Sumqayıtda qadın anasını bıçaqlayıb.

Zamantv.az APA-ya istinadla xəbər verir ki, şəhər sakini 1986-cı il təvəllüdlü Günel Əliyeva onunla yaşayan anası, 1957-ci il təvəllüdü Zemfira Əliyevaya 6 bıçaq zərbəsi vurub.

Zemfira Əliyeva xəstəxanaya çatdırılıb, onun həyatını xilas etmək mümkün olub. Günel Əliyeva hüquq-mühafizə orqanların əməkdaşları tərəfindən saxlanılıb.

Faktla bağlı Sumqayıt şəhər Polis İdarəsində cinayət işi başlanılıb.

Azərbaycan və Ermənistan liderlərinin aprelin 6-da Avropa İttifaqı Şurasının prezidenti Şarl Mişelin vasitəçiliyi ilə Brüsseldə əldə etdikləri razılaşmasının icra olunmasına bir-biri ilə bağlı olan iki böyük təhlükə var:

– Rusiya Qərbin münaqişənin həllində fəallaşmasını, regionda özünün müəyyənləşdirdiyi status-kvonun dəyişməsini istəmir;

– Ermənistan müxalifəti hakimiyyətin xarici siyasətini sabotaj etmək üçün əlindəki resursları səfərbər etməyə başlayıb. Bu istiqamətdə Rusiya hakimiyyət dairələri və Qərbdəki erməni lobbsinin bir hissəsi onlara dəstək verir.

Müharibədən sonrakı təcrübə göstərir ki, razılaşmaları icra etmək olduqca çətindir, tərəflərin mövqelərindəki antaqonist yanaşmaları yumşaltmaq mümkün olmayıb (10 noyabr, 11 yanvar, 26 noyabr üçtərəfli bəyanatları tam icra edilməyib). Prosesin moderatoru olan Rusiya isə nəinki gərginliyin yumşalmasında, əksinə, qarşıdurmanın Azərbaycanla Ermənistanın sərhədləri boyu yayılmasında maraqlıdır. Moskva iki ölkə arasında bütün məsələlərdə, ayrıca olaraq Ermənistan-Türkiyə yaxınlaşması prosesində əsas vasitəçi olmağa çalışır. Kreml rəhbərliyi regionda sülh dövrünün başlanması üçün bütün vacib komponentləri əlində saxlamaqla, öz maraqlarına uyğun status-kvonun qalmasında maraqlıdır.

Bu vəziyyət nə Ermənistanı, nə də Azərbaycanı qane edir. Qərb isə həm bundan, həm də yaranmış əlverişli geosiyasi vəziyyətdən istifadə edərək, münaqişə tərəflərini bir araya gətirməklə, ortaq razılaşma nöqtələri tapmağa çalışır. Brüsseldə təklif olunan ilkin formula Azərbaycanın sülh üçün irəli sürdüyü 5 bəndlik baza prinsipləri ilə üst-üstə düşür. Baş nazir Nikol Paşinyan, obyektiv reallıqlardan çıxış edərək, erməni cəmiyyətinə başqa alternativlərin qalmadığını izah etməyə çalışır. Bu günlərdə o qeyd etmişdi ki, Qərbin təkliflərini qəbul edilməməsinin nəticəsi Azərbaycanın Fərrux dağını götürməsi və gələcəkdə buna bənzər addımlar atması ehtimalıdır. Paşinyan başa düşür ki, işğalçı Rusiya Ukrayna böhranında demoralizasiya olduqca hazırkı qeyri-müəyyən vəziyyəti uzatmaq mümkün olmayacaq. Yeni müstəvidə Qərb beynəlxalq hüququ, Türkiyənin regionda artan təsirini əsas tutur və Ermənistana gecikmədən Qarabağla bağlı Azərbaycandan nəsə qoparmağı təklif edir. Əlbəttə, söhbət müstəqillik kimi utopiyadan yox, ermənilərin təhlükəsizliyi ilə bağlı qarantiyalardan gedir.

