ATƏT-in Minsk Qrupunun sabiq həmsədri, ABŞ-ın Azərbaycandakı keçmiş səfiri Metyu Brayza Rusiya-Ukrayna müharibəsinin hər an dayana biləcəyini istisna etmir. Onun fikrincə, qərarı Rusiya prezidenti Vladimir Putin verəcək. Zamantv.az xəbər verir ki, hərbi əməliyyatların 30-cu günündə Bizim.Media-nın suallarını cavablandıran Metyu Brayza NATO-nun Ukraynaya gözlənilən dəstəyi göstərməməsini üçüncü dünya müharibəsini başlatmaq istəmədikləri ilə əlaqələndirib.

Bu gün Ukrayna torpaqlarında 30-cu gündür ki, müharibə davam edir. Rusiya Prezidenti cənab Putini yaxından tanıyan bir diplomat olaraq soruşmaq istərdik ki, bu müharibə hansı halda dayana bilər?

- Rusiya Ukraynanın işğalını istədiyi vaxt dayandıra bilər, çünki müharibəni qızışdıran və Ukraynanı işğal edən Rusiyadır. Ukrayna Rusiya üçün heç bir təhlükə yaratmırdı. Beləliklə, müharibəni nə vaxt dayandırmaq tamamilə prezident Putinin qərarlarından asılıdır. Yeri gəlmişkən, bu, ən azından hələlik Rusiyanın qətiyyən qazanmadığı və əksinə uduzduğu müharibədir.

- Cənab Brayza, NATO-nun Ukraynaya birbaşa dəstəyini hiss etmirik. Düzdür dolayı yollarla yardımlar edilir. Ötən gün reallaşan sammitdə də bunu gördük. Və ən önəmli sual, biz həqiqətən 3-cü dünya müharibəsini yaşayırıq?

- Prezident Putin NATO ərazisinə hücum etmək qərarına gələrsə, müharibə NATO ərazisinə yayıla və bəzi insanların dünya müharibəsi adlandırdığı müharibəyə çevrilə bilər. O, son bir neçə gündə Polşaya qarşı təhdidlər səsləndirib. NATO-nun cavabı isə tamamilə aydın oldu ki, NATO öz ərazisinin hər kvadratmetrini müdafiə edəcək. Bu da o deməkdir ki, təşkilat üzvü olan istənilən dövlətə hücum edən hər hansı Rusiya qüvvələri ilə döyüşəcək və onları məhv edəcək. Amma hələlik, sizin dediyiniz kimi, NATO-nun Ukraynaya dəstəyi birbaşa deyil. Bu dəstək həm xeyli sayda rus helikopterini sıradan çıxaran portativ hava hücumundan müdafiə sistemlərini, həm də ABŞ və Böyük Britaniya tərəfindən təmin edilən tank əleyhinə raket sistemləri kimi döyüş meydanında çox faydalı silahların təmin edilməsini əhatə edir. Hətta indi Almaniya da Ukraynaya bu cür yardım edir. Bu, tarixi bir dəyişiklikdir, çünki Almaniya heç vaxt öz ərazisindən kənardakı heç bir dövlətə hərbi yardım etməyib.

- Sizcə də ümidi NATO-ya olan bir ölkə üçün (Ukrayna – Red) qurum başqa addım ata bilməz?

-NATO Rusiyaya ən yaxın olan üzv ölkələrdə, yəni üç Baltikyanı dövlətdə, eləcə də Polşada daha çox NATO qüvvələri yerləşdirməklə Ukraynanı dəstəkləyir. Və dünən də elan edildiyi kimi, Rumıniya, Macarıstan Slovakiya və Bolqarıstanda yerləşdiriləcək dörd yeni döyüş qrupu yaradılacaq. Bununla da NATO təşkilatın Şərqi Avropadakı mövcudluğundan narahat olduğu üçün bu müharibəni başlatdığı iddia edilən Putinə böyük strateji zərbə vurur. Bu müharibə nə qədər uzun olsa, Putin NATO-nun hərbi mövcudluğunu getdikcə daha çox hiss edəcək. Lakin hələlik NATO açıq şəkildə bildirib ki, Ukraynada öz qoşunlarını yerləşdirmək istəmir, əksinə, Rusiya ilə birbaşa hərbi münaqişədən qaçmaq istəyir.

- Polşanın NATO sammitində sülhməramlılarla bağlı açıq təklifi var idi. NATO bunu edəcək?

