Rusiya və onun satelliti Ermənistan arasında informasiya savaşı davam edir. Hələ ki “qərbçi” baş nazir Nikol Paşinyanın Qərblə oyunu sonuncunun ümidlərini və gözləntisini doğrultmayıb, İrəvanın Rusiya orbitindən uzaqlaşması baş verməyib.

Bunu o vaxt söyləmək mümkün olacaq ki, Ermənistandan Rusiya hərbi kontingenti çıxarılacaq, onun xarici sərhədlərini ruslar yox, öz hərbçiləri qoruyacaq.

Moskva-İrəvan münasibətlərinin gələcəyindən danışan rusiyalı ekspert Aleksey Martınov hesab edir ki, Kreml hələlik heç bir kəskin addım atmayacaq. “Çünki Rusiya, ümumiyyətlə, emosional düşüncələrə meylli deyil, baxmayaraq ki, Paşinyanın yeni Qərb dostları tərəfindən fəal şəkildə təhrik olunur. Rusiyanın Cənubi Qafqazdakı hərbi mövcudluğuna gəlincə isə xatırlatmaq istərdim ki, Ermənistan ərazisində - Gümrüdə Rusiya hərbi bazası var və bu, təkcə Rusiyanın mövcudluğunu deyil, həm də bütün regionun təhlükəsizliyini təmin edir. Baxmayaraq ki, Ermənistan Azərbaycanla münaqişə vəziyyətindədir və hələ də sülh müqaviləsi imzalanmayıb, əminəm ki, Rusiya regionda öz hərbi mövcudluğunu qoruyacaq”.

Lakin onun sözlərinə görə, baza məsələsi yenidən gündəmə gəlsə, o zaman çox güman ki, Rusiya onu Qarabağ ərazisinə keçirəcək. “Rusiya istənilən digər münaqişədə olduğu kimi, bu münaqişədə də heç kimin tərəfini tutmur, lakin Kreml regionda olmasını tələb edən geostrateji maraqlarını müdafiə edir və bu, təmin olunacaq”, - rusiyalı ekspert özündənrazı şəkildə əlavə edib.

Rusiyanın Gümrüdəki hərbi bazası, sən demə, təkcə Rusiyanın mövcudluğunu deyil, həm də bütün regionun təhlükəsizliyini təmin edirmiş. Bəlkə əksinədir?

İkinci yandan, Azərbaycan Rusiyanın bir quberniyasıdırmı ki, Gümrüdəki bazasını götürüb Qarabağa köçürsün? Martınov Bakının buna razılıq verəcəyini haradan bilir? Azərbaycan öz ərazindən xarici hərbi qüvvələri tam çıxarmağa çalışdığı halda Qarabağda rus hərbi bazası necə yerləşə bilər? Üstəlik, Azərbaycanın Konstitusiyası, Hərbi Doktrinası da buna izn vermir. Ondansa Bakı elə qardaş Türkiyənin hərbi bazasına razılıq verər.

Bu nədir, bir rus ekspertinin sadəlövhlüyü, nəbz yoxlanışı, yoxsa Bakıya mesaj?

