Elm və Təhsil Nazirliyinin Abşeron-Xızı Regional Təhsil İdarəsi tərəfindən Sumqayıt şəhər 33 nömrəli tam orta məktəbdə yoxlamalara başlanıb.Bakupost.az –ın məlumatına görə, Əsgərova Rübabə Sahib qızının direktoru olduğu 33 nömrəli məktəbdə yoxlamaların aparılmasına səbəb çoxsaylı şikayətlərin olduğu göstərilir.
2 gündür davam edən yoxlamalar zamanı çoxsaylı qanun pozuntuları, o cümlədən "ölü canlar", şagirdlərin aylığa buraxılmaları və müəllimlərin adına qanunsuz əlavə dərslərin və dərnəklərin yazılması ilə bağlı ciddi maliyyə pozuntusu faktları aşkar edilib.
Məsələ ilə bağlı Abşeron-Xızı Regional Təhsil İdarəsi ilə əlaqə saxlasaq da, zənglərimizə cavab verən olmadı.

Karl Marksın sözlərinə inansaq, insanoğlu ibtibadi icma quruluşundan sonra quldarlıq sisteminə qədəm qoymuşdur. Bir insanın başqa birini istismarı üzərində inşa olunan bu quruluşda qul quldarın xüsusi mülkiyyəti sayılırdı. Quldar istəsə öz köləsini pulsuz işlədər, onu acından öldürər və ya sata bilərdi.

Zaman keçdikcə, qul əməyinin faydalı olmadığını anlayan mülkədarlar bu sistemdən könüllü şəkildə imtina etdilər. Çünki istismar olunan zümrənin pulla həvəsləndirərək daha yaxşı məhsuldarlıq əldə edildiyini anladılar.

Bununla belə, quldarlıq münasibətlərinin tamamilə ləğv olunduğunu söyləmək də çətindir. Beynəlxalq Əmək Təşkilatı, Azad Səyahət və Beynəlxalq Miqrasiya Təşkilatının 2022-ci ilin sentyabrında birgə hazırladıqları hesabata görə, hazırda dünyada 50 milyondan çox qul yaşayır. Onların böyük əksəriyyəti isə öz yurd-yuvalarından didərgin düşüb xarici ölkələrə sığınanlardır.

Hesabatda müasir qullar iki sinifə bölünür: zorla işlədilənlər və zorla evləndirilənlər. Sözsüz ki, “zorla işlədilənlər” deyərkən təkcə silah və dəyənək altında işləməyə məcbur edilmək nəzərdə tutulmur. Müxtəlif şirin vədlərlə insanları özünə müftə işlətmək də elə qul-quldar münasibətlərinə şamil oluna bilər.

İlk baxışdan Azərbaycanda və onun tərkib hissəsi olan Naxçıvan MR-də kölələrin olmadığı görülür. Fəqət iş darlığı ucbatından dövlət orqanlarından asılı vəziyyətə salınan vətəndaşların şirin vədlə işə cəlb olunması və görülən işin müqabilində onlara 5 quruş pul verilməməsi də istismarın müasir və bəlkə də ən ağır formasıdır. Nədən ki, klassik quldarlar heç olmasa şəxsi mülkiyyətləri hesab etdikləri qulların (yəni əmək alətlərinin) sıradan çıxmaması üçün onlara bir qarın çörək verirdilərsə, müasir quldarların belə bir qayğısı da yoxdur. Zira onlar düşünürlər ki, bir qul acından ölərsə ölsün, nə çoxdur məmləkətdə başqa qul. Mütləq birini tapıb, yenə şirin vədlərlə onları acından ölənədək işlədə biləcəklər.

Vaxtilə Naxçıvan MR quldarlığının baş ağası Vasif Talıbov həzrətləri əhalini məcburi iməcliklər adlı zorla işləməyə məcbur edirdi. “Xan” həzrətləri vəzifəsini “canişin” əfəndiyə verib istirahətə çəkiləndə Muxtar Respublika əhalisi xeyli sevinmişdi. Naxçıvanda artıq məcburi iməclik kimi qul əməyinin yığışdırılacağını düşünüb xoşbəxt gələcəyin xəyallarını qururdular. Amma necə deyərlər, sən saydığını say, gör, “canişin” əfəndi nə sayır?

“Canişin” əfəndi hakimiyyəti təhvil götürəndən sonra iməclik kimi məcburi iş ənənəsinə nəinki son qoyulmadı, əskinə, o, müasir texnologiya ilə yeniləşdirildi. Ən gözəl texnologiya isə vətəndaşları şirin vədlərlə aldadıb müftə işə cəlb etmək idi.

Müasir qulluğun adını da cazibədar seçmişdilər – könüllülük. Görünür, müasir quldarlar klassik sələflərindən daha ailcənabdlrlar. Onlar istismar etdikləri canlı mülkiyyətlərinin ruhuna toxunmağın yaxşı nəticələnməyəcəyini Spartak üsyanlardan görüb, lazımi dərslər alıblar. Məhz bu səbəbdən də rəsmən zorla əməyə cəlb olunmağın acı mahiyyətini ört-basdır etmək üçün onun adlandırılmasında antoniminə üstünlük veriblər.

