Göyçay rayonunda gənc oğlan bədbəxt hadisə nəticəsində dünyasını dəyişib.

APA-nın yerli bürosunun xəbərinə görə, Zaqatala rayon sakini, Göyçay Dövlət İdarəetmə və Texnologiya Kollecinin tələbəsi, 2001-ci il təvəllüdlü Soltanov Səxavət Nemət oğlu bu gün Göyçay şəhərində kirayə qaldığı mənzildə dəm qazından zəhərlənərək ölüb.

Onun meyiti Respublika Məhkəmə Tibbi Ekspertiza və Pataloji Anatomiya Birliyinin Göyçay rayon şöbəsinə aparılıb. Hazırda rayonun hüquq-mühafizə orqanlarının əməkdaşları hadisə yerindədir.
Faktla bağlı Göyçay rayon Prokurorluğu tərəfindən araşdırma aparılır.

Odessada öldürülən azərbaycanlıların kimliyi məlum olub.

Zamantv.az-ın xəbərinə görə, maşın karvanının atəşə tutulması nəticəsində ölən İsmayılov Qabil, İsmayılov Nemət, İsmayılov Rəhimdir.

Öldürülənlər bir ailənin üzvləridir.
Odessada yaşayan və Azərbaycana qayıtmaq istəyən 3 azərbaycanlı öldürülüb.

Bu barədə Zamantv.az-a bu şəhərdə yaşayan həmyerlilərimiz məlumat veriblər. Məlumata görə, 5 nəfər də yaralanıb.

Onların hamısı əslən Kəlbəcərdəndilər.

Hadisə Мoldovayla sərhəddə Kuçurqan keçid məntəqəsi yaxınlığında baş verib. Onların diversantlar tərəfindən öldürüldüyü deyilir.
Odessa şəhərini tərk etmək istəyən həmvətənlərimizin maşın karvanı diversiya qrupu tərəfindən atəşə tutulub.

Odessada yaşayan soydaşlarımızın APA-nın Kiyevdəki xüsusi müxbirinə verdiyi məlumata görə, hadisə ötən gecə olub.

Sərhəd qoşunlarının formasında diversiya qrupu olduğu ehtimal olunan silahlılar tərəfindən həmvətənlərimizin olduğu 8 avtomobildən ibarət maşın karvanı atəşə tutulub.

Maşın karvanının atəşə tutulması nəticəsində 3 soydaşımız dünyasını dəyişib.

Ukraynadan Moldova sərhədinə keçən 160 nəfər azərbaycanlı martın 1-də Azərbaycanda olacaq.

Bu barədə APA-ya açıqlamasında Ukraynada işləyən azərbaycanlı Emin Xəlilov deyib.

O bildirib ki, hazırda sərhədi keçən azərbaycanlılar Azərbaycanın Moldova səfirliyindədirlər: “Biz 113 nəfər Ukraynada işləyən azərbaycanlılar və 20 nəfərə yaxın bizim əməkdaşların ailə üzvləri Ukrayna sərhədini keçib Moldovaya gəlmişik. Bizə Azərbaycanın Ukraynadakı səfirliyindən də kömək etdilər, burada yerləşməyimizə də səfirlik kömək göstərib. Azərbaycanın Moldovadakı səfiri Qüdsi Osmanov bizi qəbul edib. Bizim Rumıniyaya keçməyimiz üçün də Azərbaycanın Moldovadakı səfirliyi lazımi addımları atır. Mart ayının 1-i Azərbaycana uçuşumuz gözlənilir”.
E. Xəlilov qeyd edib ki, onlar üçün 160 nəfər tutumlu təyyarə ayrılıb: “Həmin təyyarəyə əlavə 30 nəfər qadın və uşaq da götürüləcək. Bununla bağlı Səfir Qüdsi Osmanovla da danışdıq. Hazırda səfirlik tərəfindən bu məsələ ilə məşğul olurlar. Təyyarə tam dolu şəkildə Azərbaycana gələcək. Bizdən əlavə də də Moldovadakı səfirliyimizə Ukrayna sərhədini keçib gələn azərbaycanlılar var, onlara da səfirlik tərəfindən kömək göstərilir. Dəqiq say barədə tam məlumat yoxdur”.

