Bakıdakı dayanacaq pavilyonlarındakı çatışmazlıqların aradan qaldırılacağı, bəzi dayanacaqların sökülməsi və yenilərinin alınıb quraşdırılması planlaşdırılır.Bakı Nəqliyyat Agentliyi balansında olan dayanacaq pavilyonlarında mövcud olan çatışmazlıqların aradan qaldırılması məqsədilə lazım olan mal, iş və xidmətlərin satın alınması; mövcud bəzi dayanacaqların sökülməsi və quraşdırılması işlərinin satın alınması; habelə, yeni dayanacaq pavilyonlarının satın alınması və quraşdırılması ilə bağlı keçirdiyi tenderi yekunlaşdırıb.
Bununla bağlı cumhuriyyet.az olaraq əldə etdiyimiz məlumata görə tenderin qalibi “SM Construction Supplies” MMC-dir. Bakı Nəqliyyat Agentliyi qalib şirkət ilə məbləği 2 milyon 340 min 394 manat olan müqavilə imzalayıb. 2018-ci ildə dövlət qeydiyyatına alınmış və 88,5 min manat nizamnamə kapitalı olan “SM Construction Supplies” MMC-nin qanuni təmsilçisi Ehtiram Heydərlidir.
İqtisadiyyat Nazirliyi yanında Dövlət Vergi Xidmətinin reyestr məlumatlarına əsasən “SM Construction Supplies” MMC 20 avqust 2018-ci ildə dövlət qeydiyyatına alınıb. Nizamnamə kapitalı 10 AZN olan şirkətin hüquqi ünvanı Bakı şəhəri Nəsimi rayonu, Cavadxan küçəsi, ev 70, mənzil 19-da yerləşir. MMC-nin qanuni təmsilçisi isə Heydərli Ehtiram Etibar oğludur.
Məsələ ilə bağlı cumhuriyyet.az olaraq apardığımız araşdırmalar zamanı MMC-ilə bağlı yalnız Koronavirusla Mübarizə Fonduna 500 AZN köçürməsi barədə məlumata rast gəldik. Şirkətin qanuni təmsilçisi Ehtiram Heydərliyə gəlincə, onun adı iki məhkəmə çəkişməsində keçir. Bunlardan biri Novruzov Azad Pərviz oğlunun avtomobilin geri alınması, digəri isə “Bank Standart”ın kredit müqaviləsi üzrə yaranmış borcun ödənilməsi tələbi əsasında baş tutan məhkəmə işidir. Ehtiram Heydərli hər iki işdə cavabdeh qismində çıxış edir. Birinci işdə iddia təmin edilsə də, ikincidə baxılmamış saxlanılıb. //cumhuriyyet.az//

Ekologiya və Təbii Sərvətlər Nazirliyinin 8 saylı Regional Ekologiya və Təbii Sərvətlər İdarəsində məsləhətçi-müfəttiş vəzifəsində çalışan Əfqan Paşayev qanunsuz olaraq işdən çıxarıldığını deyir.

Əfqan Paşayev Qaynarinfo-ya ünvanladığı müraciətdə bildirir ki, 2021-ci ilin oktyabrında idarə rəisinin tapşırığı ilə onun rəhbərliyi altında qanunsuz ov edənlərə qarşı reyd keçirilib.

"Reyd zamanı qanunsuz ov edən 4 ovçunu tutduq. Onlar barəsində akt tərtib edildi. Həmin vaxt Ekologiya və Təbii Sərvətlər Nazirliyinin Daxili Nəzarət və Audit İdarəsinin sektor müdiri Samir Kərimov bizimlə əlaqə saxlayaraq, ovçulardan birinin onun qohumu olduğunu bildirdi və həmin şəxsin buraxılmasını tələb etdi. Biz bu barədə idarəyə məlumat verdik. İdarədən isə bildirildi ki, heç kim buraxılmasın və tutulanların hər birinin barəsində akt tərtib edilsin. Biz də təbii ki, bu tapşırığa əməl etdik”, deyə Əfqan Paşayev yazır.

Onun sözlərinə görə, dekabr ayında Samir Kərimov onun işlədiyi idarəyə gəlib: "Gəlib mənim yazdığım sənədlərə baxdı, amma hər hansı nöqsan tapa bilmədi. Sonra bizi, idarənin müdiri Şahin Əliyev, mən və reyddə olan iki əməkdaşı çay içməyə dəvət etdi. Çay süfrəsi arxasında isə məni hədələdi ki, sözümə əməl etmədiyinə görə başına oyun açacağam”.

Əfqan Paşayev deyir ki, 2022-ci ilin fevral ayında idarəyə audit yoxlaması gəlib: "Yoxalamaya gələnlər Samir Kərimova yaxın adamlar idi. Başa düşdüm ki, bu şəxslər Samir Kərimovun göstərişini yerinə yetircəcək. Yoxlama bitdikdən sonra soruşduq ki, monitorinq işçiləri üçün hər hansı problem yoxdur ki? Cavab verdilər ki, xeyr. Bundan sonra məni və daha 3 nəfər işçini nazirliyə çağırıb öz ərizəmizlə işdən çıxmağı tələb etdilər. Dedilər ki, əks təqdirdə maddə ilə işdən çıxarılacaqsınız. Biz də təbii ki, öz ərizəmizlə işdən çıxmağa razılaşmadıq. Aprel ayında əmr gəldi və məlum oldu ki, 3 nəfər işdən çıxarılıb. Bir nəfər isə tapşırıq əsasında işində qalıb. Bizim işdən çıxarılmağımız isə guya vəzifəmizin öhdəsindən gələ bilməməyimizlə əsaslandırılıb. Bu, tamamilə əsassızdır. Ekologiya və Təbii Sərvətlər Nazirliyinin Hüquq və İnsan resursları şöbəsinin müdiri Aynurə Kərimova yoxlama zamanı üzə çıxan nöqsanları ört-basdır edib. Burada bizim nöqsanlarımızdan söhbət getmir. Bəzi işçilərin nöqsanları olub. Amma nöqsanı olmayan bizlər işdən çıxarılmışıq, olanlar qalıb. Bu barədə Aynurə Kərimovaya da müraciət etmişik. Amma heç bir cavab yoxdur. Bu, Samir Kərimovun bizə qərəzinin nətəcisidir. Bizə idarədən nə tapşırılıbsa, onu da etmişik. Mən 90-a yaxın qanun pozuntusu aşkarlamışam. İdarədə qanun pozuntuları aşkarlamaq üzrə üçüncü yerdəyəm. Amma bu faktlar gizlədilib, Samir Kərimovun tapşırığı ilə qərəzli akt tərtib edib. Faktiki olaraq cənab naziri aldadıblar, saxtakarlıq ediblər”.

Qaynarinfo məsələ ilə əlaqədar Ekologiya və Təbii Sərvətlər Nazirliyinə müraciət edib. Nazirlikdən məsələdən araşdırılacağı və məlumat veriləcəyi bildirilib.

