İctimai Siyasi Proseslər və Beynəlxalq Araşdırmalar Mərkəzinin (İSBAM) sədri Samir Adıgözəlli Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin fəaliyyəti ilə bağlı ilginc açıqlamalarını davam etdirir. DİA.AZ bildirir ki, bu dəfə İSBAM sədri Qeyri-Hökumət Təşkilatlarına Dövlət Dəstəyi Agentliyinin sədri Azay Quliyevn şəxsinə aid bir faktı açıqlayıb və ortaya haqlı suallar da qoyub.

İSBAM sədri yazır:

"QHT Agentliyi nə qədər səxavətli imiş...

Cəmil Həsənlinin vəkilinə də qrant ayırıb. Ölkə rəhbərliyini söyən adamları ( onların ətrafını) maliyyələşdirmək siyasi dönüklük deyilmi hörmətli Azay Quliyev ?
Hər kəsin siyasi fikrinə hörmətlə yanaşıram.

Amma Agentlik rəhbərliyinin ucuz üsulla məni ittiham etdirib, bu kimi dövlətçiliyə qarşı prinsipsizliklərini anlamaq olmur..."

Məsələ ilə bağlı olaraq bütün maraqlı tərəfləri dinləməyə hazırıq...

BTB Bank nə üçün 2022-ci ili 5 milyon manat zərərlə başa vurub..? Ölkəmizin bank sektorunda 2010-cu ildən bu günədək fəaliyyət göstərən BTB bankı ilə bağlı məlumatlara nəzər salmaq üçün bankın rəsmi saytına, http://www.btb.az/-a daxil oluruq: 2010-cu ildə təsis edilən Bank BTB 10 il ərzində bir çox uğurlara imza atmış, ölkənin seçilən bankıdır, Tam Adı: BANK "BTB" Açıq Səhmdar Cəmiyyəti Quruluş tarixi: 24.02.2010 Əlaqəli şəxs: Rzayev Emil, İdarə Heyətinin Sədri Baş ofis: AZ1025, Bakı, Azərbaycan, Xətai rayonu, Nobel pr 13 A Rəsmi saytı: https://btb.az/
Bankın rəsmi saytında başqa bir əlavə informasiyaya rast gəlmədik. Ona görə də, məcbur olub bankla bağlı media üzərindən araşdırma aparmalı olduq. Araşdırma zamanı bəlli oldu ki, bir müddət əvvəl BTB Bankın İdarə Heyətinin sədri Emil Rzayev vəzifəsindən uzaqlaşdırılıb. Deməli, bankda nəsə baş verir. Bu barədə bir azdan…
Araşdırma zamanı məlum oldu ki, BTB bank PA-nın sabiq rəhbəri Ramiz Mehdiyevin ailəsinə məxsusdur. Daha dəqiq desək, BTB bankın əsas səhmdarı Ramiz Mehdiyevin gəlini Nigar Mehdiyevadır. O, bankın 75 faizlik hissələrinə sahibdir. Bank səhmlərinin 19 faizi Rza İsmayıl oğlu Sadiqə (Müşahidə Şurasının sədri), 6%-i isə Tükəzban Ağa qızı Mahmudovaya məxsusdur. Məlumat üçün onu da qeyd edək ki, Nigar Mehdiyevanın həyat yoldaşı fövqəladə hallar nazirinin müavini general-mayor Teymur Mehdiyevdir.

Ramiz Mehdiyevin nazir müavini olan yeganə oğlu da ölkənin aparıcı nəşriyyatlarından biri olan "Şərq-Qərb" ASC-nin əsas səhmdarı (96,5%) hesab olunur.
İndi isə keçək əsas məsələyə, yəni yuxarıda dediyimiz kimi bankda nə baş verir..? Birincisi, bir müddət əvvəl BTB bank keçən il zərərlə işlədiyini açıqlayıb. Belə ki, bankın 2022-ci ilin sonuna olan maliyyə hesabatından bəlli olur ki, bank 2022-ci ili 4 milyon 975 min manat ZƏRƏRLƏ başa vurub. Və bu hadisə Azərbaycanın bank sektorunda yeganə haldlr, yəni digər banklar gəlirlə ili başa vurub, amma Ramiz Mehdiyevin bankı zərərlə…
Adamdan soruşarlar niyə, nə üçün..? Deməli, Ramiz Mehdiyevin bankında ciddi proseslər baş verir və cənab Mehdiyev keçmişdən qalan cinayət əməllərinin izini itirmək üçün bankı bağlamaq, yaxud iflas həddinə çatdırmaq və məsələni bitirmək istəyir. Hətta yuxarıda qeyd etdik ki, bir müddət əvvəl BTB Bankın İdarə Heyətinin sədri Emil Rzayev vəzifəsindən uzaqlaşdırılıb. Amma bu barədə bankın saytında heç bir informasiya yoxdur.
Məlumat üçün onu da qeyd edək ki, BTB Bankın İdarə Heyətinin sədri vəzifəsini müvəqqəti olaraq Eldəniz Hüseynov İCRA edir, müvəqqəti…
Fikir verdinizmi, BTB Bankda ruslar demişkən, çemodan əhval ruhiyyəsi var, hamı aradan çıxmağa hazırlaşır… Vaxtilə Beynəlxalq Bankda da eyni olaylar yaşanırdı… Yeri gəlmişkən, bir müddət əvvəl BTB Bankda müştərilərə məxsus 316 min manat və 32 min ABŞ dolları məbləğində nağd pulun oğurlandığı barədə rəsmi məlumat yayılmışdı.
Yəqin ki, yaxın zamanda Ramiz Mehdiyevin arvadı Qalinaya məxsus Novxanıdakı üzüm bağları da qurumağa başlayacaq… Çünki izləri itirməyin zamanıdır… //gundelik-baku.com//

