"Siyəzən Broyler" ASC-nin ərazisində yanğın olub.

Zamantv.az Fövqəladə Hallar Nazirliyinin saytına istinadən xəbər verir ki, ASC-nin ərazisində ümumi sahəsi 1096 m² olan quşçuluq sexinin dam örtüyünün yanar konstruksiyaları 548 m² sahədə, içərisində elektrik naqilləri 820 p.m, 12 ədəd mühərrik və havalandırma qurğusu, 1070 ədəd plastik su və yem qabı yanıb.

Sexin qalan hissəsi yanğından mühafizə olunub. Yanğın yanğından mühafizə bölmələri tərəfindən söndürülüb.

İstanbulun “Tophane” parkında təxminən 50 nəfərlik iki qrup arasında başlayan qartopu oyunu silahlı döyüşə çevrilib.

Zamantv.az-ın Türkiyə mediasına istinadla məlumatına görə, silahlardan istifadə edilən davada 6 nəfər yaralanıb.

Dava anları təhlükəsizlik kameralarına da düşüb
Polis qrupları, silahla atəş açan da daxil olmaqla cəmi 4 nəfəri nəzarətə götürüb, yaralılar isə xəstəxanaya aparılıb.

Məlumata görə, hadisə martın 12-də axşam yerli vaxtla saat 21:15-də baş verib. Parka gələn təxminən 50 nəfərdən ibarət 2 qrup qartopu oynamağa başlayıb. Bir müddət əylənən qruplar arasında qartopu atdıqları üçün mübahisə düşüb. Mübahisə davaya çevrildikdən sonra iki qrup yumruq və təpiklə bir-birinə hücum edib. Davam edən davada iştirakçılardan biri silahını çıxararaq qarşı qrupa güllə yağdırıb. Qəfil baş verən silahlı qarşıdurmada 6 nəfər bədənlərinin müxtəlif yerlərindən yaralanıb

Xalq artisti Naibə Allahverdiyeva Xalq artisti Flora Kərimova və müğənni Afət Fərmanqızı arasındakı məhkəmə qalmaqalına münasibət bildirib.

Zamantv.az xəbər verir ki, aktrisa bunla bağlı sosial şəbəkədə paylaşım edib. N.Allahverdiyeva ad çəkmədən Afətin ünvanına bunları yazıb:

"Bunu yazmasam ürəyim partlayar. Xalq artisti, əvəzolunmaz, korifey, vətənpərvər sənətkar Flora Kərimova... Flora xanımın istedadının hüdudları yoxdur. Bu gün isə eşidirik ki, Flora xanım deyir, məni təhqir edib, şərəf və ləyaqətimi alçaldıblar. Bu, dəhşətdir. Sənətdə subardinasiya itib. Biz gəncliyimizdə özümüzdən böyük sənətkarları, Xalq artistlərini görəndə özümüzü yığışdırırdıq, yaxınlaşıb "salam" verməyə utanırdıq, onlardan sənətin sirlərini öyrənməyə çalışırdıq. Arzu edirdik ki, biz də onlar kimi sənətdə iz qoyaq, tamaşaçıların məhəbbətini qazanaq. Bu gün də özümdən böyük sənətkarları görəndə ayağa qalxıram. Bunu özümə borc bilirəm. Amma bu gün nə görürük, sənətin əlifbasını belə bilməyənlər, Azərbaycan musiqisini bərbad günə qoyanlar Flora xanım kimi sənətkara hörmətsizlik edirlər. Ayıb olsun! Flora Kərimova Xalq artisti, xalqın sevdiyi, hörmət etdiyi sənətkardır. Azərbaycan musiqi tarixinə öz imzasını qoymuş sənətkardır. O, bir brenddir. Azərbaycan musiqisi yaşadıqca, Flora xanımın oxuduğu əsərlər (hər mahnısı bir əsərdir) yaşayacaq. Sən kimsən? Hansı titulun sahibisən? Hansı oxuduğun musiqilərlə imza atmısan? İki badam, bir qoz? Xalq artisti öz sənətinin generalıdır. Sənin borcundur ona hörmət etmək. Susduqca, həddinizi aşmayın".

