Naxçıvan şəhər 1 saylı polis bölməsinin rəisi polis polkovnik-leytenantı Şəmsi Mirzəliyev işini bir xeyli böyüdüb.

Yox, yox, söhbət polis orqanlarındakı xidməti vəzifəsindən getmir. Söhbət ondan gedir ki, Şəmsi Mirzəliyev adlı bu polis polkovnik-leytenantı Tumbul kəndindəki təsərrüfatı ilə kifayətlənməyib, indi də keçib Qaraxanbəyliyə.

Üstəlik, o boyda polis məmuru Tumbuldakı kimi əkinçiliklə də məşğul deyil. Onu Qaraxanbəylidə çoban-polkovnik-leytenant kimi tanıyırlar. Kənd əhalisi arasında bu cür ayama (ləqəb) qazanması isə səbəbsiz deyil. Məlumata görə, Qaraxanbəylidəki mülkünü bir qohumunun adına rəsmiləşdirən çoban-polkovnik-leytenant orada 350 baş qoyun saxlayır. Hətta kənd tarixində bu qədər heyvanı olan çobana rast gəlinməyib. Bu baxımdan Şəmsi Mirzəliyevin adı Naxçıvanın hələ yazılmamış «Rekordlar» kitabına düşə bilər.

Maraqlıdır ki, başı çobanlığa və rəncbərliyə qarışan Şəmsi Mirzəliyev işlərinin çoxluğundan səlahiyyətinə daxil olan ərazidə yaşananlardan xəbər tuta da bilmir. İddialara görə, Tumbulda bir neçə ay bundan əvvəl baş vermiş oğurluq hadisəsinin üstü hələ də açılmayıb. Baxmayaraq ki, bu hadisəyə görə «xan» həzrətləri dəfələrlə Daxili İşlər naziri Rəşad İsmayılovu yanına çağırıb nəyi var danlayıb, ona işin üstünün açılması üçün konkret vaxt verib. Rəşad müəllim qarşısına qoyulan bu möhlət müddəti həftənin axırından ayın axırına qədər genişlənə-genişlənə gəlib 4 aya çıxıb. Amma üzərindən xeyli keçməsinə baxmayaraq, oğrunu tapmaq mümkün olmayıb.

Xatırladaq ki, bu ilin iyun ayında Naxçıvan şəhərinin Tunbul kəndində poçt idarəsi yarılmış və poçtun dəmir kassası yerindən çıxarılaraq aparılmışdı. Maraqlıdır ki, cinayətin baş verdiyi sıralarda 1 saylı polis bölməsinin əməkdaşları həmin ərazidə patrul xidmətində imişlər. Amma nədənsə oğurluq hadisəsi onların gözündən yayınıb.

Tunbuldakı oğurluq Vasif Talıbovun indiyədək yürütdüyü «0 cinayətli bölgə yaratmaq» siyasətini alt-üst etdiyindən «xan» sarayının ciddi nəzarətinə götürülüb. «Xan» həzrətlərinin sarayda oturan «Gestapo» yetkililəri hər həftə nazir Rəşad İsmayılovu yanına çağırıb xeyli danlayır və ondan cinayətin dərhal açılmasını tələb edirlər. Rəşad İsmayılov da öz növbəsində müavini Zahid Gözəlovu, həmçinin Naxçıvan şəhər polis İdarəsinin sədr müavini, mayor Elvin Səfərlini və MR DİN-in 7-ci şöbəsinin əməkdaşlarını danlayıb Şəmsi Mirzəliyevin üstünə göndərir. Şəmsi Mirzəliyev də onlar tərəfindən danlanılır. Amma yenə də Tunbul cinayətinə vaxt ayırmaqdansa, Qaraxanbəylidə çobanlığını etməyə üstünlük verir.
Haqsız da deyil. Necə olur, Azərbaycanın bir çox generalları var ki, çobanlıqla məşğul olurlar. Naxçıvanın Azərbaycandan nəyi əskikdir ki, onun çoban-polkovnik-leytenantı olmasın? //ovqat.com//

Azərbaycanda hakim adına daha bir rəzalət baş verib.

DİA.AZ-ın Gununsesi.info-ya istinadən xəbərinə görə, Bakı Ağır Cinayətlər Məhkəməsinin hakimi Novruz Kərimov sədrlik etdiyi açıq məhkəmə iclasında proses keçirilən zalın qapısını arxadan bağlatdırıb. Nəticədə vəkil Elçin Sadıqov iştirakçısı olduğu prosesə qatıla bilməyib.

