Rusiya sülhməramlılarının müvəqqəti yerləşdiyi ərazilərdəki erməni silahlı birləşmələri, separatçı rejimə aid qüvvələr fevralın 6-sı gecə saatlarında Tərtər rayonunun Qapanlı kəndini atəşə tutublar. Nəticədə itkilərimiz olmasa da, mülki obyektə ziyan dəyib. Zamantv.az xəbər verir ki, separatçıların təxribatları haqqında Modern.az-a danışan Demokratiya və İnsan Hüquqları Komitəsinin sədri, hüquq üzrə fəlsəfə doktoru Çingiz Qənizadə Azərbaycanın atmalı olduğu addımlara toxunub.

Ç. Qənizadənin fikrincə, Tərtərin atəşə tutulması bir daha göstərir ki, separatçı rejimin tör-töküntüləri hələ də təxribatları davam etdirməkdə maraqlıdırlar:

"Burada məsələyə iki baxış ola bilər. Birincisi, erməni separatçılarının bu cür davranışları onların sülh istəmədiyini, birgəyaşayış qaydalarına gələcəkdə belə əməl etməyəcəyini, sülh olacaqsa, Qarabağda qalan ermənilərin normal yaşamayacaqlarını sübut edir. İkinci bir tərəfdən sülhməramlıların məsuliyyətsizliyi, bu cür məsələlərə ciddi yanaşmaması problemlərə gətirir. Sülhməramlılar 10 noyabr sazişinin bəndlərinə uyğun olaraq, Qarabağa yerləşdiyi andan erməni separatçıları oradan çıxarılmalı, atəşkəs bərqərar olmalı, silahlı heç bir dəstənin fəaliyyətinə imkan verilməməli idi. Lakin biz görürük ki, nəinki erməni separatçılar oranı tərk etmədilər, əksinə 2020-ci il noyabrın 26-dan sonra Azərbaycan ordusu tərəfindən həyata keçirilən antiterror əməliyyatları nəticəsində 60-dan çox terrorçu zərərsizləşdirildi. Özləri etiraf etdilər ki, atəşkəsdən 15-16 gün sonra Ermənistan tərəfindən bölgəyə göndərilib, təxribat törətmək tapşırılmışdı. Bəs Ermənistan silahlı dəstələrini Laçın dəhlizi ilə Qarabağa gətirib, terror törətmək üçün yerləşdirəndə sülhməramlılar hara baxırdılar? Eyni zamanda Qarabağda olan erməni separatçıları gah səngərlər qazır, gah istehkamlarını möhkəmləndirir, gah texnikalarını nümayiş etdirirlər. Bu zaman sual yaranır, sülhməramlılar, siz bu bölgəyə niyə gəlmisiniz? Nəyə xidmət edirsiniz? Sülhməramlılar, bölgədə sülhü təmin etməyə yönəltməli olduğunuz addımları niyə göstərmirsiniz?"

Son zamanlar sülhməramlıların nəzarət etdikləri bölgələrdəki özbaşınalıqların artdığını vurğulayan Çingiz Qənizadənin sözlərinə görə, mövcud durum göstərir ki, Qarabağdakı erməni separatçıları burada normal yaşamaq niyyətində deyillər:

"Azərbaycan tərəfi şübhəsiz ki, Rusiya sülhməramlılarına bununla və baş verən digər hadisələrlə bağlı kifayət qədər ciddi mövqeyini bildirir, tələblərini ortaya qoyur. Amma bizim istəyimizdən asılı olmadan baş verən addımlara qarşı adekvat cavablar zamanı gələndə veriləcək. Hesab edirəm ki, bu cür cılız addımlara qarşı ciddi reaksiya sərgiləyib, bizi sevməyən qüvvələrə, beynəlxalq təşkilatlara, üçtərəfli bəyanatın digər subyekti olan Rusiyaya əsas verməməliyik. Onların bizə qarşı hansısa çirkin niyyətlərini ortaya qoymasına şərait yarada bilmərik. Hələ ki, səbr nümayiş etdiririk. İndiki məqamda daha çox Rusiya sülhməramlılarından razılaşmaya uyğun nəzarət həyata keçirməyi tələb etməliyik. Bu cür qanunsuzluqlardan istifadə edərək, atəşkəs rejimini pozanların tutulub, cəzalandırılmasını istəməliyik".

