"Seçiciləri qəbul edən zaman təxminən 15 nəfərdən 10 nəfəri məşğulluq idarələrindən deyil, məndən iş istəyib. Digər 5 nəfəri isə bankdan deyil, yenə də məndən borc istəyib".

Zamantv.az xəbər verir ki, bu sözləri deputat Fazil Mustafa Milli Məclisin plenar iclasındakı çıxışı zamanı deyib:

“Birinin anası, digərinin qardaşı xəstə idi. Onlar fırıldaqçı deyildilər. Üzlərindən görünür ki, normal insanlardır. Heç kim təkliflə gəlməmişdi. Soruşdum ki, niyə bu vəziyyətdəsiniz? Məlum oldu ki, “Akkord” aparıb Qazaxıstanda işlədib, onlarla fəhlənin pulunu verməyib. İndiyədək qapı qalmayıb ki, dolanmasınlar, pullarını hələ ala bilməyiblər. Rayonlarda yaşayan insanların əksəri pensiya kartlarını sələmçiyə təminat üçün veriblər. Çünki ayın sonunda onlar pulu ödəməsələr, sələmçi faizi kartdan çəkib götürəcək. Bu vəziyyətdə olan xalqın insanlarının vəziyyətini yügülləşdirməkçün səlahiyyətli, məsuliyyətli şəxslər özlərində vicdan borcu tapıb problemləri həll etməlidirlər”.

Maraqlıdır, seçicilər deputatlara əsasən hansı problemlərlə bağlı müraciət edirlər? Fazil Mustafanın qeyd etdiyi kimi, müraciətlərin arasında borc almaq istəyən vətəndaşlar varmı? Millət vəkilləri onlara hansı məbləğdə kömək edib?

Mövzu ilə bağlı Cebhe.info-ya ilk olaraq Milli Məlisin Mədəniyyət komitəsinin üzvü, 83 saylı Ağcəbədi- Füzuli seçki dairəsindən deputat seçilən Aqil Abbas danışıb.

Millət vəkili bildirib ki, seçiciləri ona əsasən işsizlik və əlillik dərəcəsi ilə bağlı müraciət edirlər:

“Gücümüz çatanı edirik, çatmayanda da oturub ağlayırıq. Qaldı borc məsələsinə mənə yəqin ki, Fazil müəllimdən atıq müraciət edilir. Dərman pulu, ev kirayəsi və ya tələbənin təhsil haqqının ödənilməsi ilə bağlı müraciətlər olunur. Demək olar ki, hər gün belə müraciətlər var. Yanımda olsaydınız, mesajları açsam, oxusanız, başınıza hava gələr. İmkanım olan qədər kömək edirəm”. Deputat hətta pulu olmayanda borc alıb seçicilərinə verir: “Kimsə uşağı xəstədir, dərman ala bilmirsə, mütləq kömək etmək lazımdır da. Köməkçimi göndərirəm ki, get dərman al. Yalandan müraciətlər olmur. Eləsi də var ki, bir neçə dəfə müraciət edir, axırda deyirəm ki, sənə maaş kəsməmişəm e. Üzünü yumşaq görürlər, vermirsən, mesaj yazırlar. Oliqarx deyiləm, pul kəsməmişəm”. Parlament üzvü bildirib ki, seçicilərinə 200-250 manat məbləğində kömək edib: “Olub bu qədər dərman pulu vermişəm, amma borc deyil. Dərman da bildiyiniz kimi “ceyranın belində”” .