Vəkil deyir:

“Bakı Ağır Cinayətlər Məhkəməsinin hakimi Novruz Kərimov digər vəkilin olmasını bəhanə edərək gecikmiş vəkili, məhkəmə iclas zalına buraxmır. Qapını cəftəylə bağlayıb”.

Gununsesi.info xatırladır ki, Novruz Kərimov sabiq MTN rəhbəri Eldar Mahmudovun məhkəmə sisteminə yerləşdirdiyi hakim kimi tanınır. O, MTN tərəfindən şərlənən yüzlərlə vətəndaş barəsində sifarişli hökmlərin müəllifidir.

Zirə qəsəbəsində yerləşən “Zeytun yağı və süfrəlik zeytun istehsalı zavodu”nun sahibi olan “Zirə Aqropark” MMC (VÖEN – 1503134451) “Azərenerji” ASC-nin prezidenti olan Baba Rzayev ilə qohumluq əlaqələri olan şəxslərə məxsusdur. Düşünülə bilər ki, burada qeyri-adi heç nə yoxdur. DİA.AZ bildirir ki, amma qeyri-adi olanı məhz həmin şirkətin Baba Rzayevin rəhbərliyi altında olan qurum və idarələrdən davamlı olaraq büdcə milyonlarını tender formasında ələ keçirməsi faktlarıdır.

Qeyd edək ki, “Zirə Aqropark” MMC-nin bir il əvvələ qədər qanuni təmsilçisi olan Soltanov Ayaz Üzeyir oğlu eyni zamanda “FF Construston” MMC-nin (VÖEN – 1500616851) qanuni təmsilçisidir. “FF Construston” MMC-nin hüquqi ünvanı isə Baba Rzayevin kürəkəni Fərid Fərhadzadənin qeydiyyatda olduğu – Fətəli xan Xoyski pr., ev 134, m. 28-də yerləşir.

Fərid Fərhadzadə Fövqəladə Hallar Nazirliyi yanında Kiçikhəcmli Gəmilərə Nəzarət və Sularda Xilasetmə Dövlət Xidmətinin rəisi olan general-mayor Rüfət Fərhadovun oğludur. Baba Rzayevin kürəkəni mətbuatda "Göknur Bakı Ltd” MMC-nin (VÖEN - 1500023181 ) müdiri kimi təqdim olunur. Bu şirkətin qanuni təmsilçisi isə Baba Rzayevin qardaşı Rahib Rzayevdir.

Bundan başqa “Zirə Aqropark” MMC-nin qeydiyyatada olduğu hüquqi ünvanda – Ziya Bünyadov, ev 2071-ci məhəllədə “GBS” QSC adlı (VÖEN-1500855231) şirkət də yerləşir. Bu şirkətə məxsus obyektlər də Zirədəki zeytun zavodu ilə eyni ərazidədir. Həmçinin “GBS” adı ilə başlayan başqa bir şirkətə - “GBS Constrasion Electro Mechanical Systems” MMC-yə (VÖEN - 1501472741 ) Baba Rzayevin digər qardaşı Emin Rzayev rəhbərlik edir.

Hər halda bu faktlar, indi də olmasa... yaxın gələcəkdə - Baba Rzayev silisə çəkiləndə hüquqi araşdırmaçıların işinə yarıyacaq...

Dia.az

Ağdam rayon sakinləri torpaqlarını suvarmaq üçün istifadə edilən artezianın fəaliyyətinin dayanması nəticəsində çıxılmaz vəziyyətdə qalıblar.

B barədə Oxu.Az-ın redaksiyasına rayonun Əfətli kənd sakinləri bildiriblər.

Onlar qeyd ediblər ki, 56 hektar torpağa təhkim olunmuş, Ağdam Rayon Suvarma Sistemlər İdarəsində qeydiyyatda olan subartezian quyusu xarab olub:

“56 hektar torpağın mülkiyyətçilərindən hər hektara altı manat hesabı ilə 336 manat vəsait yığılıb. İdarədə heç bir təminat olmadığı üçün həmin vəsaitdən 265 manat verib boru almışıq.

Yerdə qalan 71 manat isə quyunun sökülməsinə və yığılmasına xərclənib. Bir həftə sonra quyuda yenidən problem oldu. Bir aydır idarə tərəfindən qurğunun yenidən düzəlməsi üçün maraqlanan yoxdur. Kənd camaatı taxıl əkmək istəyir, amma xərc çəkməyə qorxuruq”.

Məsələ barədə Ağdam Rayon Suvarma Sistemlər İdarəsi ilə əlaqə saxladıq.