“Azərbaycan Türkiyədən bütün növ silahlar, o cümlədən “Hurkuş” təlim təyyarələri ala bilər”.

Bunu “Report”un yerli bürosuna açıqlamasında Türkiyə Müdafiə Sənayesi İdarəsinin rəhbəri İsmail Demir deyib.

“Bu, hər an reallaşa bilər”, - o vurğulayıb.

“G7 ölkələri (Böyük Britaniya, Almaniya, İtaliya, Kanada, Yaponiya, Fransa və ABŞ) Rusiyaya qarşı yeni sanksiyalar paketi üzərində işləyir. Məhdudiyyətlərdə qarşıya qoyulan məsələ Rusiya Prezidenti Vladimir Putinin öz ordusunu maliyyələşdirmək üçün pulunun olmamasına əmin olmaqdır”.

Bunu Britaniyanın xarici işlər naziri Liz Trass deyib.

Siyasətçi konkret olaraq hansı sanksiyaların müzakirə olunduğunu isə açıqlamayıb.

“Biz artıq G7 ilə yeni sanksiyalar paketi üzərində işləyirik”, - deyə nazir Vaşinqtonda çıxışı zamanı qeyd edib.

Bununla yanaşı, söhbət Rusiya Federasiyasının ticarət statusundan məhrum edilməsindən, rüsum və kvotaların tətbiqindən də gedə bilər.


Mənbə: VOA

11 mart 2022-ci il tarixində Azərbaycan Respublikası xarici işlər naziri Ceyhun Bayramov Türkiyə Respublikasına işgüzar səfəri çərçivəsində BMT-nin Qaçqınlar üzrə Ali Komissarı (UNHCR) Filippo Qrandi ilə görüşüb.

Bununla bağlı Azərbaycan Xarici İşlər Nazirliyi məlumat yayıb.

Görüşdə Azərbaycan və BMT-nin Qaçqınlar üzrə Ali Komissarlığı arasında əməkdaşlığın perspektivlərinə və gündəlikdə duran humanitar məsələlərə dair fikir mübadiləsi aparılıb. Həmçinin, 10 noyabr 2020-ci il bəyanatına uyğun olaraq, məcburi köçkünlərin öz evlərinə qayıdışı məsələsi də müzakirə olunub.

Görüş zamanı Ceyhun Bayramov Azərbaycanın BMTQAK ilə əməkdaşlığa önəm verdiyini qeyd edərək azad edilmiş ərazilərdə həyata keçirilən bərpa və quruculuq işləri və məcburi köçkünlərin bu ərazilərə geri qayıtması tədbirləri ilə bağlı qarşı tərəfə ətraflı məlumat verib.

Filippo Qrandi ətraflı məlumata görə öz təşəkkürünü ifadə etdi və ölkəmizin bu istiqamətdə gördüyü işlərin təqdirəlayiq olduğunu qeyd etdi.

Tərəflər məcburi köçkünlərin öz doğma torpaqlarına təhlükəsiz qayıdışını təmin etmək üçün əməkdaşlığın davam etdirilməsinə qarşılıqlı maraq ifadə ediblər.

Görüşdə, həmçinin regional məsələlər, o cümlədən Ukraynadakı vəziyyət müzakirə edilib.

APA ABŞ-ın Azərbaycandakı fövqəladə və səlahiyyətli səfiri Li Litzenberqer Ukrayna-Rusiya münasibətlərinə dair məqaləsini yayıb.

