Azərbaycanda itkin düşən iki nəfər canlı efirdə ailələrinə təhvil verilib.

Zamantv.az xəbər verir ki, bir müddət əvvəl Zaqatala rayonunda itən 21 yaşlı Qurban Mahmudov Xoşqədəm Hidayətqızının “Səni axtarıram” proqramında tapılıb.

O, canlı yayıma gələrək axtarış üçün efirə çıxan anası və nənəsi ilə görüşüb.
Digər şəxs isə paytaxtın Binəqədi rayonunda itkin düşüb. Fevralın 10-da rayon ərazisindəki yaşadıqları evdən çıxıb bir daha geri qayıtmayan yaşlı qadın dəmiryolu adlanan ərazidəki bazarda aşkarlanıb.

Həmin qadın da “ATV” kanalında yayımlanan “Bizimləsən” verilişi vasitəsilə tapılaraq, oğluna təhvil verilib.

Baş Dövlət Yol Polisi İdarəsi qadın sürücülərə müraciət edib.

İdarədən Zamantv.az-a daxil olan müraciətdə deyilir:

"Yol hərəkəti günü-gündən artan iştirakçıları ilə mürəkkəb ictimai münasibətlər sisteminə malik bir prosesdir və bu prosesdə qadın sürücülərin sayı ilbəil artmaqdadır.
Belə ki, 2020-ci illə müqayisədə sürücülük vəsiqəsi alan qadınların sayı 2021-ci ildə 67 faiz artıb. Onu da qeyd etməliyik ki, nəzəri imtahanlar zamanı yol hərəkəti qaydaları ilə bağlı suallara daha tez və düzgün cavab verən, həmçinin təcrübi imtahanlarda yüksək nəticələr göstərən qadın sürücülərimiz də az deyil.

Əslində, qanunvericilikdə nəqliyyat vasitələri sürücülərinin cins fərqi, bu fərqin yaratdığı hüquq və ya vəzifələr, eləcə də məsuliyyətlə bağlı hər hansı norma nəzərdə tutulmayıb. Sadəcə, digər sahələrdə olduğu kimi, yol hərəkəti prosesində də qadın sürücülərə bəzi məqamlarda müəyyən güzəştlər edilməsi və ya onlara hansısa üstünlük verilməsi milli dəyərlərimizdən qaynaqlanır. Toxunduğumuz bu mövzuda məqsədimiz heç də qadın sürücülərə münasibətdə formalaşmış mövcud yanaşmanı müzakirə etmək deyil.

Təəssüf ki, aparılan təhlillər qadın sürücülər arasında qayda pozuntusuna meyilli şəxslərin az olmadığını göstərir. Elə özümüz də yollarda hərəkətdə olarkən bəzən sükan arxasında olduqlarını unudub güzgüyə baxa-baxa kosmetik vasitələrdən istifadə edən, saçını düzəldən, mobil telefona başı qarışan, yolun hərəkət hissəsinin sol zolağında aşağı sürətlə hərəkət edərək süni sıxlıq yaradan və başqa qayda pozuntularına yol verən qadın sürücülərin şahidi oluruq.

Statistik rəqəmlər də deyilənləri təsdiq edir. Məsələn, 2021-ci il ərzində yolda müəyyən edilmiş sürət həddini aşmağa görə xüsusi texniki vasitələrin köməyi ilə real vaxt rejimində 84 381 qadın sürücü barəsində elektron qərar çıxarılıb.

Bundan başqa, təhlükəsizlik kəmərini bağlamadan nəqliyyat vasitəsini idarə etməyə görə 5494, yolayrıcını keçmə qaydalarının pozulmasına görə 1 363, svetoforun və ya nizamlayıcının qadağanedici işarəsi verilərkən hərəkətin davam etdirilməsinə görə 1257, araməsafəsi qaydalarının pozulmasına görə 528, nəqliyyat vasitəsini tam olaraq əks istiqamətli nəqliyyat axınının hərəkət zolağına keçirərək nəqliyyat axınına əks istiqamətdə hərəkət etməyə görə 383, nəqliyyat vasitəsinin hərəkəti zamanı telefonu əldə saxlamaqla ondan istifadə etməyə görə 192, nəqliyyat vasitəsinin sərxoş vəziyyətdə idarə edilməsinə görə 40 nəfər qadın sürücü barəsində inzibati tənbeh tədbirləri tətbiq edilib.

