Sanki, ölkədə ən vacib problemlərdən biri reket jurnalistlər imiş. 20 ildir bu mövzu gündəmdən düşmür. Yeri gəldi, gəlmədi reketlik məsələsi aktuallaşır. Niyə? Səbəb nədir? Bu kimin marağındadır? Heç bir ehtimalım yoxdur.

Amma mənim düşüncəmə görə nəinki Azərbaycanda, hətta çərçivəni kifayət qədər daraldaraq Azərbaycan mediası sərhədlərinə salsaq belə, burada reketlik olduqca xırda problemdir. Əslində, heç problem də deyil. Çünki kiminsə jurnalist adından istifadə edib hansısa məmurdan pul tələb etməsi sadəcə dələduzluqdur, şantajdır. Və xırda cinayətdir.

Heç indiyə kimi eşitmizinizmi ki, hansısa jurnalist kimdənsə şantaj yolu ilə bir milyon manat pul tələb etsin?! Əminəm ki, heç 100 min manat da eşitməmisiniz. Ağıla gələn ən maksimum rəqəm 10 min manat ola bilər ki, açıq deyirəm, mən heç bunu da eşitməmişəm. Reketlərin “standart paket”ləri bəllidir. Bu “paket” üçrəqəmli məbləğ ətrafındadır ki, nəticə olaraq da çox halda minimumla kifayətlənməli olurlar. İndi sual edirəm: Bu cinayətdirmi? Sözsüz. Eyni zamanda bu mövzu günlərlə müzakirə olunacaq bir məsələ də deyil.

Həbs olunan məmurların tələb etdikləri rüşvətlərin məbləği haqda rəsmi açıqlamaları yəqin ki, hamı oxuyub. Onların tələb etdikləri məbləğin yanında bu “cücə reket”lərin tələb etdikləri nədir ki?!

Elə bilirsiniz, bir neçə məmur həbs olundu və rüşvət söhbəti bitdimi? Nə yazıq ki, məmurlarla bağlı hərəkət yalnız yuxarıdan düyməyə basılandan sonra başlayır. İnternet resurslarda axtarış verib oxuyun. Görün, hazırda içəridə olan məmurlar barədə həbs olunmamışdan əvvəl korrupsiya ilə bağlı nə qədər materialla qarşılaşacaqsınız. Xışın kötüyə dirənməsini gözləmək bu qədər vacibdirmi?

Bu günlərdə canlı debatların birində ADP sədri Sərdar Cəlaloğlu hakimiyyətyönlü Ana Vətən Partiyasının sədri Fəzail Ağamalıdan bir rica etdi: Rüşvət almayan bir məmurun adını çək! 30 ilin deputatı, qocaman siyasətçi bu qəfil istəkdən özünü itirdi. Ad çəkə bilmədi...

Mən reketləri müdafiə etmək niyyətində deyiləm. Klişeləşmiş ifadə olsa da, onlar həqiqətən Azərbaycan jurnalistikasının üz qarasıdır. Və biz bilək ki, bu üz qaramız hər zaman olacaq. Lakin həmin ləkənin arealı mövzunu əbədi gündəmdə saxlamaq üçün yetərli deyil axı. İndi jurnalist reketliyi ilə bağlı çox az faktlara rast gəlirik. Əvəzində bu mövzuda mediada yayılan materialların sayı artır. Qollarımızı çirmələyib özümüzü gözdən salmaq üçün var gücümüzlə çalışırıq. Heç nəyin fərqinə varmadan.

Biz o zaman güclü olacağıq ki, kilkələri yox, akulaları gündəmdə saxlayacağıq. Məqsədli olaraq ayrı-ayrı şəxslər və ya qurumlar tərəfindən ortaya atılmış reket jurnalistikası mövzusunu görməzdən gəlməyi bacaracağıq. Və bu mövzunu ictimaiyyətə təqdim edənlərə “bir özünüzə də baxın” deyə bildiyimiz zaman “biz birlikdə güclü” olacağıq.
Elnur Məmmədli //yenisabah.az//

Jurnalist Çingiz Özgür AZAL-dan şikayətçidir.

