Azərbaycanda daha bir təhsil işçisinin səs yazısı yayılıb. Bu dəfə Azərbaycan Texnologiya Universitetinin (UTECA) rektoru vəzifəsini icra edən Yaşar Ömərovun tabeliyində çalışan işçiləri təhdid edən audioyazısı ortaya çıxıb.

DİA.AZ yenisabah.az-a istinadla xəbər verir ki, Yaşar Ömərov vəzifəsinin icrasına başlayandan dərhal sonra keçmiş rektor Akif Süleymanova yaxınlığı ilə tanınan bütün kadrları işdən azad etməyə başlayıb.

Sözügedən audioyazıdan aydın olur ki, o, hətta universitetin xanım əməkdaşlarını da təhdid edib. Yaşar Ömərov əməkdaşları keçmiş rektora xəbərçilik etməkdə suçlayaraq, onlardan öz ərizələri ilə işdən getmələrini tələb edir:

“Hələ 2 həftə buradayam. Gedib bu şad xəbəri Akif müəllimə çatdıra bilərsiniz. Yaxşısı budur ki, ərizənizi yazıb öz xoşunuzla işdən gedin, yoxsa sonra hamınızı pis günə qoyacağam”.

Həmin səs yazısını təqdim edirik:

Dinləmək üçün bura tıklayın...My Webpage

Ölkədə bəzi odioz məmurlar var ki, şəhid ailəsi, yaxud qazi problemi üçün onun qəbuluna gedəndə şərəfsiz şəkildə “Mənim üçün döyüşməmisən ki...” deyərək qapısından qovur.
Bu təhqiramiz münasibətin nəticəsi olaraq özünü yandıran qazilər var, intihara əl atanlar olub. Amma bu aşağılayıcı tonda danışanlar arasında təkcə qazilərə deyil, sadə vətəndaşlara da adekvat münasibət göstərən məmurlar var.
Misal üçün “Azərişıq” ASC-nin Suraxanı rayon idarəsinin rəisi “Sahil - S İnşaat” MTK sakinlərini nəinki zülmətə qərq edib, hətta özünəvurğun şəkildə bildirir ki, belə də olmalıdır.
Bu günlərdə bina sakinlərindən biri, jurnalist Azər Talıbov işıq idarəsinə müraciət edərək binada tikinti işlərinin elektrik enerjisinin kəsilməsi səbəbindən yarımçıq dayandığını bildirib.
Jurnalist qeyd edib ki, şirkətin fırıldağa yol vermiş sahibləri həbs olunub və hazırda sakinlər öz vəsaiti hesabına inşaat işlərini yekunlaşdırıb köçməyə hazırlaşırlar. Lakin Suraxanı rayon idarəsinin rəisi vətəndaşları yurd-yuvasına köçməkdən məhrum edib, işığı kəsib, tikintinin getməsinə imkan vermir.
Bunun adı vətəndaşa pislik etməkdir, dövlətlə insanları üz-üzə qoymaqdır. Amma görün idarə rəisi bina sakini A.Talıbovla dialoqunda nələr deyib...

- Bu bizim, dövlətin günahı deyil, vətəndaşlar aldanmazdılar.

- Bəs dövlət niyə həmin dələduzların özbaşınalığa yol verməsinə şərait yaradıb?

- Aldanmazdılar.

- Almaniyada, Fransada hansısa tikinti şirkəti vətəndaşları aldadıb bir mənzili bir neçə nəfərə sata bilər?

- Yox

- Çünki orada sistem işləyir, qanunlar işləkdir.

