Bir gün öncə Azərbaycan Prezidentinin qəbul etdiyi "Media haqqında” yeni qanun əmək müqaviləsi ilə hansısa mediada çalışanları jurnalist hesab edir.

Konkret iş yerin yoxdursa, fərdi müəllif hüquqları əsasında mülki hüquq müqaviləsi ilə fəaliyyət göstərməlisən.

Yalnız bu təqdirdə problemi olan insanların şikayətlərini işıqlandıra, etiraz edənlərin sözlərini yayımlaya bilərsən.

Eyni zamanda, yeni qanun Azərbaycanda təsis edilmiş media, redaksiyalarla yanaşı, ölkədən kənarda olan, yalnız fəaliyyəti daxili auditoriyaya yönəlmiş medialara, həmçinin xaricdə yaranmış media qurumlarının Azərbaycandakı jurnalistlərinə şamil edilir…

"Əgər jurnalistin xidmət müqaviləsi yoxdursa…”

Müstəqil jurnalist Kamran Mahmudov düşünür ki, yeni qanun sırf müstəqil jurnalistləri və müstəqil medianı çərçivələmək üçün qəbul edilib.

Məqsədləri həmin medialar və jurnalistlərin işinə problem yaratmaqdır: "”Media haqqında” Qanunun qəbulu ortaya çıxandan vahid vəsiqə, reyestr mərkəzi məsələsi müzakirə edilir. Çünki qanunda qeyd edilir ki, əgər jurnalistin xidmət müqaviləsi yoxdursa və ya o, hansısa yerli medianın əməkdaşı deyilsə, qeydiyyatdan keçə bilməyəcək”.

Qanunun xarici media nümayəndələrinə təsiri

Qanunun 11-ci maddəsi xarici media nümayəndələrinin Azərbaycandakı fəaliyyəti barədədir. Burada deyilir ki, Azərbaycanda akkreditasiya olunmuş xarici jurnalistlərin və digər xarici media nümayəndələrinin hüquqi statusu və peşə fəaliyyəti Azərbaycanın normativ hüquqi aktları və ölkənin tərəfdar çıxdığı beynəlxalq müqavilələrlə tənzimlənir.

Xarici jurnalistlərin Azərbaycanda akkreditasiyası müvafiq icra hakimiyyəti orqanının müəyyən etdiyi orqan (qurum) tərəfindən həyata keçiriləcək.

Qadağalara rəğmən fəaliyyət göstərmək olarmı?

Kamran Mahmudov deyir ki, bu hissə xarici media ilə əməkdaşlıq edən jurnalistlərə problem yaradacaq. Bu şəxslərin həmin media ilə müqaviləsi varsa, qeydiyyatdan keçə bilər: "Bu, konkret ciddi müqavilənin olmasını şərtləndirir. Yoxdursa, qeydiyyatdan keçə bilmirsən, eyni zamanda, fəaliyyətinə əngəl yaranır. Nə buradakı, nə də xarici media orqanları ilə müqaviləm var. Deməli, əvvəl biz yazı hazırlayır, onu xarici mediaya satırdıqsa, daha bunu edə bilməyəcəyik”.

Jurnalist qeyd edir ki, qadağalara rəğmən fəaliyyət göstərmək istəsən belə, qeydiyyatın olmadığı üçün müraciət edəcəyin dövlət qurumları sizə açıqlama verməyəcək: "İstər müsahibə olsun, istər mövqe almaq baxımından. Həmçinin üzümüzə brifinq, mətbuat konfransları da qapalı olacaq. "Qeydiyyatdan keçməmisiniz, sizə məlumat verə bilmərik”, – deyəcəklər. Bu da müstəqil jurnalistlərin işini xeyli çətinləşdirəcək”.

Gizli çəkiliş, səsyazısı…

Qanunun 21-ci maddəsində gizli audio və vizual məlumatların hansı hallarda yayımlana biləcəyi sadalanır. Video, yaxud məqalə yalnız barəsində material hazırlanan şəxsin yazılı razılığı olarsa dərc edilə bilər. Yaxud həmin material başqa bir şəxsin Konstitusiyası ilə müəyyən edilmiş hüquq və azadlıqlarının qorunması üçün istifadə edilərsə, yayımlanması mümkündür. Ən son çarə də məhkəmənin qərarına qalır. Qərar varsa, yayımla, yoxsa, özündə saxla…

Əlində bu göstərişlərin hər hansı biri yoxdursa, yeni qanun gizli audio-video yazılardan, film və foto çəkilişlərindən istifadə olunması və onların yayılmasını qadağan edir.

"Bəlkə, həyat yoldaşı ilə çay içir, yaxud alt geyimindədir…”

Gizli çəkilmiş video, fotolardan daha çox bloger və vətəndaş jurnalistikası ilə məşğul olan Mehman Hüseynov istifadə edir. Deyir ki, qanunu boşuna qəbul etməyiblər, arxasında ciddi səbəblər var. O düşünür ki, qanun gələcəkdə jurnalistlərə bir xeyli məsələdə ciddi çətinliklər yaradacaq: "Dəfələrlə dronla məmurların villalarını çəkmişəm. Buna görə polisə aparılanda həmişə deyirdilər ki, şəxsi həyatıdır, bəlkə həyat yoldaşı ilə çay içir, yaxud alt geyimindədir. Qanunla tənzimlənməsə də, media etikası deyilən bir şey var. Mən bilirəm hansı görüntülər şəxsidir, yaymaq olmaz, hansılar ictimai əhəmiyyət kəsb edir”.

"Şəxsi görüntülər olub, lakin yayımlamamışam”

Mehman Hüseynov əlavə edir ki, bəli, onun əlində məmurların şəxsi görüntüləri də olub. Həmin evin, villanın, avtomobilin həmin şəxsə aid olduğunu sübut etmək üçün saxlayıb, ancaq yayımlamayıb: "Nə bilim, villada məmurun hərəkəti, avtomobili idarə etdiyi zaman həyat yoldaşının da yanında olması kimi görüntülərdir bunlar. Ancaq mən nəyi yayımlamışam? Nazirin villasının təxmini qiyməti budur, aldığı maaş isə filan qədərdir. Bu, necə ola bilər? Yəni ictimaiyyətə əhəmiyyətli hissələrini yayımlamışıq ancaq, qalan hissələr isə gələcəkdə məhkəmə predmeti yaranarsa, sübut etmək üçün saxlanılıb. Demək istəyirəm ki, jurnalist nəyi yayıb, yaymayacağını çox yaxşı bilir”.

Jurnalistə ikiqat cəza?

Bloger bildirir ki, bundan sonra seçki proseslərindəki qanun pozuntularının işıqlandırılması da çətinləşəcək. Qanun pozan şəxsin görüntüsünü, şəklini, audiosunu yaymaq mümkün olmayacaq: "Yaysan, həm məsuliyyət daşıyacaqsan, həm də o görüntülər dövlət orqanları tərəfindən fakt hesab edilməyəcək. Bu, jurnalistə ikiqat cəzadır”.