Gundem.media bakupost.az-a istinadla xəbər verir ki, o, bu barədə öz sosial media hesabında paylaşım edib.

Jurnalistin dediyinə görə, onlayn qaydada aldığı biletləri qaytarmasına baxmayaraq, hələ də ona çatacaq pulu geri ala bilməyib:
“İyun ayının 17-si iki ədəd Bakı-Naxçıvan təyyarə biletini AZAL-ın Nizami küçəsində yerləşən kassasında qaytarmışam. Biri 50, digəri 40 manat olan biletlərdən 10% tutulduqdan sonra, 81 manat pul mənə geri qaytarılmalı idi. Biletlərin ödənişini kartla etdiyim üçün, bu pulun 33 gün ərzində kartıma geri qaytarılacağı deyilib. Halbuki, alarkən bu xəbərdarlıq edilməyib. Gözləməkdən başqa çarə olmadığını bildiyimdən, dedim gözləyim, eybi yox. Bu gün mənim biletləri qaytardığım tarixdən düz 41 gün keçir. Hətta “33 iş günü” deyilirdisə belə, o da bitib. Təbii ki, mən tək deyiləm, onlarla adam bileti kassadan kartla və ya onlayn alır. Bəs niyə əlimizlə və dərhal verdiyimiz pul bu qədər saxlanılır və hətta belə görünür ki, geri qaytarılmır?”.
Məsələ ilə bağlı “Azərbaycan Hava Yolları”nın (AZAL) mətbuat xidmətinin rəhbəri Paşa Kəsəmənski Bakupost.az -a açıqlama verib.
Paşa Kəsəməniski bildirib ki, yaranmış problem AZAL-dan asılı olmayan sistemlə bağlıdır:
"Vətəndaş müraciət edəndən sonra bizdən pul bank sisteminə köçüb. Biz ona "qaytarılan biletin pulu 33 gün ərzində ödənir" demişiksə, bu, o demək deyil ki, məhz 33 günə qaytarılır. Bu müddət 3 gün də ola blər, 1 həftə də. Yəni, maksumum 33 gün ərzində vəsait şəxsin hesabına qayıtmalıdır. Qayıtmadığı halda bizdən pulun köçürüldüyü haqda arayış götürə bilər. Bu arayış əsasında istifadə etdiyi bankla, yaxud Azəricard sistemilə danışıqlara başlaya və soruşa bilər ki, niyə indiyə kimi pulum gəlməyib? Biz hansısa pulu sərnişinin kartına qaytaranda bu, bank və Azəricard sistemilə edilir. Maksimum 33 gün müddəti isə bizim yox, həmin bank və kart sisteminin qaydasıdır. Bizdən pul köçüb, ola bilər ki, hansısa kart, yaxud bank mərhələsində problem qalıb. O da AZAL-dan asılı olmayan məsələdir. Biz qeyd etdiyim kimi, yalnız məblləğin qaytarılması ilə bağlı vətəndaşa arayış təqdim edə bilərik”.

Uzun müddətdir əhalini narahat edən problemlərdən biri də su filtri satan fırıldaqçıların fəaliyyətidir. Əksər vətəndaşların evinə reklam məqsədi ilə zorla daxil olaraq vətəndaşların içdikləri suyun çirkli olmasını sübut edən testlər keçirirlər. Özlərinin gətirdikləri qurğunun vasitəsi ilə krandan gələn suyu və satacaqları filtrin təmizlədiyi suyu “analiz” edib, aradakı fərqi göstərməklə məhsullarını insanlara sırıyırlar.

Növbəti tələyə Sabirabad rayonunun Nəsimi kənd sakini Zahid Balaxan oğlu Bədirov düşüb. İstehlakçı aldadıldığı barədə Azad İstehlakçılar İctimai Birliyinə müraciət də edib.