Milli Məclisin İqtisadi siyasət, sənaye və sahibkarlıq komitəsinin üzvü, 73 saylı Lənkəran Şəhər Seçki Dairəsidən deputat seçilmiş Rüfət Quliyev də ona bu qəbildən xahişlərin olduğunu deyib:
“Təbiidir ki, vaxtilə belə müraciətlər daha çox olub, amma son 7-8 ayda mənim prinsipial fikrimi bilirlər. Elə vaxt olub ki, insana dərman lazım olub, aptekə zəng vurmuşam ki, filankəs bu reseptlə gəlir, dərmanı verin”. Deputat seçicilərinin ondan borc istədiyini etiraf etsə də, onlara pul vermədiyini deyib: “Bəli, borc istəyən də olub. Dərman pulu istəyən, ali məktəbə ödənişlə bağlı da müraciət olub. Bunları mən başqa cür həll etmişəm. Məsələn, vətəndaşın “Azərişıq” və ya “Azəriqaz”a borcu olub. Buna görə lazımı quruma zəng edib, həmin şəxsin bir ilin içərisində ödəniş məsələsini həll edəcəyini demişəm. Abonentin özü ilə razılaşdırılıb ki, ayda 50 manat pul ödəyirsən, bununla da problemi həll edirsən. Mən belə mexanizmlərlə işləyirəm”.

21 saylı Nəsimi Birinci Seçki Dairəsindən deputat seçilən Məlahət İbrahimqızı ona ən çox işsizliklə, məşğulluqla bağlı müraciətlərin olduğunu deyib:
“Hamı iş istəyir. Xüsusilə də 44 günlük Vətən müharibəsində vuruşan qazilər, onların ailə üzvləri iş problemlərinin həlli ilə bağlı müraciət edirlər. Çox çətinliklə, az sayda müraciətləri həll edə bilirik. Məşğulluq məsələsi şəxsən millət vəkili kimi mənim üçün bir nömrəli prioritetdir. Təhsil ödənişi ilə bağlı müraciətlər çox cüzidir. İldə bir dəfə olar, ya deyil. Prezidentin sərəncamı ilə Təhsil Tələbə Krediti Fondu yaradılıb. Bu, ödənişli təhsildə oxuyanların problemlərinə böyük dəstək olacaq”.

Deputat təəssüf edib ki, hələ də işsizlik, məşğulluq problemlərini Əmək və Əhalinin Sosial Müdafiəsi Nazirliyi qənaətbəxş səiyyədə həll edə bilməyib: “Bu sahədə çox ciddi nöqsan və problemlər var. Bu Nazirliyin həlli gücündə deyil. Hesab edirəm ki, bir çox qurumlarda işsizlik probleminin həlli ilə bağlı müəyyən imkanlar var”.

Milli Məclisin Elm və təhsil komitəsinin üzvü, 58 saylı Hacıqabul- Kürdəmir Seçki Dairəsindən deputat seçilən Rafael Hüseynov öncə “Uzun çəkəcək. Yazın, imkan olsa cavablandıraram”,- desə də, daha sonra suallarımızı cavabsız qoydu.

Milli Məclisin Gənclər və idman komitəsinin üzvü, 90 saylı Ağdaş Seçki Dairəsindən deputat seçilən Cavid Osmanov seçicilərin müxtəlif mövzularda ona müraciət etdiyini bildirdi:

“Azərbaycan Respublikasının Prezidenti cənab İlham Əliyevin yürütdüyü siyasətin mərkəzində hər zaman vətəndaşlarımızın sosial müdafiəsinin gücləndirilməsi, onların təhlükəsizliyinin, sağlamlığının təmin edilməsi, bir sözlə, insan amili dayanır. Milli Məclisin deputatları hər zaman seçicilərin müraciətlərinə həssaslıqla yanaşır. Həm yerlərdə keçirilən görüşlərdə, həm də karonavirus pandemiyası dövründə vətəndaşlarla onlayn görüşlərdə çalışmışıq ki, qaldırılan məsələlərin həlli istiqamətində işlər görülsün. Müxtəlif mövzularda müraciətlər olur. Bəzən olur ki, ödənişli ali təhsillə bağlı kömək istəyirlər. Eyni zamanda, təbii fəlakətlər, yanğın nəticəsindən kiminsə evi yanır, bununla bağlı müraciətlər daxil olur. Düşünürəm ki, sosial sahədə aparılan islahatlar inqilabi xarakter daşıyır. Çünki 4 ilin bu sahədə aparılan islahatlarına nəzər salsaq görərik ki, bir neçə dəfə minumum əmək haqqı, pensiyaların artırılması ilə bağlı qərarlar oldu”. Millət vəkili yardım və ya borc verməklə bağlı suallara isə "Maddi yardımın edilməsi ilə bağlı müraciətlər də olur",- cavabını verməklə kifayətləndi.