"Çəkdiklərimin heç biri şəxsi həyata müdaxilə deyil”

Mehman Hüseynov deyir ki, gələcəkdə jurnalisti nəyin gözlədiyini praktikada görəcəyik. Ancaq o, bir şeyə əmindir: çəkdiklərinin heç biri şəxsi həyata müdaxilə deyil: "Qanunda deyilir ki, barəsində gizli çəkiliş etdiyin adamdan həmin materialı yayımlamaq üçün "izin almalısan”. Bu, absurtdur. İndiyə qədər ümumiyyətlə, heç bir çəkilişimizlə bağlı göndərdiyimiz sorğulara cavab ala bilməmişik, qaldı, məmuru tapıb, yazılı icazəyə imza etdirəsən. Çox gülməlidir. Qayda var ki, jurnalistin sorğusuna 7 iş günü ərzində cavab verilməlidir. Əvvəl cavab verməyəndə qınanırdılar, indi isə arxalarında "qapı kimi” qanun dayanır. Sorğu verən müstəqil jurnalistdən qeydiyyatdan keçib-keçmədiyi soruşulacaq. Keçəyibsə, bu, mümkün deyil, əsaslandıracaqlar ki, qeydiyyatdan keçməyib, qanunsuz fəaliyyət göstərir”.

"Əziz nazir, haqqınızda korrupsiyaya bulaşdığınızı göstərən ciddi faktlar var”

Bloger qeyd edir ki, gələcəkdə hansısa məmura: "Əziz nazir, haqqınızda korrupsiyaya bulaşdığınızı göstərən ciddi faktlar var. İzin verirsiniz bunu araşdıraq, ictimailəşdirək?” – deyə bilməyəcəyiksə, deməli, işləmək mümkün olmayacaq: "Mümkün olsa belə, fəaliyyətin qanunsuz, yayımladığın faktlar isə əsassız hesab ediləcək. Qanun birbaşa söz azadlığına, müstəqil jurnalistlərin fəaliyyətinə əngəl törətmək üçündür”.

Kimlər reystrdən keçə bilər?

Media Reyestrinə daxil edilmək üçün müraciət etmiş jurnalistlərdən xeyli tələblər var. Bura ali təhsilli olmaqdan tutmuş, fəaliyyət qabiliyyətli olmağa qədər bir çox şey daxildir.

Eyni zamanda, jurnalist ağır cinayətlə məhkum edilməmiş olmalıdır, məhkumluğu ödənilmiş və ya götürülmüş olmalıdır. Ən əsası, onun media subyekti ilə əmək müqaviləsi olmalıdır. Həmin medianın reyestrə daxil olması da şərtlər sırasındadır.

Jurnalistin reyestrdən keçməsi üçün azı 3 il iş stajı olmalıdır. Mülki hüquq müqaviləsi ilə işləyən jurnalist fərdi sahibkar kimi vergi uçotuna alınmalıdır.

"Küçədə saxlayıb vəsiqə, qeydiyyat tələb edəcəklər”

Müstəqil jurnalist Nərgiz Absalamova deyir ki, əvvəllər aksiya çəkilişlərində jurnalistə çox toxunulmurdu. İndi qanun imkan verir ki, bütün iştirakçılartək jurnalistlər də saxlansın, sorğulansın.

Ona təhdid kimi görünən şeylərdən biri də küçə sorğusu keçirməyin mümkün olmayacağıdır: "Yəqin, saxlayıb vəsiqə, qeydiyyat tələb edəcəklər. Rəsmi tədbirlərə getməyə izin verməyəcəklər. Bir sözlə, qanunla vəsiqən, qeydiyyatın, VÖEN-in yoxdursa, jurnalist deyilsən. Bu, mənim fəaliyyətimə mane olacaq”.

"Günümüz bölmələrdə keçəcək”

Gənc jurnalist qanunu birbaşa işinə məhdudiyyət kimi görür. Deyir ki, sorğu etmək, aksiya çəkmək, tədbirlərə getmək haqqıdır, ancaq bundan sonra mümkün olmayacaq: "Düzdür, həmişə müəyyən basqılar olub. Sadəcə indi daha artığını etmək üçün zəmin yaratdılar. Yəqin ki, günümüz bölmələrdə keçəcək. Amma yenə də işimə davam edəcəyəm”.

Nərgiz Absalamova

Nərgiz Absalamova düşünür ki, hələ qanun təsdiqlənməmiş güc strukturu nümayəndələri təzyiqlərə başlayıb. Getdikcə bu, daha da artacaq: "Qeydiyyat üçün 3 illik iş stajı istəyir. Mənim rəsmi stajım yoxdur, hər zaman müstəqil fəaliyyət göstərmişəm. Onlara hər hansı sənəd təqdim edə bilməyəcəyəm. Düşünürəm ki, bütünlükdə qanun jurnalist fəaliyyətinə basqıdır”.

"Vəsiqəni istədikləri vaxt geri ala biləcəklər”

Ona ən çox təsir edəcək hissəyə gəlincə, jurnalist qeyd edir ki, bu, vahid vəsiqə tələbi, qeydiyyat məsələsidir: "O vəsiqəni almaq üçün lazım olan sənədlərim yoxdur. Lap deyək ki, var və vəsiqə aldım. Onu da istədikləri zaman geri tələb edə biləcəklər”.

"MEDİA Agentliyinə mediaya və jurnalistlərə barmaq silkələyən xeyli əlavə səlahiyyətlər veriblər”

Media sahəsi üzrə hüquqşünas Ələsgər Məmmədli düşünür ki, "Media haqqında” Qanun ölkədə medianın inkişafına və fəaliyyətinə ciddi problem yaradacaq: "Bunun üçün "Super Nazirlik” statusunda olan MEDİA Agentliyinə də mediaya və jurnalistlərə barmaq silkələyən xeyli əlavə səlahiyyətlər veriblər. Burada "bir müsibət min nəsihətdən irəlidir” – atalar sözü yada düşür”.

Hüquqşünas qeyd edir ki, 2009-cu il aprelin 3-də Prezident fərmanı ilə Kütləvi İnformasiya Vasitələrinə Dövlət Dəstəyi Fondu təsis ediləndə az-çox media azadlığını, funksiyasını dərk edən kəslər: "Bu formatla medianı inkişaf etdirmək olmaz. Daha çox ələbaxımlılıq artacaq və media müstəqilliyini itirəcək”, – dedilər. Bu zaman dərhal Fondun Nizamnaməsinin 1-ci bəndindən bu nümunəni təkrarlayırdılar. Fondun əsas məqsədi Azərbaycan Respublikasında fikir, söz və məlumat azadlığını inkişaf etdirmək, kütləvi informasiya vasitələrinin müstəqilliyini dəstəkləmək, informasiya sektorunda yeni informasiya-kommunikasiya texnologiyalarının tətbiqini stimullaşdırmaq, cəmiyyət və kütləvi informasiya vasitələri arasında səmərəli əməkdaşlığı genişləndirmək, jurnalistlərin peşəkarlığı və məsuliyyətinin artmasına şərait yaratmaq, sosial müdafiəsini gücləndirmək, dövlət və cəmiyyət üçün əhəmiyyət kəsb edən, habelə kütləvi informasiya vasitələrinin fəaliyyətinin təkmilləşməsini nəzərdə tutan və inkişafını dəstəkləyən proqramları, layihələri (bundan sonra – layihələr) və digər tədbirləri maliyyələşdirməkdir”.

"Bir müsibət yetmədi”

Ələsgər Məmmədli deyir ki, yaradılmasından 13 il ötəndən sonra Fondun Prezident tərəfindən təyin olunan və 12 il başında duran icraçı direktoru 10 il 6 ay həbs cəzasına məhkum edildi.

