Ermənistan silahlı qüvvələrinin bölmələri martın 2-si saat 20:50-dən 21:16-dək dövlət sərhədinin Tovuzqala rayonunun Çinarlı yaşayış məntəqəsində yerləşən mövqelərindən Azərbaycan Ordusunun Tovuz rayonunun Koxanəbi və Əsrik Cırdaxan yaşayış məntəqələri istiqamətlərində yerləşən mövqelərini müxtəlif çaplı silahlardan atəşə tutub.

Bu barədə Müdafiə Nazirliyi məlumat yayıb.

Ordumuzun qeyd olunan istiqamətlərdə yerləşən bölmələri tərəfindən adekvat cavab tədbirləri görülüb.

Azərbaycan Ordusunun sıralarında şəxsi heyət və texnika baxımından itki yoxdur.

Hazırda bu istiqamətlərdə vəziyyət sabitdir, əməliyyat şəraiti bölmələrimizin tam nəzarəti altındadır.

Azərbaycan nefti 4 dollardan çox bahalaşıb.

Zamantv.az xəbər verir ki, “Azeri LT CIF” markalı xam neftin 1 barelinin qiyməti 4,20 ABŞ dollar, yaxud 3,75 faiz artıb.

Nəticədə dünya bazarında Azərbaycan neftinin bir barelinin qiyməti 116,10 ABŞ dolları təşkil edib.

Xatırladaq ki, “Azeri Light” markalı neftin bir barelinin qiyməti 2020-ci ilin aprel ayında minimal səviyyədə - 15,81 dollar olub, 2008-ci ilin iyulunda isə maksimum qiymətə - 149,66 dollara satılıb.

Yevlaxda ölümlə nəticələnən yol qəzası olub.

Zamantv.az .az-ın məlumatına görə, hadisə martın 2-i axşam saatların Yevlax şəhəri ərazisində baş verib. “Chevrolet Cruze” markalı avtomobil yük maşınına çırpılıb.

Nəticədə minik avtomobilinin sürücüsü, 32 yaşlı Faiq Cəfərov ağır xəsarətlər alıb.
F. Cəfərov ağır xəsarətlərlə xəstəxanaya çatdırılsa da, həyatını xilas etmək mümkün olmayıb.

Qeyd edək ki, F.Cəfərov polis mayorudur. O, Yevlax rayon Polis Şöbəsinin baş təhqiqatçısı vəzifəsində çalışıb. Qəzanın işdən evə gedən zaman baş verdiyi bildirilir.

Faktla bağlı Baş Dövlət Yol Polisi İdarəsində araşdırma aparılır.

Müharibənin davam etdiyi Kiyev şəhərində polislə jurnalist evlənib.

Zamantv.az-ın Ukrayna mətbuatına istinadən məlumatına görə, Kiyev şəhər Patrul Polis İdarəsinin rəisi Yuri Zozulya və jurnalist Ancelina Karyakina nikaha giriblər.

Cütlüyün nikah şahidləri Patrul Polis İdarəsinin rəisi polkovnik Yevgeni Jukov olub.
Müharibə şəraitində gül dükanları bağlı olduğu üçün, gəlin gül buketi olaraq evdə dibçəkdə bitən orxideya çiçəyini götürüb.

Şəhər sakinləri onlara yemək və şampan verərək tarixi günü belə qeyd ediblər.

Fevral ayı ərzində Kliniki Tibbi Mərkəzə zəhərlənmə ilə bağlı 716 nəfər müraciət edib.

Mərkəzin mətbuat xidmətindən Zamantv.az-a verilən məlumata görə, onlardan 118-si Toksikologiya şöbəsinə qəbul edilib, qalanlarına isə ilkin tibbi yardım göstərildikdən sonra evə buraxılıb.

Qəbul olan xəstələrdən 55-i dərmandan, 14-ü sirkə turşusundan, 13-ü dəm qazından, 11-i etil spirtindən, 1-i göbələkdən zəhərlənib. Digərlərindən 10-u anaflaksiya səbəbindən, 7-si allergik reaksiyadan, 7-si isə botulizm səbəbindən xəstəxanaya yerləşdirilib.
Zəhərlənən şəxslərin 54-ü qadın, 50-si kişi, 14-ü uşaq olub. Həkimlərin səylərinə baxmayaraq, 118 nəfərdən (3 qadın, 5 kişi) 8-nin həyatını xilas etmək mümkün olmayıb.

