergi, gömrük, xüsusən də subsidiyalaşma ilə bağlı qərar verilməlidir. Bu sahədə əlavə dəyər vergisindən azad olma var. Dövlət artım nisbətində müəssisələr üçün subsidiyalaşma həyata keçirsə, minimum qiymətə, yəni 65 qəpiyə satılan çörəyin qiymətinin artmasının qarşısını almaq olar. Təbii ki, burada ƏDV-dən azad olmalar var. Çünki onsuz da bazarda 2 manat-2 manat 50 qəpiyə çörəklər də var. Əhalinin daha çox hissəsi minimum qiymətə olan çörəyi alır. Ona görə düşünürəm ki, dövlət burada kompensasiya tədbirləri görsə, qiymət artımından qaçmaq olar. Çünki özəl sahibkarlıq subyektləri də bunları alırlar. Sahibkarlıq subyektlərinə qiyməti qaldırmaq demək mümkün olmayacaq. Həmin müəssisələrin özlərinin də xərcləri var, ona görə burada dövlət dəstəyi olmalıdır. Bizim gəlirlərimiz neft satışından artır. Bir halda ki, gəlirlərimiz artır, oradakı gəlirlər hesabına burada- əhalinin aşağı sosial təbəqəsi nəzərə alına bilər. Onsuz da başqa mallarda qiymət artımı müşahidə edilir. Adi şirniyyat məhsulları -şokolad, konfetin qiyməti 30-40 faiz bahalaşıb. Amma bu sosial təbəqənin minimum istehlak səbətinə daxil olan qida məhsulları var. Bununla bağlı Nazirlər Kabinetinin qərarı var. 30-a yaxın məhsul növü var ki, onun ölkədən çıxarılması ilə bağlı tələblər qoyulub. O da istər-istəməz qiymət qalxmasına hədəflənir. Oradakı məhsulların daxili bazarda tam şəkildə ödəmə qabiliyyəti azdırsa, yenidən idxala ehtiyacı varsa, qiymət artımı yaranırsa, burada artıq müəyyən xərclərdə sahibkarlıq subyektlərinə dəstək verilməlidir. Necə ki, pandemiya dövründə sahibkarlıq subyektlərinin işçilərinə əmək haqlarında köməklik edildi, yenə də həmin məhsulu almağa, daşımağa görə müxtəlif subsidiyalar edilməlidir”.

Ermənistan qırıcı təyyarələrini Ukraynaya qarşı istifadə edilməsi üçün Rusiyaya verib. İrəvan bu təyyarələri Rusiyadan aldığını desə də, SU 30-ların hədiyyə edildiyi haqda məlumatlar əvvəldən var idi. Bu baxımdan, Ukraynada müharibə aparan Rusiyanın Ermənistana verdiyi təyyarələri istifadə üçün geri alması mümkündür. Xüsusilə Ukraynada ciddi hərbi texnika problemi ilə üzləşməsi Moskvanı buna vadar edə bilər. Ermənistan tərəfinin buna etiraz etməsi mümkün deyil.

Çünki erməni ordusunun hərbi-texniki təminatı bütövlükdə Rusiyadan asılıdır. Təyyarələrin erməni pilotlar tərəfindən idarə olunması isə Paşinyan hakimiyyətinin Ukraynada Rusiya hücumuna töhfə vermək, Moskva qarşısında dividend qazanmaq niyyətindən irəli gəlir. Ermənistanın mövcud hakimiyyətinin bu cür “manevrləri” ilk deyil. Qərb mərkəzlərinin dəstəyi ilə hakimiyyətə gələn Paşinyanın Rusiya ilə yaxınlaşmaq xəttini inkişaf etdirməsi, son seçkilərdən sonra bu prosesi sürətləndirməsi bunun bariz nümunəsidir. Qərbə inteqrasiya etmək istəyindən danışan Paşinyanın reallıqda Rusiyanın işğal hücumuna dəstək çıxması Ermənistan hakimiyyətinin xarici siyasi kursunda ikili oyunlara üstünlük verdiyini göstərir.