Rusiyanın Ermənistandakı uzantıları olan keçmiş siyasi elita isə bu həssas situasiyada cəmiyyəti hakimiyyətə qarşı qaldırmağa, Qərbin moderatorluğu ilə start götürmüş prosesi pozmağa çalışır. Moskva onların tezislərini tirajlayır və qarşıdurma əhval-ruhiyyəsinin növbəti siyasi böhrana çevrilməsi üçün əlindən gələni edir.

Bu gün Rusiyanın İrəvandakı səfiri Sergey Kopırkin 24news.am-a müsahibəsində ABŞ və Fransanın Minsk Qrupunda birgə fəaliyyətdən imtinasını nəzərdə tutaraq bildirib ki, Qərb öz ambisiyaları naminə planetin müxtəlif regionlarında sabitliyin və təhlükəsizliyin möhkəmləndirilməsinə xidmət edən beynəlxalq mexanizmləri, platformaları dağıdır. “Bu yanaşma, əlbəttə ki, təəssüf doğurur. Çox təəssüf ki, sülh və təhlükəsizlik maraqları, bu halda region ölkələrinin, ilk növbədə Ermənistan geosiyasi və digər ambisiyalarına qurban verilir”, – səfir bildirib.

Erməni İnqilab Federasıyası Daşnaksütun (EİFD) təşkilatı isə bəyan edib ki, Ermənistanın hazırkı hökumətinin istefaya göndərilməsi və danışıqlar aparan şəxsin dəyişdirilməsi vəziyyətdən çıxış yolu üçün ilk addımdır.

Göründüyü kimi, səfirin dedikləri ilə erməni müxalifətinin bəyanatlarında əsas tezislər üst-üstə düşür. Beləliklə, Ermənistanda daxili siyasi böhranın başlayacağı, Brüssel razılaşmalarının icra olunmayacağı təhlükəsi aktual olaraq qalır.

Təhlükəsizlik sahəsi üzrə ekspert İlham İsmayıl xatırladır ki, Brüssel görüşündən və Ermənistan baş naziri Nikol Paşinyanın Azərbaycanla sülh müqaviləsini imzalayacağı barədə dediklərindən sonra təxribatların başlanacağı, Paşinyanın hakimiyyətdən uzaqlaşdırılmasından tutmuş, ona qarşı sui-qəsdə qədər müxtəlif hadisələrin mümkünlüyü barədə proqnozlar verilmişdi. Onun sözlərinə görə, yarandığı gündən terroru əsas fəaliyyət prinsipi elan edən daşnakların Paşinyanı aradan götürmək bəyanatının arxasında müxalif siyasi qüvvələrin, hətta başqa bir dövlətin dayandığı istisna olunmur:

“Bu tip bəyanatlar bir neçə gündür ki, Paşinyan iqtidarına müxalif olan bütün siyasi qüvvələr, media mənsubları tərəfindən səslənir. Ermənistan xüsusi xidmət orqanının keçmiş rəhbəri David Şahnazaryan mövcud iqtidarın hakimiyyətdən uzaqlaşdırılmasını “ümumerməni vəzifəsi” olduğunu vurğulayaraq, ”hakimiyyət bütün siyasi metodlarla devrilməlidir” fikrini səsləndirib. Bu məqsədə çatmaq üçün vaxtın Ermənistan ətrafında daraldığını vurğulayan Şahnazaryan tezliklə yeni bir hərəkatın yaranmasına inandığını da bildirib”.

