Məlum olduğu kimi martın 26-da Bakı şəhər İcra Hakimiyyətində müşavirə keçirilib və Binəqədi rayonunda qadının liftin qapıları arasında qalaraq ölməsi faktı ilə əlaqədar ümumi lift təsərrüfatının vəziyyəti təhlil edilib. Yol verilən nöqsanlara görə Bakı şəhər “Lifttəmir” İstehsalat Birliyinin direktoru Xalid Ələkbərova şiddətli töhmət elan edilib. Eyni zamanda, “Bakımənzilavtomat” İxtisaslaşdırılmış İstehsalat İdarəsinin rəisi İlham Hüseynov və Binəqədi Rayon Mənzil Kommunal Təsərrüfat Birliyinin rəisi E.Zamanov isə araşdırma müddətində vəzifələrindən kənarlaşdırılıb.

Müşavirədə həm də Bakı şəhərində aparılan abadlıq-quruculuq işlərinin vəziyyəti müzakirə edilib. Sözügedən sahədə aparılan müzakirələrin tam təfərrüatı açıqlanmasa da bəllidir ki, son dövrlər paytaxtda görülən əsaslı tikinti və təmir məsələlərinə diqqət yönəldilib.

Məlum olduğu kimi Bakı şəhərində abadlıq-quruculuq işlərinin həyata keçirilməsini ancaq İcra Hakimiyyətinə tabeli Mənzil-Kommunal Təsərrüfatı Departamenti, qurumun rayon idarələri və “Bakı Şəhər Əsaslı Tikinti və Təmir” Məhdud Məsuliyyətli Cəmiyyəti təmin edir. Son illər Bakı şəhər İcra Hakimiyyətinə tabeli qurumların, “Bakı şəhər Əsaslı Tikinti və Təmir” MMC-nin və Bakı şəhər Mənzil-Kommunal Təsərrüfatı Departamentinin rayon idarələrinin ərazilərində əsaslı tikinti və təmir məsələlərinə hər il dövlət büdcəsindən milyonlarla manat dövlət vəsaitinin ayrıldığı da heç kimə sirr deyil.

Qeyd edək ki, son dövrlər elektron mediada Bakı şəhər Mənzil-Kommunal Təsərrüfatı Departamentinə tabeli rayon idarələri tərəfindən keçirilən şübhəli tenderlərlə bağlı çoxsaylı təkzibolunmaz məlumatlara rast gəlinir. Elə şəhər İcra Hakimiyyətinin başçısı Eldar Əzizovun təşəbbüsü ilə Bakı şəhərində həyata keçiriləcək əsaslı tikinti, təmir məsələləri sahəsində strateji planların hazırlanması, görüləcək işlərin koordinasiya olunması və ayrılan vəsaitin səmərəli istifadəsinin təmin olunmasına nəzarət üçün hələ 2019-cu ilin fevralında yaradılmış “Bakı şəhər Əsaslı Tikinti və Təmir” MMC-nin də adı bu mənada az hallanmır.

Aktualinfo.org “Bakı şəhər Əsaslı Tikinti və Təmir” Məhdud Məsuliyyətli Cəmiyyətinin Eldar Əzizovun təbirincə desək Bakı şəhərində həyata keçiriləcək əsaslı tikinti və təmir məsələləri sahəsində ayrılan vəsaitin səmərəli istifadəsinin təmin olunması ətrafında apardığı yeni araşdırmanı diqqətinizə çatdırır.

“Bakı şəhər Əsaslı Tikinti və Təmir” MMC son illər Bakı şəhərində əsaslı tikinti və təmir, abadlaşma işlərinin həyata keçirilməsi məqsədi ilə onlarla şirkətlə yüz milyonlarla manat dəyəri olan satınalma müqavilələri bağlayıb. İqtisadçı olmayan hər bir kəs də bu satınalmalara diqqət etdikdə büdcə vəsaitlərindən heç də səmərəli istifadə olunmadığını görər. “Bakı şəhər Əsaslı Tikinti və Təmir” MMC-nin müqavilə bağldığı şirkətlərin böyük əksəriyyətinin fəaliyyəti şübhəli məqamlarla doludur. Apardığımız araşdırmada o da məlum oldu ki, bu şirkətələr dövlətə həm də hərtərəfli ziyan vurur. Həm büdcədən ayrılan vəsaitləri talamaqla, həm də dövlətə olan vergi öhdəliklərindən yayınmaqla. “Bakı şəhər Əsaslı Tikinti və Təmir” MMC-nin belə şirkətlərlə bağladığı yüzlərlə müqavilələrdən bir neçəsini diqqətinizə çatdırırıq.

“Bakı Şəhər Əsaslı Tikinti və Təmir” MMC ilə “STAR CONSTRUKTION-12” MMC ilk satınalma müqaviləsi 19.03.2020-ci ildə Bakı şəhəri ərazisində səkilərdə, həyətlərdə park və bağlarda təmir, yenidənqurma və abadlıq işlərinin satın alınması üzrə bağlanılıb. Dəyəri 16.983.435,6 manat.

19.03.2020-ci ildə məhəllədaxili yollarda və səkilərdə asfalt örtüyünün təmirinin satınalınması üzrə 2.592.341,98 manat.

11.06.2020-ci ildə sosial-mədəni və məişət təyinatlı obyektlərin əsaslı təmirinin satın alınması üzrə 2.993.911,36 manat.

03.06.2021-ci ildə Bakı şəhər ərazisində səkilərdə, həyətlərdə, park və bağlarda təmir, yenidənqurma və abadlıq işləri üzrə 16.559.900 manat.

10.06.2021-ci ildə Bakı şəhəri ərazisində dövlət mənzil fonduna aid binaların təmirinin satınalınması üzrə 13.470.942,89 manat.

23.11.2021-ci ildə Bakı şəhəri ərazisində səkilərdə, həyətlərdə, park və bağlarda təmir, yenidənqurma və abadlıq işlərinin satınalınması üzrə 9.892.535,44 manat.

Göründüyü kimi “Bakı Şəhər Əsaslı Tikinti və Təmir” MMC ilə “Star-Construktion-12” MMC iki ilə yaxın müddətdə ümumi dəyəri 62 493 064 manat olan 6 satınalma müqaviləsi bağlnılıb. MMC-nin hazırda dövlət vaxtında ödənməyən 4 316 025.46 manat vergi borcu var.

İqtisadiyyat Naziriliyi yanında Dövlət Vergi Xidmətinin reyestr məlumatlarına əsasən “Star Construktion-12” QSC 4 mart 2016-cı ildə dövlət qeydiyyatına alınıb. Nizamnamə kapitalı 2050 AZN olan QSC-nin hüquqi ünvanı Bakı şəhəri Binəqədi rayonu, Binəqədi şossesi, ev 53-də yerləşir. Şirkətin qanuni təmsilçisi isə Bayramov Mirsahib Atamalı oğludur. Azadlıq radiosunun araşdırmasında da şübhəli məqamlar üzə çıxıb: 2016-cı ilin martında yaradılan “Star-Construktion-12” MMC həmin ilin 3-4 ayı ərzində Bakı Şəhər İcra Hakimiyyətindən tutmuş Ucar rayon mədəniyyət idarəsinədək çoxsaylı dövlət qurumlarının keçirdiyi 27 tenderdən qalib ayrılıb. Cəmi 3 ay əvvəl yaradılan bir şirkətin hansı resurslarla ölkənin ən müxtəlif yerlərində eyni vaxtda təmir, abadlıq, mal və avadanlıqların təchizatını həyata keçirdiyi çox maraqlıdır.