Bakının Badamdar qəsəbəsində fəaliyyət göstərən “Kİds Smile” uşaq tədris mərkəzindən şikayət var.

KONKRET.az-a mərkəzdən narazılığını Aydın Məmmədov adlı vətəndaş bildirib. Valideyn deyir ki, hazırda adıçəkilən müəssisədə nizamsızlıq hökm sürür, azyaşlı uşaqlara qarşı kobud rəftar edilir, hətta fiziki təzyiq göstərilir. Şikayətçi bu faktları mərkəzlə birbaşa əlaqəsi olan şəxs kimi sadalayır. Belə ki, dediyinə görə, onun əkiz qız övladları iki ilə yaxın bir müddətdə adıçəkilən müəssisədə hazırlıq keçib. Lakin bir-iki həftə öncə kursun xidmətlərindən imtina etmək məcburiyyətində qalıb. “Övladlarım həftənin iş günlərində günorta saat 12:00-dan axşam saat 17:00-a qədər burada hazırlıq keçiblər. Əvvəl hər şey öz qaydasında gedirdi. Mərkəzdə fəaliyyət göstərən Günəş adlı dil-ədəbiyyat müəllimindən, Tamara adlı rəsm müəllimindən, tərbiyəçi Səidə xanımdan çox razı idik. Onların bəziləri işdən çıxdılar. Sonra mərkəzə Bahar adlı yeni müəllimə gəldi. Narazılıqlar da bundan sonra başladı. Ona görə ki, həmin xanım uşaqlarla kobud davranır, üstlərinə qışqırır, onlara fiziki təzyiq göstərirdi. Övladlarım bizə həmişə bu müəllimədən şikayət edirdilər”.

Valideyn deyir ki, sözügedən xanım əslində mərkəzin təsərrüfat işlərinə nəzarət etsə də, çox vaxt müəllimləri əvəz edir. Və uşaqların test tapşırıqlarının həllində kömək istəməsinə “başım çıxmır, mən müəllimə deyiləm” cavabını verir. “Deyilənə görə, həmin xanımın ali təhsili də yoxdur. Əgər belədirsə, onda nəyə görə hazırlıq kursuna işə götürülüb?”.

A.Məmmədov mərkəzdə çalışan Elnurə adlı müəllimənin də uşaqlarla hədə-qorxu dililə danışdığını, onlara şiddət göstərdiyini bildirir. “Burada ümumilikdə əsas problem mərkəzə son vaxtlar təhsili olmayan şəxslərin işə cəlb olunması və bununla da nəzarət mexanizminin sıfıra enməsidir”.

Valideyn deyir ki, müəssisədəki nizam-intizamsızlıqla bağlı həm müdiriyyətə, həm də müəllimlərə irad bildirib. Bununla belə uşaqların nəzarətsiz buraxıldığının dəfələrlə şahidi olub. Şikayətçi bildirir ki, hətta bir dəfə nəzarətsizlik üzündən övladlarından biriylə başqa bir uşaq dalaşıb. Bu barədə müəllimlərə şikayət edəndə isə həmin uşağın autizimli xəstə olduğunu deyiblər. A.Məmmədov müəssisədəki ən ağır neqativ hal kimi övladının başqa birisi ilə mübahisə zəminində yıxılaraq ayağından xəsarət alması faktını dilə gətirib. Rəhbərliyi və müəllimlərə bununla bağlı irad bildirəndə isə onların laqeyd münasibəti ilə qarşılaşıb. Və elə bu səbəbdən də son anda kursdan imtina edib.

