Bu gün "Azpulmat" tətbiqindən bir çox şəxs istifadə edir. Bu tətbiq banklar kimi müvafiq təkliflər ilə vətəndaşlara kredit verir. Lakin bir məsələ var. Bu tətbiq vətəndaşların şəxsi məlumatlarını ələ keçirir və telefonda kontakt sayında nə qədər insan varsa onlara mesajlar göndərməyə başlayır. Bir sıra ekspertlər bu tətbiqin qanun pozuntusuna yol verdiyini, fırıldaqçılıq və şəxsi məlumatların oğurlanması kimi qiymətləndirir. Bu baxımdan sözügedən bu tətbiqdə fəaliyyət göstərən şəxslərə qanunvericilik ilə hansı cəza verilməlidir?

Mövzu ilə bağlı hüquqşünas Şamil Paşayev Sonxeber.az-a açıqlama verib:

"Nəzərə almaq lazımdır ki, şəxslər tətbiqlərlə iş görən zaman diqqətli olmalıdır. Vətəndaşlar tətbiqlərə qoşularkən şərtləri diqqətlə oxumalıdır. Bu kimi tətbiqlərdə kontaktlara giriş icazəsi ilə bağlı telefonlara bildiriş gəlir. Belə olanda əgər vətəndaş buna icazə verirsə, günahkar tətbiq yox elə zərərçəkənin özüdür. Bu kimi tətbiqlər şəxsin məlumatlarına, fərdi informasiyalarına icazəsiz yaxud tam məlumatlandırmadan bu informasiyalara daxil olması cinayət məsuliyyəti yarada bilər. Eyni zamanda kompüterdə informasiya, texnologiyalarına qanunsuz daxil olma və şəxsi toxunulmazlıq hüququnun pozulması kimi məsuliyyətə səbəb ola bilir. Vətəndaşlar bununla bağlı cinayət məsuliyyətinə cəlb edilməsi üçün həmin hüquqi və fiziki şəxslər ilə bağlı prokurorluğa və hüquq mühafizə orqanlarına müraciət edə bilər. Eyni zamanda aidiyyəti qurumlara vurula zərərə görə təzminat almaq üçün mülki məhkəməyə müraciət etmək hüquqları vardır".

Hidrogen enerjisi texnologiyalarının inkişafı üzrə təşəbbüslər genişlənəcək.

Bunu "Report"a açıqlamasında Beynəlxalq Hidrogen Enerjisi Assosiasiyasının ekoloji cəhətdən təmiz hidrogen üzrə mütəxəssislər qrupunun rəhbəri Məhəmməd Əbu Laban deyib.

Ekspert hesab edir ki, bu cür enerjidən istifadə etmək üçün infrastrukturun yaradılmasının ilkin xərcləri yüksək olsa da, uzunmüddətli iqtisadi səmərə belə keçidi cəlbedici edir: “Hökumətlər və enerji şirkətləri hidrogendən istifadə edərək enerji saxlama ilə bağlı həll yolları tapmaqda daha çox maraqlanırlar”.

Onun sözlərinə görə, bu cür tədqiqatlara siyasi dəstək irəliləyişi sürətləndirə və hidrogen anbarını real layihəyə çevirə bilər.

Siyasi liderlər, ekspertin fikrincə, hidrogen keçidinin inkişafını təşviq edərkən sosial bərabərlik və ədalət məsələlərini də nəzərdən keçirməli olacaqlar, çünki bu, texniki və iqtisadi çətinlikləri olan “mürəkkəb konsepsiya”dır.

O qeyd edib ki, infrastrukturun təyinatının dəyişdirilməsi və mövcud qaz kəmərlərinin hidrogenin nəqli üçün uyğunlaşdırılması da texniki maneələrlə üzləşə bilər, ona görə də belə texnologiyaların inkişafı və tətbiqi qlobal səviyyədə beynəlxalq əməkdaşlıq və təşəbbüslər tələb edir: “Hidrogen keçidi ədalətli yanaşma tələb edir, çünki biz qalıq yanacaq sektorunda potensial iş itkilərini həll etməliyik və işçiləri hidrogen enerjisinə hazırlamaq üçün proqramlar hazırlamalıyıq”.

