Parisdə bu şəhər üçün spesifik olmayan qəza baş verib.

Zamantv.az-ın xəbərinə görə, körpünün üzərində manevr edən betonqarışdıran avtomobil Sena çayına düşüb.

Xilasedicilər 2 nəfəri sudan çıxara biliblər. Onlar xəstəxanaya yerləşdirilib. Avtomobili çıxarılması isə 5 saat vaxt aparıb.

Almaniyadan Ukraynaya 1500 “Strela” raketi, 100 MG3 pulemyotu və 8 milyon tapança gülləsi gətirilib.

Zamantv.az-ın xəbərinə görə, bu barədə DPA agentliyi Ukraynadakı mənbəyə istinadla məlumat yayıb.

Bundan başqa, Ukraynaya 350 min quru ərzaq payı və 50 nəqliyyat vasitəsi göndərilib.
Bir müddət əvvəl Almaniya vaxtilə ADR-in ordusunun inventarında olan 500 ədəd “Strela” raketini Ukraynaya vermişdi.

Fransa Prezidenti Emmanuel Makron Rusiyadan idxal edilən qazın dəyərinin dollarla ödənilməsinə qarşı çıxıb.

Zamantv.az-ın xəbərinə görə, Fransa lideri bildirib ki, bu yanaşma müqaviləyə ziddir.

“Rusiya qazının dəyəri müqavilədə göstərilmiş valyuta ilə ödənilməlidir. Söhbət avrodan gedir” – deyə Makron qeyd edib.
Dövlət başçısı eyni zamanda təbii qazın qiymətinin aşağı salınmasınında prioritet olduğunu vurğulayıb.

Məşhur aktyor Jan-Klod Van Damın bacısı Veronika van Varenberq sosial şəbəkədə Frederiklə tanış olduqdan sonra həyatı dəyişib.

Zamantv.az-ın Belga agentliyinə istinadla xəbərinə görə, bir müddət hər şey yaxşı getsə də, Veronika hiss edib ki, Frederiki yalnız pul və Jan-Klodun məşhurluğu maraqlandırır. Buna görə də münasibətlərə son qoymaq qərarına gəlib. Təbii ki, Frederik bununla razılaşmayıb.

2017-ci il martın 17-də Frederik əşyalarını götürmək üçün Veronika gilə gəlib. Mübahisə zamanı Frederik aktyorun bacısını oxlovla döyüb. Zərbənin gücündən oxlov sınıb, qadının üz-gözü qana bulaşıb. Frederik qadını həkimə gətirib.
Polisə ifadəsində yıxıldığını bildirən qadın evə gəldikdə 30 000 avronun yoxa çıxdığını görüb. Lakin qadın o vaxt sevgilisindən şikayət etməyib, bir il sonra məhkəməyə müraciət edib.

Ötən gün keçirilən hazırlıq iclasında Frederik iştirak etməyib. Onu 6 ilədək həbs gözləyir. Məhkəmə hökmünü aprelin 28-də elan edəcək.

Böyük Britaniyada yeni növ koronavirusa yoluxma sayında sıçrayışla artım qeydə alınıb.

Zamantv.az-ın Britaniyanın Milli Statistika Bürosuna istinadla məlumatına görə, həftə ərzində 4,3 milyon yoluxma qeydə alınıb. Halbuki, ilin ilk həftəsində yoluxma göstəricisi daha aşağı olub.

Ölkədə hər 16 nəfərdən birinin koronavirus yoluxduğu bildirilir. Sürətli yayılma Omikron ştamı ilə izah edilir. Bununla belə, ağırlaşma göstəricisi çox aşağıdır.
Ekspertlər məhdudiyyətlərin çox tez aradan qaldırılmasının da yoluxmaya təsir etdiyi qənaətindədirlər. Ümumdünya Səhiyyə Təşkilatı da Britaniyanı məhdudiyyət tədbirlərini kəskin şəkildə ləğv etdiyi üçün tənqid edib.

ABŞ prezidenti Co Bayden Polşaya səfəri zamanı ABŞ əsgərlərinin Ukraynaya gedəcəyini bildirib.