Əməkdaşımız A.Məmmədovun səsləndirdiyi iddialarla bağlı müəssisə rəhbərliyinin də mövqeyini öyrənməyə çalışıb. “Kids Smile”ın direktoru Kəmalə Ağayeva valideynin iradları ilə razılaşmayıb: “Deyilənləri bir-bir araşdırsaq, görərsiniz ki, heç birinin əsası yoxdur. Həmin valideynlərin övladları bizim kursda iki il yarım hazırlıq keçib. Nə səbəbə görə birdən-birə narazı oldular? Övladları olduqca hiperaktiv idilər. Uşaqlar arasında da çox şey olur. Amma heç bir səbəb həmin valideynlərə gəlib başqasının uşağının üstünə qışqırmağa əsas vermir. Bu insanlar hətta müəllimlərimizi belə təhqir etməkdən çəkinməyiblər. Yenə də biz bütün hallarda onlarla kompromisə getmişik, dil tapmağa çalışmışıq. Son dəfə isə biz valideynlərə elan etdik ki, təmirə dayanırıq və buna görə də qrupu bağlayırıq. Növbəti tədris ilində proqram dəyişikliyi ilə əlaqədar kursa məktəbli uşaqları qəbul etməyəcəyik. Administratorumuz bununla bağlı həmin valideynlərə zəng edib normal şəkildə bildirdi ki, övladlarını kursdan çıxarıb başqa bir müəssisəyə yönləndirsinlər. Onlar da kursdan kənarlaşdılar, lakin görünən odur ki, bundan narazı qalıblar ki, dolayısı ilə bizdən şikayət edirlər”.

Direktor müəssisədə ali təhsilsiz insanların fəaliyyət göstərməsi barədə deyilənlərə də aydınlıq gətirib: “Bizdə savadsız insan yoxdur, hamı ali təhsillidir. Təkcə xadimədən başqa. Bahar müəllimənin özü də Mədəniyyət və İncəsənət Universitetini bitirib. Bundan başqa, illərlə metodist müəllim kimi çalışıb”.

Şikayətçi valideynin övladının mərkəzdə yıxılaraq ayağının əzilməsi məsələsinə gəlincə, K.Ağayeva bu faktı da inkar edib: “Bu hadisə bizim mərkəzdə baş verməyib. Müəllimləri də uşaqlardan nə vaxt yıxıldıqlarını soruşanda demişdilər ki, dünən olub. Onlar hazırlıqdan sonra başqa yerə getmirlər? Bəlkə evə gedəndə yıxılıb uşaq?! Yəni bizim qapıdan ayağı zədələnmiş şəkildə çıxmayıb”.

Qeyd edək ki, valideyn direktorun son açıqlaması ilə razılaşmayıb və redaksiyamıza övladının mərkəzdə başqa bir oğlan uşağının dalaşması nəticəsində ayağını zədələdiyini təkidlə bildirib. Onu da əlavə edib ki, bununla bağlı müəllimlərə Votçap vasitəsilə yazılı iradlarını da çatdırıb. Onlar tərəfindən isə belə cavab alıb ki, məsələni mütləq rəhbərliyə və digər uşağın valideyninin də diqqətinə çatdıracaqlar.

Görünən odur ki, səsləndirilən iddialarla bağlı özəl müəssisə kimi fəaliyyət göstərən “Kids Smile” hazırlıq kursunun fəaliyyəti ciddi şəkildə araşdırılmalıdır. Ümid edirik ki, aidiyyəti dövlət orqanları bu məsələdə laqeydlik göstərməyərək, faktların təftiş olnması istiqamətində lazımi addımlar atacaqlar.

KONKRET.az

Iranla həmsərhəd Culfa sərhəd-keçid məntəqəsində 3 kilodan artıq ərzağın keçirilməsinə qadağa qoyulub.

DİA.AZ bildirir ki, bu haqda „Gündəlik Naxçıvan“a yerli sakinlər məlumat verib. Onlar deyir ki, bundan əlavə, gətirdiklər məişət avadanlıqlarına görə də onlardan qanunsuz pul alınır. Keçid məntəqəsindən şikayət edənlər əsasən, İran ərazisindən keçməklə Naxçıvan – Bakı – Naxçıvan avtobus reyslərinin sərnişinləridir. Bu reyslər hər gün 4 dəfə həyata keçirilir.

Ordubad rayon sakini M. Əsgərov deyir ki, Naxçıvan tərəfindən fərqli olaraq, Biləsuvardakı sərhəd-keçid məntəqəsindən Bakıya istənilən qədər ərzaq keçirmək mümkündür :