Millət vəkili Ceyhun Məmmədov hesab edir ki, İrəvanın bu yardımı birmənalı olaraq onu deməyə əsas verir ki, artıq Ermənistan Ukraynaya qarşı aparılan hərbi əməliyyatlara qoşulub. Deputatın sözlərinə görə, bütün dünya Belarusun müharibəyə qoşulacağını güman etsə də, Ermənistan bu ölkəni qabaqladı və qarşıdurmanın bilavasitə iştirakçısına çevrildi:

“Tam əminliklə söyləyə bilərik ki, bu gün Ukraynanın şəhərlərinin, infrastrukturunun dağıdılmasında Ermənistan da iştirak edir və bu prosesə öz “töhfələrini” verir. Görünən odur ki, Azərbaycandan aldığı zərbə, “dəmir yumruq” Paşinyan hakimiyyəti üçün yetərli olmadı. Ermənistan rəhbəri dövlətçilik maraqlarını, öz xalqının mənafeyini qurban verərək ölkəsini ciddi zərbə altına qoydu. Ermənistanın siyasətinin həqiqi mahiyyəti budur. Bundan əvvəl də Ermənistanın Ukraynada vuruşmaq üçün Suriyadan gətirilən yaraqlıların döyüş zonasına göndərilməsində fəal iştirak etdiyi barədə məlumatlar yayılmışdı.

Məhz bu səbəbdən bir sıra Qərb dairələrində Ermənistana bu hərəkətlərinə görə sanksiyaların tətbiqi ilə bağlı fikirlər səsləndirilir. Ermənistanın son addımları bu ölkəyə sanksiyaların tətbiqi üçün kifayət qədər əsas verir. Artıq sözdən əmələ keçməyin vaxtıdır”.

Parlament üzvü vurğulayıb ki, Azərbaycan Ukraynanın ərazi bütövlüyünə və suverenliyinə hörmətlə yanaşır, bu ölkəyə davamlı humanitar yardımlar göstərir:

“Ukrayna prezidenti yenidən Prezident İlham Əliyevə zəng edərək təşəkkürünü bildirib. Ermənistan isə Ukraynada həyata keçirilən əməliyyatlarda bilavasitə iştirak edir. Qərb dövlətləri, eləcə də beynəlxalq qurumlar Ermənistanla bağlı siyasətlərində bu amilləri mütləq nəzərə almalıdırlar. Ermənistan hər zaman söylədiyimiz kimi, terror dövlətidir”.

İsrailin Bney-Brak şəhərində silahlı hücum zamanı 5 nəfər həyatını itirib

Zamantv.az-ın xəbərinə görə, bu barədə rəsmi Kan radiosu məlumat verib.

Hadisəni törədən şəxs zərərsizləşdirilib.

Vaxtı ilə vəzifədə idilər. Hər kəs onları tanıyır və demək olar qibtə edirdilər. Amma indi…

İndi isə unudulanlar siyahısındadırlar. Onlardan bəziləri xaricdə yaşayır. Hazırda iş-güc sahibi olanlar da var. Amma bir çoxu təqaüdlə dolanır

Zamantv.az vaxtilə yüksək dövlət vəzifələrində çalışan və hazırda unudulan sabiq məmurlarla bağlı layihəsini davam etdirir.

Layihəmizdə bu dəfə sabiq Kənd Təsərrüfatı naziri İrşad Əliyevdən bəhs edəcəyik.

İrşad Əliyev 30 iyun 1944-cü ildə Goranboy rayonun Gürzalılar kəndində anadan olub.

O, Azərbaycan Kənd Təsərrüfatı İnstitutunu, 1974-cü ildə isə Bakı Ali Partiya Məktəbini bitirib.
Əmək fəaliyyətinə 1961-ci ildə başlayıb. İrşad Əliyev 1961-1966-cı illərdə bir çox müxtəlif siravi vəzifələrdə işləyib.
Daha sonra isə rayon kənd texniki təminat birliyində çilingər, “Oraq-Çəkic” kolxozunda mexanik kimi çalışıb.
Əliyev Azərbaycan Lenin Komsomolu Gənclər İttifaqının Şaumyan (indiki Xətai rayonu) komitəsində ikinci katib, təlimatçı, KP MK-də inspektor, Balakən, Ucar və Goranboy rayon komitəsinin birinci katibi olub.