“Bakı Şəhər Əsaslı Tikinti və Təmir” MMC ilə “SKY PARADİSE CONSTRUCTION” MMC arasında Bakı şəhəri ərazisində yerləşən parklarda abadlıq işlərinin həyata keçirilməsinin satın alınması üzrə 6.582.988,72 manat məbləğində satınalma müqaviləsi 21.10.2022-ci ildə bağlanılıb. MMC-nin hazırda dövlət vaxtında ödənməyən 9 431 667.58 manat vergi borcu var.

Elektron mediada 14 Mart 2023-cü ildə yayılmış məlumata görə “Sky Paradise Construction” MMC-yə (VÖEN: 5500451631) gömrük qaydaları əleyhinə olan (Mallar və nəqliyyat vasitələri gətirilərkən və ya aparılarkən müvafiq icra hakimiyyəti orqanına məlumatın verilməməsi və ya təhrif olunmuş məlumatın verilməsi, yaxud əvvəlcədən qısa idxal bəyannaməsinin verilməməsi) inzibati xəta protokolu tərtib edilib. bu protokol İnzibati Xətalar Məcəlləsinin 485.2-ci maddəsi ilə iddası ilə irəli sürülüb. İşə Bakı Şəhər Nərimanov Rayon Məhkəməsində hakim Vüsal Qurbanov baxıb.
“Bakı Şəhər Əsaslı Tikinti və Təmir” MMC ilə “KASPİAN-AZ” MMC arasında Bakı şəhəri ərazisində səkilərdə, həyətlərdə, park və xiyabanlarda təmir, yenidənqurma və abadlıq işlərinin satın alınması üzrə 26.459.081,61 manat məbləğində satınalma müqaviləsi 01.06.2022-ci ildə bağlanılıb. MMC-nin hazırda dövlət vaxtında ödənməyən 1 931 179.41 manat vergi borcu var.

“Bakı Şəhər Əsaslı Tikinti və Təmir” MMC ilə “TRİLLİANT ENGİNEERİNG” MMC arasında Bakı şəhəri ərazisində dövlət mənzil fonduna aid binaların əsaslı təmirinin satınalınması üzrə 34.335.999,98 manat məbləğində satınalma müqaviləsi 10.05.2022-ci ildə bağlanılıb. MMC-nin hazırda dövlət vaxtında ödənməyən 3 556 872.29 manat vergi borcu var. Bakı şəhəri Lokal Gəlirlər Baş İdarəsinin 15.08.2023 tarixli qərarı ilə riskli vergi ödəyicisi hesab edilib.

Açıq mənbələrdə “TRİLLİANT ENGİNEERİNG” Məhdud Məsuliyyətli Cəmiyyətinin barəsində də heç bir məlumat yoxdu. Şəhərsalma və Arxitektura komitəsinin məlumatlarında “Trilliant Engineering” MMC 2020-ci ildə Əliyev Soltan Əlibala oğlunun sifarişi əsasında Sumqayıt şəhəri, Ceyranbatan qəsəbəsi yaxınlığı, 5-ci küçə, 27C ünvanında 1 mərtəbəli, 97.12 kvadratmetr fərdi yaşayış evinin tikintisini həyata keçirib. Burada da bir qəribəlik var. Bakı şəhər İcra Hakimiyyətinə tabeli “Bakı şəhər Əsaslı Tikinti və Təmir” Məhdud Məsuliyyətli Cəmiyyəti nə üçün böyük həcmdə işlər görmüş və görə biləcək təcrübəli şirkətlərə deyil, cəmi bir mərtəbəli bir ev tikmiş MMC-yə 34 mülyonluq dövlət sifarişini həvale edib?

“Bakı Şəhər Əsaslı Tikinti və Təmir” MMC ilə “MODUL XIDMƏT” MMC arasında mənzil-kommunal xidmətlərinin göstərilməsinin təmin edilməsi məqsədi ilə tələb olunan müxtəlif növ malların alınması üzrə 16.436.951,6 manat məbləğində satınalma müqaviləsi 10.05.2022-ci ildə bağlanılıb. MMC-nin hazırda dövlət vaxtında ödənməyən 471014.98 manat vergi borcu var.

“Bakı Şəhər Əsaslı Tikinti və Təmir” MMC ilə “TİKİNTİ TƏCHİZAT BƏRPA” QSC arasında mənzil-kommunal xidmətlərinin göstərilməsinin təmin edilməsi məqsədi ilə tələb olunan müxtəlif növ malların satın alınması üzrə 4.639.760 manat məbləğində satınalma müqaviləsi 08.10.2022-ci ildə bağlanılıb. MMC-nin hazırda dövlət vaxtında ödənməyən 2 234 640.35manat vergi borcu var.

Göründüyü kimi “Bakı Şəhər Əsaslı Tikinti və Təmir” MMC yuxarıda göstərdiyimiz şirkətlərlə bağladığı satınalma müqavilələrində şübhəli məqamlar çoxdu. Belə ki, bu MMC-lərin hər birinin dövlətə külli miqdarda vergi borcu yaranıb. Sanki, hər biri bir neçə milyonluq tenderi udub aradan çıxıb.

“Bakı Şəhər Əsaslı Tikinti və Təmir” Məhdud Məsuliyyətli Cəmiyyətinin direktoru Əliyev Abit Sadıq oğludur. Bu o Abit Əliyevdir ki, Eldar Əzizov hələ 2003 – cü ildə Gəncə şəhəri İcra Hakimiyyətinin başçısı təyin olunduqdan sonra karyerasında yüz səksən dərəcə dönüş yaranmışdı. Həmin dövrdə Samux rayonunda Qaz İstismar İdarəsinin müdiri işləmiş Abit Əliyevi Gəncə şəhər Mənzil Kommunal Təsərrüfatı İdarəsinə müdir təyin etmiş Eldar Əzizov onunla yolunu hələ də davam etdirir. Eldar Əzizov sadıq kadrını özü ilə gətirib Gəncədə daşıdığı vəzifəni Sumqayıtda da ona həvalə etdi. Eldar Əzizov daha sonra Abit Əliyevi Səbail rayon İcra Hakimiyyətində müavin vəzifəsinə də gətirdi. Onun Bakı şəhər İcra Hakimiyyətində də vəzifə alacağı gözlənilirdi. Lakin Eldar Əzizov sadiq kadrına şəhərin təmir tikinti işlərinə qeyri leqal nəzarəti həvalə etməyi üstün tutdu. Dövlət tərəfindən İcra Hakimiyyətinə şəhərdə abadlıq, təmir-tikinti işləri üçün ayrılmış vəsaitlər artıq Abit Əliyevin əli ilə paylanır. Yəni, “Bakı Şəhər Əsaslı Tikinti və Təmir” MMC heç bir iş görmür, sadəcə Bakı şəhər İcra Hakimiyyətindən pulu alıb, başqasına sıfariş edir. Bu da qurumun heç də dövlət vəsaitlərinin səmərəli istifadəsinə nəzarət üçün yaradılmadığından xəbər verir. Bunları yuxarıda göstərdiyimiz faktlar da təsdiq edir.

