Təxminən bir ay əvvəl Sumqayıtın Evdə fərdi təhsil məktəbinin müəllimi Humay Nuriyeva işlədiyi müəssisədə baş verən qanunsuzluq faktlarını mediada ictimailəşdirdi. Müəllimənin “Teref.az” və bəzi başqa saytlarda dərc olunmuş iddialarına görə məktəb direktorunun xanımı dərs bölgüsündə söz sahibidir.
12 ildir ki, Sumqayıtda evdə fərdi təhsil məktəbində müəllimə işləyən Humay Nuriyevanın sözlərinə görə, məktəbdə əvvəlki direktorların vaxtında da korrupsiya halları olub, amma indiki kimisi olmayıb:
“2023-cü ilin aprel ayında Sumqayıt 21 saylı orta məktəbin direktoru Vladim İbrahimovdan həddən çox şikayətlər olduğuna görə Abşeron-Xızı təhsil idarəsi onu işdən çıxarmağa məcbur oldu. Bunu həmin məktəbin müəllimləri də açıq deyirlər. Amma işdən çıxarılan direktoru imtahansız gətirib bizim Evdə fərdi təhsil məktəbinə direktor qoydular. Həmin gündən də məktəbi Vladim müəllimlə birlikdə həyat yoldaşı Səidə müəllimə idarə edir. Səidə müəllimə başqa məktəbin müəlliməsi olsa da, evdə fərdi təhsil məktəbində saat hesabı dərs deyir, həm də Abşeron-Xızı təhsil idarəsində tibbi-pedaqoji ekspert komissiyasının rəhbəridir.
Komissiyanın keçmiş sədri İsa Tərlanov yoxlamalar nəticəsində işdən çıxarılsa da, Səidə müəlliməni himayə edənlər onu komissiyanın rəhbərliyinə gətirdilər, halbuki xeyli sağlam, heç bir xəstəliyi olmayan uşaqlar 9-11-ci siniflərdə müəllim yanına gedə bilmək üçün məhz həmin komissiyanın saxta rəyləri əsasında evdə fərdi təhsil məktəbinə qəbul edilmişdilər, onlardan hələ də məktəbdə təhsil alanlar var. Hətta deyilənə görə, sağlam uşaqların məktəbə qəbulu 1500-2000 manatdır. Vladim müəllim məktəbimizə direktor təyin olunandan Səidə müəllimənin bütün rəfiqələri aprel-may ayından etibarən məktəbimizə axın etməyə başlayıblar. Yoxlama aparılsa məlum olar ki, 2023-cü ilin aprel ayından başlayaraq 21 saylı məktəbdən və digər məktəblərdən onlarla müəllimə saat hesabı dərs verilib, məktəbin öz müəllimləri isə dərs üçün az qala yalvarır.
Bir neçə kurs müəllimi sövdələşmə əsasında illərdir məktəbimizdə işləyirlər və hər gələn direktor və ya əvəzi onların əmək haqqı kartlarını bir-birinə ötürməklə bir-birinin əyri işlərini ört-basdır edirlər. Həmişə də həmin müəllimlər təriflənir, əslində hamı bilir ki, tərif nəyə görədir. Lakin illərin təcrübəli müəllimləri kiçik bir səhv edən kimi dərhal Vladim müəllim çağırıb deyir ki, “ərizəni yaz, öz xoşunla çıx işdən”. İndi (avqust ayında – red.) hamı məzuniyyətdə olduğu vaxtda direktor Vladim İbrahimov həyat yoldaşı Səidə müəllimə ilə birlikdə dərs bölgüsü aparır, amma bu bölgüdən direktor müavinlərinin, məktəbin həmkarlar təşkilatı sədrinin xəbəri yoxdur. Məktəbimiz Prezidentin açılışını etdiyi 4-cü mikrorayondakı 20 saylı məktəbin binasına köçürüləndə təmir adı ilə 50 manatdan pul yığıb vermişik ki, dərs bölgüsü vaxtı bizi incitməsinlər, lakin indi bizi sayan yoxdur.
Direktorun həyat yoldaşı Səidə müəllimə qayda qoyub ki, bu dərs ilində ancaq diaqnostik bala görə dərs veriləcək. Buna da razıyıq, bəs onda başqa məktəblərin müəllimlərinə hansı prinsiplə dərs verilir? Həmin müəllimlər öz məktəblərində diaqnostik balla 20 saat, bizim məktəbdə də 16 saat dərs alanda bu 36 saat edir, bu da elə-belə olmur. Eşitdiyimizə görə, kim əlavə dərs saatı almaq istəsə əli cibində olmalıdır. 1 saat dərsin qiyməti isə 80-100 manat arasında dəyişir. Xüsusi təhsil sinifləri isə ümumiyyətlə direktorun özünə aid olacaq. Vladim müəllim və Səidə müəllimə məktəbimizi artıq özəl obyekt kimi işlədirlər, söz arası da deyirlər ki, biz birbaşa İlhamə xanımın, yəni regional təhsil idarəsi rəisinin tapşırıqlarını icra edirik, ona arxayınıq, bizə heç icra hakimiyyəti də söz deyə bilməz. Xahiş edirik bu məsələni araşdırın, Təhsil nazirliyi məktəbimizlə maraqlansın, düzgün, şəffaf və pulsuz dərs bölgüsü aparılsın”.
Sumqayıt Evdə təhsil məktəbindəki özbaşınalıqlarla bağlı bizim redaksiyaya da etibarlı mənbədən məlumatlar daxil olub. Həmin məlumatlara görə, məktəbdə 115 nəfər əvəzçi var, onların hər birindən 100 manat rüşvət alınıb: “Direktor Vladim İbrahimov öz bacısı, 5 nömrəli məktəbin müəllimi İsmayılova Müşkünaz Məhəmməd qızını, bacısının gəlinini məktəbdə işə düzəldib, hamısına haqq etmədikləri dərs saatları verib. Elnurə adlı şəxs ixtisasca müəllim olmadığına baxmayaraq, ona heç dərsə gəlmədiyi halda bilogiya fənnindən 36 saat dərs yükü verilib. Vladim İbrahimov Elnurə “müəlliməni” məktəbdə işdə adı qaldığı halda arvadı Səidənin yanına – Abşeron-Xızı təhsil idarəsində tibbi-pedaqoji ekspert komissiyasına göndərib ki, məktəbdə gördüyü, kollektivdə söz-söhbətə səbəb olan qanunsuz işlərini orada rahat davam etdirsin. O komissiyaya ki, özbaşınalıq tüğyan edir. Dərslər satılıb deyə sağlam uşaqları da xüsusi məşğul olma tələb edən sektora götürürlər. Rüşvətlə dərs saatları verilən əvəzçi müəllimlərin işə götürülməsi prosesi indi də davam edir. Son günlərdə Vladim İbrahimov iki qadın coğrafiya müəllimini işə götürüb”.
Xatırladaq ki, məktəb xüsusi təhsil müəssisəsi olduğu üçün müəllimlərin əmək haqqına 50 faiz əlavə də edilir, bu isə 36 saat dərsi olan 55-60 yaşlı 35-40 il stajı olan müəllimlərin ayda 3000-3500 manat maaş alması deməkdir. Ona görə də çəkinmədən 1 saat dərs üçün nə qədər rüşvət tələb olunsa, verirlər. Nəticə də belə olur ki, diaqnostik balı yuxarı olan kənarda qalır, balı aşağı olan 30-36 saat dərs saatına sahib olur. Növbəti yazılarımızda həmin “fədakar” müəllimlərin adlarını çəkəcəyik.
Qarşı tərəfin də mövqeyini dinləməyə hazırıq. //aktualxeber.az//