Hərbi ekspert, polkovnik Rövşən Məhərrəmov “Yeni Müsavat”a bildirdi ki, rusiyalı siyasi ekspert Aleksey Martınov 2020-ci ildə 44 günlük İkinci Qarabağ müharibəsi dövründə, müharibədən öncə və sonrakı zamanlarda Azərbaycan əleyhinə daim çıxışlar edib və ermənipərəst siyasi ekspert kimi tanınır: “Martınov hər zaman erməni ekspertlərlə bir sırada Azərbaycanın əleyhinə çıxışlar etməsi ilə seçilir. Rusiyadakı siyasi ekspertlərin əksəriyyəti Rusiya siyasi hakimiyyətinin nəzarəti altında olan insanlardır. Onlara hansı məsələ barədə və necə danışmaq barədə sifarişlər, təlimatlar verilir. Güman etmək olar ki, bu dəfə Azərbaycanın nəbzini yoxlamaq üçün Aleksey Martınovun dili ilə Gümrüdəki hərbi bazanın məsələsi o şəkildə ictimailəşdirilib. Güman ki, Martınov ona verilən göstərişə uyğun həmin fikirləri bildirib. Rusiyanın 102-ci hərbi bazası Ermənistandan çıxarılmasa belə, Moskvanın digər hərbi bazalarını Cənubi Qafqazın daha iki ölkəsi olan Azərbaycan və Gürcüstanda yerləşdirməsi arzusu və planı həmişə olub, bu gün də var. Qarabağdakı sülhməramlıların orada qalma müddətinin bitəcəyi tarix yaxınlaşdıqca, Rusiya bölgədə hərbi mövcudluğunu başqa ad altında qoruyub saxlamaq, başqa ad altında daha da genişləndirmək barədə düşünür. Martınova nəbz yoxlaması üçün verilən sifariş də bununla əlaqədardır. 102-ci hərbi baza Ermənistan ərazisini tərk etməyəcək. Çünki Rusiyanın belə bir planı yoxdur və Ermənistan dövlətinin də Rusiyanı buna məcbur etmək gücü, imkanı yoxdur. Ermənistanın Rusiya ilə imzaladığı razılaşmalardan biri də 102-ci hərbi bazanın Gümrüdə qalma müddətinin 2045-ci ilə qədər uzadılmasıdır. Bu reallıq ortada olmasına baxmayaraq, Aleksey Martınova məlum açıqlamanı vermək təlimatı verilibsə, bu bir daha təsdiqləyir ki, Rusiya nəbz yoxlaması edir. Çünki Rusiya siyasi və hərbi rəhbərliyi Qarabağda və ya Cənubi Qafqaz ölkələrinin başqa hər hansı ərazisində hərbi iştirakı başqa bazaları vasitəsilə gerçəkləşdirmək istəyir”.

Ekspert vurğuladı ki, Azərbaycanın belə bir plana razılıq verməsi isə mümkün deyil. Azərbaycanın Hərbi Doktrinası, Milli Təhlükəsizlik Konsepsiyası və Konstitusiyası da Rusiya hərbi bazasının Azərbaycan ərazisində yerləşdirilməsinə imkan vermir: “Azərbaycan gələn ilin noyabrında Rusiya sülhməramlı qüvvələrinin ərazimizi tərk etməsi üçün 6 ay öncədən rəsmi məsələ qaldırmalıdır. Verilmiş rəsmi açıqlamalardan belə nəticəyə gələ bilərik ki, Bakı bu məsələdə qəti mövqedədir.

Martınovun çıxışı Azərbaycana qarşı təxribatçı çıxışdır. Azərbaycanın öz siyasəti var və belə təxribatçı nəbz yoxlamaları heç nəyi dəyişən deyil. Cənab Prezidentimiz də çıxışlarında bir neçə dəfə bəyan edib ki, 10 noyabr üçtərəfli bəyanatında əksini tapan müddət başa çatanda sülhməramlı kontingent Azərbaycan ərazisindən çıxacaq. Prezident İlham Əliyev bunu hətta Xankəndi separatçılardan azad edilməmişdən öncəki dövrdə demişdi. Sülhməramlı qüvvələrə ötən ilin sentyabrından sonra ümumiyyətlə ehtiyac qalmayıb. Sadəcə olaraq, Azərbaycan öz imzasına hörmət edən ölkə olaraq davranır, üçtərəfli bəyanatdakı müddətin başa çatmasını gözləyir".

