Azərbaycanda əvvəllər Tələbə Qəbulu üzrə Dövlət Komissiyası olmuş (TQDK) bu qurumun adının dəyişib Dövlət İmtahan Mərkəzi adlandırılması heç nəyi dəyişməyib. Ən əsası onu dəyişməyib ki, quruma rəhbərlik hələ də Məleykə Abbaszadədədir. Məleykə xanım təcrübəli və peşəkar ola bilər, amma ölkədə qəbul imtahanı üzrə kifayət qədər yetişmiş, bu strukturu idarə edə biləcək kadrlar mövcuddur. Çünki hər nə qədər təcrübəli, hətta şəffaf olsa belə, bir şəxsin 30 il eyni kresloda olması inkişafı tormozlayır, yenilik gətirmir, təzə nəfəs verə bilmir. Axı TQDK, indi də DİM qəbul imtahanları ilə əlaqədar nə kimi ciddi inkişafa sahibləniblər?
Misal üçün mart ayında 11-cilərin imtahanı zamanı məlum oldu ki, səhvlərə yol verilib, kodlaşdırma düzgün qeyd olunmayıb. Apreldə isə buraxılış imtahanında üzə çıxıb ki, suallar səhv salınıb. Hətta bu mövzuda DİM şöbə müdiri açıqlama vermək məcburiyyətində qaldı. Təsəvvür edin ki, 55 min 9-cu sinif şagirdi buraxılış imtahanı verir, suallar isə səhv salınır. Yəni görünən odur ki, M.Abbaszadənin qurduğu sistem getdikcə metastaz verməyə başlayıb. Bu da sağalmaz xəstəlikdir. Bütün bunlar "toya getməlidir", faciə DİM-lə Elm və Təhsil Nazirliyi arasında olan məntiqsiz bir qarşıdurmadır ki, zərərini hər il abituriyentlər görür. Söhbət məktəblərdə tədris proqramının başqa, qəbul imtahanında test suallarının başqa olmasından gedir. Belə bir vicdansızlıq heç bir ölkədə görünməyib. Ona görə də əksər şagirdlər repetitor yanına getməyə məcbur qalır. Əks halda, məktəb keçdiyi dərslərdən heç bir sual qəbul imtahanında qarşısına çıxmayacaq. Repetitorlar isə abituriyentləri sırf DİM-in imtahan suallarına uyğun hazırlayır. Yəni nazirliklə sözügedən qurumun qarşılıqlı şəkildə zərbə endirməsinin altını şagirdlər çəkir. Bu iki struktur bir-birinin əleyhinə iş aparacaq deyə şagirdlər repetitorun ümidinə qalır, valideynlər xərcə düşür, imtahanlarda isə ilbəil ballar aşağı düşür, nəticə zəif olur, bununla da təhsilin keyfiyyətinin hansı səviyyədə olduğu üzə çıxır. Bu, həm nazirliyin, həm Abbaszadənin yaratdığı sistemin göstəricisidir.
Bundan əlavə, əvvəl də qəbul və sınaq imtahanlarında iştirak etmək üçün pul ödəyirdilər. Sadəcə, DİM yarandıqdan sonra bu məbləğlər ciddi şəkildə artırıldı. Qeyd edək ki, bakalavr səviyyəsində sınaq imtahanları və qəbul imtahanlarına giriş kartı 40 manat, magistratura səviyyəsində isə qəbul imtahanları 50 manat, sınaq imtahanları isə 40 manat təşkil edir. Ancaq magistratura pilləsində sınaq imtahanlarında iştirak zamanı sual kitabçaları verilmir. Vəsaitin bütün xərclərini ödəmişəmsə, deməli, sual kitabçası da məndə qalmalıdır. Belə çıxır ki, siz bir məhsulu satışa çıxarırsınız, pulunu verirəm, ancaq siz o məhsulu vermirsiniz.
İmtahanda 40 min nəfər iştirak edirsə, sayı 40 manata vurun və görün ortaya hansı məbləğ çıxır... Axı DİM imtahanlara bu qədər vəsait sərf edə bilməz. Üstəlik sınaq imtahanında istifadə olunan test tapşırıqları da yeni deyil. TQDK fəaliyyətdə olan vaxtı həmin testlər dövlət büdcəsi hesabına alınıb. Deməli, indi həmin testlər DİM-ə pulsuz olaraq başa gəlib. Nəticə olaraq bu qurum pul xərcləmədən böyük vəsait qazanır. Qazanc əldə etmək, eyni zamanda həqiqətən də şagirdlərin bilik və bacarığını yoxlamaq istəyirlərsə, o zaman imtahanın qiymətini 10 manatdan artıq etməməlidirlər.
Düzdür, Dövlət İmtahan Mərkəzi publik hüquqi şəxsdir, amma bu qurumun adının əvvəlində “dövlət” sözü var. Ancaq DİM sədri nə etsin, Abbaszadənin Xızıdakı villasının aylıq xərcləri var, bəs, necə ödəsin?!