“Nə mənəvi, nə siyasi haqqı yoxdur ki, xalqın üzünə çıxsın”. Zamantv.az yenicag.az-a istinadla xəbər verir ki, bunu deputat Cavanşir Feyziyev barəsində danışarkən Müasir Müsavat Partiyasının sədri Hafiz Hacıyev deyib.

MMP sədri Cavanşir Feyziyevin danışmasının hörmətsizlik olduğunu qeyd edib:

“Azərbaycan dövlətini dünya miqyasında belə bir dələduzun, rüşvətxorun biabır etməsi və dil açıb danışması Azərbaycan parlamentinə və onun üzvlərinə qarşı hörmətsizlikdir.

Deyir, oğru elə bağırdı ki, doğrunun bağrı yarıldı…

Cavanşir Feyziyevin nə mənəvi, nə siyasi haqqı yoxdur ki, xalqın üzünə çıxsın”.

Hafiz Hacıyev rəsmi orqanlara müraciət edərək, Cavanşir Fərzəliyevin deputat mandatından məhrum edilməsini və həbsini istəyib:

“Mən hüquq-mühafizə orqanlarından xahiş edirəm ki, Azərbaycan imicinə ləkə gətirən belə bir dələduzu təcili şəkildə həbs edib, saxta deputat mandatından məhrum etsinlər”.

“Mediada çalışan dostlarım, sizin ünvanınıza səsləndirdiyi təhqirlər məni üzdü. Belə bir oğrunun sözlərinə fikir vermədən tutduğunuz haqq yoluna davam edin. Bunun kimilər çoxdur və sizinlə birlikdə belə ziyanvericilərin axırına birlikdə çıxacağıq, – deyə, MMP sədri jurnalistlərə də səslənib.

Xatırladaq ki, London məhkəməsi deputat Cavanşir Feyziyevin ailə üzvlərinə məxsus 5,6 milyon funt sterlinq məbləğində vəsaiti müsadirə edib. Bu xəbərlər yerli mətbuatda yer aldıqdan sonra C.Feyziyev jurnalistlərin adını çəkərək təhqir edib.

Zamantv.az : - Keçən günlərdə Ağsunun icra başçısı KİMDİR? - Əgər Rövşən Bağırovdursa... başlıqlı məlumat paylaşmışdıq.
Zamantv.az bildirir ki, bununla bağlı qarşı tərəf olaraq Ağsu RİH-dən münasibət açıqlanıb. Həmin açıqlamanı olduğu kimi təqdim edirik:

"Bildiririk ki, Ağsu Rayon İcra Hakimiyyətinin başçısı, həmçinin digər rəhbər vəzifəli şəxsləri tərəfindən qeyri-iş günləri istisna olmaqla vətəndaşların COVİD-19 pandemiyasının yayılması və qarşısının alınması məqsədilə respublika ərazisində qüvvədə olan xüsusi karantin rejiminin tələblərinə uyğun olaraq hər həftə fərdi və onlayn qəbulları həyata keçirilir. Bundan əlavə şəhid ailələri, Qarabağ müharibəsi qaziləri, iştirakçıları və digər imtiyazlı vətəndaşlar rayon icra hakimiyyətində hər gün növbədənkənar qəbul olunurlar. Qəbullar zamanı vətəndaşlara etdikləri müraciətlərlə bağlı müvafiq köməkliklər göstərilir. Ağsu RİH başçısı tərəfindən keçirilən vətəndaş qəbulları barədə ətraflı məlumatları RİH-nin http://agsu-ih.gov.az/ rəsmi veb saytından əldə etmək mümkündür. Əlavə olaraq bildiririk ki, RİH-nin başçısı, eləcə də vəzifəli şəxslərinin fəaliyyəti ilə əlaqədar məqalədə qeyd olunmuş fikirlər tamamilə əsassızdır və həqiqəti əks etdirmir".

