Azərbaycanın ixrac yönümlü ən böyük sənaye müəssisələrindən olan Sumqayıt Texnologiyalar Parkında(STP) yeni
mənimsəmə faktlarının olması ilə bağlı məlumatlar yayılır.

DİA.AZ AzToday.az-a istinadla xəbər verir ki, mediada STP-nin Təhcizat departamenti vasitəsi ilə həyata keçirilən maxinasiyalar barədə dəfələrlə məlumatlar yayılıb. Amma nədənsə, STP-də maxinasiyalar səngimir.

Redaksiyamıza daxil olan məlumatlara görə, son vaxtlar STP rədhbərliyi özünə yaxın olan şirkətlərlə işləməyə başlayıb. Məlumatda deyilir ki, STP-nin rəhbərliyində sonuncu dəyişiklikdən sonra absurd hadisələr baş verib:

“Bizim şirkət səkkiz ildən çoxdur ki, mütəmadi olaraq STP-yə müxtəlif məhsul və xidmətlər satmışıq. Sorğu göndərilirdi cavablayırdıq, sifariş almadığımız hallar olsa da, bir çox halda satış edə bilirdik. Yeni rəhbərlik gələndən sonra absurd hal o idi ki, satınalma rəhbəri olaraq yeni təyin edilmiş Seymur Hacıyev gələn kimi STP-nin çalışdığı bütün təchizatçılarla işi dayandırdı. BP və SOCAR kimi şirkətlərin belə tələb etmədiyi sənədlər istəməyə başladı. Soruşanda niyə belə edirsiniz, axı Azərbaycan heç kəs belə işləmir, qanunvericilik də tələb etmir. Seymur cavab verirdi ki, rəhbərlik belə istəyir, Azərbaycanda bizim kriteriyalara uyğun şirkətlər var və biz onlarla işləyəcik. Daha sonra rəhbərlik deyəndə Fuad Nəcəflini nəzərdə tutduğunu öyrəndik. Seymuru STP-yə Fuad Nəcəfli gətirdiyini və arxasında dayandığını dedilər. Və Seymur atdığı addımları Fuad ilə danışıb atırmış. Nəticədə STP yeni şirkətlərlə işləməyə başladı. Nədənsə bizdən tələb olunan sənədləri həmin şirkətlərdən istəmədilər. Bir müddət sonra bir neçə məhsul üçün bizə müraciət edib işləməyə başladılar. Yeganə təchizatçı biz olduğumuz üçün məcbur idilər. Amma bu dəfə bizdən əvvəl tələb etdikləri sənədləri istəmədilər.

Nəticə nə oldu? Nəticədə mediada Seymurun adı yeyinti ilə hallandı. Mediada 180 min yazılmışdı, amma məbləğ daha çox idi. Düzdür Seymur bu söhbətlərdən sonra işdən çıxarıldı, amma STP-nin satınalmasında heç nə dəyişmədi.
Seymurdan sonra STP-nin satınalmasına Rövşən İsmayılov adlı menecer gətirdilər. Onunla ilk görüşlərimiz müsbət keçirdi, hətta bir sıra sifarişlər də ala bildik. Demək olar ki, Rövşənlə işləri normallaşdırmağa başlasaq da, bəzən razılaşdığımız satışlar ləğv olunurdu ki, rəhbərlik fikrini dəyişdi. Bu təkcə bizimlə baş vermirdi. Digər şirkətlərdə eyni problemlər var imiş. Bunu son zamanlar vəziyyəti bir-birimizlə müzakirə etdikdən sonra öyrəndik. Hətta bir dəfə STP-nin işçilərinin daşınması üçün tender elan etmişdi. Tenderdə haqlı olaraq bir şirkət qalib gəldi. Daha sonra ləğv edildiyi qərarı verildi ki, rəhbərlik başqa şirkəti məsləhət görübmüş. İlk qalib gələn şirkət haqlı olaraq şikayətçi olacağını bildirəndə STP bildirdi ki, hər iki tərəfi razı salmaq üçün xidməti iki şirkət arasında bölüşdürdülər. Daha sonra məlum oldu ki, ikinci şirkət rəhbərliyin tanışının şirkəti imiş.

Bundan başqa STP-nin balansında milyonlarla dəyəri olan məhsullar var idi. Bu məhsulların satışı qanundan kənar və STP-nin ziyanına, bəzi insanların isə şəxsi marağına uyğun həyata keçirilir. Məsələn, STP balansında olan HOWO markalı yük maşını üzərində hazırladığı betonqarışdıran avtomobilləri satışa çıxarmışdı. Bizim fəaliyyət sahəmiz olmadığı üçün dostumuza bu haqda məlumat verdik və o proseslərdə iştirak etməyə başladı. Maşınların ən azı 90-100 min bazar qiyməti olardı. Nəticədə betonqarışdıranların 45 min manata satıldığını öyrəndik. Dostumuzun və rəqiblərin təklifindən daha aşağı qiymətə. Maşınların ucuz qiymətə satılması absurd kimi görünsə də, alıcının rəhbərliyə yaxın adam olması hər şeyi izah edir.

Bu yaxınlarda yeni satınalma direktoru Rövşən İsmayilovu da işdən çıxardılar. Öyrəndik ki, STP-də daxili audit keçirilib və xidmətində boşluqlar olduğu üzə çıxıb.

STP-də yeyinti və talan olduğu açıq aydın görünür. Bunun səbəbi satınalma rəhbərləri olubsa, onlar niyə cəzalanmayıb? Satınalmada yeyinti və inventarların satışından problemlər olan şirkətdə satınalmadan məhsul şəxslərin belə tez-tez işdan uzaqlaşdırılması başqa suallar doğurur. Görünür, yeyinti və talanda əli olan rəhbərlik şahidləri aradan qaldırır.

