Prokurorluq Bakıda 15 yaşda ana olan yeniyetmənin ölümü ilə bağlı məlumat yayıb.

Xəzər rayon Prokurorluğundan Lent.az-a verilən məlumata görə, fevralın 4-də, saat 18 radələrində paytaxtın Xəzər rayonu, Binə qəsəbəsi sakini 06 may 2006-cı il təvəllüdlü Nigar Rüstəmova (ad və soyad şərtidir) və bətnindəki dölün ölməsi barədə rayon prokurorluğuna məlumat daxil olub.

Aparılan araşdırmalarla müəyyən edilib ki, mərhum 10 ay əvvəl 1993-cü il təvəllüdlü Elvin Məmmədov (ad və soyad şərtidir) ilə ailə həyatı qurub, fevralın 4-də, saat 14 radələrində yaşadığı ünvanda ev şəraitində ölü döl doğduqdan sonra halının pisləşərək komatoz vəziyyətə düşməsi səbəbindən 3 saylı Şəhər Kliniki Xəstəxanasına gətirilmiş və saat 18 radələrində xəstəxananın reanimasiya şöbəsində ölüb.
Prokurorluq əməkdaşları tərəfindən məhkəmə-tibb ekspertinin iştirakı ilə hadisə yerinə, Nigar Rüstəmovanın (ad və soyad şərtidir) və dölün meyitlərə baxış keçirilib, meyitlərin bədən səthi üzərində hər hansı zorakılıq əlamətləri aşkar edilməyib.

Hazırda faktla bağlı Xəzər rayon prokurorluğunda araşdırma aparılır.

***

10.32

Bakıda uşaq dünyaya gətirən yeniyetmə ilə bağlı rəsmi məlumat yayılıb.

Zamantv.az xəbər verir ki, xəstəxanadan APA-ya verilən məlumatda bildirilir ki, yeniyetmə qız xəstəxanaya gələndə artıq hamilə olmayıb: "Aqonal vəziyyətdə qanaxma ilə xəstəxanaya çatdırılan yeniyetmə reanimasiyaya yerləşdirilsə də həyatını xilas etmək mümkün olmayıb" - xəstəxanadan bildirilib.

Faktla bağlı Cinayət Məcəlləsinin 152-ci maddəsi ilə cinayət işi açılıb, araşdırma aparılır.

***

saat 10:06

Bakıda yeniyetmə qız uşaq dünyaya gətirib, sonra özü və körpəsi ölüb.

Hadisə 3 saylı Şəhər Klinik Xəstəxanasında qeydə alınıb.

Belə ki, 15 yaşlı G.B. və dünyaya gətirdiyi uşaq ölüb.

Araşdırmalar nəticəsində G.B.-nin əvvəllər 28 yaşlı Mayıl Hadıyevlə qeyri-rəsmi nikah münasibətlərində olması müəyyən edilib.

Faktla bağlı cinayət işi başlanılıb, M.Hadıyev saxlanılıb. /Report/

Bakıda 24 yaşlı qız itkin düşüb.

Zamantv.az-ın məlumatına görə, hadisə paytaxtın Suraxanı rayonu Yeni Günəşli qəsəbəsi “V” massivində qeydə alınıb. Orada yaşayan 24 yaşlı Fərqanə Süleymanova yanvarın 28-də yaşadığı evdən çıxaraq bir daha geri qayıtmayıb.

Onun axtarışları davam etdirilir.

Bakıda ev qarət olunub.

Daxili İşlər Nazirliyindən Zamantv.az-a verilən məlumata görə, fevralın 4-də Mərdəkan qəsəbəsindəki evlərin birindən 600 manat pul, 2000 dollar (təxminən 3400 manat) və 13.000 manat dəyərində qızıl-zinət əşyaları oğurlanıb.

Bakı şəhər Baş Polis İdarəsi və Xəzər rayon Polis İdarəsinin 1-ci Polis Şöbəsi əməkdaşlarının keçirdikləri əməliyyat-axtarış tədbirləri nəticəsində oğurluqda şübhəli bilinən Bakı şəhər sakinləri E.İsmayılov və İ.Abbasov saxlanılıblar.

Ağcabədi sakinini cərəyan vuraraq öldürüb.

Zamantv.az Ağcabədi rayon prokurorluğundan verilən məlumata görə, fevralın 6-sı saat 15 radələrində Ağcabədi rayonu, Şənlik kənd sakini 40 yaşlı Ehtiram Əmirovun elektrik cərəyanı vurması nəticəsində ölməsi barədə rayon prokurorluğuna məlumat daxil olub. İlkin araşdırmalarla müəyyən edilib ki, Ehtiram Əmirov Şənlik kəndinə gedən yolun kənarında quraşdırılmış transformatorda təmir işləri görərkən elektrik cərəyanı vurması nəticəsində ölüb.