Bizim Telegram kanalımıza abunə olun

Məlum olduğu kimi bu ilin əvvəlində General-leytenant Ənvər Əfəndiyev müdafiə nazirinin müavini – Quru Qoşunlarının komandanı vəzifəsindən azad olundu və həmin vəzifəyə Xüsusi Təyinatlı Qüvvələrin komandanı, general-leytenant Hikmət Mirzəyevin gətirildi. Ənvər Əfəndiyevin Quru Qoşunları Komandanı olduğu müddətdə bir sıra qanunsuzluqlara yol verdiyi haqda mediada iddialar səslənir.

Məsələ ilə bağlı cumhuriyyet.az olaraq bildirək ki, general vəzifədən azad olunduqdan bir müddət sonra Müdafiə Nazirliyinin N saylı hərbi hissəsinin mühasibi vəzifəsində qulluq keçmiş Əliyev Alı İsrayıl oğlu barəsində həbs qətimkan tədbiri seçilib. Hərbi Prokurorluğun yaydığı məlumata görə, Əliyev Alı İsrayıl oğlu haqqında vəzifəli şəxs kimi təkrarən qabaqcadan əlbir olan bir qrup şəxs halında xidməti vəzifələrin icrası ilə əlaqədar hər hansı hərəkətə (hərəkətsizliyə) görə özü və üçüncü şəxslər üçün birbaşa və şəxsən külli miqdarda maddi neməti rüşvət istəməsinə və almasına əsaslı şübhələr yaranıb. Onun barəsində Azərbaycan Respublikası Cinayət Məcəlləsinin 311.3.1, 311.3.2 və 311.3.3-cü maddələri ilə ittiham elan olunub.

Məsələ ilə bağlı cumhuriyyet.az ölkə mediasında yer alan xəbərlərə əsasən bildirir ki, saxlanılan Əliyev Alı İsrayıl oğlu bir müddət öncə Quru Qoşunlar Komandanı vəzifəsindən azad edilən general-leytenant Ənvər Əfəndiyevin “sağ əli” olub. Amma şəbəkə bununla da bitmir. Etibarlı mənbənin cumhuriyyet.az-a bildirdiyinə görə, Quru Qoşunların keçmiş komandanı general- leytenant Ənvər Əfəndiyevin sağ əli Firuz İsmayılov ətrafında baş verən xoşagəlməz olaylar var. Belə ki, F. İsmayılovun korrupsiya əməlləri və həbsxana həyatında keçirtdiyi qalma-qallı günləri olduqca şok doğuracaq. Dəhşətlisi isə odur ki, belə bir şəxsin hansı haqla general- leytenant Ənvər Əfəndiyevin sağ əli kimi hərbi hissədə söz sahibi olub. 2024-cü il yanvarın 11-də Azərbaycan Respublikası müdafiə nazirinin müavini — Quru Qoşunlarının komandanı təyin edilən general-leytenant Hikmət Mirzəyev yuxarıda qeyd edilən məsələni şəxsi nəzarətinə götürəcək. Apardığımız araşdırmalar tam yekunlaşmadığından məsələnin bəzi detallarını ictimayətə açıqlamırıq.(Cumhuriyyet)

Böyük Britaniya multikultural dövlətdir. Bunun səbəblərindən biri onun tarixi imperiya ərazisi olmasıdır. Ona görə də krallıqda çoxsaylı etnik qrupların nümayəndələrinin yaşaması, məskunlaşması və ora köç etməsinə də təbii yanaşılır.

Ancaq son zamanlar Böyük Britaniya hökuməti multikulturallıqdan əziyyət çəkdiklərini açıq şəkildə etiraf edir. Xüsusən krallıq ərazisində törədilən terror hadisələri rəsmi Londonun narahatlığının əbəs olmadığını təsdiqləyir.

Rusiyanın paytaxtı Moskvada “Crocus city hall”da törədilən terror hadisəsi mühacirət məsələsini beynəlxalq ictimaiyyətin yenidən gündəliyinə çıxmasına təkan verib.