Naxçıvandan bir valideynin Ovqat.com-a yazdığı məktubdan belə anlaşılır ki, Muxtar Respublikanın Əmək və əhalinin sosial müdafiəsi naziri Ceyhun Cəlilov “könüllü quldarlıq” metodlarından səmərəli istifadə edən ən bacarıqlı kadrlardandır. Özü də onun “könüllü kölələri” adi insanlar da deyil. Hər biri universitetə 400-dən yuxarı balla girən və oranı yüksək nəticə ilə bitirən savadlı gənclərdir. Bir sözlə, Naxçıvanın müasir quldarlığı bu sahədə də sələflərindən öyrəndiklərini transformasiya etməyin yollarını tapıblar; antik Roma quldarlığında qullar qladiator döyüşlərində bir-birini qıraraq ən güclüləri yaşamaq haqqı qazanırdılarsa, müasir Naxçıvan kölələri intellekt yarışından qalib çıxmağı bacarmalıdırlar. Əks halda, başda “canişin” əfəndinin, ayaqda onun ən fərasətli naziri Ceyhun Cəlilovun “könüllü köləsi” olmaq hüququ qazana bilməzlər.

Daha çox şərhə yol vermədən Naxçıvandan aldığımız məktubu nöqtə-vergülünə toxunmadan yayımlayırıq:

“Əmək və əhalinin sosial müdafiəsi naziri Ceyhun Cəlilov insanları yenə aldadıb. Noyabr ayında könüllülük lahiyəsi elan etdi. Könüllülük üçün nə qədər şərt qoşdu. Universitet imtahanında 400-dən yuxarı bal toplayanları çağırdı.

Mənim qızım 460 bal toplamışdı, çağırdılar, imtahan etdilər və o imtahandanda 15+ nəticə yazaraq keçdi. 25 könüllünü noyabr ayından yığdı, onlara yalan vədlər verdi. Dedi ki, 2 ay könüllü kimi pulsuz fəaliyyət göstərin 2 ay sonra sizi imtahan edib əmək haqqı ödənilməklə işə götürəciyik.

Artıq bu müsabiqədən 6 ay keçir, heç nə demirlər bizə. Qızımı və onun həmkarlarını pulsuz işlədib idarənin işlərini gördürdülər. Sonra da yeni açılmış vətəndaş qəbulunda düz 5 saat ayaq üstdə gedib gələn vətəndaşları qarşılamaq üçün orda saxladırlar.

Qızımın körpə uşağı var, hər gün uşağını evdə qoyub rayondan uzaq yolu gedib-gəlirdi. Müftə hamballıq edirdi ki, eybi yox, 2 ayın sonunda işə götürəcək amma artıq aprel ayı olub heç nə demirlər. Qızım kimi 25 nəfər gəncin əməyini istismar edir Ceyhun Cəlilov”.
Qısası, Beynəlxalq Əmək Təşkilatı, Azad Səyahət və Beynəlxalq Miqrasiya Təşkilatının 2022-ci ilin sentyabrında birgə hazırladıqları hesabatda qeyd olunan 50 milyon kölədən ən azı 25-i Naxçıvan MR Əmək və əhalinin sosial müdafiəsi naziri Ceyhun Cəlilova aid imiş. İnsafən, pis nəticə deyil.

"Milli Məclisin deputatı Ağalar Vəliyevin oğlu Pərviz Vəliyev Gürcüstanın Kabuleti kurort şəhəri, Agmashenebeli küçəsində (277 və 313) iki binanın tikintisi üçün 1.648.000 və 2.550.000 lari dəyərində torpaq sahələri alıb".

Bu haqda araşdırmaçı jurnalist Cavanşir Həsənli özünün Feysbuk-dakı səhifəsində yazıb.

Cavanşir Həsənli yazır ki, deputatın oğlunun tikdirəcəyi binalar biri 30 milyon və digəri 20 milyon dollar olmaqla layihələndirilib və təsdiq edilib: "Məlumat üçün qeyd edim ki, Pərviz Vəliyev Gürcüstanda qeydiyyatdan keçmiş CRYSTAL BUILDİNG LTD-nin 50 faiz payçısıdır".(Yenixeber.org)

Almaniyada işləyən azərbaycanlı həkim Oksana Balakişiyeva Sumqayıtda fəaliyyət göstərən “Doktor.az” klinikasından şikayətçidir. O, həkim Sevil Musayevanın onun anasına səhvən xərçəng diaqnozu qoyaraq əməliyyata məcbur etmək istədiyini iddia edir.

“Qafqazinfo”ya danışan O.Balakişiyeva özəl klinikada çalışan həkimin əlil anasına heç bir əsas olmadan uşaqlıq boynunun xərçəngi diaqnozunu qoyduğunu deyib.

Onun sözlərinə görə, həkim şişin 2-ci dərəcədə olduğunu bildirirək təcili əməliyyata ehtiyac görüb: “Anam onu ​​görməyə martın 7-də gedib. Müayinələrdən sonra Sevil Musayeva anama audiomesaj göndərib ki, onda uşaqlıq boynu xərçəngi var və bu, çox güman ki, ikinci mərhələdir. Həkim oradakı qohumlarıma əməliyyata ehtiyacı olduğunu və hər şeyin keçəcəyini söyləyib. Ancaq o, mənim həkim olduğumu bilmirdi. Bundan sonra mən ona mesaj yazdım. Ondan konkret nə gördüyünü mənə izah etməsini və əməliyyatın epikrizini yazılı şəkildə verməsini xahiş etdim. O isə mesajımı oxuyaraq məni qara siyahıya saldı və cavab vermədi”.