Bax, bu cavabdan sonra Suraxanı işıq idarəsinin rəisi susmağa üstünlük verib və heç bir arqument gətirə bilməyib. Ancaq məsələ onunla dialoq aparmaq deyil, idarə rəisinin borcudur ki, vətəndaşlara yardım etsin, əsassız yerə işığı kəsməsin, insanlar tikintini başa vurub mənzillərinə köçsünlər və heç bir sakin də elektrik enerjisindən istifadəyə görə ödəməli olduğu borcu verməkdən yayınmır.
O halda nə üçün “Azərişıq” ASC-nin Suraxanı rayon idarəsinin rəisi vətəndaşları dövlətə, hakimiyyətə qarşı qaldırır? Sadəcə, işıq idarəsinin rəisi elə danışır ki, MTN-nin odioz quldur generalı Akif Çovdarov danışır. “Əhməd haradadır” filmində deyildiyi kimi, “kolxozçuya bax, deputat kimi danışır”. Halbuki idarə rəisi normal qaydada vətəndaşların problemini qaydaya qoya, onları razı sala bilərdi. Axı işıq vətəndaşa pulsuz verilmir? Yaxud idarə rəisi öz cibindən ödəniş etmir?! //anaxeber.info//

Ənvər Limanov Sabirabad rayon Rayon Mərkəzi Xəstəxanasında idarə etdiyi korrupsiya ilə Bursada imarət sahibi olub...

Sabirabad rayon Rayon Mərkəzi Xəstəxanasıdan, daha doğrusu xəstəxananın baş direktorundan şikayətlər bitib tükənmir. Sabirabad səhiyyəsinin göstərdiyi yarıtmaz xidmətdən şikayətçi olan vətəndaşlar qeyd edirlər ki, Ənvər Lumanov və “komandası”nın sayəsində Sabirabad Xəstəxanasında icbari tibb sığortdan əsər əlamət qalmayıb. Sakinləri bildirirdi ki, Sabirabad xəstəxanalarında, tibb məntəqələrində vətəndaşlar üçün hər bir xidmət pulludur və bu zaman sığortası olan xəstələr üçün belə istisnalar tanınmır. Mərkəzi Xəstəxanada və tibb məntəqələrində fəaliyyət göstərən şöbələr, o cümlədən həkimlər isə baş direktora aylıq “hesab” verirlər.

Xatırladaq ki, AzFakt.com olaraq bir müddət öncə Sabirabad rayon Rayon Mərkəzi Xəstəxanasıda baş direktor Ənvər Lumanov və digər şəxslərin əlbir olaraq səhiyyə ocağını korrupsiya yuvasına çevirmələri haqqında məlumatlar dərc etmişdik və bütün bu məlumatlar birbaşa vətəndaşların şikayətlərinə əsaslanırdı.

Sabirabad sakinlərinin saytımıza göndərdikləri yeni məlumatlarda isə daha ilginc faktlar öz əksini tapıb. Həmin məlumatlarda vurğulanır ki, xəstəxanada işə qəbul məsələsinə kadrlar şöbəsinin müdiri Yasəf Cavadov baxır. İşə girmək istəyənlər Yasəf Cavadovla görüşərək, onunla “razılaşırlar”. Misal üçün xəstəxanada sürücü işləmək 8-10 min, xadimə işləmək 2-3 min, tibb bacısı işləməyin qiyməti isə 4-5 min manat arasında dəyişir. Bildirilir ki, işə girmək üçün bütün pul məsələlərini baş direktor Yasəf Cavadova həvalə edib. Həmçinin işə girmək istəyənlərlə Yasəf Cavadovun vasitəçiliyini isə baş tibb bacısı həyata keçirir.

Bundan başqa Ənvər Lumanovun qanunsuz yollarla əldə etdiyi vəsaitlər hesabına Türkiyənin Bursa şəhərində imarət aldığı deyilir. Bu barədə Lumanovun yaşadığı Əhmədabad kəndində bilməyən yoxdur. Kənd sakinləri bildirirlər ki, baş direktorun ailəsi yay aylarındaTürkiyəyə gedərək Bursadakı imarətlərində yaşayırlar.