Bütün bu göstərilənlərdən sonra hesab edirik ki, BŞİH-də bir müşavirə də dövlət vurduğu hərtərəfli ziyanın qarşısının alınması məqsədi ilə, təcili olaraq “Bakı Şəhər Əsaslı Tikinti və Təmir” MMC-nin direktoru Abit Əliyevin fəaliyyətinin araşdırılması üçün çağrılmalıdır.

Aktualinfo.org

"Sığorta şirkətləri həkimlərə o qədər az pul ödəyirlər ki, həkimlər sığortalıları sadəcə başdan eləyirlər". Dia-az.info bildirir ki, bunu öz gileyində neftçi Fəxri Qurbanlı qeyd edib.

"Bu xüsusillə Mərkəzi Klinikada belədir" deyən narazı vətəndaş daha sonra əlavə edib: "Saat 13-dən sonra (əsas binada) sığortalıların qəbulu pulludu. 13-ə qədər isə "əməliyyatdadırlar"..."

Dia-az.info bildirir ki, sözügedən məsələ ilə bağlı Neftçilərin Hüquqlarının Müdafiəsi Təşkilatının eksperti Azər Quliyev xüsusi açıqlama ilə çıxış edib. Ekspert deyir:

"İşçilərin hüquqlarını daha çox pozan qurum və ya təşkilatlardan biri də tibbi Sığortalardı. Fiktimcı, əslində bu təşkilatlara sığorta deyil, başqa adla adlandırmaq daha düzgün olardı.

Azərbaycan Respublikasının Əmək Məcəlləsi ilə nəzərdə tutulur ki, hər bir işəgötürən: Tibbi sığorta haqqında Azərbaycan Respublikası Qanunu ilə müəyyən olunmuş qaydada hər bir işçinin icbari tibbi sığortalanmasını təmin etməlidir.

Şübhəsiz ki, işəgötürənlərin əksəriyyəti həm qanunu əsas tutub, eyni zamanda xoş niyyət ilə kifayət qədər vəsait ödəyib, öz işçilərini tibbi sığorta edir. Əsl problem isə bundan sonra başlayır.

Sığorta təşkilatlarının əksəriyyəti isə çalışır ki: ilk olaraq tibbi sığorta müqaviləsinə daha az müalicə xəstəlikləri yazsın, daha ağır və pul vəsaiti tələb edən xəstəliklərı, müayinə və ya müalicələr yazılmasın, hər imkandan istifadə edib müxtəlif əsassız və qanunsuz bəhanələrlə sığorta pulunu ödəməsin, bir gündə daha az sayda müalicə və müayinə ilə əlaqədar həkimə müraciət olunsun, ödəniş az edilsin, daimi olaraq şablon sözlərdən istifadə edilməklə "sizin müayinə, müalicəniz sığorta müqaviləsində yoxdur " kimi bəhanə və imtinalardan istifadə etsin və sair..."

Yəni aydın olanı odur ki, konkret olaraq Mərkəzi Klinik Xəstəxanasında ölkə qanunları qulaqardına vurulur...

Məşhur Bodrum marinası ətrafındakı vəziyyət qərbli araşdırmaçı jurnalistlərin diqqətini cəlb edib.

Gununsesi.info-nun xarici mediaya istinadən verdiyi xəbərə görə, araşdırmalarda son bir ildə məşhur azərbaycanlı oliqarx Anar Əlizadəyə (Əliyev) məxsus Bodrum Marinası qərb hüquq-mühafizə orqanları tərəfindən sanksiyaya məruz qaldığı üzə çıxıb. Bu da öz növbəsində rusiyalı milyarderlər narahat edib.

Məlumata görə, gəmi istehsalçıları bəzi yaxtalar üçün Bodrum Yalıkavakın etibarlı çətiri altında gizlənməyə imkan verən naviqasiya avadanlığını uzaqdan söndürüblər.

Bodrumda Eurochem şirkətlərinin qurucusu Andrey Melniçenkonun yaxtası da nəzərə çarpılıb.

“Melniçenkonun Trieste” limanında yaxtalardan biri italiyanın hüquq-mühafizə orqanları tərəfindən həbs edilsə də, “Melniçenko”- nun ikinci motorlu yaxtası (“A” – Motor Yaxtası A) Anar Əlizadənin köməyi ilə Bodrumda gizlədilib.

Anar Əlizadə yanacağın qiymətini dərhal iki dəfə qaldırıb.

Jurnalistlər yaxtanın və PJSC Severstal-ın Direktorlar Şurasının sədri Aleksey Mordaşovun da izinə düşüblər. Saxalin sahillərində tez-tez görünən Mordaşovun yaxtası artıq 2022-ci ilin sonundan etibarən Əlizadəni ziyarət edir.

Eyni zamanda jurnalistlər məhz Bodrumda “İnterros” şirkətinin prezidenti Vladimir Potaninə məxsus “Nirvana” yaxtasını da araşdırıblar.

Son zamanlar Anar Əlizadə Türkiyə xüsusi xidmət orqanlarının diqqət mərkəzindədir. Hazırda iş adamı cinayət təqibi altındadır və dələduzluqda ittiham olunur.

İş adamının nəzarətində olan şirkətlər Avropa ölkələrinə ixrac olunan neftə verilən sertifikatları saxtalaşdırmaqla məşğul olub.

Qeyd edək ki, bir müddət əvvəl Böyük Britaniya Milli Cinayət Agentliyi (NCA) A.Əlizadənin Londondakı maliyyə aktivlərinin mənşəyi ilə bağlı araşdırmalara başlamışdır.(Gununsesi.info)

Mövzuya qayıdacağıq.

Əmlak Məsələləri Dövlət Xidmətinin şöbə müdiri Taleh Bəşirovla bağlı ilginc iddiaların yer aldığı məqaləni dünən dia-az.info olaraq diqqqətinizə təqdim etmişdik.

Yazı burada: My Webpage

Məqalənin davamında deyilir:

"Taleh Bəşirovla bağlı faktlardan biri də budur ki, şöbə müdiri zəbt etdiyi köçkün düşərgəsində villalar inşa etmək üçün onlarla ağacı ağır texnika vasitəsilə məhv edib. Məcburi köçkünlər onlar tərəfindən əkilən və əsasən meyvə ağaclarından ibarət olan yaşıllığın məhvinə etiraz etsə də, onların etirazına məhəl qoyan olmayıb.

Taleh Bəşirov son bir neçə ildə əkilən ağaclarla yanaşı, sovet dönəmində əkilən onlarla ağacı da məhv edib. Lakin məcburi köçkünlərin ağacların məhvi ilə bağlı artan etirazından sonra məsələyə əlaqədar dövlət qurumlarının qarışacağından ehtiyat edən şöbə müdiri digər ağacların məhvini təxirə salıb. Məqsəd əraziyə baxış keçiriləcəyi təqdirdə səlahiyyətli şəxsləri yaşıllıqların məhv edilmədiyinə inandırmaq, onlara “dərman üçün” bir neçə ağac təqdim etməkdir".

Dia-az.info bildirir ki, sonda məqalə müəllifi olan narazı vəttəndaşlar media nümayəndələrinə çağırışda da bulunurlar: "Sizi Novxanı çimərliyi “Sarıqaya” yaşayı massivi “Metallurq” düşərgəsinə gələrək baş verənləri öz gözlərinizlə görməyə çağırırıq. Düşərgə “Spring” otelden bir kilometr uzaqlıqda yerləşir. Bura gəlsəniz əmin olacaqsınız ki, ölkədə şahlıq edən qanun yox, Taleh Bəşirovdur..." (Dia-az.info)

“Kənd təsərrüfatının inkişafı üçün dəyər zənciri olmalı, proseslər A-dan Z-yə bir-birini dəstəkləməlidir”.