İmişli rayonu Qulubəyli bələdiyyəsinin sədri vəzifəsini icra edən Nağıyev Qalib tərəfindən ölkə rəhbərliyinə müraciət ünvanlanıb. Müraciəttdə deyilir:
"Şikayətim Ali Məhkəmənin Mülki kollegiyasının Hakimi Elşanə Vəliyeva barəsindədir.
Şirvan Apelyasiya Məhkəməsinin 29 noyabr 2023-cü il tarixli 2(106)-1813/2023 saylı qətnaməsindən sabiq Bələdiyyə sədri cavabdeh Mirvəli Tağıyev tərəfindən verilmiş kassasiya şikayəti 14 fevral 2024-cü il tarixdə Ali Məhkəmənin Mülki kollegiyasının Hakimi Elşanə Vəliyevanın icraatına daxil olmuşdur 23 fevral 2024-cü il tarixdə işə tərəflərin iştirakı olmadan yazılı icraat qaydasında baxılacağı barədə tərəflərə rəsmi bildiriş göndərilmişdir.Ancaq xeyli müddət keçməsinə baxmayaraq sözügedən 2(102)-1221/2024 saylı işə baxılmayaraq qanunla müəyyən olunmuş 3 ay müddətin tamam olmasına az qalmış baxılacağı təsəvvürü yaranmışdır.Bu fakt isə qarşı tərəfin sifarişi əsasında bu il keçiriləcək Bələdiyyə seçkilərinə qədər vaxtı süni surətdə uzatmaqdan ibarətdir.
25 aprel 2022-ci il tarixdə cavabdeh İmişli rayonu Qulubəyli Bələdiyyəsinin sədri vəzifəsindən azad edilmişdir.Ancaq cavabdeh qanunun tələblərinə əməl etməyərək Bələdiyyənin möhür-ştamp və maliyyə sənədlərini Bələdiyyəyə təhvil vermədiyinə görə 01 iyul 2022-ci il tarixdə İmişli rayon Məhkəməsinə iddia ərizəsi ilə müraciət etsəkdə Qulubəyli Bələdiyyəsinin iddia tələbi 09 fevral 2023-cü il tarixdə təmin olundu.Artıq 22 aydır ki, aidiyyəti üzrə işə baxan Məhkəmələr möhür-ştamp və maliyyə sənədlərini cavabdehdən alıb Qulubəyli Bələdiyyəsinə təhvil verilməsinə müxtəlif bəhanələr gətirərək qəsdən süründürməçilik edirlər.20 aydan sonra sözügedən iş baxılması üçün Ali məhkəmənin Mülki kollegiyasına daxil olsada Hakim Elşanə Vəliyeva işə baxmağa tələsmir.
Əslində cavabdeh tərəfindən verilmiş kassasiya şikayəti əsassız və qanunsuz olduğundan baxılmadan geri qaytarılmalıydi.Belə ki, cavabdehin verdiyi kassasıya şikayətinin əsasını Qulubəyli Bələdiyyəsinin 25 aprel 2022-ci il tarixli iclas protokolunun saxta olduğu iddiası təşkil edir.Cavabdeh Mirvəli Tağıyevi Bələdiyyə sədri vəzifəsindən azad edib, möhür-ştamp və maliyyə sənədlərinin ondan alınıb Qulubəyli Bələdiyyəsinə təhvil verilməsinə əsas olan Bələdiyyənin sözügedən iclas protokolunu qərarını,əgər cavabdeh qanunsuz hesab edirsə belə olan təqdirdə niyə bu günə qədər Qərarın ləğv edilməsi barədə iddia ərizəsi ilə Məhkəməyə müraciət etməmişdir? Ona görə ki, həmin qərarın ləğv olunması üçün cavabdehin əsaslanacağı təkzibedilməz və mötəbər sübutlar yoxudr.
Məlumat üçün bildirirəm ki,cavabdeh Mirvəli Tağıyev Qulubəyli Bələdiyyəsində və digər yerdə törətdiyi cinayət əməllərinə görə 230440055 nömrəli cinayət işi üzrə cinayət məcəlləsinin çoxsaylı maddələri ilə ona ittiham verilərək təqsirləndirilən şəxs qismində cinayət məsuliyyətinə cəlb olunmuşdur. Hazırda Lənkəran Ağır Cinayətlər Məhkəməsində onun barəsində geniş Məhkəmə istintaqı aparılır.Ancaq təqsirləndirilən şəxs M.Tağıyev bu gündə Qulubəyli Bələdiyyəsinin möhür və sənədlərindən qanunsuz istifadə etməkdə davam edir.
Bir müddət əvvəl cavabdeh 77 yaşlı qoca Mirvəli Tağıyevlə sözügedən Qulubəyli Bələdiyyəsinin möhürü ilə əlaqədar onunla mübahisə əsnasında mənə bildirdi ki, Şirvan Apelyasiya Məhkəməsinin Qətnaməsini ləğv etdirmək üçün Ali Məhkəmədə işə baxacaq hakimə lazimi qədər rüşvət verəcəyini,ancaq möhürü mənə heç bir vaxt verməyəcəyini bildirdi.
Xahiş edirəm müraciətim barəsində qanuni tədbir görülsün".

azerbaycanrealligi.com

Daşkəsən rayonu, Məmməd Əsədov küçəsi, ev 5-də yaşayan Məmmədova Zenfira Fəxrəddin qızı və Məmmədova Vüsalə Qabil qızı tərəfindən “Hürriyyət” qəzetinin redaksiyasına şikayət məktubu daxil olub. Şikayətçilər iddia edirlər ki, İcra Hakimiyyəti tərəfindən onlara qarşı haqsızlıq edilir:

“Biz, Məmmədova Zenfira Fəxrəddin qızı və Məmmədova Vüsalə Qabil qızı, yazaraq sizdən xahiş edirik ki, problemimizi işıqlandırasınız.