Sual ola bilər ki, nəyə görə talan olduğunu düşünürük? Bəlkə səriştəsizlikdir? Baxın STP rəhbərliyindəki şəxslər hətta pandemiya dövründə də çəkinmədən zənglinləşdiklərini göstərirdilər. İnsanlar işini itirmək qorxusu ilə stress yaşadıqları halda bunlar 400-500 minlik avtomobil alıb heç kimdən çəkinmədən STP-nin ərazisinin içində narahat fəhlələrin gözü qarşısında park edirdilər. Özlərinə yeni evlər villalar alıblar…”.

Redaksiyamıza daxil olan məlumatları araşdırmaqda davam edirik. Səslənən iddialarla bağlı STP rəhbərliyinin də mövqeyini dərc etməyə hazırıq.

Bir neçə gündür ki, Azercell mobil operatorundan kütləvi narazılıqlar var. Bu barədə sosial şəbəkədə xeyli insan narazılıq edib. İstifadəçilər qeyd edirlər ki, bir neçə gündür ki, Azercell mobil operatorunun abunəçiləri balanslarına vəsait yükləsələr də həmin vəsaitlər hesabda görünmür.

Eyni zamanda sosial şəbəkələrdə Azercell-in internet traffikləri ilə də bağlı bir sıra iddialar irəli sürülür. Abunəçilər bildirir ki, müvafiq vəsaiti ödədikdən sonra internet paketi əldə edirlər. Lakin analoji dəyərdə və həcmdə olan digər mobil operatorun internet paketləri daha gec bitir. Azercell-in internet paketləri isə daha tez qurtarır. Bəzi ekspertlərin fikirincə, buna səbəb kimi Azercell-in sosial şəbəkələr üzrə istifadə zamanı tətbiq edilən internet tariflərinin baha olmasıdır.

Məsələn siz Azercell-də "Yotube", "Tik-tok" kimi sosial şəbəkələrdə ardıcıl olaraq 2 saat vaxt keçirirsiniz. Bunun üçün sizdən şərti olaraq 1000 Mb internet trafiki hesablanırsa, digər opoeratorlarda bu traffik daha azdır, şərti olaraq 600 Mb. Hələlik niyə Azercell-in həm danışıq, həm də internet tariflərinin baha olmasına dair heç bir açıqlama yoxdur.

Qarşı tərəfin də mövqeyini işıqlandırmağa hazırıq

Azerbaycanrealligi.com

Tarixən əhalisi azərbaycanlı olan Başkənd kəndinin ərazisinə ermənilər ilk dəfə 1859-cu ildə Qarabağdan və Şəmşəddin rayonundan köçürülmüşdülər. Onlar burada yerli bəylərin mal-qarasını otarırdılar. Ərazisi 61 km² olan Başkənd qəsəbəsi 1920-ci illərdə Sovet rəhbərliyi tərəfindən haqsız olaraq Ermənistana verilmiş və 1992-ci ilə qədər Azərbaycanın Gədəbəy rayonunun içərisinə doğru erməni anklavı kimi qalırdı. Ermənilər tarixi Başkənd adını unutdurmaq üçün qəsəbəyə “Arsvaşen”adını qoymuşdular. Ermənilərin Başkənd kəndinə gəlişi XIX əsrin ortalarında başlayıb. Onlar burada yerli bəylərin mal-qarasını otarırdılar. 1905-1906-cı illər, 1918-1920-ci illər hadisələri zamanı isə azərbaycanlıları sıxışdırıb kənddən çıxartdılar.

Birinci Qarabağ müharibəsi zamanı Ermənistan ordusu həmin ərazidən Azərbaycanın Gədəbəy rayonunun Şınıx bölgəsini və Tovuz rayonunun bəzi kəndlərini atəş altında saxlamaq üçün istifadə edirdi. 1992-ci ilin yayında Ermənistan ordusu Gədəbəy rayonuna Ermənistan tərəfdən hücuma keçdi. Məqsəd Başkəndin anklav vəziyyətindən çıxarılaraq Ermənistanla birləşdirilməsi idi.

İlk zərbəni baş leytenant Məzahir Rüstəmovun dəstəsi öz üzərinə götürdü, axıra qədər vuruşdu, əsgərlər və komandirləri qəhrəmanlıqla həlak oldular, lakin qarşı tərəfin hücumunu ləngitdilər. Azərbaycan Ordusu əks hücum planını həyata keçirməyə başladı. Əməliyyata korpus komandiri general-mayor Dadaş Rzayev, polkovnik Cahangir Rüstəmov, polkovnik Rəfayıl Əsədov, polkovnik Hamlet Hüseynov rəhbərlik edirdilər. Ermənilərin Mutudərə istiqamətində hücumunun qarşısı alındı və avqustun 8-də Başkənd üzərinə hücum başladı. Erməni silahlı birləşmələrinin ciddi müqavimətinə baxmayaraq axşama yaxın Başkənd azad edildi, erməni tərəfinin 200-dən çox canlı qüvvəsi, 4 topu, 3 tankı, 1 BMP və və digər texnikası məhv edildi. Beləliklə, Başkəndin ərazisi də daxil olduqda 1229 km² ərazisi olan Gədəbəy rayonunun ərazisi artaraq 1290[4] km² oldu…