Ölkəmizdə tibbi arayışın verilməsi ödənişlidir. Hazırda poliklinikalarda sağlamlıq haqqında standart arayış üçün 40 manat tələb olunur. Bir müddət əvvəl başlanan bu proses vətəndaşlar tərəfindən narazılıqla qarşılanır.

İcbari Tibbi Sığorta Agentliyindən verilən məlumatda deyilir ki, sağlamlıq haqqında arayışın rəsmi qiyməti 40 manatdır.

Qeyd olunub ki, Prezident İlham Əliyevin 13 may 2022-ci il tarixli Fərmanı ilə TƏBİB tabeliyindəki dövlət tibb müəssisələri tərəfindən əhaliyə İcbari Tibbi Sığorta üzrə Xidmətlər Zərfinə daxil olmayan və ödəniş tələb olunan tibb xidmətlərini və tarifləri TƏBİB müəyyənləşdirir.

18 yaşdan yuxarı vətəndaşların sağlamlıq barədə arayışı ödənişlidir. Bu məsələ İcbari Tibbi Sığortanın səlahiyyətində deyil. Yalnız 18 yaşa qədər uşaqlar və hərbi xidmətə çağırılanlar tibbi arayış alarkən heç bir ödəniş etmirlər. Lakin, bir məsələ var ki, 40 manat sosial müdafiəsi zəif olan insanlar üçün izafi xərcdir.

Digər tərəfdən hər bir vətəndaşın istədiyi vaxt pulsuz müayinə olmaq hüququ var. Vətəndaş bu hüquqdan istifadə edirsə və müayinənin nəticəsində rəsmi bilgi istəyirsə, onda buna görə niyə pul ödəməlidir? Məsələ ilə bağlı Milli Məclisin Səhiyyə Komitəsinin üzvü Müşviq Məmmədlinin mövqeyini öyrəndik.

Deputat Bizim.Media-ya açıqlamasında bildirib ki, bu məsələ ilə bağlı seçicilərindən də müraciətlər alıb:

“Bu sual hər kəsi maraqlandırır. Ona görə də əvvəlcə mövcud vəziyyəti, sonra isə məsələyə şəxsi münasibətimi bildrimək istəyirəm. İcbari tibbi sığortada sığorta hadisəsi deyilən bir anlayış var. Məsələn, xəstələnmək, zədələnmək və s. sığorta hadisəsi hesab edilir. Sığorta hadisələri icbari tibbi sığorta xidmətləri zərfinə daxildir.

Ona görə də bir sıra xəstəliklərin xərcini İcbari Tibbi Sığorta Agentliyi qarşılayır. Amma arayış almaqla bağlı sağlamlığın müayinəsi sığorta hadisəsi olmadığına görə bu xidmət xidmətlər zərfi paketinə daxil edilməyib.

Ona görə də sırf sığorta hadisəsi olmadığına görə tibbi arayış alarkən ödəniş tələb olunur. Yada salaq ki, stomoloji və digər xidmətlər də hələki icbari tibbi xidmətlər paketinə daxil edilməyib. Yəqin ki, bu və digər xidmətlər də zamanla xidmətlər paketinə daxil ediləcək. Onu da deyim ki, dünya praktikasına baxsaq görərik ki, tibbi arayiş əksər ölkələrdə ödənişlidir”.

Müşviq Məmmədli məsələyə subyektiv münasibətini də bildirib:

“Mənə elə gəlir ki, tibbi arayışın alınmasını da xidmətlər zərfinə daxil etmək olar. Bununla bağlı bir millət vəkili kimi təkliflərimi müvafiq qurumlara çatdıracam. Bu məsələyə yenidən baxılsa, yaxşı olar.

Çünki, bizim dövlətin əsas hədəfi əhalinin sosial müdafiəsini ən yüksək səviyyədə təşkil etmək, əhalinin sağlamlıq indeksini daha yuxarılara daşımaqdır”.

Dövlət İmtahan Mərkəzi “Abituriyent” jurnalının 11-ci nömrəsini nəşr edib.

DİM-dən verilən məlumata görə, jurnalın bu nömrəsində 2023/2024-cü tədris ili üçün Azərbaycan Respublikasının tam (11 illik) orta təhsil bazasında orta ixtisas təhsili müəssisələrinin boş qalan yerlərinə tələbə qəbulu müsabiqəsində iştirak etmək üçün ixtisas seçimi elanı, “Abituriyentin elektron ixtisas seçimi ərizəsi”nin doldurulma qaydası, qəbul aparılan ixtisasların siyahısı, plan yerləri haqqında məlumatlar Azərbaycan və rus dillərində dərc olunub.

Qeyd edək ki, ixtisas seçimi 2023-cü il sentyabrın 29-dan oktyabrın 2-dək in­ter­net vasitəsilə aparılacaq.