O.Balakişiyeva daha sonra anasının analizlərinin və digər məlumatların Almaniyada həkimlərə yoxlatdırdığını, eləcə də yaşlı anasını başqa həkimin müayinəsinə göndərdiyini deyib. Bundan sonra qadında hər hansı şiş xəstəliyinin, ümumiyyətlə, əməliyyata ehtiyacın olmaması müəyyənləşib.

O, “Doktor.az” klinikasında çalışan Sevil Musayevanın 32 ildir əlil arabasında oturan qadını pul qazanmaq məqsədilə səhv diaqnoz əsasında əməliyyat etmək istədiyini iddia edib.

“Bu necə mümkündür? Bu hekayə tək deyil, belə hallar çoxdur, amma niyə heç kim buna reaksiya vermir? Bütün bunlar nə üçün idi? Hamısı pul xatirinə?! İnanmaq mənim üçün çətindir və tibbdə belə insanların olmasına çox üzülürəm! Ən pisi isə odur ki, belə həkimlərin tibbdə işləməyə davam etmək hüququ var!”, - deyə Oksana Balakişiyeva əlavə edib.

İddialarla əlaqədar birbaşa həkimin özü ilə əlaqə saxladıq. Sevil Musayeva saytımıza açıqlamasında ittihamları tamamilə əsassız adlandırdı: “Mən necə xərçəng diaqnozu qoya bilərəm? Heç bir onkoloji xəstəlik adı çəkməmişəm, belə söhbət olmayıb. Xahiş edirəm, mənə böhtan atmasınlar. Müayinə zamanı Dilarə xanımın uşaqlıq yolunda proses müəyyən etdik və ona digər müayinələrdən keçməyi məsləhət gördük və Histalogiya Şöbəsinə yönləndirdik. Onlar gedib müxtəlif yerlərdə analizlər veriblər, məndən narazılıq edirlər. Halbuki mən onlara yalnız toxumalardan analiz götürülməsinin vacibliyini demişəm. Biz həmin qadını çox hörmətlə qarşılamışıq, yola salmışıq”.

Mövzu ilə bağlı Səhiyyə Nazirliyinə də müraciət etdik. Nazirliyin Analitik Ekspertiza Mərkəzinin Özəl Tibb Şöbəsinin müdir müavini Ramiq Quliyev sorğumuza cavab olaraq bildirdi ki, “Özəl tibb fəaliyyəti haqqında” Qanuna əsasən özəl tibb müəssisələrində xəstələrə tibbi yardımın göstərilməsi tərəflər arasında bağlanmış müqavilənin şərtləri ilə tənzimlənir: “Sahibkarlıq sahəsində aparılan yoxlamaların tənzimlənməsi və sahibkarların maraqlarının müdafiəsi haqqında” Azərbaycan Respublikasının Qanununa əsasən yerində plandankənar (növbədənkənar) yoxlama insanların həyat və ya sağlamlığına birbaşa və mühüm təhlükənin olması və ya mühüm zərərin vurulması barədə hüquqi və fiziki şəxslərdən, dövlət və yerli özünüidarəetmə orqanlarından yoxlayıcı orqana konkret faktlara əsaslanan rəsmi müraciətlər (məlumatlar) daxil olduqda, habelə mediada məlumatlar yayıldıqda keçirilir.

Beləliklə, vətəndaş tərəfindən Səhiyyə Nazirliyinə və yaxud birbaşa Anlitik Ekspertiza Mərkəzinə rəsmi müraciət olunduğu halda, yoxlama zamanı həmin klinikada göstərilən tibbi yardım, müayinə və müalicəni icra edən mütəxəssis barəsində yerində araşdırma aparıla bilər. Yoxlama nəticələrinə əsasən həkim və müəssisə barəsində “İnzibati Xətalar Məcəlləsi”nin müvafiq maddələrinə uyğun olaraq inzibati tənbeh və digər tədbirlər görülə bilər. Eyni zamanda, Analitik Ekspertiza Mərkəzinin səlahiyyətlərinə məhkəmə-tibbi ekspertizasının aparılmasının daxil olmadığı və həkiminin əməllərinə hüquqi qiymət verilməsi məsələsinin aid olmadığını nəzərə alaraq vətəndaşa təsdiqedici sənədlərlə birlikdə prokurorluq və ya məhkəməyə müraciət etmək hüququnun olduğu diqqətinə çatdırılır”.(“Qafqazinfo”)

Göygöl rayonu, Turan Qurbanov kuçəsinin sakini Rüstəmov Akif Xaliq oğlu tərəfindən Hurriyyet.az saytının redaksiyasına şikayət məktubu daxil olub. Şikayətçi iddia edir ki, Göygöl rayon İcra Hakimiyyətinin şöbə müdiri Ariz Eyvazov onun yolunu zəbt edib:

“Mən, Rüstəmov Akif Xaliq oğlu, bildirmək istəyirəm ki, 2020-ci ildən yuxarıda qeyd etdiyim ünvanda yaşayıram. 4 ildir maşınımı öz həyətimə sala bilmirəm. Səbəb isə Göygöl rayon İcra Hakimiyyətinin şöbə müdiri Ariz Eyvazovdur.