Avropa ölkələri miqrant məsələsini terrorla daha çox əlaqələndirirlər.

Bu baxımdan onlar qanunsuz miqrantların öz ölkələrinə qaytarılmasını müzakirə edirlər.

“The Times” qəzetinin yaydığı məlumata görə, krallığın Xarici İşlər Nazirliyi qanunsuz miqrantların ölkədən çıxarılması məsələsinin dörd dövlət – Ermənistan, Botsvana, Kot d-İvuar və Kosta-Rika ilə müzakirəsini aparır. Rəsmi İrəvan krallıq ərazisindəki qanunsuz erməni köçkünlərindən imtina edib. Bu ölkənin Xarici İşlər Nazirliyi qanunsuz miqrantların Ermənistana göndərilməsi ilə bağlı xəbəri cavablandırıb. Qeyd olunub ki, Ermənistan və Böyük Britaniyanın geniş siyasi dialoq gündəliyi var, lakin konkret bir nəşrdə (“The Times”) qaldırılan məsələ ilə bağlı heç bir əsaslı və texniki danışıqlar aparılmayıb.

Qəzetin yazdığına görə, London məhz bu dörd ölkə ilə Böyük Britaniya və Ruanda arasında əvvəllər əldə edilmiş razılaşmanın analoqunu bağlamağı gözləyir. Braziliya, Kolumbiya, Paraqvay, Peru və Ekvadorla mümkün əməkdaşlıq məsələsi də qaldırılsa da, Krallığın Xarici İşlər Nazirliyi bu ölkələrin hakimiyyət orqanlarının bununla xüsusi maraqlanmayacaqlarını da istisna etmir. Britaniyanın dialoqa başlaya biləcəyi Anqola, Kabo-Verde, Tanzaniya, Toqo, Seneqal və Syerra-Leonenin daxil olduğu Afrika dövlətlərinin ehtiyat siyahısı da mövcuddur. Qambiya, Mərakeş, Namibiya və Tunis isə krallıqla məsələni müzakirə etməkdən imtina ediblər.

Qəzet xatırladıb ki, Böyük Britaniya artıq bir il yarımdır krallıqdan qovulmuş qeyri-qanuni mühacirləri qəbul etməyə hazır olacaq ölkələri axtarır. Baş nazir Rişi Sunak ötən ilin payızında müvafiq sazişlər bağlamağa ümid etsə də, Britaniya səlahiyyətliləri Ruandaya bir nəfər də olsun qanunsuz miqrant göndərə bilmədiyi üçün danışıqları dayandırıb.

Qəzetin vurğuladığı kimi, London İrəvanla texniki danışıqlara ötən ilin sentyabrında krallığın xarici işlər nazirinin müavini Leo Doçerti İrəvana səfər edərkən başlayıb. Ancaq Britaniya parlamenti yeni qanuna səs verdikdən sonra Ermənistan hakimiyyəti Ruanda ətrafında vəziyyətin inkişafını gözləyir.

Bu hadisə Avropada erməni miqrantların gələcəyini gündəliyə çıxarır.

Qeyd edək ki, hazırda Böyük Britaniyada ermənilərin sayı 20 mindən çoxdur. Krallıqda bir neçə erməni təşkilatı var - Erməni Ümumi Xeyriyyə İttifaqı (AGBU), Erməni İcması və Kilsəsi Şurası, Erməni İnstitutu və başqaları. Bundan başqa Britaniyada birgünlük məktəblər, idman cəmiyyətləri və s. fəaliyyət göstərir. İngiltərədə erməni dilində 20 qəzet nəşr olunur. Erməni icması üzvlərinin çoxu Birinci Dünya müharibəsi illərində krallığa köç ediblər.

Sovet İttifaqı dağılandan sonra ermənilərin krallığa yeni miqrasiyası başlayıb. 2020-ci ildən sonra onlar Fransaya, oradan isə La-Manş boğazından keçməklə qanunsuz olaraq Böyük Britaniyaya keçiblər.