Ələsgər Məmmədli

Onun Fondun 18 milyon 500 min manat məbləğində pul vəsaitinin mənimsəməsi, cinayət yolu ilə əldə edilmiş 5 milyon 700 min manat pul vəsaitinin leqallaşdırılması yönündə təqsiri olduğu bildirilib:

"Media inkişaf etdimi? Xeyr. Hazırda Azərbaycan Mediası bütün parametrlərlə 2009-cu ilin gerisindədir. Yəni bu müsibətdən nəsihət almayanlar yenidən KİVDF-dən daha çox səlahiyyətli və qanunla daha çox "silahlanmış” bir qurumla 12 ildə dövlət dəstəyi ilə əvvəlki yerinin də gerisində qərarlaşan medianı guya düşdüyü bu çuxurdan çıxaracaq. Nafilə! Bu dəfə Azərbaycan mediası düşdüyü çuxudran kor quyuya itildi. Bir müsibət yetmədi!..”

Nə baş verib?

Fevralın 8-də Prezident İlham Əliyev "Media haqqında” Qanunu təsdiqləyib.

Milli Məclisin dekabrın 30-da keçirilən iclasında "Media haqqında” Qanun layihəsi üçüncü oxunuşda qəbul olunub.

Bu qanun layihəsində jurnalist fəaliyyəti ilə bağlı sərt tələblər nəzərdə tutulub.

Odur ki, ötən il dekabrın 28-də bir qrup azərbaycanlı jurnalist Milli Məclisin önündə "Media haqqında” yeni qanun layihəsinin qəbuluna etiraz olaraq aksiya keçiriblər.

İştirakçılar bildiriblər ki, yeni qanun Azərbaycanda olan qapalı media mühitinin daha da sərtləşməsinə təkan verəcək. Bu, ifadə azadlığı hüququnun pozulmasıdır və qəbulu yolverilməzdir.

Təkcə jurnalistlər yox, hüquqşünaslar, media ekspertləri və təşkilatları da yeni qanun layihəsinin Milli Məclisdə müzakirəsini dayandırmağı əks etdirən müraciətlər yayıblar. Hətta vətəndaş cəmiyyəti nümayəndələri layihənin Milli Məclisdə müzakirəsinin dayandırması haqqında çağırış da ediblər. Daha sonra isə Prezident İlham Əliyevdən qanunu imzalamamasını istəyiblər.

Avropa Şurasının İnsan Hüquqları üzrə Komissarı Dunya Miyatoviç isə düşünür ki, Azərbaycanda yeni qəbul edilmiş "Media haqqında” Qanun ölkədə ifadə və media azadlığının vəziyyətini daha da pisləşdirir:

"Qanun beynəlxalq ifadə və media azadlıqları dair standartlarına uyğun gəlməsi sarıdan ciddi narahatlıq doğurur. Bu qanunun media sahəsini və jurnalist peşəsini nəzarətə aldığı görünür. Media isə azad, müstəqil, senzurasız olmalıdır”.

Meydan TV

“Cənab Ramiz Mehdiyev qanunsuz olaraq Hesablama Palatası və Maliyyə Nazirliyinin funksiyasını öz üzərinə götürmüş, AMEA-nın institutlarında maliyyə yoxlamaları keçirmişdir. Bu yoxlamalar pandemiyanın tüğyan etdiyi vaxtda heç kəsə lazım deyildi. Sovet diktaturası dövrünün “ideal” kadrına isə insanları qorxutmaq, “gözükölgəli” etmək, onları özünə tabe etdirməyin bir vasitəsi kimi lazım idi”.

Bu cümlələr keçmiş təhsil naziri, AMEA Riyaziyyat İnstitutunun direktoru Misir Mərdanovun yerli mediada dərc etdiyi məqaləsindən götürülüb.

Bu, son bir neçə həftədə Akademiya prezidenti haqqında elm adamlarının, AMEA-nın tanınmış simalarının mətbuatda dərc olunan onlarla məqalələrindən biridir. Əksər çıxışlarda Ramiz Mehdiyevin elm ocağına rəhbərlik etdiyi dövrdə yarıtmaz idarəçiliyindən, korrupsiya əməllərindən, elm sahələrinə dəxli olmayan, özünə yaxın şəxsləri akademiyaya gətirməsindən bəhs edilir və istefası tələb olunur.

Diqqətçəkən məqam ondan ibarətdir ki, bütün çıxışlarda R.Mehdiyevin neqativ fəaliyyətindən geniş bəhs olunsa da Azərbaycan elminin fundamental problemlərindən, onlardan çıxış yollarından, habelə post-Mehdiyev dövrünün perspektivlərindən bəhs olunmur. Əsas problem kimi R.Mehdiyevin yarıtmaz idarəçiliyi göstərilir.

AMEA-nın mətbuat katibi Azadə Balayeva Pressklub.az-a açıqlamasında Ramiz Mehdiyevi istefaya çağıran Akademiya əməkdaşlarının, elm adamlarının çıxışlarına münasibət bildirərkən deyib ki, bu tendensiya təəssüf doğurur. “Azərbaycan Milli Elmlər Akademiyasının prezidenti Ramiz Mehdiyev haqqında mediada yayılan müraciətlər, məqalələr alimlər arasında dərin təəssüf hissi ilə qarşılanır, ümidsizlik yaradır”, – o qeyd edir.

Qurumun təmsilçisi bildirib ki, Akademiyada görülən işlər, qazanılan nailiyyətlər yetərincədir və onların müəllifləri mediada yayılan materiallardan məyus olurlar. Mətbuat katibi Ramiz Mehdiyevin haqqında deyilənlərlə bağlı açıqlama vermək niyyətində olmadığını əlavə edib: “Mediadan çoxsaylı müsahibə açıqlama almaq istəyən jurnalistlər var. Əgər özü müsahibə vermək, yaxud mətbuat konfransı keçirmək istəsə, bu barədə media nümayəndələri məlumatlandırılacaq”.

Xatırladaq ki, ötən həftə Ramiz Mehdiyevin sədrliyi ilə AMEA Rəyasət Heyətinin geniş tərkibdə iclası keçirilib. Bu barədə Akademiyanın rəsmi saytında dərc olunan materialda toplantı iştirakçılarının adları sadalanır, müzakirə olunan məsələlər haqqında ətraflı məlumat verilir. Belə təəssürat yaranır ki, R.Mehdiyev getdikdə çoxalan istefa çağırışlarına əhəmiyyət vermir, onlara “biz öz işimizlə məşğul oluruq” mesajını çatdırmağa çalışır.

Maraqlıdır, Ramiz Mehdiyev istefaya dəvət edilsə də bu barədə AMEA-nın kollegial qurumlarında məsələ qaldırılmayıb. Ümumiyyətlə, qurumun prezidentinin istefası, postundan uzaqlaşdırılması necə tənzimlənir?

Ramiz Mehdiyev 2019-cu ilin oktyabr ayının 23-də AMEA prezidenti seçilib. Qurumun Nizamnaməsinə görə, Akademiyanın prezidenti Akademiyanın ümumi yığıncağında səsvermədə iştirak edən həqiqi üzvlərinin üçdə iki səs çoxluğu və gizli səsvermə yolu ilə 5 il müddətinə seçilir. Deməli, Mehdiyevin hələ 3 ilə yaxın səlahiyyət müddəti qalıb.