„Əslində, Naxçıvan blokadadır deyə, ərzağa məhdudiyyət qoyulmamalıdır. Təəssüf ki, tam əksinədir. Necə olur ki, Biləsuvar tərəfdən istədiyin qədər məhsul keçirmək olur, Naxçıvana isə yox? Məgər, Naxçıvanda Azərbaycan qanunları işləmir. Avtobusla Bakıya gedərkən, oradakı qohumlar üçün İrandan xeli ərzaq almışdım, keçid məntəqəsindən rahatlıqla keçirdim. Naxçıvana qayıdarkən düşündüm ki, eyni qanunlar bu Culfada da işləyir. 10-15 kilo ərzaq aldım ki, evə aparım. Çünki, İranda Naxçıvana nisbətən 3-4 dəfə ucuzluqdur. Lakin, bizimkilər buraxmadı. Dedilər ki, 3 kilodan artıq olmaz. Gömrk işçiləri əlimdəki ərzaqları alıb, müsadirə etdilər“.
Şahbuz rayon sakini B. Quliyev isə deyir ki, 200 manatlıq məişət avadanlığını Naxçıvana buraxmaq üçün ondan 50 manat rüsum tələb ediblər:
„Qanunla min manatdan yuxarı dəyəri olan məişət avadanlıqlarına müəyyən faiz rüsum alınmalıdır. İrandan alıb, Biləsuvar vasitəsi ilə Azərbaycana keçirəndə, bu qanun nəzərə alınır. Naxçıvan isə, sanki başqa ölkədir. 50 manatlıq əşyaya da rüsum alırlar. Bu yaxınlarda İrandan 200 manatlıq məişət ləavazimatı alıb, Naxçıvana keçirdim. Dedilər ki, 50 manat rüsum ödəməlisən, yaxud da geri qaytar. Başıma az qala hava gələcəkdi. Məcbur olub, dediklərini ödədim. Əvəzində qəbz istədim, güldülər mənə. Dedilər ki, biz qəbz vermirik“.

Cəlilabad meşələrində görünməmiş ekoloji cinayət hadisəsi qeydə alınıb.

DİA.AZ AzToday.az-a istinadla xəbər verir ki, Cəlilabad və Göytəpə meşəbəyliklərinin ərazisində qanunsuz yüzlərlə ağac məhv edilib.

Məlumata görə, Cəlilabad və Göytəpə meşəbəyliklərinin meşəbəyisi Elman Əliyev kütləvi qırıntıların izini itirmək üçün “179” nömrəli xidməti damğa ilə kəsilən ağacları damğalayıb.

Bildirilir ki, Elman Əliyev sözügedən xidməti damğasıyla bir ay öncə Göytəpə meşəbəyliyinin 12 saylı dolayında təhvil- qəbul zamanı qanunsuz olaraq ağacları damğalayıb. Və bundan əlavə 14 saylı meşə dolayında da həmçinin. 2 dolayda 200-dən çox kəsilmiş ağaclara vurulan damğaların heç birinin aktı yoxdur.

Maraqlıdır ki, bir neçə il öncə Əmək Məcəlləsinin 70-ci maddəsini “ç” bəndi ilə meşə qırıntısına görə işdən çıxan Salayev Xaləddin Faiq oğlu bir ay öncə 12 saylı meşə dolayına yenidən gözətçi təyin edilib.

Ümid edirik, Ekologiya və Təbii Sərvətlər Nazirliyi ağacların kütləvi şəkildə məhv edilməsi faktları ilə bağlı adekvat tədbirlər görəcək.

Cəlilabad və Göytəpə meşəbəyliklərinin meşəbəyisinin izi itirmək üçün qanunsuz vurduğu damğaların bir hissəsinin görüntülərini təqdim edirik:

Göyçay rayon sakinləri tərəfindən DİA.AZ-a müraciət ünvanlanıb. Müraciət müəllifləri yazır:

"Göyçay Suvarma Sistemləri İdarəsində dövlət əmlakı talan edilir. Hər birinin dəyəri 300 min manatdan çox olan ekskavatorlar sıradan çıxarılır. Yanacaq oğurlanaraq açıq-aşkar satılır. Bu gedişlə Orxan Mahmudovun özbaşınalıqları nəticəsində idarə tamamilə məhv olacaq. O, icra başçısı Natiq Ağayevin yaxın adamı və şəxsən özünün vəzifəyə təyin elədiyi kadr olduğuna görə kürəyini möhkəm dağa söykəyirmiş kimi, heç bir haqlı şikayətdən qorxmur. İndidən bu cür, mənəm-mənəm deyirsə, gələcəkdə onun qanunsuzlarının qarşısı almaq əsla mümkün olmayacaq.

Biz Göyçay rayon sakinləri olaraq mətbuat vasitəsilə ölkə başçısı cənab İlham Əliyevdən çox xahiş edirik, icra başçısına arxalanan Orxan Mahmudov barəsində ciddi tədbir görülsün. Ümidvarıq ki, indiyədək müdir sarıdan bəxti gətirməyən Göyçay rayon Suvarma Sistemləri İdarəsinə tezliklə layiqli, vicdanlı, vətənpərvər rəhbər təyin olunacaqdır".

İddia olunanlarla bağlı olaraq qarşı tərəfi də dinləməyə hazırıq...

"Azərbaycandan göndərilən humanitar yüklərin qəbulu ilə bağlı qərar verilməyib".

DİA.AZ Bizimyol.info-ya istinadla xəbər verir ki, bu barədə Qarabağdakı qondarma rəhbərin müşaviri David Babayan Ermənistan "News-NEWS.am" saytına müsahibəsində bildirib.