Cari ayın 13 tarixli sayında “İsmayıllı və Masallı meşələrində ifşa olunan mütəşəkkil dəstələr nazırin karyerasına son qoya bilər” başlıqlı məlumat xarakterli yazımızda Masallı və İsmayıllının meşə və “Şahdağ” milli Parkında kütləvi formada kəsilən meşə cinsli ağacları məhv edən dəstələrin ifşa olunmalarından və hazırda aparılan istintaq zamanı ETSN 6 saylı Dövlət Ekologiya İdarəsinin müdiri Namiq Yusifov və İsmayıllı Regional Meşə Təsərrüfatının özündənrazı, və “pensioner komissar” müdiri Quliyev Rəsulun çox sərbəst surətdə meşələrimizi məhv edən mütəşəkkil dəstə olan “meşə quldurları” ilə əlaqələrinin olub olmaması barədə məlumat vermişdik. Bu məqaləmizdən qeyzlənən Yusifov Namiq bir neçə gün əvvəl bizimlə əlaqə yaradaraq İsmayıllıda bütün meşələrin göz bəbəyi kimi qorunmasından və bizim məlumatın tam əsassız olması barədə öz iradını bildirmişdir. Və hətta bir az da irəli gedərək bizi yalan və əsassız məlumat yaymağa görə söyüş sahibi ola biləcəyimizi də nəzərimizə çatdırmışdır. Biz də mətbu orqan olaraq ETSN 6 saylı Ekologiya İdarəsinin rəisi Yusifov Namiqin nəzərəinə baş vermiş ekoloji cinayət hadisəsini daha ətraflı formada ictimaiyyətə təqdim edəcəyimizə söz vermişik:

Yusifov Namiq 7 aydır ki, bu vəzifəyə təyinat alıb. Əslən Şəki şəhərindən olduğuna görə dövlətdən aldığı 970 manat əməkhaqqı ilə son 6 ildə Şəkidə çoxsaylı biznes obyektlərinə sahib olmuşdur. Bu barədə dövri mətbuatda jurnalistin sualını isə özünəməxsus formada sualla cavablandırmışdır ki, “Bə mənim obyektlərim olmasın, onda kimin olsun?”.

Ötən sayımızda İsmayıllının İstisu kəndi yaxınlığındakı “Şahdağ”Milli Parkının İsmayıllı Bölməsinə aid meşəli dağlardan son 7 aydır ki, Elçin adlı şəxsin sifarişləri əsasında dövlət qeydiyyat nişanları olmayan “Zil” və “QAZ -66” markalı yük avtomobilləri vasitəsilə uzunluğu 1.4 metr, diametric 44-76 sm olan yeni kəsilib yerində doğranmış fıstıq cinsli meşə materialları İsmayıllı şəhərində Ekologiya İdarəsinin yaxınlığında yerləşən taxta sexinə emal üçün daşınmışdır. Bu barədə İstisu kəndindəki mənbələrimiz qeyd edirlər ki, əvvəllər də bu barədə Ekologiya nazirliyinə və yuxarı orqanlara dəfələrlə şikayətlər etsək də xeyri olmamışdır. Təxmi nən 1 ay əvvəl DİN-nin 102 xidməti”nə edilən şikayətdən sonar məsələ nəzarətə götürülmüş, şikayətin əsaslı olması təsdiqini tapdıqdan sonara təşkil edilən əməliyyat nəticəsində hüquq-mühafizə orqanları “Şahdağ” Milli Parkında qırılan çoxsaylı ağacların kəsilməsini müəyyən etmiş, 18 kub m həcmdə kəsilmiş və sexə gətirilən ağaclar müsadirə edilmişdir. O da məlum olmuşdur ki, kəsilən ağacları Elçin sifarişlər əsasında taxta yeşiklər düzəltməklə iş adamlarına satmaqla məşğul olurmuş.

Bu fakta arayış verən Yusifov N isə qeyd edir ki, İsmayıllı Regional Meşə İdarəsində 1 dənə də olsun ağac mənim dövrümdə kəsilməyib. Bu adamı başa sala bilmədik ki, “Şahdağ” Milli Parkı daha yüksək səviyyədə qorunmalıdır və bu iş də sizin rəhbərlik etdiyiniz 6 saylı Ekologiya İdarəsinin vəzifəsinə daxildir. Necə ola bilər ki, aylarla gecə və gündüz yerli camaatın gözü önündə nömrəsiz yük avtomobillərilə daşınan yeni kəsilən fıstıq ağacları barədə sadə vətəndaşlarımız ETSN-ə şikayətlər edir, amma N.Yusifovun bundan “XƏBƏRİ OLMUR”. Axı Milli Parkdan kəsilən bütün ağac materialları nömrəsiz avtomobillərlə elə Regional İsmayıllı Regional Meşə İdarəsinin ərazilərindən keçərək İsmayıllı şəhərinin 6 saylı Ekologiya İdarəsinin yaxınlığında yerləşən Elçinin icarə götürdüyü taxta sexinə aylardır daşınmışdır. Bu olay bizə məşhur Mark Tvenin yazdığı “Ağ filin oğurlanması” hekayəsini bir daha yada salır. Və bundan sabiq “voenkom”, indiki İsmayıllı RMTM-nin müdiri Quliyev Rəsulun xəbəri olmayıb. Çox qəribdədir. Deyilənə görə ona görə bu qanunsuz yüklərdən meşə müdiri R.Quliyevin xəbəri olmur ki, hər yük avtomobili sürücüsü 100 manat xərc çəkir, eləcə də 6 saylı Ekologiya İdarəsinin də ona görə “xəbəri olmur ki,” hər ağac dolu yük avtomobilinə görə sürücü 40 manatından keçməli olurlar. Yoxsa ki, “qazdan ayıq” müdirlərin və onların onlarla işçilərinin gözlərindən yayınmaq əsla mümkün deyil. Budur, yerli sakinlərin şikayətlərindən sonra yük avtomobili sürücüləri də, ağacları kəsib yerində arxayınçılıqla doğrayanlar da, onları avtomobillərə yükləyənlər də, taxta sexinin sahibi Elçin də cəmi 13 nəfər şəxs saxlanılaraq naməlum istiqamətdə aparılmışlar. Çox güman ki, “Şahdağ” Milli Parkının İsmayıllı Bölməsində bu miqyasda törədilmiş ekoloji terror görə cinayət işi açılacaqdır. İsmayıllı şəhərindəki, taxta sexində də yarım doğranmış yaş formada ağaclar və hazırlanmış çoxsaylı taxta yeşiklər də aşkar edilmişdir.