Dediyinə görə, iyulun 22-də təxminən saat 21:00 da qapımıları döyülüb. Həmin vaxt dincəlsələr də iki nəfər xanımın gəldiyini görüb, məcburən onların qarşılarına çıxıblar:

“İki nəfər xanım özünü “Magnus” Su Təmizləmə MMC-nin əməkdaşı olduğunu və suyun tərkibini pulsuz olaraq yoxlayıb anket dolduraraq nəticə barədə guya Bakıdakı idarələrinə, dövlət orqanlarına məlumat verəcəklərini bildirdilər. Dedilər ki, biz dövlət tərəfindən göndərilmişik ki, suyun vəziyyətini öyrənək. Biz də bunun pulsuz olduğunu düşünərək razılaşıb evə dəvət etdik. Razılaşandan sonra xanımlardan biri öz bəy həmkarını da çağırıb içəri daxil oldular.

Bizdən iki fincan su istəyib analiz apardılar. Suyun rəngi dəyişdi. Onlar bu suyu göstərərək “uşaqlarınızın həyatı ilə oynayırsınız, görün nə suyu içirsiniz, sizin üçün sağlamlıq, yoxsa pul önəmlidir, kimi suallar verdilər, ailəmizi günahkar cıxartdılar. Daha sonra su filtirləri satdıqlarını və bu filtirin guya çirkli suyu şollar suyuna çevirdyinə inandırdılar. Analizi aparan oğlan gedib avtomobildən digər bəy həmkarını çağırdı. Ümumilikdə 5 nəfər idilər. Yuxulu, yorğun olan bizə psixoloji təsir edərək aparatı almağa razı saldılar”.

Zahid Bədirov qeyd edib ki, şirkət əməkdaşları dəyəri 1790 manat olan su filterini evlərində quraşdırıblar:

“Sonra müqavilə kağızını gətirib telefon işığında (heç imkan vermədilər ki müqavilə ilə tanış olum) imzalatdırdılar. Müqavilədə satıcı olaraq “Magnus Su Təmizləmə Sistemləri” MMC –nin direktoru Kərimli Beyrək Həmdulla oğlu qeyd olunmuşdu. İmzaladıqdan sonra mənə təklif etdilər ki, ödənişi nağd şəkildə ödəsəm mənə 82 mm diaqonal televizor hədiyyə edəcəklər. Həmçinin bildirdilər ki, əlavə 300 AZN ödəsəniz daha böyük diaqonal televizor verə bilərlər. Məni razı salaraq ümumilikdə 2090 manat puldan 1000 AZN nağd pul aldılar. Amma onlar bu pulun qarşılığında mənə qəbz vermədilər.

Qalan 1090 AZN pulu televizoru gətirəndə alacaqlarını dedilər. Səhəri internetdə bir qədər araşdırma apardım. Anladım ki, aldadılmışam. Qərara gəldim ki, məhsulu qaytarım.

Bir gün sonra yenidən qapımıza gəldilər və vəd etdikləri televizoru gətirdiklərini dedilər. Mən isə məhsulu geri qaytarmaq istədiyimi bildirdim və onlara verdiyim 1000 AZN pulu geri qaytarmalarnı tələb etdim. Onların cavabı isə belə oldu: Əgər məhsulu qaytarsam min manat pulun geri verilməyəcək və əlavə olaraq 400 AZN cərimə olunacağam. Televizoru da götürüb çıxıb getdilər”.

Şikayətçi əlavə edib ki, 24.07.2022- ci ildə bir nəfər yenidən onların evinə yaxınlaşaraq özünü “Magnus” Su Təmizləmə MMC-nin vəkili kimi təqdim etdi:

“O, məhsulun geri qaytarılmayacağını və cərimə olunacağımızı dedi. Ondan kimliyini təsdiq edən rəsmi sənədi tələb etsək də, heç nə göstərilmədi. Daha sonra müqavilədə qeyd olunan nömrəyə (0559355050) zəng edib məhsullarını gəlib götürmələrini və pulumu geri qaytarılmasını xahiş etdim. Əks halda onlardan şikayət edəcəyimi bildirdim. Onlar isə mənə “ürəyin hara istəyir get şikayət elə.