Təkcə ötən il ərzində qadın sürücülər tərəfindən törədilən ümumilikdə 28 yol-nəqliyyat hadisəsi qeydə alınıb ki, həmin qəzalarda 17 nəfər həyatını itirib, 18 nəfər isə yaralanıb. Ölümlə nəticələnən qəzalardan cəmi 1-i sürücülük təcrübəsi 10 ildən yuxarı olan qadın sürücü tərəfindən törədilmişdirsə, digər hadisələr sürücülük təcrübəsi 9 ilədək olan qadın sürücülərin təqsiri səbəbindən baş verib.

Hər bir ailənin doğma üzvü, cəmiyyətin təkanverici qüvvəsi olan neçə-neçə qadının məsuliyyətə cəlb olunaraq ailəsindən, doğmalarından ayrı, bəzən hətta azyaşlı övladları ilə birlikdə məhkumluq həyatı yaşamasını təsəvvür etmək belə olduqca ağrılıdır".

Gördüyünüz bu kadrları Bakının Binəqədi rayonu Biləcəri qəsəbəsində lentə almışıq.

Vətən Müharibəsi şəhidi Mayıl Mais oğlu Qurbanovun ailəsi və valideynlərinin yaşadığı bu məhəllə gözdən uzaq olmasa da, çoxdandır ki, könüllərdən iraqdır...

“Binəqədi rayonu Biləcəri qəsəbəsi 12 döngə deyilən ünvandayıq. Burda şəhidin xatirəsinin əbədiləşdirilməsi üçün valideynləri və məhəllə sakinlərinin şəxsi vəsaitləri hesabına bulaq-abidə kompleksi ucaldılıb. Mayıl 1996-cı ildə İmişlidə anadan olub. 2020-ci ilin dekabrın 3-də isə Qubadlı və Cəbrayıl istiqamətindəki döyüşlərdə qəhrəmancasına şəhid olub. Ailəsinin də, boya-başa çatdığı məhəllə sakinlərinin də bir arzusu var. Şəhid abidəsinin ətrafının, yaşadığı məhəllənin abadlaşdırılması və küçənin Şəhid Mayıl Qurbanovun adına verilməsi.
Şəhidin atası Mayıs Qurbanov deyir ki, abidənin ətrafındakı yolu düzəltmək üçün iki maşın asfalt gətirdilər: “Sonra maşının birini qaytardılar dala. Mən hansı qurum tərəfindən gətirildiyini dəqiq bilmirəm, amma İcra Hakimiyyətindən Osman və Səməndər müəllimlə görüşüb, xahiş eləmişdim. Onu da bax belə, yarımçıq qoyub getdilər. İstəyirəm ki, küçə boyu asfaltlansın məhəllə, bunu belə də xahiş etmişdim. Amma... Körpə uşaqları qalıb oğlumun, gəlib-getmək yağışlı-qarlı havalarda çətin olur. Aidiyyəti üzrə müraciət edəndə də deyirlər ki, sən İmişli qeydiyyatındasan. Başqa bir şey istəmirəm, sadəcə küçənin asfaltlanması və kücəyə oğlumun adının verilməsini istəyirəm. Bu bulağı öz xərcimlə tikmişəm”.

Problemlə bağlı Binəqədi rayon İcra Hakimiyyətinin Vətən Müharibəsi iştirakçıları və Şəhid ailələri ilə iş üzrə şöbəsinin müdiri Səməndər Mənəfovla görüşdük. Bildirdi ki, sözügedən ünvanda yaşayan Vətən Müharibəsi şəhidi Mail Qurbanovun valideyni ilə görüşüb, onu dinləyiblər.