Qaynarinfo

Millət vəkillərinin özəl sahibkarlıq fəaliyyəti ilə məşğul olması birmənalı şəkildə qadağandır. Ölkə Konstitusiyasının 89-cu maddəsinin 4-cü bəndində konkret olaraq göstərilir ki, Azərbaycan Respublikası Milli Məclisinin (MM) deputatı sahibkarlıq, kommersiya və başqa ödənişli fəaliyyətlə məşğul olduqda (elmi, pedaqoji və yaradıcılıq fəaliyyəti istisna olmaqla) mandatından məhrum edilir. Buna baxmayaraq, Milli Məclisdə mandat sahibi olan deputatların bir qismi bizneslə məşğul olur.
Onların biznesi haqda Milli Məclis rəhbərliyi məlumatlı olsa da, qanun səviyyəsində heç bir tədbir görülmür və hansısa səbəblərə görə biznesmen deputatlara güzəşt olunur. Yəni ölkə təcrübəsində bu vaxtadək bizneslə məşğul olan deputatın mandatının əlindən alındığını görməmişik. Məhz bundan arxayın düşən bəzi millət vəkilləri sahibi olduqları biznes şəbəkəsini daha da genişləndirirlər. Parlamentin biznesmen deputatlarından biri də son parlament seçkilərində 97 saylı Goranboy-Ağdam-Tərtər seçki dairəsindən mandat sahibi olmuş Vəliyev Ağalar İsrəfil oğludur. Bu yazımızda cumhuriyyet.az olaraq Ağalar Vəliyevin özü və biznesi ilə bağlı media üzərindən geniş araşdırma apardıq.
A.Vəliyevi ictimaiyyət millət vəkilindən daha çox iş adamı və “Azəraqrartikinti” ASC-nin rəhbəri kimi tanıyır. Mətbuatın monitorinqi göstərir ki, Ağalar Vəliyevi də Milli Məclisin ən qalmaqallı və qanunverici orqana nüfuz gətirməyən deputatlarından biri hesab etmək olar. Deputatla bağlı “Google” beynəxalq axtarış şəbəkəsində cumhuriyyet.az olaraq apardığımız qısa araşdırma zamanı qarşımıza çıxan ilk xəbər başlıqları belədir:
“Villası ilə Prezident Sarayını kölgədə qoyub, akvariumunda delfin saxlayan “Alabala”- Ağalar Vəliyev”(Yenicag.az); “Millət vəkili Ağalar Vəliyev Eldar Mahmudovun “toru”na necə düşüb?”(miq.az); “Ağalar Vəliyevin biznes gizlinləri, villası və mandat “legitimliyi” – ARAŞDIRMA”(arqument.az); “Deputat Ağalar Vəliyev şirkətində “şpion” axtarır”(liderinfo.az); “Ağalar Vəliyev bir ailənin faciəsinə səbəb ola bilər…”(bakunews.az); Deputat Ağalar Vəliyev yaralı tankçıya baş çəkib(azpolitika.info); “İcra başçısıyla deputat arasında qalmaqal – 4 hinduşkaya DSK sədri postu?” (aznews.az).
Ağalar Vəliyev susmaq üçün mandat alıb?

Milli Məclisin İqtisadi siyasət, sənaye və sahibkarlıq komitəsinin sədr müavini, deputat Ağalar Vəliyev son 10 il ərzində Milli Məclisin neçə iclasında iştirakı bizim üçün təəssüf ki, qaranlıq qalıb. Lakin cumhuriyyet.az olaraq bizi maraqlandıran məsələlərdən bəzilərinə parlamentimizin stenoqramlarından cavab tapa bilmişik. Yəni, “Azəraqrartikinti” ASC sədrinin parlament müzakirələrində iştirakının statistikasını müəyyənləşdirə bilmişik. Həmin statistikaya diqqət yetirib uyğun nəticəyə gəlmək heç də çətin deyil. Elə buradaca qeyd edək ki, bu açıqlamalarla heç də Ağalar müəllimin işgüzar nüfuzunu aşağılamaq fikrində deyilik. Lakin əlahəzrət həqiqətdən də qaçmaq olmur. Burada söhbət deputatın Azərbaycan parlamentinə sayğısının güzgüsünə çevrilmiş fəaliyyətindən gedir. Milli Məclisin iclaslarında demək olar ki, danışmayan millət vəkilinin sessiya və iclaslarda iştirakının nə mənası var? “Azəraqrartikinti” ASC-nin rəhbəri və onun kimi danişmayan biznesmen deputatlar öz rəhbərliyindəki qurumun işləri ilə məşğul olsa daha yaxşı olmazmı? Bu gün “Azəraqrartikinti” Açıq Səhmdar Cəmiyyətinin görüləsi o qədər işləri var ki…
Milli Məclisin deputatı Ağalar Vəliyev IV çağırış MM-in 2010-2015-ci illər ərzində keçirilən ümumilikdə 103 iclasından yalnız 2-də danışıb. Dördüncü çağırış MM-in 23 dekabr 2011-ci il tarixli IV sessiyasında Şəhərsalma və Tikinti Məcəlləsinin layihəsi haqqında müzakirələrdə çıxış edib. Deputat 2-ci çıxışını 12 iyun 2012-ci il tarixli VI növbədənkənar sessiyada Şəhərsalma və Tikinti Məcəlləsinin layihəsi haqqında (ikinci oxunuş) müzakirələrə qatılarkən irad edib. Bundan tam 5 il sonra 2016-cı il dekabrın 7-də biznesmen deputat bir daha “şeytanın qılçını sındıraraq” Milli Məclisin plenar iclasında “Azərbaycan Respublikasının 2017-cı ilin dövlət büdcəsi haqqında” Qanun layihəsinin müzakirəsində çıxış edib.

Millətin, yoxsa biznesin vəkili?

Qazancı danışmaqdan üstün tutan Ağalar Vəliyev gerçəkdən oliqarx imici formalaşdırmağa nail oldu. Dövlət sifarişləri əsasında ucaltdığı obyektlərlə həm özü ucaldı (ordenlə), oliqarxa çevrildi, həm də özünə milyonlarla manat dəyərində möhtəşəm və dünyada analoqu olmayan saray kompleksi ucaltdı. Unutmayın, bu ucalıqlarda gündə 10-15 manata bir qarnı ac-biri tox qeyri-rəsmi çalışan yüzlərlə, bəlkə də minlərlə qara fəhlənin alın təri var. Vergi orqanlarında və dövlət əmək müfəttişliyində çalışan mütəxəssislər “Azəraqrartikinti” ASC-nin hesabatlarına nəzər saldıqda, bu qurumun dövlət sifarişləri əsasında yerinə yetirdiyi çoxsaylı tikinti və təmir işlərinin belə deyək, bir ovuc inşaatçının əli ilə reallaşdırılmasını az qala möcüzə kimi qəbul ediblər. Əlbəttə. bizə çatan məlumata görə dəfələrlə bu məsələ ilə bağlı Ağalar Vəliyevə ciddi iradlar da olub. Lakin…Buradan da deputatlığın ona nə üçün lazım olduğunu ehtimal etmək çox da çətin deyil. Hər halda, büdcə yeyintilərinin zığ verdiyi işin içindən iş çıxanda millət vəkilliyinin sanbalı ortaya çıxır. “Azəraqrartikinti” ASC-nin sədri belə situasiyalarla az üzləşməyib. Onun dövlət vergi orqanları ilə uzun sürən çəkişmələrini xatırlayın.