Biz belə işləyirik, bizim öz qanunlarımız var“ dedilər. Mən həmin pulu əziyyətlə qazanmışam və o pula Qarabağ döyüşlərində itkin düşmüş şəhid qardaşım Bədirov Zaurun adına şəhid bulağı tikdirməyi nəzərdə tutmuşdum. Bu sözümü də onlara deim, amma əhəmiyyət vermədilər”.

Zahid Bədirov aidiyyəti qurumlardan probleminin həll edilməsi, quraşdırılmış filterin sökülməsi, müqavilənin ləğv edilməsi və ona dəymiş 1000 manat ziyanın geri qaytarılmasını tələb edib. Bədirov başına gələnlərdən digərlərinin də agah olmasını vı belə fırıldaqçılara aldanmamağa çağrıb.

Mövzunu davam etdirəcəyik.
Bizim.Media

Əmlak Məsələləri Dövlət Xidməti “Sədərək” Ticarət Mərkəzindən icarə müqaviləsi bağlanılmasını tələb edir.

DİA.AZ xəbər verir ki, “Qafqazinfo”nun əldə etdiyi məlumata görə, qurum iddia edir ki, Ticarət Mərkəzi dövlətə məxsus torpaq ərazisində fəaliyyət göstərməsinə baxmayaraq, bu müddət ərzində Komitəyə icarə pulu ödənilməyib.

ƏMDX artıq “Sədərək” barəsində məhkəmə iddiası da qaldırıb. İddia Bakı Kommersiya Məhkəməsində icraata götürülüb. İşə hakim İlham Əhmədovun sədrliyi ilə baxılır.

Mübahisə ilə bağlı maraqlı məqamlardan biri də Bakı Şəhər İcra Hakimiyyətinin məhkəməyə maraqlı şəxs qismində cəlb olunmasıdır. Belə ki, “Sədərək” firması bu günə qədər BŞİH-in sərəncamı əsasında fəaliyyət göstərirmiş.

Qeyd edək ki, "Sədərək" Ticarət Mərkəzi Qafqazın ən böyük bazarı hesab olunur. Ərazisi 30 hektardan çox olan ticarət mərkəzinin rəhbəri tanınmış iş adamı Yunis Qədimbəylidir.

Ağdam rayonunda həkimlərin sayının az olması xəstə yaxınları ilə Mərkəzi Xəstəxananı üz-üzə qoyur. Bu barədə Yenicag.az-a Ağdam rayon sakini Elçin Quliyev məlumat verib.

Onun sözlərinə görə, yaxınları üçün təcili tibbi yardım çağırıb, ancaq həkimlər çox gec gəliblər:

“Neçənci dəfədir ki, Alıbəyli-2 qəsəbəsinə təcili tibbi yardım çağırırıq, həkimlər çox gec gəlirlər. Hətta bu gecikməyə görə halı çox pisləşənlər də olub. Artıq insanlar adət ediblər. Halı pisləşən olanda ya şəxsi maşınla, ya da taksi ilə xəstəxanaya aparırlar”.

Yenicag.az olaraq məsələni bir qədər araşdırdıq. Məlum oldu ki, bu məsələ təkcə bir qəsəbəni əhatə etmir. Bütün rayon təcili tibbi yarımın vaxtında çatmamasından şikayətçidir.

Şikayətçinin sözlərinə görə, məsələni özü araşdırıb və bunun səbəbini tapıb:

“Təcili tibbi yardım maşınlarının niyə gec gəlməsini araşdırmağa başladım. Məlum oldu ki, əhalisi çox olan Ağdam rayonunda 10-dan çox təcili tibbi yardım maşını olmasına baxmayaraq, cəmi iki həkim var. Həkimlərin saylarının az olması xəstələri çarəsiz vəziyyətə qoyur. Bizim çağırışa gələn həkimlər bildirdi ki, yolüstü bir neçə xəstəyə ilkin tibbi yardım göstərib, sonra gəliblər”.