Qurumdan bildirilib ki, problem müvəqqətidir:

“İndiyə kimi nasos təmirini dövlət vəsaiti hesabına aparmışıq. Bir neçə aydır ki idarəyə heç bir ehtiyat hissəsi verilmir. Səbəb tenderlə bağlıdır. Bu işlər yekunlaşandan sonra məsələ həllini tapacaq. Bu, müvəqqəti çətinlikdir”.

Oxu.Az

Astarada Təngərüd meşəbəyliyinin 6 saylı meşə dolayında yerli Ekologiya idarəsinin əməkdaşları aqrobağ salmaq məqsədi ilə agacları məhv edirlər.

DİA.AZ AzToday.az-a istinadla xəbər verir ki, bu barədə “ecofront” məlumat yayıb. Məlumatda deyilir ki, meşədə aqrobağ salmaq məqsədilə 25-dən artıq iridiametrli ağacın (şabalıyarpaq palıd, cır xurma, vələs) gövdəsini halqavari kəsib və 10-15 ağacı deşib içərisinə kimyəvi məhlul tökərək onları məhv etməyi planlaşdırırlar. Həmin ağacların əksəriyyəti də “Qırmıza kitab”a düşüb.

Yerli sakinlər isə bildirir ki, işlərin başında Qurban adlı şəxs dayanır…

Baş verən cinayət hadisəsinin ictimailəşməsinə baxmayaraq, Ekologiya və Təbii Sərvətlər Nazirliyi hələlik heç bir tədbir görməyib. Əvəzində isə problemi ictimailəşdirən yerli sakinlərdən birinə inzibati qurumların təzyiqi başlayıb.

Təngərüd meşələrində baş verən cinayətin görüntülərini təqdim edirik:

videoya buradan baxın...My Webpage

Baş Prokuror yanında Korrupsiyaya Qarşı Mübarizə Baş İdarəsinin oktyabrın 4-də Lənkəran Şəhər İcra hakimiyyətində keçirdiyi əməliyyat bu rayonun icra başçısı Taleh Qaraşovu çətin vəziyyətdə qoyub.

Yenisabah.az xatırladır ki, vətəndaş müraciətləri əsasında həyata keçirilmiş əməliyyat-axtarış tədbirləri nəticəsində Lənkəran Rayon İcra Hakimiyyəti başçısı Aparatının Memarlıq və Tikinti şöbəsinin müdiri - baş memar Elgün Abdullayev xidməti vəzifəsinin icrası ilə bağlı vətəndaşlardan rüşvət alarkən cinayət başında yaxalanıb.

Aldığımız məlumata görə, Baş Prokurorluğun Lənkəranda keçirdiyi əməliyyat yalnız bu rayonda deyil, bütövlükdə cənub bölgəsində böyük ajiotaj doğurub. İcra başçısı kimi kariyerasına 1996-cı ildə Kürdəmir rayonunda başlayan, daha sonra Cəlilabad, Neftçala, və Astara rayonlarına rəhbərlik edən Taleh Qaraşov ölkənin ən stajlı icra başçılarından sayılır. Onun icra başçısı kimi fəaliyyət göstərdiyi 26 ilin son 10 ili Lənkəranla bağlıdır.

Azərbaycan Respublikası Prezidentinin 14 aprel 2012-ci il tarixli Sərəncamı ilə Lənkəran Şəhər İcra Hakimiyyətinin başçısı təyin olunan Qaraşov cənub bölgəsinin qeyri-rəsmi kuratoru sayılır. Oktyabrın 4-ə kimi cənublar onu “toxunulmaz” icra başçısı hesab edirdilər.

Lənkərandakı mənbələrdən aldığımız məlumata görə, ötən həftə bu rayonda keçirilən əməliyyat T. Qaraşovun kariyerası üçün ciddi problem yaradıb. Mənbə deyib ki, Baş Prokuror yanında Korrupsiyaya Qarşı Mübarizə Baş İdarəsi Lənkəran Şəhər İcra Hakimiyyətində əməliyyat keçirdiyi gün T.Qaraşov təcili Bakıya çağırılıb.

“Yen Sabah” Elgün Abdullayevin həbsi ilə bağlı maraqlı məlumat əldə edib. Xəbərə görə, Taleh Qaraşov əməkdaşının məhkəməyə çıxarılmadan azad edilməsinə çalışıb. O, bütün imkanlarını səfərbər etsə də, şöbə müdirinin azad edilməsinə nail ola bilməyib. T.Qaraşovun səylərinə baxmayaraq, Baş Prokurorluq 2 gün sonra - oktyabrın 6-da Lənkəran Şəhər İcra Hakimiyyətində keçirilən əməliyyatla bağlı rəsmi məlumat yayıb.