Anaxeber.info

Uzun müddətdir müzakirə olunan, vətəndaşları və müvafiq qurumları narahat edən problem, deyəsən, artıq həllini tapır. Söhbət sənədsiz evlərə çıxarışların, müvafiq digər sənədlərin verilməsi məsələsindən gedir. Bununla bağlı İqtisadiyyat Nazirliyi yanında Əmlak Məsələləri Dövlət Xidmətinin rəisi Mətin Eynullayevin açıqlaması ictimaiyyətdə böyük ümidlər yaradıb. Amma sözügedən qurumun bu işin öhdəsindən gələ biləcəyini düşünmək çətindir. Bir zamanlar bu sahədə Kərəm Həsənov kimi odioz oliqarxın tam hökmranlığı olduğu halda indi Mətn Eynullayevin eyni idarəçilik güçünə sahib olduğunu demək olmaz…
AzToday.az ALFA xəbər-ə istinadən xəbər verir ki, burda xidmət rəisindən daha çox digər fiqurlar söz sahibinə çevrilib. Məsələn, adi yerölçənlikdən məmumların sevimlisinə çevrilmiş Dövlət əmlakının icarəyə verilməsi və dövlət ehtiyacları şöbəsinin müdiri vəzifəsini icra edən Taleh Arif oğlu Bəşirov. Taleh Bəşirovun dövlət torpaqlarını məmurlara peşkəş etməsi qarşılığında aldığı Range Rover zamanla özü nəhəngliyində problemə çevrilməkdədir. Şöbə müdiri lovğalıq edərək ona tam məxfi ortamda təqdim edilən avtomobillə bağlı yaxın çevrəsinə açıq məlumat verməsi onunla yanaşı, ona həmin avtomobili hədiyyə edən şəxsi də çətin vəziyyətə salıb. Məhz həmin iş adamı ilə birgə Novxanıda yerləşən “Metallurq” düşərgəsində qaçqınları məskunlaşdığı ərazinin qeyri qanuni zəbti Bəşirov üçün ciddi problemlər yaradıb. Əmlak makleri ona zamanında avtomobil hədiyyə etmiş məşhur general qardaşıyla birgə köçkün düşərgəsində villalar inşa etmək üçün onlarla ağacı ağır texnika vasitəsilə məhv edib. Dövlət torpaqları hesabına milyonlar qazanan Taleh Bəşirov Tükiyədə də nəhəng biznes imperiyası yaradıb. Tez-tez Türkiyəyə səfərlər edən Taleh Bağırov öz biznesini Azərbaycandan kənarda genişləndirməkdə maraqlıdır.
Əmlak Məsələləri Dövlət Xidmətində qanunsuz yollarla nəhəng biznes imperiyası quran məmurlardan biri də Torpaqların dövlət idarəetməsinin təşkili və geodeziya şöbəsinin müdir müavini Eldəniz Qafarovdur. Paytaxt ərazisində biznes üçün ən uğurlu nöqtələrin zəbti Eldəniz Qafarovun adı ilə bağlıdır . Gediş-gəlişin çox olduğu ərazilərdə boş torpaq sahələrini, hətta səki, park və zibilxanaları belə zəbt edən müdir müavini, qısa zamanda bu ərazilərdə ictimai iaşə obyektləri və mağazalar inşa edərək öz biznes imperiyasını durmadan genişləndirir. Tutduğu vəzifə və yüksək ranqlı məmurlarla qurduğu dostluq münasibəti ona zəbt etdiyi əraziləri qısa zamanda sənədləşdirməyə, əməlinə qanuni don geyindirməyə imkan verir. Belə bir mühitdə isə sənədsiz evlərin sənədləşdirilməsi prosesinin şəffaflığı inandırıcı görünmür. Nəzərə alsaq ki, bu məsələ ölkə rəhbərliyinin vətəndaşlara vədlri sırasındadır, demək, Mikayıl Cabbarovun idarəsində prezidentə qarşı sabotaj mafiyası fəaliyyət göstərir.

Ekologiya və Təbii Sərvətlər Nazirliyi "Siyəzən Broyler" ASC-nin fəaliyyətində nöqsanlar aşkarlayıb.

İqtisadiyyat.az xəbər verir ki, aparılan yoxlamalar nəticəsində ASC-nin atmosferi çirkləndirdiyi məlum olub.

Buna görə də şirkət barəsində İnzibati Xətalar Məcəlləsinin 234.0.1-ci maddəsinə əsasən cərimə protokolu tərtib edilib.

Daha sonra protokol baxılması üçün Siyəzən Rayoh Məhkəməsinə göndərilib və iş hakim Bəylər Ələkbərovun icraatına verilib.

Aprelin 23-də məhkəmə iclası keçiriləcək.

Hakim iddianı təmin edərsə, müvafiq icra hakimiyyəti orqanının xüsusi icazəsi olmadan atmosfer havasına zərərli maddələrin atılmasına görə "Siyəzən Broyler" ASC-ni yeddi min beş yüz manatdan on min manatadək məbləğdə cərimə gözləyir.

Qobustan rayonu, Xilmilli kənd sakini Osmanova Leyla Tərlan qızı tərəfindən Azərbaycan Respublikasının Prezidenti cənab İlham Əliyevə, sabiq Ədliyyə naziri Fikrət Məmmədova, Ədliyyə Nazirliyinin Bələdiyyələrlə İş Mərkəzinə, Məhkəmə-Hüquq Şurasına, Ombudsman Aparatına və Kütləvi İnformasiya Vasitələrinə bir məsələ ilə bağlı artıq neçə ildir ki, müraciətlər ünvanlayıb. Əvvəlki müraciətlərdə Xilmilli kənd sakini Leyla Osmanova Qobustan rayon İcra Hakimiyyətinin başçısı Adil Məmmədovun və Qobustan şəhər Bələdiyyəsi sədri Vasif Novruzovun törətdiyi qanun pozuntularının qarşısının alınmasından və ona məxsus torpaq sahəsinin geri qaytarilmasından şikayətçi idi. İndi isə 3 azyaşlı uşaq anası Leyla Osmanova Daşınmaz Əmlakın Dövlət Reyestr Publik Hüquqi şəxsin 14 saylı Ərazi idarəsi tərəfindən verilmiş saxta sənədlər əsasında Sumqayıt şəhər Məhkəməsində qurama və sifarişli məhkəmə oyunbazlığından şikayət edib.

Dia-az.info vətəndaş Leyla Osmanovanın müraciətini olduğu kimi oxuculara təqdim edir. O,yazır:

Məlumat üçün bildirirəm ki, Qobustanın sabiq rüşvətxor İcra başçısı İsmayıl Vəliyevin 2011-ci ilin martın 7-də Qobustan Bələdiyyə sədri V.Novruzov vasitəsilə Leyla Osmanovaya ayrılmış 0.06 ha torpaq sahəsini İsmayıllı rayonun Maliyyə İdarəsinin məmuru olan Habil Gülməmmədova qanunsuz sənədlərlə satılmasından sonra günüm məhkəmələrdə keçir.