Onun sözlərinə görə, şəhidin xatirəsinin əbədiləşdirilməsi məqsədilə ucaldılmış xatirə bulağının ətrafının, yəni təxminən 50 kvadrat metr sahənin abadlaşdırılması ilə bağlı Rayon İcra Hakimiyyətinə müraciət edilib.

Sevinc Vaqifqızı,

Kamran Namazov,

APA TV

Xalq artisti Naibə Allahverdiyeva ona edilən şantajdan danışıb. Zamantv.az-ın məlumatına görə, aktrisa "Onun sirri" verilişində bildirib ki, adını açıqlamaq istəmədiyi Xalq artisti onu şantaj edib:
"Allah hər şeyi görür, əgər günahım varsa, mənim cəzamı verir. Əgər onun günahı varsa, onun da cəzasını verir. Mənim də səhvlərim olub, amma bilmədən etmişəm. Xalq artisti məni çılpaq şəkillərimlə şantaj edib.

Bunu edən aktrisa artıq dünyasını dəyişib, adını çəkmək istəmirəm. Sevilən aktrisa və Xalq artisti olub. Allah onun günahlarını bağışlasın".

Azərbaycan Silahlı Qüvvələrinin sabiq Baş Qərargah rəisi, ehtiyatda olan general-polkovnik Nəcməddin Sadıkov Bakıda qəza törədib.

Zamantv.az Bakupost.az-a istinadla bildirir ki, hadisə dünən Mikayıl Müşfiq küçəsi, 10 ünvanında baş verib.

Belə ki, “Land Cruiser” markalı, 90 AS 020 nömrəli avtomobili idarə edən N.Sadıkov öndəki “Toyota Prius” markalı maşını vurub. Həmin avtomobil də qarşısındakı digər maşına çırpılıb. General-polkovnikin maşını zirehli (bronirovannıy) olduğundan zədələnməyib, lakin “Toyota Prius” yararsız hala düşüb.
Hadisə yerinə Dövlət Yol Polisi İdarəsinin əməkdaşları gəlib.

N.Sadıkov sonradan hadisə yerinə öz köməkçisini çağırıb.

Şahidlərin bildirdiyinə görə, o, maşından 10 min dollar pul götürərək köməkçisinə uzadıb və dəyən ziyanın ödənilməsi ilə bağlı tapşırıq verib.

Qeyd edək ki, aylardır N. Sadıkovla bağlı ağır ittihamlar səsləndirilir, amma o, ittihamlara reaksiya verməyib.

Bakıda və Abşeron yarımadasında sabah hava şəraitinin dəyişkən buludlu olacağı, arabir tutulacağı, əsasən yağmursuz keçəcəyi gözlənilir.

Milli Hidrometeorologiya Xidmətindən "Zamantv.az"a verilən məlumata görə, şimal-şərq küləyi gündüz cənub-şərq küləyi ilə əvəz olunacaq.

Havanın temperaturu gecə 2-4° isti, gündüz 7-10° isti olacaq. Bakıda gecə 2-4° isti, gündüz 8-10° isti olacaq. Atmosfer təzyiqi normadan yüksək 770 mm civə sütunu təşkil edəcək. Nisbi rütubət 60-70 % olacaq.

Azərbaycanın rayonlarında havanın arabir yağıntılı olacağı, dağlıq ərazilərdə qar yağacağı gözlənilir. Gecə və səhər saatlarında duman olacaq. Şərq küləyi əsəcək.

Havanın temperaturu gecə 0-5° isti, gündüz 7-10° isti, dağlarda gecə 5-10° şaxta, gündüz 0-5° şaxta olacaq.

Bakıda yerləşən xəstəxanaların birində həkimlər arasında xoşagəlməz hal yaşanıb.

"Zamantv.az" Oxu.az-a istinadən bildirir ki, bu barədə görüntülər sosial şəbəkələrdə yayılıb.

Elmi-Tədqiqat Ağciyər Xəstəlikləri İnstitutunun həkimləri - Ağca Abbasova və Fizuli Əliyev xəstələrin yanında bir-birilərinin ünvanına xoşagəlməz ifadələr işlədiblər.