O istəsə danışa bilər, amma…

Bütün yuxarıda sadalananlar o nəticəyə əsas vermir ki, A.Vəliyevin siyasi savadı və natiqlik qabilliyyəti çıxış etməyə imkan vermir. Əsla belə deyil. Məsələ burasındadır ki, biznesmen deputatımızın qalmaqallı çıxışları haqda da ilginc iddialar var. Bununla bağlı cumhuriyyet.az olaraq mediada yer alan və deputatın özü tərəfindən rəsmən təkzib olunmayan məlumatı olduğu kimi diqqətinizə çatdırırıq: “MTN İşi” ilə bağlı prosesə diqqət edəndə Eldar Mahmudovun və dəstəsinin iş adamları, məmurlarla yanaşı hətta Milli Məclis üzvlərini belə şantaj edərək, onların pulunu almaları faktı üzə çıxmaqdadır. Belə deputatlardan biri də iş adamı kimi tanınan Ağalar Vəliyev olub. “Azəraqrartikinti” Səhmdar Cəmiyyətinin idarə heyətinin sədri vəzifəsini tutan, həmçinin, Bakının bir çox məkanlarındakı “Kristal Abşeron” adlandırılan yaşayış binalarını inşa etdirən Ağalar Vəliyev MTN-nin “toruna” 2013-cü ildə düşüb. Saytımızı bilgiləndirən mənbənin sözlərinə görə, Ağalar Vəliyev MTN tərəfindən özünün səsyazı ilə “vurulub”. Belə ki, yaxın ətrafı ilə bir məclisdə hökumətin sahibkarlara olan münasibətindən gileylənən iş adamının səsi yazılıb. Həmin səs yazısında Ağalar Vəliyev sətiraltı ifadələrlə bir sıra tənqidlər səsləndirib. Onu MTN-nə dəvət edərək, həmin səsyazısı qarşısına qoyulub və “müxalifətçi” ittihamı irəli sürülüb. Bu fakt qarşısında təslim olan deputatın 1 milyon pulu əlindən alınıb. Bundan başqa “Kristal Abşeron” yaşayış binalarının aşağı mərtəbəsində bir neçə obyekt yeri və mənzil də MTN rəhbərliyinə “hədiyyə” edilib. Araşdırmamız zamanı Ağalar Vəliyevin MTN-dən zərərçəkən statusu ilə bağlı prokurorluğa şikayət etmədiyi də bəlli olub. Görünür, Ağalar Vəliyev özünün “siyasi səhvi” səbəbindən “ilişdiyindən” bu məsələnin arxasına getməkdən imtina edib.

Deputatın “Kristal Abşeron”unda baş verənlər

Ağalar vəliyevin biznesinə “Kristal Abşeron” MMC də daxildir. Belə ki, bu şirkətin təsisçisi Tovuzdan olan iş adamı Məhayət Nəbiyevdir. Şirkətin qeyri-rəsmi sahibi isə deputat Ağalar Vəliyevdir. Bununla bağlı cumhuriyyet.az bildirir ki, millət vəkilinin “krişalıq” etdiyi sözügedən şirkət Xırdalanda binalar inşa edib. Bu firmadan mənzil alanlar isə sözün əsl mənasında peşman olublar. Çünki alqı-satqı müqaviləsində məzənnəyə uyğun kredit ödənişi edilməsi bəndi yer alıb. Bu da 2015-ci ildəki 2 devalvasiyadan sonra payçıları müflis edib. Onlar dollarla kredit ödəməyə məhkum olunub.

Məsələn, 50 kvadratlıq mənzil 110 min manata başa gələcək. Sakinlərin isə dərdinin üstünə təzə dərd gəlib. Belə ki, “Kristal Abşeron” özəl müəssisə olduğu üçün qazın qiyməti qeyri – əhali kateqoriyası üzrə hesablanır. Şirkət istiliyin qiymətini 40 qəpikdən 70 qəpiyə qaldırıb. Şirkət indiyə qədər qazanxanaları “Azəristiliktəchizat” ASC-yə təhvil verməyib. Bu da azmış kimi, keçən aydan etibarən istilik 70 qəpikdən 80 qəpiyə qaldırılıb. İndi 50 kv mənzili olan sakin hər ay təkcə istiliyə 40 manat ödəniş etməlidir. İsti suyun kubmetri isə 2 manat 30 qəpikdən 3 manat 50 qəpiyə qaldırılıb. Dövlət suyu əhaliyə 50 qəpikdən satır, “Kristal Abşeron” isə od qiymətinə… Sakinlərin dediyinə görə, yaxın günlərdə Prezident Administrasiyasının qarşısına toplaşacaqlar. Onlar şirkətin soyğunçuluğundan şikayət etməyə hazırlaşırlar.

Dəniz kənarında çoxqübbəli villa

A.Bayramov ilə bağlı cummuriyyet.az olaraq media üzərindən apardığımız araşdırmalar zamanı daha bir maraqlı fakta rast gəldik. Belə ki, Ağalar müəllimin bir villasının görüntüləri da yayılıb. Həqiqətən də, Bakının Novxanı kəndi ərazisində ucaldılmış, gozəllikdə tayı-bərabəri olmayan bu çoxqübbəli villanin dəyəri milyonlarla ölçülür. Ümid və inamla ehtimal etmək olar ki, Ağalar Vəliyevin bu sənət əsəri büdcə vəsaitləri hesabına başa gəlməyib. Qeyd edək ki, bu bənzərsiz layihənin özəlliklərindən biri kimi villadan dənizə yeraltı tunel cəkilməsi ehtimalını söyləmişdik. Deyilənə gorə, millət vəkilinin dəniz sahilində yeraltı akvarium yaratmaq istəyi onun uşaqlıq arzusu olub.

Bəzi məlumatlara görə, akvariumda yerləşdirmək üçün dünya okeanında balina və delfin axtarışları gedir. Əldə etdiyimiz bu ilginc informasiya öz-özlüyündə ona görə maraq doğurur ki, “Azəraqrartikinti” ASC son bir neçə ildə büdcə vəsaitləri hesabına daha çox təmir-tikinti işləri aparan təşkilatlardan biri kimi ölkənin ən iri vergi ödəyiciləri sırasında yer alır. Ağalar Vəliyevin ortaqlıq etdiyi tikinti şirkətlərindən bəziləri ilə hesablaşmaqdan imtina etdiyi barədə gəzən söz-söhbətləri də nəzərə alsaq, hörmətli millət vəkilinin çoxqübbəli villasının tikintisinə hansı mənbələrdən vəsait əldə etməsi barədə müəyyən qənaətə gəlmək olar. Milli Məclisə ara-sıra şok hesabatları ilə gundəmdən düşməyən Hasablama Palatası deputat Ağalar Vəliyevin prezident sarayı ilə müqayisə edilə biləcək çoxmilyonluq mülkününün nəyin hesabına başa gəldiyini aşkarlaya biləcəkmi?

“Mənim bütün biznesim qanunidir”Jurnalistlərin “millət vəkilləri özəl sahibkarlıqla məşğul ola bilməz” replikasına cavab verən Ağalar Vəliyev deyib: “Fəaliyyətim tam qanunidir, qanunsuz heç bir şey yoxdur. Mən Səhmdar Cəmiyyətin təsisçisiyəm. Ora özəl qurumdur. Mən rəhbər yox, təsisçiyəm, oranın icraçı direktoru var, biznes sahəsi ilə məşğul olan adam var, mən sadəcə millət vəkilliyimlə məşğulam”. Ağalar Vəliyevə cumhuriyyet.az olaraq həmin qanunu bur daha xatırladırıq. Azərbaycan Respublikası Konstitusiyasının 85-ci maddəsinin II hissəsi: II. İkili vətəndaşlığı olan, başqa dövlətlər qarşısında öhdəliyi olan, icra və ya məhkəmə hakimiyyəti sistemlərində qulluq edən, elmi, pedaqoji və yaradıcılıq fəaliyyəti istisna olmaqla, başqa ödənişli fəaliyyətlə məşğul olan şəxslər, din xadimləri, fəaliyyət qabiliyyətsizliyi məhkəmə tərəfindən təsdiq edilən, ağır cinayətlərə görə məhkum olunmuş şəxslər, məhkəmənin qanuni qüvvəyə minmiş hökmü ilə azadlıqdan məhrumetmə yerlərində cəza çəkən şəxslər Azərbaycan Respublikasının Milli Məclisinə deputat seçilə bilməzlər. “…elmi, pedaqoji və yaradıcılıq fəaliyyəti istisna olmaqla, başqa ödənişli fəaliyyətlə məşğul olan şəxslər… Azərbaycan Respublikasının Milli Məclisinə deputat seçilə bilməzlər.” //cumhuriyyet.az//

Atalar deyib ki, yüz dəfə eşitməkdənsə, bir dəfə görmək yaxşıdı.

