Deputat Ağalar Vəliyevlə bağlı keçən yazımızda toxunduğumuz məqamlar maləsəf, rəsmi izahatla müşahidə olunmadı. Amma bunun da səbəbi varmış. Bu barədə DİA.AZ-a daxil olan məlumatlardan aydın olur. Xatırladaq ki, keçən günlərdə Ağalar Vəliyevin bizensi ilə bağlı müəyyən informasiyaları paylaşmışdıq və ortada bir sual var idi, rəsmilər bundan xəbərdardırmı... İndi isə bu olaya qeyr-rəsmi olaraq rəsmi münasibətin necəliyi açıqlanır...

Belə ki, hökumətdəki qaynağın dia.az-a açıqlamasındakı iddialara görə, nəninki Ağalar Vəliyevin, habelə digər biznesmen deputatların növbəti seçkilərdə Milli Məclisin heyətində görünmələri imkansız olacaq. Mənbə bildirir ki, artıq belə bir RƏSMİ QƏRAR VAR və onlar qarşısında `YA MANDAT, YA DA BİZNES" seçimi qoyulacaq...

Biz isə dia.az olaraq öz növbəmizdə biznesmen deputatlarımızın hansı çətir altında öz "işgüzarlıqlarını" gizlətdiklərini ifşa etməkdə davam edəcəyik. Yerinə düşdüyündən bu barədə "Bumerang Media"nın hazırladığı süjeti təqdim edirik

Qanunla deputatların bizneslə məşğul olmasının qadağan edilməsinə baxmayaraq, hələ də bəziləri iş fəaliyyətini davam etdirir. Hətta onların bir qismi ölkədə qurduqları biznes imperiyasını xaricdə də genişləndirməklə məşğuldurlar.
Bakupost xəbər verir ki, belə deputatlardan birinin də Ağalar Vəliyev olduğu iddia edilir. Belə ki, Azəraqrartikinti ASC sədri olan və mənzil biznesi ilə tanınan deputatın biznesi Gürcüstanda da geniş inkişaf edib.

“AS-AQRARŞMENİ” adı ilə Tiflisdə qeydiyyata alınan və qanuni təmsilçilik hüququ İmran Verdiyevə həvalə olunan həmin şirkət deputata məxsus şirkətlərdən biridir.
Hələ 2014-cü ildə deputatın Novxanıda çoxqübbəli və bir neçə milyon manat qiyməti olan villa tikdirdiyi bildirilirdi. Onun Gürcüstanda olan daha bir şirkəti isə oğlu Pərviz Vəliyevin adınadır. PZ Servis MMC-nin rəhbəri olan Pərviz Vəliyevin ötən il Kabuletidə otel və bir neçə başqa bina tikdirdiyi və buna görə qonşu ölkəyə 50 milyon dollar vəsait yatırdığı bildirilir.
Xaricdə atasının biznesini genişləndirən Pərviz Vəliyevin hazırda Azərbaycanda plastik pəncərələr istehsal edən fabriki, beton zavodu və “Mələk” ailə-uşaq əyləncə mərkəzi də var.
Həmçinin Pərviz Vəliyevin İstanbulun mərkəzində, Sultanəhməd məscidi yaxınlığında yerləşən dördulduzlu “Aybar” oteli, Ukraynada böyük biznes şəbəkəsinin də olduğu iddia edilir.
“Kristal Abşeron” MTK-nın sahibi kimi də tanınan Ağalar Vəliyev bəzi şirkətlərini qohumlarının adına açıb. Belə ki, onun Azital İnşaat MMC adlı şirkəti qardaşı oğlu Ramin Vəliyevin adınadır.
Ümumilikdə isə Vəliyevlər ailəsinin böyük biznes imperiyası mövcuddur.

Məsələ ilə bağlı dia.az olaraq qarşı tərəfi də dinləməyə hazırıq...

Ölkəmizdə su təsərrüfatı sahəsi əsas strateji sahələrindən biri hesab olunsa da, deyəsən uzun illərdən bəri
Tovuz Suvarma Sistemləri idarəsinin rəisi vəzifəsindən “ikiəlli yapışan” Nəsrəddin Əsəd oğlu Aslanov, hələ də
bu sahənin əhəmiyyətinə “gözucu qiymət” verməkdə davam edir. Media üzərindən apardığımız
araşdırmalardan, bəzi mənbələrdən əldə etdiyimiz səhih məlumatlardan və s. aydın olur ki, idarə rəisi vəzifəsini
daşıyan bu şəxsin yeni sakinlərdən bəzilərinə qarşı sərgilədiyi kin-kudurət artıq “pik nöqtə”yə çatıb. Çünki,
rayon sakinlərdən bəzilərinin redaksiyamıza ünvanladıqları şikayət məktubların məzmunlarından bəlli olur ki,
Nəsrəddin Aslanovun rəhbərlik etdiyi Tovuz Suvarma Sistemləri idarəsinin əməkdaşları, bu gün də imkansız
sakinlərə “qan qusdurmaq”la məşğuldurlar.