“Bu məsələ ilə bağlı heç kim bizimlə əlaqə saxlamayıb, ona görə də bunu Azərbaycanın növbəti təxribatı kimi qiymətləndiririk. Onlar bizim üçün qəbuledilməz olmaqla yanaşı, bizi, beynəlxalq hüquq və normaları məsxərəyə qoyub, Qarabağın, Laçın dəhlizini, hətta gətirdikləri hümanitar yardımları 44 günlük müharibənin simvolu olan Azərbaycana məxsus 44 nömrə nişanlı avtomobillərlə gətiriblər. Onların cəzasızlıq hissi o qədər artıb ki, hətta belə səhvlərə yol verirlər”, - deyə Babayan qeyd edib.

Babayan vurğulayıb ki, azərbaycanlılar öz humanitar yardımlarını tətbiq etmək istəyirlər, lakin hökumət və xalq bu məsələdə həmfikirdir, bu yardımı qəbul etmək istəmir.

Yük maşınlarının Rusiya sülhməramlılarının nəzarət-buraxılış məntəqəsindən keçməsi ilə bağlı internetdə yayılan videogörüntülərə münasibət bildirən Babayan bildirib ki, mən belə düşünmürəm, bu, Azərbaycan təbliğat maşınının növbəti dezinformasiyasıdır.

O qeyd edib ki, həmin an yüzlərlə Xankəndi vətəndaşı Azərbaycan mallarının içəri keçməsinin qarşısını almaq üçün Ağdam-Xankəndi yoluna toplaşıb.

Qeyd edək ki, dünən Azərbaycan Qızıl Aypara Cəmiyyəti xətti ilə Bakıdan Qarabağda yaşayan erməniəsilli şəxslərə humanitar yardım göndərilib. Humanitar yardım karvanında ilkin mərhələ üçün 40 ton un məmulatları var.

“Avqustun 21-də Azərbaycan Qızıl Aypara Cəmiyyəti İdarəetmə Şurasının qərarına uyğun olaraq bəyanat imzalamışıq. Bəyanatımızın fəlsəfəsinə görə irqindən, dinindən, milliyyətindən asılı olmayaraq hər bir insana yardımçı olmaqdır. Həmin bəyanatdan sonra bu məsələ diqqətimizdədir və hazırda humanitar yardım göndəririk. Qızıl Aypara Cəmiyyətinin rəhbər işçiləri, o cümlədən könüllülərimiz Ağdam-Xankəndi yoluna doğru irəliləyəcək”, - bunu jurnalistlərə açıqlamasında Azərbaycan Qızıl Aypara Cəmiyyətinin prezidenti Novruz Aslan deyib.

"Təzadlar" qəzetinə Kürdəmir rayonunun Şıxımlı kənd sakini Mustafayeva Səbinə Qərib qızının Azərbaycan Respublikasının Birinci Vitse-prezidenti Mehriban Əliyevaya, surəti Azərbaycan Respublikası Tibbi Ərazi Bölmələrini İdarəetmə Birliyinə ünvalı müraciəti daxil olub.

Müraciətdə deyilir:

"Hörmətli Mehriban xanım!

İlk növbədə qeyd etmək istəyirəm ki, Sizi ümüdlərimizin gerçəkləşən ünvanı kimi qəbul edirik və bu üzdən də həmişə dərdlərimizi Sizinlə bölüşür, problemlərdən çıxış yollarını birgə axtarır və hər zaman da müsbət nəticələrin əldə olunmasına nail oluruq.

Bildirirəm ki, 14 ilə yaxındır tibb sahəsində çalışıram. Bir səhiyyə işçisi kimi qeyd etmək istəyirəm ki, bu illər ərzində Azərbaycan Səhiyyəsinin inkişafı, onun maddi-texniki bazasının gücləndirilməsi və xidmətlərin ən müasir səviyyəyə çatdırılması istiqamətində göstərdiyiniz əvəzsiz xidmətlər uğurlu dövlət siyasətinin tərkib hissəsidir. Hesab edirəm ki, bütün bunların mərkəzində xeyirxahlıq, qayğıkeşlik və insanpərvərlik amili dayanır. Bu, bir həqiqətdir ki, rəhbərlik etdiyiniz fond tərəfindən son illər həyata keçirilən layihələr mahiyyətcə qarşıdakı onilliklərdə görüləcək işlərə bərabərdir və bu xoş nümunə kimi gələcək nəsillərə əsl Azərbaycançılıq və milli dövlətçilik ideyaları aşılayır.

Hörmətli Mehriban xanım!