E. Xəliov nəzərə çatdırıb ki, Ukraynada vaksin olunanlarla bağlı Moldova sərhədini keçəndə heç bir problem olmur:

“Vaksin olunmayanlardan isə təmənnasız test götürülür. Viza da tələb edilmir”.

“Bayraktar TB2” SİHA-ların Rusiyanın Xerson şəhərinə girən hərbi karvanını vurmasının görüntüləri paylaşılıb.

Zamantv.az-ın xarici mediaya istinadla məlumatına görə, Ukraynanın Türkiyədəki səfirliyi həmin anları sosial media hesabında yayıb. Paylaşımda "Ukrayna Baş Qərargah rəisi - Maşallah Bayraktar TB2 SİHA"larına deyilir.


Rusiyanın Ukraynaya hücumunun 4-cü günündə də bölgədən dəhşətli görüntülər gəlməyə davam edir.

Ukraynanın müdafiə nazirinin müavini bildirib ki, Rusiya hücumun əvvəlindən bu yana 4300-ə yaxın əsgər və 146 tank itirib.

Azərbaycanda son sutkada koronavirus (COVID-19) əleyhinə 25 208 vaksin vurulub.

Nazirlər Kabineti yanında Operativ Qərargahdan verilən məlumata görə, bir gündə birinci mərhələ üzrə vaksinasiya olunanların sayı 1 552, ikinci mərhələ üzrə vaksinasiya olunanların sayı 1 372, 3 və daha çox doza üzrə vaksinasiya olunanların sayı 20744, pozitiv nəticədən sonra buster doza olunanların sayı isə 1 540 nəfərdir.

Ölkədə vurulan vaksinlərin ümumi sayı 12 982 355, birinci mərhələ üzrə vaksinasiya olunanların ümumi sayı 5 298 628, ikinci mərhələ üzrə vaksinasiya olunanların sayı 4 784 850, 3 və daha çox doza üzrə vaksinasiya olunanların sayı 2 694 562, pozitiv nəticədən sonra buster doza olunanların sayı isə 204 315 təşkil edir.

Kiyevdə Baş Kəşfiyyat İdarəsinin döyüşçüləri bir qrup təhlükəli çeçen diversantını zərərsizləşdiriblər.

Zamantv.az-ın Ukrayna mediasına istinadla xəbərinə görə, onlar şəhərdə təcili yardım maşınında hərəkət edəndə yaxalanıblar.

Bu barədə Ukrayna daxili işlər nazirinin müşaviri Anton Qeraşenko “Telegram”da xəbər yayıb.
“Təcili yardım maşınında Kiyev ətrafında hərəkət edən bir qrup çeçen diversant cəsur Ukrayna hərbi kəşfiyyatçılarının bir hissəsi güllələnib, bir hissəsi saxlanılıb”, - xəbərdə qeyd edilir.
Digər məlumata görə, çeçen alayının komandiri Maqomed Tuşaev də Ukraynada məhv edilib.

Bu gün Xarkovdan bir qrup azərbaycanlı tələbə və digər Azərbaycan vətəndaşları qatarla Lvova yola salınıb.

Bu barədə APA-ya hazırda Azərbaycanın Xarkovdakı konsulluğunda olan İctimai Siyasi Proseslər və Beynəlxalq Araşdırmalar Mərkəzinin (İSBAM) sədri Samir Adgözəlli məlumat verib.

Tələbələr Azərbaycanın Xarkovdakı konsulluğunun təşkilati və texniki dəstəyi ilə yola salınıb. Bundan sonra da tələbələr də daxil olmaqla, Azərbaycan vətəndaşlarının Xarkovdan təxliyəsi davam etdiriləcək.
Qeyd edək ki, Xarkovdan təxliyə olunmaq istəyən 1500 Azərbaycan vətəndaşı var.

Ukraynanın Bakıdakı səfirliyi qarşısında Ukraynaya dəstək aksiyası keçirilib.

