Vatsap messencerinin tərtibatçıları böyük qrupların üzvlərinə zəng etmədən səsli söhbətə başlamağa imkan verəcək funksiyanı sınaqdan keçirməyə başlayıblar.

Yeni funksiyanı “WABetaInfo” portalı elan edib.

“Səsli çatlar 32-dən çox üzvü olan qruplarda mövcud olacaq. Bu halda yeni səs dalğası simvolu görünəcək. Bununla belə, 32-dən çox istifadəçi çatlara qoşula bilməyəcək”, – nəşrdə deyilir.

Vatsap messencerin 2.23.16.19 versiyasını yüklədikdən sonra “Android” mobil əməliyyat sisteminə əsaslanan smartfonlar üçün bu funksiyanı indi tətbiq edir.

Səsli çatların əsas üstünlüyü ondan ibarətdir ki, onlar sizə hər bir qrup üzvünün smartfonuna zəng etmədən başqasına zəng etməyə imkan verir. Bunun əvəzinə yeni səsli söhbət yaradıldıqda qrup üzvlərinə bildiriş göndəriləcək.

Xəbər verdiyimiz kimi, Prezident İlham Əliyev avqustun 7-də Qazax rayonuna səfər edib.

Dövlət başçısının səfərindən videonu təqdim edirik:

17 yaşadək həndbolçu qızların Avropa çempionatında qrup mərhələsində Azərbaycan millisi biabırçı hesabla uduzub.

“Qafqazinfo” xəbər verir ki, millimiz Sloveniyaya 6-58 hesabı ilə məğlub olub.

Qeyd edək ki, Avropa çempionatı Bakıda keçirilir.

Yevlax rayonu Qoyunbinəsi kəndində torpaq qalmaqalı davam edir. Kəndin keçmiş bələdiyyə sədri Qabil Məmmədov Qarabağ qazisi Azər Səfərov və onun ailə üzvlərinə məxsus pay torpağı zəbt etməsi barədə deyilənlərin əsassız olduğunu bildirir.

Məlumat üçün deyək ki, Azər Səfərov Qaynarinfo-ya torpaq sahəsinin Qabil Məmmədov tərəfindən qanunsuz zəbt edildiyini bildirmişdi. Azər Səfərov həmçinin Qabil Məmmədovla övladları tərəfindən təhdidlərə məruz qaldığını iddia etmişdi.

Keçmiş bələdiyyə sədri isə Qaynarinfo-ya açıqlamasında bildirib ki, Azər Səfərov ona və övladlarına böhtan atır. Qabil Məmmədovun sözlərinə görə, 1995-ci ildə "Avdılar” Kəndli Fermer Təsərrüfatına (KFT) 50 ha torpaq sahəsi ayrılıb. Bunu təsdiq edən hüquqi sənədlər, o cümlədən dövlət aktı mülkiyyətçiyə verilib. KFT tərəfindən 1999 və 2005-ci il tarixli yenidən alınmış Dövlət Aktlarında da həmin 50 ha torpaq sahəsinin təsərrüfatın mülkiyyətində olması təsdiqini tapıb:

"Təsərrüfat yaradılanda onun rəhbəri atam Məmmədov Süleyman Avdı oğlu olub. O, 1999-cu il 17 mart tarixində rəhmətə getdikdən sonra həmin təsərrüfatın rəhbərliyinə qardaşım Məmmədov Tofiq Süleyman oğlu keçib. 2016-cı il 25 aprel tarixində qardaşım Tofiq Məmmədov vəfat edib. 2021-ci ildən isə mən təsərrüfata rəhbərlik etməyə başlamışam. Haqqında bəhs edilən torpaq sahəsi 1995-ci ildən təsərrüfatın mülkiyyətində və faktiki istifadəsində olub, 28 il ərzində Azər Səfərov və onun ailə üzvləri torpağa dair hər hansı iddia irəli sürməyiblər. 2022-ci ildə Azər Səfərov tərəfindən mənə qarşı iddia qaldırılıb və təsərrüfatın mülkiyyətində olan torpaq sahəsindən təqribən 6 hektar torpaq sahəsinin onlara məxsus olması iddia edilib. Təsərrüfat tərəfindən aidiyyəti orqanlara sorğu verildikdən sonra məlum olub ki, 1998-ci ildə həmin torpaq sahəsindən 6.06 ha "Avdılar” Kəndli Fermer Təsərrüfatına məlum olmadan Səfərov Saleh Allahverdi oğlu, Səfərov Azər Saleh oğlu, Səfərov Ceyhun Saleh oğlu, Səfərova Xatirə Musa qızı və Səfərova Samirə Saleh qızının adına rəsmiləşdirilib. Bundan sonra rəhbərlik etdiyim təsərrüfat KFT tərəfindən Yevlax Aqrar İslahat Komissiyasının bu barədə qərarı və Azər Səfərov, onun ailə üzvlərinin adına verilmiş dövlət aktı Şəki İnzibati Məhkəməsində mübahisələndirilib. KFT-nin iddiası 1-ci instansiya məhkəməsi tərəfindən qismən təmin edilib. Qərardan narazı qalan Azər Səfərov artıq apelyasiya şikayəti verib”.