“Bakı Metropoliteni” Qapalı Səhmdar Cəmiyyətinin dövlət qarşısında vergi borcu daha da artıb.

İqtisadiyyat Nazirliyi yanında Dövlət Vergi Xidmətinin məlumata əsasən, “Bakı Metropoliteni” QSC-nin 01.02.2022-ci il tarixinə qədər vergi borcu 14 098 026 manatdır. 9 noyabr 2021-ci il tarixinə qədər “Bakı Metropoliteni” QSC-nin vergi borcu 12 milyon 974 min 333 manat təşkil edirdi. Xatırladaq ki, “Bakı Metropoliteni” QSC-nin nizamnamə kapitalı 1 770 950 768 AZN-dir. Qeyd edək ötən müddət ərzində dövlət şirkətlərinin borcu ilə bağlı məsələyə bir neçə dəfə toxunulmuşdu.

Ötən il göstərilirdi ki, “Azərsu” ASC-nin kredit və borc öhdəliyi bu il yanvarın 1-nə 264,761 milyon manat təşkil edib. Hesabat dövründə “Azərsu”yun Maliyyə Nazirliyinə borcu 17,55% artaraq 128,433 milyon manat, Almaniyanın dövlət bankı KfW-yə borcu 13,6% artaraq 66,304 milyon manat, Fransanın korporativ və investisiya bankı “Natixis”ə borcu 2% azalaraq 38,785 milyon manat, Dünya Bankına borcu 14,676 milyon manat, Asiya İnkişaf Bankına (ADB) borcu 6,5% artaraq 16,49 milyon manat, “Azərbaycan Beynəlxalq Bankı” ASC-yə (ABB) borcu isə dəyişməyərək 73 min manat təşkil edirdi.

Ümumilikdə “Azərsu” ASC-nin 3 milyondan artıq vergi borcu olduğu göstərilirdi. Hesablama Palatasının 2021-ci ilin dövlət büdcəsi sənədinə verdiyi rəydən aydın olurdu ki, 2020-2024-cü illərdə “Azəralüminium” ASC Təminat Fonduna dövlət zəmanəti ilə almış olduğu kreditlərin qaytarılmasına görə 175,5 milyon manat, “Azərbaycan Dəmir Yolları” QSC 281,9 milyon manat, “Azərbaycan Hava Yolları” QSC 1 milyard 383,8 milyon manat, “Azərenerji” ASC 290,5 milyon manat, “Azərişıq” ASC 26,9 milyon manat, “Azəristiliktəchizat” ASC 23,8 milyon manat, “Azərkosmos” ASC 142,8 milyon manat, “Azərsu” ASC 9,9 milyon manat, SOCAR 169,1 milyon manat, “Azİntelekom” MMC 322,6 milyon manat, Gənclər və İdman Nazirliyi 48 milyon manat vəsait ödəməlidir. SOCAR-ın qısamüddətli xarici borclarının 5,91 milyard manat, cəmi borclar isə 11,219 milyard manata çatdığı göstərilirdi.

Bununla yanaşı, SOCAR Azərbaycan Beynəlxalq Bankından 21 iyul 2022-ci ildən başlayaraq 23 avqust 2026-cı ilədək ödəmək şərti ilə illik 4,0-4,8 faizlə 559 milyon manat, Maliyyə Nazirliyindən 12 yanvar 2024-cü ildən başlayaraq 1 aprel 2039-cu ilədək qaytarmaq şərti ilə illik 0,1 -3,8 faizlə 354 milyon manat – cəmi 913 milyon manat borc götürüb. Bundan əlavə, ödənilməmiş istiqrazlar üzrə 175 milyon manat İnvestisiya Şirkətinə, 2 milyard 960 milyon manat isə Dövlət Neft Fonduna borcu yaranmışdı. 2021-ci ilin dövlət büdcəsinin layihəsində qeyd olunur ki, yerli xərclərin 160,1 milyon manatı (18,6%) icra hakimiyyəti orqanlarının saxlanılması xərclərinə yönəldilmişdi.