“İddiaçı Gülməmmədov Habil Gülməmməd oğlunun adına 2019-cu ildə verilmiş əsassız və saxta A N- 401833 nömrəli “Torpaq sahəsinin plan və ölçüsü” sənədinin etibarsız hesab edilməsilə bağlı Sumqayıt İnzibati Məhkəməsinə verdiyimiz iddianın başa çatmasına qədər icraatınızdakı məhkəmə prosesinin təxirə salınması ” barədə Sumqayıt Apellyasiya Məhkəməsinin hakimi Səyyad Qafariyə vəsatətlə müraciət etmişdir. Müraciətin bir nüsxəsi də redaksiyamıza göndərilmişdir. Vəsatətdə 27 fevral 2024-cü il tarixli ekspert rəyinə istinad edilərək bildirilir ki, iddiaçı Habil Gülməmmədov ( İsmayıllı rayon Maliyyə İdarəsinin işçisi olan . redaktordan) Qobustan şəhər Bələdiyyəsinin sədri Vasif Novruzovla gizli sövdələşərək 2019-cu ildə yerli bələdiyyənin formal keçirdiyi hərrac protokolunu arxa tarixlə, yəni 2011-ci il kimi sənədləşdirərək Leyla Osmanovaya məxsus bələdiyyə torpağlından 273 kv m, qalan 273 kv m torpaq sahəsini isə dövlət yolu və xüsusi mülkiyyətçi olan Şahin Səlimovun birlikdə torpaqları hesabına 5.6 sot təşkil edərək maddi maraqları təmin edilməklə satılmışdır. Ekspert rəyində də təsdiq edilir ki, yerli bələdiyyə sədri hətta dövlət torpağı olan yol və xüsusi mülkiyyət hesab edilən Şahin Səlimovun pay torpağının bir hisəsini qanunsuz olaraq pullu və imkanlı şəxs olan İsmayıllı rayon sakini olan birisinə satmışdır. Və maraqlıdır ki, DƏDRX-nın 14 saylı Şamaxı Ərazi İdarəsi də bu saxtakarlığı bilə bilə Habil Gülməmmədova A N- 401833 nömrəli “Torpağın plan və ölçüsü ” barədə 2019-cu ildə dövlət sənədi vermişdir. Ekspert qeyd edir ki, Hətta bu A N- 401833 nömrəli sənədi arxivdə aşkar etmək mümkün olmamışdır. Yəni, bu mütəşəkkil dəstə qabaqcadan sövdələşərək maddi maraqların təmin olunması müqabilində belə bir saxta sənəd tərtib edib H.Gülməmmədova vermişlər. İnanırıq ki, istər DƏDRX-nın 14 saylı Şamaxı Ərazi İdarəsinin , istərsə də Qobustan Bələdiyyə sədrinin təşkil etdiyi sənəd saxtakarlığı ilə müşayət olunan cinayətlərə hazırda davam edən Sumqayıt Apellyasiya Məhkəməsində təqdim edilmiş ekspert rəyi və maddi sübutlar əsasında hüquqi qiymət verilməsi üçün xüsusi qərardad qəbul edilərək aidiyyatı üzrə göndəriləcəkdir.
İddiaçı Gülməmmədov Habil Gülməmməd oğlunun bizə qarşı “Zəbt edilmiş torpaq sahəsinin boşaldlması, aparılmış qanunsuz tikintinin sökülməsi” tələbinə dair mülki iş üzrə Qobustan Rayon məhkəməsinin 25 yanvar 2023-cü il tarixli, 2 (026)-30/2023 saylı qətnaməsindən hər iki tərəfin verdiyi apellyasiya şikayətləri Sizin icraatınızdadır.
İş üzrə iddiaçı Gülməmmədov Habil Gülməmməd oğlu Qobustan şəhər Bələdiyyəsinin 2019-cu il tarixində ona arxa tarixlə, 2011-ci il tarixli – formal hərrac keçirməklə cavabdehə məxsus torpağın 273 kv m sahəsini G.Habilə qanunsuz olaraq satmışdır. Habil də öz növbəsində ona satılmış 5.46 sot torpaq sahəsinin qalan 273 kv.m sahəsini isə dövlət mülkiyyətindəki yolun bir hissəsi və bir hissəsini də Qobustan rayon sakini olan Şahin Səlimovun xüsusi mülkiyyəti olan pay torpağının bir hissəsi hesabına cəmi 546 kv.m torpaq sahəsini qanunsuz olaraq bələdiyyə mülkiyyəti adı altında, arxa tarixlə, yəni 2011-ci ildə formal keçirdiyi hərrac yolu ilə rüşvət müqabilində H.G.Gülməmmədova satmışdır. ( sənədlər əlavə edilir)
Cavabdeh Gülməmmədov Habil Gülməmməd oğlunun adına 2019-cu ildə verilmiş A N- 401833 nömrəli “Torpaq sahəsinin plan və ölçüsü” sənədini torpaq sahələrinin hansı təyinata aid olduğunu araşdırmadan ( yəni, 546 kv.m sahə üçün verilmiş inzibati aktda göstərilən torpağın yarısı- 273kv m.-i bələdiyyə fondunun, qalan 273 kv m sahənin isə xüsusi və dövlət fonduna aid olan) sənədi təsdiq etmişdir.
Bizə aid olan və vətəndaş Habil Gülməmmədov tərəfindən mübahisələndirlilən 273 kv.m torpaqla bağlı hazırda Sumqayıt Apellyasiya Məhkəməsində hakim Səyyad Qafarlı tərəfindən 31 may 2023-cü il tarixli Ekspertizanın keçirilməsi” barədə qərarına əsasən təyin edilən Daşınmaz Əmlakın Dövlət Reyestr Publik Hüquqi şəxsin 4 saylı Abşeron Ərazi İdarəsinin 30.12.2023-cü il tarixli, 234120003621 nömrəli mütəxəssis rəyindən və ƏN-nin Mərkəzi Ekpertiza İdarəsinin eksperti Elman Aslanlının tərtib etdiyi Ekspert N- 3-16-16/2-10/62 saylı, 27 fevral 2024-cü il tarixli ekspert rəyində xüsusi olaraq qeyd edilir:
“ Məlumat üçün bildiririk ki, naturada hasara alınmış mübahisəli torpaq sahəsi ilə H.Gülməmmədova məxsus A N-401833 nömrəli “Torpaq sahəsinin plan və ölçüsü” sənədində qeyd edilən koordinatlar daxilində torpaq sahəsi arasında sahə, konfiqurasiya və coğrafi yerləşməsi uyğunsuzluğu vardlr. Belə ki, Habilin adına olan A N-401833 nömrəli sənəddə qeyd edilən koordinatlıar daxilində olan torpaq sahələrinin bir hissəsi hasara alınmış mübahisəli torpaq sahəsi ( 273 kv.m ) , bir hissəsi yol və bir hissəsi başqa şəxsin istifadəsində olan torpaq sahəsilə üst üstə düşür. Qeyd edilən uyğunsuzluqlar rəyə əlavə olunmuş ortofoto görüntüsündə öz əksini tapmışdır. Eyni zamanda bildirilir ki, H.Gülməmmədova məxsus A N-401833 nömrəli sənədin ikinci nüxsəsi Ərazi İdarəsinin arxivində aşkar edilməmişdir.”
Yəni, ekspert rəyindən də sübut edilmişdir ki, DƏDRX-nın 14 saylı Ərazi idarəsi tərəfindən Habil Gülməmmədovun adına rəsmiləşdirdiyi 2019-cu il tarixli, A N-401833 nömrəli “Torpaq sahəsinin plan və ölçüsü” sənədi saxtakarlıqla tərtib edildiyinə görə etibarsızdır və ləğv edilməlidir.
Torpağa dair verilmiş A N-401833 nömrəli kadastr hazırda qüvvədədir, hər hansı dövlət orqanı tərəfindən ləğv edilməyib, dəyişdirilməyib və ya etibarsız hesab edilməyib.