Nizamnaməyə görə, ildə bir dəfədən gec olmayaraq, aprel ayında Akademiyanın Ümumi yığıncağı çağırılmalıdır. Bu toplantıda AMEA-nın ən mühüm məsələləri üzrə qərarlar qəbul edilir. O cümlədən;

Akademiyanın ümumi yığıncağı tərəfindən seçilmiş Akademiyanın prezidentini həmin vəzifədə təsdiq edilmək üçün Azərbaycan Respublikasının Prezidentinə təqdim edir;

Akademiyanın prezidentini, vitse-prezidentlərini, akademik-katibini, Rəyasət Heyətinin digər üzvlərini ümumi yığıncaqda iştirak edən üzvlərinin üçdə iki səs çoxluğu ilə seçir və elmi bölmələrin akademik-katiblərini Rəyasət Heyətinin üzvləri kimi təsdiq edir;

Akademiyanın həqiqi, müxbir, xarici və fəxri üzvləri bu Nizamnaməyə uyğun olaraq öz vəzifələrini yerinə yetirmədikdə onların fəaliyyəti Akademiyanın ümumi yığıncağında müzakirə olunur və nəticəyə dair qərar qəbul edilir;

Akademiyanın Rəyasət Heyəti Akademiyanın ümumi yığıncağının keçirilməsinə azı 60 təqvim günü qalmış ümumi yığıncağın keçirilmə vaxtını elan edir.

Beləliklə, AMEA-nın ümumi yığıncağına 2 ay vaxt qalıb. Nizamnaməyə görə, Rəyasət Heyəti bu günlərdə onun vaxtını və müzakirə ediləcək məsələləri ictimaiyyətə elan etməlidir.

Onu da qeyd edək ki, AMEA nizamnaməsində qurumun prezidentinin səlahiyyətlərinə vaxtından əvvəl xitam verilməsi ilə bağlı hər hansı müddəa yoxdur. Ümumi yığıncaq Akademiya üzvlərinin fəaliyyətini qiymətləndirib, onlar haqqında qərar verə bilər, amma qurumun rəhbəri bu sıraya aid deyil. Nizamnaməyə görə, AMEA-nın fəaliyyətinin təşkili və ləğv olunması səlahiyyətini ölkə prezidentinə məxsusdur. //pressklub.az//

Goranboy rayon İcra Hakimiyyətinin qarşısında özünü yandıran 2-ci Qarabağ Müharibəsinin Qazisi Sərdar Həsənovun vəziyyəti ağırdır. Zamantv.az xəbər verir ki, KanalS.az-ın əldə etdiyi məlumata görə, hadisə bu gün günorta saatlarında qeydə alınıb.

Məlumata görə, sosial məişət durumu acınacaqlı durumda olan 44 günlük Vətən Müharibəsinin iştirakçısı Qarabağ Qazisi, 1996-ci il təvəllüdlü Sərdar Rüstəm oğlu Həsənov yardım üçün Goranboy rayon İcra Hakimiyyətinə müraciət edib. Müraciətinə İcra Hakimiyyətindən müsbət cavab ala bilməyən Qazi İcra Hakimiyyətinin qarşısında özünü yandırıb. Sərdar Həsənov yaxınlıqda olan vətəndaşların köməkliyi ilə Goranboy rayon Mərkəzi Xəstəxanasına çatdırılıb.

Əldə etdiyimiz digər məlumata görə, Qazinin vəziyyəti ağırdır.

Məsələ ilə bağlı Goranboy rayon İcra Hakimiyyəti ilə əlaqə saxlamağa çalışsaq da, telefonlarımıza cavab verən olmadı.

Qarşı tərəfin də mövqeyini dərc etməyə hazırıq…

Buna deyərlər, “qara məni basmamış, mən qaranı basım”. Yaxud “oğru elə bağırdı ki, doğrunun bağrı yarıldı”. Hərgah, oğru Ermənistanın bağırtısına, “timsah göz yaşları” tökməsinə artıq doğru Azərbaycan da, dünya da öyrəncəlidir. Bağrımız yarılıb-edən də deyil. Ona görə ki, 44 günlük müharibədəki sarsıdıcı məğlubiyyətdən sonra ermənilərin köhnə yalan-palanlarına faktiki özlərindən başqa inanan qalmayıb.

Ötən həftə YUNESKO-nun Azərbaycan və Ermənistana araşdırma missiyaları göndərməklə bağlı ən yüksək səviyyədə əldə olunan çoxtərəfli anlaşmanın, habelə Azərbaycan Mədəniyyət Nazirliyinin bir neçə gün öncə Qarabağdakı tarixi alban (udin) abidələri ilə bağlı yaydığı açıqlamanın kapitulyant ölkədə ciddi təlaş yaratması, Ermənistan XİN-in buna qıcıqlı reaksiyası, ölkəmizə qarşı növbəti ittiham-hədyanları və böhtanları tamamilə məntiqlidir. Necə deyərlər, soğan yeməmisinizə, burnunuz niyə göynəyir?

Həyasızlığa bax, öz ərazisində bütün köklü xalqları qovub monoetnik dövlətə çevrilən, Azərbaycan xalqına məxsus maddi-mədəni dəyərləri mənimsəyən, mədəni-tarixi irsimizi yer üzündən silən Ermənistan çoxmillətli, çoxkonfessılyalı Azərbaycanı “erməni mədəni irs”inə qarşı genosid siyasəti yürütməkdə, “erməni kilsələrini albanlaşdırmaqda” ittiham edir. Halbuki tam əksinədir. Azərbaycan Mədəniyyət Nazirliyinin bəyan etdiyi kimi, söhbət məhz tarixi ədalətin bərpasından, o sırada ermənilər tərəfindən özününküləşdirilmiş qədim alban məbədlərinin öz sahibinə və əvvəlki simasına qaytarılmasından gedir. Bundan ötrü beynəlxalq ekspertlərin də cəlb olunacağı xüsusi komissiya yaradılacaq. Hətta oraya erməni tərəfindən də kimsə qatıla bilər.

O zaman Ermənistan nədən narahatdır?

Əlbəttə ki, öz yalanlarının, total saxtakarlıqlarının faş olmasından. Axı on illərdir ermənilər Qarabağın işğalına əsasən elə sözügedən abidələrin, kilsələrin guya onlara məxsus olduğunu iddia edərək haqq qazandırmağa, beynəlxalq birliyi çaşdırmağa çalışırlar. Daha belə məkrli oyunlar, hoqqalar keçməyəcək. Əgər YUNESKO nəinki Qarabağda, eləcə də Ermənistan adlanan qədim Türk yurdunda vicdanlı və detallı şəkildə Azərbaycan mədəni-tarix irsinin hara yoxa çıxması ilə maraqlanarsa, o zaman erməniləri daha bir ağlamalı gün gözləyəcək - hətta 10 noyabrdan da betər gün! Bakı artıq kontur-planı icraya yönəldib...

“Ümid edirik ki, YUNESKO-nun qarşıdan gələn missiyası Ermənistan ərazisində Azərbaycan xalqına məxsus irsin ətraflı öyrənilməsi, monitorinqi və sənədləşdirilməsi baxımından mühüm əhəmiyyət kəsb edəcək”.