Həmçinin qeyd edilir ki, Ənvər Lumanovun digər qazanc yerlərindən biri də yaşadığı Əhmədabad kənd həkim məntəqəsidir. Adı çəkilən həkim məntəqəsinin müdiri isə baş direktorun qardaşı Əhməd Lumanovdur. Məhz koronvirus infeksiyasının vüsət aldığı vaxtlarda (2020-ci ildən 2021-ci ilin yarsına kimi) Əhmədabad kənd həkim məntəqəsində də vətəndaşlara tibb yardımın göstərilməsi üçün çalışan, adı olub özü olmayan və yüksək əmək haqqı yazılan tibb işçiləri olub.

Digər məlumatda bildirilir ki, Ənvər Lumanov Sabirabad Xəstəxanasının baş direktoru keçəndən sonra, vaxtı ilə Əhmədabad kənd icra nümayəndəsi işləyən və 2014-cü ildə rüşvət ittihamı ilə həbs olunan qardaşı Alim Lumanova Əhmədabad kəndində böyük mağaza tikdirib. Qeyd edək ki, icra nümayəndəsi Alim Lumanov dövlət tərəfindən Əhmədabad kənd sakinləri üçün tikilən evləri rüşvətlə satdığına görə həbs olunub və məhkəmə tərəfindən 8 il cəza alıb.

Sabirabad sakinləri bildirirlər ki, rayon xəstəxanasındakı rüşvətin, özbaşınalığın qarşısının alınmasının yeganə yolu baş direktor Ənvər Lumanovun, baş həkimi İkram Allahverdiyevin, baş direktorun maliyyə işləri üzrə müavini Bayram Mikayılovun, mühasib Rasim Vəliyevin, kadrlar şöbəsinin müdiri Yasəf Cavadovun və digər aidiyyatı şəxslərin vəzifədən uzaqlaşıdırlmasıdır. Yəni TƏBİB və Səhiyyə Nazirliyi Sabirbad xəstəxanasının rəhbərliyinə vicdanlı, korrupsiyadan uzaq, vətəndaşına, dövlətinə bağlı kadrları təyin etməldir.

Saytımıza verilən digər məlumatda isə bildirilir ki, Sabirabad xəstəxanasında rüşvət sistemi quran şəxslərdən biri də vaxtıilə xuliqanlığa görə həbs edilən və korrupsiya faktlarına görə vəzifəsindən qovulan baş direktorun müavini Bayram Mikayılovla şöbələrin birinin tibb bacısıdır.

Bu barədə növbəti yazımızda oxucularımıza ətraflı məlumat verəcəyik. (AzFakt.com)

Azərbaycan Respublikasının Prezidenti İlham Əliyev Rusiya Federasiyasının Prezidenti Vladimir Putinin dəvəti ilə MDB Dövlət Başçılarının qeyri-rəsmi görüşündə iştirak etmək üçün oktyabrın 7-də Sankt-Peterburq şəhərinə işgüzar səfərə gedib.

Bu barədə Prezidentin Mətbuat Xidməti məlumat yayıb.

“Sipark” tikinti firması illərdir ki, vətəndaşları aldadır.

DİA.AZ reportyor.info-ya istinadla xəbər verir ki, boğaza yığılan sakinlər yenidən aksiya keçiriblər. Onlar tikinti şirkətindən narazılıqlarını çatdırıblar.

Video materialı təqdim edirik:

Hər dəfə ümidləri boşa çıxan sakinlər, "40 ildir yollarımız bu vəziyyətdədir", deyirlər.

Qusar rayon Urva kəndinin camaatı İllərdir həsrətlə yollarının təmirini gözləyirlər. Hər təqvim dəyişəndə urvalılar yayda tozulu, çala-çuxurlu, yağıntılı günlərdə bataqlıq, gölməçələrlə dolu yollarının təmir olacağına ümid edirlər.