Qabil Məmmədov əlavə edib ki, qanunvericilik kolxoz, sovxoz torpaqlarının mülkiyyətçisi ola bilən əhali kateqoriyasını müəyyən edib. Azər Səfərov isə bu kateqoriyaya aid deyl:

"Xüsusilə vurğulamaq istərdim ki, Azər Səfərov və iş üzrə digər cavabdehlər onlara torpaq sahəsi ayrılması barədə qərarı belə ortaya çıxara bilmədilər. Göründüyü kimi, məhz elə Azər Səfərovun özünün və ailə üzvlərinin iddiası tamamilə qanunsuzdur. Sadəcə qanuni əsaslarla məhkəmədə əleyhinə qərar çıxarıldığından məqsədi ara qarışdırmaq olan Azər Səfərov bununla bizi və məhkəmələri qorxutmaq istəyir.
Diqqətinizə təqdim etmək istərdik ki, 16 iyul 1996-cı il tarixli, № 155-IQ nömrəli "Torpaq İslahatı haqqında" Azərbaycan Respublikasının Qanununun 12-ci maddəsinə əsasən sovxoz və kolxozların torpaqlarından pay almaq hüququ olan subyektlər müəyyən edilib. Sovxoz və kolxozlarda daimi işləyən şəxslər, bu Qanun qüvvəyə mindiyi günədək daimi yaşayış yeri sovxozun və kolxozun ərazisində olan şəxslər, sovxoz və kolxozlardan təqaüdə çıxmış və müvafiq rayonun (şəhərin) ərazisində yaşayan şəxslər, sovxozun və ya kolxozun ərazisindən həqiqi müddətli hərbi qulluğa çağırılmış və müvəqqəti qaib olmuş şəxslər, bu Qanun qüvvəyə mindiyi günədək sovxozun və ya kolxozun ərazisində yaradılmış və təyinatına uyğun fəaliyyət göstərən təsərrüfatlararası müəssisələrin, kooperativlərin, kiçik müəssisələrin, kəndli (fermer) təsərrüfatlarının və digər kənd təsərrüfatı istehsalı müəssisələrinin təsisçiləri və əsas iş yeri həmin müəs-sisələr olan şəxslər bu subyektlər dairəsinə aiddirlər. Azər Səfərov və onların ailə üzvləri bunların hər hansı birinə aid olmalarını sübut edə bilmədilərsə, hansı səbəbdən torpaq iddiasındadırlar”.

Qabil Məmmədov özü və övladları Azər Səfərovun evinə basqın etməsi barədə iddiaya da toxunub. Keçmiş bələdiyyə sədri deyib ki, Azər Səfərov onun baldızı oğludur. Onun yaşadığı ev isə həyat yoldaşının ata evidir. Qabil Məmmədovun sözlərinə görə, evə basqından söhbət gedə bilməz. Sadəcə qayınatasının il mərasimini vermək üçün həmin ünvana gediblər:

"Heç bir insident yaşanmayıb. Əgər həqiqətən də həmin yaşayış sahəsinə hər hansı basqın olmuşdursa və ya A.Səfərovun ailə üzvlərinə təhqiramiz sözlər işlədilmişdirsə və yaxud A.Səfərovun ərizədə göstərdiyi digər hallar baş vermişdisə, o zaman hüquq-mühafizə orqanlarına nə üçün şikayət edilməmişdir?”.