Elçinin taxta sexindəhazırlanan taxta yeşiklər

Bəli, biz 2021-ci ilin martında da növbəti yazımızda Yusifov Namiqin ETSN 7 saylı Ekologiya İdarəsinin müdiri olarkən də eyni mənzərəni Qaxın Güdüllü kəndinin sakinləri tərəfində də qeyd edildiyi bildirilmişdik. Belə ki, Qax rayonu Çüdüllü kəndinin meşələri kütləvi şəkildə qırılmasının qarşısını almaq üçün kənd sakinlərinin Qax.org.az saytına verdiyi məlumata görə, 2021-ci ilin fevralında 1 həftədir ki, kəndin meşəlik sahələrindəki çoxillik ağaclar kütləvi şəkildə qırılır və naməlum istiqamətə daşınır.
Yerli icra hakimiyyətinin və icra nümayəndəliyinin göz yumduğu bu meşə soyqırımında deputat Azər Kərimlinin yaxın adamları yaxından iştirak edirlər.”

Güdüllü meşəsi, sakinlər meşə qorumaq üçün yoluna beton bloklar qoyublar

Çıxılmaz vəziyyətdə qalan kənd sakinləri meşənin girişinə beton baryerlər qoyublar ki, meşə cəlladları əraziyə daxil ola bilməsinlər.” Bəli, 2 il əvvəl də Yusifov Namiq şəxsi maraqları naminə öz vəzifə borcunu indi İsmayıllıda olduğu kimi yerinə yetirməmişdir.
Lakin 2021-ci ilin iyul ayında Qax rayonun Qıpçaq kənd bələdiyyəsinin ərazisində kəsilən qovaq ağaclarına görə bizim qohumumz olan İbaxlı kənd sakini Abdullayev Kamran Mövlüd oğlunu 28000 manat cərimə aktı yazaraq polisə vermişdır. Qax rayon Prokurorluğu da cinayət işini başladarq sənədləri məhkəməyə təqdim etmiş və Kamran həbsə atılmışdır. Yalnız Kamranının atası 5000 mant xərc çəkdikdən sonar oğlu azadlığa çıxa bilmişdir. Bəli, N.Yusifov kasıb və imkansız adamları dərhal cəzalandıraraq vəzifəsini ləyaqətlə və vicdanla da yerinə yetirən vaxtlar olmuşdur. Lakin deputat Azər Kərimli, son 20 ildə Qax meşələrinin axırına çıxana qədər cıqqırını da çıxara bilməmişdir.

Qobustan. Ceyrankeçməz çayı arxasında dağ sökülüb
Qobustan. “Diribaba” dağı arxasındakı dağ suxuru sökülüb daşınıb

Bu ilin may ayında Qobustan rayonun mərkəzinə yaxın olan “Dirbaba” dağının arxasındakı suxurlu dağın və Ceyrankeçməz çayının gündoğar hissəində yerləşən yüksək bərk suxurlu dağın yer səthindən 30 m aşağıya kimi qazılıb daşınması barədə ETSN-nə göndərdiyimiz sorğuya yenə də 6 saylı Ekologiya İdarəsi formal rəsmi cavabında bildirmişdir ki, yerlərə baxış keçirilmiş və yazılanlar öz əsdiqini tapmamışdır. Bəli, ona görə ki, Nərimankənd sakinlərinin gözləri önündə hər gün bu dağ suxurları dolu 300 yük yük avtomobili ilə daşınmış və 2016-cı ildə Bakı-Şamaxı yolunun yol yatağına doldurulmuşdur. Və icraçı təşkilat olan “Polat Yol Yapı” hər iki dağı 3 milyon manat rüşvət hesabına satın alıb materialından istifadə etmişdir. Yusifov Namiq isə baş vermiş cinayətləri gizlədərək ETSN rəhbərliyinə saxta və əsassız məlumat vermişdir. Necə deyərlər, “Görünən dağa bələdçi lazım olmadığı” deyilsə də, “Dirbaba” dağını “görünməz” etməklə atalar misalına yeni məzmun vermişdir.
Davamı var. Bizi izləyin.
İfadetv.com-un araşdırma qrupu

Aktualinfo.org Əmək və Əhalinin Sosial Müdafiəsi Nazirliyi tərəfindən Azərbaycan Respublikasının ərazi bütövlüyünün, müstəqilliyinin və konstitusiya quruluşunun müdafiəsi ilə əlaqədar əlil olmuş şəxslərə və şəhid ailələrinə Bakı, Gəncə, Mingəçevir, Şəki, Şirvan şəhərlərində və Salyan, Qax, Ağsu, Ağdaş, Astara rayonlarında 1, 2 və 3 otaqlı mənzillərin satınalınması ilə bağlı keçirilmiş açıq tender ətrafında apardığı araşdırmaları davam etdirir. Xatırladaq ki, sözügedən qurum əlil olmuş şəxslərə və şəhid ailələrinə mənzillərin satınalması üzrə keçirmiş olduğu açıq tenderə 12.07.2023 -cü ildə yekun vurub və fiziki şəxs Ağaməmmədova Xanım Şamil qızı ilə 2.531.250 manat məbləğində satınalma müqaviləsi bağladığını 23.08.2023-cü il tarixdə dövlət satınalmalarının vahid internet portalında açıqlayıb. Xüsusilə qeyd etmək istərdik ki, nazirliyin Tender Komissiyası şərtlər toplusundə tələb olunan sənədlərin təqdim edilməsinin son tarixini 03.07.2023-cü ilə müəyyən edib, amma nədənsə tenderdə iştirak üçün sənədlərin qəbulu tarixini göstərməyib. Bu isə müəyyən şübhələr yaradır. Belə ki, tender proseduru başlaması üçün verilmiş elandan sonra iddiaçılara sənədləri təqdim etmək üçün ən azı bir ay vaxt verilməlidir. Amma məlumatlardan da göründüyü kimi nazirlik 3 milyon manata yaxın dəyəri olan açıq tenderi cəmi 9 günə yekunlaşdırıb.

Bu tenderin keçirilməsi zamanı yol verilən bir qanunsuzluq, birinci şübhəli məqam. Növbəti şübhəli məqamlar 3 milyon manata yaxın dəyəri olan açıq tenderin qalibi olmuş Ağaməmmədova Xanım Şamil qızı ilə bağlıdır. Ötən yazılarda da qeyd etmişdik və bir daha xatırlatmaq istərdik ki, redaksiyanın araşdırma qrupu həmin vaxt açıq internet axtarış sistemlərində Sosial Müdafiə Nazirliyindən 3 milyon manata yaxın tender udan Xanım Ağaməmmədova barədəsində heç bir məlumat əldə edə bilməmişdi. Yalnız Dövlət Vergi Xidmətinin fiziki şəxslərin reytestr məlumatlarından məlum oldu ki, fiziki şəxs Ağaməmmədova Xanım Şamil qızının hüquqi ünvanı ŞƏKİ RAYONU, ŞƏKİ ŞƏHƏRİ, S.RƏHMAN, ev 70, mənzil 49-da yerləşir. Mərkəzi Seçki Komissiyasının seçicilərin siyahısında Ağaməmmədova Xanım Şamil qızının həqiqətən də göstərilən ünvanda pasport qeydiyyatında olduğu göstərilir.