Odur ki, H.G.Gülməmmədova verilmiş A N- 401833 nömrəli kadastr sənədi hazırda qüvvədə olduğundan və onun verilməsində şərtlər, qaydalar pozuldığu ekspertlər tərəfindən sübuta yetirildiyindən 14 saylı Ərazi idarəsi tərəfindən bu inzibati akt (sənəd) məhkəmə tərəfindən qəbul edilmiş qərar əsasında ləğv edilməlidir. Buna görə də iddia ərizəsilə Sumqayıt İnzibatri Məhkəməsinə müraciət etmişik.
Saxtalaşdırılmış bələdiyyə qərarı-protokolu və onun əsasında Habil Gülməmmədovun adına “Torpağın plan və ölçüsü” sənədini tərtib etmiş sənəd saxtakarları barədəsində aidyyatı üzrə hüquq-mühafizə orqanlarına məlumat verməli idi. Lakin bunu etməmişdir. Əksinə, iddiaçı H.Gülməmmədov aldığı A- N 401833 nömrəli sənəd saxta olduğuna görə çıxarış ala bilməmişdir. Yəni imtina edilmişdir. Ona görə də iddiaçı ona təqdim edilmiş saxta kadastr sənədi əsasında bizə qarşı əsassız məhkəmə davası açmışdır. Bütün yuxarıda qeyd edilənləri nəzərə alaraq məhkəmədən xahiş edirəm ki,

İddiaçı Gülməmmədov Habil Gülməmməd oğlunun adına 2019-cu ildə verilmiş əsassız və saxta A N- 401833 nömrəli “Torpaq sahəsinin plan və ölçüsü” sənədinin etibarsız hesab edilməsilə bağlı Sumqayıt İnzibati Məhkəməsinə verdiyimiz iddianın başa çatmasına qədər icraatınızdakı məhkəmə prosesinin təxirə salınması barədə qərar qəbul edəsiniz.

Aprelin 15-də görkəmli oftalmoloq-alim, akademik Zərifə Əliyevanın vəfatından 39 il ötür. Onun nurlu xatirəsi qədirbilən xalqımız tərəfindən hörmətlə anılır.

Akademik Zərifə Əliyevanın anım günündə onun həyat və fəaliyyətinin bəzi məqamlarına nəzər salırığ.

Qədim Naxçıvanın Şahtaxtı kəndində dünyaya göz açmış Zərifə Əliyeva zəngin və mənalı ömür yaşayıb. Atası - görkəmli ictimai və dövlət xadimi Əziz Əliyevin ömür yolu onun üçün əsl həyat məktəbi olub. Zərifə xanım müasir müstəqil Azərbaycan dövlətinin memarı və qurucusu Ümummilli Lider Heydər Əliyevin ömür-gün yoldaşı, dostu və silahdaşı idi. Vaxtilə ata evində görüb-götürdükləri respublikanın birinci şəxsinin xanımı olduğu zamanlarda köməyinə çatıb. O, Ulu Öndərə mənəvi dayaq, arxa olub.

Akademik Zərifə Əliyevanın tədqiqatları, alim kimi qazandığı böyük uğurlar Azərbaycan tibb elminin tarixində xüsusi mərhələ təşkil edir. O, Azərbaycan Tibb İnstitutunu bitirəndən sonra təhsilini Moskvada, Həkimləri Təkmilləşdirmə İnstitutunda davam etdirib. Əmək fəaliyyətinə 1949-cu ildə Azərbaycan Elmi-Tədqiqat Həkimləri Təkmilləşdirmə İnstitutunda elmi işçi kimi başlayıb və bütün ömrünü tibbin oftalmologiya sahəsinə həsr edib.

1940-1950-ci illərdə Azərbaycanda göz xəstəlikləri, xüsusən traxoma geniş yayılmışdı. İnsanları bu bəladan xilas etmək, eləcə də digər aktual problemə - gözün peşə xəstəliklərinə dair fundamental tədqiqatlar aparmaq, onların effektli müalicə metodlarını və profilaktik tədbirləri işləyib-hazırlamaq lazım idi. Beləliklə, gənc tədqiqatçının elmi araşdırmalarının mövzusunu həyat özü müəyyənləşdirir və o, elmi istiqamətlərinin ilkin mərhələsini traxomanın müalicəsinə həsr edir. Bu xəstəliyin daha geniş yayıldığı rayonlara gedir, xəstəlik ocaqlarını aşkarlayır, göz həkimlərinə mühazirələr oxuyur, əhali arasında söhbətlər aparırdı.

Çox keçmədən Zərifə xanım traxoma xəstəliyinin başlanğıc dövründə sintomisinin tətbiqində uğurlu nəticələrə nail oldu. Tədqiqatlarının yekunu olaraq 1959-cu ildə “Traxomanın digər terapiya üsulları ilə birlikdə sintomisinlə müalicəsi” mövzusunda namizədlik dissertasiyasını uğurla müdafiə etdi. Onun təklif etdiyi müalicə metodu respublikamızda geniş tətbiq olundu və traxomanın bir xəstəlik kimi aradan qalxmasında mühüm rol oynadı.

