Bakının Xəzər rayonu Binə qəsəbəsində yerləşən Rəşid Baxışov adına 218 nömrəli orta məktəb distant təhsilə keçir.
Zamantv.az-ın əldə etdiyi məlumata görə, təhsil müəssisəsində müəllim və şagirdlər arasında COVID-19-a kütləvi yoluxma qeydə alınıb. Bununla bağlı məktəbdə tədris sabahdan etibarən bir həftə müddətinə distant formada davam etdiriləcək.

Bildirilib ki, 218 nömrəli məktəbdə 9 müəllim, 7 şagird və 5 texniki işçidə koronavirusa yoluxma qeydə alınıb.
Qeyd edək ki, hazırda məktəbdə 159 müəllim çalışır, 4000-ə yaxın şagird kontingenti var.

saat 10:25

Bakıdakı 66 nömrəli "Tərəqqi liseyi" distant təhsilə keçib.

Lent.az-ın əldə etdiyi məlumata görə, müəllimlər və şagirdlər arasında kütləvi yoluxma səbəbindən məktəb bağlanıb.

Qeyd edək ki, Nazirlər Kabinetinin verdiyi qərara əsasən, məktəblərdə karantin müddəti 1 həftəyə endirilib.

Səbail rayon Polis İdarəsinin 9-cu Polis Bölməsinin əməkdaşları Bakı şəhər sakini əvvəllər məhkum olunmuş Rahim Şəfəqqətovu saxlayaraq Polis Bölməsinə gətirib.

Daxili İşlər Nazirliyindən Zamantv.az-a verilən məlumata görə, onun üzərinə baxış zamanı 3 ədəd parton aşkar edilib. Saxlanılan şəxs ifadəsində yaşadığı Sabunçu rayonu, Ramana qəsəbəsində odlu silah-sursat gizlətdiyini qeyd edəndən sonra həmin ünvana da baxış keçirilib. Oradan isə Rahim Şəfəqqətova məxsus 1 ədəd atəşə yararlı “AK-74” markalı avtomat silah, 1 ədəd daraq və 2 ədəd parton aşkar olunaraq götürülüb. Rahim Şəfəqqətov odlu silahı bir müddət əvvəl əldə etdiyini və polisə təhvil verməyərək gizlətdiyini bildirib.

9-ci Polis Bölməsində toplanan materiallar araşdırmaların davam etdirilməsi üçün Səbail rayon Polis İdarəsinin İstintaq Şöbəsinə göndərilib. Rahim Şəfəqqətov barəsində məhkəmənin qərarı ilə həbs-qətimkan tədbiri seçilib, istintaq tədbirləri davam edirilir.

Bakıda məktəblilər arasında kütləvi dava olub.

Zamanv.az-ın məlumatına görə, bununla bağlı video sosial şəbəkələrdə yayılıb.

İddialara görə, dava edənlər Bakı şəhərində yerləşən 116 saylı orta məktəbin şagirdləridir.
Daxili İşlər Nazirliyindən Lent.az-a bildirilib ki, yayılan görüntülərlə bağlı araşdırmalara başlanıb.

Həmin videonu təqdim edirik:

"Tərtər işi"ndə zərərçəkənlərin sayı artıb.

Zamantv.az-ın məlumatına görə, bu barədə Baş Prokurorluqdan bildirilib.

Qeyd olunub ki, indiyə kimi "Tərtər işi" ilə bağlı 296 nəfər dindirilib. Onlardan 178 nəfərin işgəncələrə məruz qalması müəyyən edilib.
Hazırda bu iş üzrə istintaq işləri davam etdirilir.

Qeyd edək ki, Baş Prokurorluğun bir müddət əvvəl yaydığı məlumata əsasən, bu iş üzrə aparılan cinayət işinin istintaqı zamanı 281 zərərçəkən olduğu bildirilmişdi.

Mingəçevirdə 7-ci sinif şagirdi vəfat edib.

Zamantv.az xəbər verir ki, İbadova Şövkət Ceyhun qızının başında olan şiş səbəbindən dünyasını dəyişdiyi bildirilir.

Qeyd edək ki, azyaşlı Mingəçevir şəhər Üzeyir Hacıbəyli adına 11 illik musiqi məktəbində təhsil alırdı.

Dünyada yeni növ koronavirus (COVID-19) infeksiyasına yoluxanların sayı 414,019,118 nəfərə çatıb.

Zamantv.az “Worldometers” saytına istinadən xəbər verir ki, koronavirusdan 5,845,058 xəstə ölüb, 336,108,093nəfər sağalıb.

Xatırladaq ki, Azərbaycanda indiyədək ümumilikdə 747 918 nəfər koronavirus infeksiyasına yoluxub. Onlardan 690 059 nəfər müalicə olunaraq sağalıb, 9077 nəfər vəfat edib, aktiv xəstə sayı 48 782 nəfərdir.