Kasıb ailəyik, 10 aydır evimiz təbii fəlakət nəticəsində uçaraq, yarasız hala düşmüşdür. Fövqəladə Hallar Nazirliyi bizi çadıra çıxardı. 4 ay çox əziyyətli günlər keçirdik.

Müraciətlərimizdən sonra İcra Hakimiyyətindən bizim kirayə pulları ödənildi və kirayə evə çıxdıq. Evimizə Gəncə şəhərindən icra nümayəndələri gəlib baxış keçirdilər. Onlar saxta sənədləri qüvvəyə mindirib, evin köhnəldiyini, istismar vaxtının keçdiyini yazıblar. Gedib bu quruma müraciət edirik, deyirlər ki, bizlik deyil, İcra Hakimiyyətindən necə tapşırıblar, elə də yazmışıq.

Bir neçə ailə olaraq, evsiz qalmışıq. Kirayə pulunu da bu aydan dayandırıblar. Bizə deyirlər ki, gedin çadırda qalın.

Bu qədər haqsızlıq olar? Dərdimizi deməyə yer yoxdur. İcra Hakimiyyətindən bizə deyirlər ki, hara şikayət etsəniz də, xeyri yoxdur. Həqiqətən də üz tutduğumuz saytlardan şikayətlərimiz silinir. Bu qədər başımıza oyun açırlar. Səlahiyyətli qurumlardan xahiş edirik ki, bizə kömək edin”.

Məsələ ilə bağlı Daşkəsən Rayon İcra Hakimiyyəti ilə əlaqə saxlamağa çalışsaq da, zənglərimiz cavabsız qaldı.

Redaksiyadan: Yazıda adları qeyd olunan qurumların mövqeyini dərc etməyə hazırıq.

"Sabirabad rayonunun Ulacalı və Qruzma kəndlərini birləşdirən çox təhlükəli bir körpü var. İşimlə əlaqədar ayda bir neçə dəfə həmin körpüdən istifadə etməli oluram. Həmin körpüdən istifadə edən sakinlər hər dəfə ödəniş edirlər, minik maşınları 50 qəpik, böyük maşınlar isə 1 manat. Hər dəfə həmin körpüdən keçərkən həyəcan keçirir, bir gün Kür çayında batacağımı düşünürdüm, belə bir körpünün varlığına hansı qurumun icazə verdiyini özümə sual edirdim". Dia-az.info bildirir ki, bunu öz etirazında tanınmış jurnalist, criminal.az saytının baş redaktoru Anar Məmmədov qeyd edib.

Jurnalist daha sonra bildirir: "Bu gün ağlıma gələn başıma gəldi, həmin körpüdən keçərkən maşının qabaq təkərləri qum doldurulmuş kisədən sürüşərək çaya düşdü. Kənd sakinlərinin köməyi ilə əraziyə çağırdığım başqa avtomobilə qoşqu edərək düşdüyüm yerdən çıxarıldım.
Əraziyə toplaşan kənd sakinlərindən öyrəndim ki, həmin körpü Anar adlı şəxsin nəzarətindədir. O, şəxsi maraqlarına görə dövlət qurumları ilə anlaşaraq həmin körpünü qəzalı və insan həyatı üçün təhlükəli olmasıba baxmayaraq, pul yığmaqda davam edir.
Məni az qala çay apara, körpünün pul yığanı üstümə düşüb ki, maşınların gəlhagəl vaxtı işimi "sorvat" etdin…
Həmin Anarla əlaqə saxladım, bildirdi ki, körpüdən yığdığı pulla dövlətə vergi ödəyir, şəhid və qazi ailələri saxlayır və s. Utanmadan deyir ki, hadisə hər yerdə olur, göydə təyyarə, yerdə avtomobil də qəzaya uğrayır.
Aidiyyatı dövlət qurumlarına, şəxsən fövqəladə hallar naziri Kəmaləddin Heydərova müraciət edirəm, qısa zamanda həmin əraziyə yoxlama göndərsin və gələcək facilərin qarşısını alsın. Sonra gec olacaq…"

Bu gün ölkənin bir sıra məkanlarında yanacaqdoldurma məntəqələri fəaliyyət göstərir. Düzdür, bu cür obyektlərin sayının çox olması sürücülər üçün əlverişlidir. Lakin bununla bərabər tez-tez qalmaqallı mövzular da ortaya çıxır.