Zərifə xanımın oftalmoloq-alim kimi diqqət yetirdiyi aktual problemlər sırasında diaqnostika, qlaukomanın və görmə orqanının iltihabının müalicəsi xüsusi yer tuturdu. O, oftalmologiyanın elmi cəhətdən az araşdırılmış sahəsi - görmə orqanının peşə patologiyasını dərindən tədqiq edib. Bu problemin aktuallığı yalnız kimya və elektronika sənayesinin geniş inkişafı ilə deyil, həm də bir çox yeni kimyəvi birləşmələrin görmə orqanına təsirinin tədqiqi ilə əlaqədar idi. Zərifə xanım bu sahənin ilk tədqiqatçısı olub. O, dünyada ilk dəfə olaraq görmə orqanının peşə patologiyasını araşdıran elmi-tədqiqat laboratoriyası yaradıb və elm aləmində yeni bir istiqamətin - peşə oftalmologiyasının əsasını qoyub. Bu sahəyə dair araşdırmalarının ilkin nəticələrini ümumiləşdirərək “Azərbaycanın kimya sənayesi işçilərində görmə orqanının vəziyyəti” mövzusunda doktorluq dissertasiyası yazıb. 1977-ci ildə ona tibb elmləri doktoru alimlik dərəcəsi verilib.

Gərgin və məhsuldar elmi fəaliyyətinə görə 1980-ci ildə “Əməkdar elm xadimi” fəxri adına layiq görülüb. Görkəmli alimin respublikanın iri sənaye müəssisələrində apardığı genişmiqyaslı elmi-tədqiqat işləri “Şin istehsalında gözün peşə patologiyası”, “Xroniki yod intoksikasiyası zamanı oftalmologiya” və “Yod sənayesində gözün peşə xəstəliyinin profilaktikası” kimi dəyərli monoqrafiyalarında öz əksini tapıb. 1981-ci ildə görmə orqanının peşə patologiyası sahəsində apardığı elmi-tədqiqat işlərinin uğurlu nəticələrinə və oftalmologiyanın inkişafına verdiyi töhfələrə görə ona keçmiş ittifaqın oftalmologiya sahəsində ən mötəbər mükafatı olan SSRİ Tibb Elmləri Akademiyasının M.İ.Averbax adına mükafatı verilib. O, həmin mükafata layiq görülən ilk qadın alim idi.

Zərifə Əliyeva 1983-cü ildə Azərbaycan Elmlər Akademiyasının həqiqi üzvü seçilib. O, həmçinin bir sıra dərs vəsaiti və monoqrafiyaların müəllifidir: “Kəskin virus konyunktivitləri”, “Keratitlər, gözün damarlı traktının, torlu qişanın, görmə sinirinin xəstəlikləri, kataraktalar”, “Qlaukoma və gözün hipertenziyası”, “Görmə orqanının zədələnməsi”, “Göz yaşı axmasının fiziologiya və histologiyası”, “Şəkərli diabetdə göz xəstəlikləri”, “Gözün mikrocərrahiyyəsi”, “Göz bəbəyi haşiyəsinin adaptasiya və müdafiə funksiyası” və sair. Alimin “Yaşaparıcı yolların fiziologiyası”, “Yaşaparıcı yolların cərrahi müalicəsi”, “Göz yaşı yollarının qoruyucu cərrahiyyə üsulları” və digər əsərləri bu gün də aktuallığını qoruyub saxlayır. O, iridodiaqnostika və iridoterapiya problemləri ilə də məşğul olub, bu sahəyə dair iki monoqrafiya hazırlayıb. Dünya miqyasında iridodiaqnostikaya aid kitabları ilk dəfə Zərifə xanım Əliyeva yazıb.

Zərifə xanımın həkimlik sənəti ilə bağlı bir fikri də diqqəti cəlb edir: “Həkim insanın ən doğma adamıdır. O, insanlardan özünü ayırmamalı, özünü sevən, laqeyd insan olmamalıdır”.

Akademik Zərifə Əliyeva həm də görkəmli ictimai xadim idi. O, keçmiş SSRİ Sülhü Müdafiə Komitəsinin üzvü, Azərbaycan Sülhü Müdafiə Komitəsi sədrinin müavini, Ümumittifaq “Bilik” Cəmiyyəti İdarə Heyətinin, Ümumittifaq Oftalmoloqlar Elmi Cəmiyyəti Rəyasət Heyətinin üzvü olub. Xalq yazıçısı Elmira Axundovanın “Zərifə və Heydər Əliyevlər - Əbədiyaşar məhəbbət” kitabında oxuyuruq: “Özü də çoxsaylı vəzifələrinin heç birinə qətiyyən formal yanaşmırdı. Məsələlərin müzakirəsində şəxsən iştirak edir, onların uğurlu həlli üçün bilik, qüvvə və enerjisini əsirgəmirdi.

Bu zaman çalışırdı ki, gündəlik həyatının işlə bağlı tərəfi heç bir halda qadın və ana kimi üzərinə düşən vəzifələri üstələməsin. Bəzən Zərifə xanım elmi və ictimai işlərin ailəsinə, övladlarına ayıra biləcəyi vaxtı əlindən aldığına görə özünü günahkar hiss edirdi”.

Zərifə xanımın fəxri adları, elmi titulları, mükafatları olduqca çoxdur. Bu adların hər biri qürur, iftixar mənbəyidir. Amma bu adlar sırasında ən şərəflisi Ana adıdır. Zərifə xanım Ümummilli Lider Heydər Əliyevin siyasi xəttinin layiqli davamçısı Prezident İlham Əliyevin anasıdır.

Müasirlərinin dediyi kimi, Zərifə xanım qeyri-adi bir ana idi və övladlarına olan münasibət də xüsusi idi. Belə münasibətin bənzərini tapmaq çətindir. O, uşaqları sanki Ulu Tanrı tərəfindən bəxş olunan bir nur payı kimi qəbul edirdi. Özünə rəhm etmirdi, analıq borcunu yerinə yetirməkdə də özünə rəhmi gəlmirdi. Hərdən analar uşaqlarına olan məhəbbətdə elə yüksək dərəcələrə çatırlar ki, bununla hamını heyrətə gətirirlər. Zərifə xanım məhz belə analardan idi.

Şəki rayonun Baş Göynük kənd sakini, “Çernobul” qəzası iştirakçısı və əlili Məmmədov Aqil Sabir oğlu tərəfindən ölkə rəhbərliyinə müraciət ünvanlanıb. Bir nüsxəsi də dia-az.info-ya daxil olan müraciətdə deyilir:
"Bir daha Sizlərə minnətdarlığımızı bildirmək istəyirik ona görə ki, Siz 44 günlük Vətən Müharibəsinə Qarabağ Problemini birdəfəlik həll etdiniz. Biz də bir seçici kimi hamılıqla Sizi yenidən dövlətimizə başçı seçdik.