Yuxarıda qeyd etdiyim uğurlara kölgə salmaq fikrindən uzaq olaraq, çalışdığım Kürdəmir Rayon Mərkəzi Xəstəxanasında cərəyan edən mənfi proseslərdən və mənə qarşı göstərilən haqsız münasibətdən söz açmaq istəyirəm. 14 ilə yaxındır ki, Kürdəmir Rayon Mərkəzi Xəstəxanasında mama-ginekoloq vəzifəsində çalışıram və 2022- ci ilin noyabr ayında xəstəxanamızda aparılan doğuş əməliyyatl zamanı üç ana ölümü faktı qeydə alındıqdan sonra xəstəxananın baş həkimi İslamov Tarix Heybət oğlu məni həmin şöbəyə müdir vəzifəsinə təyin etdi və bu sahədə müəssisə daxilində yüksək etimad doğruldacağıma inandığını bildirdi. Qısa zaman kəsiyində, 7 aya yaxın bir müddət ərzində üzərimə düşən vəzifələri layiqincə yerinə yetirməyimə baxmayaraq, xəstəxananın ümumi işlərində yaxından iştirak etməklə yanaşı, təsərrüfat işlərinə qədər belə, qanunsuz hesab olunan əməyə cəlb olundum. Bu müddətdə hər gün kipriyimdə od götürərək, səbr və təmkin nümayiş etdirdim, bütün xəstələrə eyni münasibəti bəsləyərək, müəssisənin nüfuzunu daim yüksəkdə tutmağa çalışdım. Lakin bütün bunlara baxmayaraq, 15 avqust 2023- cü il tarixdə aparılan iclas zamanı gözləmədiyim bir şəraitdə baş həkim mənim həmin vəzifədən xəbərim olmadan azad olunduğumu və ASM- ə göndərildiyimi diqqətə çatdırdı. Artıq bir-neçə gündür xəstələrə xüsusi qeydiyyata əsasən, verilən qəbzlər əsasında deyil, adsız qaydada xidmət göstərirəm və bu, məni çox narahat edir. Sistemdə həkim kimi adımın keçmədiyi barədə aidiyyəti üzrə və TƏBİB-ə məlumat versəm də, bu istiqamətdə heç bir müsbət addımlar atılmır və bu xoşagəlməz hal artıq 5 gündür ki, davam edir. Hesab edirəm ki, burada bir çox qaranlıq məqamlar və çirkin məqsədlər var ki, bu da öz növbəsində Azərbaycan səhiyyəsinin inkişafı prosesinə və bu istiqamətdə qazanılan böyük uğurlara kölgə salan amil kimi qəbul oluna bilər.

Xüsusi olaraq onu da diqqətinizə çatdırmaq istəyirəm ki, məlum yerdəyişmə ilə bağlı barəmdə verilən ƏMR-in sürətinin mənə verilməsini Baş həkimdən xahiş etsəm, o, iki həftədən artıq müddətdir qanunsuz bəhanələr gətirərək, həmin sənədin surətini mənə təqdim etməkdən imtina edir. Bütün bunlara yanaşı, xəstəxananın inzibati binasının daxilində baş həkimin çətiri və iradəsi altında özünə yaşamaq üçün qanunsuz otaq ayıran Vəfa həkimin, başqalarının şərəf və ləyaqətinə utanmadan (üzr istəyirəm, namusuna sataşan) toxunan Şirin həkim kimi cılız məzmun ifadə edən insanlarla bir kollektivdə çalışmaq nə qədər çətin olsa da, hər zaman ən ali məqsədim müəssisə daxilində sağlam mühitin formalaşdırılmasına nail olmaq istiqamətində yorulmadan çalışmaq və xəstələrə şəffaf xidmət göstərmək olub. Xüsusi olaraq qeyd etmək istəyirəm ki, əgər proseslər bu yöndə davam edərsə, zərurət yarandığı halda mənə qarşı edilən digər haqsızlıqlarla bağlı hüquq-mühafizə orqanları qarşısında bütün çılpaqlığı ilə olduğu kimi söhbət açacağam. Qoy, onlar özləri araşdırsınlar ki, illər öncə və indinin özündə də məni hansı formada şantaj ediblər və rəhbərlik tərəfindən üzərimə hansı maddi-mənəvi öhdəliklər qoyulub. Düşünürəm ki, bu müraciətimdən sonra xəstəxana daxilində baş verənlərə münasibətdə az bir hissəsədə həqiqətləri söylədiyimə görə müəssisəmizdə bir çoxları tərəfindən mənə olan münasibət dəyişəcək və əsassız hücumlar baş qaldıracaq. Yaranmış fürsətdən istifadə edərək, qarşı tərəfin də diqqətinə çatdırmaq istəyirəm ki, mənə qarşı aparacaqları hər hansısa kampaniya onların özlərinin daha dərin bir şəkildə ifşasına gətirib çıxaracaq.

Hörmətli Mehriban xanım!

Sizdən xahiş edirəm ki, mövcud qanunvericiliyin tələblərinə uyğun olaraq Əmək Məcəlləsinin əmək müqaviləsinin ləğv olunması qaydalarının tənzimlənməsi hissəsində həmin məcəllənin 68 və 69-cü maddələrinin tələbələri kobud şəkildə pozulduğuna görə Baş həkim vəzifəsini icra edən İslamov Tarix Heybət oğlunun tutduğu vəzifəsindən azad edilməsinə dair Azərbaycan Respublikasının Səhiyyə Nazirliyinə və adıçəkilən diğər əməkdaşlar barəsində hüquqi ölçülərin götürülməsi istiqamətində Azərbaycan Respublikasının Baş Prokurorluğuna öz müvafiq tapşırıqlarınızı verəsiniz.