Bu fikirləri kənd təsərrüfatı sahəsində olan mövcud problemlər və çatışmazlıqlar barədə danışan kənd təsərrüfatı məsələləri üzrə ekspert Şahin Nəcəf Yenicag.az-a açıqlamasında deyib.

Onun sözlərinə görə, Azərbaycanda kənd təsərrüfatında olan problemlər kifayət qədər çoxdur:

“Meliorasiya-sulama sistemləri ilə bağlı olan ciddi problemlər hələ də qalmaqdadır. Bildiyimiz kimi, Cənubi Qafqazda ən az şirin su ehtiyatına malik ölkə Azərbaycandır. Cənubi Qafqazda şirin su ehtiyatlarının 67 faizi Gürcüstanın, 29 faizi Ermənistanın, 11 faizi isə Azərbaycanın payına düşür.
Buna baxmayaraq, hökumət hər il əkin sahələrinin dövriyyəsini artırır və həvəslə hesabat verilir ki, 150-160 min hektar örüş sahəsi əkin sahəsinə qaytarılıb. Kiçik təsərrüfatlar özlərinin bir-iki yerini sulamağa çətinlik çəkdiyi, Azərbaycanda şirin su ehtiyatlarnın bu qədər qıt olduğu halda, əkin sahələri dövriyyəyə qaytarılır. Lakin heç kim demir ki, 150 min hektarlıq sahə hansı mənbədən sulanacaq. Bunların hamısı kiçik fermer təsərrüfatlarının məhvi hesabına əmələ gələn porblemdir və hesabatlılıq, demək olar ki, yoxdur.

Mən dəfələrlə təklif etmişəm ki, ən azı bu məsələdə növbəli əkinə keçmək olar. Fermer 20 hektar taxıl əkib su olmadığına görə 10 ton taxıl əldə etməkdənsə, 10 hektar əkərək 50 ton taxıl yığsın. Geridə qalan növbəli əkin olan yerə də subsidiya verilsin. Bu gün subsidiyaların verilməsinə ciddi nəzarət var. Aldığın sahənin 10 sotu belə əkilmədikdə Kənd Təsərrüfatı Nazirliyi tərəfindən cəza tətbiq edilir.

Bu gün Kənd Təsərrüfatı Nazirliyindən çox şey gözləmək də olmur. Çünki kənd təsərrüfatı naziri portfelsiz nazirdir. Onun heç bir səlahiyyəti yoxdur. Bu gün onun yeganə məşğul olduğu sahə subsidiyaların verilməsidir. Əhalinin 40 faizi aqrar sahədə çalışsa da, nazirin səlahiyyəti məhduddur. Mən meliorasiyanı Kənd Təsərrüfatı Nazirliyinə billəşdirilməsinin tərəfdarı idim.

Kənd təsərrüfatının inkişafı üçün dəyər zənciri olmalı, proseslər A-dan Z-yə bir-birini dəstəkləməlidir. Bu gün tonlarla soğan fermerin əlində qalaraq çöplüyə atılır. Milyonlarla ziyan olundu. Çünki Belarusdan soğanın buraxılması yerli fermerin ziyan etməsi ilə nəticələndi. İstixanalarda xiyar yetişdirən fermer İrandan məhsulun buraxılması nəticəsində ziyana düşür. Məsələn, Azərbaycanda Şəmkir pomidorunun 1 kiloqramının maya dəyəri 1 manat 40 qəpiyə əmələ gəlirsə, iranınkı isə 52 qəpiyə əmələ gəlir. Fermerlər azca pul qazanan kimi belə halların baş verməsi onların, belə deyək, “belini qırır”.

Bu gün ən böyük çatışmazlıqlardan biri min hektarlarla meyvə bağı salınsa da, konserv, meyvə qurutma zavodlarının az olmasıdır. Bunlar düzgün hesablanmalıdır. Şəmkir kimi aqrar sahədə böyük sərmayələr qoyulan bir rayonda bir konserv zavodu belə yoxdur. Birinci dərəcəli mallar bazarlara göndərilsə də, ikinci dərəcəli malların taleyinin necə olduğu bilinmir, yəni zavod yoxdursa, deməli, bunlar çoplüyə atılır.

Ümumiyyətlə, kənd təsərrüfatı sahəsində olan problemlər danışdıqca bitməyəcək qədər çoxdur. Bu gün Kənd Təsərrüfatı Nazirliyinin statistikalarına baxsaq, çoxlu sayda məhsulun yığılmasını göstərildiyini görərik. Lakin 42 faiz aqrar sahə ilə məşğul olan kiçik təsərrüfatların payının nə qədər olduğunu soruşsaq, bir-iki faiz olduğunu görərik. Kənd təsərrüfatının inkişafından danışdıqda onu iki hissəyə bölməliyik: bəzi məmurlara məxsus olanlar və kiçik təsərrüfatlar. Kiçik təsərrüfatlar doğru şəkildə dəstəklənmədikcə kəndlərimiz boşalacaq, kəndli yazda əkinçi, qışda dilənçi olacaq”.

Yenicag.az

Son 200 ildə Azərbaycan tarixinə bir çox şanlı səhifələrlə yanaşı, faciələr və soyqırımıları, müsibətlərlə dolu səhifələr də yazılıb. Bu dəhşətli hadisələrdən biri 1918-ci ilin mart-aprel aylarında yaşanıb.

106 ildir ki, 31 mart tarixi Azərbaycan xalqının qan yaddaşından soyqırımı dərdi kimi silinmir, unudulmur. Odur ki, ölkədə martın son həftəsində səhər saatlarından başlayaraq azərbaycanlıların soyqırımının 106-ci ildönümü ilə əlaqədar Quba Soyqırımı Memorial Kompleksini kütləvi şəkildə ziyarət edildi. Ziyarətçilər arasında hökumət və dövlət nümayəndələri, idarə və müəssisələrin kollektivləri, siyasi və ictimai təşkilatların üzvləri, respublikamızın bölgələrindən olan şagird və tələbələr, müəllimlər, sıravi insanlar, eləcə də xarici vətəndaşlar vardı. Ziyarətçilər soyqırımı qurbanlarının xatirəsini anmaqla yanaşı, həm də tarixi faktlarla daha yaxından tanış olurdular.

Martın 30-da Quba Soyqırımı Memorial Kompleksində soyqırım qurbanlarının xatirəsinə ucaldılmış abidəni ziyarət edənlərdən bir qrupu Ağdam rayonunun Bakıda fəaliyyət göstərən orta məktəblərdən birinin müəllim və şagird kollektivi olub. Ziyarət zamanı müəllim və şagirdlər bələdçi tərəfindən bir sıra arxiv sənədləri, bir çox tarixi şəkillərlə ətraflı tanış edilərək, erməni vəhşiliyinin şahidi olublar...