Avropanın ən böyük Atom Elektrik Stansiyası Enerqador təhlükədədir.

Zamantv.az xəbər verir ki, bu barədə Ukrayna Daxili İşlər Nazirliyinin müşaviri Anton Geraşinko məlumat verib. Onun dediyinə görə, hazırda elektrik stansiyasının yanında döyüşlər gedir.

“Düzdür, onlar reaktorun beton təbəqəsini dağıda bilməyəcəklər. Amma transformatoru, turbinləri və digər qurğuları zədələyə bilərlər. Bu isə Çernobıl və Fukusima atom elektrik stansiyalarında baş verən qəza kimi böyük fəlakətlərə səbəb ola bilər”.
Geraşinkonın bildirdiyinə görə, həmin Atom Elektrik Stansiyasını Ukraynanın Milli Qvardiyasının döyüşçüləri qoruyur.

100-dən artıq azərbaycanlı Odessadan təxliyə olunub.

Bu barədə Zamantv.az-a "Birlik" Odessa azərbaycanlıları Diaspora təşkilatının rəhbərlərindən biri olan Anar Natiqoğlu məlumat verib.

O bildirib ki, şəhərdən çıxarılan azərbaycanlılar Moldovaya yola salınıb.

Rusiya ilə danışıqların ikinci raundu martın 2-də axşam baş tutacaq.

Zamantv.az xarici mediaya istinadla bildirir ki, bu barədə Ukrayna prezidenti ofisinin rəhbəri Aleksey Arestoviç məlumat verib.

Cəbhədəki vəziyyətlə bağlı brifinq zamanı o, Belarus qoşunlarının Rusiyanın Ukraynaya qarşı müharibəsində iştirakının heç bir təsdiqinin olmadığını bildirib.

Rusiya və Ukrayna arasında müharibənin 7-ci günüdür. Şiddətli küçə döyüşlərinin getdiyi Xarkov şəhərində azı 21 nəfər həyatını itirib, 112 nəfər yaralanıb. Cəbhə xəttindən paylaşılan görüntülərdə mülki şəxslərin əsir götürdüyü Rusiya ordusuna məxsus zirehli texnikalar, tanklar diqqət çəkir. Ən çox isə silahlarını yerə atıb ağlayan rusiyalı əsgərlərin şəkilləri dünyada gündəm olub.

Zamantv.az həmin əsgərlərin şəkillərini təqdim edir:

“Nə yalan danışım, heç də hamıya yardım göstərə bilmirik. Müharibədi və əlimiz nəyə çatır kömək göstərməyə çalışırıq”.

Bunu Zamantv.az-a Azərbaycanın Kiyevdəki diaspor nümayəndəsi Nasir Cəbiyev deyib. O bildirir ki, Kiyevdə ümumi vəziyyət gərgin olaraq qalır:

“Biz diaspora tərəfindən bacardığımız köməyi edirik. Nə yalan danışım, hamıya da yardım göstərə bilmirik. Müharibə dövrüdü və əlimiz çatan qədər kömək göstərməyə çalışırıq. Bu gün 1100 nəfər həmyerlimiz qatarla Kiyevdən yola düşdü. Onlar Moldovaya gedəcək, orada da səfirlik onları qarşılayacaq”.
Onun sözlərinə görə, Ukraynada yaşayan azərbaycanlıların hamısı qeydiyyatda deyil:

“Biz bütün məlumatları saytımızda vermişik. Çox insan zəng edir, biz onları qeydə alırıq. Ukraynada 600 min azərbaycanlı var və onların hamısı da bura gələndə qeydiyyata düşməyiblər. Ona görə də onlar özləri bizə müraciət etməlidir. Qeydiyyatda olanları zəng edib, çağırırıq”.

Nasir Cəbiyev qeyd edir ki, Kiyevdə vəziyyət Xarkovdan daha yaxşıdı:

“Bəli, şəhərin bəzi yerləri atəşə tutulur. Amma Kiyevdə Xarkovdakı kimi dəhşətli vəziyyət yoxdur. Biz özümüz də siqnal veriləndə zirzəmidə qalırıq. Hətta elə oldu ki, vağzalda olanda siqnal verildi, amma heç kim qaçmadı. Tək ümidimiz dua etmək oldu”.