Biz də qərara gəldik ki, "Ziraat Bank”dakı kadr dəyişikliyi ilə bağlı ilkin mənbəyə, yəni bankın Ziraatbank.az saytına nəzər salaq.

Deməli, saytın yazdığına görə, 2021-ci ilin 20 iyun tarixində bankda ciddi kadr dəyişikliyi baş verib. Ziraatbank.az saytı yazır: Bankdaxili rotasiyalar ilə bağlı bankımızın rəhbərliyində yeni təyinatlar baş tutub. Belə ki, dəyişikliklərə əsasən Dr. İlker Met Müşahidə Şurasının sədri, Dr. Selçuk Demir isə İdarə Heyətinin Sədri vəzifələrinə təyin edilib.

Yeni təyinatlarla bağlı bankdaxili tədbir keçirilmiş və İdarə Heyətinin yeni sədri ilə komanda tanış olmuşdur. Tədbirdəki uzun çıxışları və bəy tərifini, bankın xidmətləri ilə bağlı "dejurnı” çıxışları dərc etməyə nə həvəsimiz var, nə də oxucunu yormaq istəmirik.

Ona görə də konkret olaraq saytın Səlcuq Dəmirlə bağlı yazdığını dərc edirik: Dr.Selçuk Demir bank sahəsində zəngin təcrübə və yüksək işgüzar nüfuza malikdir. Anadolu Universitetinin Biznesin İdarəedilməsi, İstanbul Ticarət Universitetinin Beynəlxalq Bankçılıq və İstanbul Universitetinin İqtisadiyyat bölmələrinin məzunudur. İqtisad üzrə fəlsəfə doktorudur. Ziraat Bank komandasına 2001-ci ildə qoşulmuşdur. Fərqli illərdə Ziraat Bank-ın müxtəlif filiallarının müdiri, qrup rəhbəri, bölgə koordinatoru vəzifələrində çalışmışdır.

Son olaraq Ziraat Bank İstanbul-1 Bölgə Müdiri vəzifəsində fəaliyyət göstərmişdir. Onu da qeyd edək ki, Ziraat Bank Səhmdarlarının Ümumi Yığıncağının qərarına əsasən Ziraat Bank Azərbaycanın Müşahidə şurasında da dəyişikliklər baş vermişdir.
Belə ki, Müşahidə Şurasının sədri Bilgehan Kuru öz vəzifələrini Dr.İlker Mete təhvil vermiş, Tahir Demirkıran və Zaffer Aydını isə Altan Güler və Kemalettin Bayat əvəz etmişlər.

Qeyd edək ki, Dr. İlker Met həmçinin İnsan Resursları üzrə Ziraat Bank-ın Qrup Rəhbəridir. Dr.İlker Met ilə bağlı araşdırmamızı sonraya saxlayaraq diqqəti Səlcuq Dəmirin fəaliyyətinə yönəldək. Ötən yazılarımızın birində qeyd etdiyimiz kimi "Ziraat Bank Azərbaycan” ASC-nin İdarə Heyətinin yeni sədri Səlcuq Dəmir bankı özünün şəxsi "obyekti”nə çevirib.

Belə ki, redaksiyamıza daxil olan məlumata görə, Səlcuq Dəmirin siqaret, gündəlik yeyib-içmək pulundan tutmuş ailəsinin xərclərinə qədər hamısını bankın hesabına ödəyir. Bütün bunlar azmış kimi Səlcuq Dəmir şənbə və bazar günləri müxtəlif xanımlar üçün bahalı ziyafətlər təşkil edir. Ki, bunun da xərcləri Ziraat Bank tərəfindən ödənilir.

Məlumdur ki, xarici səfərlər zamanı Hava limanında VİP keçidlər olur ki, bu da ödənişlidir. Səlcuq Dəmirin nəinki özünün, həm də ailə üzvlərinin xarici səfərləri zamanı VİP üçün ödənişlər Ziraat Bankın hesabından ödənilir. Bankın özündən daxil olan başqa bir məlumatdan bəlli olur ki, Səlcuq Dəmir bankın hesabına özü üçün 650 manat dəyərində YASTIQ alıb və evində istifadə edir. Belə yerdə deyirlər ki, yastığın ağır olsun… Əgər Mərkəzi Bank, yaxud Vergilər Nazirliyi Ziraat Bankda yoxlama apararsa, bizim yazdıqlarımızın təsdiq olunacağına əsla şübhəmiz yoxdur. Bankın rəhbəri işlədiyi 1 il müddətində Səlcuq Dəmirin kollektiv arasında sanki Don Juan kimi tanınması da əsl biabırçılıqdır. Səlcuq Dəmirin qardaş Azərbaycanda, müsəlman bir ölkədə etdiyi bu işlər heç bir əndazəyə sığımır. Bəs harada qaldı, "İki millət bir dövlət” şüarı, ay Səlcuq əfəndi..? Siz bu hərəkətlərinizlə Türkiyə-Azərbaycan dostluğuna qara kölgə salırsınız.

Qarabağ savaşında Türkiyə-Azərbaycan əsgərləri çiyin-çiyinə vuruşanda, əsgərlərimiz şəhid olanda, sən Bakıda eyş-işrət məclisləri təşkil edirdin. Elə bilirsən ki, Cema xanımla, Dərya xanım Bıçaqçı ilə, Şəms adlı xanımla, Şərəf xanımla, Günel xanımla "oynadığın” oyunlardan cəmiyyətin xəbəri yoxdur..?
"Bunlar mənim özəl həyatımdır” deyib yaxanı çəkə bilərsən. Bəs, proqramist Sadiq Axundovun vasitəsilə bankın proqram təminatları üçün yüz minlərlə vəsaiti mənimsədiyini hara yazaq..?
Bu yaxınlarda bankın konfrans zalı üçün 10 min manat dəyərində olan manitoru 40 min manata sənədləşdirməyini hara yazaq..?

Hələ bu harasıdır..? Səlcuq Dəmir öz şəxsi geyimləri üçün lazım olan kimyəvi təmizləmə maddələrinə 3 min manat pulu bankın hesabından silib. Və bu pulu qonaqların ziyafət xərci kimi "oformit” edib.
Ən dəhşətlisi odur ki, Səlcuq Dəmir müxtəlif toplantılarda müxtəlif şəxslərin barəsində hər cürə hədyanlar, rüsvayçı sözlər danışır. Sonda onu da qeyd edək ki, "Ziraat Bank”da aparılan son araşdırmalar zamanı Hüquq Mühafizə Orqanlarında banka qarşı 300 min manat mənimsəmə ilə bağlı cinayət işi başlanılıb.

Səlcuq Dəmirin Azərbaycan xalqının ünvanına dediyi təhqiramiz ifadələri isə ona bağışlamaq olmaz. Biz qardaş Türkiyənin Azərbaycandakı səfirliyindən xahiş edirik ki, iki qardaş millətin birliyinə ləkə salan Səlcuq Dəmirçinin fəaliyyəti ciddi nəzarətə götürülsün.

P.S. Biz əminik ki, həm Türkiyə səfirliyi, həm də Türkiyə dövləti onlara ünvanladığımız rəsmi məktubları cavabsız qoymayacaqlar. //Gundelik-baku.org//

Bildiyimiz kimi 1 noyabr 2022-ci il tarixində Dövlət Təhlükəsizlik Xidmətinin (DTX) əməkdaşları Mədəniyyət Nazirliyində əməliyyat keçirdi. Əməliyyat zamanı nazirin birinci müavini Elnur Əliyev başda olmaqla bir neçə vəzifəli şəxslər saxlanıldı. Özü də həmin şəxslərin əksəriyyəti Anar Kərimovun əmri ilə vəzifəyə təyin edilən şəxslər idi.