Bundan başqa, məlum olub ki, Azər Səfərov Qabil Məmmədovun oğlu Rahil Süleymanzadə tərəfindən məhkəməyə verilib. Səbəb isə Azər Səfərovun Rahil Süleymanzadəyə böhtan atması olub. Yevlax rayon Məhkəməsi iddia ərizəsini təmin edib:

"Həmin iş üzrə Azərbaycan Respublikasının Ali Məhkəməsi qərarda qismən dəyişiklik etməklə (mənəvi zərər məbləğində) qüvvədə saxlayıb. Yevlax rayon İcra və Probasiya Xidməti tərəfindən qərar icra olunub. 31 avqust 2022-ci il tarixdə Azər Səfərov oğlum Rahil Süleymanzadə barəsində yaydığı həqiqətə uyğun olmayan məlumatların yalan olduğunu Komitəyə ərizə yazaraq təkzib edib”.

Keçmiş bələdiyyə sədri Azər Səfərovun qazi adı daşımasını da şübhə altına alıb. Qabil Məmmədov bildirib ki, 1994-ci ildə Azər Səfərov hərbi xidmətə yararsız kimi qeydiyyata düşüb:

"Daha sonra müvafiq olaraq 1997, 2000, 2004 və 2007-ci illərdə təkrar "tibbi komissiyadan” keçməklə hərbi xidmətdən yayınıb. Hansı ki, 1994-cü ildən Azər Səfərov Rusiya Federasiyasına qaçaraq ölkədən gedib. Atası Yevlax şəhər xəstəxanasının baş həkim olduğu dövrdə Hərbi Həkim Komissiyasına təziq etməklə, oğluna "Kontuziya” diaqnozu yazdırmaqa hərbi xidmətdən yayınmasına şərait yaradıb".

Sonda qeyd edək ki, Qabil Məmmədov söylədiyi fikirləri təsdiq edən sənədləri də redaksiyaya təqdim edib.

Son günlər etimadsızlıq baxımından ilk sırada dayanan Mənzil İnşaatı Dövlət Agentliyi (MİDA) ilə bağlı nəhayət ki, konkret tədbir görülə bilər. Bu barədə DİA.AZ-a hökumətdəki mötəbər mənbə informasiya verib.

Xəbəri verən qaynaq iddia edir ki, yazın günlərdə sözügedən Agentlikdə total yoxlama işləri həyata keçiriləcək:

"Söhbət təkcə elektron sistemin yox, kadrların da təftişindən gedir. Real nəticələr və cəzalandırmalar qaçılmazdır".

Əlavə bilgilərimiz olacaq. İddia ilə bağlı olaraq qarşı tərəfi də dinləməyə hazırıq..

Baş Prokuror yanında Korrupsiyaya qarşı Mübarizə Baş İdarəsinin Tərtər rayon İcra Hakimiyyətində keçirdiyi əməliyyatdan sonra aparılan istintaq hərəkətləri bu rayonun icra başçısı Müstəqim Məmmədovun cinayət məsuliyyətinə cəlb olunması ilə nəticələnəcək.
Bir neçə gün əvvəl rayonda keçirilən əməliyyatda həbs edilən Tərtər rayon İcra Hakimiyyətinin Memarlıq və Tikinti Şöbəsinin müdiri – baş memar Tofiq Kərimov istintaqa ilkin ifadəsində icra başçısının əleyhinə ifadə verib. Bu isə icra başçısı Müstəqim Məmmədovun həbs edilməsi üçün ciddi əsas yaradıb. Xatırladaq ki, Baş Prokurorluğun açıqlamasında Tofiq Kərimovun yerli vətəndaşdan tikintiyə icazə üçün 25 min manat pul aldığı bildirilir. Onun bu vəsaiti icra başçısına verdiyi deyilir. Əldə etdiyimiz məlumatda o da bildirilir ki, Müstəqim Məmmədov artıq özünə vəkil də tutub. Onun bu həftə ərzində istintaqa çağırılacağı gözlənilir.

Mövzu ilə bağlı “Sherg.az”a açıqlama verən Azərbaycanda Vətəndaş Cəmiyyətinin İnkişafına Yardım Assosiasiyasının (AVCİYA) vitse-prezidenti, Azərbaycan Turizm və Menecment Universitetinin professoru Məhərrəm Zülfüqarlı bildirib ki, bu problem demək olar ki, əksər şəhərlərdə, rayonlarda mövcuddur:

"Vətəndaşların əksər hissəsi belə problemlərlə üzləşirlər. Qanunda belə bir maddə var ki, 12 metr yüksəkliyinə qədər icazə olmadan insanlar ev tikə bilərlər. İkinci maddədə göstərilir ki, amma evin layihəsi memarlıq idarəsi ilə razılaşdırılmalıdır. Bu ikinci maddə rüşvət üçün şərait yaradır. Bu qanunda deyilir ki, ev üçün mütləq şəkildə memarlıq idarəsi ilə razılaşdırılma olmalıdır. Memarlar proyekti təsdiq etmək üçün rüşvət tələb edirlər ".