Ehtimal etmək olar ki, rəsmi Paris ermənilər də daxil olmaqla Böyük Britaniyaya qanunsuz miqrantlarla bağlı təzyiq göstərir. Qeyd edək ki, 2021-ci ildə Rusiya Daxili İşlər Nazirliyi 61 qanunsuz erməni mühacirin ölkənin ərazisini tərk etməsini istəmişdi.

Ermənilər Böyük Britaniya ərazisindən niyə qovulur? Təbii ki istənilən dövlətin qapısı qanunsuz miqrasiyaya bağlıdır. Çünki onlar keçmək istədikləri ölkə üçün yalnız sosial problem yaratmır, həm də perspektivdə dövlətin təhlükəsizliyinin təhdid mənbəyi olurlar.

Bu baxımdan erməni icması da yerləşdiyi istənilən ölkədə terror quruluşlarına dəstək verə bilər. Düzdür, Avropa hazırda daha çox müsəlman ölkələrindən, Afrikadan köç axınının qarşısını almağa çalışır. İddiaya əsasən, qitənin bir sıra ölkələrində törədilən terror aktlarında onların adları hallanır.

Ermənilərin Avropada türklərə qarşı belə cinayətlər törətmələrinin “ənənəsi” mövcuddur. ASALA terror qruplaşmasının fəaliyyət göstərdiyi ölkələr sırasında Livan, Türkiyə, ABŞ, Fransa, Yunanıstan, İsveçrə, İspaniya, Avstriya ilə yanaşı Böyük Britaniya da var.

2022-ci il avqustun 4-də Azərbaycanın Böyük Britaniya və Şimali İrlandiya Birləşmiş Krallığındakı səfirliyinə hücum edilmişdi. Bu məsələdə erməni radikallarının da əli olduğu ehtimal az deyil. Yaxud bu ölkədə Türkiyəyə qarşı aksiyalara erməni icması da qatılır. Bu isə Londonla Ankara arasında münasibətlərə mənfi təsir göstərir. Odur ki, erməni icması belə çirkli əməlləri soydaşlarından ibarət qanunsuz miqrantlar vasitəsi ilə də reallaşdıra bilər.

Rusiya ilə Ermənistanın münasibətlərinin perspektivdə mümkün pisləşməsi ermənilərin Avropaya xüsusi ilə Fransaya yeni köçünə təkan verə bilər. Bu halda La-Manş boğazından qanunsuz köçkünlər, o cümlədən ermənilərin Britaniya keçməsi mümkündür.

Terroru daha çox yoxsul və kasıb təbəqənin nümayəndələri törədir. Miqrasiya insanları həm də yoxsullaşdırır. Onların müxtəlif cinayətlərə əl atmasına səbəb olur. Bu baxımdan qanunsuz miqrant ermənilərin dolanışıq səbəbindən də mənsub olduqları icmanın tapşırığını yerinə yetirməsi mümkündür. Odur ki, rəsmi Londonun ölkəni erməni köçündən təmizləməsi həm də krallığın təhlükəsizliyinin möhkəmlənməsinə yardım sayılır.

Bakı Avrasiya Universitetinin prorektoru Gürkan Hüseynovun Gürcüstanda kazinoda külli miqdarda pul uduzduğu haqda xəbərlər yayılıb.

Tribunainfo.az məlumat verir ki, yayılan xəbərlərə əsasən, BAU-nun prorektoru dostları ilə birlikdə Gürcüstanın paytaxtı Tiflisə istirahətə yollanıb və aprelin 11-də əyləncə məqsədi ilə Tiflisdəki məşhur “Ambasodor” kazinosuna gedib. Amma onun əyləncəsi necə deyərlər, “burnundan gəlib”. Belə ki, prorektor kazinoda yüksək məbləğdə pul uduzub. Ümumiyyətlə, onun azart həvəskarı olduğu haqda iddialar var.