Xatırladaq ki, bundan əvvəl - 2020-ci ilin may ayının 8-də də DTX Mədəniyyət Nazirliyində əməliyyat aparmışdı. O zamanlar da aşkar olunmuş ciddi nöqsanlara və yeyintiyə görə Sabiq nazir Əbülfəz Qarayev başda olmaqla, bir neçə vəzifəli şəxslər işindən azad edilmişdir. 2021-ci ilin yanvar ayına qədər isə nazir vəzifəsini birinci müavin əvəz edirdi. 2021-ci ilin yanvar ayının 5-dən bugünə qədər isə prezidentin imzaladığı sərəncama əsasən, nazir kürsüsünə Anar Kərimov əyləşib. 2021-ci ilin sentyabr ayından bəri də Anar Kərimovun birinci müavini vəzifəsini Elnur Əliyev icra edirdi. Bu ilin noyabr ayının 1-də DTX yenidən əməliyyat keçirdi. Bu dəfə də birinci müavin və digər bir neçə vəzifəli şəxslər saxlanıldı.

Baxın!
Birinci əməliyyat zamanı aşkar edilmiş nöqsanlara görə Nazir vəzifəsindən azad edilir və onu birinci müavin əvəz edir. İkinci əməliyyat zamanı yenə də nöqsanlar aşkar edilir, bu dəfə isə birinci müavin saxlanılır, nazirə "gözün üstə qaşın var". deyən olmur.

Maraqlıdır, əgər bütün bu yeyinti və digər nöqsanların başında nazir özü durursa, yəni rəhbər məsuliyyət daşıyırsa, o zaman Anar Kərimov niyə həbs edilmədi, yaxud işindən azad edilmədi?

Əməliyyatdan belə rahatlıqla yaxa qurtaran Anar Kərimovun deyəsən "sehirli çırağı" var. Amma, nağıllarda deyilir ki, o çıraqlardakı cin yalnız "3 arzunu yerinə yetirir". Odur ki, hörmətli Anar Kərimovun bir şansı artıq, xərcləndi. Mədəniyyət sahəsindəki korrupsiya və özbaşınalıqlar davam etdikcə, bu cür 2-ci, 3-cü, 4-cü dalğalar da qaçılmazdır yəqin ki...

Kənardan baxıb, yalnız "oxuyub-oynamaq" gördüyümüz bu sahədə problem olmadığını düşünür adam. Amma, dərindən araşdırdıqda bəlli olur ki, əslində ən çox problem - korrupsiya, saymazlıq, "ödənişli hörmət" və sair hamısı Mədəniyyət Nazirliyində mövcuddur.

Bu arada bir haşiyəyə çıxmaq yerinə düşər.
Demək, Bakıda yaşadığımız üçün bizi özünün "yuxarıdakı adamı" hesab edən uzaq tanışlardan biri ötən il zəng edib, işinin düşdüyünü dedi. Qeyd edək ki, həmin tanış rayonlardan birinin mədəniyyət evinin müdiridir. Bizə düşən işi isə bu idi ki, deyir "Regional Mədəniyyət idarəsinə müdir yeri boşdur, ora 4.000 (dörd min) manat istəyirlər, mənim də əlimdə 2.000 (iki min) manat var, ona da yaxın durmurlar. Bəlkə siz desəniz o qədərlə də məni ora müdir götürərlər". Bu saf tanışımız daha bilmir ki, onlar hamısı jurnalist görəndə "qanadsız mələk" olurlar, pula yaxın durmurlar və hətta, "Vallah bizlik deyil, ora təyinatı birbaşa nazirlik özü verir" deyirlər.

Yox biz tanışın sözünü eşidib, ora ağız açmadıq. Sadəcə bu cür cavablar standart olduğu üçün dedik.

Yəni, sözümüzün canı o ki, Mədəniyyət naziri Anar Kərimov korrupsiya və digər nöqsanlara görə işindən azad edilən Əbülfəz Qarayevin yoxluğunu hiss etdirmir sağolsun.

Mədəniyyət nazirliyinə dövlət büdcəsindən ayrılan bu qədər milyonlara rəğmən, bölgələrin əksəriyyətində mədəniyyət evləri bərbad, baxımsız vəziyyətdədir. Yalnız bayram tədbirlərində (o da həmişə yox) məktəblilərin tədbirləri keçirilir vəssalam. Rayon mərkəzi kitabxanaları, rayon mədəniyyət evləri təmirsiz, bərbad gündə, kənd klubları da yox kimi. Amma, maraqlıdır ki, bütün rayonlarda, kəndlərdə mədəniyyət işçisi olaraq maaş alanlar var. Özü də bu adamlar xadimlərindən tutmuş, müdirinə qədər heç də təsadüfi adamlar deyil. Məsələn, ötən həftə "DogruXeber.az" informasiya agentliyinin tabeçiliyində fəaliyyət göstərən "Kanal14" YouTube kanalımızda yayımlanan "Kamalın zamanı" proqramı ilə canlı bağlantı yaradan Xaçmaz rayon Çılğır kənd sakini İlyas Ramazanov deyir, "Çılğır kəndində mədəniyyət klubunun qapıları həmişə bağlıdır. Heç bir fəaliyyət göstərmir. Xadiməsi də, işçiləri də hamısı Xaçmaz rayon İcra Hakimiyyətində İctimai-siyasi və humanitar məsələlər şöbəsində baş məsləhətçi Yaqut Məsimovanın bacıları və yaxın qohumlarıdır". Yaqut xanım məmurdur və yenə də dövlət büdcəsindən maaş alanlar da məmur yaxınları.

Bu hər yerdə, hər sahədə belədir. Hətta, ümumiyyətlə mədəniyyət klubunun binasının belə mövcud olmadığı kəndlər var ki, orada da mədəniyyət klubunun xadimə və digər işçiləri var, o da yalnız kağız üzərində. Bir sözlə rayon mədəniyyət evlərində "ölü canlar" saxlanılır.

Təbii ki, bu qədər qanunsuz işlər görməyə tək bir adam risk etməz, ən azından bir dayağı olmalıdır. "Dayaqların dayaqları" da zəncirvari olaraq, həmişə rəhbərə qədər uzanır. Odur ki, sözügedən sahənin "gözüqıpığ" nümayəndələrinin "hörmətli nazirin bundan xəbəri yoxdur" cümləsi tamamilə yersizdir.

Mövzuya yenidən və daha detaylı şəkildə qayıdacağıq.

Redaksiyamız hər kəsin söz haqqını tanıyır.

DogruXeber.az

Ağdamın işğaldan azad edilməsindən 2 il ötür.

Azərbaycan Ordusunun 2020-ci il sentyabrın 27-də başladığı əks-hücum əməliyyatı 2020-ci il noyabrın 9-da başa çatıb.

Azərbaycan Ordusu 44 günlük Vətən müharibəsində ümumilikdə 300-dən çox yaşayış məntəqəsini, həmçinin Ağdərə, Murovdağ və Zəngilan istiqamətlərində mühüm strateji yüksəklikləri işğaldan azad edib.

Noyabrın 8-də Şuşanın işğaldan azad edilməsi ilə müharibədə məğlub olduğunu anlayan Ermənistan məcburiyyət qarşısında qalaraq kapitulyasiya aktına imza atıb.

Noyabrın 10-da Azərbaycan Prezidenti İlham Əliyev, Rusiya Prezidenti Vladimir Putin və Ermənistanın Baş naziri Nikol Paşinyan arasında Bəyanat imzalanıb.

Bəyanatın 2-ci bəndinə əsasən, Ağdam şəhəri və Ağdam rayonunun işğal altında olan hissəsi 20 noyabr 2020-ci il tarixində Azərbaycan Respublikasına qaytarılıb. Bununla da, Ağdamın 27 illik işğalına son qoyulub.