İndi Başkənddə başqa “müharibə” başlayıb. Bu dəfə Azərbaycan hərbçiləri ilə Azərbaycan polisi arasında. Başkənd sakinlərinin verdikləri məlumata görə, kənddə əkin əkən sakinlər vaxtilə ermənilərin çəkdikləri köhnə yeraltı su borularını aşkarlayıblar. Hər birinin uzunluğu 5 metr, diametri 300 mm olan, ümumi sayı 43 ədəd, və 215 metr uzunluğu olan «asinkovı» boruları çıxarıb yol çəkilişinə istifadə etməyə cəhd göstəriblər. Bu vaxt hadisə yerinə hərbçilər gəlib və boruların daşınmasını qadağan ediblər. Kənd sakinləri polisi çağırıblar. Hadisə yerinə Gədəbəy Rayon Polis Şöbəsinin Saratovka qəsəbəsi üzrə Polis Bölməsinin rəisi Yaşar İsmayılov da gəlib. Bu vaxt Yaşar müəllimlə «MTO-nun zampaliti» arasında insident yaşanıb. Zabit rəisə, əəəə deyə qışqıranda, Yaşar İsmayılov yumruqla onu təhqir edən zabitin ağzını partladıb. Daha sonra hər iki tərəfdən – yəni, həm hərbçilərdən yeni dəstə, həm də polis naryadı gəlib və aralarında əməlli-başlı əlbəyaxa çarpışma düşüb. Sakinlərin sözlərinə görə, dalaşanların sayı 100-ə yaxın olub. Boruları maşından düşərkən xəta baş verib. Hərbçilər arasında yaralananlar olub. Hadisə yerinə bir neçə təcili yardım maşını gəlib.(Hadisənin tam videosu var. Bəzi səbəblərə görə təqdim edə bilmirik)

Hazırki vəziyyət belədir ki, hərbçilər öz postlarını buraxıb ermənilərdən qalan boruları mühafizə edirlər. Yəqin ki, Gədəbəy Rayon İcra Hakimiyyətinin yeni başçısı boruların aqibətinin müəyyənlkəşdirilməsini təmin edəcək. Lakin kənddə dolaşan başqa bir məlumata görə, borulara keçmiş briqada komandiri, hazırda də məsul vəzifədə çalışan Oruc adlı komandir əl qoyub və hərbçilərə də göstərişi o verdirib.

Həmin boruların dəyərini İcra Hakimiyyətin məsul şəxsləri 14000 manata dəyərləndiriblər.

Mövzuya qayıdacağıq.

Deryaz.az

Qırğızıstan Prezidentinin vurğuladığı kimi, Heydər Əliyev tarixdə dərin iz buraxmış görkəmli şəxsiyyətdir. O, iş yerindən və ictimai-siyasi quruluş formasından asılı olmayaraq, həmişə Azərbaycanın maraqlarını müdafiə edib.

Bunu Azərbaycan Prezidenti İlham Əliyev Bişkekdə Heydər Əliyev adına 20 saylı Məktəb-Gimnaziya təhsil-tərbiyə kompleksinin açılış mərasimində deyib.

Dövlətimizin başçısı qeyd edib ki, Heydər Əliyev sovet dövründə Azərbaycanın rəhbəri olarkən respublikanı keçmiş SSRİ-də sosial-iqtisadi inkişaf göstəriciləri üzrə son yerlərdən qabaqcıllar sırasına çıxarmışdı. Eyni zamanda, istər SSRİ hökuməti sədrinin birinci müavini olduğu vaxtlarda, istərsə də xalqın onu gənc Azərbaycan Respublikasını iflasa uğramaqdan xilas etməyə çağıranda, ən çətin dövrdə Azərbaycan dövlətinə rəhbərlik edəndə ölkənin maraqlarını müdafiə edib.

Füzuli rayon sakini Rafiq Mehdiyev oğlu Radiq Mehdiyev barəsində qanunsuz olaraq cinayət işi başlandığını iddia edir.

DİA.AZ-ın məlumatına görə, “Qafqazinfo”ya müraciət edən vətəndaş bildirib ki, Nərimanov rayonunda yerləşən “Tonqal” restoranının icarədarı Şəmsəddin Hüseynov şəxsi əlaqələri sayəsində oğlunu həbs etdirməyə çalışır.

Onun sözlərinə görə, Ş.Hüseynovun oğlu Samir də dövlət strukturunda vəzifəli şəxs kimi çalışır və bu məsələdə onun da əli var: “Oğlum Faqət adlı şəxsin yanında kuryer kimi çalışır. Faqətin satdığı ətləri gündəlik olaraq “Tonqal” restoranına aparır. Oktyabrın 5-də Radiq Nərimanov polisi tərəfindən şübhəli şəxs kimi saxlanılıb ki, bəs sən 11 aydır Şəmsəddin Hüseynovun restoranına aparılan ətdən hər gün 20 kilo oğurluq etmisən. Halbuki hər gün ət təhvil-təslimlə restorana verilir. Kababçıya da yalançı izahat yazdırıblar ki, guya həftəlik 2000 manatlıq ət oğurlanıb.

Görünür, Samirin Nərimanov Rayon Prokurorluğuna etdiyi təsir vasitəsilə oğlum barəsində cinayət işi başladıblar. Məqsədləri də odur ki, Şəmsəddinin Faqətə olan borcunu bu yolla sildirsin. Çünki Şəmsəddinin Faqətə 40 min manat borcu var. Şəmsəddin özü də dedi ki, əti göndərən Faqətə 40 min manat borcum var, belə əvəzləşdirirəm. Həmin pulu qaytarmaq istəmədiyi üçün oğlumun üstünə atıb söhbəti bağlamaq istəyir”.

Şikayətçi qeyd edib ki, oktyabrın 7-də Nərimanov Rayon Məhkəməsində oğlunun həbs olunması ilə bağlı verilmiş təqdimata baxılıb: “Radiq barəsində əsassız şəkildə ev dustaqlığı qətimkan tədbiri seçildi. Nərimanov rayon prokuroru niyə əsassız təqdimatla sifarişli həbsə təqdimat verir? Yəni bir restoran sahibi istədiyi adamı həbs etdirə bilər? Məhkəmənin qərarından şikayət verəcəyik. Ümid edirik ki, Bakı Apellyasiya Məhkəməsində işə ədalətli baxılacaq. Biz ev dustaqlığından da narazıyıq.