Bir neçə gün əvvəl “SOCAR Petroleum” QSC və “İST Petrol” yanacaqdoldurma məntəqələrində sürücülərə su ilə qarışdırılmış yanacağın satılması sosial şəbəkələrdə geniş müzakirəyə səbəb olub. Məlumata görə, “İST PETROL” yanacaqdoldurma məntəqəsində satılan avtomobil yanacağının keyfiyyəti aşağıdır. İddia olunub ki, yanacağa benzinlə birlikdə su qatılır.

Məsələ ilə bağlı “SOCAR PETROLEUM” QSC-nin mətbuat xidməti bildirib ki, “SOCAR PETROLEUM” QSC 11.04.2024-cü il tarixində “İST Petrol” MMC rəhbərliyi tərəfindən qəbul edilən yanacağın keyfiyyəti ilə bağlı narahatedici məlumat alan kimi məsələni nəzarətə götürmüşdür.

“SOCAR Petroleum” QSC sözügedən texniki problemin yanacaq çəninə su sızması nəticəsində baş verdiyini bildirərək, sürücülərə dəymiş bütün maddi məsuliyyəti öz üzərinə götürüb ödəsə də, insanlar bundan sonra da keyfiyyətsiz məhsulun satışından narahatdırlar. Bundan başqa, paytaxt sakinləri xüsusən “İST Petrol”un “Əhmədli” filialında müxtəlif problemlərin olduğunu bildirirlər.

Bəs, görəsən, bu təsadüfdür yoxsa reallıq?

Belə ki, adı zaman-zaman müxtəlif ittihamlarda və qalmaqallı vətəndaş şikayətlərində hallanan “İST Petrol” MMC-nin adı son zamanlar yenidən gündəm olub. “İST Petrol”la bağlı şikayətlər sadəcə bununla bitmir. Yaxın keçmişə nəzər saldığımız zaman sözügedən yanacaqdoldurma məntəqəsi ilə bağlı zaman-zaman şikayətlərin sosial şəbəkələrdə və KİV-də yayıldığının şahidi oluruq.

Məsələ ilə bağlı danışan nəqliyyat məsələləri üzrə ekspert Elməddin Muradlı redaksiyamıza bildirdi ki, Azərbaycanda bir çox yanacaqdoldurma məntəqələrində satılan benzinin keyfiyyəti heç də ürəkaçan deyil:

"Minlərlə sürücü bu kimi problemlərin fəsadını yaşayır, təəssüflər olsun ki, bu cibəgirmələr aidiyyatı qurumların gözü qarşısında baş verir və bununla bağlı tədbirlər də görülmür. Yanacaqdoldurma məntəqələrinin təhlükəsizlik qaydaları ilə bağlı bəzi təlimatlar var. O təlimatlardan da biri yanacaq çənlərinin vaxtında təmizlənməsi məsələsidir. Bu təmizləmə olduqca ağır bir prosesdir, bu zaman bütün iş dayanır və çən tam boşalır. Bu təxminən ayda bir, ya da 3 ayda bir dəfə baş verən bir prosesdir".

Ekspert qeyd edib ki, bu gün istər bəzi yanacaqdoldurma məntəqələrində, istərsə də onlara nəzarət edən qurumlarda özbaşınalıq baş verir. Onun sözlərinə görə, illərdir bu kimi problemlər var, lakin heç bir tədbir görülmür.

Şikayətlərə məsuliyyətsiz yanaşılır

Araşdırma apardığımız zaman məlum olur ki, Bakıda sürücülərin ən çox şikayətləndiyi və narazı qaldığı yanacaqdoldurma məntəqələrindən biri elə məhz "İST Petrol" MMC-dir. Vətəndaşları narazı salan əsas faktorlar isə “İST Petrol” MMC-nin qanunsuz və yarıtmaz fəaliyyəti ilə bağlıdır.

Məlumata görə, bir müddət əvvəl Bakıda sürücü "İST Petrol"un yanacağının keyfiyyətindən narazı qalıb. O, yanacağın içərisindən torpaq çıxdığını bildirib. Sürücünün sözlərinə görə, yanacağın içərisindəki torpaq avtomobilin filterini yararsız hala salıb.