Nazim Hüseynov

Qeyd edək ki, Gürkan Hüseynov həm də Bakı Avrasiya Universitetinin rektoru Nazim Hüseynovun oğludur. Əslən Gədəbəydən olan rektor öz oğlunu ali məktəbin prorektoru təyin edib. Lakin göründüyü kimi, prorektor elm və tədrisi deyil, bayram günlərində qumarı üstün tutub. Bildirilir ki, bu hadisə rektor atasını möhkəm qəzəbləndirib və Nazim Hüseynov prorektor oğlunun kazinoda yüksək məbləğdə pul uduzmasına görə bərk dilxor olub. Yayılan məlumatlarda o da deyilir ki, sözügedən kazinoya yalnız pasportla və video qeydiyyatla daxil olmaq mümkündür.

Yəni müştərinin şəxsiyyətinin kimliyi qeydə alınır, eləcə də video görüntü götürməklə üzü skayner edilir. Ona görə də kazinodakıların kimliyi haqda obyektin administrasiyasında səhih məlumatlar olur. Bu səbəbdən yayılan informasiya ilə bağlı “Ambasodor” kazinosu ilə əlaqə saxlayaraq dəqiqləşdirmə aparmağa çalışdıq. Lakin oradan saytımıza deyildi ki, onlar müştəriləri barədə məlumatları məxfi saxlayırlar və yalnız rəsmi sorğu əsasında cavab verilə bilər. Onu da deyək ki, qeyri-iş günləri olduğu üçün xəbəri Hüseynovların özü və universitetlə aydınlaşdırmaq imkanımız olmadı. Bütün hallarda yayılan bu məlumatlarla bağlı qarşı mövqeyini işıqlandırmağa hazırıq.

Duzdağ Fizioterapiya Mərkəzinin işçiləri əməkhaqqı ala bilmədiklərinə görə, etiraz edirlər.

TNS xəbər verir ki, bu gün mərkəzin 40-dan çox əməkdaşı Naxçıvan Ali Məclisi binasının önünə toplaşıb.

Onlar bildirib ki, sonuncu dəfə dekabrın 15-də əməkhaqqı alıblar.

İşçilərin dediyinə görə, onları Naxçıvan şəhərindən Duzdağa aparan servis avtomobili ödənişlidir. Bu gün pul tapa bilməyiblər, ona görə də heç kim işə çıxmayıb.

İşçilər indiyədək dəfələrlə Naxçıvan Muxtar Respublikasının Səhiyyə Nazirliyinə, digər aidiyyəti dövlət orqanlarına müraciət etsələr də, heç bir nəticəsi olmayıb.

Mərkəzin əməkdaşları Yeni ili, Novruz və Ramazan bayramlarını pulsuz keçirdiklərini deyiblər: “Belə vicdansızlıq olar? Biz 3 bayramı pulsuz keçirmişik. Nə dərdimizi dinləyən var, nə də şikayətimizə baxan. 4 aydır, əməkhaqqı ala bilmirik”.

Məlumata görə, Naxçıvan Ali Məclisinin yüksək vəzifəli şəxsi şikayətçiləri qəbul edib. Onlara problemin tezliklə həll olunacağı bildirilib.

Qeyd edək ki, son vaxtlar Naxçıvanda belə hadisələr tez-tez baş verir. Bir müddət əvvəl Naxçıvan Şəhər Sanitar-Təmizlik İdarəsinin bir qrup əməkdaşı iş şəraitinə etiraz olaraq işə çıxmaqdan imtina etmişdi. Onlar Naxçıvan Muxtar Respublikası Ali Məclisinin qarşısına gələrək çalışdıqları yerdə təhqir olunduqlarını, işləmək üçün heç bir şəraitin yaradılmadığını, əməkhaqlarının azaldıldığını bildirmişdi.

Azərbaycan Prezidenti İlham Əliyev Qarabağ suvarma kanalının yenidən qurulması ilə bağlı tədbirlər haqqında Sərəncam imzalayıb.

Dövlət başçısının imzaladığı sənədə əsasən, Yuxarı Qarabağ suvarma kanalı yenidən qurulacaq və Qarabağ suvarma kanalı adlandıracaq.