Ağdam rayonunun əhalisinin sayını nəzərə alsaq, həkim sayının azlığının hansı fəsadlara yol aça biləcəyini düşünmək o qədər də çətin deyil.

Məsələni diqqətdə saxlayacağıq…

Yenicag.az

2019-cu ilin mart ayından Bakı Dövlət Universitetində rektor vəzifəsini daşıyan və fizika-riyaziyyat elmləri üzrə fəlsəfə doktoru, dosent olan Elçin Səfərəli oğlu Babayevin idarəçiliyi, müəyyən çevrələrdə dolaşan söz-söhbətlərə görə artıq “çat vermək” üzrədir.

Çünki, bu şəxsin rektor təyinatından əvvəlki illər ərzində, BDU özünün təmiz adı ilə fərqlənən ali təhsil müəssisəsi olaraq fərqlənirdi.

Bəs bu gün nələr baş verir ki, Elçin Babayevin rəhbərlik etdiyi bu ali təhsil ocağı, hansı ki, tərkibində 4 institut, 16 fakültə, 1 filial, 2 elmi-tədqiqat institutu, 3 elmi-tədqiqat mərkəzi, 1 elmi-tədqiqat hissəsi, 24 elmi tədqiqat laboratoriyaları, elmi kitabxanası, 12 qiraət zalı, 5 abonent şöbəsi, çap avadanlıqları olan nəşriyyatı, 6 muzeyi, 80 elmi-tədqiqat və tədris laboratoriyası, informasiya və tərcümə mərkəzi, idman — sağlamlıq kompleksi, poliklinikası, yataqxana və tələbə şəhərciyi və s. olan BDU, bu gün böyük kəsimin qınaq obyektinə çevrilib?

Adicə bir məqama diqqət yetirək ki, bu ali təhsil müəssisəsinin kitabxanasında baş verən hər cür hərcmərcliklər, məhz bu gün Elçin Babayevin idarəçiliyinə lazımi qiyməti verməyə imkan verir.

Unutmaq olmaz ki, BDU-nun Elmi Kitabxanası respublikamızın ali təhsil ocaqlarına məxsus kitabxanalar içində ən zəngin kitabxana hesab olunur.

Çünki, bu kitabxana 1919-cu ildə təşkil olunmuş və Universitetin kitabxansını yaratmaq üçün, hətta xüsusi komissiya da təşkil edilmişdir.

İndi isə keçək əsas mətləbə. AMİA.AZ xəbər verir ki , Məmmədova Zirvə Firəddin qızı BDU-nun Elmi Kitabxanasında işləyir və o, bu kitabxanaya aid kitabları daim evinə daşıyır. Zirvə Məmmədova belə bir addımı ilə, sanki kitabxanadan dədə malı kimi istifadə edir.

Bu xanımın orda-burda danışdığına görə, adicə Sani adlı şəxs Universitetə 20 min manat dəyərində xalça alsa da, rəsmi sənədlərdə bu rəqəm olduqca şişirdilir və 50 min manat göstərilir.

Bundan əlavə, guya ki, bu ali təhsil ocağında tədbirlər keçiriləcək, amma heç bir tədbir keçirilmir və belə bir ad altında ara-sıra 100 min manatlarla “pullar silinir”.

Yəqin ki, rəhbərlikdə çalışan Fikrət adlı şəxsin Qubada inşa etdirdiyi pansionat, məhz belə bir yolla silinən pulların sayəsində ərsəyə gətirilir.

Söylənilənlərə görə, elə ki, bir müddət bundan öncə Sani adlı şəxs daşıdığı vəzifəsindən uzaqlaşdırılır, o halda Fikrəti fikir götürür və az sonra onun halı pisləşir.

Çünki,... Zirvə Məmmədovanın orda-burda danışdığına görə, bu gün Elçin Babayevin əsas gəlir gətirən mənbələrindən biri də, 14-16 bal toplayan tələbələrin kursdan-kurasa keçirilmələri olur.

Bu da o deməkdir ki, əsası ADR-in varlığı dönəmində qoyulan BDU da davam edən acınacaqlı vəziyyətin varlığı, cənab Rektoru heç də maraqlandırmır.