Adını çəkdiyim şəxs qanunsuz olaraq mənim evimin qabağındakı yolu zəbt edib. Həmin şəxsə başqa bir yerdən əlavə torpaq verilməsinə baxmayaraq, 2 küçəni zəbt edərək vəzifəsindən sui-istifadə etmişdir. Rayonun icra başçısı və memarı da vəzifə sahibi olan Arizin tərəfini saxlayır. Başçının qəbulunda olmuşam, problemimi bildirmişəm. Mənimlə birgə yolun bağlanmasına narazı olan qonşum da yanımda olub. Memar deyir ki, cığır oldu bəsdir də. Memarın özünün evinin qarşısı, yolu kəsilsə, götürərmi? Bura dağ kəndi deyil ki, çığırlar olsun. Mənə yol göstərirlər ki, sən dünənki uşaqsan, darvazanı sök, dəyiş.

Mən bu qədər özbaşınalığın qabağında aciz qalmışam".

Şikayətçinin redaksiyamıza göndərdiyi video müraciəti olduğu kimi təqdim edirik:

Sabah Ramazan ayının 25-ci günüdür.

Sabah imsak vaxtı saat 04:51, iftar isə 19:23-dədir.

İmsak duası:

“Allahumməc-əlni fihi muhibbən li-ovliyaik. Və muadiyən li-ə-daik. Mustənnən bisunnəti xatəmi ənbiyaik. Ya asimə qulubin-nəbiyyin”.

Tərcüməsi:

“İlahi, bu gün məni sənin dostlarını sevənlərdən, sənin düşmənlərinlə düşmən olanlardan qərar ver! Məni sonuncu Peyğəmbərinin sünnəsinə əməl edənlərdən qərar ver! Ey peyğəmbərlərin qəlbinin hamisi olan Allah!”

İftar duası:

“Allahummə ləkə sumtu və əla rizqikə əftərtu və əleykə təvəkkəltu. Bismillahir-Rəhmanir-Rəhim. Ya vasiəl-məğfirəti iğfirli!”

Tərcüməsi:

“İlahi, səndən ötrü oruc tutdum, sənin verdiyin ruzi ilə iftar açdım və sənə təvəkkül etdim. Bağışlayan və mehriban Allahın adı ilə. Ey hüdudsuz bağışlama sahibi, mənim günahlarımı bağışla!”

Allah orucunuzu qəbul etsin!

“Göyçay-Şərab” ASC-nin rəhbəri Naib Kərimov Nazirlər Kabinetinin qəbul şöbəsinin baş inspektoru Qurban Sadıqov tərəfindən şantaj olunduğunu iddia edir.

Reportyor.info xəbər verir ki, bu barədə müraciət edən müəssisə rəhbəri Naib Kərimov bildirib ki, Qurban Sadıqov onun barəsində məhkəmələrdə əsassız iddialarla çıxış edərək onlardan külli miqdarda pul tələb edir:

Qurban Sadıqov “Göyçay-Şərab” ASC-nin adına necə kredit götürüb?

“2000-ci ildən “Göyçay- Şərab” ASC-yə rəhbərlik edirəm. Bu günə qədər müəssisəmizin heç bir banka borcu olmayıb və adı hər hansı məhkəmə çəkişməsində hallanmayıb. Qurban Sadıqov vəzifəsindən sui-istifadə edərək məhkəmələrdə əsassız iddialar qaldırıb, “Göyçay-Şərab” ASC-dən külli miqdarda pul tələb edir. Halbuki özü bizim müəssisənin adına bankdan yüksək məbləğdə kreditə pul götürüb və öz məqsədləri üçün xərcləyib. İndi də həmin pulu bizdən tələb edir. 2016-cı ildə Qurban Sadıqov o vaxt qudası, həm də mənim dostum olan Loğman Məmmədov vasitəsilə mənə yaxınlaşdı. Pula ehtiyacı olduğunu, lakin bankdan kredit götürməkdə çətinlik çəkdiyini bildirdi. Xahiş etdi ki, “Göyçay- Şarab” ASC-nin adına kredit götürülüb ona verilsin. Hətta “Paşa Bank”ASC-də özünün tanışları olduğunu dedi. Müəsssisəmisin adına götürdüyü kreditin müqabilində isə “Göyçay-Şərab” ASC-nin Nazirlar Kabineti səviyyəsində biznesinin genişləndiriləcəyinə vədlər verdi. Kreditin ödənilməsində heç bir problemin yaranmayacağını, özünün zamin olacağını və banka vaxtı-vaxtında pulu qaytaracağını dedi. Hətta bunun üçün ailasinə və qohumlarına məxsus 6 daşınmaz amlakı da kreditin taminatı kimi banka ipoteka qoyacağını söylədi. Mənim iştirakım olmadan “Paşa Bank”ın Bakıxanov küçəsi, Bridge Plazada yerləşən filialına gedib və kreditin bütün şərtləri ilə razılaşıb”.

750 000 min manat kimə verilib?