Məsələn, Tovuz rayonu, Qovlar şəhəri, Xəqani küçəsi, ev-13 ünvanında yaşayan Əsgərov Şahin Kərəm oğlu,
uzun müddətdir ki, suvarma suyuna həsrət qalıb. Bu şəxs redaksiyamıza çatdırdığı video-müraciətində qeyd edir
ki, “Bizim ailə üzvlərinin 1ha.78 sot torpaq sahəsi var və həmin torpaq sahəsinə yonca qarışıq taxıl əkmişik.
Artıq payız fəslinin sonlarıdır və hal-hazırda əkin sahəmizin suvarılmasına ehtiyac var. Şəxsən mən oktyabr
ayının ilk günlərindən yonca qarışıq taxıl sahəmizi suvarmaq üçün, dəfələrlə idarənin rəhbər şəxslərinə
müraciət etmişəm. Hər dəfə mənə “Bir qədər gözləməli olacaqsınız, hələ sizə su verə bilmərik” deyə cavab
verirlər. Bəli, həqiqətən də bu belə olur. Çünki, suvarma suyunun verilməsinə cavabdehlik daşıyan məsul
şəxslər, o cümlədən Rafiq və Bəhruz adlı şəxslər idarə rəisinin verdiyi “nataraz tapşırıqlar”ı əsas tutaraq
addımlarını atırlar. Yəni, kim əkin sahəsini suvarmaq üçün daha çox pul verirsə, suvarma suyu həmin
şəxslərə verilir. Bir sözlə, Nəsrəddin Aslanovun rəhbərlik etdiyi Tovuz SSİ-nin əməkdaşlarını imkansız
ailələrin, o cümlədən bizim ailənin taleyi heç bir halda düşündürmür, onları daha çox pul, var-dövlət əldə
etməyin yolları düşündürür. Qeyd edim ki, bizə məxsus yonca qarışıq taxıl sahəsinin sağ və sol hissələrində ayrı-
ayrı şəxslərə məxsus sahələr var. Hazırda SSİ-nin rəhbər şəxsləri qeyd olunan taxıl sahələrinin suvarılması
zamanı heç bir problem yaratmırlar. Elə ki, biz də minbir əzab-əziyyətlə ərsəyə gətirdiyimiz sahəmizi suvarmaq
istəyirik, o halda bu qurumun əməkdaşları “Növbəniz çatanda sizə də su verərik” deyib, açıq-aşkar şəkildə bizi
“fırlatmaqla” məşğul olurlar. Yəni, oktyabr ayının əvvəlindən indiyə kimi suvarma suyuna həsrət qaldığımızdan,
heç cür taxıl sahəmizi suvara bilmirik. Belə bir səbəbdən də, yonca qarışıq taxıl əkdiyimiz sahə tamamilə
quruyub və sahəni gəmiricilər məhv etməkdədirlər. Qeyd edim ki, bu qurumun əməkdaşları 1 ha əkin
sahəsinin suvarılması üçün, imkanlı şəxslərdən 50 AZN pul alırlar və günlərini kafelərdə yeyib –içməkdə
keçirirlər. Yəni, Tovuz SSİ idarəsində elə bir idarəçilik qaydası qurulub ki, aşağıda pulları Qaqarin adlı şəxs yığır
və o, toplanan pulları özündən yuxarı vəzifə sahiblərinə çatdırır. Elə ki, aidiyyatı üzrə dövlət qurumlarına şikayət
edəcəyimi deyirəm, o halda SSİ-də çalışan bəzi vəzifə sahibləri “Get kimə, hansı vəzifə sahibinə istəyirsən
şikayətini çatdır. Biz bir kimsəni “priznavat” etmirik” deyə cavab verirlər. O halda sual oluna bilər ki, görəsən
Tovuz SSİ-nin əməkdaşlarının belə bir ayrıseçkiliyə yol vermələrinin kökündə nələr durur? Məgər, bizim
ailənin üzvləri də bu ölkənin vətəndaşları deyilmi? Bizim suvarma suyundan istifadə etmək hüququmuz
yoxdurmu?