Sakinlər deyirlər ki, mərkəzi yola çıxana qədər üst-başları palçıq içində olur deyə sürücülər onları avtomobillərinə götürmürlər. Ona görə də yola çıxanda özlərinə ikinci paltar, ikinci ayaqqabı götürməyə məcburdurlar.

Böyüklərlə yanaşı məktəbə gedən uşaqlar da eyni əziyyəti çəkir. Yollar bataqlıq olduğundan sürücülər bu yollara girmir. Çünki nahamar, bataqlıqdan ibarət yollar avtomobilləri də sıradan çıxarır. 3000 sakini olan Urva kəndinin yollarının bu vəziyyətdə olması və aidiyyatı qurumların məsələyə laqeyd münasibəti kənd camaatını təngə gətirib.

Söhbət təkcə kənddaxili yollardan getmir. Rayon mərkəzinə gedən yol da artıq sıradan çıxıb. Sakinlər probelmin həlli ilə bağlı aidiyyatı qurumlara dəfələrlə müraciət etsələr də, kənd yollarının nə zaman təmir ediləcəyi ilə bağlı məlumat verən yoxdur.

Urva kənd İcra Nümayəndəliyindən Belediyye.net-in məsələ ilə bağlı sorğusuna cavab olaraq bildirilib ki, sözügedən yollarda asfalt işləri aparılması nə özlərinin, nə də bələdiyyənin imkanı daxilində deyil.

Bu səbəbdən Urva kəndinin yollarının təmiri yaxın zamanlarda baş tutmayacaq.

Qeyd edək ki, bundan öncə Qusar rayonunun Urva kəndinin sakinlərinin ictimai nəqliyyat problemi olduğu barədə də yazmışdıq.

Belediyye.net

Ağcabədi rayonu Hindarx qəsəbə Uşaq Musiqi Məktəbinin direktor müavini, tar müəllimi Zöhrab Hüseynov haqsızlıqla üzləşdiyini deyir.

Bu barədə müəllim Meydan TV-yə danışıb.

Onun sözlərinə görə, on ildir ki, məktəbdə iyirmi dörd saat olmaqla dərs deyib.

Bir neçə ay öncə isə məktəbin direktoru İlkin Ağalarov onun dərs saatlarını yarıbayarı azaldıb:

“Direktor mənə bildirdi ki, bundan sonra dərs saatlarım 24 deyil, 7-8 olacaq. Səbəbini soruşanda dedi ki, bu, Regional Mədəniyyət İdarəsinin rəisi Qalıb Həsənovun tapşırığıdır. Üzərindən bir müddət keçəndən sonra, avqustun 30-da keçirilən iclas zamanı öyrəndim ki, sən demə, direktor bəzi müəllimlərə 32, hətta 36 dərs saatı yazaraq, pulları özü götürürmüş”.

Direktor müavini deyir ki, məsələ ilə əlaqədar Ağcabədi Regional Mədəniyyət İdarəsinin rəisi Qalib Həsənovla görüşüb:

“Ona bildirdim ki, ortada belə bir korrupsiya faktı var. Qalib Həsənov da direktoru müdafiə etdi ki, bəs nə ilə dolanmalıdır? Rəisin bu açıqlamasından sonra məəttəl qaldım. Düşündüm ki, Qalib Həsənov direktorla əlbir olduğu üçün onu müdafiə edir”.

Şikayətçi Prezident Adminstrasiyasına, Korrupsiya qarşı Mübarizə İdarəsinə, Mədəniyyət Nazirliyinə, Maliyyə Nazirliyinə, Dövlət Təhlükəsizlik Xidmətinə, Ağcabədi Rayon Prokurorluğuna, Dövlət Təhlükəsizlik Xidmətinin Ağcabədi rayon şöbəsinə məktub yazsa da, müraciətinə baxılmadığını deyir:

“Korrupsiya qarşı Mübarizə İdarəsindən cavab gəlib ki, şikayətim Mədəniyyət Nazirliyinə göndərilir. Məsələni niyə özünüz araşdırmırsınız? Mədəniyyət Nazirliyi də şikayəti Regional İdarəyə göndərəcək. Bununla olayın üstünü ört-basdır etmək istəyirlər”.