Sərəncamda qeyd olunub ki, İqtisadiyyat Nazirliyi, Azərbaycan Respublikasının Ekologiya və Təbii Sərvətlər Nazirliyi, Azərbaycan Respublikasının Kənd Təsərrüfatı Nazirliyi, Azərbaycan Respublikasının Fövqəladə Hallar Nazirliyi, Azərbaycan Respublikasının Dövlət Şəhərsalma və Arxitektura Komitəsi, Mingəçevir və Yevlax şəhər icra hakimiyyətləri, Goranboy, Bərdə, Tərtər, Ağcabədi, Ağdam, Beyləqan və İmişli rayon icra hakimiyyətləri, həmçinin digər aidiyyəti dövlət orqanları (qurumları) Qarabağ suvarma kanalının yenidən qurulması üzrə texniki-iqtisadi əsaslandırma və layihə-smeta sənədlərinin hazırlanmasından irəli gələn məsələlərin həlli ilə bağlı zəruri tədbirlər görməlidirlər.

Qeyd edək ki, Azərbaycanın ən böyük magistral suvarma kanalı olan Yuxarı Qarabağ kanalı Qarabağ zonası və ona yaxın ərazilərdə yerləşən 9 rayonun 115 min hektaradək əkin sahəsini suvarma suyu ilə və yaşayış məntəqələrini məişət suyu ilə təmin edir, habelə Araz çayı üzərindəki Bəhrəmtəpə hidroqovşağına əlavə su ötürməklə müvafiq əkin sahələrinin su təminatına dəstək verir.

Azərbaycanda əvvəllər Tələbə Qəbulu üzrə Dövlət Komissiyası olmuş (TQDK) bu qurumun adının dəyişib Dövlət İmtahan Mərkəzi adlandırılması heç nəyi dəyişməyib. Ən əsası onu dəyişməyib ki, quruma rəhbərlik hələ də Məleykə Abbaszadədədir. Məleykə xanım təcrübəli və peşəkar ola bilər, amma ölkədə qəbul imtahanı üzrə kifayət qədər yetişmiş, bu strukturu idarə edə biləcək kadrlar mövcuddur. Çünki hər nə qədər təcrübəli, hətta şəffaf olsa belə, bir şəxsin 30 il eyni kresloda olması inkişafı tormozlayır, yenilik gətirmir, təzə nəfəs verə bilmir. Axı TQDK, indi də DİM qəbul imtahanları ilə əlaqədar nə kimi ciddi inkişafa sahibləniblər?
Misal üçün mart ayında 11-cilərin imtahanı zamanı məlum oldu ki, səhvlərə yol verilib, kodlaşdırma düzgün qeyd olunmayıb. Apreldə isə buraxılış imtahanında üzə çıxıb ki, suallar səhv salınıb. Hətta bu mövzuda DİM şöbə müdiri açıqlama vermək məcburiyyətində qaldı. Təsəvvür edin ki, 55 min 9-cu sinif şagirdi buraxılış imtahanı verir, suallar isə səhv salınır. Yəni görünən odur ki, M.Abbaszadənin qurduğu sistem getdikcə metastaz verməyə başlayıb. Bu da sağalmaz xəstəlikdir. Bütün bunlar "toya getməlidir", faciə DİM-lə Elm və Təhsil Nazirliyi arasında olan məntiqsiz bir