İnanıram ki, hər şeydən öncə, həmişə olduğu kimi, humanizm və ədalət prinsiplərini rəhbər tutacaqsınız və bir Azərbaycan qadını kimi öz əvvəlki işımdə fəaliyyət göstərməyim istiqamətində mənə yardımçı olmaqla yanaşı, həm də şərəf və ləyaqətimin öz peşə fəaliyyətlərində kifayət qədər səriştəsiz olan insanlar tərəfindən tapdanmasına imkan verməyəcəksiniz.

Sizə əvvəlcədən öz dərin minnətdarlığımı bildirirəm".

Məsələ ilə bağlı Kürdəmir Rayon Mərkəzi Xəstəxanasının rəhbərliyinin fikrini öyrənmək cəhdimiz alınmadı. Odur ki, qarşı tərəfin də mövqeyini dərc etməyə hazırıq. //tezadlar.az//

Neçə vaxtdır ki, ölkə mətbuatı İstanbul NS klinikasında “bezpredel idarəçilik”lə bağlı həyacan təbili çalmaqdadır. Buna baxmayaraq, bu gün də səhiyyə ocağında yaşanan acınacaqlı durum aradan qaldırılmır ki, qaldırılmır. Belə bir səbəblər üzündən də, səhiyyə müəssisəsinə müayinə və müalicə olunmaq, eyni zamanda digər məqsədlər üçün üz tutan insanların narazılıqları “pik nöqtə”yə çatıb və sanki insanlar arasında İstanbul NS klinikasına qarşı inamsızlıq hissi də formalaşıb. Hələ bunlar azmış kimi, əldə etdiyimiz məlumatlara görə klinikada baş verən ara-sıra ölüm faktlarının varlığı da, artıq vəziyyətin dözülməz olmasından xəbər verir. Qeyd etdiyimiz belə bir faktların varlığına baxmayaraq, bugünə kimi bir kimsə eşitməyib ki, baş verən hadisələrlə bağlı bir kimsə cəzalandırılsın. Sanki, süstlük, yenə də süstlük!
Xüsusilə bir faktı qeyd etmək istəyirik ki, son dövrlər özünün reklamına küllü miqdarda puş tökən Neyrocərrah Zaur Ramixanov, bir qadının ölümünə səbəb olub.

Millitv.az xəbər verir ki DİA.AZ-a daxil olan məlumata görə, ictimaət arasında böyük nüfuza sahib olan Saleh Aqşinin anasını əməliyyat edən Neyrocərrah Zaur Ramixanov, ciddi yalnışlığa yol verərək, xəstənin ölümünə səbəb olub. Saleh Aqşinin sözlərinə görə, həkim anasını əməliyyata götürməzdən əvvəl ailə üzvlərinə bildirib ki, keyyitmə ilə baş tutacaq cərrahi prosedur. Lakin həkim Zaur Ramixanov verdiyi sözə əməl etməyərək, yaşlı qadına narkoz verərək, əməliyyata alıb. Əməliyyat zamanı xəstənin halı pisləşib və vəfat edib. Mərhumənin ailə üzvləri həkimi ittiham edərək, səhlənkarlıq səbəbindən xəstənin ölümünə səbəb olduğunu bildiriblər. Ölüm faktı və həkim səhlənkarlığı ilə bağlı mərhumənin ailə üzvləri hüquq mühafizə orqanlarına və ölkə rəhbərliyinə müraciət ediblər. Vəfat edən qadının ailə üzvləri həkim Zaur Ramixanovun qanun qarşısında cavab verməsini və qanunvericilik çərçivəsində həkimlik fəaliyyətinə xitam verilməsini tələb edirlər.
P.S. Xüsusilə qeyd edək ki, ötən il adı qeyd olunan həkim ilə bağlı fakt dolu məlumatlar ölkə mətbuatının gündəmini zəbt etmişdi. Belə ki, Zaur Ramixanov əməliyyat zamanı həkim səhlənkarlığına yol verərək, bir nəfər şəxsin kor qalmasına səbəb olmuşdu. Həmin hadisə “Yeni Gəncə” Tibb Mərkəzində baş vermişdi. Zaur Ramixanov həmin hadisənin ört-basdır olunmasına nail olmuşdu və məsuliyyətə cəlb olunmaqdan son vaxtda qurtulmuşdu. Amma bu səfər görünür çətin olacaq. Çünki ortada ölüm faktı var. İnsanların ölümünə səbəb olan həkimlər layiqli cəzalarını almalıdır ki, digərlərinə də dərs olsun.

İddia olunanlarla bağlı olaraq qarşı tərəfi də dinləməyə hazırıq...