Onu da deyim ki, "Tonqal" restoranı sabiq Baş prokuror, hazırda həbsdə olan Eldar Həsənova məxsusdur. Restoranı işlədən Şəmsəddin Hacıyev də onun tanışı, həmyerlisidir. Sonradan öyrəndik ki, oğlu Samir əvvəllər Bakı Şəhər Prokurorluğunda işləyib. Hazırda isə Strateji Obyektlərin Mühafizəsi Dövlət Agentliyində çalışır”.
Məsələ ilə bağlı Daxili İşlər Nazirliyinə sorğu ünvanladıq. DİN-in Mətbuat Xidmətinin əməkdaşı Nurlan Əliyev müraciətimizə cavab olaraq bildirdi ki, vətəndaş Ş.Hüseynovun icarədarı olduğu “Tonqal” restoranından oğurluq edilməsilə bağlı etdiyi müraciəti əsasında Nərimanov Rayon Polis İdarəsində araşdırma aparılıb: “Polis əməkdaşları tərəfindən keçirilən istintaq hərəkətləri ilə restorana ət gətirən Radiq Mehdiyevin orada aşpaz kimi çalışan digər bir şəxslə əlbir olaraq 8 ay ərzində həmin restorana gətirdiyi ətin çəkisini qəsdən həqiqi çəkisindən artıq göstərməklə obyektə külli miqdarda ziyan vurduqları məlum olub.

Faktla bağlı Nərimanov RPİ-də Cinayət Məcəlləsinin 177.3.2-ci (Oğurluq, külli miqdarda ziyan vurmaqla törədildikdə) maddəsilə cinayət işi açılıb. İstintaq hərəkətləri davam etdirilir”.

Baş Prokurorluğun Mətbuat xidmətindən isə sorğumuza cavab olaraq bildirildi ki, Nərimanov Rayon Polis İdarəsinə daxil olmuş müraciət üzrə araşdırma aparılıb: “Aparılan araşdırma ilə Radiq Mehdiyevin özgəsinin əmlakını ələ keçirmək məqsədilə 1 oktyabr 2021-ci ildən 13 avqust 2022-ci ilədək müddətdə Şəmsəddin Hüseynovun icarəyə götürərək işlətdiyi “Tonqal” restoranında kababçı işləyən tanışı Natiq Qardaşov ilə qabaqcadan əlbir olaraq həmin restorana gətirib təhvil verdiyi ətin çəkisini qəsdən artıq qeyd etdirməklə restoranın xəzinəsindən həmin çəkiyə uyğun pul vəsaitini təhvil alıb Şəmsəddin Hüseynova 85 min 980 manat məbləğində külli miqdarda ziyan vurmaqla oğurluq etməsinə əsaslı şübhələr müəyyən edilib.

Radiq Mehdiyev və Natiq Qardaşov Cinayət Məcəlləsinin 177.3.2-ci maddəsi ilə təqsirləndirilən şəxs qismində cəlb edilərək barələrində məhkəmənin qərarları ilə müvafiq qətimkan tədbiri seçilib.

Hazırda istintaq davam edir. Bundan əlavə bildiririk ki, Samir Hüseynov adlı şəxs prokurorluq orqanlarında xidmət etmir”.

Son illər ölkəmizdə heyvandarlığın və əkinçiliyin inkişafı üçün böyük vəsaitlər ayrılır, subsidiyalar verilir və inkişaf konsepsiyaları hazırlanır. Ölkə başçısı İlham Əliyevin arardığı siyasətin əsas prioritet hissələrindən biri də ölkə ərazisində fəaliyyət göstərən sahibkarların sərbəst fəaliyyətinin tənzimlənməsidir.

Amma və lakin bir çox hallarda aidiyyatı qurumların rəhbərləri və yerlərdəki məmurlar bu konsepsiyaya qarşı çıxır, yaradılmış infrastrukturu inkişaf etdirmək əvəzinə öz qazancları naminə məhv edir.

Belə bir acınacaqlı vəziyyət Kürdəmir rayonu, “Ərəbqubalı massivi”ndəki “Qubalı yeri” adlanan qış otlaq sahəsində qeydə alınıb və nəticədə 30-40 min baş qoyun, 2700 hektardan çox qış otlaq sahəsi və böyük heyvan tövlələri, infrastruktur tamamilə məhv edilib.

Bizimxeber.az-a daxil olan müraciət əsasında aparıdğımız apaşdırma zamanı bəlli oldu ki, sözügedən ərazi əvvəllər Qarasu bataqlığı kimi tanınıb. Bu ərazi mərhum prezident Heydər Əliyevin tapşırığı ilə qurudularaq, məhz heyvandarlığın inkişafı üçün qış otlaq sahəsi hissəsi hesab olunub.

Bundan sonra 3000 hektara yaxın ərazi heyvandarlığın inkişafı naminə üçün Kürdəmir, Ağsu və diğər rayonlardan olan fermerlər arasında bölüşdürülərək müqavilə şəkilində paylanıb.

Fermərlər də özlərinə məxsus olan vəsaitlər hesabına heyvan tövlələri tikərək heyvanlarını burada saxlayıb, çoxaldıb. Qısa zamanda bu ərazidə 30-40 min baş qoyun və qara mal bəslənib.

Amma bir neçə il əvvəl Kürdəmir rayonun sabiq başçısı Ceyhun Cəfərovun bir başa göstərişi və iştirakı ilə (Ceyhun Cəfərov Baş prokuror yanında Korrupsiyaya Qarşı Mübarizə Baş İdarəsinin Kürdəmirdə keçirdiyi əməliyyat zamanı həbs edilib) bu ərazidə olan fermerlərə qarşı sözün əsl mənasında divan tutulub.