Məlumatların ən maraqlı tərəfi Əmək və Əhalinin Sosial Müdafiəsi Nazirliyinin 2.531.250 manat məbləğində satınalma müqaviləsi bağladığı Ağaməmmədova Xanım Şamil qızının 1951-ci il təvəllüdlü olması idi. Yəni, 72 yaşlı bir qadının Əmək və Əhalinin Sosial Müdafiəsi Nazirliyi üçün əlil olmuş şəxslərə və şəhid ailələrinə Bakı, Gəncə, Mingəçevir, Şəki, Şirvan şəhərlərində və Salyan, Qax, Ağsu, Ağdaş, Astara rayonlarında 1, 2 və 3 otaqlı mənzillərin satın alınmasını reallaşdıra biləcəyi bir qədər şübhəli görsənirdi. Odur ki, araşdırmalarımızı davam etdirməli olduq.

Şəkidəki mənbələrimizdən əldə etdiyimiz məlumata görə Xanım Ağaməmmədova həqiqətən də ŞƏKİ ŞƏHƏRİ, S.RƏHMAN, ev 70, mənzil 49-da pasport qeydiyyatındadır. Mənzil Şəki şəhərindəki 8 nömrəli məktəbin üst tərəfi, Şəki bazarının aşağısındakı 5 mərtəbəli binanın 5-ci mərtəbəsində yerləşir. Xanım Ağaməmmədova ildə bir-iki dəfə sözügedən mənzildə olur, ya olmur. Xanım Ağaməmmədova hazırda Bakı şəhərində, 4-cü mikrorayonda yaşayır, Yasamal rayonu Şəfayət Mehdiyev küçəsində, “Lider”TV-nin yanında yerləşən böyük bir idarənin baş mühasibidir.

Həmin mənbədən əldə etdiyimiz ən son məlumatda Xanım Ağaməmmədovanın ayaqlarında ağrılar olduğundan çox yeriyə bilmədiyi bildirilir. Yəni 72 yaşlı xanım daim oturaq şəraitdə yaşayır. Belə olan halda Əmək və Əhalinin Sosial Müdafiəsi Nazirliyinin Tender Komissiyası və satınalmaların keçirilməsinə birbaşa cavabdeh olan İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidməti Xanım Ağaməmmədovanın Bakı, Gəncə, Mingəçevir, Şəki, Şirvan şəhərlərində və Salyan, Qax, Ağsu, Ağdaş, Astara rayonlarında mənzillərin satın alınmasına necə razılıq verib? Yəni xanım oturaq şəraitdə yaşayırsa, rayonlar arasında bu qədər məsafələri necə qət edib, bu dövlət sifarişini yerinə yetirəcək?

Burada başqa maraqlı bir məqam da var. Göründüyü kimi, 3 milyon manata yaxın dəyəri olan açıq tenderin qalibi Ağaməmmədova Xanım Şamil qızı fiziki şəxsdir. Təbii ki, qanun fiziki şəxslərin də tenderdə iştirakına icazə verir. Bunun üçün fiziki şəxslərdən bank hesabı tələb olunur ki, bu hesabda tenderdə təklif ediləcək məbləğin ən azı 50 faizi olmalıdır. Bu tenderdə risklərin qarşısını almaq üçündür. Göründüyü kimi, fiziki şəxs Ağaməmmədova Xanım Şamil qızı tenderə 2.531.250 manat təklif edərək qalib olub. Burada sual yaranır bir fiziki şəxs olaraq 72 yaşlı xanımın bank hesabında ən azı 1 milyon manat varmı? Varsa, ömrü boyu mühasib işləmiş bu xanım bu 1 milyon manatı necə qazanıb?

Göründüyü kimi cavabsız suallar və şübhəli məqamlar çoxdu. Amma bir cavab var ki, o da Ağaməmmədova Xanım Şamil qızının bu tenderdə qalib gəlməsinin formal olduğudur. Ötən yazılarımızda da da qeyd etmişdik və bir daha xatırlatmaq istərdik ki, məlumatlı mənbənin sözlərinə görə əvvəllər Xanım Ağaməmmədovanın adına bir neçə MMC olub. Həmin MMC-lər vasitəsi ilə o, həm Şəki rayon İcra Hakimiyyətinin, həm də bir sıra dövlət qurumlarının həyata keçirdiyi dırnaqarası layıhələdə dövlət vəsaitlərinin təyinatından kənarlaşdırılması işlərinə baxıb. Mənbəmizin verdiyi məlumatda Xanım Ağaməmmədovanın hazırda Yasamal rayonu Şəfayət Mehdiyev küçəsində yerləşən böyük bir idarənin baş mühasibi işlədiyi bildirilir. Şəfayət Mehdiyev küşəsində, “Lider”TV-nin yanında Ağalar Vəliyevə məxsus başqa bir şirkət, “Azəraqrartikinti” ASC də yerləşir. Məlumatlı mənbənin sözlərindən görsənən odur ki, 72 yaşlı Xanım Ağaməmmədova hazırda “Azəraqrartikinti” ASC -nin mühasibatlığında ya çalışır, ya da adı gedir.

Qeyd edək ki, tenderdə şübhəli məqamların araşdırılması, ləğv edilməsi və hüquqi qiymət verilməsi məqsədi ilə redaksiya İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidmətinə, Respublika Hesablama Palatasına, Maliyyə Nazirliyinin Dövlət Maliyyə Nəzarəti Xidməti və Baş prokurorluq yanında Korupsiyaya qarşı Mübarizə Baş İdarəsinə müraciət edib. Nəticələri barədə yaxın gələcəkdə daha ətraflı məlumatları diqqətinizə çatdıracağıq.

Aktualinfo.org

Göygöl rayonu, Cümşüdlü kənd sakini İsayev Anar Tahir oğlu tərəfindən Hurriyyet.az saytının redaksiyasına şikayət məktubu daxil olub. Şikayətçi Məşğulluq Xidmətindən narazılığını bildirir:

"Mən, İsayev Anar Tahir oğlu, yazaraq sizdən xahiş edirəm ki, problemimi işıqlandırasınız.