11 nömrəli İnteqrasiya təlimli internat məktəbinə yeni direktor təyin olunub.

"Zamantv.az"ın əldə etdiyi məlumata görə, bununla bağlı Təhsil naziri Emin Əmrullayev əmr imzalayıb.

Əmrə əsasən, sözügedən vəzifəyə Yeganə Məmmədəliyeva təyinat alıb. Qeyd edək ki, Y.Məmmədəliyeva bu təyinatadək 4 nömrəli Respublika xüsusi internat məktəbinin direktor müavini vəzifəsində çalışıb.

Qeyd edək ki, bir müddət öncə Gülnarə Abdullayeva barəsində Baş prokuror yanında Korrupsiyaya qarşı Mübarizə Baş İdarəsində Cinayət Mcəlləsinin 179.3.2 (mənimsəmə, külli miqdarda törədildikdə), 308.1 (vəzifə səlahiyyətlərindən sui-istifadə) və 313-cü (vəzifə saxtakarlığı) maddələri ilə cinayət işi açılmışdı. Hazırda istintaq davam edir.

Aparılmış istintaq-əməliyyat tədbirləri ilə müəyyən edilib ki, Gülnarə Abdullayeva 2020-ci ilin yanvar ayından 2021-ci ilin avqust ayınadək olan müddətdə rəsmi sənədlərə bilə-bilə yalan məlumatlar daxil etməklə faktiki olaraq işə gəlməyən müəllimlərin guya işə gəlməklə tədris həyata keçirməsi, müəllim və tərbiyəçilərin dərs saatlarının artıq göstərilməsi, gündəlik məktəbə gələn uşaqların sayının artıq göstərilməsi ilə onların qidalanması üçün tələb olunan qida məhsulları və içməli suyun artıq rəsmiləşdirilməsinə nail olmaqla 88 min 622 manat pul vəsaitini nağdlaşdıraraq mənimsəyib, vəzifə saxtakarlığına yol verərək səlahiyyətlərindən sui-istifadə edib.

Cinayət prosessual qanunvericiliyin tələblərinə uyğun olaraq, G.Abdullayevanın otağına keçirilmiş baxış zamanı ayrı-ayrı şəxslərin adına olan 4 ədəd plastik kart, işçilərə pul vəsaiti verməsi ilə bağlı qeydlərin aparıldığı dəftərçəsi aşkar olunaraq götürülüb.

Xatırladaq ki, Gülnarə Abdullayeva ötən ilin oktyabr ayında vəzifəsindən azad olunub.

Bakı Şəhər İcra Hakimiyyətinin Mənzil-kommunal təsərrüfatı departamentinin İnzibati binaların istismarı idarəsi kommersiya qurumuna çevrilir.

“Zamantv.az” bu barədə İqtisadiyyat Nazirliyi yanında Dövlət Vergi Xidmətinin “Vergilər” qəzetinə istinadən xəbər verir.

Məlumata görə, idarə adını və təşkilati-hüquqi formasını dəyişərək eyni adlı MMC-yə çevrildiyini elan edib.

Rusiya hərbi rəsmisi ölkəsinin onun ərazi sularına qanunsuz daxil olan xarici gəmi və sualtı qayıqlara atəş açmağa hazır olduğunu bildirib.

"Zamantv.az" xəbər verir ki, bu barədə “İnterfaks” agentliyinə danışan Rusiya hərbi rəsmisi bəyan edib.

Onun sözlərinə görə, Rusiya onun ərazi sularına daxil olan xarici gəmilərə və sualtı qayıqlara atəş açmağa hazırdır.

Azərbaycanın xarici işlər naziri Ceyhun Bayramov və Gürcüstan xarici işlər naziri David Zalkaliani arasında telefon danışığı baş tutub.

Bu barədə "Zamantv.az"a Xarici İşlər Nazirliyindən məlumat verilib.

C.Bayramov dünən Gürcüstan ərazisində baş vermiş zəlzələ ilə bağlı gürcü həmkarından ölkədə mövcud olan vəziyyəti sorğu edib. Azərbaycanın ehtiyac duyulduğu təqdirdə hər zaman dost Gürcüstana yardım etməyə hazır olduğunu ifadə edib.

D.Zalkaliani zəlzələnin ciddi fəsadlar doğurmadığını söyləyib və nümayiş etdirilən həmrəyliyə görə azərbaycanlı həmkarına təşəkkürünü bildirib.

Nazirlər inkişaf etməkdə olan ikitərəfli münasibətlərin aktual mövzularını, habelə regional məsələləri müzakirə ediblər.

Tərəflər, həmçinin beynəlxalq təşkilatlar çərçivəsində əməkdaşlıq və qarşıdan gələn aylarda keçiriləcək tədbirlər üzrə fikir mübadiləsi aparıblar.