- Bəli, NATO-nun Brüsseldə keçirilən sammitində Polşa tərəfi təklif edib ki, NATO və ya ən azı NATO-ya üzv dövlətlər Ukrayna daxilində sülhməramlı missiyada öz əsgərlərindən bir neçəsini yerləşdirsinlər. NATO-nun bunu təsdiqləyəcəyini düşünmürəm. Bu, Ukrayna prezidenti Zelenskinin davamlı olaraq irəli sürdüyü təklifə bənzəyən yeni bir təklifdir ki, bu da NATO-nun Ukrayna üzərində uçuşa qadağa zonası yaratması deməkdir, lakin hər iki halda, istər sülhməramlı qüvvə olsun, istərsə də uçuşa qadağa zonası, NATO və ya təşkilata üzv dövlətlər məsələyə qarışarsa, NATO-nu Rusiya ilə müharibədə görəcəyik. Bu isə bizi bunun Dünya Müharibəsinə səbəb olub-olmayacağı ilə bağlı sualınıza qaytarır.

- Ən önəmli məqam, Rusiyanın dünyanı hədələdiyi kimyəvi silah. Bu baş tuta bilər?

- Əgər prezident Putin özünün dediyi kimi "ənənəvi hərbi münaqişənin gərginliyini azaltmaq, qarşı tərəfi döyüşü dayandırmağa məcbur etmək" üçün Rusiyanın hərbi doktrinasının bir hissəsi kimi kimyəvi və ya nüvə silahlarından istifadə edərsə, məncə, biz NATO-nun baş katibi Stoltenberqin də dünən dediyi kimi tamamilə fərqli mənzərənin şahidi ola bilərik. Və bu, Rusiya üçün çox ciddi hərbi zərərə səbəb ola bilər.

Rusiyanın xaricdə fəaliyyət göstərən dövlət qurumlarını ictimai nüfuzdan salan və yalan məlumatlar yayanlar cinayət məsuliyyətinə cəlb ediləcək.

Zamantv.az xəbər verir ki, Rusiya Prezidenti Vladimir Putin bununla bağlı qanunu təsdiq edib.

Qanundan irəli gələn müddəaları pozanları 15 ilə qədər həbs gözləyir.

Rusiya ordusunun hərbi texnikasının çox hissəsini Ukrayna Silahlı Qüvvələri məhv edib, yardım və yerdəyişməni gözləmək üçün heç bir yer yoxdur.

Zamantv.az-ın Ukrayna KİV-nə istinadla məlumatına görə, Rusiya hərbçiləri Bryansk vilayətindəki təmir-bərpa bazasına getməyə qərar veriblər, lakin məlum olub ki, anbarlarda olan bütün avadanlıqlar oğurlanıb və ya praktiki olaraq sıradan çıxıb.

İddiaya görə, Rusiyada repressiya ilə üzləşəcəyindən çəkinən Rusiyanın 4-cü tank diviziyasının 13-cü tank alayının komandiri özünü güllələyib.
“Rusiyanın 4-cü tank diviziyasında 10 "yenidən işə salınan" tankdan yalnız birinin az və ya çox işlək vəziyyətdə olduğunu müəyyən ediblər. Qalanlar-tamamilə komplektləşdirilib. Bəzilərinin hətta mühərriki yoxdur. Bu texnikaların vəziyyəti əsasən son dərəcə qeyri-qənaətbəxşdir, bu da ondan tam istifadəni qeyri-mümkün edir”, - məlumatda bildirilir.

Kəşfiyyat məlumatlarına görə, döyüş maşınlarından tərkibində qiymətli metallar olan optik alətlər və elektronika tamamilə oğurlanıb.

Ukrayna Rusiya ordusunun hərbi itkilərini açıqlayıb.

Zamantv.az-ın məlumatına görə, bu barədə Ukrayna Silahlı Qüvvələri Baş Qərargahının "Facebook" səhifəsində bildirilib.

Fevralın 24-dən bu gün səhər saatlarına olan məlumat aşağıdakı kimidir:
Canlı qüvvə - 16400;

Tankı - 575;

Zirehli döyüş maşını - 1640;

Artilleriya sistemi - 293;

Reaktiv yaylım atəş sistemi - 91;

Hava hücumundan müdafiə sistemi - 51;

Hərbi təyyarə - 117;

Helikopter - 127 ;

Avtomobil texnikası - 1131;

Gəmi/kater - 7;

Yanacaq çəni - 73;

PUA - 56;

OTRK / TRK / mobil SRBM sistemi - 2;

Xüsusi texnika - 19.

Xersonda Rusiya işğalçıları azərbaycanlıları və Axısqa türklərini zorla deportasiya etməyə hazırlaşır. Onları Krıma köçürmək niyyətindədirlər.

Zamantv.az xəbər verir ki, bunu Ukrayna Baş nazirinin müavini, müvəqqəti işğal olunmuş ərazilərin reinteqrasiyası üzrə nazir İrina Vereşuk brifinqdə söyləyib.

“Əldə olan məlumata görə, işğalçılar nümayiş aksiyası planlaşdırıblar. Onlar Xersondan etnik erməniləri, azərbaycanlıları və Axısqa türklərini zorla Ukraynanın işğal olunmuş Krıma sürgün etməyə hazırlaşırlar”.

Kiyev rəsmisinin sözlərinə görə, bu addımlar cinayətdir.