Məlumat üçün qeyd edək ki, avtomobillərin mühərrikinin sıradan çıxmasına səbəb olan 5 əsas problemdən biri benzinə su, qum və ya digər qatqı maddələrinin qatılmasıdır. Benzinin tərkibinə qarışan su qısa zaman ərzində avtomobilin yanacaq sisteminə, nasosa, eləcə də slindirlərə ciddi zərər vurur.

“İST Petrol” MMC sözügedən texniki problemin yanacaq çəninə su sızması nəticəsində baş verdiyini bildirərək, sürücülərə dəymiş bütün maddi məsuliyyəti öz üzərinə götürsə də, bundan sonra itirilmiş keyfiyyətini, sürüclərin və vətəndaşların güvənini yenidən qazana biləcəkmi? Təəssüflər olsun ki, xeyr.

Məlumat üçün qeyd edək ki, bu xəbəri dərc etməklə müəssisənin işgüzar nüfuzunu zədələmək niyyətimizin olmadığını bir daha bəyan edir, “İST Petrol” MMC-yə qarşı hər hansı qərəzli mövqeyimizin olmadığını vurğulayırıq.

“Hürriyyət”

Bu gün "Azpulmat" tətbiqindən bir çox şəxs istifadə edir. Bu tətbiq banklar kimi müvafiq təkliflər ilə vətəndaşlara kredit verir. Lakin bir məsələ var. Bu tətbiq vətəndaşların şəxsi məlumatlarını ələ keçirir və telefonda kontakt sayında nə qədər insan varsa onlara mesajlar göndərməyə başlayır. Bir sıra ekspertlər bu tətbiqin qanun pozuntusuna yol verdiyini, fırıldaqçılıq və şəxsi məlumatların oğurlanması kimi qiymətləndirir. Bu baxımdan sözügedən bu tətbiqdə fəaliyyət göstərən şəxslərə qanunvericilik ilə hansı cəza verilməlidir?

Mövzu ilə bağlı hüquqşünas Şamil Paşayev Sonxeber.az-a açıqlama verib:

"Nəzərə almaq lazımdır ki, şəxslər tətbiqlərlə iş görən zaman diqqətli olmalıdır. Vətəndaşlar tətbiqlərə qoşularkən şərtləri diqqətlə oxumalıdır. Bu kimi tətbiqlərdə kontaktlara giriş icazəsi ilə bağlı telefonlara bildiriş gəlir. Belə olanda əgər vətəndaş buna icazə verirsə, günahkar tətbiq yox elə zərərçəkənin özüdür. Bu kimi tətbiqlər şəxsin məlumatlarına, fərdi informasiyalarına icazəsiz yaxud tam məlumatlandırmadan bu informasiyalara daxil olması cinayət məsuliyyəti yarada bilər. Eyni zamanda kompüterdə informasiya, texnologiyalarına qanunsuz daxil olma və şəxsi toxunulmazlıq hüququnun pozulması kimi məsuliyyətə səbəb ola bilir. Vətəndaşlar bununla bağlı cinayət məsuliyyətinə cəlb edilməsi üçün həmin hüquqi və fiziki şəxslər ilə bağlı prokurorluğa və hüquq mühafizə orqanlarına müraciət edə bilər. Eyni zamanda aidiyyəti qurumlara vurula zərərə görə təzminat almaq üçün mülki məhkəməyə müraciət etmək hüquqları vardır".

Hidrogen enerjisi texnologiyalarının inkişafı üzrə təşəbbüslər genişlənəcək.

Bunu "Report"a açıqlamasında Beynəlxalq Hidrogen Enerjisi Assosiasiyasının ekoloji cəhətdən təmiz hidrogen üzrə mütəxəssislər qrupunun rəhbəri Məhəmməd Əbu Laban deyib.

Ekspert hesab edir ki, bu cür enerjidən istifadə etmək üçün infrastrukturun yaradılmasının ilkin xərcləri yüksək olsa da, uzunmüddətli iqtisadi səmərə belə keçidi cəlbedici edir: “Hökumətlər və enerji şirkətləri hidrogendən istifadə edərək enerji saxlama ilə bağlı həll yolları tapmaqda daha çox maraqlanırlar”.

Onun sözlərinə görə, bu cür tədqiqatlara siyasi dəstək irəliləyişi sürətləndirə və hidrogen anbarını real layihəyə çevirə bilər.