M.Zülfüqarlı vurğulayıb ki, ümumiyyətlə icra başçıları ilə bağlı bəzi islahatlar keçirilməlidir. Əksər bölgələrimizdəki icra başçıları özlərini doğrultmurlar. Bunların əsas işi büdcəni mənimsəməkdir. Korrupsiyaya qarşı mübarizə aparmaq üçün onu doğuran səbəbləri aradan qaldırmaq lazımdır.

"Yerlərdə bələdiyyələrin səlahiyyətləri artırılmalıdır, onlara böyük səlahiyyətlər verilməlidir. Həm Prezidentin təyin etdiyi icra başçılar, həm də xalqın seçdiyi bələdiyyələr birgə şəkildə cavabdeh olduqları ərazinin inkişafı üçün çalışmalıdırlar. Əlbəttə belə olan zaman xalq tərəfindən seçilmiş bələdiyyə daha effektiv şəkildə xalqa xidmət edəcək. Məsələn, qardaş Türkiyədə olduğu kimi. Amma bələdiyyələrin səlahiyyətlərinin artırılmasına icra başçıları imkan vermirlər. Bələdiyyələr icra hakimiyyətinin kiçik bir şöbəsinə çevirilmiş olurlar. Bələdiyyələrin müstəqilliyi bərpa olunmalıdır. Müstəqil qrum kimi səlahiyyətləri artırılmalıdır. Bu müstəqillik bərpa olunarsa indiki nöqsanların əksəriyyəti aradan qalxa bilər. Çünkü belə olduğu zaman həm icra hakimiyyətinə yerli nəzarət təmin ediləcək, həm də onlara alternativ struktur fəaliyyət göstərmiş olacaq. Xalq da daha çox işləyən struktura üstünlük verəcək".

“Sherg.az”

Xətai rayonu, Sarayeva küçəsi, ev 3, mənzil 49-da yaşayan Ələkbərov Əsgərxan Bəhrəm oğlu tərəfindən “Hürriyyət”in redaksiyasına şikayət məktubu daxil olub. Şikayətçi yaşadığı ünvanda liftin işləməməsindən narazıdır. Onun məktubunu olduğu kimi dərc edirik:

"Mən, Ələkbərov Əsgərxan Bəhrəm oğlu, yazaraq sizdən xahiş edirəm ki, problemimi işıqlandırasınız.

Mənim 86 yaşım var, 51 il fasiləsiz işləmişəm. Əmək veteranıyam. Dincəlib, istirahət etməli olduğum vaxtda evdən çölə çıxmaqda çətinlik çəkirəm.

Binanın problemləri çoxdur, mən ən vacibini sizlərə bildirirəm. Binadakı lift köhnədir, bu səbəbdən də 2 gündən bir qırılır. Usta gah deyir "tros", gah da deyir "motor" xarab olub.

Hər ay lift üçün 2 manat 50 qəpikdən pul yığıb veririk ki, lift xarab olmasın, amma mümkün deyil. Ay ərzində 3-4 dəfə xarab olduğuna görə əlavə pul yığılır ki, yenidən təmir olunsun.

Binada mənim kimi yaşlı insanlar çoxdur. Biz istirahət etmək, hava almaq istəyirik. Lakin məlum səbəblərə görə məhrum olmuşuq. Bizdə olan məlumata görə, lift ustası Namiq müəllimin ürəyi xəstədir, işləyə bilmir. 13 gün səhhətinə görə işdə olmayıb. Sizin sayt vasitəsilə xahiş edirəm ki, bizə sağlam usta versinlər".

Redaksiyadan: Qarşı tərəfin mövqeyini dərc etməyə hazırıq.

"Bakı Metropoliteni" Qapalı Səhmdar Cəmiyyətinin rəhbərliyində kadr dəyişikliləri ediləcəyi deyilir.

DİA.AZ bildirir ki, Qaynarinfo-nun əldə etdiyi məlumata görə, 2014-cü ildən "Bakı Metropoliteni" QSC-nin sədri olan Zaur Hüseynovun vəzifəsindən azad olunacağı bildirilir.

Artıq sədrin yerinə namizəd də müəyyənləşib. Hələlik onun adı açıqlanmır.