Bundan başqa, “Azəristiliktəchizat” ASC-nin “Azəriqaz” İstehsalat Birliyinə olan 20 milyon borcu dövlət hesabına ödəniləcəyi bildirildi. Beləliklə, bu istiqamətdə mövcud problemlərin aradan qaldırılması məqsədilə ölkə başçısı tərəfindən dövlət şirkətlərinin və müəssisələrinin, habelə dövlət payı olan təsərrüfat cəmiyyətlərinin vahid prinsiplər əsasında idarə olunması, onların fəaliyyətinin təkmilləşdirilməsi, o cümlədən həyata keçirdikləri investisiya proqramlarının şəffaflığının və iqtisadi səmərəsinin yüksəldilməsi, rəqabət qabiliyyətinin artırılması, maliyyə sağlamlığının və dayanıqlılığının yaxşılaşdırılması məqsədilə “Azərbaycan İnvestisiya Holdinqi” publik hüquqi şəxs yaradıldı. Ancaq hələ də dövlət şirkətləri öz borclarını açıqlamaqda davam edirlər.

Dövlət qurumlarının ziyanla işləməsi nə ilə bağlıdır? DİA.AZ-ın məlumatına görə, iqtisadçı-ekspert Natiq Cəfərli Cebhe.info-ya bildirib ki, dövlət şirkətlərinin ən böyük problemi gəlir deyil, xərc hissəsidir:

“Xərc hissəsinin şişirdilməsi, qeyri-rasional xərcləmələrin olması, xərclərə nəzarət mexanizminin olmaması nəticə etibarilə onların ziyanla işləməsinin və yaxud vergi borclarının yaranmasının əsas səbəblərindən biridir. Biz zaman-zaman görürük ki, həmin şirkətlərin həm bir-birilərinə, həm də dövlət büdcəsinə borcu olur, vergi daxilolmaları ilə bağlı problemlər yaşanır. Nəticə etibarilə onun səbəbləri hesablanmır. Əgər səbəblər hesablansa məlum olar ki, onların əsas problemi xərclərin şişirdilməsidir. Yəni bütün dövlət şirkətlərində xərclərə nəzarət mexanizminin zəif, müəyyən korrupsiya sxemlərinin olması onların xərclərini şişirdir. Qanunvericiliyə uyğun olaraq onlar xərclərini gəlirlərdən çıxırlar, yerdə qalan hissəni ziyan kimi göstərirlər. Nəticədə ziyanla işlədiklərini bəhanə gətirərək vergiləri də ödəmirlər. Əsas problem xərc sisteminin şişməsi və buna nəzarət mexanizminin olmamasıdır. Daha bir problem isə odur ki, bu kimi açıqlamalarla onlar vergi borcu və digər probleminin olmasını bəhanə edərək qiymət artımına gedir, tarifləri yüksəltməyi də bununla əsaslandırırlar.

Bu baxımdan, Metropoliten bu kimi açıqlamalar verməklə, sərnişindaşımalarda maya dəyərinin yüksəldiyini bəhanə edərək tarifləri, qiymətləri artırmağı düşünürlər. Ola bilsin ki, yaxın zamanlarda bunları bəhanə edərək tariflərin artırılması ilə bağlı Tarif Şurasına müraciət də edilsin”.