Bu barədə Azərbaycan Mədəniyyət Nazirliyinin dünənki, növbəti bəyanatında deyilir.

Sənəddə habelə hazırkı Ermənistan ərazisində əsrlər boyu yaşamış azərbaycanlıların zəngin tarixi, mədəni və dini irsinə aid nümunələrin mövcudluğu xatırladılır. Məsələn, 1869-cu ildə Qafqaz Rusiyası Qubernatorluğu tərəfindən dərc edilmiş “1870-ci il üçün Qafqaz təqvimi” sənədindəki statistik məlumatlara görə, təkcə İrəvan quberniyasında 269 məscid olub. Həmin siyahıya məscidlərlə yanaşı, İrəvandakı “Xan sarayı”, İrəvan qalasının divarları, müasir Ermənistan ərazisində mövcud olmuş çoxsaylı hamamlar, karvansaraylar, türbələr, qəbiristanlıqlar və s. daxildir.

Bəs “Xan sarayı”, İrəvan qalası, 269 məscid indi haradadır? Mənbəni, ünvanları ki, biz yox, Rusiya deyir. Burada hansı qərəz ola bilər?

Demək, ümid qalır yenə YUNESKO-nun öz işinə nə dərəcədə səmimi, obyektiv yanaşacağına, məsələni nə dərəcədə siyasiləşdirəcəyinə, “ikili standartlar”a söykənib-söykənməyəcəyinə, nəhayət, erməni timsah göz yaşlarına nə dərəcədə inanıb-inanmayacağına!

Gözləyək görək, əlahəzrət faktlara YUNESKO hansı münasibəti göstərəcək. Əgər o da ATƏT-in üzdəniraq Minsk Qrupu həmsədrləri kimi “balanslı yanaşma”ya üstünlük verəcəksə, yəni təcavüzkarla təcavüzə məruz qalanı, haqsızla haqlını tərəzinin eyni gözünə qoyacaqsa, onda onun da taleyi MQ-dən fərqlənməyəcək. Rəsmi Bakının adekvat və sərt addımları da öz yerində...

“Ermənistan XİN-in yaddaşını təzələyirik: Ermənistan 30 ilə yaxın bir müddətdə Azərbaycanın ərazilərinin bir hissəsini hərbi işğal altında saxlayaraq bu ərazilərdə genişmiqyaslı qeyri-qanuni fəaliyyət, o cümlədən urbisid, kultursid və ekosid törədən bir ölkədir”.

Bunu dünən Azərbaycan Xarici İşlər Nazirliyinin Mətbuat xidməti idarəsinin rəisi Leyla Abdullayeva bildirib.

Sözünə davam edən XİN rəsmisi deyib ki, Ermənistan Azərbaycanın 9 şəhərini və yüzlərlə kəndini yer üzündən silib, bu ərazilərdəki tarixi, mədəni, dini abidələr viran qoyulub, talan edilib: “Ermənistan işğal altında saxladığı ərazilərdə törətdiyi məqsədyönlü dağıntıları gizlətmək üçün onilliklər ərzində bu ərazilərə YUNESKO missiyasının səfərinin qarşısını alıb. Bu fakt, YUNESKO-nun 2005-ci ildə dərc etdiyi fəaliyyət hesabatında aydın şəkildə əks olunub. Eyni zamanda Ermənistan öz ərazisindəki Azərbaycanın mədəni irsini tamamilə məhv edib, son 30 ildə beynəlxalq hüquq, o cümlədən humanitar hüquq normalarını tapdalayıb; 1949-cu il Cenevrə Konvensiyası, YUNESKO-nun 1954-cü və 1970-ci illər konvensiyalarını kobud şəkildə pozub. Ermənistanın yuxarıda sadalanan vandalizminin nəticələri beynəlxalq media və müstəqil ekspertlər tərəfindən geniş şəkildə sənədləşdirilib və işıqlandırılıb.

Bütün bu qeyd edilənlər fonunda, görünür, Ermənistan XİN Azərbaycan Mədəniyyət Nazirliyinin bəyanatından yalan çıxarışlar edərək öz qeyri-qanuni əməllərini pərdələmək məqsədi güdür. Lakin qonşu ölkənin rəsmi qurumu unudur ki, Ermənistandan fərqli olaraq, Azərbaycan tarixi-mədəni irsinə dini və etnik zəmində ayrı-seçkilik etmir. Azərbaycan bütün dünyada tolerantlıq və mədəni müxtəliflik mümunəsidir. Ermənistan XİN-ə tövsiyəmiz budur ki, ətəyinə yalan, uydurma, iftira dolu daşları yığmaqla özünü daha da dərin və çıxılmaz vəziyyətə salmasın, əksinə, ətəyindəki daşları ataraq, xoş niyyət və əməllər göstərməyə çalışsın".

Azərbaycan XİN-in bu bəyanatı əslində həm də bölgəyə araşdırma missiyaları göndərəcək YUNESKO-ya çağırışdır. Ermənistanla yanaşı, YUNESKO-nun da yaddaşını təzələmək üçündür...
“Yeni Müsavat”

İqtisadiyyat naziri Mikayıl Cabbarov özünə daha bir müşavir təyin edib.

Zamantv.az xəbər verir ki, bu vəzifə Nazim Səmədova həvalə olunub.

O, bu təyinata qədər keçmiş nazirlik yanında Dövlət Vergi Xidmətində aparat rəhbəri, daha öncə isə mədəniyyət və turizm nazirinin müavini vəzifələrində çalışıb.

"Əvvəlcə prokurorluq cinayət işini başlamaqdan imtina etmişdi. Məsələ ictimailəşdikdən və qərardan verilən şikayətdən sonra məhkəmə-mühasibatlıq ekspertizası keçirildi". Zamantv.az xəbər verir ki, bunu Şəmkir rayonunda yerləşən, yarım milyon manatdan çox pulun mənimsənildiyi deyilən “Zirvə” marketin sahibi Ramin Əliyev “Qafqazinfo”ya növbəti müraciətində deyib. O bildirib ki, ilk müraciətindən sonra Ədliyyə Nazirliyinin Məhkəmə Ekspertiza Mərkəzi tədqiqat apararaq 451 000 manat mənimsəmə olmasına dair rəy verib.

Sahibkar yarım milyon manatdan çox pulun mənimsənilməsində işçisi Laura Əliyevanı şübhəli bilir: "Onun pulları mənimsədiyi sübuta yetirilsə də, işi aparan Şəmkir rayon prokurorluğunun müstəntiqi Nicat Məmmədli onu təqsirləndirilən şəxs kimi cəlb etmir.

Artıq Ədliyyə Nazirliyinin Məhkəmə Ekspertiza Mərkəzi tədqiqat apararaq 451 000 manat mənimsəmə olmasına dair rəy verib. Bundan sonra Nicat Məmmədli məni qəbul edərək rəhbərliyin həmin rəylə razı olmadığını, təkrar ekspertiza keçirilərək rəyin dəyişdiriləcəyini bildirdi. İndi Laura Əliyevanı məsuliyyətə cəlb etməmək üçün formal olaraq əlavə suallar qoyub müxtəlif üsullarla vaxt qazanmaq istəyirlər. N.Məmmədli əlavə etdi ki, “bu məsələni davam etdirsən, biz də sənin barəndə başqa tədbirlər görəcəyik. Çünki bu rəyi elə vergiyə göndərsəm, sənin barəndə vergi yayınması ilə cinayət işi başlanacaq”.