Naib Kərimov deyib ki, Qurban Sadıqovun xahişi ilə “Göyçay-Şarab” ASC-nin adına özünün əmlaklarını gorov qoymaqla “Paşa Bank”dan 750000 manat kredit götürülüb və tanışı Natiq Məmmədova verilib:

“Qurban Sadıqov bundan əvvəl də əmlkalarını girov qoyub kredit götürmək istəyib. Lakin bank kredit verməyib. Bundan sonra Qurban Sadıqov Loğman Məmmədov vasitəsi ilə məndən xahiş etdi ki, kredit “Göyçay-Şərab” ASC-nin adına rəsmiləşdirilsin. Bir məqamı qeyd edim ki, götürülən kreditin müqabilində banka Qurban Sadıqovun əmlaklarını giro qoyulub. Yəni, “Göyçay-Şərab” ASC girovluqda olmayıb.

Götürülən məbləğ isə elə bank filialının binasının yanında Qurban Sadıqovun tapşırığı ilə tanışı Natiq Məmmədova verilib. Bu proses isə Natiq Məmmədovun direktoru olduğu “Finans İnvest” Bank olmayan kredit taşkilatı MMC-ya maxsus NİVA 212140 markalı 99AM841 dövlat qeydiyyat nişanlı avtomobildə baş tutub. Həmin vaxt şahid kimi orada Namiq Bahəddin oğlu Mirzəyev, Hüseyn Nizam oğlu Rüstəmov, Rafiq Şamil oğlu Quliyev də iştirak edib. Daha sonra Natiq Məmmədov pulu Qurban Sadıqova çatdırıb. Bunu Qurban Sadlqovun özü də telefon vasitəsilə təsdiqləyib”.

Bank əməkdaşlarının ifadələri…

Naib Kərimovun sözlərinə görə Qurban Sadıqov banka olan borcunu yubatsa da, bununla bağlı xəbərdarlıqlar “Göyçay-Şarab” ASC-yə deyil, elə Qurban Sadıqovun özünə gəlib:

“Çünki bank da bilirdi ki, krediti Qurban Sadıqov götürüb, o da qaytarmalıdır. Bunu bank işçiləri də məsələ ilə bağlı keçirilən məhkəmə proseslərində təsdiqləyiblər. Təkcə onu nümunə gətirim ki, Qurban Sadıqovun bizə qarşı qaldırdığı Nərimanov rayon məhkəməsindəki iddia prosesində şahid qismində dindirilən “Paşa Bank”-ın işçiləri İntiqam Rövşən oğlu Əliyev və Cavid Cavan oğlu Mansurov kredit borcunun Qurban Sadıqova məxsus olduğunu və özü ödəyəcəyini bildiriblər. Hətta 2017-2018-ci illərdə krediti ödənilməsində külli miqdarda borcu yaranan Qurban Sadıqov ailəsinə məxsus Mersedes Galenvagen markalı avtomobili və Yasamal rayonu ərazisində yerləşən mənzili satmaq üçün bank işçilərindən xahiş edib. Bank əməkdaşları isə həmin əmlaklara baxış keçiriblər. Qeyd edim ki, Qurban Sadıqov götürdüyü 750 000 manatı uzun müddətə olsa da banka tam ödəyib”.

Qurban Sadıqovun vəkili şantaja niyə keçib?

Şikayətçi Qurban Sadıqovun “Göyçay-Şərab” ASC-yə qarşı qaldırdığı əsassız iddianı anlamadığını bildirib:

“Bu adam bizdən nə istəyir onu anlamıram. Heç bir fakta və reallığa söykənməyən iddialarla məhkəməyə müraciət edib. Əvvəlcə Nərimanov rayon, daha sonra isə Apelyasiya məhkəmələrində işə baxılıb. Hər iki məhkəmədə direktoru olduğum “Göyşay-Şərab” ASC-nin xeyrinə qərar verilib. Biz krediti onun götürdüyünə dair bütün sənədləri, səs yazılarını, və lazım olan materilları məhkəməyə təqdim etmişik. Hər iki məhkəmədə işə obyektiv baxılıb və sübuta yetirilib ki, Qurban Sadıqovun qaldırdığı iddia absurddur. Buna baxmayaraq yenə də bizə böhtan atır və 750000 manat məbləği bankdan guya bizim götürdüyümüzü iddia edir. Onu da deyim ki, işə Bakı Apellyasiya Məhkəməsində baxılarkən məhkəmə müəyyən edib ki, Natiq Məmmədova (pulu qəbul edən şəxs) Qurban Sadıqov və onun vəkili Əjdər Sarıyev tərəfindən təzyiqlər edilib. Bu adam vəkilini də bu işə alət edib. Vəkili Əjdər Sarıyev Natiq Məmmədova hədə-qorxu gələrək, məhkəmə instansiyalarında Qurban Sadıqovun xeyrinə ifadə verməsini tələb edir. Bu faktla bağlı Bakı Apellyasiya Məhkəməsinin 19 dekabr 2023-cil ii tarixli qərardadı ilə şahid Mərnmədov Natiq Seyid Həsən oglunun birinci instansiya rnəhkərnəsi baxışı zarnanı ifadə verərkən şahidi yalan ifadə verməyə məcburetmə cinayətin əlamətlərinin olub-olrnadığının müvafiq qaydada araşdırılrnası ilə bağlı Azərbaycan Respublikası Baş Prokurorluğuna xəbər verilrnəsi qərara alınıb”.

Qurban Sadıqov Loğman Məmmədovun adını niyə hallandırır?