Ekspert bildirir ki, Ermənistanda məsələ artıq hakimiyyətin mövqeyinin sadəcə tənqid edilməsi, etiraz edilməsi mərhələsini keçib: “Çağırışların bir hədəfi var: Paşinyan hakimiyyəti devrilməlidir. Çağırışı edən siyasilər bütün təhlillərini Rusiya ilə əlaqələndirir, sülh müqaviləsi bağlanıb Azərbaycanın ərazi bütövlüyü tanındığı halda Qarabağda bir erməninin də qalmayacağı, nəticədə Rusiyanın Qarabağdan, sonra da Ermənistandan çıxıb gedəcəyi ilə cəmiyyəti hədələyirlər. Üstəlik, Paşinyanın bu məsələdə Qərb tərəfindən idarə olunduğunu, Avropa İttifaqının aktiv şəkildə bu proseslərə müdaxilə etdiyini və guya Ukrayna müharibəsi getdiyi bir vaxtda Rusiya maraqlarının olduğu bir çox bölgələrdə, o cümlədən Qarabağda “ikinci cəbhə açmaq”la Rusiyanı pis vəziyyətdə qoymağı hədəfə aldıqlarını vurğulayırlar. Əlbəttə, Rusiyanı erməni siyasilərin qızışdırmasına ehtiyacı yoxdur, çünki maraqlarına nəyin və necə təsir etdiyini, erməninin də burada nədən faydalanmaq istədiyini yaxşı bilir. Əksinə, Rusiyanın bu hay-küyü idarə etməsinə, istiqamət verməsinə şübhə yoxdur. Rusiya, ermənilərin öz dili ilə “yeni təhlükə, yeni müharibə, yeni itkilər, yeni qurbanlar və yeni kapitulyasiya” fikirlərini yayır, onları qorxudur, təhdid edir. Rusiyanın pas ötürməsi bununla bitmir, bəzi erməni siyasi ekspertlərin adından indiki situasiyanın ağır olduğunu və “Artsaxı tamamilə itirməmək” üçün keçmiş Dağlıq Qarabağ Muxtar Vilayətinin Azərbaycanın tərkibində bərpasına nail olmağı çıxış yolu kimi gördüklərini söyləyirlər”.

İ.İsmayıl əlavə edir ki, daşnaklar yalnız Rusiyaya deyil, beynəlxalq qurumlara da müraciət ünvanlayıb, Qarabağın Azərbaycana verilməsi üçün Paşinyanın şifahi və yazılı öhdəliyini, imzasını legitim hesab etmədiklərini bildiriblər:

“Yalnız Ermənistan siyasiləri deyil, Xankəndidəki separatçı rejim də Paşinyanın sülh müqaviləsi barədə dediklərinin əleyhinədir və beynəlxalq cəmiyyətin “Qarabağın statusunun plankasını aşağı salmağı” tələb etməsini qəbuledilməz sayırlar. Qondarma parlamentin adından Rusiya Federasiyasının rəhbərliyinə “Artsax xalqının gələcək təhlükəsizliyi üçün heç kimə əsas verməmək” xahişi ilə müraciət ediblər. “Heç kim” dedikdə ilk növbədə Paşinyanı nəzərdə tutduqları aydın məsələdir. Onlar həmçinin ATƏT-in Minsk Qrupunun həmsədr ölkələrinin rəhbərliyini, Ukrayna ilə bağlı mövcud fikir ayrılıqlarından asılı olmayaraq, tədbirlər görməyə çağırıblar”.

Təhlükəsizlik eksperti deyir ki, separatçılar həm siyasi, həm də hərbi mübarizəyə hazır olduqlarını və bu mübarizəni eyni zamanda Ermənistan üçün, bütün ermənilər üçün aparacaqlarını bildirsələr də, bu şüarın real olmadığını özləri də yaxşı bilirlər. “O zaman real görünməyən belə bir şüarın ortaya atılması perspektiv təxribatlara zəmin hazırlamaq üçün Moskvaya lazım ola bilərmi? Moskva 6 aprel Brüssel görüşündən sonra qəzəbləndiyini gizlətmədi, 8 apreldə Ararat Mirzoyana “dərs” verdi, indi də Paşinyanı 19-da Kremlə çağırıb. Bu görüşün ütülü keçməyəcəyi indidən görünür. Ukraynadakı vəziyyətdən qəzəblənmiş çarın Nikol Paşinyana hansı “yolu” göstərəcəyi uzun müddət gizli qalmayacaq. Vaxtilə Ermənistanın birinci prezidenti Levon Ter-Petrosyan da 1997-ci ilin sentyabrında Azərbaycanla sülh müqaviləsinin bağlanmasının zəruriliyini elan edəndə, onu Novo-Oqaryovoda Yeltsinin rezidensiyasına çağırdılar və tezliklə istefa verməyə məcbur etdilər. İki aydan sonra Ermənistanın birinci prezidenti istefa verdi, ondan da iki ay sonra da Koçaryan prezident oldu. Nikol Paşinyanı da belə bir tale gözləyə bilərmi? Heç nə alınmasa, 1999-cu il 27 oktyabr parlament qətliamı kimi sui-qəsd hadisəsinin baş verəcəyi də istisna olunmur. Nəzərə alaq ki, terrorçu təşkilat Daşnaksütun yeganə çıxış yolunun hakimiyyəti istefaya göndərmək olduğu barədə bəyanat yayıb. Metodlardan biri də arzuolunmaz fiqurları terrorla aradan götürməkdir”, – ekspert qeyd edir.