Xatırladım ki, elə seçki bitər bitməz “Su və Meliorasiya Təsərrüfatı” ASC-nin Şəki rayonu üzrə idarəsi rəisi mənə zəng edərək bildirdi ki, təcili idarəyə gəlib öz xahişinizlə ərizə yazıb işdən çıxmalısınız. Mən ona bildirdim ki, axı mən xüsusi kateqoriyaya aid Çernobul veteranıyam. Niyə idarədəki bu ixtisara məndən başlayırsınız. Cavab Verdi ki, idarə etdiyiniz avtomobil köhnəlib, işləmir ona görə. Bu birbaşa “Su və Meliorasiya Təsərrüfatı” ASC-nin sədri cənab Zaur Mikaylovun göstərişidir. Mən müdir Sabir Əhmədovun öz xahişimlə ərizə yazıb işdən çıxmağım barədə təklifilə razı olmadığımı bildirdim.

Öncə mən inanmıram ki, cənab “Su və Meliorasiya Təsərrüfatı” ASC-nin sədri Zaur müəllim Sabir Əhmədova göstəriş versin ki, təcili olaraq işçiniz olan Çernobul veteran Aqil Məmmədovun ərizəsi alınsın. Yaxşı olardı ki, Sabir müəllim ixtisarlara idarəyə doldurduğu öz qohum-əqrəba, dost tanışlarından başlayaydı. Və biz də belə şəxsi nümunədən nəticə çıxarıb ərizəmizi yazardıq. Biz zorakılıqla indiki iqtisadi çətin bir vaxtda öz xoşumuzla ərizə yazmadım . Fevralın 24-də təkrar bu barədə yuxarı orqanlara yenidən müraciətimi görən müdir məni 6 mart tarixindən xəbərdarlıq etmədən işdən çıxarmışdır. Bu barədə ƏƏSMN-nin Əmək müfətişliyi mənimlə əlaqə saxlayaraq bildirmişdir ki, belə yanaşmaya görə biz idarəni 1500 manat cərimələyəcəyik. buna görə də mən Çernobul əlili birinci olaraq işdən çıxarıldım. Xatırladım ki, mənim 3 qız övladım olmaqla yanaşı ailəsi başsız qalan və bir xəstə oğlu ilə Şəki rayonun Cumakənd kəndində uçuq bir daxmada yaşayan bacım Məmmədova Nəzakət Sabir qızının da dolanışığına köməklik edirdim. hələ iki il əvvəl onun uçuq damının təmiri üçün yuxarı orqanlara müraciət etmişdim. Bundan sonra Şəki İcra Hakimiyyətindən məni çağırıb 10 dəqiqə nağıl danışıb bildirdilər ki, İcra Hakimiyyətinin kömək etməyə heç bir maddi imkanı yoxdur. Gərək nəzərə alasınız. Kimsə ac bir adam buraya gəlsə bizim ona bir çörək alıb verməyə imkanımız yoxdur. Qəbul zamanı az qaldı ki, cibimdəki qəpik quruşu da İcranın bu bədbəxt məmuruna verib kəndimə qayıdım. Budur, indi məni xüsusi kateqoriyalı adamı işdən çıxarıblar. İndi bilmirəm mən öz ailəmə baxım Yoxsa bir xəstə uşaqla uçuq damın altında yaşayan bacımın ailəsinə. Mən kənddə kimsənin sifarişi əsasında qapısında nökər kimi işləyib, kiməsə tualet quyu qazır, kiməsə daş daşıyır, yer belləyir və s. işlər görüb çörək qazanmağa çalışıram. Amma sağlamlığım get gedə ağırlaşır. 2-3 il yaşasam min şükür. Yaxşı ki, əlil kimi bir az təqüd verirlər.

Ona görə də cənab Prezident Sizdən çox xahiş edirəm ki, mənim 3 qız övladımın olmasını, (ikisi tələbədir) və həyat yoldaşımın da ağır xəstəlikdən müalicə almasını , bacım və xəstə oğluna da maddi yardım etmək məcburiyyətində qalmağımı nəzərə alaraq cənab Zaur mikayılova göstəriş verəsiniz ki, mənim adi bir sürücü kimi idarədə qalmağıma və yenidən işləməyimə şərait yaratsın".

Quba-Xaçmaz Regional Təhsil İdarəsinin müdiri Coşqun Əliyev bir müddət bundan əvvəl Ruslan Rzayev adlı dostunu Quba-Xaçmaz Regional Təhsil İdarəsinə məsul vəzifəyə təyin etdi.
Məlumata görə, təhsillə yaxından-uzaqdan heç bir əlaqəsi olmayan bu şəxsin təhsil idarəsinə işə götürərək təhsilə “böyük qatqı”qatan Coşqun Əliyevin sözügedən bu dostu isə buna qədər süd məhsullarının emalı və satışı ilə məşhurlaşıb.
Uzun illərin dostluğu və xətir-hörmətinə olan sədaqəti isə Coşqun Əliyevin onu bu məsul vəzifəyə təyin etməsinə səbəb olub.
Dost belə olar!
Teodor Ruzveltin belə bir sözü var.
“Təhsilsiz birisi ən çoxu bir vaqonu,universitet məzunu isə bütöv dəmir yolunu oğurlaya bilər.”
Ruzveltin bu məsəlini bilirsiz niyə çəkdik?
Məntiqi bir müqayisə aparmaq zərurəti olmuş olsa Coşqun
Əliyevin yağ-pendir satan bu dostu region təhsilinə nə verə bilər?
Ruslan Rzayev bu vəzifəyə təyin edildikdən sonra idarədə və regionda “mükəmməl” bir davranışla ad-san qazanıb.
Qubaya gəldikdən sonra o gecə saatlarında Qubada yerləşən restoranların birində sərxoş halda dava salıb və polisə düşüb.Amma dostu Coşqun Əliyev dərhal bu məsələyə müdaxilə edərək onu həm polisdən qurtarıb həm də bu hadisənin yayılmasının qarşısını alıb.
Dost həmdə belə olar!
Dost-dosta tən gərək!
Küçə jarqonu ilə söyüşcül dili və bayağı davranışları Ruslan Rzayevin ən simvalik fakturasını təmsil edir.Yüzlərlə pedaqoqun təmsil edildiyi təhsil kimi mədəni və kübar bir struktura belə bir “əfsanə”qaranlıqda parıldayan almasa bənzəyir.

Parıldaya-parıldaya gözlər qamaşdırır.
Dostunu göstər kim olduğunu deyim!