Faktla bağlı rayon prokurorluğunda araşdırma aparılır.

Xocavənddəki qəza nəticəsində xəsarət alan şəxslər Bakı Sağlamlıq Mərkəzinə yerləşdiriliblər.

Zamantv.az xəbər verir ki, bu barədə Səhiyyə nazirliyindən bildirilib. Belə ki, qəza nəticəsində mərkəzə müştərək travmalarla 13 nəfər yerləşdirilib. Onlardan 11-i Türkiyə vətəndaşıdır. 2 nəfər reanimasiya şöbəsində müalicə alır vəziyyətləri ağırdır.

Qeyd edək ki, digər 11 nəfərin vəziyyəti orta ağır kimi qiymətləndirilir.
Hazırda müayinə və müalicələr davam edir.

Dünən axşam saatlarında Əhmədbəyli-Füzuli-Şuşa avtomobil yolunun tikintisi işlərini həyata keçirən subpodratçı “Kolin İnşaat Turizm Sənaye və Ticarət” şirkətinə məxsus xidməti avtobusun qəzaya uğraması nəticəsində müxtəlif dərəcəli xəsarətlər almış 16 nəfər ilkin tibbi yardımdan sonra Bakı Sağlamlıq Mərkəzinə təxliyə edilib.

Zamantv.az xəbər verir ki, bu barədə TƏBİB məlumat yayıb.

Qeyd edək ki, qəza dünən axşam saatlarında Xocavənd rayonu ərazisində baş verib

Qəza nəticəsində axşam növbəsinə gedən işçilərdən xəsarət alanlar olub.

Qəzanın baş vermə səbəbləri və digər təfərrüatlar barədə hələlik rəsmi məlumat açıqlanmayıb.

Goranboyda iki nəfərin qətli ilə bağlı cinayət işi açılıb.

Bu barədə rayon prokurorluğundan məlumat verilib.

Bildirilib ki, fevralın 6-sı saat 17 radələrində rayonun Qarasüleymanlı kəndi ərazisində kənd sakinləri - 1970-ci il təvəllüdlü Pərviz Namazov və bacısı 1960-cı il təvəllüdlü Səlmi Namazovanın öldürülmələri barədə rayon prokurorluğuna məlumat daxil olub.

Aparılan ilkin araşdırmalarla zərərçəkmişlərin həmkəndlisi, 1965-ci il təvəllüdlü İlham Haqverdiyevin torpaq mübahisəsi ilə əlaqədar aralarında yaranan münaqişə zamanı Pərviz Namazov və Səlmi Namazovaya bıçaqla xəsarətlər yetirərək onları qəsdən öldürməsinə əsaslı şübhələr müəyyən edilib.

Faktla bağlı Goranboy Rayon Prokurorluğunda Cinayət Məcəlləsinin 120.2.7-ci (iki və ya daha çox şəxsi qəsdən öldürmə) maddəsi ilə cinayət işi başlanılıb.

Hazırda cinayət işi üzrə istintaq tədbirləri davam edir.

Bakıda ölümlə nəticələnən yol qəzası olub.

Daxili İşlər Nazirliyindən verilən məlumata görə, hadisə fevralın 4-də saat 9 radələrində Xəzər rayonunun Qala qəsəbəsi ərazisində qeydə alınıb.

Qəsəbə sakini Rəvan Muxtarov idarə etdiyi “Mercedes” markalı avtomobili yolun kənarındakı elektrik dirəyinə vurub. Nəticədə xəsarət alan sürücü xəstəxanaya aparılarkən yolda ölüb, sərnişininin vəziyyəti orta-ağırdır.
Faktla bağlı Xəzər rayon Polis İdarəsində araşdırma aparılır.

Bakıda intihar hadisəsi olub.

Zamantv.az xəbər verir ki, hadisə paytaxtın Xətai rayonunda qeydə alınıb. 56 yaşlı Fətəliyev Rafiq Əli oğlu özünü yaşadığı evin qarşısında asıb.

Onun meyiti qonşular tərəfindən aşkar edilib. Bundan sonra qonşular hüquq-mühafizə orqanlarına məlumat veriblər.
R. Fətəliyevin hansı səbəbdən intihar etməsi hələlik istintaqa məlum deyil.

Faktla bağlı Xətai rayon Prokurorluğunda araşdırma aparılır.

Əfqanıstanda narkomaniyadan asılılığı aradan qaldırmaq üçün minlərlə insan həbs düşərgələrini xatırladan “xəstəxanalara” yerləşdirilib.