Fermərlərə qarşı qanunsuz məhkəmə iddiaları qaldıran Ceyhun Cəfərov bu torpaqları sözün əsl mənasında ələ keçirib. Məhkəmələr də icra başçısının sifarişini yerinə yetirərək icra hakimiyyətinin xeyrinə qərar çıxarıb və qış otlaq sahələri fermerlərdən qanunsuz olaraq alınıb.

Nəticədə bütün məhkəmə instansiyalarını öz vəzifə səlahiyyətlərindən istifadə edərək “qazanan” icra başçısı onlarla fermerin illərlər çəkdiyi əməyi məhv edib. Müxtəlif formada təzyiqlərə mərus qalan fermerlər heyvanlarını dəyər-dəyməzinə satmağa məcbur edilib, 10 minlərlərlə heyvan tələf olub və sairə...

Bundan sonra icra başçısının göstərişi ilə qış otlaq sahələrinin statusu dəyişdirilərək əkin sahələri statusuna salınıb və bu ərazilər öncədən planlaşdırıldığı kimi “Azər Aqro” MMC-yə icarə müqaviləsi ilə verilib.

Təsəvvür edin qurudulmuş bataqlıq, qış otlaq sahəsi statusunda olan ərazilər əkin sahəsi olaraq sənədlərşdirilir və bu ərazilərdə taxıl və pambıq əkilməsi barədə qərar verilir, subsidiyalar ayrılır, böyük xərclər tökülür, gübrələnmə işi aparılır və sairə. Amma heç bir nəticə olmur, ola da bilməz. Bu əsl cinayətdir və dövlər əmlakının külli miqdarda və planlı şəkildə məhv edilməsinə yönəlik addımdır.

Bizimxeber.az-ın araşdırlmaları zamanı bəlli oldu ki, bu əraziyə xərclənən milyonlar havaya sovurulub. Əkilən taxıl, pambıq məhv olub. Bu günə qədər bu ərazidə əkilən sahələrdən bir manat xeyir götürülməyib. Bütün bunlar azmış kimi, bu ərazilərdə qanunsuz olaraq bostançılıq və tərəvəzçilik sahələri sahılıb. Bu zaman da heç bir gəlir əldə etmək mümkün olmayıb.

"Azər Aqro” MMC-yə bu ərazilərdə pambıq və taxıl becərmək üçün ayrılan subsidiyaları sözün əsl mənasında havaya sovurub. Nəticədə nə heyvanbdarlıq inkişaf edib, nə əlinçilik, nə də bostançılıq və tərəvəzçilik.

İndi bu ərazilər sadəcə boş sahə olaraq qalmaqdadır. Əkinçilik üçün yararsız olan bu ərazilər hazırda qış otlaq sahəsi kimi belə yararsız halla gətirilib. Ərazidə lazımsız xəndəklər qazılıb, fermerlərə məxsus heyvan tövlələri məhv edilib.

Bir sözlə, korrupsioner icra başçısı Ceyhun Cəfərovla “Azər Aqro” MMC-nin rəhbərliyi 2700 hektardan çox olan qış otlaq sahəsini məhv edib.

Sözügedən ərazidə baş verənlər, ayrılmış milyon manatlarla subsidiyaların kimlər tərəfindən mənimsənilməsi araşdırılmalıdır. Ümid edək ki, bu araşdırılmaların aparılması üçün Dövlər Komissiyası yaradılacaq, günahkarların müəyyənləşdirilərək cəzalandırılması həyata keçiriləcək.

Araşdırmalarımız davam edir!

Bizimxeber.az

"ADAU-nin Daxili Nəzarət şöbəsinin müdiri Namiq Cəfərov sabiq rektor İbrahim Cəfərovu necə idarə edirdisə, indi də rektor əvəzi Zəfər Qurbanovu idarə edir.

Çox maraqlıdır ki, Namiq Cəfərov 2018-ci ildən nazir İnam Kərimovun təşəbbüsü ilə ADAU-nin Daxili Nəzarət şöbəsinə müdir təyin edilib. Təyinatından indiyə qədər Namiq Cəfərov sabiq rektor İbrahim Cəfərovla birlikdə şərikli biznesləri olmuşdur. Hətta mexanizasiya korpusunun qardrovunu ləğv edərək orada kafe açaraq Namiq Cəfərovun idarəsinə vermişdir.

Bundan başqa sabiq rektorla əkinçilik və digər biznesləri belə olmuşdur. Rektor əvəzi təyin olunan Zəfər Qurbanov təyin olunan gündən bu günə qədər Namiq Cəfərov, Zəfər Qurbanovun yanında gəzir və ADAU-nin idarəçiliyində fikirlərini diktə edir.

Zəfər Qurbanov Basarkeçər rayonunun Qanlı kəndindən olduğu kimi Namiq Cəfərovda Basarkeçər rayonunun Qanlı kəndindəndir.

ADAU nin proffessor müəllim heyyətinin bildirdiklərinə görə Zəfər Qurbanovla, Namiq Cəfərov yaxın qohumdurlar. Yaxın qohumluq əlaqələrinə görədə rektor əvəzi bütün məsələri Namiq Cəfərovdan məsləhət alır. Bu qohumluq əlaqəsindən istifadə edərək Namiq Cəfərov ADAU nun tələbə qəbulu üzrə məsul katibi Telman Musayevə 1 noyabır peşə bayramı münasibəti ilə fəxri ad verdirmək istəyir. Telman Musayev bu günə qədər tələbə qəbuli ilə bağlı bir çox maxinasiyalar edərək universitetə qanunsuz tələbə qəbul etmişdir. Hətta bir müddət əvvəl Dövlət İmtahan Mərkəzinin nüfuzunu ləkələməyi və DİM də işləyən bir qurup vəzifəlilərlə əlbir olaraq universitetə tələbə qəbullarında maxinasiyalar edərək külli miqdarda pul əldə etməsi barədə mətbuatda məqalələr və şikayyətlər dərc olunmuşdu. Hətta sabiq rektor İbrahim Cəfərov rüşvət və qanunsuz qəbulla bağlı Telman Musayevi işdən azad etmək isdəsədə Namiq Cəfərovun təkidi ilə vəzifədə qalmışdır. ADAU nə heç bir əməyi keçməyən Telman Musayevə fəxri adın verilməsində Namiq Cəfərov yaxın qohumu rektor əvəzi Zəfər Qurbanova təkitlə Telman Musayevə fəxri adın verilməsini istəyir.
Biz ADAU-nin professor müəllim heyyəti olaraq inanırıq ki bu ədalətsiz yanaşmaya Nazir İnam Kərimov "dur" deyəcək...