Baxmayaraq ki, ölkə Prezidentinin 27 iyul 2020-ci il tarixli “Su ehtiyatlarından səmərəli istifadənin təmin
edilməsi ilə bağlı əlavə tədbirlər haqqında” Sərəncamında, həmçinin müxtəlif tədbirlər zamanı əhalinin su ilə
təminolunmalarının yaxşılaşdırılması və bu yolda əmələ gələn problemlərin aradan qaldırılması ilə bağlı
möhtərəm Prezident tərəfindən lazımi tapşırıqlar verilsə də, hələ də Tovuz SSİ-nin əməkdaşları verilmiş
tapşırıqları qulaqardına vurmaqla məşğul olurlar. Buna misal olaraq Şahin Əsgərovun oktyabr ayının
əvvəlindən indiyə kimi suvarma suyuna həsrət qalması, məhz ölkə rəhbərinin verdiyi tapşırıqların əleyhinə
getmək olduğunu sübuta yetirir. Sözsüz ki, belə bir yanaşmanın kökündə xəyanət amili əsas rol oynayır ki, bu da
son anda sadə sakinlərin dövlət qurumlarına olan inamının heçə enməsinə öz təsirini göstərir. O halda sual oluna
bilər ki, hal-hazırda Tovuz SSİ-nə rəhbərlik edən və əksər vaxtlarda iş başında tapılmayan Nəsrəddin Aslanov,
görəsən belə bir idarəçiliyi ilə hara gedir? Axı, bu şəxsin etibar etdiyi vəzifə sahibləri suvarma suyu ilə rayon
ərazisində “bazar açırlar”, imkansız şəxsləri olmazın məşəqqətlərə düçar edirlər? Deməli, imkansız şəraitdə
yaşayan yerli sakinlərin belə məşəqqətlərdən xilas olmaları üçün, rəhbərlik Nəsrəddin Aslanova “dur”
deməlidir ki, haqq-ədalət bərpa olunsun. Yoxsa, ...

Qarşı tərəfin mövqeyini işıqlandlrmağa hazırıq!
Nyus.Az

Laçının işğaldan azad edilməsindən 2 il ötür.

Azərbaycan Ordusu tərəfindən Ermənistanın 2020-ci il sentyabrın 27-də təcavüzünə qarşı başlanan əks-hücum əməliyyatı 2020-ci il noyabrın 9-da böyük Zəfərlə başa çatıb.

Noyabrın 8-də Şuşanın işğaldan azad edilməsi ilə müharibədə məğlub olduğunu qəbul edən Ermənistan məcburiyyət qarşısında qalaraq kapitulyasiya aktına imza atıb.

Noyabrın 10-da Azərbaycan Prezidenti İlham Əliyev, Rusiya Prezidenti Vladimir Putin və Ermənistanın Baş naziri Nikol Paşinyan arasında Bəyanat imzalanıb.

Sənədin 2-ci bəndinə əsasən, 20 noyabr 2020-ci il tarixinədək Ağdam rayonu, bəyanatın 6-cı bəndinə əsasən, 25 noyabr 2020-ci il tarixinədək Kəlbəcər rayonu, 1 dekabr 2020-ci il tarixinədək isə Laçın rayonu Azərbaycana qaytarılıb.

Beləliklə, Laçının 28 ilik işğalına 2020-ci il dekabrın 1-də son qoyulub.

Azərbaycan Ağdam, Kəlbəcər və Laçın rayonlarının işğaldan azad edilməsinə heç bir itki vermədən nail olub.

Lakin bəyanatın imzalandığı 10 noyabr 2020-ci ildən 1 dekabr 2020-ci ilə qədər - 20 gün müddətində ermənilər Laçın şəhərində və rayon ərazisində dağıntılar törədib, rayonu tərk edərkən binaları, evləri, tikililəri talan edib, yandırıb, ağacları qırıb, ekoloji terrora əl atıb.

Azərbaycan Prezidenti İlham Əliyev 1 dekabr 2020-ci ildə televiziya ilə müraciətində Laçın rayonunun işğaldan azad edilməsi münasibətilə Azərbaycan xalqını təbrik edib.

“Böyük sevinc hissi ilə bildirirəm ki, Laçın rayonu işğaldan azad olundu. Bütün Azərbaycan xalqını bu münasibətlə ürəkdən təbrik edirəm. Laçın rayonunun işğaldan azad olunması tarixi hadisədir. Özü də bir güllə atmadan biz Laçın rayonunu qaytardıq. Düşməni buna məcbur etdik. Döyüş meydanında əldə edilmiş parlaq qələbə bu gözəl nəticəyə gətirib çıxardı ki, üç rayonumuz – Ağdam, Kəlbəcər və Laçın bizə qaytarıldı. Biz bu rayonları bir güllə atmadan, bir şəhid vermədən qaytarmışıq”, - dövlət başçısı bəyan edib.

Laçın rayonunun işğaldan azad edilməsi şərəfinə Azərbaycan Respublikasında “Laçının azad olunmasına görə” medalı təsis olunub.
Prezident İlham Əliyevin Sərəncamı ilə Laçının işğaldan azad edilməsi uğrunda döyüş əməliyyatlarında iştirak edərək şəxsi igidlik və şücaət göstərmiş hərbi qulluqçular “Laçının azad olunmasına görə” medalı ilə təltif edilib.