Təhsil hara,süd,qatıq pendir hara ay Coşqun Əliyev…

Bir dana naxırın adını korlayır axı…
Tomas Martinin də belə bir sözü var.
“Bacaran iş görür,bacarmayan dərs verir.Dərs verməyi bacarmayan isə dekan olur.”
Dəyərli məsləhət qızıl qiymətindədir.Dəyərini bilmədiyin hikmətlər isə qıcqırmış iy qoxan yağlı pendir kimidir.
Mövzunu növbəti sayımızda daha isbatlı və təfərrüatlı təqdim edəcəyik.
Qarşı tərəfin mövqeyini dərc etməyə hazırıq.(Yenigundem.az)

Ölkəmizin qida sənayesinin istehsal etdiyi yararsız və zərərli qidalar vətəndaşlarımızın sağlamlığını siradan çıxarır. O üzdən də hansı tibb müəssisəsinə üz tütürsansa onun həndəvərində avtomobil, içərisində isə insan tıxacına düşürsən. 40 yaşdan yuxarı əhalinin qazancının əksər hissəsi tibbi xidmətlərin alınmasına xərclənir. Bunu nəzərə alan bizim büdcə oğruları Bakı şəhərinin hər tinində bir özəl klinika, iki aptek açıb.

Bir dəfə əlimə bir iki yuzlük düşmüşdü. Ətrafda böyük market yox idi. Hansı mağazaya girdimsə, dedilər ki, xırda yoxdu. Axrıncı mağazada satıcı işləyən oğlan dedi ki, əmi aptekə girin, indi onların alveri "xod gedir"... Oğlanın dediyi kimi, balaca bir aptekə girib, əskinası xırdalamağı rica etdim. Gülərüz xanım hələ necə xırda istədiyimi də sorüşdü...

Beləcə həmvətənlərimiz özəl tibb müəssisələrinin və apteklərin biznesini inkişaf etdirmək yolunda əzimlə çalışdırılır. Vətəndaşlarımız ölkədə qazancını əlindən alınması üçün müxtəlif labrintlərə qovulur. Belə labrintlərdən biri də "qida sənayesi-səhiyyə müəssislərı" labrintidir. Qida sənayesi gözəl və parıltılı qablaşdırılmalarda təqdim etdiyi, qəpik-quruşa başa gələn zərərli qidalarla insanların sağlamlığına zərbə vurur. Belə qidaları bazar inhisarçıları həm on qat baha satıb yaxşı qazanc əldə edir, həm də insanları xəstələndirməklə, xidməti bərbad gündə olan özəl tibb müəssisələrinə müştəri "istehsal edir".

Son illər hökumət durumu nəzərə alaraq tibbi sığorta mexanizmi qurmağa başlayıb. Lakin hələ ki, tibbi sığorta nə vətəndaş, nə də həkim məmnunluğunu təmin edə bilmir. Həkim gileylənir ki, sığorta mənə az əmək haqqı hesablayır, vətəndaş da narazıdır ki, həkimlər yenə onlardan zəhmət haqqı umur. Bu məsələnin bir tərəfi, amma vətəndaşlar üçün elə vacib tibbi xidmətlər var ki, o xidmətlər nədənsə hələ də tibbi sığorta paketinə daxi edilmıyib.

Məsələn, onkoloji xəstəliklər dünyada, o cümlədən də ölkəmizdə tüğyan etsə də, bu xidmətlər Azərbaycanda tibbi sığorta paketinə daxil edilməyib. Bundan sui-istifadə edən Milli Onkologiya Mərkəzi isə (MOM) xərçəng xəstələrinə tam olaraq ödənişli xidmət göstərir.

Allah heç kimin güzarını bu xəstəxanaya salmasın, bu yaxınlarda bir qohumumda xərçəng xəstəliyi aşkarlandı. O zaman şahidi olduq ki, MOM-a qeydiyyat belə ödənişlidir - 30 manat. Bizə təqdim edilən digır xidmətlərin qiyməti ilə də oxucularımızı tanış etmək istərdik: MRT müayinəsi - 150 manat; yoğun bağırsağın kolonoskapik müayinəsi - 250 manat; qanın ümumi analizi - 70 manat; rengen müayinəsi - 25 manat; EKT müayinəsi - 30 manat; şüa-terapiya - 1000-1500 manat; kimya-trapiya, hər seansı - 250-600 manat.

Onu da qeyd edim ki, ödənişlərə görə heç bir qəbz verilmir, tələb edəndə də deyirlər ki, bizdə qəbz yoxdur. Qəbz yoxdursa, deməli, ödəniş qeyri-qanunidir! Bu məsələ barədə danışanda MOM əməkdaşları tutuquşu kimi təkrarlayır ki, tibbi sığorta bizim xəstəxanada işləmir. Tibbi sığortanın bu xəstəxanada işləmədiyini başa düşdük, bəs Azərbaycan qanunları necə, MOM-da işləyirmi?! Bizdən soruşsalar, müşahidələrimizə görə "yox" cavabını vermək məcburiyyətində qalırıq. Çünki şahidi olduqlarımız bunu təsdiqləyir.

MOM-un baş həkimi, Səhiyyə Nazirliyinin baş onkoloqu Azad Kərimli yerli mediaya açıqlamasında deyib ki, MOM-da onkoloji xəstələrə bütün xidmətlər ödənişsiz təqdim edilir!

Bununla yanaşı, "Onkoloji yardım haqqında" AZƏRBAYCAN RESPUBLİKASININ QANUNU-nun 4.3-cü maddəsində oxuyuruq: "Azərbaycan Respublikasının vətəndaşı olan onkoloji xəstələrə tibbi yardım dövlət tibb müəssisələrində dövlət büdcəsi vəsaiti hesabına həyata keçirilir".
Qanunun bu qədər aydın yazıldığı halda dövlət tibb müəssəsi olan MOM-da bir pasientə belə ən ucuz xidmət ödənişsiz həyata keçrilmir.