2020-ci ildən bu günə kimi Məşğulluq Xidmətində qeydiyyatdayam. Nümayəndələr gəlib baxış keçirməlidir, amma indiyədək gələn yoxdur. Məndən sonra müraciət edənlərə cavab gəlib, heyvan verilib, mən isə hələ də gözləyirəm. Nə vaxt getsəm deyirlər ki, get, yoxlama gələcək. Bu qədər rahatçılıq, özbaşınalıq mövcuddur.

Mənim ehtiyacım var ki, 3 ildir həmin idarəyə gedib-gəlirəm. İnsanı yaşamaqdan soyudurlar, bu, mənə düşürsə, niyə vermirsiz, niyə uzadırsız?!”

Məsələ ilə bağlı Əmək və Əhalinin Sosial Müdafiəsi Nazirliyi ilə əlaqə saxladıq, məsələnin araşdırılacağı bildirildi.

Ekonazirliyin tabeliyində olan Dövlət Mineral Xammal Ehtiyatlarından İstifadə Agentliyində nələr baş verir..?

Beləki, 19 iyul 2022-ci il tarixdə Prezident İlham Əliyevin sərəncamı ilə Samir İdayətov Dövlət Mineral Xammal Ehtiyatlarından İstifadə Agentliyinin İdarə Heyətinə sədr təyin olunub.
Söhbət Ekologiya və Təbii Sərvətlər Nazirliyinin tabeliyində olan Dövlət Mineral Xammal Ehtiyatlarından İstifadə Agentliyindən gedir.
İndi isə cənab ekologiya naziri Muxtar Babayevin 2 il öncə Azər Məcid oğlu Şükürovu Agentliyin sədr müavini təyin etməsinə nəzər salaq.
Bəli, Muxtar Babayev 20.10.2020-ci il tarixdə Azər Şükürovu Agentliyə sədr müavini təyin edib.
Yeni təyin olunan sədrin fəaliyyəti haqqında nəsə deyə bilmərik, çünki təyin olunduğu heç bir həftə də deyil.
Ona görə də mövzunu 2 ildir sədr müavini olan Azər Şükürovun üzərində quracağıq.
Məlumat üçün qeyd edək ki, Azərbaycanda “Yerin təki haqqında” qanun var. Və Agentlik “Yerin təki haqqında” qanunda nəzərdə tutulmuş yerin təkindən istifadə növləri üzrə fəaliyyətin tənzimlənməsini, habelə yerin təkinin istifadəsində və mühafizəsində qanunvericiliyə, müəyyən edilmiş standartlara və tələblərə əməl olunmasına nəzarəti həyata keçirən, yerin təkindən istifadə ilə bağlı müsabiqə və hərracların keçirilməsini təşkil edən, bu sahədə xidmətlər göstərən publik hüquqi şəxsdir.
Amma Azər Şükürov üçün nə yerin təki, nə yerin üstü deyilən anlayış yoxdur. Onun bildiyi bir meyar var ki, o cənab nazirin dostudur, tələbə yoldaşıdır və istədiyini edə bilər. Hətta deyir ki, onu nazir də vəzifəsindən çıxara bilməz, çünki açar sandığı, tökər rüşvəti…
Bəli, məlumdur ki, bu gün Azərbaycanda onlarla daş karxanaları, qum-çınqıl sexləri fəaliyyət göstərir.
Təkcə onu qeyd edək ki, çayların məcrasında olan qum-çınqıl o dərəcədə şəhərlərə daşınır ki, hətta çaylar artıq öz məcrasını dəyişir və ətraf mühitə ciddi ziyan dəyir. Bunun bircə adı var- ekoloji terror.
Bütün bunlara görə Azər Şükürov rəhbər şəxs olaraq məsuliyyət daşıyır.
Təsəvvür edirsiniz, real dövriyyəsi milyonlarla olan daş, çınqıl, qum, qızıl, əhəng karxanaları, klinker istehsal edən sexlər bütün ekoloji normaları pozur. Və nəticədə Azər Şükürovun rəhbərlik etdiyi Agentlik kağız üzərində həmin daş karxanalarına 500 min, bəzən 1 milyon, hətta 2 milyona yaxın cərimə müəyyən edirlər və sonra cərimə etdikləri şəxsləri bazarlığa çağırırlar. Beləcə sövdələşmə başlayır.
Nəticədə 100 minlərlə kifayətlənməyən Agentliyin rəhbərliyi həm də karxana sahiblərini “aylığa” otuzdururlar. Yəni bu qədər sadə və bəsit bir rüşvət-korrupsiya mexanizmi.
Amma sözdə Azər Şükürov kimilər təbiətə sevgidən danışırlar.
Və utanıb-qızarmadan başlarının üstünə Ulu Öndərin “Mən istəyirəm ki, hamınız təbiəti qoruyan olasınız” sözlərini asıb, təbiətə qənim kəsilirlər.
Araşdırma zamanı Azər Şükürovun ana təbiətə sevgisi ilə bağlı xeyli uzun müsahibələrə rast gəldik.
Hətta Azər Şükürov öz müsahibəsində qeyd edir ki, kaşki, təbiəti qoruyanlar olasınız.
istəyirəm ki, hamınız təbiəti qoruyanlar olasınız.
Mədən sənayesi üzrə kadr hazırlığı bu günün tələblərinə cavab vermir:
“Hazırda Azərbaycanın inkişafı fonunda bu təhsil ocaqlarının dağ-mədən sənayesi sahəsində kadr hazırlığı istiqamətində ciddi fəaliyyətləri nəzərə çarpmır. Dağ-mədən sənayesi elə kadr tələb edir ki, müəyyən hazırlıqdan, praktikadan sonra konkret mədənlər üzrə müasir texnologiyaların iş prinsiplərinə uyğun müstəqil fikirlər irəli sürsün və təkliflərini qəbul etdirə biləcək savada malik olsun. Düzdür, bu cür kadrlar hər bir sahəyə lazımdır. Ancaq müasir dağ-mədən sənayesi tamamilə yeni, müasir təfəkkür tərzinə malik kadrlar tələb edir. Dağ-mədən sənayesi elə bir sahədir ki, burada işləyən kadr ətraf mühitin mühafizəsindən tutmuş kollektiv və şəxsi təhlükəsizliyə qədər bütün detalları nəzərə almaq istedadına malik olmalıdır. Sovetlər dövründə bu sahə üzrə çox gözəl mütəxəssislər hazırlanmışdı. Ancaq Sovet İttifaqı dağıldıqdan və Azərbaycanda dağ-mədən sənayesində geriləmələr baş verdikdən sonra onların çoxu öz işini itirdi və bu gün ixtisaslarına uyğun olmayan sahələrdə fəaliyyət göstərirlər”.
Həə, indi mətləb üstünə gəlmək olar.
Cənab Azər Şükürov, sizin bu müsahibənizi oxuyanda vaxtilə Prezident Administrasiyasının rəhbəri olan cənab Ramiz Mehdiyevin “Mənə savadlı və təmiz bir hüquqşünas” verin deməyi yada düşür.
Sizə savadlı kadrlar lazımdır yoxsa?- rüşvət və korrupsiyanı əla bilən kadrlar?
Ona görə də oxuduğum bütün müsahibələrindən bir nəticə çıxardım. Sənin kimilərin avazı yaxşı gəlir, amma oxuduğunuz təbiətə sevgi deyil. Bu olsa, olsa Ekalogiya naziri və siz Azər Şükürovun prezidentən gizli “EKOLOJİ TERROR”a bilərəkdən rəvac verib, cib idarəçiliyində şərik dostlar olaqraq nazirliyi zəbt edən yarıtmaz vəzifə sahiblərisiz!
Video və mətini yaydı Gundelik baki.com //gundelik-baku.com//