Mübahisə zamanı xanım həmkarına əxlaqsız və tərbiyəsiz deyib.

Fizuli Əliyev hadisəni lentə alıb və xəstələrin yanında həkimin onu təhqir etməsinə etirazını bildirib.

Bu zaman Ağca Abbasova F.Əliyevin xəstəyə tibbi yardım göstərərkən onu öldürdüyünü bildirib:

"Reanimasiyadakı xəstəyə drenajı qoydun, enfizema oldu, öldü".

İttihamlar arasında Aytac adlı xanımın həkimin otağında olması da səsləndirilib.

"Xalqın qızıyla oturdun burada günlərlə. Sən o qızın atası yaşındasan. Niyə o qızı otağına salıb saatlarla danışırdın?", - deyə A.Abbasova bildirib.

Həmkarı isə ittihamlara cavabında bildirib ki, şöbə müdiri həmin xanıma intim münasibətdə olması barədə təklif edib. Və bu barədə onda video da var.

İnstitutdan Oxu.az-a bildirilib ki, artıq yayılan videogörüntü ilə bağlı araşdırma aparılır.

Rusiya müharibə istəmir və buna görə də təhlükəsizliklə bağlı ideyalar irəli sürür.

Bunu Rusiya prezidenti Vladimir Putin Almaniya kansleri Olaf Şolts ilə danışıqlardan sonrakı mətbuat konfransında bəyan edib.

Kremldən verilən məlumata görə, liderlərin görüşü üç saatdan artıq davam edib.

Danışıqların başlıca mövzusu Ukrayna ətrafındakı gərginlik, qlobal təhlükəsizlik məsələləri və ikitərəfli münasibətlər olub.

Qeyd edək ki, bu, Almaniyanın yeni kanslerinin Rusiyaya ilk səfəridir.

Mənbə: “RİA Novosti”

Gəncədə 111 nömrəli tam orta məktəbin direktoru Vəfa Əmiraslanova tutduğu vəzifədən azad olunub.

Zamantv.az-ın APA-ya istinadən məlumatına görə, sosial şəbəkələrdə yayılan məlum videogörüntü ilə bağlı məsələ araşdırılıb və Təhsil Nazirliyinin müvafiq əmri ilə məktəbin direktoru Əmiraslanova Vəfa Əmiraslan qızı tutduğu vəzifədən azad edilib.

Qeyd edək ki, bir qədər əvvəl Göygöl rayonunda yerləşən Kəlbəcər rayon 111 saylı tam orta məktəbdə məktəb direktoru ilə müəllim arasında baş verən mübahisə ilə bağlı videogörüntülər yayılıb. Video orta məktəbin ibtidai sinif müəllimi İslam Əliyev tərəfindən çəkilib. Görüntülərdə məktəbin direktoru Vəfa Əmiraslanova adıçəkilən müəllimi təhqir edib. Yayılan videoya münasibət bildirən direktor isə deyib ki, görüntülər məqsədli şəkildə çəkilib və montaj olunduqdan sonra yayılıb.

Zamantv.az Bərdə rayon Məhkəməsinin 2022-ci il fevralın 10-dakı hökmü ilə Cinayət Məcəlləsinin 152.1-ci mаddəsi ilə təqsirləndirilən rayon sakininə bəraət verilib.

Baş Prokurorluqdan bildirilib ki,hökmün işin faktiki hallarına uyğun olmaması əsası ilə həmin şəxsin Cinayət Məcəlləsinin 152.1-ci maddəsi ilə təqsirli bilinib ona həmin maddənin sanksiyasında nəzərdə tutulan cəza təyin edilməklə yeni ittiham hökmü çıxarılması məqsədilə fevralın 15-də Baş Prokurorluq Gəncə Apellyasiya Məhkəməsinə protest verib.

Qeyd edək ki, iş üzrə bəraət alan şəxs Cinayət Məcəlləsinin 152.1-ci (onaltı yaşına çatmayan şəxslə cinsi əlaqədə olma və ya seksual xarakterli digər hərəkətlər etmə) maddəsilə təqsirli bilinir.