Ekspertin sözlərinə görə, il yarımdan çoxdur ki, İnverstisiya Holdinqi fəaliyyət göstərir:

“Onların yaradılması ilə müəyyən ümidlər yaranmışdı ki, İnvestisiya Holdinqi ən azından nəzarət mexanizmlərinin, şəffaflığın artırılmasında, müşahidə şuralarının yaradılması mühüm rol oynayacaq. Ancaq təəssüf ki, il yarım keçməsinə baxmayaraq, İnvestisiya Holdinqinin və müşahidə şuralarının fəaliyyəti demək olar ki, nəzərə çarpmır. Köhnə qaydada çarxlar dönməyə başlayır, əvvəlki qaydada necə işləyirdilərsə o qaydada da işləməkdə davam edirlər. Bu da təəssüf doğurur”.

2 fevral tarixində “Gənclər günü” ilə əlaqədar olaraq, ölkənin ən gənc qazilərindən biri olan Fərid Nəsibovla müsabihə hazırlamışdıq.
Həmin müsahibədə ikinci qrup əlil olan Qarabağ qazisi Fərid Nəsibov Sumqayıt şəhər İcra Hakimiyyətinindən giley-güzarını bildirmiş, hətta iş üçün müraciət etməsinə baxmayaraq, İcra hakimiyyətindən ona “baxarıq deyib yola verdiklərini" qeyd etmişdi.

Nəsibov Fərid Teymur oğlu Fərid Nəsibov (sağda)
Bu gün Fərid Nəsibov Bizimyol.info-ya müraciət edərək, sözügedən müsahibədən sonra Sumqayıt şəhər İcra Hakimiyyətindən ona Zaur adlı şəxsin zəng etdiyini və ona uyğun olmayan işlər təklif etdiyini bildirib.

"Zəng edib dedi ki, müsahibə vermisən və bizim adımızı da hallandırmısan. İzah etdim ki, Bizimyol.info müharibə vaxtında mənə ilk dəstək olan media qurumudur və söhbət əsnasında ürəyimdə olanları demişəm. Mənə bildirdi ki, ““STP Zavod”da turba (boru - red.) daşımaq və başqa bir zavodun həyətində zibil yığmaq işi var. Amma sənə rəva bilmirəm”. Mənə "rəva bilmədiyini" deyir, amma mənə təklif edir. İkinci qrup əlilə turba daşımaq işini təklif etmək hansı məntiqə sığır? Sumqayıt onların öz əllərindədir. Necə olur ki, bu boyda şəhərdə bir qaziyə iş tapılmır? Mənim anam zob xəstəsidir. Mən bu dəqiqə öz ağrılarımı unudub anamın xəstəliyi ilə vuruşuram. Heç kimdən heç nə gözləmirəm. Sadəcə, məni bacardığım bir işlə təmin etmələrini istəyirəm”.

Məsələ ilə bağlı Sumqayıt şəhər İcra Hakimiyyəti və idarənin Böyük məsləhərtçisi Zaur Süleymanlı ilə əlaqə saxlamağa çalışsaq da, zənglərimizə cavab ala bilmədik.


P.S. Yəqin ki, iş üçün müraciət edən şəxs Qazi deyil, icra başçısı Zakir Fərəcovun uzaq-iraq bir qohumu olsaydı, məsələn, 3 dəqiqə 17 saniyə ərzində ona gəlirli bir iş yeri tapılardı. Bu arada əmək naziri Sahil Babayevin gurultulu məşğulluq siyasəti necə oldu?..

Fevralın 4-də Fransa Respublikasının Prezidenti Emmanuel Makronun təşəbbüsü ilə Azərbaycan Respublikasının Prezidenti İlham Əliyevin, Fransanın Avropa İttifaqına sədrliyi qismində Prezident Emmanuel Makronun, Avropa İttifaqı Şurasının Prezidenti Şarl Mişelin və Ermənistan Respublikasının baş naziri Nikol Paşinyanın iştirakı ilə videoformatda görüş keçirilib.