Qeyd edək ki, 26 avqust 2022-ci il tarixində Laçın rayonunun Zabux və Sus kəndləri də nəzarətə götürülüb, Azərbaycan Ordusu Laçın şəhərinə yerləşib.

Xatırladaq ki, Laçın rayonu 1992-ci il mayın 18-də Ermənistan Silahlı Qüvvələri tərəfindən işğal edilmişdi. Ermənistan işğal müddətində Laçın şəhərini və rayonun yaşayış məntəqələrini talayıb, darmadağın edib, tarixi, mədəni, dini abidələr, qəbiristanlıqlar yer üzündən silinib.

Təəssüf edirik ki, Rusiya Federasiyasının sülhməramlı kontingenti müraciətlərimizə hələ də etinasız yanaşır.

Bu barədə Müdafiə Nazirliyi məlumat yayıb.

"Azərbaycan Respublikası ərazisindəki yaşayış məntəqələrimizin adlarının uydurma erməni toponimləri ilə qeyd olunması, o cümlədən "Dağlıq Qarabağ ərazisi" ifadəsinin işlənməsinin yolverilməz olduğunu bir daha xatırladırıq.

Yenə də Rusiya Federasiyasının sülhməramlı kontingentini rəsmi məlumatlarında qeyd etdiyimiz yanlış ifadələrdən istifadə etməməyə çağırırıq.

Bir daha israrla bildiririk ki, Rusiya Federasiyasının Müdafiə Nazirliyinin rəsmi internet səhifəsində dərc olunan Rusiya Federasiyasının sülhməramlı kontingentinin 30.11.2022-ci il tarixli rəsmi məlumatında "Dağlıq Qarabağ ərazisi" kimi qeyd olunan ərazi Qarabağ iqtisadi rayonudur, “Mardakert” və "Martuni" kimi adlandırılan Azərbaycan yaşayış məntəqələrinin rəsmi adları isə müvafiq olaraq AĞDƏRƏ və XOCAVƏNDDİR", - deyə məlumatda bildirilib.

Ey gidi dünya...

Yağışın-qarın altında döyüşüb, respublikanın düşmən tapdağında olan 20% torpağını düşməndən azad edib bayrağını sancan kim, kameralar qarşısında erməni bayrağını yumruqla cırıb, şou göstərən kim. Yəni cəfasını kimlər çəkdi, səfasını kimlər sürür...

Torpağı geri almaq üçün qanını tərinə qatıb döyüşən oğullara, o zamanlar övladını, kürəkənini gizlədən məmurların indi 2-3 sot haqqı olan pay torpağı verməyə əlləri gəlmir. Yaxud, ölkə başçısının bu barədəki xüsusi tapşırığına baxmayaraq, bir işlə təmin etməyə belə xəsislik edirlər.

44 günlük müharibənin fəsadları iki ildir nəinki bitmir, hələ hər gün daha da artır sanki.
Hər gün hər hansı sosial mediya, yaxud sosial şəbəkələrdə müharibə iştirakçıları ya torpaq problemindən, ya da işsizlikdən gileylənirlər.

Statistika işsizlik səviyyəsinin 5 %-ə qədər azaldığını deyir.
Bəs kimlərdir o, 95% çalışanlar?

Bütün bölgələrdən "DogruXeber.az"a, "Kanal14"ə, həmçinin digər müstəqil mediyalara işsizlikdən və rayon rəhbərliyindən narazı vətəndaşlar, Qarabağ veteranları və sair şəxslər olur. Lakin, elə vətəndaşların özlərinin verdikləri məlumatlarda aydın görünür ki, çalışan şəxslərin əksəriyyəti məmur qohumları, qalanları isə rüşvət vermək iqtidarında olan şəxslərdir.

Qazax rayon sakini Məzahir Əliyev "Kanal14"ün efirində yayımlanan "Kamalın zamanı" proqramı canlı yayımda rayonda işləmək üçün kimlərin qohumu olmağın "vacibliyini" vurğulayıb.

İşsizlik demişkən, 28.11.2022-ci il tarixində "Kamalın zamanı" proqramı ilə canlı bağlantı yaradan Daşkəsən rayon Əmirvar kənd sakini, eyni zamanda Vətən müharibəsi iştirakçısı, bir neçə medal sahibi Hüseynli Səyyab da işsizlikdən və bugünə qədər pay torpağı ala bilmədiyindən gileylənib və vurğulayıb ki, bunlara sahib olması üçün kənd İcra nümayəndəsi Rüfət Bədəlov ondan rüşvət tələb edir.

Ətraflı videoda:

Torpağı vətən edən oğulları vətəndən narazı salmaq üçün vəsifə səlahiyyətlərindən istifadə edən hər kəs bu vətənin, bu xalqın düşməni deyilmi sizcə ?!

Redaksiyamız hər kəsin söz haqqını tanıyır.