Zamantv.az-ın xəbərinə görə, aksiyada Ukraynada gedən müharibənin dayandırılması barədə şüarlar səsləndirilib.

Eyni zamanda Ukrayna xalqına dəstək ifadə olunub.
Aksiyadan sonra Ukrayna səfiri Vladislav Kanevski öz “Tvitter” səhifəsində aksiya iştirakçılarına və Azərbaycan xalqına bu həmrəyliyə görə təşəkkürünü bildirib.

Şirvan Dövlət İqtisadiyyat və Humanitar Kolleci rüşvət yuvasına çevrilməkdə ittiham edilir

Kollecin direktoru Bərxudar Bərxudarov bu təhsil ocağını market kimi idarə edir.

Bu barədə mənbə xəbər verir ki, kollecdə hər şey direktorun “qiymət tas”ından asılıdır. Yəni, tələbələrdən toplanan pulların məbləği bazar məzənnələri ilə tənzimlənir.
B.Bərxudarov tələbələrdən müxtəlif adlar altında pul toplanması adi hal alıb. Dərsə gəlməyin və gəlməməyin öz qiymətləri var.
İmtahanlar zamanı əlin cibində olmasa növbəti kursa keçmək üçün heç bir şansın yoxdur. Bundan əlavə, kollecdə “ölü ştatlar” var. Bərxudar Bərxudarovun qohum-əqrəbasının, dost-tanışının bir çoxunun adı kollecdə gedir.

Hər ay onlar üçün dövlət büdcəsindən maaş ödənilir və kollecdə bu şəxsləri tanımırlar. Nəticədə büdcə vəsaitləri talanır, müxtəlif adlar altında mənimsənilir.
Mediada yayılan xəbərlərdə bildirilir ki, kollec direktoru tələbələrdən alınan pulları özünün yaxın adamların əliylə toplayır.

Kollecin direktoru Bərxudar Bərxudarov təyinatından sonra qaydalarla yanaşı, durum da dəyişib.
Məlumatda deyilir ki, Bərxudar Bərxudarov təhsil rəhbərliyi ilə yola getməsə də, hansısa sirrli əllər onu direktor postunda saxlayır. Həmin «sehirli əl» isə nəinki onu himayə edir, həm də bir sıra qanunsuzluqlara imza atmasını sığortalamaqla da məşğul olur.
O da vurğulanır ki, kollecin direktorunun digər qazancı müəllimlərdən aylıq almasıdır. Onlar hər ay Bərxudar Bərxudarov «görmək»lə işlərinə davam edir və kimsəni saya salmırlar.
Amma Bərxudar Bərxudarov bir başqa gəlir yeri də var. İddia olunur ki, direktorun şəxsi maraqları təmin olunduğundan kollecdə adı gedən, lakin özü məktəbin yolunu belə tanımayan 10-dan artıq müəllim də mövcuddur.
Şirvan Dövlət İqtisadiyyat və Humanitar Kollecində qəbuldan tutmuş, imtahanda qiymətlərin yazılmasına qədər hər şey pulladır.
Təsəvvür edin ki, bir vaxtlar direktor süpürgəçinin maaşını mənimsəyib. Bərxudar Bərxudarovun belə işləri çoxdur. Lakin ona qarşı hər hansı bir tədbir görülmür.
Təhsil Nazirliyinin baş verənlərə loyal münasibəti bir çox hallarda isə, susqunluğu müəllim adına xələl gətirən ünsirlərin əl-qol açmasına münbit şərait yaradır.
B proseslərdə iqtisadiyyat və humanitar şöbələrinin müdirləri xüsusilə seçilir. Semestr və dövlət imtahanlarının müxtəlif məbləğlərdə pulların tələb olunması kollecdə adi hala çevrilib.
Kollec direktoru isə ittihamları rədd edir və razılaşmır, hər şeyin qaydasında olduğunu bildirir.
Qarşı tərəfin mövqeyini dərc etməyə hazırıq.

PS: Daha ətraflı sizi məlumatlandıracağıq… Bizi izləyin.

Xeberim.info

Ermənilərin Azərbaycanın Xocalı şəhərində törətdiyi soyqırımından 30 il ötür.