Onun fikrincə, normal məntiq və mövcud situasiya belə olmayacağını deyir. Ekspert əlavə edir ki, Paşinyan Moskva səfərinə əliboş deyil, Qərbin “məsləhətli donu”ilə gedəcək və geri dönəndə donun nə qədər “gen” olduğu da bilinəcək: “Sülh müqaviləsindən imtina olmayacaq, sadəcə, bu işin memarının Moskva olduğu qabardılacaq və çox güman ki, zaman məsafəsi yenə də qeyri-müəyyən olaraq qalacaq. Qarabağ siyasəti yeni detallarla yeni mərhələyə daxil olur. Bütün variantları nəzərə alaraq, Azərbaycanın bu mərhələdən də uğurlu çıxması şübhə doğurmur”. //pressklub.az//

Qafqaz Müsəlmanları İdarəsindən deyirlər ki, yığılan pulların onlarla heç bir bağlılığı yoxdur.

Yaponiya Şimali Koreyanın şənbə günü bir neçə raket buraxdığını hesab edir.

Zamantv.az-ın xəbərinə görə, bu barədə Yaponiyanın Müdafiə Nazirliyi məlumat yayıb.

Nazirlik hazırda raketlərin tipini müəyyən etmək üçün araşdırma aparır.

Şimali Koreya ordunun gücünü artıracaq yeni silah sistemini sınaqdan çıxarıb.

Zamantv.az-ın xəbərinə görə, bu barədə ölkə televiziyası məlumat yayıb.

Bildirilib ki, ölkə başçısı Kim Çen In da yeni raketin buraxılışını izləyib. Rəsmi KCNA agentliyinin məlumatına görə, yeni silah sayəsində artilleriyanın atəş gücü artacaq, nüvə-taktiki raketlərin iş keyfiyyəti yaxşılaşacaq. Lakin agentlik raket sınağının dəqiq tarixini açıqlamayıb.
Ekspertlərin hesablamalarına görə, rəsmi Pxenyan 2006-cı ildən indiyədək 6 nüvə sınağı keçirib. Hazırda nüvə başlıqlarının ölçülərinin kiçildilməsi üzərində iş gedir. Məqsəd ballistik raketlərin uçuş məsafəsini artırmaqdır.

Politoloq Cümşüd Nuriyev Publika.az-a müsahibəsində bildirib ki, Kremlin İrəvan və Bakı arasında münasibətlərin normallaşması üçün xüsusi nümayəndə təyin etməsinin səbəbləri var.

Müsahibəni təqdim edirik:

- Cümşüd müəllim, İqor Xovayevin Azərbaycan-Ermənistan münasibətlərinin normallaşması üçün Kreml tərəfindən xüsusi nümayəndə təyin edilməsi nədən xəbər verir?