Milli Məclisin İnsan hüquqları komitəsinin üzvü, 66 saylı Bilasuvar Seçki Dairəsindən deputat seçilmiş Bəhruz Məhərrəmov seçicilərindən ən çox torpaq verilməsi, məşğulluq, habelə, əlillik təyinatı ilə bağlı yazılı və şifahi müraciətlər aldığını qeyd etdi:

“Su qıtlığı yaşayan bölgəyik, suvarma problemlərinə dair ərizə və şikayətlər alırıq". Həm borc, həm də yardım üçün müraciət edən seçicilərinin çox olduğunu deyən deputat bu məsələyə detallı toxunmaq istəmədiyini, lakin bunu anlayışla qarşıladığını bidirdi. Millət vəkili torpaq ayırmaq, işlə təmin etmək, su verilməsi, maddi yardım etmək və s. məsələləri aidiyyətı strukturların səlahiyyətində olan məsələlər kimi dəyərləndirərək, ən yaxşı halda vətəndaşın şikayətini aidiyyəti üzrə yönəldə, bu barədə sorğular verə biləcəklərini vurğuladı. Milli Məclisin üzvü həmçinin narahatlığını da dilə gətirdi: “İndi başqa acı bir reallıq var, təəssüflə bildirməliyəm ki, bu günə qədər hətta, cəmiyyətin təhsilli təbəqəsində belə parlamentin və deputatın funksiyaları barədə təsəvvürlər lazımi səviyyədə deyil. Ona görə də insanlar yanlış gözləntilərə düşürlər və bunu reallığa uyğun anlayışla da qarşılayıram. Lakin hesab edirəm ki, biz daha çox məsələləri ümumiləşdirib kökündə yatan problemləri qabartmalıyıq və bunu da edirik. Məsələn, kütləvi şəkildə iş üçün müraciət edən varsa, təklifimiz "filankəsin işlə təmin olunması" yox, həmin bölgədə məşğulluqla bağlı bir layihəninin gerçəkləşdirilməsi olmalıdır”.

Bakıda quldurluq hadisəsi olub.

Zamantv.az Daxili İşlər Nazirliyinə istinadla bildirir ki, bu barədə zərərçəkmiş Ələt qəsəbə sakini P.Məmmədov Qaradağ rayon Polis İdarəsinin 11-ci Polis Bölməsinə müraciət edib. O bildirib ki, aprelin 14-də saat 2 radələrində yaşadığı evdə döyülərək 3800 manat pulu alınıb və əlləri iplə bağlanıb.

Polis əməkdaşlarının keçirdikləri əməliyyat-axtarış tədbirləri nəticəsində quldurluğu törətməkdə şübhəli bilinən İmişli rayon sakini A.Alıkişiyev və Səngəçal qəsəbə sakini İ.Məmmədova müəyyən edilərək saxlanılıblar.

Rusiyanın Nijni-Tagil şəhərində yerləşən cəzaçəkmə müəssislərinin birində intihar olub.

Zamantv.az-ın yerli KİV-ə istinadla məlumatına görə, azərbaycanlı keçmiş hərbçi T. özünü asıb. O, pedofiliyaya görə, cəza çəkirdi.

Onun cəza müddətinin bitməsinə hələ xeyli müddət var imiş.

Rusiya Federasiyasının Kommunist Partiyası Rusiyanın öz ərazisində varislik prinsipini təmin etmək üçün üçrəngli bayrağı SSRİ bayrağı ilə əvəz etməyi təklif edib.

Zamantv.az xəbər verir ki, bu barədə qanun layihəsi Dövlət Dumasının elektron məlumat bazasında dərc edilib.

Qanun layihəsinə edilən izahatda qeyd edilib ki, bu dəyişikliklər tarixi boşluq və qanunvericiliyin birmənalı şərh edilməməsi cəhdlərini aradan qaldıracaq, vətəndaşların vətənpərvərlik tərbiyəsinə töhfə verəcək.