O, Goranboy, Beyləqan, Balakən və Kürdəmir rayon İcra hakimiyyətinin başçısı vəzifələrində də çalışıb.

1992-ci ildə Azərbaycan Respublikası Prezidentinin Administrasiyasının Ərazi idarəetmə orqanları ilə iş şöbəsində məsləhətçi, Daimi yaşayış yerlərini məcburi tərk etmişlərlə iş üzrə Dövlət Komitəsinin sədri işləyib. 1994-2004-cü illərdə Kənd Təsərrüfatı naziri olub.

2014-cü ildə Kürdəmir rayon icra hakimiyyətinin başçısı vəzifəsindən azad edilən İrşad Əliyev mətbuata belə demişdi:

“Bundan da çox işləməkmi olar? Böyük hörmət, izzət göstərilib, etibar edilib, işləmişəm. İndi isə işdən azad olunmağım haqqında sərəncam verilib. Nəinki vaxtında verilmiş, hətta deyərdim ki, bir qədər yubanmış qərardır. Sərəncamı çox səmimi qəbul etdim”.

“Bəs, vəzifədən azad olunmaq üçün müraciət etmişdinizmi?” sualını isə o belə cavablandırıb:

“Yaşım 70-i ötüb və çox şükür ki, səhhətim də yaşıma uyğundur. Belə şeyləri açıqlamağa ehtiyac yoxdur. Prezidentin sərəncamı ortadadır və mən bunu çox səmimi qəbul edirəm. Qalan məsələlərə toxunmaq istəmirəm. 1969-cu ildən vəzifələrdə işləyirəm. Bu müddətdə müxtəlif vəzifələrdə olmuşam, dövlətin tapşırıqlarını yerinə yetirmişəm. Daha bəsdir”.

İrşad Əliyev 1991-ci ildə Azərbaycan Respublikasının müstəqilliyinin əleyhinə səs verənlər arasında idi.
Bundan başqa sabiq nazirin adı korrupsiya iddialarında hallanıb. Belə ki, onun dövründə kənd təsərrüfatı istehsalçılarına ayrılan subsidiyaların, aqrar təsərrüfatlar üçün texnika, avadanlıq, damazlıq heyvan və gübrələrin alınıb gətirilməsində ciddi maxinasiyalar aşkarlanıb. Xüsusilə keçmiş “Aqrolizinq”ASC-nin xəttilə həyata keçirilən dövlət satınalmalarında yol verilən ciddi korrupsiya faktları dəfələrlə ölkə mətbuatının gündəmini təşkil edib, hətta qurumun rəhbərliyi barədə cinayət işi qaldırılıb.

İ.Əliyevin ailə üzvlərinin xarici ölkələrdəki biznesi barədə faktlar ictimailəşdirilib.

O, müxtəlif orden və medallarla təltif olunub. Ailəlidir, üç övladı var.

Ukrayna Silahlı Qüvvələrinin Baş Qərargahı Rusiyanın Ukraynadakı növbəti itkilərini açıqlayıb.

Bu barədə qurumun “Facebook” hesabında məlumat dərc olunub.

Qeyd edilir ki, Rusiyanın Ukraynaya hücumunun 34-cü günündə Müdafiə Qüvvələri Qrupu şərq, cənub-şərq və şimal-şərq istiqamətlərində müdafiə əməliyyatlarını davam etdirir.

Rusiyaya məxsus 12 tankını, 10 piyada döyüş maşınını və 3 zirehli avtomobilini məhv edilib. Rusiya ordusu canlı qüvvədə də itki verib.

Ukrayna Silahlı Qüvvələrinin Hərbi Hava Qüvvələri ötən gün ərzində Rusiyaya məxsus 17 hava hədəfini - 8 təyyarə, 3 helikopter, 4 müxtəlif tipli dron və 2 qanadlı raketi vurub. Hərbi Hava Qüvvələrinin aviasiyası düşmənin canlı qüvvəsinin və texnikasının yığıldığı yerlərə raket zərbələri endirib.

Bildirilib ki, indiyədək 17 200 rusiyalı hərbçi zərərsizləşdirilib.