Mövzuya qayıdacağıq.

Qeyd: Yazı bir neçə saatdan sonra istinad olunan saytdan çıxarılsa da, nə BDU tərəfdən münasibət bildirilməyib, nə də faktlarla bağlı heç bir təkzib verilməyib. Məqalədəki faktlarla bağlı qarşı tərəfində münasibətin ictimailəşdirməyə hazırıq.Xeberfakt.az

Azərbaycan Respublikasının Prezidenti İlham Əliyev və birinci xanım Mehriban Əliyeva Bakının Sabunçu rayonunun Bakıxanov qəsəbəsində 2 nömrəli doğum evində aparılmış əsaslı təmirdən sonra yaradılan şəraitlə tanış olublar.

Dövlətimizin başçısına və birinci xanıma doğum evində yaradılan şərait barədə məlumat verildi.

Azərbaycanda əhalinin sağlamlığı hər zaman dövlət siyasətinin mərkəzində dayanır. Bu baxımdan ölkəmizdə səhiyyə sisteminin inkişafı, maddi-teхniki bazasının, kadr potensialının gücləndirilməsi və infrastrukturun yenilənməsi istiqamətində mühüm addımlar atılır. Dövlətimizin başçısının təşəbbüsü ilə bu sahədə həyata keçirilən layihələr insanların sağlamlığının etibarlı qorunmasına xidmət edir. Müalicə-diaqnostika mərkəzlərinin, xəstəxanaların tikilməsi və əsaslı şəkildə yenidən qurulması, müasir avadanlıqlarla təchiz olunması bunun əyani təsdiqidir.

Qeyd edək ki, 2 nömrəli doğum evi 1987-ci ildə istifadəyə verilib. Uzunmüddətli istismar nəticəsində bu tibb müəssisəsində əsaslı təmirə ehtiyac yarandığından dövlətimizin başçısının 2019-cu il 3 aprel tarixli Sərəncamı ilə 2 nömrəli doğum evinin əsaslı təmiri üçün Prezidentin ehtiyat fondundan 2 milyon manat vəsait ayrılıb.

Məlumat verildi ki, əsaslı şəkildə təmir edilən 120 çarpayılıq bu səhiyyə müəssisəsində ən müasir tələblərə uyğun tibbi avadanlıqlar quraşdırılıb. Üçmərtəbəli binada ümumilikdə 51 palata var. Tibb ocağında 80 çarpayılıq doğum, 30 çarpayılıq ginekologiya və 10 çarpayılıq reanimasiya şöbələri fəaliyyət göstərir. Burada vətəndaşlara həm ambulator, həm də stasionar xidmət göstəriləcək. Əvvəllər Səhiyyə Nazirliyinin nəzdində olan 2 nömrəli doğum evi 2021-ci ildən “Sabunçu Tibb Mərkəzi” publik hüquqi şəxsin tabeliyindədir.

Azərbaycanda yeni tikilən səhiyyə ocaqları, ölkəmizə gətirilən müasir tibbi avadanlıqlar bir məqsədə - əhalinin sağlamlığının qorunması kimi mühüm missiyanın yerinə yetirilməsinə xidmət edir. Bu prosesdə Heydər Əliyev Fondunun da misilsiz xidmətləri var. Bütövlükdə əhalinin, xüsusən də ana və uşaqların sağlamlığının qorunması Fondun fəaliyyətinin prioritet istiqamətlərindən biridir. Fondun prezidenti, Azərbaycanın Birinci vitse-prezidenti Mehriban Əliyevanın birbaşa təşəbbüsü ilə həyata keçirilən tədbirlər genefondumuzun qorunmasına, bu sahədə mövcud problemlərin əsaslı surətdə həllinə yönəlib. Bu doğum evinin əsaslı şəkildə yenidən qurulması da ölkəmizdə ana və uşaqların sağlamlığının qorunması istiqamətində dövlət tərəfindən həyata keçirilən tədbirlərin daha bir əyani təsdiqidir.