Bu barədə redaksiyamıza məlumat verən adının çəkilməsini istəməyən məktəbin müəlliməsi bəzi gileylərini də bildirdi. Qeyd etdi ki, müəllim və şagird kollektivi da Quba Soyqırımı Memorial Kompleksində soyqırım qurbanlarının xatirəsinə ucaldılmış abidəni ziyarət etdikdən sonra Bakıya qayıtmaq üçün sifariş etdikləri avtobusla yola çıxıblar. Müəllimənin sözlərinə görə, hər şey kollektivin Quba rayonunun Qəçrəş meşəsində yol kənarında fəaliyyət göstərən kafe və restoranlardan birində çay içmək təklifi ilə başlayıb: "Təklifimizlə razılaşan sürücü qısa bir məsləhətləşmədən sonra avtobusu yol kənarında ilk qarşılaşdığımız "Şah Quba" restoranının yanında saxladı.

Avtobusdan düşən məktəbliləri və onlara nəzarət edən müəllimələri qarşılayan xidmətçiyə çay içəcəyimizi bildirdik. Şagirdlər və müəllimələrimiz göstərilən masada əyləşdikdən sonra bizə yaxınlaşan xidmətçi çayla bərabər konfet, mürəbbə, quru meyvələr, şirniyyatların da "çay dəstgahı"na daxil edildiyini söylədi. Biz isə dedik ki, Bakıdan Quba soyqırımı qurbanlarını ziyarət etməyə gəlmişdik, yalnız hərəyə bir stəkan çay içəcəyik, sonra gedəcəyik. Həm də bildirdik ki, şirniyyat özümüzdə var, ona görə də zəhmət olmasa, yalnız hər kəsə bir stəkan çay gətirsin.

Aldığı cavabdan sanki əhvalı korlanan xidmətçinin getməyi ilə qayıtmağı bir oldu. Dilxor halda qayıdan xidmətçi əlindəki armudu stəkanları masanın üstünə qoyaraq getdi. Çox keçmədi ki, xidmətçi tez-tələsik iki samovarı əyləşdiyimiz masanın üzərinə qoyub geri döndü. Bu dəfə dəm çayniklərini gətirən xidmətçiyə narazılığımızı bildirdik ki, axı biz samovar sifariş etməmişik, hər kəsə bir stəkan çay istədik. Xidmətçi dedi ki, burada müştərilərə çayı yalnız samovarla verirlər. Biz də qayıtdıq ki, əgər belədirsə, bizə bir samovar bəs edər, ikincisi artıqdır. Xidmətçi isə bildirdi ki, hər iki samovar artıq kassaya daxil edilib, geri qaytarmaq mümkün deyil. Şagirdlərinin gözü qarşısında heç də xoş olmayan durumla üzləşən müəllimələr çıxılmaz vəziyyətdə qaldılar... Havanın yavaş-yavaş qaraldığını və yolun uzaqlığını nəzərə alaraq vaxt itirməmək üçün hər kəs bir stəkan çay içib qalxdıq. Və xidmətçini çağırıb yenidən haqlı narazılığımızı bildirdik və ikinci samovardan istifadə olunmadığını, hətta birinci samovardan suyun və dəmin artıq qaldığını dedik. Başını qaldırmadan dodağı altında mızıldanan xidmətçinin nə dediyini anlamasaq da, içilən çay üçün nə qədər ödəyəcəyimiz hesabı soruşduq. Xidmətçi cavab verdi ki, iki samovar üçün 50 manat ödəməlisiniz. Etiraz etdik ki, bu pulu ödəmək imkanında deyilik. Bir az öncəki mübahisədən hələ də sakitləşməyən əsəblərimiz yenidən tarıma çəkildi. Dedik, "ay oğul, bu gün hamımız üçün çətindir, dediyimiz kimi, Bakıdan bura Quba soyqırımı qurbanlarını ziyarət etməyə gəlmişdik, indi ziyarətdən qayıdırıq, hamımızın əsəbləri gərilib, tarıma çəkilib, hamımız yorulmuşuq, sən də bir tərəfdən bizi əsəbləşdirmə. Bu gördüyün körpələrin hamısı doğma yurd-yuvalarından 30 ildir didərgin düşən insanların övladları, nəvə-nəticələridir. Onlar öz istəkləri ilə, könüllü pul toplayıb sifarişlə avtobus tutub bu qədər yolu qət edib gəliblər ki, Quba soyqırımı qurbanlarını ziyarət etsinlər. İndi sən də deyirsən ki, 5-6 litir qaynamış su və iki balaca çaynik üçün 50 manat verin. Burada yəni suyun qiyməti bu qədər bahadır? Bu insafsızlıqdır. Belə çörək qazanmazlar... Uzun sözün qısası, biz çox dedik, amma o az eşitdi. Dedi, siz 50 manatı verməlisiniz, yoxsa o pulu mənim əməkhaqqımdan kəsəcəklər. Xidmətçi iki ayağın bir başmağa dirədi ki, olmaz, siz 50 manatı mütləq verməlisiniz. Bu arada restoranın digər xidmətçiləri də ətrafımıza toplaşıb məsələyə müdaxilə etməyə başladılar. Onlara bu barədə aidiyyəti yerlərə şikayət edəcəyimizi bildirsək də, dedilər, bura elə bir adamındır ki, ona heç nə edə bilməzsiniz, yaxşısı budur pulunuzu verib gedin. Gördük ki, nə etsək də, xidmətçi fikrini dəyişmək niyyətində deyil. Məsələnin daha da böyüməməsi üçün təkcə qaynar su üçün 40 manat ödəyib (çek təqdim edilmədi), avtobusa minib Bakıya yola düşdük...

...Yol boyu avtobusun salonunda səs-səmir, hərəkət deyilən hec nə yox idi. İnsanın hövsələsini daraldan səssizlik çökmüşdü hər kəsin üzərinə. Beləcə, yolumuza davam edirdik. Amma bu səssizlikdə bəzi qarışıq fikirlər məni rahat buraxmadı... İllər keçəcək, fəsillər dəyişəcək, lakin "Şah Quba" restoranında bugünkü üzləşdiyimiz ədalətsizlik heç zaman unudulmayacaq. Məktəbimizin kollektivi üçün bu xoş olmayan anlar unudulmaz bir gün olaraq yaddaşımızda qalacaq. Onu da deyim ki, "Şah Quba" restoranının işçiləri tərəfindən bizə olunan hörmətsizlik, sayğısızlıq Quba soyqırımı qurbanlarının ruhuna da sayğısızlıqdır. Biz bu özbaşınalıqlara birtəhər dözdük. Amma gördük ki, "Şah Quba" restoranında başdan-başa, sözün əsl mənasında soyğunçuluq hökm sürür. Müştərilərdən bir samovar qaynamış su və iki qaşıq quru çay üçün 50 manat tələb edirlər. Qubada su tapılmır, yoxsa restoran işçilərinin insafı yoxdur? Adam onların əvəzinə utanır, xəcalət çəkir! Çünki bu kimi yeməkxana, restoran və çayxanalarda müştərilərin "cibinə girməklə" "rahat yolla pul qazanırlar". Məsələn, çox uzağa getməyək, elə Qəçrəş meşəsində yol boyu əraziləri zəbt edən restoran, kafe və yeməkxanalarda soyğunçular imkanlarını genişləndirmək, var-dövlət toplamaq, villa tikdirmək, bahalı maşınlar almaq üçün gecə-gündüz müştəriləri aldadırlar. Niyə burada qayda-qanun yaradılmır? Bu özbaşınalığa nə qədər dözmək olar? Özü də bu özbaşınalıqla Qurani-Kərimin nazil olduğu mübarək Ramazan ayında üzləşdik. Halbuki Müqəddəs Ramazan ayı insanları gözəl niyyətlər və xeyirxah əməllər naminə birliyə çağırır, onları əmin-amanlıq, qardaşlıq və bərabərlik yoluna dəvət edir. İnsanlar bu ayda Allah və din qarşısında vicdani borc və vəzifələrini ləyaqətlə yerinə yetirmək fürsəti qazanır, mənəvi-ruhi kamilliyin nəfs üzərində qələbə sevincini yaşayırlar. Bundan başqa, Müqəddəs Ramazan ayı boyunca respublikamızın müxtəlif regionlarında iftar süfrələri açılır. Məgər "Şah Quba" restoranının sahibinin bunlardan xəbəri yoxdurmu? Əgər bunu edə bilmirsə, ən azından insafı əldən verməsin. Əmin olmaq istəyirik ki, növbəti səfərlərimizə qədər "Şah Quba" restoranının rəhbərliyi dediklərimizdən dərs çıxaracaq...".