Naib Kərimovun sözlərinə görə Qurban Sadıqovun vaxtilə qudası olmuş Loğman Məmmədovla da 2020-ci ildən başlayaraq məhkəmə çəkişməsi olub. 2023-cü ildə bütün məhkəmə instansiyaları təsdiq edib ki, Qurban Sadıqov və onun ailəsinin Loğman Məmmədova külli miqdarda borcu var. Son Ali Məhkəmənin qərarında Qurban Sadıqov və onun ailəsinim Loğman Məmmədova olan boru öz təsdiqini tapıb. Uzun müddət gedən məhkəmə qalmaqalında Qurban Sadıqov bir dəfə də olsun “Göyçay-Şərab” ASC-nin adından şikayət etməyib və heç bir iddia qaldırmayıb. Sadəcə sonuncu Ali məhkəmənin qərarından sonra Qurban Sadıqov Loğman Məmmədova külli miqdarda pul uduzduğunu görüb şantaj formasında zavoddan şikayət etməyə başlayıb. Ona görə də hazırda Qurban Sadıqov şərab zavodunu şərləmək istəyir və saxta üsulla varlanmaq istəyir.

Nərimanov və Apelyasiya məhkəmələrinin qərarı…

Qeyd edək ki, Bakı Apellyasiya Məhkəməsinin 2(103)-6266/2023 saylı 19.12.2023-cü il tarixli qətnaməsi ilə Qurban Sadıqovun “Göyçay-Şarab” ASC-ya qarşı 7S0000 manat pul üstəgəl bank faizlərinin ödənilməsi tələbinə dair iddiası təmin edilməyib.

Şikayətçinin bildirdiyinə görə hazırda Qurban Sadıqov sözügedən iddiası ilə yenidən Ali Məhkəməyə müraciət edib. Bu addım isə ona, rəhbərlik etdiyi “Göyçay- Şərab”ASC-yə, eləcə də orada çalışanların işgüzar nüfuzuna xələl gətirir:

“Qurban Sadıqovun iddiaları tamamilə əsassızdır. Yalan və heç bir fakta söykənməyən məlumatlarla indi də Ali Məhkəməyə şikayət edib. Ümid edirəm ki, Ali Məhkəmə də Qurban Sadıqovun və onun vəkili Əjdər Sarıyevin hərəkətlərinə obyektiv qiymət verəcək”, – deyə Naib Kərimov qeyd edib.

Onu da əlavə edək ki, Naib Kərimov Qurban Sadıqovun bankla olan kredit müqaviləsi, 2016 və 2018-ci illərdə zaminliyini təsdiq edən sənədləri, eləcə də məhkəmə qərarlarını redaksiyamıza təqdim edib.

Bununla yanaşı “Bank Olmayan Kredit Təşkilatı Caspian İnvest” MMC-nin rəhbəri (pulu Naib Kərimovdan alan Natiq Seyid Həsən oğlu Məmmədov da öz növbəsində Bizim.Media-ya müvafiq sənədlər təqdim edib. Həmin sənədlərdə qeyd olunub ki, o, tanışı Qurban Sadıqovun “Paşa Bank”dan “Göyçay-Şərab” ASC-nin adına kredit götürülməsi, rəsmiləşdirilməsi və məbləğin Qurban Sadıqova şəxsən verilməsində iştirak edib. Bildirib ki, bankdan kreditlə götürülən 750000 manatın və üstəgəl bank fazilərinin Loğman Məmmədova və “Göyçay-Şərab”ASC-yə aiddiyəti yoxdur. Bu barədə Apelyasiya Məhkəməsinə də yazılı müraciətlər edib.

Məhkəmə çəşişməsi ilə bağlı Qurban Sadıqovla əlaqə yaratsaq da, məsələyə mövqe bildirmək istəməyib.(Reportyor.info)

Qaradağ rayonu, Sanqaçal qəsəbəsi, 3-cü massivdə yaşayan Qarabağ qazisi Xankişiyev Balaş Atamkişi oğlu tərəfindən Hurriyyet.az saytının redaksiyasına şikayət məktubu daxil olub. B.Xankişiyev rəsmi qurumlardan şikayətçidir:
“Mən, Xankişiyev Balaş Atamkişi oğlu, yazaraq sizdən xahiş edirəm ki, problemimi ictimailəşdirin.

Əlim hər yerdən üzülüb, haqsızlıqla barışmaq çətin gəlir. Bəzi qurumlar "eşitmirəm, görmürəm, bilmirəm" sisteminə keçərək, öz bildiklərini edirlər. Nə xəstəyə əhəmiyyət verən var, nə də müharibə iştirakçısına. Dövr haqq-hesab dövrü olub, bir əlin cibində gəzməlisən.

1982-ci ildə Novosibirsk vilayətində hərbi xidmətdə olmuşam. 1985-ci ildə hərbi xidməti başa vurmuşam. 1992-ci il, mart ayının 17-dən Azərbaycan Respublikasının torpaqlarının müdafiəsi uğrunda gedən döyüşlərdə könüllü iştirak etmişəm.