Lauranın mağazamdan oğurluq etməsini təsdiq edən 5 aylıq kamera görüntüləri, 2 audit hesabatı, 1 məhkəmə-mühasibatlıq rəyi, çoxsaylı şahid izahatlarının olmasına baxmayaraq, Şəmkir Rayon Prokurorluğu cinayət işinə başlamaqdan imtina edir. Bu azmış kimi şikayətimin geri götürülməsi üçün məni müxtəlif bəhanələrlə hədələyirlər. Müstəntiq prokurorluğun zona üzrə kuratoru vasitəsilə rəyin dəyişdiriləcəyini deyir.

Baş Prokuror Kamran Əliyevə müraciət edərək bildirirəm ki, mənim artıq rayon prokurorluğuna inamım qalmayıb. Əvvəlcə rayon prokurorunun müavini, hazırda isə müstəntiq məni hədələyərək geri çəkilməyimi tələb edir. Araşdırmanın Baş Prokurorluqda aparılmasını təmin etməyinizi xahiş edirəm”.

Məsələ ilə bağlı Baş Prokurorluğun Mətbuat xidməti ilə əlaqə saxladıq. Qurumdan “Qafqazinfo”nun sorğusuna cavab olaraq bildirilib ki, həmin müraciət əsasında Şəmkir Rayon Prokurorluğunda hazırda araşdırma aparılır: “Araşdırma zamanı izahatlar alınıb, məhkəmə-mühasibatlıq ekspertizası təyin edilərək rəy alınıb və digər zəruri sənədlər toplanıb.

Lakin, məhkəmə-mühasibatlıq ekspertizasının rəyində ekspert tərəfindən qoyulmuş suallara tam və ətraflı cavab verilmədiyindən, əlavə ekspertiza təyin olunub.

Bundan əlavə, sahibkar Ramin Əliyevə prokurorluğun hər hansı əməkdaşı tərəfindən təzyiq göstərilməsi barədə onun tərəfindən heç bir şikayət daxil olmayıb”.

Qeyd edək ki, adıçəkilən müstəntiq Nicat Məmmədli daha öncə qətl işini prosesual pozuntularla araşdırdığı üçün Gəncə Ağır Cinayətlər Məhkəməsinin hakimi Xəqani Səmədov onun barəsində xüsusi qərardad çıxararaq barəsində müvafiq tədbirlərin görülməsi üçün Baş Prokuror Kamran Əliyevə məlumat verilməsi haqda qərar vermişdi.

..
Zamantv.az : - Azərbaycan Respublikasının Prezidenti, Silahlı Qüvvələrin Ali Baş Komandanı cənab İlham Əliyevin göstərişinə əsasən, Azərbaycan Ordusunda aparılan islahatlar çərçivəsində müasir standartlara cavab verən hərbi infrastrukturun yaradılması və bölmələrin döyüş hazırlığının yüksəldilməsi istiqamətində həyata keçirilən tədbirlər davam etdirilir. Bu barədə Müdafiə Nazirliyindən verilən məlumatda deyilir.

Azərbaycan Respublikasının müdafiə naziri general-polkovnik Zakir Həsənov və nazirliyin digər rəhbər heyəti Quru Qoşunlarının Ümumqoşun Təlim Mərkəzində olub.
Məruzə olunub ki, mərkəzdə komando və digər qoşun növü bölmələrinin təyinatı nəzərə alınmaqla, bu bölmələrdə xidmət edən hərbi qulluqçuların döyüş hazırlığının və taktiki-xüsusi bacarıqlarının inkişaf etdirilməsi məqsədilə təlimlər keçirilir.
Mərkəzdə müasir döyüş üsullarının praktiki tədbiq edilməsi üçün real şəraitə uyğunlaşdırılmış təlim nöqtələri inşa olunub.
Hərbi qulluqçuların istənilən hava şəraitində döyüş vərdişlərini təkmilləşdirmək, o cümlədən fiziki və atəş hazırlıqlarını yüksəltmək məqsədilə zəruri şərait yaradılıb.
Bununla yanaşı, hərbi qulluqçulara mürəkkəb dağ şəraitində döyüş aparmaq, pusqu və kəşfiyyat-axtarış tədbirləri həyata keçirmək, eləcə də yaşayış məntəqələrində əməliyyatların və antiterror fəaliyyətlərinin aparılması öyrədilir.
Sonra nazirliyin rəhbər heyəti yeni inşa edilən qərargah binası ilə tanış olub.
Bildirilib ki, mərkəzin qərargah binası müasir səviyyədə inşa olunub. Binada hərbi qulluqçular üçün sinif, inzibati və xidməti iş otaqları mövcuddur. Bütün otaqlar zəruri mebel və avadanlıqlar, o cümlədən əyani təbliğat vasitələri ilə tam təchiz edilib. Binada mərkəzləşdirilmiş istilik sistemi, işıq, su və kommunikasiya xətləri çəkilib. Ərazidə abadlıq işləri aparılıb.
Daha sonra general-polkovnik Z.Həsənov mərkəzdə hərbçilər üçün yeni inşa edilən əsgər yataqxanasının açılışında iştirak edib. Yeni tikilən binada silah, ideoloji, məişət, dəftərxana və digər otaqlar zəruri avadanlıqla təchiz olunub. Yataqxanada şəxsi heyətin qalması, istirahəti və asudə vaxtlarının səmərəli təşkili üçün hər cür şərait yaradılıb.
Müdafiə naziri Vətən müharibəsində qazanılan təcrübənin tətbiq edilməsi ilə müasir təlim-məşq üsullarının öyrənilməsi, onların döyüş hazırlığında tətbiqi və mövcud şəraitə uyğunlaşdırılaraq icra olunması ilə bağlı müvafiq tapşırıqlar verib.

AMEA prezidenti Ramiz Mehdiyevin elmi ictimaiyyətə, tanınmış elm xadimlərinə müqavimət göstərərək tutduğu postdan istefa verməməsi ona qarşı olanların səfini bir qədər də genişləndirməkdədir. Sabiq təhsil naziri, AMEA-nın müxbir üzvü, fizika-riyaziyyat elmləri doktoru, professor, AMEA-nın riyaziyyat və mexanika institutunun direktoru Misir Mərdanov da bu mövzuda düşüncələrini yazaraq, "Yeni Müsavat" qəzetinin elektron poçtuna göndərib.

Zamantv.az həmin yazını olduğu kimi oxucularına təqdim edir:

“Dünyanın qədim yaşayış məskənlərindən olan Azərbaycan antik sivilizasiyanın əsas məskənlərindən biri, uzun əsrlərdən bəri folklor, ədəbiyyat, fəlsəfə, incəsənət, riyaziyyat, etika, coğrafiya, fizika, kimya, tibb və sair elm sahələrinin bir-biri ilə qarşılıqlı əlaqədə inkişaf etdiyi mərkəzlərdən olmuşdur. Bəhmənyar Azərbaycani, Nəsirəddin Tusi, İmadəddin Nəsimi, Nizami Gəncəvi kimi dahilərimizin əsərləri qədim dövrlərdən orta əsrlərə qədər Azərbaycan elminin səviyyəsini dolğun əks etdirən mənbə hesab edilə bilər. Onlar əyani surətdə sübut edir ki, biz həm yunan-Roma mədəniyyətinin varisləriyik, həm də müsəlman intibahını yaradan və Avropaya renessansı ərməğan edən mədəniyyətlərdən biriyik.