Qeyd edək ki, "Bakı Metropoliteni"ndə yüksək vəzifələrdə çalışanların əksəriyyəti Zaur Hüseynova yaxınlıqları ilə seçilən keçmiş iş yoldaşları, dostları və tanışlarıdır. Bu da ciddi narazılıqlara səbəb olub.

Xatırladaq ki, nəqliyyat, rabitə və yüksək texnologiyalar naziri Rəşad Nəbiyev 2023-cü il aprelin 26-da Prezidenti Sərəncamı ilə "Bakı Metropoliteni” Qapalı Səhmdar Cəmiyyətinin Müşahidə Şurasının sədri təyin edilib.

TƏBİB-in tabeliyindəki “Yeni Klinika” tibb müəssisəsində ötən ay rəhbərliyin dəyişməsi xəbəri hər kəsə yaxşı məlumdur. Bu dəyişiklikdən sonra ölkənin ən böyük səhiyyə ocağında baş verən proseslər isə heç də ürəkaçan deyil. Xüsusən hazırda klinikada çalışan ayrı-ayrı işçilərin kütləvi şəkildə işdən kənarlaşdırılması personal arasında böyük narazılıq yaradıb.

DİA.AZ bildirir ki, KONKRET.az-ın əldə etdiyi məlumata görə, bir ay ərzində mərkəzin Daxili Mühafizə Xidmətinin rəisi də başda olmaqla, 10-a yaxın əməkdaş işdən çıxarılıb. Belə ki, Barat Yusubov klinikanın yeni direktoru təyin edildikdən sonra əksəriyyəti qazi və veteranlardan ibarət olan mühafizəçilər öz ərizələri ilə işdən ayrılıblar.

Onların işdənçıxma səbəbləri isə sözün əsl mənasında cəmiyyətdə şok effekti yarada bilər. Məsələn, klinikanın təhlükəsizlik xidməti şöbəsinin müdiri, polkovnik-leytenant Coşqun Məmmədov TƏBİB-in icraçı direktoru Vüqar Qurbanovun xüdməti maşınının qapısını açmadığına görə Barat Yusubovun qəzəbinə tuş gəlib. Bu, o Coşqun Məmmədovdur ki, 44 günlük Vətən müharibəsindəki xidmətlərinə görə müxtəlif orden və medallarla təltif edilib.

Medalların siyahısı:

– Vətənə xidmətə görə 3-cü dərəcəli orden;

– Fizulinin azad edilməsi medalı;

– Cəbrayılın azad edilməsi medaıl;

– Xocavəndin azad edilməsi medalı;

– Vətən müharibəsi iştirakçısı medalı;

– Silahlı Qüvvələr veteranı Medalı;

– Qüsursuz xidmətə görə 3-cü dərəcəli medalı;

– Qüsursuz xidmətə görə 2-ci dərəcəli medalı;

– Silahlı Qüvvələrin yaranmasının 10 illiyi medalı;

– Silahlı Qüvvələrin yaranmasının 90 illiyi medalı;

– Silahlı Qüvvələrin yaranmasının 95 iliyyi medalı;

– Silahlı Qüvvələrin yaranmasının 100 illiyi medalı.

Xatırladaq ki, C.Məmmədov Zəfər paradında öndə gedən hərbi maşında bayrağımızı aparan hərbçilərimizdən biridir.

Beləliklə, əməkdaşımız qazi C.Məmmədovla bağlı yayılan məlumatları dəqiqləşdirmək üçün onunla əlaqə saxlayıb. Klinikanın Daxili Mühafizə Xidmətinin keçmiş şöbə müdiri faktı təsdiqləyib:

“Mən 2022-ci ilin avqust ayının 22-də “Yeni Klinika”da bu vəzifəyə təyin olunmuşdum. Özüm ehtiyatda olan polkovnik-leytenantam. 27 ildir Silahlı Qüvvələrdə xidmət etmişəm. Vətən müharibəsində Füzuli, Cəbrayıl, Xocavənd rayonlarının işğaldan azad edilməsində iştirak etmişəm. Xocavənd uğrunda gedən döyüşlərdə yaralanmışam. Müalicəmi alandan sonra yenidən döyüşlərə qayıtmışam. Kapitulyasiya aktı imzalana qədər və ondan sonra da xüdmətimi davam etdirmişəm. 2022-ci ilin fevral ayında isə xəstəliyimlə əlaqədar ehtiyata buraxılmışam.