Siyasi liderlər, ekspertin fikrincə, hidrogen keçidinin inkişafını təşviq edərkən sosial bərabərlik və ədalət məsələlərini də nəzərdən keçirməli olacaqlar, çünki bu, texniki və iqtisadi çətinlikləri olan “mürəkkəb konsepsiya”dır.

O qeyd edib ki, infrastrukturun təyinatının dəyişdirilməsi və mövcud qaz kəmərlərinin hidrogenin nəqli üçün uyğunlaşdırılması da texniki maneələrlə üzləşə bilər, ona görə də belə texnologiyaların inkişafı və tətbiqi qlobal səviyyədə beynəlxalq əməkdaşlıq və təşəbbüslər tələb edir: “Hidrogen keçidi ədalətli yanaşma tələb edir, çünki biz qalıq yanacaq sektorunda potensial iş itkilərini həll etməliyik və işçiləri hidrogen enerjisinə hazırlamaq üçün proqramlar hazırlamalıyıq”.

Bizim Telegram kanalımıza abunə olun

Məlum olduğu kimi bu ilin əvvəlində General-leytenant Ənvər Əfəndiyev müdafiə nazirinin müavini – Quru Qoşunlarının komandanı vəzifəsindən azad olundu və həmin vəzifəyə Xüsusi Təyinatlı Qüvvələrin komandanı, general-leytenant Hikmət Mirzəyevin gətirildi. Ənvər Əfəndiyevin Quru Qoşunları Komandanı olduğu müddətdə bir sıra qanunsuzluqlara yol verdiyi haqda mediada iddialar səslənir.

Məsələ ilə bağlı cumhuriyyet.az olaraq bildirək ki, general vəzifədən azad olunduqdan bir müddət sonra Müdafiə Nazirliyinin N saylı hərbi hissəsinin mühasibi vəzifəsində qulluq keçmiş Əliyev Alı İsrayıl oğlu barəsində həbs qətimkan tədbiri seçilib. Hərbi Prokurorluğun yaydığı məlumata görə, Əliyev Alı İsrayıl oğlu haqqında vəzifəli şəxs kimi təkrarən qabaqcadan əlbir olan bir qrup şəxs halında xidməti vəzifələrin icrası ilə əlaqədar hər hansı hərəkətə (hərəkətsizliyə) görə özü və üçüncü şəxslər üçün birbaşa və şəxsən külli miqdarda maddi neməti rüşvət istəməsinə və almasına əsaslı şübhələr yaranıb. Onun barəsində Azərbaycan Respublikası Cinayət Məcəlləsinin 311.3.1, 311.3.2 və 311.3.3-cü maddələri ilə ittiham elan olunub.

Məsələ ilə bağlı cumhuriyyet.az ölkə mediasında yer alan xəbərlərə əsasən bildirir ki, saxlanılan Əliyev Alı İsrayıl oğlu bir müddət öncə Quru Qoşunlar Komandanı vəzifəsindən azad edilən general-leytenant Ənvər Əfəndiyevin “sağ əli” olub. Amma şəbəkə bununla da bitmir. Etibarlı mənbənin cumhuriyyet.az-a bildirdiyinə görə, Quru Qoşunların keçmiş komandanı general- leytenant Ənvər Əfəndiyevin sağ əli Firuz İsmayılov ətrafında baş verən xoşagəlməz olaylar var. Belə ki, F. İsmayılovun korrupsiya əməlləri və həbsxana həyatında keçirtdiyi qalma-qallı günləri olduqca şok doğuracaq. Dəhşətlisi isə odur ki, belə bir şəxsin hansı haqla general- leytenant Ənvər Əfəndiyevin sağ əli kimi hərbi hissədə söz sahibi olub. 2024-cü il yanvarın 11-də Azərbaycan Respublikası müdafiə nazirinin müavini — Quru Qoşunlarının komandanı təyin edilən general-leytenant Hikmət Mirzəyev yuxarıda qeyd edilən məsələni şəxsi nəzarətinə götürəcək. Apardığımız araşdırmalar tam yekunlaşmadığından məsələnin bəzi detallarını ictimayətə açıqlamırıq.(Cumhuriyyet)

Bakı Avrasiya Universitetinin prorektoru Gürkan Hüseynovun Gürcüstanda kazinoda külli miqdarda pul uduzduğu haqda xəbərlər yayılıb.