Zöhrab Hüseynov iddia edir ki, məktəb direktoru ona hədə-qorxu gəlir:

“Zəng edib, ailəmi təhdid etdi ki, sən öl, gör, sizin başınıza nə oyun açacağam. Əfsuslar olsun ki, mən bu qədər yerə müraciət edəndən sonra ortada heç bir nəticə yoxdur. Ciddi araşdırma aparılmır, həmin şəxslər cəzalandırılmır”.

Musiqi məktəbinin direktoru İlkin Ağalarov məsələyə ancaq rəsmi müraciətdən sonra cavab verəcəyini desə də, Meydan TV-nin sorğusunu cavablandırmayıb.

Ağcabədi Regional Mədəniyyət İdarəsi də Meydan TV-nin sorğusuna cavab verməyib.

Mədəniyyət Nazirliyinin Daxili nəzarət və audit şöbəsindən Meydan TV-yə bildirilib ki, məsələ ilə bağlı araşdırma aparılır:

“Araşdırmanın nəticəsi bəlli olduqdan sonra ictimaiyyətə məlumat verilə bilər”.

Elm və Təhsil Nazirliyi yanında İctimai Şuranın üzvü İlqar Orucov Meydan TV-yə açıqlamasında bu kimi hallarla rastlaşmadığını və buna çox təəccübləndiyini deyib:

“Elm və Təhsil Nazirliyinə, həmçinin İctimai Şuraya belə halların baş verməsi ilə bağlı heç vaxt şikayət daxil olmayıb. Hər zaman vətəndaşlara – müəllimlərə, şagirdlərə- təhsilin bütün subyektlərinə müraciət edirik ki, qanunsuz tələblər, pul yığma halları, yaxud da direktorların özbaşınalığı ilə bağlı hər hansı bir faktlar olduğu təqdirdə, bizə dərhal müraciət etsinlər. Bu kimi hallar olduğu təqdirdə, yalnız rəsmi müraciət olduqda, bunu araşdırmaq mümkündür”.

Şura üzvü həmçinin deyib ki, müəllimlərə əlavə dərs saatlarının verilməsi, istisna hallarda, vakansiya vasitəsilə edilə bilər:

“Ümumiyyətlə, müəllimin maksimum neçə saat dərs deməsi, minimum saatın nə qədər olması ilə bağlı normalar var. Bütövlükdə bunlar konkret normalar çərçivəsində tənzimlənir”.

2021-ci ilin dekabrında mədəniyyət naziri Anar Kərimov demişdi ki, musiqi məktəblərində qeyri-şəffaf prosedurlar mövcuddur. Nazir musiqi müəllimlərinin işə qəbulu prosesinin Dövlət İmtahan Mərkəzinin (DİM) səlahiyyətinə verilməsi təklifini irəli sürmüşdü:

“Bu istiqmatədə yeni bir yol xəritəsi cızmaq istəyirik. Müəllimlərin işə qəbulu ilə bağlı müəyyən meyarlar, metodologiya tətbiq edilsin. İstəyirik ki, bu prosesə ixtisaslaşmış qurumları, həmçinin Dövlət İmtahan Mərkəzini cəlb edək. Mədəniyyət Nazirliyi isə prosesdən kənarda dayansın”.