ADAU nin professor müəllim heyəti"

Qarşı tərəfin də mövqeyini dərc etməyə hazırıq. //Turantv.az//

“Ən böyük arzum budur ki, şəhid oğlumun adı itməsin, yaşasın. Oğlum böyük qəhrəman övlad olub. Baş kəşfiyyatçı olaraq həm döyüşlərdə, həm dronla peşəkar iş qabiliyyətində, həm də əsgərlərinə qarşı insani münasibətdə fərqli olub. Əsgərləri belə deyirdi ki, oğlum ikinci Polad Həşimov idi”.

Balakən sakini, 44 günlük İkinci Qarabağ müharibəsində həyatını itirmiş Harun Alqayevin anası Kifayət Alqayeva belə deyir. O, oğlunun adının əbədiləşdirilməsini istəyir:

“Cibindəki pulu əsgərlərinə xərcləyib, digərləri kimi əsgərdən pul almayıb. Öz arzusu ilə hərbçi, kəşfiyyatçı olub. Ali hərbi təhsili vardı. Milli Qəhrəman adına layiq oğludur. Biz demirik bunu, keçdiyi döyüş yolu, hərbçi yoldaşları deyir. Hazırda məni Balakəndə qəhrəmanın anası deyə çağırırlar. Camaatın dilindədir övladım. Ümüd edirik ki, müraciətimizə müsbət cavab gələr və oğlumuzun adı məktəbə verilər”.

“Uşaqların təhsil aldığı yerdən oğlumun adı çəkilsin”

Kifayət Alqayevanın digər övladı da müharibə qazisidir. İki övladının Vətən üçün döyüşdüyünü, Harun Alqayevin layiq görüldüyü 8 medal, bir bayraq ordenini əsas gətirən ana deyir ki, qanun oğlunun adının əbədiləşdirilməsinə imkan verir. O, övladının adının oxuduğu orta məktəbə verilməsini arzulayır.

Harun Alqayev 28 yaşında həyatını itirib. Heydər Əliyev adına Azərbaycan Ali Hərbi Məktəbində təhsilini başa vurub, 2015-ci ildə leytenant rütbəsi alaraq Goranboy rayonundakı “N”saylı hərbi hissədə kəşfiyyat tağım komandiri kimi çalışıb. Bir il sonra müşahidə kəşfiyyat tağım komandiri, 2018-ci ildə isə baş leytenant rütbəsinə layiq görülüb.

Tərcümeyi-halında göstərilir ki, Harun Alqayev bu müddət ərzində peşəkar kəşfiyyatçı kimi yetişib və ən ağır əməliyyatları həyata keçirib. 2020-ci ilin martında kəşfiyyat bölüyünün komandiri vəzifəsinə layiq görüldükdən sonra xüsusi təyinatlı qüvvələrin heyətinə qoşulub və baş kəşfiyyatçı olub. O, Murovdağ və Füzuli uğrunda gedən döyüşlərdə iştirak edib və oktyabrın 15-də həyatını itirib. Erməni, rus dilləri daxil, 4 dil bilib.

Şəhid atası Məhəmməd Alqayev deyir ki, ölümündən sonra ailə öz büdcəsi hesabına bulaq memorial kompleksi inşa edib. Bu ilin yazında oğlunun adının əbədiləşdirilməsi üçün Balakən rayon 1 saylı Talalar kənd tam orta məktəbi adından və eləcə də ailənin yaşadığı küçənin sakinləri adından Nazirlər Kabinetinə müraciət göndərilib. Deyir ki, yaşadıqları Fikrət Əmirov adına küçənin adı dəyişdirilərək oğlunun adını daşısa da, məktəbin adı ilə bağlı müraciətə cavab gəlməyib:

“Martda məktub hazırlandı. Apreldə Balakən Rayon İcra Hakimiyyəti məktubu yola saldı Nazirlər Kabinetinə. Məktubda şəhidin adının Balakən rayon Talalar kənd 1 saylı tam orta məktəbə verilməsi qeyd olunub. Artıq 7 aydır ki, məktuba cavab yoxdur. Niyə gecikir, yekun cavab nə olacaq, bilinmir. Mənim oğlum uşaqları çox sevən övlad olub. Onlarla səmimi münasibəti vardı. Onun şəhid olması xəbəri daha çox qohum, qonşu uşaqlarını kədərləndirmişdi. İndi uşaqların yanında ola bilməsə də, istəyirik adı məktəbə verilsin. Uşaqların təhsil aldığı yerdə oğlumun adı çəkilsin. Hətta oğlumun Milli Qəhrəman adını almasını istəyirəm. Onun cəsarəti, xidməti bunu haqq edir”.