Bu gün Daxili İşlər Nazirliyində mülkiyyət əleyhinə olan və əvvəllər məhkum olunmuş şəxslər tərəfindən törədilən cinayətlərin, həmçinin xırda talamaların qarşısının alınması və açılması, mühafizə-siqnalizasiya vasitələrinin tətbiqi sahəsində fəaliyyətin nəticələrinə həsr olunmuş onlayn formatda Kollegiya iclası keçirilib.

Nazirlikdən Zamantv.az-a verilən məlumata görə, İclası giriş sözü ilə açan nazir, general-polkovnik Vilayət Eyvazov müzakirəyə çıxarılan məsələlərin vətəndaş məmnunluğunun təmin edilməsi, insan hüquq və azadlıqlarının etibarlı müdafiəsi baxımından aktual olduğunu və həmin istiqamətlərdə həyata keçirilən tədbirlərin müasir dövrün tələbləri nəzərə alınmaqla təkmilləşdirilməsinin və daha da gücləndirilməsinin vacibliyini vurğulayıb.

Bu ilin birinci rübündə əməliyyat-xidməti fəaliyyətin nəticələrini müsbət dəyərləndirən nazir Vilayət Eyvazov bildirib ki, bu müddətdə qeydə alınmış 8.622 cinayətin 86 faizinin açılması təmin olunub, qeyri-aşkar şəraitdə baş verən cinayətlərin, mülkiyyət əleyhinə olanların, o cümlədən oğurluqların, soyğunçuluqların, quldurluqların, hədə-qorxu ilə tələb etmələrin, avtonəqliyyat vasitəsini qaçırmaların açılması ötən ilin müvafiq dövrü ilə müqayisədə yaxşılaşıb.
Qanunsuz dövriyyədən 1 ton 64 kiloqram narkotik vasitə çıxarıldığını qeyd edən nazir bu əməllərlə bağlı 1.689 nəfərin məsuliyyətə cəlb edildiyini, habelə axtarış işinin, o cümlədən ağır və xüsusilə ağır cinayətlərə görə axtarılan şəxslərin tutulmasının nəticələrinin yüksəldiyini, 556 nəfərdən ibarət 220 cinayətkar qrupun zərərsizləşdirildiyini nəzərə çatdırıb.

Gündəlikdəki məsələlərlə bağlı nazir müavini, Baş Təşkilat-İnspeksiya İdarəsinin rəisi, polis general-leytenantı Fazil Quliyev, Baş Cinayət Axtarışı İdarəsinin rəisi, polis general-mayoru Arzu Daşdəmirov, Baş Mühafizə İdarəsinin rəisi, polis general-mayoru Nurulla Məmmədxanlı, Katibliyin rəisi, polis polkovniki Nahid Məmmədzadə və Bakı şəhər Baş Polis İdarəsinin rəis müavini, polis polkovniki Vüqar Ələkbərov məruzə ediblər.

Kollegiya iclasına yekun vuran nazir, general-polkovnik V.Eyvazov vətəndaş məmnunluğunun təmin edilməsinin Azərbaycan Respublikasının Prezidenti, Silahlı Qüvvələrin Ali Baş Komandanı cənab İlham Əliyevin qarşıya qoyduğu əsas vəzifələrdən olduğunu xatırladaraq cinayətlərin qarşısının alınması, açılması, hüquqazidd əməllər nəticəsində vurulmuş maddi ziyanın ödətdirilməsi, vətəndaşların müraciətlərinə baxılması və qəbulu işinə daha böyük həssaslıqla yanaşılmasını tələb edib. Həmçinin xidməti fəaliyyətdə müasir texnologiyaların tətbiqinin və idarəetmədə elektronlaşdırmanın genişləndirilməsinin zəruriliyini, hüquqi və fiziki şəxslərə məxsus obyektlərin, mənzillərin mühafizə-siqnalizasiya vasitələri ilə təmin edilməsinin, narkotiklərin qanunsuz dövriyyəsinə qarşı mübarizə tədbirlərinin gücləndirilməsinin, hər bir şəxsin hüquq və azadlığının, qanuni mənafeyinin etibarlı müdafiəsinin, bütövlükdə polisin səlahiyyətinə aid vəzifələrin peşəkarlıqla yerinə yetirilməsinin vacibliyini nəzərə çatdıraraq bir sıra konkret tapşırıqlar verib.