Məsələni şərh edən təhsil eksperti Nabatəli Qulamoğlu Meydan TV-yə deyir ki, müəllimlərə dərs bölgüsü onların işə qəbul imtahanında topladığı ballara nisbətən verilməlidir:

“Məntiqi izahı budur ki, savadlı müəllim daha çox dərs deməlidir. Bu, əmr şəklində deyil, nazirin tövsiyəsidir. Dəfələrlə vurğulamışam ki, direktorlar nazirə formal tabedirlət. Məktəb direktorları icra başçıları ilə hesablaşırlar. Məktəblərdən yığılan pulların əsas hissəsi direktorlar tərəfindən icra başçılarına verilir. Çünki təhsil şöbələrinin müdirlərinin namizədliyini rayonun icra başçısı verir. Məhz buna görə də direktorlar özbaşınalıq edirlər”.

Ekspert hazırda Azərbaycanda dövlət sektorunun 80-ci illərdəki kimi fəaliyyət göstərdiyini deyir:

“Yəni o vaxt dövlət kolxoz və sovxozlara pullar tökürdü ki, vəziyyəti dirçəldib, qaydaya salsınlar. Pulları isə anbardar, kolxoz sədri, briqadir yeyirdi. Bu dəqiqə dövlət sektoru, yəni bizim məktəblər həmin vəziyyətdədir. Özbaşınalıqdır, əsas səbəbi də yeyintidir. Aşkarlıq yoxdur, şikayət edirsən, baxan yoxdur. Bütün sahələrdə vəziyyət acınacaqlıdır. Məktəbin direktoru özündən yuxarı orqana – birinci növbədə icra başçısına pul çatdırır. O, arxayındır, çünki arxası var. Məktəb direktoru vəzifəsinə elə adamları seçirlər ki, onlar hər oyundan keçsinlər, hər şeyi bacarsınlar. Yaxşı rüşvət toplaya bilsinlər, onu çatdıra bilsinlər. Müəllimlərin üzərində yumruğu olsun”. //Meydan TV//

Azərbaycan Respublikasının Prezidenti cənab İlham Əliyev “Aqrar sahədə yeni subsidiya mexanizminin yaradılması haqqında” Fərman imzalayıb. Bu Fərman subsidiyaların fermerlərə vahid mexanizm vasitəsilə çatdırılmasını nəzərdə tutur.Amma Şəmkir rayonunda fermerlərə Subsidiyaların verilməsi ilə bağlı rüşvət tələb olunduğu iddia olunur.

Xalqxeber.az xəbər verir ki, bu haqda Dünyanınsəsi.Az saytına Şəmkir rayonun Atabəy kənd sakini Şərifov Ziya Fərman oğlu tərəfindən şikayət daxil olub.

Belə ki, Aqrar İslahat komisitasının məlum qərarı ilə şikayətçi bildirir ki, onların ailəsinə Atabəy kəndində 3.5 ha torpaq sahəsi verilib.Hər il dövlət tərəfində şikayətçi qeyd edir ki, onların ailəsinə hər hektara görə 220 manat pul verirdilər.Amma bu il rüşvət müqabilində Şəmkir rayon Dövlət Aqrar İnkişaf Mərkəzinə rəisi Rəşad Əzizovun köməkçisi olan Elvin adlı əməkdaşa 100 manat verəndən sonra onlara 160 manat subsidiya veriblər.
Şəmkir rayonun Atabəy kənd sakini şikayətində onuda qeyd edir ki, sözügedən mərkəzin bığının altından keçməsən subsidiyaların verilməsinə nail ola bilmərsən.
Prezidenti cənab İlham Əliyev “Aqrar sahədə yeni subsidiya mexanizminin yaradılması haqqında” Fərman imzaladı ki, subsidiyalara müraciət və istifadə mexanizmi asanlaşdırılsın.İndi hansı boşluq yaranıb ki, fermerlər Dövlət Aqrar İnkişaf Mərkəzindən asılı vəziyyətdə qalsın?Fermerlərə subsidiyaların verilməsi ilə bağlı xidmətlərin göstərilməsi regionlarda Dövlət Aqrar İnkişaf Mərkəzləri tərəfindən həyata keçirilməsi korrupsiya və bürokratik əngəllərə yol açırsa dərhal prokurorluq orqanları hərəkətə keçməlidir.
Belə olmazsa dövlətimizin kənd təsərrüfatına dövlət dəstəyinin və aqrar sahədə aqrar-iqtisadi siyasət töhvə vermiyəcəkdir.
Redaksiya olaraq şikayətçinin ittiham etdiyi Şəmkir rayon Dövlət Aqrar İnkişaf Mərkəzinin mövqeyini də dərc edə bilərik.
Şikayətçinin səs yazısını təqdim edirik:

“Gəncə şəhərində fəaliyyət göstərən Azərbaycan Texnologiya Universitetində 9 ilə yaxın rektorun köməkçisi vəzifəsində çalışmışam. Təhsil Nazirliyinin Ali, orta ixtisas və əlavə təhsil sektorunun müdiri olan Yaşar Ömərov gəldikdən sonra bütün işçiləri, xüsusən də məni incitməyə başladı…”

DİA.AZ xəbər verir ki, bu sözləri Yenisabah.az-a şikayətçi Firuzə Qarayeva deyib.

Uzun illər Azərbaycan Texnologiya Universitetində rektor köməkçisi olaraq çalışan F.Qarayeva bildirib ki, yeni rektor Yaşar Ömərov vəzifəyə gəldikdən sonra ilk işi keçmiş rektorun kadrlarını qərəzli şəkildə işdən çıxarmaq olub:

“Yaşar Ömərov vəzifəyə gəldikdən sonra keçmiş rektorun ətrafında olan bütün işçilərə deyib ki, “ərizənizi yazıb çıxın”. Bunu xüsusilə mənə qarşı edib, masaya yumruq vuraraq işdən çıxmağımı tələb etdi. Bildirdi ki, işdən ərizənizi yazıb çıxmasanız başınıza oyun açacağam.

Mən də məcbur olub ərizəmi yazıb işdən çıxmışam. Özüm Birinci Qarabağ qazisi veteranının qızıyam, öhdəliyimdə 6 yaşlı uşaq var, məni bu vəziyyətdə işdən çıxmağa məcbur edib. Nə qədər işdə qalmağa çalışsam da, öz kadrlarını öyrədib göndərdi ki, gedin ona deyin, özü ərizə yazıb çıxmasa, başqa cür şərləyərək çıxaracağam. Məcburi şəkildə ərizə yazaraq işdən çıxmışam, hazırda işləmirəm. Səbəb isə keçmiş rektor Akif Süleymanovun ətrafında olan heç kəsin işdə qalmasını istəməməsi idi, öz komandasını yığmağa çalışırdı. Bu məsələdə ən çox hədə-qorxu isə mənə gəldi, çünki mən Akif müəllimin köməkçisi olmuşam. Dəfələrlə rektor köməkçisi olmasa da başqa vəzifəyə keçirməyini istəməyimə baxmayaraq, buna razı olmayıb, deyib ki, belə bir şey mümkün deyil və bu universitetdən getməlisən”.

Məsələ ilə əlaqədər Azərbaycan Texnologiya Universitetinə dəfələrlə zəng vurmağımıza baxmayaraq, suallarımız cavabsız qaldı. Universitetin mətbuat xidmətinə suallarımızı ünvanlasaq da, onlar dəstəyi asdı.

Azərbaycan Həmkarlar İttifaqları Konfederasiyası “Kurort” Qapalı Səhmdar Cəmiyyətinin Abşeron mədə-bağırsaq xəstəlikləri sanatoriyası Azərbaycanın paytaxtı Bakı şəhərinin cəmi 35 km-də yerləşən Abşeron yarımadasının ən mənzərəli yerlərindən biri olan Mərdəkan qəsəbəsində fəaliyyət göstərir.