Zamantv.az-ın xəbərinə görə, erməni silahlı birləşmələri SSRİ dövründən Xankəndi şəhərində dislokasiya olunmuş 366-cı motoatıcı alayının zirehli texnikası və hərbi heyətinin köməyi ilə 1992-ci il fevralın 25-də Xocalı şəhərinə hücuma keçib.

Mühasirəyə alınan şəhərin 2500 sakini xilas olmaq üçün Ağdam istiqamətində hərəkət edib. Lakin pusquda dayanan ermənilər dinc sakinləri gülləbaran ediblər. Əsrin faciəsi olan Xocalı soyqırımı nəticəsində 63-ü uşaq, 106-sı qadın, 70-i qoca və qarı olmaqla, 613 Xocalı sakini qətlə yetirilib, 8 ailə tamamilə məhv edilib, 25 uşaq hər iki valideynini, 130 uşaq valideynlərindən birini itirib. Düşmən gülləsindən 76-sı uşaq olmaqla, 487 nəfər yaralanıb. 1275 nəfər əsir götürülüb. Girov götürülənlərdən 150 nəfərinin, o cümlədən 68 qadın və 26 uşağın taleyi bu günədək məlum deyil.
Rəsmi hesablamalara görə, qanunsuz erməni silahlı birləşmələri tərəfindən Xocalı şəhərinin işğal edilməsi ilə əlaqədar dövlət əmlakının və xüsusi mülkiyyətdə olan əmlakın məhv edilməsi, talan edilməsi ilə bağlı Azərbaycan dövlətinə və vətəndaşlarına 170 milyon ABŞ dollarından artıq ziyan vurulub.

1993-cü ildə Bakının Xətai rayonunda Xocalı soyqırımı qurbanlarının xatirəsinə abidə ucaldılıb.

1994-cü ildə Heydər Əliyevin təşəbbüsü ilə Milli Məclis “26 fevral - Xocalı soyqırımı günü haqqında” xüsusi qərar qəbul edib. Sənəddə hadisənin başvermə səbəbləri və günahkarları təfsilatı ilə açıqlanıb.

Leyla Əliyeva İslam Konfransı Təşkilatı Gənclər Forumunun (İKGF) Mədəniyyətlərarası Dialoq üzrə Baş Koordinatoru olarkən “Xocalıya ədalət!” kampaniyasının keçirilməsi təşəbbüsü ilə çıxış edib. Bu təşəbbüs əsasında 2008-ci ilin fevralından “Xocalıya ədalət!” kampaniyası keçirilir. Kampaniyanın məqsədi beynəlxalq ictimaiyyətin Xocalı faciəsi ilə bağlı məlumatlandırılması, faciəyə beynəlxalq aləmdə mənəvi-siyasi qiymət verilməsi və beynəlxalq səviyyədə anılmasını təmin etməkdir. Kampaniyanın beynəlxalq əlaqələndirilməsi www.justiceforkhojaly.org saytı vasitəsilə aparılır.

Xocalı soyqırımının ildönümü hər il Azərbaycan və dünyanın bir çox ölkəsində hüznlə qeyd olunur. Azərbaycan səfirlikləri və diaspor təşkilatları hər il fevralın 26-da fəaliyyət göstərdikləri ölkələrdə anım mərasimləri təşkil edir, konfranslar keçirirlər. Bu tədbirlərdə ermənilərin Xocalıda törətdikləri vəhşilikləri əks etdirən foto-stendlər, sənədli filmlər nümayiş olunur, soyqırımı həqiqətlərini əks etdirən kitablar sərgilənir.

Hazırda 17 dövlətin milli qanunvericilik orqanı, həmçinin ABŞ-ın 24 ştatı, eyni zamanda İslam Əməkdaşlıq Təşkilatı və Türk Dövlətləri Təşkilatı Xocalıda dinc əhalinin qətliamını pisləyən və bunu soyqırımı və insanlıq əleyhinə cinayət aktı kimi dəyərləndirən çoxsaylı qətnamə və qərarlar qəbul edib.