Zamantv.az xəbər verir ki, görüş zamanı əvvəlcə Prezident Şarl Mişelin təşəbbüsü ilə Azərbaycan Respublikasının Prezidenti İlham Əliyev və Ermənistanın baş naziri Nikol Paşinyanın iştirakı ilə 2021-ci il dekabrın 14-də Brüsseldə keçirilmiş birgə görüşün əhəmiyyəti vurğulandı.

Sonra Brüssel sülh gündəliyinin davamı olaraq Ermənistan-Azərbaycan münasibətlərinin normallaşdırılmasına dair ətraflı müzakirələr keçirildi. Bu xüsusda, tədbirin əvvəlcədən müəyyən edilmiş gündəliyinə uyğun olaraq, iki ölkə arasında münasibətlərin müxtəlif aspektləri, o cümlədən humanitar məsələlər, etimad quruculuğu, Azərbaycanın üzləşdiyi mina problemi, kommunikasiyaların açılması, sərhədlərin delimitasiyası və demarkasiyası, sülh sazişi üzrə danışıqların başlanması kimi məsələlərə dair fikir mübadiləsi aparıldı.
Prezident İlham Əliyev müzakirə olunan məsələlər barədə Azərbaycanın mövqeyini bir daha vurğuladı.

Müzakirələr zamanı Prezident İlham Əliyev Birinci Qarabağ müharibəsi zamanı itkin düşmüş şəxslərin taleyinin, kütləvi məzarlıqların yerinin müəyyənləşdirilməsi, işğaldan azad edilmiş ərazilərin minalardan təmizlənməsi sahəsində Azərbaycana beynəlxalq dəstəyin artırılması, dəmir yolu və avtomobil yolu ilə nəqliyyat dəhlizinin açılması məsələsinə xüsusi olaraq diqqət verdi.

Dövlətimizin başçısı Birinci Qarabağ müharibəsi zamanı 71-i uşaq, 267-si qadın və 326-sı ahıl olmaqla, ümumilikdə 3890 Azərbaycan vətəndaşının itkin düşməsini qabartdı.

Prezident İlham Əliyev qeyd etdi ki, Vətən müharibəsinin başa çatmasından bəri mina partlayışı nəticəsində 36 nəfər Azərbaycan vətəndaşı həlak olub, 165 nəfər isə yaralanıb.

Görüşdə, həmçinin UNESCO-nun Azərbaycana və Ermənistana missiyası məsələsi də müzakirə olundu və missiyanın hər iki ölkəyə göndərilməsinə dair razılıq ifadə edildi.

***

19.40

Fevralın 4-də Fransa Respublikasının Prezidenti Emmanuel Makronun təşəbbüsü ilə Azərbaycan Respublikasının Prezidenti İlham Əliyevin, Fransanın Avropa İttifaqına sədrliyi qismində Prezident Emmanuel Makronun, Avropa İttifaqı Şurasının Prezidenti Şarl Mişelin və Ermənistan Respublikasının baş naziri Nikol Paşinyanın iştirakı ilə videoformatda görüş keçirilib.

Zamantv.az-ın xəbərinə görə, bu barədə Prezidentin Mətbuat Xidməti məlumat yayıb.

Azərbaycanda müəllim təhsil ekspertlərinin adından istifadə edərək dələduzluğa əl atıb.

Zamantv.az xəbər verir ki, bu barədə təhsil ekspertləri Kamran Əsədov və Elçin Əfəndi məlumat yayıblar.

Məlumatda bildirilir ki, Şirvan şəhərində yerləşən məktəblərdən birinin ingilis dili müəllimi olan Bəhruz Şıxalıyev onların və Təhsil Nazirliyinin bir neçə əməkdaşları adından istifadə edərək müəllimlərdən pul alıb.
Ekspertlər həmin şəxslə heç bir əlaqələrinin olmadığını, onunla sadəcə Şirvan şəhərində baş tutan sınaq imtahanında görüşdüklərini bildiriblər.

K. Əsədovun sözlərinə görə, B. Şıxalıyev onunla və Elçin Əfəndi ilə həmin sınaq imtahanı görüşündə foto çəkdirib. Daha sonra həmin fotodan istifadə edərək vətəndaşların inamını qazanmağa çalışıb.