Tribunainfo.az məlumat verir ki, yayılan xəbərlərə əsasən, BAU-nun prorektoru dostları ilə birlikdə Gürcüstanın paytaxtı Tiflisə istirahətə yollanıb və aprelin 11-də əyləncə məqsədi ilə Tiflisdəki məşhur “Ambasodor” kazinosuna gedib. Amma onun əyləncəsi necə deyərlər, “burnundan gəlib”. Belə ki, prorektor kazinoda yüksək məbləğdə pul uduzub. Ümumiyyətlə, onun azart həvəskarı olduğu haqda iddialar var.

Nazim Hüseynov

Qeyd edək ki, Gürkan Hüseynov həm də Bakı Avrasiya Universitetinin rektoru Nazim Hüseynovun oğludur. Əslən Gədəbəydən olan rektor öz oğlunu ali məktəbin prorektoru təyin edib. Lakin göründüyü kimi, prorektor elm və tədrisi deyil, bayram günlərində qumarı üstün tutub. Bildirilir ki, bu hadisə rektor atasını möhkəm qəzəbləndirib və Nazim Hüseynov prorektor oğlunun kazinoda yüksək məbləğdə pul uduzmasına görə bərk dilxor olub. Yayılan məlumatlarda o da deyilir ki, sözügedən kazinoya yalnız pasportla və video qeydiyyatla daxil olmaq mümkündür.

Yəni müştərinin şəxsiyyətinin kimliyi qeydə alınır, eləcə də video görüntü götürməklə üzü skayner edilir. Ona görə də kazinodakıların kimliyi haqda obyektin administrasiyasında səhih məlumatlar olur. Bu səbəbdən yayılan informasiya ilə bağlı “Ambasodor” kazinosu ilə əlaqə saxlayaraq dəqiqləşdirmə aparmağa çalışdıq. Lakin oradan saytımıza deyildi ki, onlar müştəriləri barədə məlumatları məxfi saxlayırlar və yalnız rəsmi sorğu əsasında cavab verilə bilər. Onu da deyək ki, qeyri-iş günləri olduğu üçün xəbəri Hüseynovların özü və universitetlə aydınlaşdırmaq imkanımız olmadı. Bütün hallarda yayılan bu məlumatlarla bağlı qarşı mövqeyini işıqlandırmağa hazırıq.

Duzdağ Fizioterapiya Mərkəzinin işçiləri əməkhaqqı ala bilmədiklərinə görə, etiraz edirlər.

TNS xəbər verir ki, bu gün mərkəzin 40-dan çox əməkdaşı Naxçıvan Ali Məclisi binasının önünə toplaşıb.

Onlar bildirib ki, sonuncu dəfə dekabrın 15-də əməkhaqqı alıblar.

İşçilərin dediyinə görə, onları Naxçıvan şəhərindən Duzdağa aparan servis avtomobili ödənişlidir. Bu gün pul tapa bilməyiblər, ona görə də heç kim işə çıxmayıb.

İşçilər indiyədək dəfələrlə Naxçıvan Muxtar Respublikasının Səhiyyə Nazirliyinə, digər aidiyyəti dövlət orqanlarına müraciət etsələr də, heç bir nəticəsi olmayıb.

Mərkəzin əməkdaşları Yeni ili, Novruz və Ramazan bayramlarını pulsuz keçirdiklərini deyiblər: “Belə vicdansızlıq olar? Biz 3 bayramı pulsuz keçirmişik. Nə dərdimizi dinləyən var, nə də şikayətimizə baxan. 4 aydır, əməkhaqqı ala bilmirik”.

Məlumata görə, Naxçıvan Ali Məclisinin yüksək vəzifəli şəxsi şikayətçiləri qəbul edib. Onlara problemin tezliklə həll olunacağı bildirilib.

Qeyd edək ki, son vaxtlar Naxçıvanda belə hadisələr tez-tez baş verir. Bir müddət əvvəl Naxçıvan Şəhər Sanitar-Təmizlik İdarəsinin bir qrup əməkdaşı iş şəraitinə etiraz olaraq işə çıxmaqdan imtina etmişdi. Onlar Naxçıvan Muxtar Respublikası Ali Məclisinin qarşısına gələrək çalışdıqları yerdə təhqir olunduqlarını, işləmək üçün heç bir şəraitin yaradılmadığını, əməkhaqlarının azaldıldığını bildirmişdi.