İndi Avropa üçün və bütün dünyada azadlıqsevər insanlar üçün təhlükəli məqamdır. Vladimir Putin Ukrayna xalqına qarşı qəddar hücumu ilə qlobal sülhə və demokratiyaya da hücum etmiş oldu. Lakin Ukrayna xalqı dözümlüdür və onların şücaəti dünyanı ruhlandırır. Ukrayna xalqını öz ölkəsini müdafiə etdiyi bir zamanda Birləşmiş Ştatlar dünya üzrə müttəfiqlərimiz və tərəfdaşlarımızla birgə onları dəstəkləməyə davam edəcək.
Cavabımızda birik

Mən ABŞ-nin Azərbaycandakı səfiri kimi, bu işğalın Azərbaycan xalqında nə qədər açıq rezonans doğurduğunu görürəm. Minlərlə Azərbaycan vətəndaşı Ukraynada işləyir və təhsil alır. Buradakı bir çox insanın orada dostları, ailələri var. Bu il Azərbaycan kimi Ukrayna da ABŞ ilə əlaqələrinin 30 illiyini və Sovet İttifaqından müstəqilliyinin 30 illiyini qeyd edir. Bu gün Ukraynanın müstəqilliyi təhlükə altındadır. Ukraynada insan tələfatı, o cümlədən günahsız Azərbaycan vətəndaşlarının – qadınların və uşaqların, gənclərin, hətta yeni doğulmuş körpənin faciəvi vəfatı məni çox kədərləndirir. Azərbaycan hökumətinin və xalqının Ukraynaya yardım üçün humanitar yardım göndərməsi məni ürəkləndirir.

Birləşmiş Ştatlar müttəfiqlərimiz və tərəfdaşlarımız ilə birlikdə Ukraynanın yanında olmaq və Rusiyanı məsuliyyətə cəlb etmək üçün tədbirlər görürlər. Prezident Bayden Rusiyanın iqtisadiyyatına, maliyyə sisteminə və texnologiyaya çıxışına zərər verəcək geniş maliyyə sanksiyaları və sərt ixrac nəzarəti elan etdi.

Eyni zamanda, Prezident Bayden dərhal Ukraynaya özünü müdafiə etmək üçün əlavə 350 milyon dollarlıq təhlükəsizlik yardımı ayrılmasına icazə verdi. Bununla da Amerikanın Ukraynaya son bir ildə ümumi təhlükəsizlik yardımı 1 milyard dolları aşdı. Bu böhran zamanında Ukrayna xalqını dəstəkləmək üçün biz bu yaxınlarda 300 milyon dollara əlavə olaraq 54 milyon dollar humanitar yardım elan etdik.

Eyni zamanda, Birləşmiş Ştatlar qlobal enerji təchizatının təmin edilməsində ümumi marağımızı vurğulamaq üçün əsas neft hasil edən və istehlak edən ölkələrlə əlaqələndirmə işləri aparmışdır. Biz enerji şirkətləri ilə işləyirik ki, qiymətlərin artımı fonunda onların bazara enerji təchizatı imkanlarını artıraq. Biz Azərbaycanın bu sahədə bazar sabitliyini təşviq etmək səylərini yüksək qiymətləndiririk.

Putinin səbəbsiz və əvvəlcədən düşünülmüş müharibəsi

Bu, Vladimir Putinin çoxdan planlaşdırdığı hücum idi. O, 150 mindən çox əsgər və hərbi texnikanı Ukrayna sərhədinə köçürdü, qan ehtiyatlarını hazır vəziyyətə gətirdi və hazırlıq üçün səhra xəstəxanaları tikdi. O, lüzumsuz münaqişələrdən qaçmaq, diplomatiya və dialoqa getmək üçün ABŞ-nin, müttəfiqlərimizin və tərəfdaşlarımızın göstərdiyi hər cür xoş niyyətli səyləri rədd etdi.

Putin öz oyununu bizim əvvəlcədən xəbərdar etdiyimiz şəkildə icra etdi. Biz Rusiyanın etibarlı qüvvələrinin Donbasda atışmaları artırdığını gördük. Biz Rusiya hökumətinin Ukraynaya qarşı kiber əməliyyatlara başladığını gördük. Biz Moskvada səhnələşdirilmiş siyasi tamaşanı gördük və Rusiyanın təcavüzünə bəraət qazandırmaq üçün Ukrayna haqqında absurd və əsassız iddialar eşitdik. Rusiya heç bir dəlil olmamasına baxmayaraq, Ukraynada “soyqırımın” dayandırılmasının zəruriliyi ilə bağlı saxta iddialar irəli sürməklə, hərbi təcavüzünə haqq qazandırmağa davam edir. Rusiya indi fərq qoymadan mülki şəxslərə, xəstəxanalara və məktəblərə qarşı hücumlara əl atır. 2014-cü ildə Ukraynanı, 2008-ci ildə Gürcüstanı işğal edəndə Rusiyanın bu taktikadan istifadə etdiyini görmüşdük.