02.11.1993-ci ildə döyüş zonasında, N saylı hərbi hissədə xidmət keçərkən 1 saylı Ağdam Hərbi Səhra Cərrahiyyə Hospitalında müalicə olunmuşam, "qlomerulonefrit" diaqnozu qoyulub. 08.11.1993-cü ildən 07.12.1993-cü ilə kimi müayinə va müalicə olunduğum xəstəlik diaqnozu - "Xroniki qastroduodenit kəskinləşmə mərhələsində, kəskin bronxit" astma xastəlikləri barədə çıxarış epikrizlərim vardır.

1993-cü il, dekabr ayının 15-nə qədər Ələt hospitalında ağciyər və astma bronxit diaqnozu ilə xastaxana şəraitində müalicə almışam. 1994-cü ildə yenə də bir neçə dəfə həmin xəstəliklə əlaqədar xəstəxana şəraitində müalicə olunmuşam.

2012-ci ildə əməliyyat olundum, ürəyimə 2 stend qoyuldu. Hətta evdə də ambulator şəraitdə müalicə almışam.

2015-ci ildə Bakı Şəhəri Mərkəzi Xəstəxanasında 2 dəfə əməliyyat olunmuşam, yenə 2 stend qoyulub. 2016-cı ildən indiyə qədər, hər il "Neftçilər" Xəstəxanasında ambulator şəraitdə müalica alıram.

2019-cu ildən bu günə qədər 2-ci və 3-cü dərəcəli nəfəs çatışmazlığı ilə bir neçə dəfə Ağciyər Xəstəlikləri İnistitunda müayinədən keçmişəm. 2020-ci ilin noyabr ayında "Covid 19" tipli xəstəliyə tutularaq, 15 gün xəstəxanada müalicə almışam. 2022-2023-cü illərdə yenə də Ağciyər Xəstəlikləri İnstitutunda müalicə almışam.

2018-ci ildən 2019-cu ilə qədər həm sosial təqaüd, həm də Prezident təqaüdü alırdım. İkisi bir yerdə cəmi 650 manat edirdi. Lakin 1 il təqaüd aldıqdan sonra kəsildi. Əmək və Əhalinin Sosial Müdafiəsi Nazirliyinə müraciət etdim. Mənə bildirdilər ki, guya, həkimin səhvi ucbatından olub. Yəni həkim sənədləri mənim yaşadığım ərazidə yox, Gəncə şəhərində hazırlamışdır. Sanki başqa respublikada hazırlanmışdır. Səhv kimin idi, bilmirəm, amma mənim təqaüdüm dayandırıldı.

Dəfələrlə Əmək və Əhalinin Sosial Müdafiəsi Nazirliyinə müraciət etdim. Uzun aradan sonra - 2020-ci ilin mart ayından 2-ci dərəcəli təqaüd hüququm bərpa olundu. Lakin 2018-2019-cu illərdə aldığım təqaüd, guya, səhv imiş və bu pulları təzə bərpa olunan təqaüdümdən hər ay tutmağa başladılar. Hər təqüddən 50 manat olmaqla, toplam hər ay hesabımdan 100 manat çıxılırdı. Üstəlik, 10 il dövlətə borc verməli olduğumu bildirmişdilər.

2024-cü il, yanvarın 16-da avtomobil növbəsi ilə əlaqədar müraciət etmişdim. Tibbi müayinə olunmam üçün Əmək və Əhalinin Sosial Müdafiəsi Nazirliyinə çağırdılar ki, gəl, görək sənə avtomobil düşür, ya yox. Getdim, tibbi müayinə zamanı həyacandan halım qəfil pisləşdi, nəfəs çatışmazlığı baş verdi. Astma üçün olan dərmanlarım üzərimdə olduğundan, özümü sakitləşdirməyi bacardım. Bir neçə həftədən sonra cavab çıxdı ki, mənim təqüdüm dayandırılmışdır.

Bəli, bir çoxları kimi mən də eşitmişdim ki, boş yerə camaatın pensiyasını dayandırırlar. Amma düzü, tam inanmağım gəlmirdi. Necə yəni, xəstənin pensiyası kəsilir?! Dünya başıma fırlandı. Dərmanlar od qiymətinədir. Zəng edib məlumat aldım ki, həqiqətən də həkimlərin rəyinə əsasən, "sağlam" adam imişəmmiş. Maşın üçün müraciətim pensiyamın kəsilməyinə səbəb oldu.

Üzümü yenidən nazirliyə tutdum. Bildirdilər ki, narazılığın var, məhkəməyə ver. Belə çıxır ki, ölənə kimi məhkəmələrdə sürünməliyəm? Təqaüdü kəsilən bir insan iynə-dərmanlarını necə ala bilər? Yəni mənim kimi xəstələri nazirlik ölümə məhkum edir. Nazirliyin bu haqsızlığı bir neçə qazinin ölüm səbəbi olub.
İş yerim, bir yerdən gəlir mənbəyim yoxdur. 58 yaşdan sonra mənə iş verən də yoxdur. Astma çox ağır bir xəstəlikdir. Nəfəs darlığı zamanı ağrılarım çox olur.

Sizdən artıq dərəcədə xahiş edirəm, ya mənim pensiyamın bərpa olunmsına, ya da əvvəlki iş yerim olan "SOCAR" şirkətində işləməyimə dair göstəriş verilsin. Bu yaşımda iynə-dərmanım, yəni yaşamağım üçün maddiyyata ehtiyacım var. Bu yaşda gedim ofisiant işləyim? Axı bu qədərdə haqsızlıq olmaz? Əslində, olur və biz vətəndaşlar da qarşı çıxa bilmədiyimizdən susuruq".