Azərbaycan elminin ənənələrini davam etdirən və 75-dən artıq yaşı olan Azərbaycan Milli Elmlər Akademiyası dünya elminə verdiyi töhfələri, respublika qarşısında duran problemlərin həllindəki mühüm xidmətləri ilə tariximizə yazılmışdır. Bu şərəfli tarixi vərəqləyərkən müqəddəs elm ocağımızın Üzeyir Hacıbəyli, Mirəsədulla Mirqasımov, Səməd Vurğun, Yusuf Məmmədəliyev, Heydər Hüseynov, Mirəli Qaşqay, Mustafa Topçubaşov kimi fədakar ziyalıların böyük zəhməti ilə ərsəyə gəlməsini də, 90-cı illərinin əvvəllərindən onun həyatında çətin, mürəkkəb və dramatik bir mərhələnin başlamasını da, Elmlər Akademiyasını cəmiyyətin gözündən salmaq kampaniyasını da yaxşı xatırlayırıq. Xoşbəxtlikdən ulu öndər Heydər Əliyevin müdrik siyasəti sayəsində Elmlər Akademiyasını ləğv etmək cəhdləri iflasa uğradı və o, öz bütövlüyünü qoruyub saxlaya bildi. Tariximizin o çətin dövrlərində belə cəhdləri, bəlkə də başa düşmək olardı.

Ancaq bu gün, XXI əsrin 20-ci illərində, elmin bəşəriyyət üçün daha böyük əhəmiyyət daşıdığı mərhələdə, dünya ölkələrinin ərazi, hərbi sənaye, əhalinin sayı və digər amillərlə yox, elm və innovasiyaların inkişaf səviyyəsinə görə dəyərləndirildiyi dövrdə Azərbaycan Milli Elmlər Akademiyasının xalqın gözündən salınmasını heç cür başa düşmək olmur.

Bununla yanaşı, Qarabağın bərpasının ölkə üçün prioritet sahə olduğu bir dövrdə Akademiyanın belə mühüm məsələdən bu qədər kənarda qalması da anlaşılan deyil. Elmlə məşğul olan hər bir Azərbaycan vətəndaşı kimi məni də narahat edən budur ki, niyə bizim alimlərimiz, zəngin biliyi və səriştəsi olan elm xadimlərimiz həyat əhəmiyyətli məsələnin həllindən kənarda qalıblar? Niyə həm bir vətəndaş kimi, həm milli maraqların təəssübkeşi kimi, həm də istedadını, on illərlə topladığı təcrübəni, biliyi Qarabağın bərpasına yönəltməli insanlar həmin enerjini intriqalara, mübahisələrə, konfliktlərə yönəldiblər?

Yaxud, “iqtisadi potensialı intellekt kapitalına çevirmək” amalı uğrunda daim mübarizə aparan, ölkənin neft-qaz amilindən asılılığını minimuma endirməyi ümdə məqsəd hesab edən və iqtisadi müstəqilliyi dövlət müstəqilliyinin əsası kimi dəyərləndirən Azərbaycan Respublikasının Prezidenti İlham Əliyev alimlərimizin bu işlərdə fəal iştirakını tələb etdiyi halda son illərdə buna mane olan nədir, yaxud kimdir?

Son günlərdə sosial şəbəkələrdə və mətbuatda yazılanlardan belə çıxır ki, bu vəziyyətin yaranmasında əsas səbəbkar kimi iki il üç ay bundan əvvəl akademiyanın rəhbərliyinə gələn Ramiz Mehdiyevdir.

Bəs bu müqəddəs elm ocağında nələr baş verir, hansı “işlər” görülmüşdür?

Bir-birinin ardınca heç bir perspektivi və yaranma səbəbi məlum olmayan yeni şöbələr yaradılıb, iki il ərzində AMEA-da əsas vəzifələrdən biri olan Akademik katib qanunsuz olaraq üç dəfə dəyişdirilib.

Tarixən AMEA-da həmişə üç nəfər vitse-prezident olduğu halda indi onların sayı əsassız olaraq doqquza çatdırılıb.

AMEA-nın necə deyərlər, canı olan Elmi bölmələri ləğv edilib.

Heç bir zərurət olmadan və müzakirə aparılmadan AMEA-nın institutlarında Baş direktor və icraçı direktor vəzifələri təsis edilib. Pandemiya dövründə bu mənasız məsələnin yerlərdə icrasına bir neçə ay nahaq vaxt sərf edilmiş, bütün bunlar onlarla alimin ciddi əsəb gərginliyi keçirməsinə səbəb olmuşdur.

Cənab Ramiz Mehdiyev qanunsuz olaraq Hesablama Palatası və Maliyyə nazirliyinin funksiyasını öz üzərinə götürmüş, AMEA-nın institutlarında maliyyə yoxlamaları keçirmişdir. Bu yoxlamalar pandemiyanın tüğyan etdiyi vaxtda heç kəsə lazım deyildi. Sovet diktaturası dövrünün “ideal” kadrına isə insanları qorxutmaq, “gözükölgəli” etmək, onları özünə tabe etdirməyin bir vasitəsi kimi lazım idi.

Ramiz Mehdiyev prezident olduqdan sonra AMEA-nın idarəetmə strukturunu heç bir əsas olmadan tez-tez dəyişidirmiş, Rəyasət Heyəti aparatının rəhbəri vəzifəsini təsis etmiş, bu vəzifəyə Akademiya ilə heç bir əlaqəsi olmayan şəxsi gətirmişdir.

AMEA-nın mərkəzi aparatında əsas vəzifələrdən biri olan İşlər İdarəsinin rəisi vəzifəsinə iki il ərzində akademiya ilə heç bir əlaqəsi olmayan müxtəlif şəxsləri təyin etmişdir.

Ölkə Prezidentinin dəstəyi ilə AMEA-da alınmış elmi nəticələrin tətbiqini təmin etmək üçün yaradılmış Yüksək Texnologiyalar Parkının rəhbərini iki il ərzində bir neçə dəfə dəyişdirərək, Ramiz Mehdiyev bu çox gərəkli müəssisəni iflic vəziyyətinə salmışdır

Ramiz Mehdiyev tərəfindən iki il ərzində həyata keçirilən “Struktur islahatlarındakı” hərdəmxəyallıq, plansızlıq, proqnozlaşdırma prinsiplərindən bixəbərlik, kadr siyasətindəki meyarsızlıq, seçim uyğunsuzluğu, ümumakademik maraqlardan uzaqlıq, hansısa anlaşılmaz, qeyri-obyektiv prinsiplərə görə dəyərli kadrların kənarda saxlanılması və bir silsilə belə arzuolunmaz hallar Akademiyanı illərcə doğma evi bilmiş neçə-neçə alimi işdən soyudur, başqa müəssisələrdə iş axatrmağa sövq edir, illərcə formalaşmış kadr potensialının sıraları durmadan seyrəlir.

AMEA-nın mərkəzi aparatına elmlə heç bir əlaqəsi olmayan, keçmiş vaxtlarda hüquq-mühafizə orqanlarında müxtəlif vəzifələrdə işləmiş və cəmiyyətdə “Ramiz Mehdiyevin kadrları” hesab edilən çoxsaylı şəxslər işə qəbul edilmişdir.