Zamantv.az xarici mediaya istinadla bildirir ki, aşağıdakı videoda dövlət başçısının ABŞ-ın 82-ci Hava Desant Diviziyasının hərbi qulluqçuları ilə necə danışdığını görə bilərsiniz. Bayden Ukraynadakı vəziyyətdən danışıb və əsgərlərə qəribə bir ifadə ilə müraciət edib. Deyib ki, ora çatanda özünüz görəcəksiniz.

Prezidentin sözlərinin birbaşa təfsiri o deməkdir ki, ABŞ qoşunları Ukraynaya göndəriləcək. Bununla belə, Bayden tez-tez ağzından söz qaçırır və bunu nəzərə almaq lazımdır.
ABŞ rəhbərinin bəyanatı ilə bağlı Ağ Evdən hələlik rəsmi açıqlama daxil olmayıb.

“Telegram” kanalında Rusiya Liberal Demokrat Partiyasının (LDPR) lideri Vladimir Jirinovskinin ölümü ilə bağlı məlumat dərc edən rusiyalı senator Aleksandr Pronyuşkin postu silib və abunəçilərindən üzr istəyib.

Aleksandr Pronyuşkin etiraf edib ki, o, öz səhifəsində Vladimir Jirinovski haqqında yoxlanılmamış məlumatlar dərc edib.

Senator həmçinin bildirib ki, məlumatın səhifəsində yayılmasında əli olanların hamısı məsuliyyətə cəlb olunacaq.

Yeri gəlmişkən qeyd edək ki, Federasiya Şurasında Vladimir vilayətinin qubernatorunu təmsil edən Aleksandr Pronyuşkin vaxtından əvvəl istefa verə bilər. Belə ki, LDPR Ali Şurası növbəti iclasında Pronyuşkinin məsələsini müzakirə edəcək.

Üstəlik Dövlət Dumasının spikeri Vyaçeslav Volodin də A.Pronyuşkinə vəzifəsini tərk etməyi məsləhət bilib.

Fransada prezidentliyinə namizəd Erik Zemmurun paytaxt Parisin şimalında narkomanların tez-tez toplaşdığı Porte-de-lya-Villet parkına səfəri zamanı ona içərisində su olan butulka atılıb.

Erik Zemmur CNews telekanalının “Morandini” adlı canlı proqramında olub. Proqram canlı yayımlanır və prezidentliyə namizədlərin Fransaya səfərlərini izləyir.

Belə ki, Zemmur izdihamın arasında olarkən ətrafdakı sakinlərdən biri ilə söhbət edib. Bu zaman ona tərəf hansısa əşya atılıb. Zemmur baş verənlərə “Görürsən, bura Parisdir, bu gün Fransa belədir” deyib.

Proqramın aparıcısının daha sonra dediyi kimi, bu, içərisində su olan butulka olub. Parisin polis prefekturasından bildirilib ki, Zemmura butulka atan şəxs saxlanılıb.

Ukraynanın Xarkov vilayətində insanların toplaşdığı əraziyə raket düşməsinin görüntüləri yayılıb. Bildirilir ki, sakinlər humanitar yardım növbəsində olublar.

Hadisə nəticəsində altı nəfər həlak olub, 15 nəfər xəstəxanaya yerləşdirilib.

Qeyd edək ki, hadisə martın 24-də baş verib, ancaq kadrlar bu gün yayılıb.

Ukraynada xüsusi əməliyyat zamanı 1351 rusiyalı hərbçi həlak olub.

Bu barədə RF Müdafiə Nazirliyi məlumat yayıb.

“Təəssüf ki, xüsusi hərbi əməliyyat zamanı döyüş yoldaşlarımız arasında itkilər var. Bu günə kimi 1351 hərbçi həlak olub, 3825 nəfəri yaralanıb”, - deyə Rusiya Silahlı Qüvvələri Baş Qərargah rəisinin birinci müavini general-polkovnik Sergey Rudskoy bildirib.

Qeyd edək ki, fevralın 24-də Rusiya Prezidenti Vladimir Putin Ukraynada genişmiqyaslı hərbi əməliyyatların başlandığını elan edib.

Mənbə: TASS