Azərbaycanda son illər təhsil sahəsinə dövlət büdcəsindən ayrılan vəsaitlər artmaqda davam edir. Ancaq təəssüflər olsun ki, büdcədən ayrılan vəsaitlər çox zaman təhsilin keyfiyyətinə yox, izafi işlərə xərclənir.

İzafi xərclərə yol verən təhsil müəssisələrindən biri də Mingəçevir Dövlət Universitetidir.

Məlumata görə Mingəçevir Dövlət Universitetinin rektoru yeni xidməti avtomobil üçün 83.000 manat xərcləyib.

Universitetin büdcəsindən satınalma yolu ilə xərclənən bu vəsaitə Toyota Abşeron Center MMC-dən avtomobil alınıb.

İlginc məqam isə Universitet rektorunun əvvəlki xidməti avtomobilinin istifadəyə tam yararlı olmasıdır.

Məsələ ilə bağlı Qlobal.az Mingəçevir Dövlət Universiteti ilə əlaqə saxlayaraq yeni avtomobilə xərclənən vəsaitin mənbəyi, yeni avtomobil almaq ehtiyacının nədən yarandığı və rektorun əvvəlki xidməti avtomobilinin marka və buraxılış ilinə aydınlıq gətirilməsini istəyib. Universitetin verdiyi açıqlamada deyilir:

“Bildiririk ki, MDU tərəfindən həyata keçirilən bütün satınalmalar, o cümlədən, yeni avtomobilin alınması zamanı “Dövlət satınalmaları haqqında” Azərbaycan Respublikasının qanunu ilə müəyyən edilmiş tələblərə tam riayət edilmişdir. Nəzərinizə çatdırırıq ki, Cənab Prezidentimizin tapşırığına əsasən, yeni dövrün universitetinə çevrilməyi hədəfləyən MDU-nun maddi-texniki bazasının təkmilləşdirilməsi ilə bağlı Mingəçevir şəhərində ölkə ərazisində analoqu olmayan müasir kampusun tikintisi də nəzərdə tutulmuşdur. Azərbaycan Respublikasının Təhsil naziri cənab Emin Əmrullayev 27.07.2022-ci il tarixdə keçirdiyi brifinqdə də bu barədə ətraflı məlumat vermişdir”.

Qeyd edək ki, Mingəçevir Dövlət Universitetinin rektoru Şahin Bayramovdur.Qlobal.az

Bakı Dövlət Universitetinin keçmiş rektoru, alimdən daha çox biznesmen kimi ad çıxarmış Abel Məhərrəmova aid olduğu deyilən Nabrandakı “El Faro” istirahət mərkəzində soyğunçuluq və bərbad xidmət var. Bu haqda istirahət mərkəzinin qonağı olmuş müştərilərdən bir qrupunun TİA.Az-a verdiyi məlumata görə, “El Faro”da tamamilə rəzalət, özbaşınalıq yaşanmaqdadır.

Bildirilir ki, ilk növbədə köhnə, qalmış yeməklər verilir. Bu da azmış kimi, həmin yeməklər baha və dodaquçuqladan qiymətədir. Müştərilər ailələri ilə istirahətə gedir, normal xidmət, təzə və isti yemək gözləyir, əvəzində stress, əsəb, rüsvayçı xidmətlə qarşılaşır. Qeyd olunur ki, sözügedən istirahət mərkəzində günlük xidmət 200 manatdır. Bu bahalıqla yanaşı, verilən yeməklər dünəndən qalmış olur. Məlumata görə, obyekti keçmiş rektorun qardaşı Habil Məhərrəmov idarə edir. “El Faro”da personal da Məhərrəmovların qohum-əqrəbasıdır.

“Yerlərdəki məmurlar sözün həqiqi mənasında xalqın xidmətçisi olmalıdır. Onlar kabinetlərdə oturub özlərini “rayonun ağası” kimi aparmamalıdırlar”.