“Əvvəl iki orden, iki dəfə Milli Qəhrəman adı daşımaq tələb olunurdu”

“Şəhid adının əbədiləşdirilməsi və şəhid ailələrinə edilən güzəştlərin tətbiqi qaydaları” Azərbaycan Respublikası Nazirlər Kabinetinin 1994-cü il 15 yanvar tarixli 10 saylı qərarı ilə nizamlanır. Şəhid adını əbədiləşdirmə məqsədilə yerli rayon (şəhər) icra hakimiyyəti orqanları Nazilər Kabineti qarşısına vəsatət qaldıra bilər. Həmin qərara əsasən Azərbaycan Respublikasının Vətən Müharibəsi Qəhrəmanı və Azərbaycan Milli Qəhrəmanı, həmçinin vətən uğrunda döyüşlərə görə ordenlə təltif olunan şəxslərin adları küçələrə, meydanlara verilir. Təşkilatlara, müəssislərə, hərbi və mülki gəmilərə verilməsi üçün Azərbaycan Respublikasının Nazirlər Kabineti qarşısında vəsatət qaldırılmalıdır. Həmçinin icra hakimiyyətləri “Şəhid” Memorial kompleksini yaratmalıdır. Vətən uğrunda göstərilən qəhrəmanlıqla bağlı döyüş yerləri , dəfn yerləri qorunmalı, abadlaşdırılmalı, qəbirüstü daşların, xatirə abidələrinin qorunması da təşkil edilməlidir. Döyüş əməliyyatları getmiş yerlərdə isə xatirə nişanları qoyula bilər. Büstlər isə Azərbaycan Respublikasının Vətən Müharibəsi Qəhrəmanı və Azərbaycan Milli Qəhrəmanı olan şəxslərə ucaldılır.

Balakən Rayon İcra Hakimiyyətinin Vətən Müharibəsi iştirakçıları və şəhid ailələri ilə işin təşkili şöbəsinin müdiri Ağa Ağayev Meydan TV-yə deyib ki, ölkədəki 14 557 şəhiddən 193-ü Balakənin payına düşür. 30 nəfəri İkinci Qarabağ müharibəsində həlak olub. Onlardan üçü ordenə layiq görülüb, biri isə Vətən Müharibəsi qəhrəmanıdır. Məhz Nazirlər Kabinetinin qərarına əsasən yalnız onların adından müraciət göndərilib. Ölkə prezidetinin qərara etdiyi son dəyişiklik isə proseduru qismən asanlaşdırıb:

“Vətən Müharibəsi qəhrəmanı Novruzov Amin Taciddin oğluna artıq büst qoyulub, liseyə və küçələrdən birinə adı verilib. Əvvəl iki orden, iki dəfə Milli Qəhrəman adı daşımaq tələb olunurdu, indi bir ordeni, Milli Qəhrəman adı olana verilməlidir. Müraciətlər əsasında ölkə prezidenti qərarda dəyişklik etdi. İki sözü ləğv olundu. Harun Alqayev bayraq ordeni olandır, Əlisoltanov Vahid Tahir oğlunun üçüncü dərəcəli medalı, Rəşidov Tural Fazil oğlunun isə Qarabağ ordeni var. Orden fərq etmir, yetər ki, orden olsun. Üçünün də adından vəsatət qaldırılıb icra hakimiyyəti adından və hələ cavab gəlməyib. Memorial komplekslərin isə hər bir şəhid üçün təşkili mümkündür. Əslində icra hakimiyyəti etməlidir, bəzən ailələri, imkanlı şəxslər, bələdiyyə də edə bilər. Büst isə ancaq icra hakimiyyəti büdcəsi ilə qoyulmalıdır, o da Milli Qəhrəmanlara və Vətən Müharibəsi qəhrəmanlarına”.

“Sonradan bu imtiyazdan sui- istifadə olundu…”

Ölkədə indiyə qədər 83 nəfər Vətən Qəhrəmanı, 221 nəfər isə Milli Qəhrəman adına layiq görülüb. 18 adda orden, 59 adda medal var.

Millət vəkili Fazil Mustafa Meydan TV-yə açıqlamasında bildirib ki, qanunun sadələşdirilməsinə ehtiyac yoxdur. Çünki bu, vəziyyətdən sui- istifadənin qarşısını alır. O, müraciətlərin gecikməsini isə uzun araşdırma prosesi ilə əlaqələndirib:

“Bu, sadə məsələ deyil, müəyyən prosedurlar var ki, onların əsasında olur. Tələblərə cavab verməlidir. Hansı döyüş bölgəsində, hansı döyüş şəraitində olub və əldə etdiyi nəticələrə əsasən bunu vermək olur. Yoxlama, araşdırma prosesi ciddi olmalıdır ki, müraciət əsasında müəyyən vaxt aparan məsələlər, araşdırmalar tam həyata keçsin. Kifayət qədər səbəblər var ki, müraciətlər tez araşdırıla bilmir”.

“Qarabağ müharibəsində sadə vəziyyətdə dünyasını dəyişmiş şəxslərə də bu ad verildi. Sonradan bu imtiyazdan sui- istifadə olundu. Digər haqqı çatan şəhidin haqqına girmək idi, bu. Ona görə biz elə etməliyik ki, həqiqətən bu adı alanlar statusa layiq olsun. Layiq olmayanda da ciddi problem yaradır”, – deputat deyib.

“Qoysunlar, məktəb kollektivi özü qərar qəbul etsin”

Azərbaycan Qarabağ Müharibəsi Əlilləri, Veteranları, Şəhid ailələri İctimai Birliyinin sədr müavini Arif Məmmədov isə şəhid adının əbədiləşdirilməsi prosedurunun asanlaşdırılmasını məqbul sayır. Deyir ki, hətta ötən ilin payızından təmsil olunduqları təşkilatın adından Nazirlər Kabinetinə rəsmi müraciət də ünvanlanlanıb. Müraciət ad almayan və prosedurdan kənarda qalan bütün həlak olan əsgərlər üçündür:

“Bu gün hansısa məktəbə, küçəyə simvolik olaraq o şəhidin adı verilsə, nə itirə bilərik? Onun adı yaşayar. Pis nə var burda? O qədər küçələr, meydanlar, təşkilatlar, məktəblər, sinif guşələri var ki. Prezidentin qərarına ehtiyac yoxdur. Qoysunlar, məktəb kollektivi özü qərar qəbul etsin”.