DogruXeber.az

Şahbuz rayonundakı kənd icra nümayəndələri taxıl əkməyə məcbur edilir.
Bu haqda "Gündəlik Naxçıvan"a rayonun bir qrup icra nümayəndəsi məlumat verib. Şikayətçilərin sözlərinə görə, onlara taxıl əkdirməkdə məqsəd, adlarına subsidiya yazıb, həmin pulu mənimsəməkdir. Onlar deyir ki, bu işə birbaşa rayon icra hakimiyyətinin başçısı Rafael Babayev və onun müavini Tural Məmmədov rəhbərlik edir.
Təhlükəsizliyinə görə adının çəkilməsini istəməyən, rayonun ucqar kəndlərindən birinin icra nümayəndəsi deyir ki, bu il onu 15 hektar taxıl əkməyə məcbur edirlər:
"Bu hər il təkrarlanır. 15 hektarı əkmək üçün 6 min manat pul lazımdı. 15 hektara 3 ton buğda səpməliyəm, 2400 manat şum pulu, 900 manat səpmək, 900 manat tapan pulu və.s. Bu pulu məcbur olub, kredit götürürük. Sulu yerləri özləri götürür, yarasız yerləri bizə verirlər ki, məcbur əkməlisən. Ötən il əkdiyimiz qurudu, bir kilo da məhsul götürə bilmədik. Hər il belə olur. Bizim adımıza subsidiya yazıb, mənimsəyirlər. Bunun üçün bizim adımıza kart açılıb, pulu ora vururlar. Biz o kartın üzünü belə görməmişik. Özləri alıb, yeyirlər. İcra başçısı deyir ki, mənlik deyil, Ali Məclisdən belə tapşırıq gəlib".
Digər şikayətçi deyir ki, ona bu ilə 20 hektar ərazini əkmək tapşırılıb:
"8-10 min pul lazımdır, bunu əkməyə. Sonda məhsul da yığa bilmirik. Çünki, əkməyə dağın başını, su olmayan yerləri verirlər. Həmin yerlər də kəndlilərin pay torpağıdır. Yarasız olduğundan, istifadə etmirlər. Mən də məcbur olub, kredit götürürəm. Bu il 8 min manat götürmüşəm. Hələ keçən ilki krediti verib, bitirməmişəm. Maaşımın yarıdan çoxunu kreditə ödəyirəm. Dolanışıq üçün pul qalmır. İşdən çıxmağa da qoymurlar. Polislə hədələyirlər".
Şahbuz Rayon İcra Hakimiyyətindən şikayətçilərin iddialarına cavab vermək istəmədilər.

"Gündəlik Naxçıvan"

Deputat Fəzail Ağamalının qızı Günay Ağamalıdan Bakının Nərimanov rayonu 16-cı polis bölməsinə şikayət olunub. Buna səbəb deputat qızının rəhbərlik etdiyi “Buta” uşaq bağçasında 4 yaşlı qızcığaz Firəngizin nəzarətsizlikdən yıxılaraq ayağının sınmasıdır. Uşağın anası Mehriban Fərruxlu bildirir ki, polisdə işin obyektiv araşdırılacağına ümid edir. Onun sözlərinə görə, bağça rəhbərliyi aylıq ödənişi geri qaytarıb: “Uşaq 18 noyabrdan getməyə başladı, ayın 23-də ayağı sındı. Bağçanın aylığı 225 manatdır, cəmi 1 saat artıq qalmışdı deyə 20 manatı da aldılar. Ancaq 83 manat gips, 24 manat rentgen üçün pul veriblər, bir də aylığı qaytarıblar. Ancaq uşağımın başına gələn araşdırılmalıdır. Bu necə uşaq bağçasıdır?”

Reportyor.info

Millət vəkili Ramil Həsənin biləyində daşıdığı cüt bilərzik diqqət çıkib.

DİA.AZ bildirir ki, 32gun.az-ın əldə etdiyi məlumata görə, deputatın bilərziyi məşhur Macarıstan markası olan "JOSH" brendinə məxsudur.

Həmin markanın qiyməti 6000 və 20000 manat arasında dəyişir.

Ramil Həsən biləyindəkilər isə "JOSH" KARKÖTŐ 24957" və "JOSH KARKÖTŐ 09285" modelləridir.

Deputatın biləyindəki aksesuarlrın birlikdə ümumi qiyməti 16 min manata yaxındır.

Naxçıvanın Culfa gömrüyünün “xan” rejimindən qalma kadrları yenə “köhnə hamam, köhnə tas” siyasətini davam etdirməyə çalışırlar. Onlar müxtəlif vasitələrlə Naxçıvanda aparılan islahatları sabotaj etmək istəyirlər.

Ovqat.com-a daxil olan şikayət məktubundan belə anlaşılır.

Məktubu qələmə alan Culfa gömrüyünün bir işçisidir.