Bəyanatın 6-cı bəndinə əsasən, 2020-ci il noyabrın 25-də Kəlbəcər rayonu, dekabrın 1-də isə Laçın rayonu işğaldan azad edilib. Azərbaycan Ağdamın, eləcə də Kəlbəcər və Laçın rayonlarının işğaldan azad edilməsinə heç bir itki vermədən nail olub.

Ağdam rayonunun işğaldan azad edilməsi münasibətilə Azərbaycan Prezidenti İlham Əliyev 20 noyabr 2020-ci ildə xalqa müraciət edib.

Prezident müraciətində Ağdam rayonunun işğaldan azad olunmasının noyabrın 10-da imzalanmış üçtərəfli Bəyanatın nəticəsi olduğunu bildirib. Ağdam rayonunun işğaldan azad olunmasını tarixi hadisə adlandıran dövlət başçısı rayonun 73 faizinin 27 il işğal altında qaldığını qeyd edib.

Prezident İlham Əliyev vurğulayıb ki, Ağdamın işğaldan azad edilməsi şanlı hərbi Qələbə nəticəsində mümkün olub. Ali Baş Komandan bəyan edib ki, Azərbaycan Ermənistanı döyüş meydanında məğlub etməsəydi, Ermənistan öz xoşu ilə bizim torpaqlarımızdan çıxmayacaqdı.

Qeyd edək ki, Ağdamın işğaldan azad edilməsi şərəfinə Azərbaycan Respublikasında “Ağdamın azad olunmasına görə” medalı təsis olunub.

Prezident İlham Əliyevin Sərəncamı ilə Ağdamın işğaldan azad edilməsi uğrunda döyüş əməliyyatlarında iştirak edərək şəxsi igidlik və şücaət göstərmiş hərbi qulluqçular “Ağdamın azad olunmasına görə” medalı ilə təltif edilib.

Xatırladaq ki, Ağdam rayonu 1993-cü il iyulun 23-də Ermənistan Silahlı Qüvvələri tərəfindən işğal edilmişdi.

Qısa məlumat üçün haqqında bəhs edəcəyimiz Xəzər rayon səhiyyəsi ilə bağlı onu deyə bilərik ki, rayonda 4 birləşmiş şəhər xəstəxanası, 2 vərəm xəstəxanası və 1 dispanser, 5 uşaq sanatoriyası, 1 şəhər poliklinikası, 1 Müalicə Diaqnostika mərkəzi, 1 Uşaq reabilitasiya xəstəxanası, 1 Səhiyyə Nazirliyinin Sanatoriya-Kurort və Reabilitasiya Mərkəzi, 1 özəl klinika və 4 özəl müalicə diaqnostika mərkəzi, 2 müharibə əlilləri və veteranları üçün pansionat, 1 müharibə veteranları xəstəxanası, 3 kurort-müalicə sanatoriyası və 2 psixo-nevroloji Sosial Müalicə müəssisəsi, 1 stomatoloji poliklinika fəaliyyət göstərir.
Bəli, konkret mövzumuz isə Xəzər rayonu, Buzovna qəsəbəsində yerləşən 14 saylı Birləşmiş Şəhər Xəstəxanası ilə, daha dəqiq desək, xəstəxananın baş həkimi Sultan İbrahim oğlu Əliyevin fəaliyyəti ilə bağlıdır. Məlumat üçün onu da qeyd edək ki, Sultan “doxtur” uzun illər Səhiyyə Nazirliyində şöbə müdiri, sonra Hematologiya və Transfuziologiya İnstitutunun direktoru vəzifəsində işləyib. Sonradan “Semaşko” kimi tanınan 1 saylı Kliniki Tibbi Mərkəzə baş həkim təyin olunub. “Semaşko”da çalışdığı illərdə Sultan Əliyev sözün həqiqi mənasında oliqarxa, milyonçuya çevrilib. Onu da qeyd edək ki, bu tibb müəssisəsində 1000-ə yaxın çarpayı var, ümumi 2000 nəfərə yaxın işçi var, onlardan 500 nəfəri həkim, 800 nəfəri orta tibb işçisi, 700 nəfəri isə kiçik tibb işçiləridir. Mərkəzə il ərzində 30000 xəstə gəlir, 10000 xəstə əməliyyat olunur. Hər şeyə kommersant kimi yanaşan Sultan Əliyevin aylıq gəlirini hesablasaq astronomik rəqəm alınar. Sultan Əliyev xəstədən müayinə üçün pul alan həkim barəsində müxbirin sualına belə cavab verir: O hadisə 3 ay öncə baş verib, özü də gecə vaxtı...
Sultan Əliyevdən soruşan olmur ki, 3 ay öncə, ya da 3 saat öncə, nə fərqi var..?
Rüşvəti gecə alıblar, ya gündüz, bunun fərqi varmı, ay Sultan doxtur..?
Yaxşı bütün bunları qoyduq bir kənara, bəs kollektiv niyə Sultan Əliyevdən cana doyub..?
Belə ki, xəstəxananın həkimləri, tibb personalı, texniki işçiləri dad edirlər ki, biz belə baş həkim görməmişik, bu özünü nazir kimi aparır, işçiləri saymır, ancaq şöbə müdirlərindən aylıq tələb edir. Təsəvvür edirsiniz, Sultan Əliyevin əlindən bezən həkimlər başqa özəl xəstəxanalara üz tuturlar. Vallah, Sultan Əliyev polis rəisi, prokuror olsaydı, bəlkə də onu başa düşmək olardı. Amma həkimin xəstələrdən, xüsusilə də işçilərindən özünü belə yekə tutması, həkim adına yaraşan hal deyil. Sultan Əliyev işçiləriylə sanki qul kimi danışır. Onlarla ünsiyyət qurmaqdan qaçır. Həkimlər xeyirxah olmalı, xəstəyə can yandırmalı sağlamların dostu olmalı, hamının sağalmasına ümid verməlidirlər. Sultan Əliyev isə sifətindəki “zəhrimar”, qəzəb ilə nəinki xəstələri, hətta sağlam həkimləri də sanki öldürür. Bu adam üçün ancaq mənfəət, gəlir var, qalanı boş şeydir. Xəstənin maddi imkanı aşağıdırsa, həmin xəstəyə qarşı münasibət də fərqli olur. İmkanı olmayan xəstəni tibb ocağına qəbul belə etmək istəmirlər. Hazırda 75 yaşı olan Sultan Əliyev öz əməllərini 14 saylı Birləşmiş Şəhər Xəstəxanasında davam etdirir.
Bəli, Sultan Əliyev haqqında yazılan şikayətlərə görə, o 2015-ci ildə “Semaşko” xəstəxanasının baş həkimi vəzifəsindən azad edilərək 14 saylıya baş həkim təyin olunub. Və o gündən Buzovna camaatının qara günləri başlayıb. Bu adamı başa salmaq olmur ki, dövlət xəstəxanasında tibbi xidmət pulsuzdur. Bu adam dərman preparatlarına görə dərman firmalarından da mənfəət əldə edir. Biz hələ xadimələrin əmək haqqından, həkimlərin maaşından, hər xəstəyə görə, baş həkimə verilən “bəxşeyiş”dən danışmırıq. Görəsən, 60 yaşında həkimləri “təqaüdə” göndərən səhiyyə rəhbərləri nə üçün yaşı az qala səksəni haqlamış, kommersant baş həkim Sultan Əliyevi unudublar.
P.S. Deyəsən Səhiyyə Nazirinin işini bu dəfə cənab Əzrayıl yerinə yetirəcək. O da deyir ki, doxtur Sultan Əliyevə zəng çatmır… //gundelik-baku.com//

Azərbaycan ticarət seqmentində hələ də çaşqınlıq yaşanır. Bu dəfəki səbəb “Qara Cümə” naməlumluğudur. Həmin günə bir həftə qalmağına baxmayaraq, tanınmış brendlərin mağazaları hələ nə edəcəklərini bilmirlər.