Ekspertlər Bəhruz Şıxalıyevin əməlindən zərər çəkənləri hüquq-mühafizə orqanlarına şikayət etməyə səsləyib.
Ekspertlər həmin şəxslə heç bir əlaqələrinin olmadığını, onunla sadəcə Şirvan şəhərində baş tutan sınaq imtahanında görüşdüklərini bildiriblər.

“Məktəblərdə hər zaman şagird davranışları ilə bağlı problem olub. Nəzərə alsaq ki, ölkədə 70 minə yaxın sinif komplekti var və bu o deməkdir ki, gündə 350 min dərs keçirilir. Bu halda müəyyən problemlərin olması qaçılmazdır”.

Zamantv.az xəbər verir ki, bunu Təhsil Nazirliyinin Ümumi təhsilin təşkili və idarəolunması şöbəsinin müdiri Elnur Əliyev jurnalistlərə açıqlamasında deyib.

Onun sözlərinə görə, ötən ildən məktəblərdə keyfiyyət monitorinqinin aparılmasına başlanılıb:
“Tədrisin keyfiyyəti başlıca amil olub. 10 mindən artıq valideyn və şagird arasında anonim sorğu keçirilib. Təhlil nəticəsində müəyyən olunub ki, məktəblərdə şagirdlərin davranış qaydaları təkmilləşdirilməlidir. Qaydalar yeni şərtlər və reallıqlara uyğunlaşdırılmalıdır. Yeni tədris ilinə qədər məktəblərdə şagird davranışı qaydalarını tənzimləyən yeni nümunəvi qaydalar hazırlanacaq. Bu barədə ictimaiyyətə əlavə məlumatlar veriləcək”.

E. Əliyev yeni qaydalarla məktəblərdə davranış məsələlərini idarə etməyin mümkün olacağını vurğulayıb:

“Hazırda hər hansı məktəbə davranışlarla bağlı yeni nəsə göndərməyiniz barədə nəsə yoxdur. Məktəb rəhbərliyi mövcud qanunvericilik çərçivəsində daha üst normativ aktlara uyğun olaraq qaydalar təşkil edə bilər. Çünki məktəb rəhbərliyinin daxildə nizam-intizamı idarə etmək ən başlıca məsuliyyətidir. Nazirlik olaraq qaydaların tənzimlənməsi ilə bağlı qaydaları yeniləyirik”.

“Bəzi hallarda gənc müəllimlərin sinfi idarə etməklə bağlı təcrübələri az olur. Onlar ötənilki müəllimlərin işə qəbulu imtahanlarında uğur qazanaraq müəllim olublar. Onların təcrübəsizliyi siniflərdə şagird intizamsızlığına gətirib çıxara bilər.

Bu il yeni işə götürüləcək müəllimləri yeni tədris ili başlayana qədər, ən geci sentyabr ayının sonuna qədər sinif idarəetmə təlimindən keçirəcəyik. Bəzi hallarda müşahidə də edirik ki, müəllimlərimiz bilmədən şagirdləri bulinqlərə məruz qoyurlar. Təhsil İnstitutuna tapşırıq verilib ki, bulinqlə bağlı öyrədici materialların tədris resurslarında artırılması istiqamətində işlər aparsın”.

İmişlinin sabiq icra başçısı Vilyam Hacıyevin cinayət işi üzrə məhkəmə prosesi davam etdirilib.

Zamantv.az APA-ya istinadla xəbərinə görə, bu gün Bakı Ağır Cinayətlər Məhkəməsində hakim Azər Paşayevin sədrliyi ilə keçirilən prosesdə təqsirləndirilən şəxsin vəkili müvəkkili barəsində elan olunmuş Cinayət Məcəlləsinin 228.1-ci (qanunsuz silah saxlama) maddəsi ilə bağlı ittihama aydınlıq gətirib. Vəkil bildirib ki, orada söhbət bir neçə ov tüfəngi barıtından gedir.