Hesablama Palatasının daha bir dövlət qurumunda apardığı yoxlamalar nəticəsində ciddi pozuntulara yol verildiyi aşkarlanıb.

Yenicag.az xəbər verir ki, Hesablama Palatasının iki həftə öncə Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətinə ayrılmış dövlət vəsaitinin və digər dövlət əmlakının istifadəsi və idarə olunmasının qüvvədə olan hüquqi aktların tələblərinə uyğunluğunun qiymətləndirilməsi məqsədilə apardığı auditin nəticələrinə dair hesabatı müəyyən ajiotaja səbəb olub.

Hesabata görə, aparılan audit 2020-2022-ci illər üzrə dövlət büdcəsindən Xidmətə yönəldilən 22 milyon 214,1 min manat vəsaiti əhatə edib. Yoxlamaların nəticələrinə əsasən, qeyd olunan dövrdə sözügedən Xidmətin nəzarət sahəsinə aid edilən 4331 ədəd daşınmaz tarix və mədəniyyət abidələrinin 87,9 faizinin (3809 abidə) pasportlaşması təşkil edilməyib, 94,7 faizinin (4102 abidə) mühafizə zonaları təyin olunmayıb, 86,1 faizinin (3730 abidə) balans mənsubiyyəti müəyyən edilməyib, abidələrin qorunması və istifadəsi üzrə tələblərin pozulmasına görə 17 halda cərimə tətbiq olunmayıb, bir sıra hallarda isə tətbiq edilmiş cərimə məbləğlərinin dövlət büdcəsinə ödənilməsi təmin olunmayıb.

Bundan başqa, Xidmət tərəfindən podratçılar və digər icraçılarla bağlanılmış müqavilələrin şərtlərinə tam əməl edilməyib, müqavilənin bitmə müddətinə yaranmış debitor borcun bağlanması təmin edilməyib, satınalma müqaviləsinin müddətində işlərin başa çatdırılmaması fonunda 3 halda podratçıya artıq vəsait ödənilib, işlərin başa çatdırılması müddətinin pozulmasına (gecikməyə) görə 2 halda cərimə məbləği icraçılara tətbiq edilməyib.

Auditlə əhatə olunan obyektlər üzrə layihə-smeta sənədlərinin və yerinə yetirilmiş işlərin qəbulu aktlarının tikinti norma və qaydalarına uyğunluğu təmin edilməmiş, əsaslı təmir və yenidənqurma işləri üzrə yerinə yetirilmiş işlərin dəyərinin, həmçinin binaların sökülməsi və mədəniyyət obyektlərində ilkin təmir-bərpa işləri yerinə yetirilmiş iş həcmlərinin qəbul aktlarında əhəmiyyətli dərəcədə artıq göstərildiyi müəyyən edilib.

Xidmətin fəaliyyətindəki nöqsanların bir qismi də dövlət satınalmaları ilə bağlı olub, yerinə yetirilməyən iş və xidmətlər üzrə vəsait ödənilməsi halları, həmçinin bir sıra satınalma prosedurlarının pozulması halları olub.

Aparılmış inventarizasiya nəticəsində əsas vəsaitlər üzrə çatışmazlıqların müəyyən edilməsi, yaranmış debitor borc məbləğinin uçotdan yayındırılaraq maliyyə hesabatlarında əks etdirilməməsi, yaranan öhdəliyə görə kreditor borc məbləğinin uçotda artırılması və bu kimi halların xarakterik olması, ümumilikdə Xidmət üzrə nəzarət mexanizmlərinin tətbiq edilməməsi, aktivlərin uçotunun aparılması prinsiplərinin pozulması maliyyə hesabatlarında fərqlərə və təhriflərə yol açmaqla, maliyyə vəziyyətinin düzgün qiymətləndirilməsində əsaslı risk amillərini formalaşdırıb.

Xidmətdə dövlət vəsaitinin və digər dövlət əmlakının istifadəsi və idarə olunmasının auditi üzrə aşkar edilib hüquqpozmalarda cinayət tərkibinin əlamətlərinin ehtimal olunması nəzərə alınaraq auditin nəticələrinə dair müvafiq materiallar Baş Prokurorluğa göndərilib.

Hesablama Palatasının məlumatından göründüyü qədər, fəaliyyəti yoxlanılan bir sıra dövlət qurumlarında olduğu kimi, Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətinin işində də kifayət qədər ciddi sayılacaq pozuntular aşkara çıxarılıb. Ancaq yuxarıda qeyd olunanlar məsələnin bir tərəfidir. Başqa sözlə desək, fəaliyyətdə nöqsanlar varsa, bunun əsas səbəbi rəhbərlik tərəfindən işin düzgün qurulmaması və nəzarətin yetərli səviyyədə təşkil olunmamasıdır. Bu sayaq səhlənkarlığa və məsuliyyətsizliyə yol verən rəhbər işçinin isə cəzalandırılması adi hal olmalıdır.