Rusiyanın İtaliyadakı səfirliyi “La Stampa” qəzetini məhkəməyə verib.

Zamantv.az-ın “Le Matin” saytına istinadla xəbərinə görə, buna səbəb hərbi jurnalist Domeniko Kuirikonun Rusiya prezidenti ilə bağlı məqaləsi olub.

Ukraynadan söhbət açan məqalə müəllifi qeyd edib ki, hərbi müdaxilə istisnadır, diplomatik cəhdlər səmərəsizdir: "Çıxış yolu Çarı öz yaxınlarının əli ilə öldürməkdir. Bayden, NATO və Avropanın bir nömrəli planı budur: Moskvada kimsə Putini öldürsün və canımız bu ağır yükdən qurtarsın”.
Səfir Sergey Razov məqalənin jurnalistika prinsiplərindən uzaq olduğunu iddia edib.

Hərbçilərdən Rusiyada siyasi mənzərənin dəyişməsini gözləmək lazımdır. Oliqarxlara güvənməyin.

Zamantv.az xarici KİV-ə istinadla bildirir ki, bu barədə rusiyalı politoloq Andrey Piontkovski “Ukrayna 24” telekanalına danışıb.

“Mən hələ çevriliş əlamətləri görmürəm. Amma istənilən hərbi məğlubiyyət hər zaman hərbi çevriliş üçün ilkin şərtdir. Buna görə də son günlər Ukrayna ordusundan gördüyümüz ilk əks-uğurlar, əlbəttə ki, Moskvadakı hərbçilərin bir-birinə verdiyi sualların sayını artırır və bunu edə bilənlər. Əlbəttə ki, Ali Baş komanandan da soruşurlar. Axı biz yaxşı bilirik ki, Baş Qərargahın hərbi komandanlığı genişmiqyaslı hücuma qarşı idi. Ona görə də hərbçilərin “Biz sizə xəbərdarlıq etdik” arqumenti getdikcə daha inandırıcı səslənə bilər.
Ukrayna ordusunun hər yeni uğuru ilə belə bir çıxışın mümkünlüyü artır. Rusiya elitasında daxili dəyişiklikləri ancaq hərbçilər edə bilər.

Oliqarxlarla bağlı bütün axmaq hesablamalar tamamilə aciz insanlarındır. Bəziləri indi qaçır, qalanları tələsir”, - Piontkovski söyləyib

Ermənistanın Baş naziri Nikol Paşinyanın diplomatik münasibətlərin 30 illiyi münasibəti ilə Rusiyaya rəsmi səfəri aprelin ikinci ongünlüyünə planlaşdırılıb.

Zamantv.az-ın TASS-a istinadla xəbərinə görə, bunu Rusiya XİN-in sözçüsü Mariya Zaxarova bildirib.

Paşinyandan əvvəl Moskvaya Ermənistanın xarici işlər naziri Ararat Mirzoyan səfər edəcək.
“Ermənistanın Baş naziri Nikol Paşinyanın Rusiyaya rəsmi səfəri aprelin ikinci ongünlüyünə, xarici işlər naziri Ararat Mirzoyan işçi səfəri isə aprelin 8-nə nəzərdə tutulub” – deyə Zaxarova bildirib.

Ukraynadan gələn qaçqın axını səbəbindən İnterpol Moldovaya əməliyyat dəstəyi qrupu göndərib.
Zamantv.az-ın İnterpolun rəsmi saytına istinadla xəbərinə görə, dəstək qrupu paytaxt Kişinyovda və qaçqın düşərgələrində fəaliyyət göstərəcək.

Qrupun məqsədi Moldova polisinə və humanitar təşkilatlara dəstək verməkdir. Qrup üzvləri yerlərdə vəziyyəti qiymətləndirəcək, hazırlıq, təhlil və əməliyyat dəstəyi sahəsində ehtiyacları müəyyən edəcəklər. İnterpol bildirib ki, son həftələrdə Ukrayna sərhədlərinin qanunsuz keçilməsi və insan alveri ilə bağlı çox sayda məlumat daxil olub.

Avropa İttifaqı liderləri Ukraynada vəziyyətin daha da ağırlaşacağı təqdirdə Rusiyaya qarşı əlavə sanksiyaları müzakirə ediblər.

Zamantv.az-ın xəbərinə görə, bunu Fransa Prezidenti Emmanuel Makron Aİ-nin Brüsseldə keçirilən zirvə görüşünə dair mətbuat konfransında bildirib.

“Biz əlavə sanksiyalara hazırlıqlara başladıq. Biz vacib və koordinasiyalı iş gördük.Vəziyyət daha da pisləşəcəyi tədqdirdə sanksiyalar da hazır olacaq” - deyə Makron vurğulayıb.
Fransa lideri eyni zamanda Moskva ilə dialoq kanallarının açıq olmasının da vacibliyini qeyd edib.