Şikayətçi yazır:

“Məsələ bundan ibarətdir ki, yoxlamalar başlayandan təcili olaraq gömrüklərdə poçt filialları faliyyətə keçdi. Gömrüyə ödənən rüsumları poçta köçürdürlər. Son 10 gün içində poçt filiallaı risumları dollar və başqa valyutalarınan qəbul edirdilər.
Bu gündən isə Naxçıvanın Baş naziri Səbuhi Məmmədov Poçtun direktoru Saxavət müəllimə göstəriş verib ki qəbulu ancaq manatla edin, çünki poçtun qəbul etdiyi dollarları Kapital Banka köçürdürdülər, yəni Dövlətimiz qazanırdı. Gələn TIR sürücüləri olsun, xarici vətandaşlar olsun, hamısında Dollar yada Euro olur. Poçt isə xarici valyuta qəbul etmədiyi üçün vətandaşlar üz tututrlar Səbuhi müəllimin gömrüyün qarşısında gözləyən “qara kassa”ların üstünə onlardan manat alıb gəlib ödənişlərini edirlər. “Qara kassa”lar da dolların kursunu çox aşağıdan vurub soyğunçuluq edirlər, həm Səbuhi qazanır, həm də özləri.
Bir sözlə, istər xarici sürücülər, istərsə də əcnəbi vətandaşlara həm maddi, həm də mənəvi əziyyət verirlər.
Yoxlamalardan əvvəl də Səbuhi müəllimin hər gömrükdə “qara kassa”ları vardı, onlar gömrüyün içində oturub dollar alırdılar. Sərhəd Qoşunlarını Bakıya birləşdirəndən sonra onlar həmin “qara kassa”ları içəri buraxmadılar. Səbuhi isə Saxavətin əliylə dollar biznesini əvvəlki kimi davam etdirməyin yolunu tapdı”.
Məktub müəllifi ilə əlaqə saxlayıb, irəli sürdüyü bəzi məqamlara aydınlıq gətirməyə çalışdıq. Həmsöhbətimizin bildirdiyinə görə, gömrük məntəqələrində yaradılan bürokratik əngəllərdən ən çox Türk sürücülər əziyyət çəkirlər. Onları elə gözümçıxdığa salırlar ki, adamlar Naxçıvana gəlməyə peşman olurlar.

Ovqat.com

Əhmədli qəsəbəsi, Aşıq Ələsgər küçəsi, ev 17 ünvanında yerləşən sakinlər "Hürriyyət"ə müraciət edərək, yaşadıqları binanı inşa edənlərdən və əsas mülkiyyətçilərdən şikayətçidirlər. Bu bina Bakıda ən böyük poliqrafiya və nəşriyyat olan "Şərq-Qərb" ASC-nin ərazisində inşa edilib.

Öncə adını çəkdiyimiz ASC-nin tarixi barədə araşdırma apardıq. “Şərq-Qərb” ASC 1986-cı ildə 4 nömrəli Bakı kitab mətbəəsi kimi fəaliyyətə başlayıb.

2001-ci ildə “Şərq-Qərb” özəlləşdirmə nəticəsində səhmdar cəmiyyətinə çevrilib. Əsas fəaliyyət növü nəşr və çap işləri olan “Şərq-Qərb” ASC-nin tərkibində Nəşriyyat Departamenti·və mətbəə fəaliyyət göstərir.

Lakin mətbəənin ərazisi və mətbəənin özü bir zamanlar Prezident Adminstrasiyasının rəhbəri işləmiş Ramiz Mehdiyev tərəfindən ələ keçirilib.

Sovetlər dönəmindən qalan bu əmlakın idarəedilməsi uzun illər PA-da humanitar şöbənin rəhbəri olmuş Fatma Abdullazadənin həyat yoldaşına həvalə edilib. Bundan sonra isə Ramiz Mehdiyevin həm pulsilən obyekti, həm də gəlir gətirən əsas qazanc yerlərindən birinə çevrilib.

"Hürriyyət"ə danışan Sahib Vəlizadə Zəngilan sakinidir. Aşıq Ələsgər küçəsi, 17 C ünvanında yerləşən binanın D blokunda birotaqlı mənzildə yaşayır.

Sahib Vəlizadə bildirir ki, binanın 2013-cü ildə inşa edilməsi üçün rəsmi icazə alınıb. İlkin olaraq Bakı Şəhər İcra Hakimiyyəti Şəhərsalma və Arxitektura İdarəsi ilə razılaşdırılıb. Bundan sonra inşa edilib. Lakin layihədə nəzərdə tutulan eskiz sərhədlər pozulub.