Daha sonra məhkəmədə şahidlər ifadə verib. Şahid qismində ilk olaraq, İmişli Rayon İcra Hakimiyyətində hüquq şöbəsinin müdiri olan Rahim Zahidov ifadə verib. R.Zahidov bildirib ki, işini itirməmək üçün qanuni və qanunsuz bütün tapşırıqları yerinə yetirməli olub: "Vilyam Hacıyev tərəfindən vətəndaşlara mənzillərin verilməsi və torpaqların icarəyə verilməsi ilə bağlı tapşırıqlar verilirdi. Mənzillərin verilməsi zamanı qanunsuzluqlar olurdu. Mənzil növbəsində olan adam qalırdı kənarda, başqa adamlara ev verilirdi. Dəfələrlə başçının özünə də deyirdim ki, növbədə dayanan adamlar var, onların hüququ pozulur. Cavabı da belə olurdu ki, mən deyirəmsə, edilməlidir. Mənzillərin satış qiymətləri isə otaq sayına görə dəyişirdi. Məsələn, yadımdadır ki, 2 otaqlı mənzilə görə 10 min manat, 3 otaqlıya görə 18 min manat alınırdı."
Şahid torpaq sahələrinin icarəyə verilməsi ilə bağlı da danışaraq bildirib ki, İcra Hakimiyyəti tərəfindən müəyyən torpaq sahələri də rüşvət müqabilində satılırdı: "Məsələn, bir nəfərə 70-80 min manata torpaq sahəsi satılmışdı. Torpaq satışı ilə bağlı məsələlər dövlət torpaq şöbəsi ləğv olunana qədər davam etdi".

Məhkəmədə müdafiə tərəfi vəsatət qaldıraraq şahidin ifadəsində səsləndirdiyi epizodlara görə cinayət məsuliyyətinə cəlb edilməsini istəyib: "Bu şəxs hələ də icra hakimiyyətində eyni vəzifədə işləyir, demək dediyi əməlləri indi də davam etdirir. Həmçinin, özünün dediyinə əsasən, qanunsuzluqları görsə də, susub. Xahiş edirik tədbir görülsün".

Vəsatətə münasibət bildirən Vilyam Hacıyev şahidə ondan əvvəl işləmiş icra başçılarının vaxtında qanunsuzluqlar olub-olmadığını soruşub. Şahid isə ona “Xeyr, sizdən əvvəl olmayıb. Çünki onlar qanunsuz tapşırıqlar vermirdi", cavabını verib.

İmişli Rayon İcra Hakimiyyətinin Memarlıq və tikinti şöbəsinin rəhbəri Nazim Rəsulov da məhkəmədə şahid qismində ifadə verib. Şahid V.Hacıyevin ondan həftəlik hesabatlar tələb etdiyini deyib: "Görülən işlər haqqında yox, həftə ərzində yığılan rüşvətlə bağlı ona hesabat verilirdi. Soruşurdu nə qədər rüşvət toplanıb, rüşvət daxil olmayanda deyirdi ki, isləmirsiz də".

Proses fevralın 7-də davam etdiriləcək.

Qeyd edək ki, Vilyam Hacıyev Dövlət Təhlükəsizliyi Xidməti (DTX) tərəfindən keçirilən əməliyyatla saxlanılıb.

İstintaq orqanı tərəfindən toplanmış materiallarla sabiq icra başçısı barəsində Cinayət Məcəlləsinin 179.3.2-ci (külli miqdarda mənimsəmə və ya isriaf etmə, 308.1-ci (vəzifə səlahiyyətlərindən sui-istifadə), 311.3.3 (rüşvət alma (passiv rüşvətxorluq), külli miqdarda törədildikdə) 313-cü (vəzifə saxtakarlığı) və 228-ci (qanunsuz silah saxlama) maddələri ilə yekun ittiham elan olunub.