Daxili İşlər Nazirliyində geniş kollegiya iclası keçirilir.

Zamantv.az-ın məlumatına görə, Daxili İşlər naziri, general-polkovnik Vilayət Eyvazovun rəhbərliyi ilə onlayn formatda keçirilən kollegiya iclasında respublikanın rayon və şəhərlərinin polis rəisləri iştirak edir.

Kollegiya bu ilin birinci rübündə respublika ərazisində baş verən cinayətlərin müzakirəsinə və təhlilinə həsr olunub.

Kollegiya iclasında həmçinin son günlər respublika ərazisində törədilən ağır cinayət hadisələrinin də müzakirə ediləcəyi bildirilir.

İngiltərədə bir qadın övladlığa götürdüyü uşağın ərinin oğlu olduğunu öyrənib.

Zamantv.az xəbər verir ki, qadın övladlığa götürdüyü uşağın öz bioloji övladlarına oxşadığının fərqinə varıb.

Oxşarlıq, həmçinin, yaxınlarının da diqqətini çəkib. Bundan sonra qadın DNT analizi etdirmək qərarına gəlib.
Nəticələrin cavabı isə onu şoka salıb. Belə ki, uşaq yoldaşının qeyri-rəsmi münasibətindən olduğu ortaya çıxıb.

Qadın həqiqəti öyrəndikdən sonra dərhal ərindən boşanıb.

"ABŞ Dövlət Departamentinin rəsmiləri Rusiyanın Ukraynadakı müharibəyə görə məsuliyyət daşıması üçün əllərində olan bütün materialları, o cümlədən onu terrorizmi dəstəkləyən dövlət kimi tanınması imkanlarını nəzərdən keçirir".

CNN-in məlumatına görə, bu bəyanatla ABŞ Dövlət Departamentinin sözçüsü Ned Prays çıxış edib.

O, jurnalistlərin Rusiyanın terrorizmin himayədarı kimi tanınmasının mümkünlüyü ilə bağlı sualını cavablandırarkən belə deyib:
"Biz faktları diqqətlə öyrənirik. Qanunları diqqətlə nəzərdən keçiririk. Qərar qəbul edilməzdən əvvəl belə bir proses bir neçə həftə çəkə bilər”.

Xatırladaq ki, aprelin 17-də Ukrayna Prezidenti Vladimir Zelenski amerikalı həmkarı Co Baydendən Rusiyanın “Terrorizmi dəstəkləyən ölkələr” siyahısına daxil edilməsini xahiş edib.

ABŞ qanunlarına görə, terrorun sponsoru olan dövlət “beynəlxalq terror aktlarını dəfələrlə dəstəkləyən” ölkə sayılır. Hazırda ABŞ-ın siyahısında belə 4 ölkə var: Kuba, İran, Suriya və Şimali Koreya.

Rusiya Federasiyasının bu siyahıya əlavə edilməsi sanksiyaların daha da genişlənməsinə rəvac verəcək.

Qeyd edək ki, Birləşmiş Ştatlar bir sıra ölkələrin, o cümlədən Fransa, Almaniya, Böyük Britaniya, Kanada, İtaliya, Polşa Rumıniyanın rəhbərləri ilə təcili məsləhətləşmələr təşkil etmək niyyətindədir.

Görüşdə NATO-nun baş katibi Yens Stoltenberq, Avropa Komissiyasının prezidenti Ursula fon der Lyayen və Avropa İttifaqının prezidenti Şarl Mişelin də iştirak edəcəyi bildirilir.