Biz Rusiyanın planları ilə bağlı kəşfiyyat məlumatlarımızı açıqladıq ki, qarışıqlıq və ört-basdır olmasın. Putin təcavüzkardır. Putin bu müharibəni seçdi. İndi isə onun xalqı prezidentlərinin onlara deyil, müharibəyə sərmayə qoymaq qərarının nəticələrini çəkəcək. Putin bizi parçalaya bilmədi. Putin qürurlu Ukrayna xalqını silə bilməyəcək.

Növbəti bir neçə gün, həftə və ay Ukrayna xalqı üçün inanılmaz dərəcədə çətin olacaq. Putin onları böyük əzaba düçar edir. Ancaq Ukrayna xalqı 30 illik müstəqilliyi dadıb və ölkələrini geriyə aparmağa çalışan heç kəsə qarşı dözümlü olmayacaqlarını dəfələrlə nümayiş etdirib. Biz Ukraynanın yanında qalmağa və qlobal sülhü təhdid edən təcavüzə qarşı durmağa davam edəcəyik.

Putinin Ukraynaya qarşı təcavüzü Rusiyaya həm iqtisadi, həm də strateji baxımdan çox baha başa gələcək. Rus xalqı öz hökumətlərinin bu işğalına görə üzləşməli olacaqları acı nəticələrə deyil, daha yaxşısına layiqdir.

ABŞ-nin Azərbaycandakı fövqəladə və səlahiyyətli səfiri Li Litzenberqer

Ukrayna hərbçiləri Rusiya prezidenti Vladimir Putinin NATO-ya qarşı döyüşmək planlarını əks etdirən sənədləri ələ keçirə bilib.

Zamantv.az Ukrayna mediasına istinadla bildirir ki, bu barədə ukraynalı hərbi jurnalist Andrey Tsaplienko məlumat verib

Onun sözlərinə görə, Ukrayna Silahlı Qüvvələri xüsusi xidmət orqanları ilə birlikdə Rusiyanın NATO ilə döyüşə hazırlığını göstərə biləcək qiymətli sənədləri ələ keçirib. Belə ki, Xerson və Nikolaevski yaxınlığındakı döyüşlərdə ələ keçirilən Rusiyaya məxsus sənədlərdə onun ehtimal olunan düşməni, o cümlədən ABŞ, Türkiyə, Yunanıstan və digər ölkələr haqqında broşürlər hazırlanıb.

Bundan əlavə, qeyd olunur ki, hər bir Rusiya hərbçisinə NATO ölkəsinin əsgərini müəyyən etmək üçün materiallar verilib.

Tsaplienko qeyd edib ki, ələ keçirilən sənədlərdə NATO ölkələrinin tanınma nişanları, onların hərbi geyimləri, aviasiya, artilleriya, zirehli və digər hərbi texnika təsvir edilib. O əlavə edib ki, bu, Putinin NATO bloku ölkələri və bütün dünya ilə mübarizə aparmaq niyyətindən xəbər verir.

Azərbaycanda faktiki hava şəraiti açıqlanıb.

Milli Hidrometeorologiya Xidmətindən Zamantv.az-a verilən məlumata görə, martın 10-u saat 12:00-a olan məlumata əsasən bəzi yerlərdə yağış, dağlıq ərazilərdə qar yağıb.