“Valideyn üçün fərqi yoxdur, onun oğlu Milli Qəhrəman adına layiq görülüb, ya yox. Ordeni var, ya yoxdur. Onlar doğmaları və bizim üçün şəhiddir. Ayrı-seçkilik olmamalıdır. Övlad itib, vətəndaş itib. Əksinə bu addım analara təskinlik, mənəvi rahatlıq verəcək. Ancaq hələ də müraciətimizə cavab yoxdur”, – Arif Məmmədov deyib.

Birlik yetkilisi hesab edir ki, kriteriyalara uyğun gəlməyən, amma müharibədə həlak olan şəxslərin də adı əbədiləşdirilməlidir. Elə birliyin müraciəti d bu yöndədir.

“Ailələr səbrlə gözləməli, dövlət də o ailələrə dəstək olmalıdır”

Qarabağ qazisi, “Xocalı Soyqırımını Tanıtma” İctimai Birliyinin sədri Şamil Sabiroğlu isə şəhid ailələrinin istəyini normal saysa da, indiki məqamda ad əbədiləşdirilməsinin kütləviləşdirilməsini uyğun hesab etmir. Bu mənada Türkiyə, İran kimi ölkələrin təcrübəsini təqdir edən QHT rəhbəri eyni döyüş yolunu keçən qazilərə də həssas yanaşılmasını vacib sayır:

“Düzdür, biz işləyirik onlarla, valideynlər, xüsusilə analar narazıdır bu mövzuda. Onlar istəyir ki, hər birinin övladının adı əbədiləşdirilsin. İndiki halda axı mümkün deyil. Çünki Nazirlər Kabinetinin məlum qərarı var. Konkret kimlərin ala biləcəyinə dair maddələr var. Sahibkarlar da bu mənada iş görə bilər. Məsələn, öz şirkətlərində adverməni təşkil edə bilərlər. Düşünürəm, bu kimi mübahisələrə son qoymaq lazımdır. Ailələr səbrlə gözləməli, dövlət də o ailələrə dəstək olmalıdır”. Şamil Sabiroğlu hesab edir ki, çətin və həssas dönəmdir:

“44 qazi intihar edib. Qazilərin müraciətlərinə baxılmalı, onlara qarşı həssas davranılmalıdır. Axı onlar da o döyüş yolunu keçib. Dövlət əsas diqqəti hələ şəhid ailələrinə çəkir. Bizə müraciətlər çox olur. Konkret istiqamətləri veririk, kömək edirik ki, necə müraciət etsin. Yaxud müraciətin əsası varmı, başa salırıq. Ancaq o saat cavab gəlmir müraciətə, xırdalığa qədər gedilir. Məsələn, Harun Alqayevin o qədər xidməti olsa da, hələ araşdırma gedir və ikinci bir orden alması gözlənilir. Onun adının əbədiləşdirilməsi isə Nazirlər Kabinetinin apardığı araşdırmanın yekununda bilinəcək”. //Meydan TV//

""MADO"nun Fəvvarələr meydanında yerləşən filialında müştəriləri əməlli-başlı qarət edirlər". Bu barədə DİA.AZ-a tanınmış jurnalistlərdən biri giley edib.

Jurnalist iddia edir ki, keçən şənbə günü iki dostu ilə birgə sözügedən kafenin Fəvvarələr meydanında yerləşən filialında çay içib:

"Hər şey elə ilk başdan başladı. Çay əvəzinə stolun üstünə şirniyyatları düzəndə dedim ki, sadə çay istəyirəm. Ofisiant isə "şirniyyatın və 4 növ mürəbbənin çayın üstündə vacib" olduğunu bildirdi. Mən müştəri hüquqlarımdan danışdım, kar eləmədi... Nəhayətdə jurnalist olduğumu bildirdim. Şirniyyatı geri götürdü.

Amma yekun hesabda yenə də şirniyyatın pulunu məndən çıxdılar. Yeməsəm də, pulunu ödərtdilər".

Bunun açıq-aşkar qarət olduğunu bildirən jurnalist məsələ ilə bağlı əlaqədar qurumlara şikayət yazacağını da qeyd edib.

DİA.AZ

Azərbaycan Respublikası Prezidentinin Administrasiyasının humanitar siyasət məsələləri şöbəsinin müdiri Fərəh Şirməmməd qızı Əliyeva Naxçıvan «xan» Vasif Talıbovdan qorxur.

DİA.AZ-ın ovqat.com-a istinadən məlumatına görə, bu iddia Azərbaycan xalq artisti Həsən Ağasoya aiddir.

Bəs xalq artisti niyə bu qənaətə gəlib?

Gəlin, ən yaxşısı, bu sualın cavabını xalq artistinin özündən xəbər alaq.

Həsən Ağasoy öz Facebook statusunda bu qənaətinə belə aydınlıq gətirir:

«Azərbaycan Respublikasının 1-ci vitse prezidenti Mehriban xanıma öz işimlə bağlı yazdığım şikayət məktubum Fərəh xanımın göstərişi ilə məktublar şöbəsində ilişib qalıb.Səbəbini məktublar şöbəsindən soruşdum. Fərəh xanım deyib ki, məktub Naxçıvandan gəldiyinə görə saxlanılır. Görünür, Fərəh xanım da Naxçıvan rəhbərliyindən ehtiyat edir ya da qorxur. Artıq 6 aya yaxındır ki, məktubuma cavab verilmir. Çünki məktub gərək Mehriban xanıma çatdırıla ki, cavab da verilə. Bir sənət adamına olan hörmətsizlikdir bu! Buna başqa nə ad vermək olar?»