Son dövrlərdə xaotik, pərakəndə, qeyri-peşəkar idarəçiliyin hökm sürdüyü Akademiya ilə bağlı müxtəlif şikayətlər, tənqidlər, açıqlamalar böhranı daha da dərinləşdirir, sistem xarakteri alan bu cür hallar mötəbər elm ocağını sarsıdır, iflic edir, onu iflasa aparır.

Akademiyanın Prezidenti son iki il ərzində heç bir Elmi-tədqiqat İnstitutunun kollektivi ilə ya online, ya da əyani görüş keçirməmişdir, halbuki, əvvəlki Prezidentlər idarəetmənin vacib amili kimi bu görüşləri mütəmadi keçirərdilər. İş o həddə gəlib çatıb ki, bölmələrin illik elmi hesabatlarına institut direktorları dəvət olunmur. Yaxud, heç bir əsas və institut kollektivinin, Elmi bölmənin xəbəri olmadan İnstitutların adını dəyişmək haqqında istehza doğuran qərarlar qəbul edilir.

Bir zamanlar həqiqi elm xadimləri olan Mirəsədulla Mirqasımov, Yusif Məmmədəliyev, Zahid Xəlilov, Rüstəm İsmayılov, Həsən Abdullayev kimi şəxsiyyətlər AMEA-nın Prezidentləri olublar, sadə bir ziyalı kimi həmişə elm xadimlərinin yanında, alimlərin içində, Elmi-tədqiqat institutlarının iclaslarında olub, Akademiyanın həyatı ilə yaşayıblar. İndi Ramiz Mehdiyev yeganə adamdır ki, işə silahlı mühafizəçilərlə, Dövlət Yol Polisinin və iki avtomobilin müşayiəti ilə gəlir. Heç kəsin ona yaxınlaşıb dərdini demək şansı yoxdur.

Uzun illərdir ki, ölkənin nüfuzlu qurumu kimi dövlət tərəfindən şəhərin ən gözəl memarlıq abidələrinin birində yerləşən AMEA-nın Rəyasət Heyətinin binası ilk dəfədir ki, tarixi əhəmiyyəti nəzərə alınmadan milyonlarla dövlət vəsaiti hesabına cənab Ramiz Mehdiyevin zövqü ilə yenidən qurulmuşdur.

Bütün memarlıq dəyərlərini, texniki imkanlarını, yükgötürmə məhdudluğunu qulaqardına vuraraq binanın daxili konstuksiyasına kobud müdaxilə edilmiş, üçüncü mərtəbəyə qalxa bilməyən “kişi” üçün xüsusi lift quraşdırılmışdır.

Bəs Akademiyanın əməkdaşlarının “boğazından kəsilib” belə şəxsi mənafelərə yönəldilən milyonların hesabatını kim verəcək? Nəinki sıravi əməkdaşların, professorların, akademiklərin, İnstitut direktorlarının, hətta 9 nəfər vitse-prezidentin, Rəyasət Heyətinin 15 nəfər üzvünün və 4 nəfər müşavirin ona “dur!” deməyə haqqı çatmır! “Xalqın pulunu hara sovurusan?”, “Niyə səni polis maşını müşayət etməlidir?”, “Köhnə kadrların” nə vaxta qədər sənə yaltaqlıq edəcək?” kimi sualları verməyə cəsarət etmirlər. Soruşmaq istəmirlər ki, nə üçün İnstitut direktorlarının heç kəsi işə götürməyə ixtiyarı yoxdur, ciddi elmi tədqiqatla məşğul olmaq istəyən alimlər niyə gözümçıxdıya salınır, nə ixtiyarla öz sərəncamı ilə özünə “Nizami Gəncəvi qızıl medalı” verib və s.

Bütün bu deyilənlər az imiş kimi, bu günlərdə AMEA-nın rəsmi saytında mərkəzi aparat əməkdaşlarının, o cümlədən Ramiz Mehdiyevi aylıq əmək haqqının xeyli artırılması haqqında qəbul olunmuş qərar akademiyanın onsuz da az maaş alan əməkdaşlarını hiddətləndirmişdir.

Onu da qeyd etmək istəyirəm ki, AMEA Rəyasət Heyətinin qərarı ilə 2017-ci il 24 oktyabr tarixindən mən AMEA-nın Elmi Nəşriyyat Şurasının sədri vəzifəsinə təyin edilmişəm. Bu Şurada elmi məqalələr, monoqrafiyalar, kitablar, jurnallar müzakirə olunmalı, Akademiyanın siması kimi onların yüksək səviyyədə çapı təmin edilməlidir. Ramiz Mehdiyev bu vəzifəyə təyin olunduqdan sonra dəfələrlə ona bu məsələnin vacibliyi barədə yazılı müraciət etsəm də, hələ də heç bir cavab ala bilməmişəm. Elmə, alimə, ziyalıya münasibət, öz şəxsi mənafelərinin bu dərəcədə qabardılması, “padşah”modelinin düzəldilməsi həm cəmiyyətdə ikrah doğurur, həm də heç bir alim AMEA-nın Rəyasət heyətinin binasına getmək istəmir.

Son günlər AMEA-da baş verən hadisələrlə bağlı cəmiyyətdə geniş müzakirələr gedir. Bəziləri bu qurumun ləğv olunmasını tələb edir, digərləri burada əsaslı islahatların aparılmasını təklif edir, bir qrup şəxs akademiyanı universitetlərlə inteqrasiyasına üstünlük verir. Düşünürəm ki, 75 ildən artıq Azərbaycanın müqəddəs elm məbədi hesab olunan AMEA-nı bir nəfərə görə ləğv etmək olmaz. Bu məbədə müasir elmi tendensiyalardan xəbərdar olan, səriştəli, nüfuzlu bir alimi seçməklə bütün problemləri yoluna qoymaq mümkündür.

Maraqlı orasıdır ki, bu təkliflərin müəlliflərinin əksəriyyəti mövcud problemlərin həllində Ramiz Mehdiyevin bu vəzifədən getməsini yeganə çıxış yolu kimi görür.

Biz də belə düşünürük...."

Misir Mərdanov - AMEA-nın müxbir üzvü, fizika-riyaziyyat elmləri doktoru, professor, AMEA-nın riyaziyyat və mexanika institutunun direktoru[/justify]

Yevlax sakini həyat yoldaşını və qonşusunu güllələyib.

Zamantv.az xəbər verir ki, bu barədə Yevlax Rayon Prokurorluğu məlumat yayıb.

Məlumata görə, hadisə rayonun Hacışelli kəndində baş verib. Kənd sakini, 1975-ci il təvəllüdlü Mehdi Atakişi oğlu Qarayev həyat yoldaşı, 1977-ci il təvəllüdlü Elnarə Qafar qızı Qarayevanı ov tüfəngi ilə güllələyərək qətlə yetirib.

Mehdi Qarayev daha sonra qonşusu, 1959-cu il təvəllüdlü İldırım Zirəddin oğlu Qarayevə də atəş açaraq onu yaralayıb. Yaralı xəstəxanaya yerləşdirilib.

Hadisəni törədən M.Qarayev saxlanılıb.

Faktla bağlı Yevlax şəhər Prokurorluğunda cinayət işi açılıb.