- Əslində, Rusiyadan belə bir addım gözlənilməz idi. Çünki Rusiya daha çox Qarabağın dağlıq hissəsində sülhməramlıların əli ilə təxribatlara meyl edən bir istiqamət götürmüşdü. Amma 22 fevral 2022-ci ildə Azərbaycanla Rusiya arasında imzalanan ikitərəfli əməkdaşlıq bəyanatından sonra istiqamət dəyişib. Yəni əvvəlcə həmin ikitərəfli bəyanatı mən Azərbaycanı Rusiyanın gələcək bütün təxribatlarından qorumaq sənədi kimi qiymətləndirirdim. Amma indi bu sənədə başqa bir qiymət də verirəm; deməli, bu sənəd həm də Qarabağ məsələsinin həllinin sürətləndirilməsinə xidmət edir. 43 bəndlik razılaşma buna hesablanan bir sazişdir. Burada Rusiyanın Azərbaycanı özü üçün prioritet seçməsi heç də təsadüfi deyil. Moskva son hadisələr (Rusiya-Ukrayna müharibəsi) zamanı rəsmi Bakının nə qədər normal bir tərəfdaş, partnyor olduğunu gördü. Bundan başqa, Azərbaycan bu məsələlərdə sərbəst siyasət yürütdü. Nə Qərbin düşünülən və düşünülməyən sanksiyalarına qoşuldu, nə də Ukraynanı yalnız buraxdı. Azərbaycan dövləti öz xarici çıxarlarına, maraqlarına uyğun olaraq hərəkət etdi. Çünki Azərbaycan və Ukrayna ilə bağlı ayrıca qurum da mövcuddur. 1997-ci ilin oktyabr ayında Strasburq Bəyannaməsini məhz Ulu öndər yaratmışdı. GUAM adlı regional inteqrasiya təşkilatında da Azərbaycan həm Gürcüstan və Moldova, həm də Ukrayna ilə eyni qurumda təmsil olunur. Təbii ki, Azərbaycan buradakı maraqlarını da güdür. Bütün bunların fonunda görünən odur ki, Rusiya yeni xüsusi nümayəndə təyin etməklə bir sıra məsələləri nəzərdə tutub.

- Söhbət hansı nüanslardan gedir?

- Rusiya artıq Qarabağ məsələsində bu ərazilərin Azərbaycanın sərhədləri daxilində qalmasına qərar verdi. Bu, mənim şəxsi analizimdir. Ola bilər ki, bəzi şeylərdə yanılım. İkincisi, Rusiya tezliklə Azərbaycanla Ermənistan arasında sülh sazişinin imzalanmasının tərəfdarıdır. Moskva növbəti mərhələdə bunu həyata keçirəcək. Üçüncüsü, Rusiya birmənalı şəkildə demarkasiya və delimitasiya işlərini gündəmə gətirəcək. Yəqin ki, ilk növbədə delimitasiya işləri gerçəkləşdiriləcək, sonra sülh sazişi imzalanacaq. Bu da o deməkdir ki, İrəvan Bakı ilə sülh sazişinə imza atandan, Azərbaycanın ərazi bütövlüyünü tanıyandan sonra ölkəmizin daxilində, burada yaşayan etnik qrup kimi Qarabağdakı separatçı erməni qəbiləsinə hansı yanaşmanın olacağı ilə dövlətimizin Konstitusiyası ilə müəyyənləşəcək. Buna Azərbaycan Prezidenti qərar verəcək. Dövlətimizin Konstitusiyası imkan vermir ki, Azərbaycan federativ bir quruluş olsun. Ola bilər ki, onlarla bağlı hansısa mədəni muxtariyyət məsələsi müzakirə edilə bilər. Rusiya həm də Zəngəzur dəhlizinin açılmasında maraqlıdır. Eləcə də Moskva İrəvanın tez-tez öz mövqeyini dəyişməsindən artıq bezib. Üstəlik, Ermənistanın baş naziri Nikol Paşinyan peşəkar siyasətçi deyil. Paşinyan axşam “hə” deyir, gecə yatır, yuxuda nə görürsə, deyir ki, “yox”, “bu olmaz”.

- Brüssel görüşündən sonra regionda fərqli yönlərdə hərəkətlilik nədən xəbər verir?

- Brüssel görüşündən sonra görünən odur ki, Nikol Paşinyan Rusiyanın nüfuz dairəsindən çıxmaq istəyir. Məhz Rusiyanın Kremli təmsil edən bir adamı birdən-birə ATƏT-dən Azərbaycan-Ermənistan arasındakı münasibətlərin normallaşdırılması üçün xüsusi nümayəndə olaraq aparması, ona səlahiyyət verməsi ilə Moskva öz addımını qətiləşdirdi. Yəni həm də ATƏT-in “Fatihə”sini oxumuş oldu. Artıq ATƏT-in bir üzvünün belə bir addım atması o deməkdir ki, adıçəkilən qurumun bundan sonra heç bir statusu qalmayıb. Kreml onu da aradan qaldırdı. Ona görə də Brüssel görüşünün müsbət tərəfləri məhz bunlardır. Mənfi tərəflərinin olmasına isə mən inanmıram. Çünki Rusiya onsuz da kifayət qədər problemlə üzləşib. Ona görə də Kremlin Qərbə yolu bağlıdır. Şərqdə də Rusiyanı gözləyən yoxdur. Sadəcə onun Yaponiya ilə problemi var. Bircə Çin qalır, Rusiya gözəl bilir ki, Çin pusquda duran bir dövlətdir. İstənilən vaxt Rusiyanı məhv etməyə hazırdır. Ona görə də Moskvanın əsas tərəfdaşları Bakı və Ankara olacaq. Təbii ki, İranı da buraya qatacaqlar. Bu zaman “3+3” formatının aktuallığı yenidən gündəmə gələcək.