Bundan başqa, Rusiyaya məxsus 597 tank, 1 710 zirehli döyüş maşını, 303 artilleriya sistemi, 96 reaktiv yaylım atəşi sistemi, 54 hava hücumundan müdafiə sistemi, 127 ədəd hərbi təyyarəsi, 129 ədəd helikopteri, 71 PUA, 1 178 nəqliyyat vasitəsi, 73 ədəd yanacaq çəni, 7 ədəd gəmi/kater, 21 ədəd xüsusi texnikası və 4 operativ-taktiki raket kompleksi məhv edilib.

Rusiya və Ukrayna nümayəndə heyətləri danışıqlar üçün Türkiyənin İstanbul şəhərinə gəliblər, onlar Prezident Rəcəb Tayyib Ərdoğanın təşəbbüsü ilə danışıqlar aparırlar.

Bu, Türkiyənin ikinci belə praktiki səyidir, bundan əvvəl də, Rusiya və Ukrayna XİN başçıları Antalyada bir araya gəlmişdilər, hərçənd ki, tərəflərin tezisləri bir-biri ilə daban-dabana ziddiyyət təşkil edirdi.

İstanbul görüşündə diqqət edəcəyimiz məqam ilklə bağlıdır: Söhbət ilk dəfə bir prezidentin vasitəsilə tərəflərin masaya əyləşməsidir.

Ərdoğan danışıq başlamamışdan qabaq çıxış edərək nümayəndə heyətlərinə səsləndi, atəşkəsin vacib olduğunu vurğuladı. Bu, nümayəndə heyətləri ilə yanaşı Rusiya və Ukrayna liderlərinə də ünvanlanan bir çağırışdır.

Danışıqlardan dərhal sonra nəticənin hasil olmasını gözləmək əbəsdir, çünki növbəti prosedur tərəflərin təklifləri öz prezidentlərinə təqdim etməsindən ibarət olacaq.

Rusiya Ukraynada işğal etdiyi ərazilərlə öz xeyrinə riyaziyyatdakı iti bucaq formasında bir üstünlük qazandırıb, amma Ukrayna ordusu da ciddi müqavimət göstərərək Rusiyanı ağır itkilərə məruz qoyur.

Hazırkı danışıqlar təcavüzün yaratdığı bu xəritə əsasında reallaşır, ona görə də, Ukraynanın Rusiyadan təhlükəsizlik zəmanəti alması dalana dirənir. Həm də ona görə ki, Rusiyanın təhlükəsizliyə dair anlayışı fərqlidir və hər an təhlükəyə çevrilmək potensialına malikdir.

Hiss olunur ki, Rusiya Ukraynanın dənizə çıxışını qapamaq istəyir, amma Odessada heç bir irəliləyiş əldə edə bilmir, yalnız Azovdan Ukraynanın əlini çəkə bilib.

Dəniz amili vacibdir, ona görə də Ukrayna dənizlərlə (Qara dəniz və Azov dənizi) əlaqədar da bağlı qapılar arxasında şərtlərini qoya bilər, Moskva isə o şərtləri asanlıqla həzmə verən addımlara getməz.

İstanbul danışıqlarından sonra tezislər prezidentlərə - Vladimir Putin və Volodimir Zelenskiyə çatana qədər və növbəti qərarlar verilənədək Ukraynada döyüşlər davam edəcək. Çünki tərəflər maksimum üstünlüklərlə danışıqların yeni raunduna hazırlaşır.

Hələlik isə görünür ki, Rusiya əvvəlki maksimalist tələblərini bir qədər yumşaldıb, Ukraynanın xeyrinə redaktələr etmək məcburiyyətində qalıb, bununla belə döyüş meydanındakı əməliyyatların nəticələri də həlledici rol oynayacaq.

Buna görə də, Rusiyanın Kiyevə yeni hücum planı masadadır, lakin dəqiqləşdirmə aparılır, risklər dəyərləndirilir.

Aqşin Kərimov

Rusiyanın Ukraynada apardığı müharibədən bir ay keçməsinə baxmayaraq, ukraynalıların müqaviməti günü-gündən daha da artır. Bu səbəbdən Rusiya ciddi irəliləyiş əldə edə bilməyib.
Etnik müxtəlifliyi ilə seçilən Ukraynada bu ölkənin vətəndaşları olan azərbaycanlılar da az deyil. Ölkənin müxtəlif strukturlarında olduğu kimi, hüquq-mühafizə orqanlarında da həmyerlilərimiz fəaliyyət göstərirlər.