Məsələ ilə bağlı qarşı tərəfin də mövqeyini dərc etməyə hazırıq.

tezadlar.az

Ağcabədi Rayon İcra Hakimiyyətinin "Hindarx qəsəbəsində və Ağcabədi şəhər Bayraq meydanında görüləcək abadlıq və təmir işləri üçün layihə-smeta işlərinin satın alınması" ilə bağlı elan etdiyi tender ləğv edilib.

32gun.az xəbər verir ki, buna səbəb Tenderdə iştirak etmək üçün tender təklifi vermiş iddiaçıların sayı üçdən az olmasıdır.

Bu da DSQ 11.1-ci maddəsi il tənzimlənir.

Xatırladaq ki, Ağcabədi Rayon İcra Hakimiyyətinin başçısı Rafil Hüseynovdur.

Sabah Ramazan ayının 24-cü günüdür.

Qafqaz Müsəlmanları İdarəsinin açıqladığı Ramazan təqviminə əsasən, aprelin 3-də Bakıda imsak saat 04:53, iftar isə saat 19:22-dədir.

Ramazan ayının 24-cü gününün duası:

"Allahummə inni əs-əlukə fihi ma yurzik. Və əuzu bikə mimma yu-zik. Və əs-əlukət-tovfiqə fihi li-ən utiəkə və la ə-siyək. Ya cəvadəs-sailin".

Tərcüməsi:

"İlahi, bu gün səni razı salan əməlləri səndən istəyirəm. Səni qəzəbləndirən əməllərdən sənə sığınıram. Sənə tabe olmaq və sənə qarşı üsyan etməmək üçün yardım istəyirəm. Ey xahiş edənlərə bəxşiş verən Allah!"

Allah orucunuzu qəbul etsin!

Oxucularımıza yenə də dia-az.info olaraq Qaxın Kötüklü kəndində sayseçmə ağacların qanuni kəsilməsindən bəhs etmək istəyirik.
Daha öncə bu barədə paylaşım etmişdik. ETSN-in reaksiyası bu oldu ki, elə belə də olmalıdır. Az kötük paylaşmışdıq deyə miqyas çox da vahiməli deyildi. Bu da heç nədir. Burda cəmi 20 filan ağac var. Ölkə üzrə 10 minlərlə belə ağac qanunla kəsilir hər il. Gedib bunları bir-bir çəkməyə nə resurs var, nə də ehtiyac, bu statistikadır.
Dərd odur ki, ETSN-ə görə burda problemli heç nə yoxdur, qanunidir və söhbət öldü...
Nümunə üçün ona görə ki, bura tək deyil bütün qırma sahələri bu gündədir. Dia-az.info bildirir ki, qazlaşma artsa da, odun tələbatı olan müəssisələr mərkəzi istilik sisteminə keçsə də ETSN qanuni ağac kəsmə işini hər il artırır. Məqsəd isə yanacaq odun tədarükü deyil. Əvvəl qanunsux yolla tədarük edilən ağac materialını indi qanunla tədarük edirlər. Sizcə bu meşənin vecinədir? Əlbəttə ki yox.
Bizim meşəçilər hər cəhdlə bunu normallaşdırmağa çalışırlar. Sovet dövründə Rusiyada Ukraynada aldıqları təhsillə meşədən ağac tədarükünün planlaşdırılmasından, icrasından danışırlar. Fərq ondadır ki, o ölkələrdə meşədən ağac tədarükü meşə əkinlərindən periodik baş verirdi, o ölkələrin ucsuz bucaqsız düzən meşələri var idi. Bizim meşələr isə 90% + dağətəyi təbii meşələrdir, erroziyaya meyllidir və bizim çox az meşəmiz var.
Hər il 10 minlərlə bu cür ağaclar qanunla kəsilirsə, meşənin vecinə də deyil, bu qanunidir yoxsa qanunsuz.
Sizcə kütləvi şəkildə nəhəng ağaclar kəsilirsə bunun qanuni ya qanunsuz olmağının iqtisadi cəhətdən başqs nə fərqi var?
Biz daha öncə də təklif etmişdik, meşələrimizin az və həssas olmasını nəzərə alaraq kommersiya məqsədli ağac materialı tədarükünün tamamilə dayandırılsın. Necə ki, 2018-ci ilə qədər belə idi. İndi də təkrar edirik: Bu qanuni meşə qırğınlarına "dur" deməyin vaxtıdır.

Bakı şəhəri, Səbail rayonu, Rostropoviçlər küçəsi, ev 7-11 və Nizami küçəsi, ev 4 kəsişməsi ünvanında yerləşən "Pilot Residence” MTK tərəfindən inşa edilmiş binadakı özbaşınalıqlar və qanusuzluqlar barədə mətbuatda mütəmadi xəbərlər yayımlanır. Binada yaşayan sakinlərin sözlərinə görə, MTK tərəfindən yaşayış kompleksində inşaat-təmir işləri dəfələrlə dondurulmuş, təsdiqlənmiş layihədən saysız-hesabsız kənarlaşma və ciddi reviziyalar baş vermiş və yaşayış binasının daxili həyətində təsdiqlənmiş Layihədə ümumiyyətlə mövcud olmayan iri ticarət obyektinin inşası həyata keçirilmişdir. Problemlər bununla da bitmir. Şikayətçilər bildirir ki, "Pilot Residence” MTK törədilmiş hüquq pozuntularına görə məsuliyyətdən qaçması üçün Mənzil Mülkiyyətçiləri Müştərək Cəmiyyəti yaratmaq niyyətindədir və ikinci dəfə bu Cəmiyyətin qurulması barədə bir qisim mənzil sahibinin imzasını saxtalaşdıraraq, onların adından guya imza toplamış kimi göstərərək təqdim olunan saxta Protokolu qeydiyyatdan keçirmək üçün Ədliyyə Nazirliyinə göndərmişdir. Qeyd olunur ki, MTK və ya digər bir təşəbbüs qrupu tərəfindən bu məqsədlə heç vaxt Mənzil Sahiblərinin Ümumi İclası keçirilməyib, Ədliyyə Nazirliyinə MTK-nın təşəbbüsü və təşkilatçılığı ilə təqdim olunmuş Protokolda təqdim olunan mənzil sahiblərinin imzalarının bir qismi mənzil sahibləri tərəfindən atılmayıb, digər bir qisminin isə etibarsız olduğuna ciddi əsaslar mövcuddur.