Bizim.Media-nın əməkdaşı mağazalara müştəri kimi zəng edərək “Qara Cümə”yə hazırlıqları ilə maraqlanıb.

Beləliklə:

“FLO” mağazalar şəbəkəsi: “Endirim olacağı gözlənilsə də hansı məhsullara, neçə faiz endirim olacağı hələ dəqiq deyil”.

“New Yorker” mağazalar şəbəkəsi: “Bir ay əvvəl müştərilərimizə endirim kuponları paylanılıb. “Qara Cümə” endirimindən də yalnız həmin kupona sahib müştərilərimiz faydalana biləcəklər. Hazırda təəssüf ki, endirim kuponu yoxdur, bir ay əvvəl bitib”.

“Bershka” mağazalar şəbəkəsi: “Bu haqda hələ dəqiq məlumat yoxdur”.

“Kontak Home” mağazalar şəbəkəsi: “Bizdə endirimlər “Böyük Cümə” adı altında noyabrın 18-dən başlayıb. Televizor, noutbuk, telefon, paltaryuyan, soyuducu, mebel, ev tekstilinə 70%-dək endirim var”.

“Lacoste” mağazalar şəbəkəsi: “Hələ ki bu haqda məlumat yoxdur. Endirim olacaqsa, bunu ancaq həmin gün məlum olur”.

“LC Waikiki” mağazalar şəbəkəsi: “Endirim olması nəzərdə tutulub, lakin neçə faiz olacağı, hansı günləri əhatə edəcəyi hələ dəqiq məlum deyil”.

“İrşad Elektronics”: “Cümə endirimlərinə hazırlaşırıq, lakin kampaniya gününədək nə qədər endirim olacağı və hansı günləri əhatə edəcəyi barədə məlumat verə bilmirik”.

Əlaqə saxladığımız bəzi market və ticarət mərkəzləri bizə belə maraqlı fikir də söylədilər:

“Bizdə “Qara Cümə” gömrükdən başlayır. Bəyəm imkan verirlər ki, endirim etməyə də halımız olsun?”.

Bizim.Media

Noyabrın 15-də Fransa Senatında Azərbaycan əleyhinə qəbul olunan qətnamə nə qədər ağrılıdırsa, bu qətnaməyə azərbaycanlıların senat qarşısında, guya qətnaməyə etiraz olaraq rəqs edib, oynaması ondan da ağrılıdır. Bu, sözün bitdiyi yerdir. Bu, rəzalətdir! Belə rəzalət təkcə qətnaməyə etiraz etməklə rəqs edənlərə yox, eyni zamanda Azərbaycan Diaspor Komitəsinə və onun sədri Fuad Muradova da aiddir.

Gələk mətləbə: Fransada erməni diasporasının güclü olduğu hamıya məlumdur. Bunun nəticəsi kimi erməni Emma Makronyanın oğlu, Fransa prezidenti Emanuel Makron (Makroniyan) bütün Fransanın mənafeyini ayaq altına ataraq, damarında axan erməni qanına xidmət etməklə Azərbaycana qarşı yenə hücumdadır. Erməni diasporası nə çalırsa, Makron da ona oynayır. Hətta canında erməni qanı olduğundan, bu oynamağına improvizələr də edir.

Azərbaycan Diasporla İş Üzrə Dövlət Komitəsi bəs indiyə qədər nə işlə məşğul olub? Niyə erməni diasporunun bu qədər güclü olduğu Fransada lazımı səviyyədə iş apara bilməyib? Mən bu barədə bir dəfə demişəm ki, bizim diasporanın Fransada güclü təbliğat işi aparması üçün əlində Fransanın Milli Qəhrəmanı Əhmədiyə Cəbrayılov kimi “kozır”ı var. Hələ bircə dəfə eşitmədim ki, Fransa mətbuatında, televiziyasında diasporamız Əhmədiyyə Cəbrayılov haqqında hansısa bir verlişi hazırlayıb fransızların gözünə soxsun. Amma bu təbliğatı aparmaq üçün Diaspor Komitəsinə dövlət tərəfindən külli miqdarda pullar ayrılır. Çox təəssüf ki, ayrılan bu pulların nəticəsini görmürük. Niyə görmürük? Daha doğrusu fərqli görürük və buna ürəyimiz ağrıyır. Necə ki, noyabrın 15-də Fransa senatının Azərbaycan əleyhinə qəbul etdiyi qətnaməyə “Nə oldu Paşinyan?” mahnısına çalıb-oynayanları görəndə ürəyimizdən qara qanlar axdı.

Gəlin əvvəlcə Fransa senatının noyabrın 15-də Azərbaycan əleyhinə qəbul etdiyi qətnamənin bəzi məqamları ilə tanış olaq:

.Qətnamə layihəsində “Azərbaycanın Ermənistan ərazisindən və Laçın dəhlizindən çəkilməsi” tələb olunub.
.Layihə müəllifləri “Azərbaycan və onun tərəfdaşlarının Ermənistanın suverenliyi və ərazi bütövlüyünə hörmət etməsini, həmçinin bütün erməni hərbi əsirlərin qaytarılmasını” tələb edirlər.
.Bununla yanaşı, Fransa hökumətinə Dağlıq Qarabağda humanitar büro açmaq təklif edilir.
4.Təkliflər arasında qondarma “Dağlıq Qarabağ Respublikasf’nın müstəqilliyinin tanınması da yer alır.

5.Ermənistan Azərbaycan sərhəddində beynəlxalq statuslu sülhməramlı qüvvələrin yerləşdirilməsi də təkliflər arasında var.

Görəsən, burada çalıb-oynamalı nə var ki, soydaşlarımız senat qarşısında “Nə oldu Paşinyan?” mahnısına şıdırğı rəqs edirlər? Heç bilirsiniz Fransa mətbuatı bu barədə nə yazır?

Fransadakı etibarlı mənbədən aldığımız məlunata görə Fransada noyabrın 17-də dərc olunan qəzetlərdə Fransa senatı qarşısında azərbaycanlıların çalıb, oynamasını əleyhimizə qəbul edilən bu qətnaməni Azərbaycan icmasının da dəstəkləməsi kimi təqdim ediblər. Yazıblar ki, qəbul etdiyimiz qətnaməni Azərbaycan icması ürəkdən alqışlayır və bu münasibətlə senat qarşısında rəqs edirlər.

Yaxşı, bu rəzaləti kimin ayağına yazaq? Bu, Diasporamızın Fransada rəzaləti deyilmi?

Kiçik araşdırmalar apardıq ki, görək qətnaməyə etiraz etmək əvəzinə, bu çalıb-oynayanları ora kim göndərib? Müəyyən etdik ki, 12-15 nəfər olan həmin soydaşlarımızı Fransaya Hollandiyadakı Azərbaycan Konqresinin rəhbəri olan və özünün də çox şübhəli, olduqca qaranlıq həyat tərzi yaşayan Elsevər Məmmədov adlı şəxs aparıb. Bu adam Azərbaycanın Diasporla İş Üzrə Dövlət Komitəsinin birbaşa göstərişi və maliyə vəsaitiylə bu işi təşkil edib. Mənbə bildirir ki, o, Hollandiyadan bir avtobus tutaraq 12-15 nəfər olan soydaşımızı Fransa senatının qarşısına gətirib. Gələnlərin hər birinə 100 avro pul söz verilib, lakin sonda bu rəqs edənlərə 50 avro çatıb. Görünür, gələn soydaşlarımız senatın Azərbaycan əleyhinə qəbul etdiyi qətnaməyə ürəkdən rəqs etməyiblər. Onu da diqqətə çatdırım ki, ora gələnləri və rəqs edən xanımları, bəyləri artıq hamı tanıyır. Adlarını çəkib, onları Azərbaycandakı döğmalarını, qohum-əqrabasını utandırmaq istəmirik. Amma utanc verici halın biri də odur ki, rəqs edən bu xanımlar yurd-yuvası 30 il erməni işğalında olan rayonlardandırlar. Bu da rəzalətin daha bir formasıdır ki, sənin yurdunu Fransa kimi ermənipərəst bir dövlətin dəstəyi ilə 30 il işğalda saxlayan erməninin vəhşiliklərini unudub, yenə də onların yurdu əleyhinə qəbul edilən qətnaməyə arsızcasına çalıb-oynayırlar. Ar olsun!