Babək rayon Nehrəm qəsəbə sakinləri kütləvi etiraz aksiyasına hazırlaşır. Buna səbəb təmiri bir neçə ay öncə başa çatmış 3 saylı orta məktəbin istifadəyə verilməməsidir. Həmin məktəb üç ildən artıqdır ki, təmir adı ilə bağlanıb. Bu səbəbdən məktəbin yaxınlığında yaşayan 600-ə yaxın şagird kilometrlərlə aralıda olan başqa bir məktəbə gedirlər.
Qəsəbə sakinləri deyirlər ki, bu illər ərzində döymədikləri qapı qalmasa da, şikayətlərinə baxan olmayıb. Elə buna görə də, kütləvi aksiyalara başlamağı qərara alıblar. Aksiyanın məqsədi aidiyyəti qurumların diqqətini problemə yönəltməkdir.
İki övladı məktəbli olan qəsəbə sakini H. Qəmbərova deyir ki, gününü yarısını yollarda keçirməli olur:
“Məktəbin tikintisi demək olar ki, başa çatıb, açılışını edib, istifadəyə vermək istəmirlər. Belə getsə, hələ çox əziyyət çəkməli olacağıq. Övladımın biri 1-ci sinifdə, degəri isə 3-cü sinifdə oxuyur. Fərqli satlarda dərsə gedirlər. 2-3 kilometr yolu hər gün bir neçə dəfə mən də məktəbə gedib-gəlməli oluram. Birini aparıb qoyuram, qayıdıb gəlirəm, bir neçə saatdan sonra ikincini aparıram, orada gözləyib o birini gətirirəm. Sonra yenidən gedib digərini gətirməli oluram. Halbuki, 3 saylı məktəb evimizə çox yaxındır. Uşaqların özləri gedib-gələ bilərlər”.
Digər şikayətçi C. Gülməmmədov deyir ki, məktəbin açılışı təmiri aparan tikinti şirkəti FHN-ə rüşvət vermədiyi üçün gecikdirilir:
“Təkcə uşaqlar deyil, valideyinlər də, müəllim kollektivi də əziyyət çəkirlər. Güya ki, tikili standartlara uyğun deyil deyə, FHN rəy vermir. Əslinə baxsan, digər məktəblər də standartlara uyğun tikilməyib. Sadəcə FHN-ə rüşvət verilməyib, ona görə də rəy vermək istəmir. Bunun müqabilində də yüzlərlə şagird, onların valideynləri əziyyət çəkir. Bu səbəbdən etiraz aksiyasına qərar vermişik”.
Adıçəkilən məktəbin təmirinə 2021-ci ildə başlanılıb. 2022-ci il martın 31-də tikinti işləri aparılarkən binanın bir divarının çökməsi nəticəsində 3 tikinti işçisi həlak olub, bir nəfər isə xəsarət almışdı. Bundan sonra məktəbdə əsaslı təmir işlərinə başlanılmışdı.

Gündəlik Naxçıvan

Xəbər verdiyimiz kimi, Tibbi Ərazi Bölmələrini İdarəetmə Birliyinin (TƏBİB) sabiq sədri Ramin Bayramlının “SPEKTR MED” şirkəti ondan alınıb. Şirkət əvvəlcə fiziki şəxsin adına rəsmiləşdirilsə də, daha sonra “Avromed” şirkətinə verilib.
Bakupost.az -a TƏBİB sədri olduğu dövrdə Ramil Bayramlının “Spektr Med” şirkəti vasitəsilə həyata keçirdiyi əməliyyatlarla bağlı yeni məlumatlar daxil olub.

Belə ki, R.Bayramlı pandemiya dövründə vəzifəsindən sui-istifadə edərək, dövlət satınalmalarını “Spektr Med” şirkəti vasitəsilə həyata keçirib. O, TƏBİB sədri kimi laboratoriya cihazları və reaktiv-reagent istehsal edən məşhur şirkətlərin xarici nümayəndələri ilə şəxsən görüşərək “Spektr Med”i tərəfdaş kimi tanımalarını tələb edib. Ramin Bayramlı bunun qarşılığında həmin şirkətlərlə laboratoriya cihazları və digər tibbi avadanlıqların alqı-satqısı ilə bağlı iribüdcəli müqavilələr bağlanacağını vəd edib.
Beləliklə, pandemiya dövründə Azərbaycanda dəyəri milyonlarla dollarla ölçülən avadanlıqların alınması faktiki olaraq, Ramin Bayramlıya məxsus olan “Spektr Med” vasitəsilə həyata keçirilib.

Əldə etdiyimiz məlumata görə, həmin illərdə 650 bahalı tibbi cihaz və digər avadanlıqlar alınıb. Bu alqı-satqı əməliyyatları nəticəsində qısa müddət ərzində “Spektr Med”in büdcəsi 70 milyon manata yüksəlib.
Qeyd edək ki, R.Bayramlının TƏBİB rəhbərliyindən uzaqlaşdırılmasında bu məsələnin də ciddi rol oynadığı vurğulanır.
R.Bayramlı 2021-ci il sentyabrında 12-də öz ərizəsi ilə TƏBİB-in sədri vəzifəsindən azad olunub.

BakuPost