Üzərindən xeyli müddət keçməsinə baxmayaraq, MTK rəhbərliyi hələ də sakinlərin haqlı narazılıq və şikayətlərini təmin etmir. Bütün bunları nəzərə alaraq, Azərbaycan Respublikası Ədliyyə Naziri postunda dəyişiklikdən - yeni nazir təyinatından sonra "Pilot Residence” Yaşayış Kompleksindəki 22 nəfər mənzil sahibi adından Ədliyyə Nazirliyinə, həmçinin Azərbaycan Respublikasının İnsan Hüquqları üzrə Müvəkkilinə (Ombudsman), Azərbayan Respublikası Baş Prokurorluğu yanında Korrupsiyaya qarşı Mübarizə Baş İdarəsinə, Bakı şəhəri prokuroruna və Ədliyyə Nazirliyinin Ədliyyə sahəsində xidmətlər Baş idarəsinə şikayət məktubu ünvanlanmışdır. Məktubda Ədliyyə nazirindən MTK-nın mənzil mülkiyyətçilərindən xəbərsiz təqdim olunan, saxta sənədlər əsasında Mənzil Mülkiyyətçilərinin Müştərək Cəmiyyətinin (MMMC) formalaşması barədə "Ümumi İclasın Protokolu” və digər sənədlərin etibarlılığının yoxlanılması, saxtakarlıq aşkar olunduqda həmin əməllərə hüquqi qiymət verilməsi məqsədilə prokurorluq orqanlarına göndərilməsi, sakinlər və MTK arasında Səbail Rayon Məhkəməsində olan mübahisələri nəzərə alaraq həmin mübahisələr yekunlaşanadək və MTK Yaşayış Kompleksinin sakinləri qarşısında tərəflər arasında Müqavilələrdə qeyd olunmuş öhdəlikləri tam yerinə yetirənədək mövcud MTK-nın yerinə yeni idarəetmə "SƏBAİL-23” MMMC-nin formalaşması barədə MTK-nın vermiş olduğu müraciətin baxılmasının dayandırılmasına göstəriş verilməsi xahiş olunur.

Həmin məktubu olduğu kimi diqqətinizə çatdırırıq:

Azərbaycan Respublikasının Ədliyyə naziri

cənab Fərid Əhmədova

Surəti: Azərbaycan Respublikasının İnsan Hüquqları üzrə

Müvəkkili (Ombudsman) xanım Səbinə Əliyevaya

Surəti: Azərbayan Respublikası Baş Prokurorluğu yanında

Korrupsiyaya qarşı Mübarizə Baş İdarəsinin rəisi

cənab Nazim Rəcəbova

Surəti: Bakı şəhəri prokuroru cənab Elşən Abbasova

Surəti: AR Ədliyyə Nazirliyinin Ədliyyə sahəsində xidmətlər Baş idarəsinin rəisi cənab İlqar Məmmədova

Bakı şəhəri, Səbail rayonu, Rostropoviçlər küçəsi, ev 7-11 və

Nizami küçəsi, ev 4 kəsişməsi ünvanında yerləşən

"Pilot Resıdence” MTK yaşayış binasında yaşayan sakinlər tərəfindən

KOLLEKTİV MÜRACİƏT.

Hörmətli cənab Nazir!

Yaşadığımız Bakı şəhəri, Səbail rayonu, Rostropoviçlər küçəsi, ev 7-11 və Nizami küçəsi, ev 4 kəsişməsi ünvanında yerləşən "Pilot Residence” MTK tərəfindən inşa edilmiş binadakı özbaşınalıqların və qanusuzluqların qarşısının alınması məqsədilə mənzil sahibləri adından Sizə müraciət etmək məcburiyyətində qalmışıq.

Belə ki, Səbail Rayonu İcra Hakimiyyətinin 2 iyun 2017 il tarixli 3/10-497 saylı Sərəncamı ilə təsdiqlənmiş Pilot Layihəyə uyğun olaraq "Pilot Residence” MTK yaşayış binasının tərkibində 1) ümumi qapalı istirahət parkı, 2) yeraltı qaraj mərtəbəsi və 3) Rostropoviçlər küçəsinə avtomobil və piyada giriş-çıxışı inşa etməklə, mənzillərlə birgə 2019-cu ilin sonunadək sahiblərinə tam təhvil verməyi öhdəliyinə götürmüşdür.Binanın sakinləri ilə "Pilot Residence” MTK arasında yaşayış binası, qaraj mərtəbəsinin inşası və onun tərkibindəki mənzil və yeraltı qaraj yerlərinin, qapalı həyətin və Rostropoviçlər küçəsinə giriş-çıxışın 2017-ci ildə təsdiqlənmiş Layihəyə uyğun təhvili və istismarının təmin edilməsi və sakinlərə verilməsi istiqamətində bizimlə müvafiq alqı-satqı müqavilələri imzalanmışdır.

Buna baxmayaraq, MTK tərəfindən yaşayış kompleksində inşaat-təmir işləri dəfələrlə dondurulmuş, təsdiqlənmiş Layihədən saysız-hesabsız kənarlaşma və ciddi reviziyalar baş vermiş və yaşayış binasının daxili həyətində təsdiqlənmiş Layihədə ümumiyyətlə mövcud olmayan iri Ticarət Obyektinin inşası həyata keçirilmişdir. Belə ki, çoxmənzilli yaşayış binasının 5-ci blokunun qarşısında tikilən, "Pilot Residence” MTK tərəfindən təxminən 850 kv.m. sahəni əhatə edən ərazidə həmin binanın dövlət orqanı tərəfindən təsdiq edilmiş layihəsində göstərilməyən və heç bir rəsmi icazə sənədi olmayan qanunsuz tikili tikilmiş və "Bazarstore” MMC-yə icarəyə verilmişdir. Bu qanunsuz tikilinin mövcudluğu bina sakinlərinin binadan və binanın layihə üzrə göstərilən həyətindən normal istifadəsi üçün ciddi problem yaratmaqdadır.

Bundan başqa inşaatı faktiki 2016-cı ildən, 2017-ci ildən isə mənzil və yeraltı qarajların satışına başlanmasına baxmayaraq, idarəetməni faktiki həyata keçirən MTK Təsisçisinin acgözlüyü ucbatından "Pilot Residence” yaşayış kompleksinin həyəti və qarajlarına giriş-çıxış Layihəyə uyğun şəkildə təmin olunmamışdır, həyətinin ərazisində isə qeyri-qanuni şəkildə iri kommersiya obyektinin tikilməsi azmış kimi, çoxmənzilli yaşayış binasının 3-cü blokunun girişinin sağ tərəfində binanın rəsmi dövlət orqanları tərəfindən təsdiq edilmiş layihəsində göstərilməyən və heç bir rəsmi icazəsi olmayan 2 mərtəbəni əhatə edən qanunsuz dəmir tikili inşa olunaraq, qeyri-yaşayış obyekti sahibinə satılmışdır.

Həm "Pilot Residence” MTK, həm də "Bazarstore” MMC faktiki olaraq sakinlərə məxsus, onların Layihəyə əsasən istifadə edə biləcəyi binanın həyətini qanunsuz şəkildə istifadə edərək qanunsuz gəlir əldə edirlər. Qeyd olunan qanunsuz tikilinin binanın həyətində mövcud olması və fəaliyyət göstərməsi Şəhərsalma və Tikinti normalarının vəyanğın təhlükəsizliyi norma və qaydalarının kobud şəkildəpozuntusu oğlduğundan sakinlər tərəfindən kollektiv formada qanunsuz tikillilərin sökülməsi tələbi ilə Səbail Rayon Məhkəməsinə müraciət olunmuş, həm "Pilot Residence” MTK, həm də "Bazarstore” MMC-ni cavabdeh qismində məhkəməyə verilmiş və Layihənin ərazisində qanunsuz tikililər barədə qismində iddiamız təmin olunmuşdur. (Məhkəmə Qətnaməsi bu Müraciətimizə əlavə olunmuşdur.)