Görəsən, Diasporla İş Üzrə Dövlət Komitəsinin rəhbəri Fuad Muradov bu rəzaləti necə qəbul edəcək? Diaspora Komitəsinə çoxsaylı cavan qızları işə qəbul etməklə Xarici ölkələrdə Azərbaycan həqiqətlərini yaymaq olmaz. Elə təcrübəsiz belə gənc qızlarla və yaxud qaranlıq keçmişi olan insanlarla işləməyin nəticəsidir ki, xalqımız və dövlətimiz belə aşağılanır.

Azərbaycanın Ali Baş Komandanı Prezident cənab İlham Əliyev 44 günlük Vətən müharibəsində böyük sərkərdəlik məharəti göstərərək, torpaqlarımızın 30 illik işğalına son qoydu. Noyabrın 8-də qazanılan Zəfərin iki ili tamam oldu. Bu iki ildə Prezident cənab İlham Əliyev döyüş meydanında qazandığımız qələbəni beynəlxalq aləmdə və siyasət masasında rəsmiləşdirməklə məşğuldur. Artıq qalib Prezident kimi İlham Əliyev beynəlxalq aləmdə sayılıb- seçilən liderlər sırasındadır və Azərbaycanın haqq səsini, ermənilərin isə işğalçı siyasətini bütün dünyaya tanıtdırmaqda böyük rol oynayır. Bəs qalanlar nə iş görür? Bu boyda respublikanı Prezident İlham Əliyev təkbaşına idarə etməlidir? Bəs bu qədər dövlət təşkilatları və qrumlar nədən ötrüdür? Bu işdə isə, konkret olaraq Diasporla İş Üzrə Dövlət Komitəsi birbaşa məsuliyyət daşıyır. Dövlət tərəfindən bu təşkilata yetərincə pullar ayrılır. Yəqin ki, Hesablama Palatası bu qrumda da bir yoxlama aparacaq. Onda məlum olacaq ki, dövlətin pulları burada, Fuad Muradovun rəhbərlik etdiyi 5 il ərzində göyə sovrulub. Əgər Elsevər Məmmədov kimi Avropadakı azərbaycanlılar tərəfindən qəbul edilməyən, işi-gücü Diaspora Komitəsinin ayırdığı pulları mənimsəməklə məşğul olan birisinə Fuad Muradov etibar edirsə, onda nəticə Fransa senatının qarşısında rəqs edənlərlə başa çatır. Ona görə də Fransa mətbuatı haqlı olaraq yazır ki, qəbul etdiyimiz qətnaməyə Azərbaycan icması çalıb, oynamaqla dəstək verir. (https://ok.ru/video/3971759540957?fromTime=3)

Mənbəmiz Elsevər Məmmədov haqqında onu da dedi ki, bu adam Hollandiyada guya Qarabağ İdman Klubu yaradıb və buna görə Diaspora Komitəsindən babat pullar silir. Amma belə bir idman klubu isə mövcud deyil. Ona görə də Elsevər Məmmədov özü kimilərini Hollandiyadan yığıb Fransaya rəzalət göstərməyə gətirib.

Yaxşı, tutaq ki, bu 12-15 nəfəri pul gücünə Hollandiyadan Fransaya gətiriblər. Bəs bu gələnlərin özlərində bir vicdan hissi, bir qeyrət damarı olmadımı ki, qətnaməyə etirazı çalıb, oyanamaqla bildirməsinlər? Hanı bunların əllərində qətnaməyə etiraz bildirilən bircə yazılı şüar? Niyə ucadan fransız və ingilis dillərində “Rədd olsun erməni diasporası”, “Fransa, Azərbaycandan əlini çək”, “Fransız xalqını bir erməniyə görə gözdən salmayın”, “Senat üzvləri, erməninin puluna yox, vicdanınıza səs verin” və s. kimi şüarlar yox idi? Bundan əlavə, məgər Fransada azərbaycanlı yaşamır ki, Hollandiyadan avtobus tutub, xərc çəkərək etiraz bildirməyə adam gətirirlər? Vallah buna adam cavab tapıb, söz deyə bilmir. Diasporamızın dişsizliyinin və yarıtmaz fəaliyyətinin nətıcəsidir ki, illər öncə Fransada qondarma erməni soyqrımını inkar edənlərə cinayət işinin açılması haqqında qanun qəbul etdilər. Bu il isə Fransada, Londonda və ABŞ- da səfirliklərimiz erməni hücumlarına məruz qaldı. Bu günlərdə məşhur fotoqraf, Fransa vətəndaşı olan Reza Degati çox maraqlı aşıqlama verdi. Reza bəy bildirdi ki, Fransanın Azərbaycana qarşə belə mənfi münasibətinin günahı özümüzdədir: “Çünki fransızlar arasında yaxşı təbliğat apara bilməmişik. Necə olur ki ermənilər fransızları özlərinə dost edə bilir, biz isə yox?” Elə bu sözlər bəs edir ki, diasporamızın necə işlədiyi aydın olsun.

Azərbaycanın Fransadakı səfirliyi də indiyə qədər çox bərbad vəziyyətdə işləyib ki, ermənilər orada bu qədər əl-qol açıblar. İndi təzəlikcə Azərbaycanın Fransadakı elçiliyinin rəhbəri, xarici işlər nazirliyinin mətbuat xidmətinin rəhbəri olmuş Leyla Abdullayeva təyin olunub. İnanmaq istərdik ki, Leyla xanım özündən əvvəlki səfirlərin və Diasporla İş Üzrə Dövlət Komitəsinin yol verdiyi nöqsanları aradan qaldıracaq və Fransa xalqında Azərbaycana qarşı mənfi münasibəti müsbətə doğru dəyişməyə nail olacaq. Leyla xanım üçün sıfırdan başlamaq olduqca çətin olacaq, amma bacaracağına da inanırıq. Diasporla İş Üzrə Dövlət Komitəsinin sədri Fuad Muradovun işinin öhdəsindən gələ bilməməsi göz önündədir. Bu təkcə Fuad Muradovun öz adma olan rəzalət və biabırçılıq deyil, həm də dövlətimizin nüfuzuna, eyni zamanda Prezident cənab İlham Əliyevin gecə və gündüz çalışıb müsbət imic qazandırdığı Azərbaycanın adına vurulan zərbədir.

Avropadakı və dünyadakı Diasporla işləməyi isə mütləq həm bu işi bacarana, həm də vətənini, dövlətini təmənnasız sevənə həvalə etmək lazımdır. Fuad Muradov kimi təcrübəsiz bir gəncə belə bir mühüm postu həvalə etmək özünü doğrultmadı. Yəqin ki, aidiyyəti qrumlar noyabrın 17-də Fransa mətbuatında gedən yazılarla tanış olub, Azərbaycanın adına belə zərbə vuran və xalqımıza rəzalət yaşadan Diasporla İş Üzrə Dövlət Komitəsinin sədrinə qarşı çox ciddi tədbirlər görəcəklər. //tezadlar.az//