"Binanın ərazisi faktiki olaraq "Şərq-Qərb" mətbəəsinin ərazisində qalır. Yəni bina üçün nəzərdə tutulan istirahət-əyləncə yerləri olmalı idi. Lakin bina inşa edilən zaman layihə icra edilməyib. Bundan başqa, su anbarının yeri də layihə-eskizdə göstərildiyi kimi əks olunmayıb. Su anbarı tamam başqa səmtdə inşa edilib. Ona görə də binanın birinci mərtəbəsi və zirzəmisində su yığılır", - deyə həmsöhbətimiz bildirdi.

Sahib Vəlizadə qeyd edir ki, bu yaxınlarda bina sakinlərindən başqa-başqa adlar altında çıxarışlar (kupçalar) toplanıb. "Bundan sonra isə guya bina sakinlərinin adından bina Ədliyyə Nazirliyindən qeydiyyatdan keçirilərək, sakinlərin yaratdığı hüquqi şəxsin idarəedilməsinə verilib. Hansı ki, sakinlərin bundan xəbəri belə olmayıb", - deyə həmsöhbətim əlavə etdi.

Maraqlıdır ki, bina 2013-cü ildə ilkin olaraq layihələndirildikdən sonra məhz Ramiz Mehdiyevin PA-da rəhbər işlədiyi dönəmlərdə Fövqəladə Hallar Nazirliyi tərəfindən 2018-ci ildə istismara qəbul edilib. Bundan sonra da çıxarışlar verilməyə başlayıb. Nəticədə R.Mehdiyevin oğlu fövqəladı hallar nazirinin müavini general Teymur Mehdiyev tərəfindən istismara qəbul edilib. Yəni ata və oğlu sürətli şəkildə binanı inşa edib və dövlət reyestrinə qəbul etdirə biliblər. Hansı ki, 2018-ci ildən sonra artıq Ramiz Mehdiyevin "Şərq-qərb" mətbəəsi vasitəsilə pozuntulara yol verdiyi, AMEA prezidenti olduğu zamanlarda tender və 10 milyonlarla çap sifarişləri ilə bağlı artıq 2020-ci ildə yeyintilər aşkarlanmışdı. Məhz Hesablama Palatasının apardığı yoxlamalardan sonra bu faktlar ortaya çıxmışdı.

Bu faktları təsadüfən qeyd etmədik. R.Mehdiyevin qılıncının dalı da qabağı da kəsəndə qeyd edilən binanı necə istəyib elə də inşa etdirib və oğlunun vasitəsilə istismara qəbul etdirə bilib.

Apardığımız araşdırmalar zamanı məlum olub ki, Əhmədli qəsəbəsi Aşıq Ələsgər küçəsi, 17 ünvanında yerləşən nəşriyyatın ərazisində dördbloklu 16 mərtəbəli və 2 bloklu yaşayış binaları tikilib. Binaları “Şərq-Qərb Mülk” MMC inşa edib. Bu tikinti şirkəti yaxınlıqda daha bir 16 mərtəbəli yaşayış binası da tikib.

Nəzərə alsaq ki, ASC AMEA prezidentinin nəzarətindədir, o zaman bu məsələnin akademik üçün ciddi başağrısına çevriləcəyini söyləmək olar. Ramiz Mehdiyev 23 oktyabr 2019-cu il tarixdən AMEA-nın prezidenti seçilmişdi.

Binanın sakinlərin idarəsinə verilməsinə dair məlumatlarla bağlı sənədlərə diqqət edərkən məlum oldu ki, "Xəzər-35" MMC kimi yaradılan quruma Dina Bədəlova təyin edilib. Lakin Dina xanım "Hürriyyət"ə açıqlamasında deyib ki, onun baş verənlərdən xəbəri olmayıb.

“Xətai-35” mənzil mülkiyyətçilərinin müştərək cəmiyyətinin sədri Dina Bədəlova qızı “Hürriyyət”ə verdiyi müsahibəsində cəmiyyətin yaradılması ilə alaqədar sakinlərin kütləvi halda keçirilən iclasında iştirak etmədiyini bildirib.

Dina Bədəlova cəmiyyətin sədri vəzifəsinə necə gəlməsinə də aydınlıq gətirib: "İcraçı direktor Elxan İsmayılov dedi ki, bizim kommunal yığmağa ixtiyarımız yoxdur. Ona görə də cəmiyyət ayrılmalıdır. Bunun üçün də təhvil-təslim olmaq üçün 1 sakinin adına keçməli idi. Həmin sakinin də çıxarışı olmalıdır. Mənim çıxarış sənədim olduğuna görə, dedilər ki, sizin adınıza keçirib, təhvil-təslim edəcəyik, bütün problemləri həll edəndən sonra sizi sədr vəzifəsindən ayıracağıq. Razılaşıb, çıxarışımın kopyasını vedim və mənim kimi bəzi sakinlər də belə etdi. Bundan əlavə heç nə bilmirəm. 62 sakinlə birgə mən də çıxarış sənədimi vermişəm”.