"Pilot Residence” MTK bu günədək bizimlə bağlanılmış müqavilələrdə göstərilən şərtləri yerinə yetirmir, sakinlərdən külli miqdarda vəsait toplayaraq, yaranmış öhdəliklərin icraatından boyun qaçırdır; "Pilot Residence” Yaşayış Kompleksi və onun ərazisində dövlət orqanı tərəfindən 2017-ci ildə təsdiqlənmiş Layihəsindən baş vermiş kənarlaşmaları davamlı olaraq həyata keçirdir. Bununla əlaqədar qeyd etmək lazımdır ki, yaşayış binası üzrə Səbail Rayonu İcra Hakimiyyəti tərəfindən dövlət qəbulu sənədləri təsdiqlənsə belə, mənzil sahiblərinin ciddi bir qismi müvafiq qaydada Çıxarışlarını əldə edə bilməmişdir və MTK tərəfindən 2017-ci ildə təsdiqlənmiş Layihənin tam yekunlaşması istiqamətində hələ də icra olunmayan işlər mövcuddur (yuxarıdakı ilə bağlı Səbail Rayon və Bakı

Appelyasiya Məhkəmələri tərəfindən MTK-nın öhdəlikləri təsdiqlənmişdir, İcra Olunmamış İşlərin Siyahısı da əlavə olunmuşdur).

Bildirmək istəyirik ki, "Pilot Residence” MTK törədilmiş hüquq pozuntularına görə məsuliyyətdən qaçması üçün Mənzil Mülkiyyətçiləri Müştərək Cəmiyyəti yaratmaq niyyətindədir və yeni Cəmiyyətin qurulması barədə mənzil sahiblərinin imzasını saxtalaşdıraraq, onların adından guya imza toplamış kimi göstərərək təqdim olunan saxta Protokolu qeydiyyatdan keçirmək üçün Ədliyyə Nazirliyinə göndərilmişdir. Xüsusi qeyd etməliyik ki, MTK və ya digər bir təşəbbüs qrupu tərəfindən bu məqsədlə heç vaxt Mənzil Sahiblərinin Ümumi İclası keçirilməyib, Ədliyyə Nazirliyinə MTK-nın təşəbbüsü və təşkilatçılığı ilə təqdim olunmuş Protokolda təqdim olunan mənzil sahiblərinin imzalarının bir qismi mənzil sahibləri tərəfindən atılmayıb, digər bir qisminin isə etibarsız olduğuna ciddi əsaslar mövcuddur.

Təsəvvvür edin ki, "Pilot Residence” MTK-nın məsul şəxsləri sakinlərdən xəbərsiz onların adından saxta imza ataraq və saxta protokol tərtib edərək yalandan törədilmiş hüquq pozuntularına görə məsuliyyətdən qaçması üçün Mənzil Mülkiyyətçiləri Müştərək Cəmiyyəti yaratmaq istəyirlər. Bir dəfə belə bir cəhd edilmiş və heç bir iclas keçirmədən, MTK işçiləri tərəfindən sakinlərin adından saxta imzalar atılmaqla "SƏBAİL-23” MMMC qurulması ilə bağlı AR Ədliyyə Nazirliyinin Ədliyyə sahəsində xidmətlər Baş idarəsinə müraciət olunmuş, ancaq sənədlərdə səhvlik olduğundan qeydiyyat təsdiq olunmamışdır. Ancaq bizdə olan məlumatlara görətəkrarən saxta sənədlər əsasında yenidən AR Ədliyyə Nazirliyinin Ədliyyə sahəsində xidmətlər Baş idarəsinə müraciət olunmuş və hazırda həmin sənədə baxılmaqdadır. Saxta sənəd tərtibatı ilə Səbail Rayon Prokurorluğuna şikayət etməyimizə baxmayaraq, prokurorluq tərəfindən heç bir araşdırılma aparılmamış və açıq aşkar saxta sənəd tərtib olunması ilə bağlı cinayət əməli araşdırılma aparılmadan bağlanılmışdır.

Yuxarıda qeyd olunanlardan göründüyü kimi bizimlə MTK arasında kifayət qədər mübahisələrimiz var və həmin mübahisələrin həlli üçün binamızın bir neçə sakinlər qrupları tərəfindən "Pilot Residence” MTK-nın götürdüyü öhdəliklərdən yayınması və fəaliyyətindəki ciddi qanunsuzluqlar, o cümlədən kvadratura itkiləri, barədə təqdim olunmuş kollektiv şikayətlər hazırda Səbail Rayon Məhkəməsi, Bakı Appelyasiya Məhkəməsinin və Ali Məhkəmənin icraatındadır.

Əlavə olaraq, xüsusi qeyd etməliyik ki, MTK kontrakt öhdəliklərini tam yerinə yetirib, mənzil və qaraj sahiblərinə müvafiq həyət və giriş-çıxış yol ifrastrukturu ilə rəsmi Layihəyə uyğun şəkildə təhvil verdikdən, mənzil sahibləri isə mülkiyyət hüququnu təsdiq edən dövlət sənədlərini tam əldə edə biləndən dərhal sonra "Pilot Residence” Yaşayış Kompleksinin mülkiyyətçiləri Mənzil Məcəlləsinin tələblərinə uyğun şəkildə həqiqi Mənzil Mülkiyyətçiləri Müştərək Cəmiyyətini təsis edib, idarəetməni həyata keçirməyə planlayır.

Hörmətli cənab Nazir!

Bakı şəhəri Səbail rayonu ərazisində,"Pilot Residence” MTK-nın mənzil mülkiyyətçilərindən xəbərsiztəqdim olunan, saxta sənədlər əsasındaMənzil Mülkiyyətçilərinin Müştərək Cəmiyyətinin (MMMC) formalaşması barədə"Ümumi İclasın Protokolu” və digər sənədlərin etibarlılığının yoxlanılması, saxtakarlıq aşkar olunduqda həmin əməllərə hüquqi qiymət verilməsi məqsədilə prokurorluq orqanlarına göndərilməsi, sakinlər və MTK arasında Səbail Rayon Məhkəməsində olan mübahisələri nəzərə alaraq həmin mübahisələr yekunlaşanadək və MTK Yaşayış Kompleksinin sakinləri qarşısında tərəflər arasında Müqavilələrdə qeyd olunmuş öhdəlikləri tam yerinə yetirənədək mövcud MTK-nın yerinə yeni idarəetmə "SƏBAİL-23” MMMC-nin formalaşması barədə MTK-nın vermiş olduğu müraciətin baxılmasının dayandırılmasına göstəriş verməyinizi Sizdən xahiş edirik. Dia-az.info

Qoşma:

1.Müvafiq Məhkəmə qətnamələri, qərardadları və digər sənədlərin surətləri.

2."Pilot Residence”MTK tərəfindən İcra Olunmayan İşlər Siyahısı.

İmza: "Pilot Residence” Yaşayış Kompleksindəki 22 nəfər mənzil sahibi adından.