Zamantv.az-ın xarici mediaya istinadla məlumatına görə, “Taliban”ın Əfqanıstandakı “xəstəxanalarından” birinə daxil olan danimarkalı jurnalistlər gördüklərinə inana bilməyiblər. Məhkumlardan bəziləri aclıqdan insan əti yeməyə başlayarkən, bir məhbusun pişiyin başını kəsərək yeməsi, üç nəfərin tək yatağı paylaşması və digər əhvalatlar bütün dünyanı şoka salıb.

Hakimiyyəti ələ keçirdikdən altı ay sonra “Taliban” birtəhər öz sözünü tutub: onlar minlərlə evsiz narkotik aludəçisini üç ay ərzində konsentrasiya düşərgələrinə bənzəyən xəstəxanalara yerləşdiriblər.

'Bir adamı öldürüb bağırsaqlarını bişirdilər”

Kabildəki bu “xəstəxanaların” içərisinə nəzər salanda məlum olur ki, məhbuslar ağır şəraitdə günbəgün əriyir: Az və ya heç bir yemək verilməyən, aclıq hissini aradan qaldırmaq üçün ot yeməyə məcbur edilən insanların sağ qalmaq üçün pişiklər və hətta insan əti yeməkləri haqqında şayiələr yayılıb.

Keçən ay danimarkalı jurnalistlərə danışan, sağalmaq üzrə olan bir narkoman deyib: "Bir adamı öldürüb od vurdular. Onun bağırsaqlarını bişirib yedilər".

Əbdül adlı başqa bir məhbus, "xəstələrin" günlərlə ac qalmasının adi hal olduğunu və insanların müntəzəm olaraq aclıqdan öldüyünü söyləyib.

Əbdül gördüyü mənzərəni bu sözlərlə izah edib: "Dünən insanlar parkda pişiyi yedilər. Onlardan biri pişiyin başını kəsərək ağzına atdı".

Xəstəxanaya gətirmədən edam edirlər

Kabildə ziyarət edilən xəstəxana 1000 çarpayıya malikdir, lakin 3000 nəfər yerləşdirilib. Üç nəfər dar ikiqat çarpayılarda yatmağa məhkumdur.
Məhkumlar bəzi narkomanların xəstəxanaya gətirilmədən edam edildiyini söyləyir. Məhkumlardan biri iddia edir ki, onun doqquz dostu həbsxanada ölümə buraxılıb, qalanları isə klinikaya yerləşdirilib.

Aylardır qıtlıq var və ərzaq getdikcə azalır. Əbdül bildirib ki, həkimlər məhbuslara hər gün yarım çörək verirlər, amma indi heç onu da ala bilmirlər.

İndi təchizat o qədər azdır ki, hər gün yalnız bəzi məhbuslara yemək yeməyə icazə verilir - kiçik bir kasa düyü verilməzdən əvvəl otaqda çılpaq vəziyyətdə sıraya düzülürlər.
Yemək yeyə bilməyənlər çıxıb otun üstünə uzanıb ot yeyirlər. Bu, onları yaşatmaq üçün çox şey etməsə də, aclıq hissini bir az da olsa azaldır.

“Taliban” “heç bir problem yoxdur” deyir

Müəssisəyə rəhbərlik edən həkimlər anlayışlıdırlar, amma az şey edə bilərlər. Həkimlər aylardır maaş almırlar və növbəti maaşlarının nə vaxt veriləcəyi barədə heç bir məlumatları yoxdur.

Bununla belə, dəhşətli dəlillərlə üzləşən “Taliban” sözçüsü heç bir şeyin səhv getmədiyini iddia edir.

“Taliban”ın narkotiklərlə mübarizə agentliyinin rəhbəri Hasibullah Əhmədi deyir: "Bu insanlar xəstədirlər və nə danışdıqlarını bilmirlər".


Əfqanıstan keçən il ABŞ qoşunlarının qəfil ölkədən çıxması və hökumətin bir neçə gün ərzində tamamilə dağılması nəticəsində yaranan iqtisadi çöküşün ortasındadır.

“Taliban” illərdir ölkəyə nəzarəti bərpa etmək arzusunda olsa da, qəfil ələ keçirilməsi onları təəccübləndirərək böyük xaosa səbəb olub.

Qazaxda zəhərlənmə faktı qeydə alınıb.

Zamantv.az-ın APA-ya istinadla məlumatına görə hadisə rayonun Çaylı kəndində baş verib.

Səbinə Gülməmmədova və onun azyaşlı qızı zəhərlənmə diaqnozu ilə xəstəxanaya yerləşdirilib. Hər iki xəstəyə lazımi tibbi yardım göstərilib, vəziyyətlərinin kafi olduğu bildirilir. İlkin məlumata görə ana və az yaşlı qızı yaşadığı evin vanna otağında dəm qazından zəhərlənib.