Lakin vaxtilə keçmiş SSRİ miqyasında “Yessentuki”dən sonra əhəmiyyətinə görə ikinci olan sanatoriya indi AHİK-in hüquqlarını qoruduğu zəhmətkeşlər üçün müalicə yerindən çox imkanlı adamlar üçün əyləncə məkanına çevrilib. Sanatoriyanın baş həkimi Fəxrəddin Kazımovun yürütdüyü xidmət siyasəti belə vəziyyət yaradıb. İşlə bağlı jurnalistlərin hər hansı bir sualını cavablandırarkən özünün də, həyat yoldaşının da xəstə olduğunu deyən 75 yaşlı baş həkim, hələ ki, tutduğu vəzifəni gənc, perspektivli və kreativ kadrlara güzəştə getmək niyyətində deyil.

Bu günlərdə sözügedən sanatoriyada müalicə alan şəxslərdən biri redaksiyamıza müraciət edərək, pasientlərə münasibətdə ayrı-seçkilik edilməsindən, müəssisədə rast gəldiyi başqa neqativ hallardan gileylənmişdir. Pasientin sözlərinə görə, baş həkim VİP otaqları baha qiymətə kirayəyə verir, ən yaxşı xidməti də “VİP” müştərilər görürlər. Digər otaqlarda su vaxtlı-vaxtında gəlmir, təmizlik işləri lazımi səviyyədə görülmür. Keyfiyyətli qidalanma üçün də ciblərini geniş açmalısan. Sanatoriyada spirtli içkilər də təklif olunur ki, bu hal da baş verənləri müşahidə edən, gerçəkdən mədə-bağırsaq xəstəliyindən əziyyət çəkən, müalicəyə gələn pasientlərdə qıcıq doğurur. Bundan başqa, sanatoriyanın həyətində əvvəllər mövcud olmuş ağacların xeylisinin qırıldığını, skamyaların çoxu götürülüb. Kasıb pasientlər ya qaxılıb korpusdakı otaqlarda oturmalı, ya da həyətdəki pullu guşələrdə əylənməlidirlər.

Bütün bu və digər neqativ hallara niyə rəvac verildiyini öyrənmək üçün sanatoriyanın baş həkimi ilə görüşmək, suallarımızı cavablandırmasını istədik. Fəxrəddin Kazımovla yalnız üçüncü cəhdimizdə görüşə bildik. Birinci dəfə yerində tapmadıq. İkinci dəfə danışıb görüş üçün vaxt vədələşsək də, yenə də təyuin etdiyi gün işə çıxmadı. Nəhayət, üçüncü cəhddə görüşəndə də yenə həmişəki qaydada səhhətindən şikayətləndi. Sonra özünün fəaliyyətini tərifləməyə başladı. Bildirdi ki, o, vəzifəyə təzə təyuin olunanda sanatoriyada polisrəisinin, bölmə rəisinin, qəsəbə icra nümayəndəsinin qeyri-rəsmi bron etdikləri otaqlar var imiş, sanatoriya əxlaqsızlıq yuvasına çevrilibmiş. O gələndən sonra belə hallara son qoyulub. “Abşeron”dan fərqli olaraq, Ələkbər Nəzərovun rəhbərlik etdiyi qonşu “Günəşli” sanatoriyasında isə elə hallar qalmaqdadır. Skamyaların sayının məhdudlaşdırılmasına gəlincə, bunu yaxın ərazidə yaşayan narkomanların həmin skamyalardan istifadə edə bilməmələrinə görə özü götürdüb.

Baş həkim spirtli içki məsələsinə də toxundu: “Ay balam, istirahətə gələn yeyib-içməlidir də, bunun nəyi pisdi ki!?”

F.Kazımov sanatoriyada ümumən yürüdülən xidmət və qiymət siyasətinin isə “Kurort” Səhmdar Cəmiyyətinin prezidenti Əbil Ağasiyevin imperativ göstərişləri ilə qurulduğunu dedi.

Deryaz.az