qarşıdurmadır ki, zərərini hər il abituriyentlər görür. Söhbət məktəblərdə tədris proqramının başqa, qəbul imtahanında test suallarının başqa olmasından gedir. Belə bir vicdansızlıq heç bir ölkədə görünməyib. Ona görə də əksər şagirdlər repetitor yanına getməyə məcbur qalır. Əks halda, məktəb keçdiyi dərslərdən heç bir sual qəbul imtahanında qarşısına çıxmayacaq. Repetitorlar isə abituriyentləri sırf DİM-in imtahan suallarına uyğun hazırlayır. Yəni nazirliklə sözügedən qurumun qarşılıqlı şəkildə zərbə endirməsinin altını şagirdlər çəkir. Bu iki struktur bir-birinin əleyhinə iş aparacaq deyə şagirdlər repetitorun ümidinə qalır, valideynlər xərcə düşür, imtahanlarda isə ilbəil ballar aşağı düşür, nəticə zəif olur, bununla da təhsilin keyfiyyətinin hansı səviyyədə olduğu üzə çıxır. Bu, həm nazirliyin, həm Abbaszadənin yaratdığı sistemin göstəricisidir.
Bundan əlavə, əvvəl də qəbul və sınaq imtahanlarında iştirak etmək üçün pul ödəyirdilər. Sadəcə, DİM yarandıqdan sonra bu məbləğlər ciddi şəkildə artırıldı. Qeyd edək ki, bakalavr səviyyəsində sınaq imtahanları və qəbul imtahanlarına giriş kartı 40 manat, magistratura səviyyəsində isə qəbul imtahanları 50 manat, sınaq imtahanları isə 40 manat təşkil edir. Ancaq magistratura pilləsində sınaq imtahanlarında iştirak zamanı sual kitabçaları verilmir. Vəsaitin bütün xərclərini ödəmişəmsə, deməli, sual kitabçası da məndə qalmalıdır. Belə çıxır ki, siz bir məhsulu satışa çıxarırsınız, pulunu verirəm, ancaq siz o məhsulu vermirsiniz.
İmtahanda 40 min nəfər iştirak edirsə, sayı 40 manata vurun və görün ortaya hansı məbləğ çıxır... Axı DİM imtahanlara bu qədər vəsait sərf edə bilməz. Üstəlik sınaq imtahanında istifadə olunan test tapşırıqları da yeni deyil. TQDK fəaliyyətdə olan vaxtı həmin testlər dövlət büdcəsi hesabına alınıb. Deməli, indi həmin testlər DİM-ə pulsuz olaraq başa gəlib. Nəticə olaraq bu qurum pul xərcləmədən böyük vəsait qazanır. Qazanc əldə etmək, eyni zamanda həqiqətən də şagirdlərin bilik və bacarığını yoxlamaq istəyirlərsə, o zaman imtahanın qiymətini 10 manatdan artıq etməməlidirlər.
Düzdür, Dövlət İmtahan Mərkəzi publik hüquqi şəxsdir, amma bu qurumun adının əvvəlində “dövlət” sözü var. Ancaq DİM sədri nə etsin, Abbaszadənin Xızıdakı villasının aylıq xərcləri var, bəs, necə ödəsin?!