Lakin fəaliyyətində çox sayda pozuntular aşkar olunan quruma yaxın aylara qədər rəhbərlik etmiş şəxsin başqa bir dövlət qurumuna təyinat alması heç də normal qarşılanacaq durum deyil. Haqqında danışılan Xidmətin sabiq rəhbəri Azad Cəfərli də nəzərdə tutulan həmin məmurların sırasındadır. Yəni Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətinin rəhbəri vəzifəsindən azad olunan Azad Cəfərli uzun müddət işsiz qalmadı. “Uğurlu” kadr bu ilin iyununda Kənd Təsərrüfatı Nazirliyi Aparatının rəhbəri postuna gətirilib. Bu təyinata hər hansı şərh vermək və Cəfərlinin yeni vəzifəsində özünü necə göstərəcəyini proqnozlaşdırmaq niyyətimiz yoxdur. Maraqlı olan onun əvvəlki vəzifəsində işlədiyi müddətdə aşkarlanan pozuntulara görə qanun qarşısında necə cavab verməsidir. Baş Prokurorluğun bununla bağlı təhqiqatı yəqin ki, vurğulanan məsələyə də aydınlıq gətirəcək.

www.yenicag.az

Bir qrup ixracatçı sahibkar Prezident İlham Əliyevə müraciət edərək Dövlət Gömrük Komitəsinin onlara yaratdığı əngəldən şikayətləniblər. Anaxeber.info bildirir ki, iş adamları Azərbaycanın qərb bölgələrindən xurma ixrac edirlər. Onların sözlərinə görə, bu məhsullar əsasən Ukraynaya göndərilir. Sahibkarlar qeyd edirlər ki, müqavilə əsasında ixrac etdimkəri xurma 51 qəpiyə qiymətləndirilib.
"Lakin Yevlax, Tovuz rayonlarında rəsmiləşdirmə zamanı xəbərdar etmədən hər bir xurma maşınının hesab fakturasını 1.30 manat dəyərində qiymət qoyaraq bütün ixracı iflic ediblər. Müzakirə zamanı hər iki gömrük postunun Qərb bölgəsi üzrə regional idarə rəisi Pərviz müəllimin tapşırığı olduğunu bizə bildirdilər.
Məsələyə aydınlıq gətirərək bildirirk ki, ölkə ərazisində xurma məhsulunun kiloqramı
15 qəpikdir, bunu qarşı tərəfə 51 qəpiyə razılaşdırsaq da, Gömrük Komitəsinin regional idarəsi məcbur edərək 1.30 manatdan hesablamaqla Ukraynada rəsmiləşməni düz 3000 dollar bahalaşdırıb.
Bu isə Azərbaycanda olan xurma məhsulunun ölkədən ixracının qarşısının kəskin şəkildə alınması deməkdir", - deyə Prezidentə müraciətdə qeyd edilib.
Hazırda Ukrayna xurma məhsulunun ikinci dərəcəli alıcısıdır, bu cür gömrük yanaşması konseqnasiya zamanı vəsaitin geri qayıdan hissəsini yarıya çatdıracaq ki, bu da tam vəsaitin geri qayıtması deməkdir. Sahibkarlar əlavə edib ki,
Yevlax və Tovuz ərazisində bəyannamə geri qaytarılarkən əsas səbəb kimi qiymət uyğunsuzluğunun qeyd olunmaması da şübhə doğuran haldır: "Çünki bu zaman bəyannaməni geri qaytararkən Gömrük Komitəsinin sahibkara invoys dəyərini artırmaq səbəbini gömrük portalında qeyd etmirlər.
Səbəb başqa qeyd edilir. Çünki özləri də xurma məhsuluna şişirdilmiş qiyməti yazdıqlarının fərqindədirlər. Ölkəmiz bu gün ağır imtahanlar verdiyi halda, Qərb gömrük komitəsinin rəhbəri Pərviz müəllimin bu rəftarı nəyə xidmət etdiyi bəlli deyil.
Məlumdur ki, xurma məhsulu ölkədən ixrac olunmazsa, ölkədə bu məhsula tələbat olmadığından külli miqdarda xurma daxildə xarab olacaq. Hörmətli Prezident və Şahin Bağırov, sizə Qərb regional gömrük barədə tapşırıq verməyinizi xahiş edirik".

Şirvan şəhər sakini İlyas Mahmudov bu il, aprelin 7-də işdə xəsarət alıb. Onun sol əlinin iki və üçüncü barmaqları 1-ci buğundan, eləcə də sol ayağının bütün barmaqları ambutasiya olunub.

Ancaq deyir ki, xəstəlik vərəqini çalışdığı “Şirvan Oyl” Əməliyyat Şirkətinə təqdim etsə də, bugünə qədər ödəniş olunmayıb.

“Fikirləşmirlər ki, necə dolanıram”, – deyən İlyas Mahmudov sözügedən şirkətdə qazmaçı kimi çalışıb.

Onun sözlərinə görə, müalicəsi hələ də davam edir:

“Mənimlə bağlanan əmək müqaviləsinin müddəti gələn ay bitir. Doğrusu, şirkət işdən çıxarmaqla bağlı heç nə deməyib. Lakin müvafiq komissiyadan keçmək üçün Bakıya göndərdilər. Müayinə edən həkimlər dedilər ki, xəsarətlər çoxdur, əli hərəkət etdirmək çətindir. Hələlik əlillik verilib-verilməyəcəyini də bilmirəm”.

“Xəstəlik vərəqəsini avqustun 1-də təqdim eləmişəm. Şirkət deyir ki, ödənişlə bağlı gecikmə onlarlıq deyil. Həyat yoldaşım evdar qadındır, üstəlik, himayəmdə yataq xəstəsi olan anam var”, – şikayətçi deyir.

“Şirvan Oyl” Əməliyyat Şirkəti 3 fevral 2009-cu ildə imzalanmış, 22 may 2009-cu ildə Parlament tərəfindən təsdiqlənmiş hasilatın pay bölgüsü sazişi əsasında “Kürovdağ” yatağının istismarı ilə məşğuldur. Azərbaycanda quruda neft hasilatı ilə məşğul olan ən böyük xarici şirkət olan “Global Energy Azerbaijan Group”un (“GEA”) operatoru olduğu 5 Hasilatın Pay Bölgüsü Sazişinin (PSA) iştirakçısıdır . Rəhbəri Aleksandr Alekseeviç Anoxindir.

Şirkətdən Meydan TV-yə bildiriblər ki, vəsaitin ödənilməsi şirkətlə bağlı məsələ deyil. Qurumdan əlavə məlumat vermək istəməyiblər.

Əmək və Əhalinin Sosial Müdafiəsi Nazirliyindən isə bildiriblər ki, müraciəti araşdırandan sonra açıqlama verəcəklər.