Xarkovda son dörd gündə Rusiyanın hücumları nəticəsində 18 nəfər ölüb, 106 nəfər yaralanıb.

Bu sözləri Ukrayna Prezidenti Volodimir Zelenski deyib.

O, Rusiya ordusunun hücumlarını “şüurlu terror” adlandırıb.

“Təbii ki, Rusiyadan neft tədarükünə dair embarqoya ehtiyac hər ötən gün artır”, - deyə o vurğulayıb.

Ukrayna lideri tələb etdikləri silahları 53 gündür gözlədiklərini də qeyd edib:

“Açıq şəkildə ifadə etmək istəyirəm ki, silahların çatdırılmasındakı hər gecikmə, hər siyasi ləngimə Rusiyaya ukraynalıları öldürmək icazəsidir”.

“Rusiya qoşunları Luqansk vilayətinin Kreminna şəhərini nəzarətə götürüb”.

Bu barədə Luqansk vilayətinin hərbi administrasiyasının rəhbəri Sergey Qayday bildirib.

“İşğalçılar Kreminnanı nəzarətə götürüb. Döyüşlər davam edir. Artıq şəhərdən təxliyə mümkün deyil”, - deyə S.Qayday qeyd edib.

Mənbə: Unian.net

Azərbaycanda daxili qanaxma riski ilə xəstəxanaya müraciət edən türkiyəli tələbə problemlə üzləşib.

Bu barədə “Twitter” sosial şəbəkəsində Çağla Acar adlı istifadəçi məlumat paylaşıb. Belə ki, sözügedən hadisənin dostunun başına gəldiyini qeyd edən sosial şəbəkə istifadəçisi xəstəxanalarda tibb işçilərinin laqeyd münasibətindən şikayət edib:

“Ötən gün dostum Azərbaycanda dövlət xəstəxanası olan Kliniki Tibbi Mərkəzə (Semaşko) gedib və həkim tərəfindən qəbuledilməz bir münasibətlə qarşılaşıb. Həkim onun şikayətini belə dinləmədən, laqeyd münasibət sərgiləyərək onu evinə göndərməyə çalışıb. 40 dəqiqə bir otaqda gözlədiblər. Daha sonra insana rəva bilinməyəcək tərzdə müayinə tətbiq edən həkim bir diaqnoz qoyaraq otağı tərk edib.

Qeyd edim ki, dostum xəstəxanaya daxili qanaxma riski ilə gedib. Bu şikayətə həkim gözü ilə diaqnoz qoymaq olarmı? Dostum sonra həkimi tapa bilməyib və otağa gedərək ona hər hansı dərman yazılıb-yazılmayacağını soruşub. Oradakı işçilər isə onu çox kobud şəkildə otaqdan çıxmasını tələb ediblər. Ailəsinin qardaş ölkə bilib göndərdiyi bir yerdə tələbəyə, qonaq şəxsə münasibət budur? Bu, hansı etik, əxlaqi davranışlara sığır? Bu tələbə Azərbaycandakı dövlət xəstəxanasının səhlənkarlığı səbəbindən həyatını itirsəydi, bunun məsuliyyətini kim daşıyacaqdı? Kim cavabdeh olacaqdı? Hətta dostum bir gün öncə müraciət etdiyi başqa bir tibb müəssisəsində ondan qeydiyyatdan kənar pul tələb edildiyini də dedi. O, pul verməyəcəyini dedikdə isə ona hörmətsiz bir şəkildə cavab verilib. Eşidəndə çox təəccübləndim

Dostum o vəziyyətdə başqa bir xəstəxanaya gedib, orada da gözəyarı bir diaqnoz qoyublar. Dostum ağzından hələ də qan gəldiyini dediyi halda isə “bəyənmirsənsə, başqa xəstəxanaya gedə bilərsən” deyə cavab veriblər. Mən başa düşmürəm, dövlət xəstəxanasında daxili qanama riski ilə müraciət edən pasiyent üçün 1 saatın belə hökmü varkən, bu şəkildə müayinə edərlər? Bu, rəsmən şəxsi ölümə tərk etmək deməkdir”.