Anaxeber.info

Uzun müddətdir müzakirə olunan, vətəndaşları və müvafiq qurumları narahat edən problem, deyəsən, artıq həllini tapır. Söhbət sənədsiz evlərə çıxarışların, müvafiq digər sənədlərin verilməsi məsələsindən gedir. Bununla bağlı İqtisadiyyat Nazirliyi yanında Əmlak Məsələləri Dövlət Xidmətinin rəisi Mətin Eynullayevin açıqlaması ictimaiyyətdə böyük ümidlər yaradıb. Amma sözügedən qurumun bu işin öhdəsindən gələ biləcəyini düşünmək çətindir. Bir zamanlar bu sahədə Kərəm Həsənov kimi odioz oliqarxın tam hökmranlığı olduğu halda indi Mətn Eynullayevin eyni idarəçilik güçünə sahib olduğunu demək olmaz…
AzToday.az ALFA xəbər-ə istinadən xəbər verir ki, burda xidmət rəisindən daha çox digər fiqurlar söz sahibinə çevrilib. Məsələn, adi yerölçənlikdən məmumların sevimlisinə çevrilmiş Dövlət əmlakının icarəyə verilməsi və dövlət ehtiyacları şöbəsinin müdiri vəzifəsini icra edən Taleh Arif oğlu Bəşirov. Taleh Bəşirovun dövlət torpaqlarını məmurlara peşkəş etməsi qarşılığında aldığı Range Rover zamanla özü nəhəngliyində problemə çevrilməkdədir. Şöbə müdiri lovğalıq edərək ona tam məxfi ortamda təqdim edilən avtomobillə bağlı yaxın çevrəsinə açıq məlumat verməsi onunla yanaşı, ona həmin avtomobili hədiyyə edən şəxsi də çətin vəziyyətə salıb. Məhz həmin iş adamı ilə birgə Novxanıda yerləşən “Metallurq” düşərgəsində qaçqınları məskunlaşdığı ərazinin qeyri qanuni zəbti Bəşirov üçün ciddi problemlər yaradıb. Əmlak makleri ona zamanında avtomobil hədiyyə etmiş məşhur general qardaşıyla birgə köçkün düşərgəsində villalar inşa etmək üçün onlarla ağacı ağır texnika vasitəsilə məhv edib. Dövlət torpaqları hesabına milyonlar qazanan Taleh Bəşirov Tükiyədə də nəhəng biznes imperiyası yaradıb. Tez-tez Türkiyəyə səfərlər edən Taleh Bağırov öz biznesini Azərbaycandan kənarda genişləndirməkdə maraqlıdır.
Əmlak Məsələləri Dövlət Xidmətində qanunsuz yollarla nəhəng biznes imperiyası quran məmurlardan biri də Torpaqların dövlət idarəetməsinin təşkili və geodeziya şöbəsinin müdir müavini Eldəniz Qafarovdur. Paytaxt ərazisində biznes üçün ən uğurlu nöqtələrin zəbti Eldəniz Qafarovun adı ilə bağlıdır . Gediş-gəlişin çox olduğu ərazilərdə boş torpaq sahələrini, hətta səki, park və zibilxanaları belə zəbt edən müdir müavini, qısa zamanda bu ərazilərdə ictimai iaşə obyektləri və mağazalar inşa edərək öz biznes imperiyasını durmadan genişləndirir. Tutduğu vəzifə və yüksək ranqlı məmurlarla qurduğu dostluq münasibəti ona zəbt etdiyi əraziləri qısa zamanda sənədləşdirməyə, əməlinə qanuni don geyindirməyə imkan verir. Belə bir mühitdə isə sənədsiz evlərin sənədləşdirilməsi prosesinin şəffaflığı inandırıcı görünmür. Nəzərə alsaq ki, bu məsələ ölkə rəhbərliyinin vətəndaşlara vədlri sırasındadır, demək, Mikayıl Cabbarovun idarəsində prezidentə qarşı sabotaj mafiyası fəaliyyət göstərir.

Sumqayıt şəhər “Qurd dərəsi” yaşayış massivində evdən külli miqdarda pul oğurlamış 1988-ci il təvəllüdlü Məhəbbət Məmmədovun məhkəməsi başa çatıb.

“Qafqazinfo” xəbər verir ki, Sumqayıt Ağır Cinayətlər Məhkəməsində keçirilən prosesdə M.Məmmədov Cinayət Məcəlləsinin 177.3.2-ci (Külli miqdarda oğurluq) maddəsi ilə təqsirli bilinib.

Qeyd edilib ki, Məhəbbət Məmmədov Azərbaycan Təhsil İşçiləri Azad Həmkarlar İttifaqının Abşeron rayon komitəsinin sədri Vahid Əliyevin bacısı oğlu və xidməti avtomobilinin sürücüsüdür. O, dayısına məxsus evdə yerləşən divanın altına qoyulmuş çantadan 90 min manat pulu gizli talayaraq mərc oyunlarına qoyub və pulun böyük hissəsini uduzub.

Məhkəmə prosesində Vahid Əliyevin oğlu zərərçəkmiş şəxs qismində tanınıb. O, ifadəsində bildirib ki, 3 il əvvəl anasına böyrək köçürülməsi məqsədilə Sumqayıtdakı evini satıb və pulu atasına məxsus evə qoyub. Bundan sonrakı dövrdə yığdığı pulları da oraya gətirərək yerləşdirən zərərçəkmiş şəxs sonuncu dəfə orada 90 min manatın olduğunu deyib.

Pulların bibisi oğlu Məhəbbət tərəfindən oğurlanması məlum olduqdan sonra onun barəsində hüquq-mühafizə orqanlarına şikayət edilib. Geridə qalan müddətdə təqsirləndirilən şəxs dəymiş zərərdən yalnız 3 min manat ödədiyindən zərərçəkmiş şəxs ondan şikayətçi olduğunu bildirib.

Sumqayıt Ağır Cinayətlər Məhkəməsinin bir neçə gün əvvəl çıxardığı hökmlə M.Məmmədova 7 il həbs cəzası verilib.