Bakı şəhəri, Əbdülkərim Əlizadə küçəsində fəaliyyət göstərən, “Loona Bistro” restoranında qida təhlükəsizliyi sahəsində normativ hüquqi aktların tələblərinə əməl olunmadığı ilə bağlı "Azərbaycan Reallığı" saytına məlumat daxil olub.
Belə ki, müəssisədə sanitar-gigiyenik qaydalara, texnoloji ardıcıllığa, mal qonşuluğu prinsipinə riayət olunmadığı, xammalın qəbulu və saxlanılması, yeməklərin hazırlanmasının eyni sahədə həyata keçirildiyi, mətbəx sahəsində müvafiq təmizlik işlərinin aparılmadığı daxil olan məlumatda qeyd olunur.

Həmçinin mənşəyi məlum olmayan, üzərində saxlama müddəti göstərilməyən, etiketlənmə tələblərinə cavab verməyən məhsullarının satışının və istifadəsinin həyata keçirildiyi xüsusilə vurğulanır. Bundan başqa işçi heyətin şəxsi gigiyena qaydalarına riayət etməməsi məlumatlar arasında yer alır. Həmçinin onların dəyişəkli təmiz iş geyimi olması halda qaydalara əməl olunmur.

Gün ərzində bir çox insanla təmasda olduqlarından qoruyucu vasitələrlə və dezinfeksiyaedici məhlulla təmin olunmalıdırlar lakin heç biri yerinə yetirilmir. Vergidən yayınma halı baş alıb gedir. Belə ki, müştəriyə heç bir qəbz verilmir. “Loona Bistro” restoranında özbaşınalıq hökm sürür, müştəriləri sözün əsil mənasında soymaqla məşğuldurlar! Aydın məsələdir ki, Azərbaycanın çox yerində olduğu kimi, bu restoranlarda da müştərilərin qabağına çıxıb, onları qarşılamırlar.

Müştərilərə oturmaq üçün yer də göstərmək "yadlarından çıxır". Bir masa tapıb arxasında əyləşirsən, handan-hana biri gəlir ki, "nə istəyirsiniz?" İstəyirsən ağzını doldurub deyəsən ki, "kostyum istəyirəm!". Sonra izah etməyə məcbur olursan ki, "a bala, restorana yeməyə gələrlər də..."

Sonra da soruşursan ki, "yeməyə nə var?" Bəziləri menyu gətirir, istədiyin bir yeməyi sifariş vermək istəyirsən. Adını çəkən kimi, üzü saqqalı. xalat-filan geyinməmiş, küçə uşağına bənzər "xidmətçi" deyir ki, "o yoxdur". Nəhayət, başqa yemək sifariş vermək istəyirsən, deyir: "Gərək, əvvəlcədən 100 manat depozit verəsiniz!"

Mən dünyanın çox ölkəsində olmuşam, yeməkdən əvvəl depozit istəyən görməmişəm! Qəribədir, müştəri 20-30 manatlıq yemək yeyəcəksə, 100 manat depozit niyə verməlidir? Axı, depozit nə üçündür? Yeyib-içib, qaçan müştəri olur ki? Restoranlarda eybəcər musiqi səsindən qulaq batır! Xidmət səviyyəsi sıfır, Yeməklər keyfiyyətsizdir.

Yeməkdə sonra adamın ürəyi bulanır! Heç demə, bəzi yeməkləri palma yağı ilə bişirirlər ki, ucuz başa gəlsin. Deyirlər, palma yağının bir kiloqramı 1 manat 50 qəpiyədir! Hesab gətirəndə verdikləri yeməyin qiymətindən 4-5 qat artıq yazırlar Bu, artıq həyasızlıqdır! Bunların hamısı villa tikdirmək, bahalı maşınlar almaq istəyirlər! Hətta daxil olan məlumatda qeyd olunur ki, restoranda müştərilərə verilən içkilərin hər biri padvallarda “kustar” üsulla hazırlanıb.

Bir sözlə adı qeyd olunan restoranın rəhbərliyi insanlarön həyat sağlamlığını nəzərə almayaraq, onların taleyləri ilə oynayır. Ümumiyyətlə, Bakıda 90 faiz restoranlar əhaliyə səviyyəli xidmət göstərmirlər. Səbəbi də məlumdur: onları kimlərsə qoruyur, müdafiə edir. Bu işlər havayı olmur, aylıq "haqlarını" alırlar! Belə olmasaydı, Azərbaycanda da başqa ölkələrdə olduğu kimi, əhaliyə yüksək xidmət göstərilərdi...

Əgər yoxlasalar, görərlər ki, restoranlarda işləyənlərin çoxu ştatda deyil. Günü 15, 20 manata işləyənlərdir. Belələrinin nə mədəniyyəti, nə məsuliyyəti ola bilər? Ümumiyyətlə, nə vaxt ictimai-iaşə müəssisələrində, xüsusilə restoranlarda özbaşınalıqlara son qoyulacaq? Bu işi bacaran bir kişi tapılacaq, yoxsa yox?

Qarşı tərəfin mövqeyini işıqlandırmağa hazırıq.