Bu barədə “"Sherg.az"a Milli Həmrəylik Partiyasının sədri Əlisahib Hüseynov deyib. Partiya rəhbəri bildirib ki, icra başçıları Prezidentin birbaşa təmsilçiləri kimi hər gün xalqın içində olmalı və qarşıya çıxan cari problemləri yerindəcə həll etməyə çalışmalıdırlar:

“44 günlük Vətən müharibəsində bizim hər birimizə Qələbə sevincini yaşadan şəhidlərimiz və onların ailələri, qazilərimiz də daim icra başçılarının diqqət mərkəzində olmalıdır. Prezident yeni icra başçıları ilə söhbəti zamanı bu məsələni də məxsusi olaraq onların diqqətinə çatdırdı və bildirdi ki, bu kateqoriyadan olan insanlarımız daim dövlətin qayğısını hiss etməlidirlər. Şəhid ailələrinə xüsusi diqqət göstərilməlidir. Dövlət başçısı özü tez-tez şəhid ailələri, müharibə əlilləri, qazilərlə çoxsaylı görüşlər keçirirsə, icra başçıları da bilavasitə dövlət başçısından nümunə götürməlidir. Şəhid ailələrinə, əlillərə, qazilərə isti münasibət göstərməlidirlər. İcra başçıları şəhid ailələrini, qaziləri qapılarda gözlətməməli, get-gələ salmamalı, saymazyanalığa yol verməməlidirlər. Unutmamalıyıq ki, məhz bəzi icra başçılarının yerlərdə bu cür mənfi hərəkətlərinin nəticəsində bir neçə qazi özünə qəsd edib, intihar halları baş verib. Odur ki, yeni icra başçıları bütün bunlardan özləri üçün ciddi nəticələr çıxarmalıdırlar. Onlar bir ali həqiqəti dərk etməlidirlər ki, icra başçısı institutu xalqla dövlət arasında narazılıq, uçurum yaratmaq üçün yox, körpü yaratmaq üçün, dövlət qurumları ilə vətəndaşlar arasında qarşılıqlı etimad mühitini formalaşdırmaq üçün nəzərdə tutulub. Hər bir başçı bilməlidir ki, Prezidentin yürütdüyü daxili siyasəti yerlərdə uğurla həyata keçirmək məhz başçıların fəaliyyətindən asılıdır. Ona görə də başçılar məşhur ifadə ilə desək, özlərini yox, qanunu şah bilməli və ədaləti unutmamalıdırlar. Bunun əksini düşünənlərin icra başçısı olmağa, Prezidenti təmsil etməyə haqqı yoxdur”.
Ə.Hüseynov vurğulayıb ki, Masallının sabiq icra başçısı Şahin Məmmədovun guya, “şəhid ailələri və digər sakinlər” tərəfindən “təntənə” ilə yola salınması olayı da bu fikrimizi təsdiqləyir: “Onun məlum hərəkəti qurama oyundur, əsl şoudur. Bu da onu göstərir ki, dövlət başçısının belə bir azğın və intriqan adamı işdən almağı, vəzifəsiz qoymağı tamamilə düzgün addımdır. Bu cür xırda avantüristlər icra başçısı kimi məsul vəzifələrə yiyələnməməlidirlər. Hər kəsin icra başçısı olmağa mənəvi haqqı çatmır. Yalnız milləti sevən, vətəndaşlara gerçəkdən xidmət etmək istəyən, ölkə üçün faydalı işlər görmək istəyən şəxslər icra başçısı missiyasını daşımağa layiqdirlər. Bəli, söhbət məhz missiyadan gedir. Ümid edək ki, yeni təyin olunan icra başçıları bu missiyanın önəmini dərk edəcək və öz yaxşı əməlləri, uğurlu fəaliyyətləri ilə nümunəvi icra başçısı obrazını yarada biləcəklər. Çünki xalq həqiqətən də icra başçılarından çox şey gözləyir. Prezidentin də onlardan gözləntiləri çoxdur. Baxaq görək yeni icra başçıları Prezidentin etimadını və xalqın ümidlərini doğrulda biləcəklərmi. Təki doğrultsunlar!”.

“"Sherg.az"