- Bəs bu formatdakı Gürcüstan “düyünü” necə olacaq?

- Ola bilər ki, Gürcüstanla müəyyən problemlər yaransın. Amma görünən odur ki, Gürcüstan Qərbin Rusiyaya qarşı sanksiyalarına qoşulmadı. Müəyyən mənada Moskva və Tiflis arasındakı münasibətlərdə istiləşmə, yumşalma var. Yəni bu formatın həyata keçirilməsi, 3 müsəlman, 3 xristian dövlətinin bir araya gələ bilməsi Rusiyanın maraqlarına uyğundur və Kreml bu istiqamətdəki fəaliyyətini həyata keçirəcək. Ona görə də Azərbaycan və Ermənistan arasında dövlətlərarası münasibətlərin normallaşdırılması üçün Rusiya tərəfindən İqor Xovayevin xüsusi nümayəndə ayrılması, onun perspektivdə Azərbaycanın əleyhinə hər hansı bir iş görməsi inandırıcı deyil.

- Sizcə, Qarabağdakı separatçıların rəhbəri Araik Arutyunyanın son təxribatçı açıqlamalarının arxasında kimlər və hansı amillər dayanır?

- Əslində Araik Arutyunyanın sayıqlamaları daha çox Koçaryan-Sarkisyan dueti ilə bağlıdır. Bilirsiniz ki, Rusiyada müəyyən qüvvələr var. Onlar Putinin hazırda yürütdüyü siyasəti də qəbul etmək istəmirlər. Xüsusilə rus ordusunun Ukraynadakı məğlubiyyəti rus generalitetini çox çətin vəziyyətə salıb. Həmin generalitet bir növ Ukraynadakı məğlubiyyəti Qarabağda unutdurmaq istəyir. Platondan üzübəri hər kəs deyir ki, müharibəyə generallar getmir, döyüşə əsgərlər yollanır. Yəni burada da rus generaliteti çalışır ki, Qarabağda Araik Arutyunyanın dili ilə bir şey desinlər. Bütün bunlar boş şeylərdir. Arutyunyan kimdir ki, onun ağzının ölçüsü ilə nəyisə qeyd etsinlər. Ermənistanın təhlükəsizlik orqanının rəhbərinin Qarabağa gəlməsi sırf baş nazir Nikol Paşinyanın göstərişidir. Çünki Ermənistan saytları qeyd edirlər ki, Paşinyan Azərbaycan və Türkiyənin agentidir. Bu mənada onlar başlarını itiriblər. Düşünürəm ki, Abazyan Xankəndiyə məhz Arutyunyanla bağlı gəlib. Yəni Arutyunyan sayıqlamasın.

- Yəni İrəvan Bakının daha sərt addımlar atacağından qorxur?