Soydaşlarımızdan biri Tural Əmiraslanov Kiyev vilayətinin rayonlarından birinin polis idarəsinin baş müstəntiqidir. Onun sözlərinə görə, Ukraynada hərbi vəziyyət elan edilməsi nəticəsində polis əməkdaşları gücləndirilmiş iş rejiminə keçiblər.

“Ukraynada xeyli azərbaycanlı yaşayır ki, onların böyük hissəsi Ukrayna vətəndaşlarıdır. Mənim kimi hüquq-mühafizə orqanlarında çalışan azərbaycanlılarla yanaşı, ərazi müdafiə bölmələrinə və orduya qoşulan soydaşlarımız da var”, - deyə o əlavə edib.

1998-ci ildən etibarən Ukraynanın paytaxtında yaşayan Cahangir Rzazadə isə Kiyev rayonlarından birinin patrul xidmətinin polis zabitidir. Buna qədər o, sahə müvəkkili vəzifəsində çalışıb. “Hərbi vəziyyətlə əlaqədar ailəmi Ukraynadan çıxardım. Valideynlərimin və uşaqlarımın burada olmaması mənə daha rahat işləməyə imkan verir”, - deyə o qeyd edib.

Ətraflı Baku TV-nin süjetini təqdim edirik:

Bakı-Qazax avtomobil yolunda ölümlə nəticələnən yol-nəqliyyat hadisəsi olub.

Zamantv.az -ın məlumatına görə, “Mersedes Sprinter” markalı mikroavtobus yük maşını ilə toqquşub.

Baş verən qəza nəticəsində iki nəfər həlak olub, bir neçə nəfər yaralanıb.

Qeyd edək ki, qəzaya uğrayan mikroavtobus Gəncə-Qazax xətti üzrə işləyirmiş.

Faktla bağlı araşdırmalara başlanılıb.

“Rusiyanın öz ərazisində bir sıra Azərbaycan saytlarına girişi bloklamasını düzgün hesab etmirəm. Düşünürəm ki, media sərbəst və azad fəaliyyət göstərməlidir. Beynəlxalq hüququn da bu məsələdə mövqeyi birmənalıdır”.

Bunu Oxu.Az-a açıqlamasında Milli Məclisin deputatı Ceyhun Məmmədov deyib.

O deyib ki, rəsmi Moskva tərəfindən belə addımları atılması ikitərəfli əlaqələrə xələl gətirən yanaşmadır.

Millət vəkili qeyd edib ki, Azərbaycan Rusiya ilə münasibətlərə hər zaman həssas yanaşıb.

“Bu prinsiplə yanaşılsa, istər 44 günlük müharibə dövründə, istərsə də əvvəlki dövrlərdə Rusiya mediası davamlı olaraq Azərbaycan həqiqətlərini təhrif edir, Ermənistanın haqsız mövqeyini dəstəkləyirdi. Onda biz də gərək həmin saytları və kanalları bloklayaydıq”, - deyə Ceyhun Məmmədov əlavə edib.

Bəs Azərbaycan da adekvat addım atıb Rusiya kanallarının ölkə ərazisindəki yayımını dayandıra bilərmi?

Deputat hesab edir ki, hazırkı həssas məqamda maksimum diqqətli, təmkinli və soyuqqanlı olmalıyıq.

“Hazırda vəziyyət kifayət qədər gərgin və mürəkkəbdir. Qarabağda vəziyyəti gərginləşdirmək cəhdləri kifayət qədərdir. Ona görə vəziyyəti ciddi təhlil etməli, vəziyyətə dair mövqeyimizi davamlı bildirməliyik. Gələcəkdə daha sərt addımların atılması məsələsinə baxıla bilər. Ancaq reaksiyalar mütləq olmalıdır”, - deyə deputat fikrini yekunlaşdırıb.

Qeyd edək ki, Rusiya öz ərazisində bir neçə Azərbaycan saytına, o cümlədən Oxu.Az-a girişi bloklayıb.

Aqşin Kərimov