Yeri gəlmişkən, şahidi olduğumuz bir maraqlı nüansı da oxucuların diqqətinə çatdırmaq istərdik. Biz rengen müayinəsində dayananda Səfərbərlik və Hərbi Xidmətə Çağırış üzrə Dövlət Xidməti tərəfindın müayinəyə göndərilmiş çağırışçının valideyini müayyinənin "xidmət haqqı"nı ödəməkdən imtina etdi. Dedi ki, bu adam vətənə xidmətə getmək üçün müayinə edilir, özü də onu dövlət xidməti göndərib, qəpik də ödəməyəcəm. Sonda həkim təkrar xahiş etdi ki, heç olmasa diskin və plyonkanın xərcini ödəyin - 5 manat. Valideyin imtina etdi. Belə olan halda həkim müayinələri dayandırdı və getdi, yuxarı rəhbərliyə məruzə etsin ki, pasientin biri müayyinənin "xidmət haqqını" ödəməkdən imtina edir. Bu məsələ 40 dəqiqəyə qədər vaxt aldı.

Sonda bəlli oldu ki, həm xəstəxanada qirilmuş elektron sistem vasitəsi ilə, həm də müşahidə kameraları ilə bütün müayinə otaqları izələnilir.
İzlənilmə zamanı bütün pasientlər sayılır və günün sonunda həmin saya uyğun olaraq müayinə həkimindən yığdığı pul tələb edilir. Bu isə o deməkdir ki, xəstəxanada rüşvəti əməkdaşlar özbaşına almır, onlar verilən tapşırığı yerinə yetirir.

MOM-da gündəlik rüşvətin həcminə gəldikdə isə təxminlərimizə görə bu yüz min manat civarındadır. Çünki xəstəxananın bütün foeləri gün ərzində adamla dolu, müayinə otaqları isə uzun növbələrlə müşahidə edilir. Bir tərəf yuz min manatlarla pul qazanır, digır tərəf isə yaşamaq uğrunda mübarizə məqsədi ilə pul əldə etməkdən ötrü hər cür vasitələrə əl atır. Çoxları müalicəsini bank krediti hesabına davam etdirir.

Bu il dövlət büdcəsindən dövlət xəstəxanalarının saxlanması üçün 231,5 milyon manata qədər vəsait ayrılıb. Əldə etdiyimiz məlumata görə, bu vəsaitin təxminən 60 milyon manata qədəri MOM-un xərclərinin qarşılanması üçün nəzərdə tutulub. Beləcə, MOM həm qanuni, həm də qeyri-qanuni yolla pul qazanır.//GundemXeber.Az

Ölkənin aparıcı banklarından biri olan “Paşa Bank” ASC “Neon MMMC” MMC (VÖEN – 1600012611) və Caniyev Namiq Rafiq oğlu barəsində məhkəmə iddiası qaldırıb.
Yeniavaz.com xəbər verir ki, məhkəmə iddiası Bakı Kommersiya Məhkəməsinin hakimi Kənan Hüseynovun icraatına verilib. İddia ilə əlaqədar olaraq 15 aprel 2024-cü il saat 11:20-yə hazırlıq iclası təyin olunub.
İddia kredit müqaviləsi üzrə mübahisələrlə əlaqədar qaldırılıb.
Məlumat üçün bildirək ki, “Paşa Bank” ASC-nin barəsində iddia qaldırdığı “Neon MMMC” MMC 1998-ci ildə dövlət qeydiyyatına alınıb. Hüquqi ünvanı Nizami rayonu, Mikayıl Əliyev, ev 17-də yerləşən MMC-nin nizamnamə kapitalı 60 manat təşkil edir. MMC-nin qanuni təmsilçisi Məmmədov Valeh Raqib oğludur.
Qeyd edək ki, uzun illər mətbuatda “Neon MMMC”nin qeydiyyatda olduğu hüquqi ünvanda - Nizami rayonu, Mikayıl Əliyev, ev 17-də fəaliyyət göstərən “Neon Palace” şadlıq sarayının 2016-cı ildə Türkiyədə öldürülən “Lənkəranski” ləqəbli məşhur kriminal avtoritet Rövşən Rafiq oğlu Canıyevin ailə üzvlərinə məxsus olması barədə məlumatlar yayılıb. “Paşa Bank” ASC-nin barəsində iddia qaldırdığı Namiq Caniyev də mərhum Rövşən Lənkəranskinin qardaşıdır.
Namiq Caniyev uzun illər Bakı Baş Gömrük İdarəsinin “Keşlə” gömrük postunun rəisi vəzifəsində çalışıb. Polkovnik rütbəsi daşıyan Namiq Caniyevi 2017-ci ilin noyabr ayında Türkiyənin hüquq-mühafizə orqanları tərəfindən başqa bir kriminal avtoritet – “Lotu Quli” ləqbli Nadir Səlifova qarşı sui-qəsd hazırlığında ittiham edilərək saxlanılıb.

Milli Məclisin sabiq sədri və hazırda millət vəkili olan Oqtay Əsədovun həyat yoldaşı Zemfira Əsədovaya məxsus olan və Rusiyada fəaliyyət göstərən “Arizarum Qrup” şirkətinin (ООО "АРИЗАРУМ ГРУПП" – 7705176856) 2023-cü ildə əldə etdiyi gəlirlər açıqlanıb.
Yeniavaz.com Rusiyanın müvafiq rəsmi qurumlarının açıqladığı məlumatlara istinadən bildirir ki, “Arizarum Qrup” ötən il 14 milyon 270 min rubl (260 min manat) gəlir əldə edib.
Qeyd edək ki, əvvəlki – 2022-ci illə müqayisdə “Arizarum Qrup”un gəliri 2,5% artıb. Ümumiyyətlə son 7 ildir “Arizarum Qrup”un gəlirlərində ciddi dəyişiklik olmur:
2017-ci ildə 14 568 000 rubl,
2018-ci ildə 13 984 000 rubl,
2019-cu ildə 13 919 000 rubl,
2020-ci ildə 13 815 000 rubl,
2021-ci ildə 14 045 000 rubl,
2022-ci ildə 13 924 000 rubl,
2023-cü ildə 14 270 000 rubl.
Məlumat üçün bildirək ki, “Arizarum Qrup” 14 yanvar 1998-ci ildən fəaliyyət göstərir. Hüquqi ünvanı Moskva şəhəri, Bakı küçəsi, ev 29-da yerləşən şirkətin yeganə təsisçisi Əsədova Zemfira Adil qızıdır. Şirkətin direktoru isə Nazarova Larisa Aleksandrovnadır. Nizamnamə kapitalı 10 min rubl olan şirkətin restoran sektorunda fəaliyyət göstərdiyi qeyd olunur.
Onu da qeyd edək ki, Oqtay Əsədovun həyat yoldaşı eyni zamanda Nizami rayonunda yerləşən 175 saylı Körpələr evi-uşaq bağçasının müdiri olub.