- Onlar çox gözəl bilirlər ki, əgər Putinin mövqeyi bu məsələnin bitməsinə xidmət edirsə, Azərbaycan Ordusunun Qarabağın dağlıq hissəsində anti-terror əməliyyatları keçirməsi an məsələsidir. Artıq Ağdərənin üstü tam olaraq Azərbaycanın nəzarətindədir. Xocalı da, Xankəndi də hərbi nüfuz dairəsindədir. Ən azından iriçaplı olmasa da, kiçik və ortaçaplı silahlarla Azərbaycan Ağdərəni də, Xankəndini də birmənalı şəkildə məhv edə bilər. Ermənilər həmişə bu mənada dinc əhalidən istifadə edib təxribatlar törədirlər. Amma Azərbaycan Ordusu bu baxımdan çox tərbiyəli bir ordudur. Biz qadınlarla, uşaqlara heç vaxt vuruşmamışıq. Bu, bizim millətə xas olan xüsusiyyət deyil, ermənilərə xas olan xasiyyətdir. Harda olursa olsun, biz düşməni məhv etməyə qadirik. Ermənistanın indiki rəhbərliyi bunu çox gözəl başa düşür. Paşinyan elə-belə demir ki, mən Ukrayna səhvini buraxa bilmərəm. Yəni bu o deməkdir ki, Paşinyan Ermənistanın və Qarabağdakı ermənilərin Ukraynanın və oradakıların vəziyyətinə düşməsini istəmir. Ermənistanın baş naziri anlayır ki, əks halda Qarabağda bir nəfər də olsun erməni qalmayacaq. Ermənistanda Qarabağa avtobuslarla erməni daşıyırlar, amma bu o demək deyil ki, Qarabağda ermənilər var. Bu mənada Araikin sərsəmləmələrinə o qədər də fikir vermək lazım deyil. Paşinyan sərsəmləyib nə qazandı ki, separatçı qurumun “rəhbəri” də nə qazansın?! Bir sözlə, narahat olmağa dəyməz.

Rusiya Prezidenti Vladimir Putin İkinci Dünya müharibəsində SSRİ ilə nasist Almaniyasını ictimai şəkildə eyniləşdirməyə görə cəriməni nəzərdə tutan qanunu imzalayıb.

Zamantv.az xəbər verir ki, Rusiya Prezidentinin imzaladığı sənəd rəsmi hüquq informasiya portalında dərc olunub.

Qanuna görə, ictimai şəkildə İkinci Dünya müharibəsində SSRİ və nasist Almaniyasının rolunu bənzədən, Sovet İttifaqının faşizm üzərində qələbədə rolunu inkar edən fiziki şəxslər 5 min rubla qədər cərimə və ya 15 günə qədər həbs, hüquqi şəxslər isə 100 min rubla qədər cərimələnəcəklər.

Rusiya XİN Çexiyaya nota verib.

Zamantv.az xəbər verir ki, bu barədə TASS agentliyi məlumat yayıb.

Nota Çexiyanın Sovet İttifaqında istehsal edilmiş silah və texnikanı başqa ölkələrə ötürməsi ilə bağlı verilib.

“Azəriqaz” İstehsalat Birliyi hər zaman şəhid və qazi ailələrinin müraciətlərini diqqət mərkəzində saxlayır. Bu istiqamətdə görülən işlər çərçivəsində daha 2 qazi ailəsinin müraciəti təmin olunub.

Zamanv.az xəbər verir ki, Salyan rayonunun Dayıkənd kənd sakini Əliabbas Qasımov torpaqlarımızın azadlığı uğrunda gedən Vətən müharibəsində iştirak edib.

O, Birliyə müraciət edərək ailəsi ilə birgə yaşadığı fərdi yaşayış evinin həyətyanı sahəsinin yaxınlığından keçən qaz xəttinin və qaz sayğacının yerinin dəyişdirilməsini xahiş edib. Birlik rəhbərliyinin tapşırığı ilə Salyan Regional qaz istismarı İdarəsinin Salyan xidmət sahəsi tərəfindən qazinin müraciəti qısa zamanda həllini tapıb.
Salyan rayonunun Kürsəngi kənd sakini Natiq Mailov da 2-ci Qarabağ döyüşlərində iştirak edib. O, Suqovuşan istiqamətində gedən döyüşlərdə yaralanıb. Qazi ona məxsus fərdi yaşayış evinin qazlaşdırılması ilə bağlı Birliyə müraciət edib. Birliyin baş direktorunun müvafiq göstərişi ilə Vətən müharibəsi iştirakçısının müraciətinin həlli istiqamətində işlərə başlanılıb. Fərdi yaşayış evi təbii qazla təmin edilərək sayğac quraşdırılıb.

Aprelin 17-dən etibarən İtaliya limanları Rusiya gəmiləri üçün bağlanacaq.

Zamantv.az xəbər verir ki, bu barədə “Stampa” qəzeti məlumat yayıb.

Bildirilib ki, bu qadağa fevralın 24-dən bayrağını dəyişdirərək, başqa bayraq altında üzən gəmilərə də şamil ediləcək.