E. Abdullayevin qəfil həbsinin T.Qaraşov üçün ciddi problemlər yaratdığı bildirilir. Sabiq şöbə müdirinin istintaqa verdiyi ifadələrin yeni həbslər üçün zəmin yaradacağı güman edilir. //Yenisabah.az//

"Şahin Bağırov Dövlət Gömrük Komitəsinin rəhbərliyinə gələndən sonra demək olar ki, heç nə dəyişməyib. Yenə də köhnə qaydalardır. Sadəcə, dünənə qədər Səfər Mehdiyevin adamları pul yığırdısa, indi eyni işi Şahin Bağırovun adamları görür". DİA.AZ bildirir ki, bu barədə sahibkarlardan biri redaksiyamıza müraciətində qeyd edir. Hələ də gömrüklə "əməkdaşlığının" davam etdiyini və biznesindən ehttiyat etdiyini deyən sahibkar adının açıqlanmamasını xahiş edir.

"Qələm onların əlindədir. İstdəikləri vaxt problem yarada bilərlər. Mənim elə gücüm yoxdur ki, bunlarla davaya çıxım. Nə istəyirlər, quzu balası kimi verirəm. Ona gərə də sizə bildirirənm: "Dəyişiklik var" deyənlər yalan deyir..." deyə bildirən narazı sahibkar hətta Səfər Mehdiyevin dövründə vəziyyətin daha yaxşı olduğunu da dilə gətirir.

Xatırladaq ki, dia.az olaraq gömrükdəki vəziyyətin dəyişməz olduğ\u haqda keçən günlərdə də faktları təqdim etmişdik:

Səfər Mehdiyevin məşhur `RAMAL TRANS`ı yenə də İŞ BAŞINDADIR - İLGİNC FAKTLAR My Webpage

İndi isə etiraz edən narazı sahibkar hətta Səfər Mehdiyevin dövründə daha yaxşı vəziiyətin olduğunu bildirir:

"Səfər Mehiyevin dövründə artıq hər şey "relsə oturmuşdu". Kimə nə qədər verəcəyimizi yaxşı bilirdik. İndi təzə gələnin necə olacağını bilmədiyimzdən aradakıl dəllallar 5 manatlıq işi 15 manata görürlər. Guya, risq eləmirik təzəyə söz deməyə.... Amma təzəsi köhnsəindən betər yığır..."

İddia olunanlarla bağlı dia.az olaraq qarşı tərəfi də dinləməyə hazırıq...

“Broker” MMC-nin rəhbəri Əbülfəz Məlikov barəsində seçilmiş həbs-qətimkan tədbirinin uzadılması ilə bağlı istintaq orqanının təqdimatına baxılıb.

APA-nın əldə etdiyi xəbərə görə, Səbail Rayon Məhkəməsində keçirilən iclasda təqdimat təmin edilib.

Qərara əsasən, Əbülfəz Məlikovun həbs müddəti 2 ay uzadılıb.

Qeyd edək ki, şirkət rəhbəri Dövlət Təhlükəsizliyi Xidmətində Dövlət Gömrük Komitəsinin yüksək vəzifəli şəxsləri barəsində davam edən cinayət işi çərçivəsində saxlanılıb.

Əbülfəz Məlikov Cinayət Məcəlləsinin 209.3 (gömrük ödənişlərinin ödənilməsindən yayınma, xüsusilə külli miqdarda törətdikdə), 213.3 (vergiləri ödəməkdən yayınma - xüsusilə külli miqdarda törədildikdə) və 313 (vəzifə saxtakarlığı) maddələri ilə cinayət əməli törətməkdə şübhəli bilinir.

APA

Fövqəladə hallar naziri, general-polkovnik Kəmaləddin Heydərov qurumun Sənədlərlə və vətəndaşların müraciətləri ilə iş idarəsinin rəisini təqaüdə göndərib.

DİA.AZ bildirir ki, Qaynarinfo-nun əldə etdiyi məlumata görə, idarənin rəisi Mehriban Səadətxan öz istəyi ilə tutduğu vəzifəsindən azad olunaraq, təqaüdə çıxıb.
Ətraflı

Nazirin digər əmri ilə qurumun Sənədlərlə iş şöbəsi müdiri Nailə Mürsəliyeva vəzifəsindən azad olunaraq, Sənədlərlə və vətəndaşların müraciətləri ilə iş İdarəsinin rəisi vəzifəsinə təyin edilib.v