Yağıntı: Lerikdə 11.0 mm, Şabranda 6.0 mm, Sədərək, Gədəbəy, Zaqatala, Xaltanda 2.0 mm, Ağdərə (Ordubad), Daşkəsən, Göygöl, Şəmkir, Balakən, Qax, Oğuz, Qəbələ, İsmayıllı, Qobustan, Quba, Qusar, Bərdə, Göyçay, Salyan, Neftçala, Ağsu, Maştağada 1.0 mm-dək olub.
Qar örtüyünün hündürlüyü: Şahdağda 30 sm, Qrızda 5 sm, Göygöldə 4 sm, Daşkəsəndə 3 sm, Xaltanda 1 sm olub.

Külək: Cənub-şərq küləyi arabir Gəncədə 24 m/s, Neftçala, Naftalanda 20 m/s, Ağdamda 18 m/s, Kəlvəzdə 17 m/s, Tərtərdə 16 m/s, Bakıda və Abşeron yarımadasında 19 m/s-dək güclənib.

Neft Daşları stansiyasının məlumatına əsasən dalğanın hündürlüyü 2.7 metrə çatıb.

Bakı Şəhər İcra Hakimiyyətində (BŞİH) müşavirə keçirilib və icra başçılarına ciddi xəbərdarlıq edilib.

Bu barədə BŞİH-in Mətbuat Xidmətindən məlumat verilib.

Bildirilib ki, Bakı şəhəri ərazisində qanunsuz tikintilərlə bağlı vəziyyət və bu halların qarşısının alınması məsələləri paytaxt rayonlarının icra hakimiyyəti başçıları və müvafiq təsərrüfat strukturları rəhbərlərinin, Dövlət Şəhərsalma və Arxitektura Komitəsi yanında Bakı Şəhər Memarlıq və Şəhərsalma Baş İdarəsi və Fövqəladə Hallar Nazirliyinin nümayəndələrinin iştirakı ilə Bakı Şəhər İcra Hakimiyyətində keçirilən müşavirədə müzakirə edilib.

Müşavirədə çıxış edən Bakı Şəhər İcra Hakimiyyətinin başçısı Eldar Əzizov martın 3-də Prezident İlham Əliyevin çıxışı zamanı Bakı şəhərində qanunsuz tikintilərlə bağlı tutduğu iradlar və bu neqativ halların qarşısının alınması ilə bağlı verdiyi tapşırıqlar barədə məlumat verib.

Bildirilib ki, son vaxtlarda rayon icra hakimiyyəti başçılarına qanunsuz tikililərlə mübarizə tədbirlərinin gücləndirilməsi ilə bağlı dəfələrlə tapşırıqlar verilib, buna baxmayaraq, rayon icra hakimiyyətləri başçıları, onların aparatının məsul əməkdaşları bu vacib məsələni daimi nəzarətdə saxlamayıb və nəticədə ərazidə qanunsuz tikintilərin artmasına şərait yaranıb.

Müşavirədə paytaxt ərazisində aparılan monitorinq zamanı aşkar edilən qanunsuz tikililər barədə film nümayiş etdirilib.

Toplantıda paytaxtın hər bir rayon icra hakimiyyəti başçısının rayon ərazisindəki bütün məsələlərlə bağlı şəxsi məsuliyyət daşıdıqları vurğulanıb və bildirilib ki, RİH-in qanunsuz tikintilərə qarşı Bakı Şəhər Memarlıq və Şəhərsalma Baş İdarəsinin Şəhərsalma Nəzarəti şöbəsi ilə birgə fəal əməkdaşlıq etməlidirlər.

Müşavirədə ərazisində daha çox qanunsuz hallara yol verilmiş bəzi icra hakimiyyəti başçılarına ciddi xəbərdarlıq edilib, qanunsuz tikinti halların qarşısının alınması ilə bağlı təcili və təxirəsalınmaz tədbirlərin görülərək bu barədə 2 ay müddətində hesabat verilməsi tapşırılıb.

Müşavirədə həmçinin yaz mövsümü ilə əlaqədar şəhərdəki park, istirahət bağları, “Abad məhəllə”lərdə cari təmirlərin aparılması, ağac və yaşıllıqlara qulluq göstərilməsinə nəzarətin artırılması ilə bağlı müvafiq tapşırıqlar verilib.

Bizimlə əlaqə saxlayın