“Cəmiyyətin yaradılması ilə bağlı xəbəri binanın komendantı Fuad Məmmədovdan almışam”

Dina Bədəlova cəmiyyətin yaradılması ilə əlaqədar sənədlərin yığılması prosesində iştirak etmədiyini bildirdi: “Sənədlərin toplanmasını, bizim komendantımız və ofisdə Fəridə xanım adında bir qadın var idi, onların yığdığını düşünürəm. Şəxsən mən mənzilin çıxarışını Fuad bəyə vermişəm. Mən nə sənəd aparmamışam, nə də heç kəsdən imza toplamamışam. Bütün binanın sakinləri necə, mən də elə.

Onu da nəzərinizə çatdırım ki, hardasa 3 ay kecdikdən sonra mənə ofisdən Rauf bəy zəng edib dedi ki, Ədliyyə Nazirliyinə gedin, orada sənəd var, onu götürmək lazımdır. Dedi ki, Nərmin Zamanova adlı xanıma yaxınlaşıb, sənədi götürün. Mən də tək getməmək üçün qonşumuz Sahib bəylə getdim. İlk dəfə idi ki, mən Ədliyyə Nazirliyinin Notariat xidmətinə gedirdim. Aşağıdan həmin xanıma xəbər etdilər və o, bir bəylə yanımıza gəldi və sənədi imzalamaq üçün mənə verdi. İmzalayıb sənədi götürəndən sonra orada mənə dedilər ki, artıq siz cəmiyyətdən ayrılmısız, artıq ayın 1-dən fəaliyyətdəsiz. Sual verdim ki, necə yəni, təhvil-təslim olmalı idi, binanın problemləri həll olunmalı idi? Dedilər xeyr, siz artıq ayın 1-dən fəaliyyətdəsiz. Mən heç yerə getmədim, “peçat” da almadım, fəaliyyətə də başlamadım. Çünki mən belə bir məsuliyyətin altına girə bilməzdim. Yəni razılaşmadım. İradımı bildirdikdə isə mənə dedilər ki, bundan sonra heç bir təhvil-təslim olmayacaq, binanın problemləri necə var yarımcıq qalacaq. Sonra nə vaxtsa düzələcəyini desələr də buna əməl etmədilər. Mən isə fikirləşirəm ki, imzaları toplayım və ləğv edim. Mən belə bir məsulliyyətin altına girə bilmərəm”.

Bütün bunlarla yanaşı, “Şərq-Qərb Mülk” MMC-nin icraçı direktoru Elxan İsmayılov “Hürriyyət”ə açıqlamasında bildirdi ki, bina 2013-cü ildə tikilməyə başlayıb, 2018-ci ildə texniki istismar rəyi alıb. "Bina hazır olmasa dövlət qurumları bu rəyi bizə verməzdilər. Belə çıxır ki, şikayət tək bizdən deyil, həmçinin dövlət qurumlarındandır. Bina hazır olmasa 5-6 qurumun imzası, möhürü olmazdı. Fövqəladə Hallar Nazirliyi, Bakı Şəhər İcra Hakimiyyəti və bir neçə qurumun təsdiqi ilə bina istismardan keçib.

O ki qaldı 1-ci mərtəbədə yerləşən obyektlərin satışına, obyektlərin satışı sakinləri narahat etməməlidir. Sahibkar həmin obyektlərin satışını, icarəsini özü bilər necə edəcək, hansı qərar verəcək. Kupçaların yığılıb sakinlərdən xəbərsiz “Xətai-35” mənzil mülkiyyətçilərin müştərək cəmiyyəti yaranması haqqında olan fikirləri tamamilə yanlışdır. Necə ola bilər ki, mülkiyyətçinin özü olmadan belə bir cəmiyyət yaradılsın?

O ki qaldı su çəninin yerinin dəyişməsinə, ilkin layihədə ola bilər ki, fərqli qeyd edilsin. Axı, mənzillərin tikilmə prosesi gedən zaman layihələr bir neçə dəfə dəyişdirilə bilər. Su çəninin yerini Fövqəladə Hallar Nazirliyinin Yanğından Mühafizə İdarəsi gəlib özü göstərir ki, burda tikilə bilər, ya yox. Yəni biz su çəninin yerini seçmirik. Bir daha nəzərinizə çatdırım ki, sizdəki ilkin layihədir. Mənzillərin tikilişi zamanı layihələr dəfələrlə dəyişdirilə bilər. Hətta imkan dairəsində mən sizdən xahiş edərdim ki, gəlib başqa sakinləri də dindirəsiz və elə bir nəticəyə gələsiniz. Bina tam hazır vəziyyətdə sakinlərə təqdim olunub. Onları nə qane etmir, onu bilmirəm. Orada hazır olmayan bir tək obyektlərdir", - deyə E.İsmayılov bildirdi.

“Hürriyyət”