Məndən başqa həmin klinikada mühafizə xidmətində qazi və veteranlardan ibarət 16 nəfər heyət də çalışıb. Həmin şəxslər cənab prezidentin tapşırığına əsasən klinikanın sabiq rəhbəri Cavid Paşayevin göstərişi ilə işlə təmin olunmuşdu.

Lakin Barat Yusubov yeni rəhbər təyin ediləndən bir neçə gün sonra xəstəxananın bir çox şöbələrində ard-arda işdənçıxarmalar baş verdi. Və mən də belə demək olarsa, öz növbəmi gözləyirdim…

Günlərin birində TƏBİB-in icraçı direktoru Vüqar Qurbanov klinikaya gələndə Barat həkim mənə onun maşınının qapısını açmaq göstərişi verdi. Sonra isə təkid etdi. Təbii ki, mən bunu qəbul edə bilməzdim. Çünki ehtiyatda olan zabit kimi qürurum, mənliyim buna yol verməzdi. Mənim vəzifəm klinikada kiməsə qapı açmaq deyildi. O vəzifəyə təhlükəsizlik şöbəsinin müdiri kimi klinikada həm pasiyentlərin, həm də işçilərin təhlükəsizliyini təmin etmək məqsədilə təyin olunmuşdum və görəcəyim işlər haqqında da təlimatım var idi.

Həmin hadisədən sonra rəhbərliyin məni başqa variantlarla çirgindirməməsi, yaxud da alçaltmaması üçün iyulun 26-da özüm işdən çıxmaq haqqında ərizəmi yazdım. Ərizəm də həmən qəbul olundu. Amma ən azından şöbə müdiri olaraq işdən çıxmaq səbəbim öyrənilməliydi. Ancaq öyrənilmədi, əksinə, bu addımım onlar üçün sanki göydəndüşmə oldu”.

C.Məmmədov qısa müddət ərzində mühafizə xidmətinin 10 əməkdaşının öz ərizəsi ilə işdən kənarlaşdırıldığı faktını da təsdiqləyib.

Əldə etdiyimiz digər bir məlumata görə, işdən çıxarılan başqa bir zabit əməkdaş – Vətən müharibəsi qazisi də yeni direktor tərəfindən gördüyü hörmətsizlik ucbatından öz vəzifəsindən imtina edib. Belə ki, qarşısında durduğu liftin düyməsini həmin əməkdaşa basmağı əmr edən direktorun bu xoşagəlməz hərəkəti sonda işçinin istefasına səbəb olub.

Səsləndirilən iddialarla bağlı qarşı tərəfin də mövqeyini işıqlandırmağa hazırıq.

"Azərbaycan Elmi Tədqiqat Travmatologiya və Ortopediya İnstitutu" Publik Hüquqi Şəxsin direktoru məhkəməyə verilib.
DİA.AZ Faktinfo.az-a istinadla xəbər verir ki , məhkəməyə müraciət edənlər 13 ildir Elmi-Tədqiqat Travmatologiya və Ortopediya İnstitutunda tibb bacısı kimi çalışan Mikayılova Lalə Ayaz qızı və bacısı Bayramova Jalə Ayaz qızıdır.

Belə ki, Lalə Mikayılova may ayının 13-də gecə növbəsindən çıxıb, növbəni təhvil verərkən İnstitutun rəhbərliyi tərəfindən onun dolabında axtarış aparılıb.Qərara gəlinib ki, tibb bacısı özünə məxsus dolabda lazımsız tibbi preparatlar və dərmanlar saxlayır. Bunu əsas götürərək direktor Mikayılova Laləyə töhmət verib,onu “Travma” şöbəsinin gecə növbəsindən, “Ortopediya” şöbəsinin gündüz növbəsinə keçirdib.

Eynilə 10 ilə yaxın həmin İnstitutda işləyən şikayətçinin doğma bacısı Bayramova Jalə Ayaz qızını da institut rəhbərliyi gecədən gündüz növbəsinə keçirib. Şikayətçi bacılar barələrində atılan bu addımın şəxsi prinsipdən qaynaqlandığını iddia ediblər.

Qeyd edək ki, bacılar Elmi-Tədqiqat Travmatologiya və Ortopediya İnstitutunun direktoru Şahin Əkbərovdan narazıdırlar.

Onu da qeyd edək ki,narazılıq iki şəxslə yekunlaşmır digər bir neçə şəxs də,direktor Şahin Əkbərovdan digər dövlət orqanlarına şikayət edib.