Xalq artisti Brilliant Dadaşova özünə qarşı olan münasibətlərdən gileylənib.

Zamantv.az-ın məlumatına görə, ifaçı bu barədə sosial şəbəkədə yazıb: "Hələ anlaya bilmədinsə saxtakarları, günah özündədir. Qınama riyakarları...

Nişan alıb yüksək hədəfi onların fırıldaq vücudları. Mənəvi dəyərlər? Əzib keçərlər, anlamaz başları, zəif yaddaşları. Boş ver cinsi məfrağları. İstisna yox, məqsədə varmaq üçün hər kəsi tapdalayıb keçər ayaqları".

Bakı Ağır Cinayətlər Məhkəməsində ləğv edilmiş “RoyalBank” ASC-nin Müşahidə şurasının sədri Əli Cam və onun oğlu, bankın kredit departamentinin direktoru, İdarə heyətinin sədr müavini və baş direktor vəzifələrində işləmiş Fuad Camın işi üzrə məhkəmə prosesi davam etdirilib.

Zamantv.az xəbər verir ki, hakim Zeynal Ağayevin sədrliyi ilə keçirilən prosesdə təqsirləndirilən şəxs Fuad Camın vəkili dövlət ittihamçısının çıxışına etiraz edib.

O, müdafiə etdiyi şəxsə prokurorun 14 il həbs cəza istəməsini əsassız hesab edir:
“Biz buna etiraz edirik. Məhkəmədə 101 cildlik cinayət işində kifayət qədər Fuad Camın xeyrinə faktlar olsa da, ittiham tərəfi bunları nəzərə almayıb. Bankın rəhbər şəxslərinin hamısı cinayətdə Fuadın adını çəkməyib. Hamısı bildirib ki, bu işdə Fuadın əli yoxdur. Amma ittiham tərəfi bunları nəzərə almayıb. Dövlət ittihamçısı bütün ittiham olunan maddələrdə Fuada ən ağır cəza istəyib. Niyə? İttiham tərəf niyə belə qərəz nümayiş etdirir? Məhkəmədə dindirilən şahidlər heç biri demədi ki, Fuada pul veriblər. Məhkəmədən xahiş edirəm, bu hallar nəzərə alınsın. Fuad Cama hökm oxunarkən xahiş edirəm, yüngülləşdirici hallar nəzərə alınsın”.

Vəkilin sözlərinə görə, Fuad Camın cinayət işindəki heç bir sənəddə imzası olmayıb:

"Cinayət Əli Camındırsa, oğul niyə ağır cəzaya məhkum olunmalıdır. Axı onun ittiham edilən sənədlərin heç birində ki, imzası yoxdur. Bu köçürmələri Əli Can edibsə, Fuad Cam niyə cəzalandırılır? İttihama kənd təsərrüfatı kreditləri adı ilə 4 milyon manata yaxın pul mənimsənilməsi var. Bu prosesdə Fuad Canın hesabına 1 milyon 200 min manat köçürülüb və çıxarılıb. İttiham aktında da göstərilir ki, bu proses Əli Camın göstərişi ilə köçürülüb və çıxarılıb. Burda Fuadın nə günahı var? Axı bu pulu Fuad köçürməyib. Əl Cam köçürüb də, çıxarıb da. Fuad Camın bu işdə nə günahı var? İttiham aktında yazılıb ki, Fuad bu işdə atası ilə əlbir olub. Bu əlbirlik harada olub? Kim sübut elədi bunu? İstəyirlər ki, Fuad, cavan uşaq türmədə yatsın?
Ona görə də xahiş edirəm Fuad barədə ədalətli qərar verəsiniz”.

Prosesdə Əli Cama son söz verilib.

Ə.Cam bildirib ki, onun prosesdə heç bir günahı yoxdur və bəraət istəyib:

“1991-ci ildən bu vaxta qədər olan xidmətlər bir kənara, biz bankı 2003-dən sonra götürmüşük. 2003-2006-cı illərdə bank əməkdaşları 12 nəfərdən 600 nəfərə çatdırılıb. 2008-ci ildə “RoyalBank”ın kapitalı 10 milyon, 2010-da 22 milyon olub. Bütün dünyada böhran olsa da mən bankın kapitalının düşməsinə imkan verməmişəm. Mən xaricdən mülkümü satıb Bakıya gətirmişəm. İstəməsəydim, etməzdim. Xahiş edirəm mən və oğluma bəraət verin".

Prosesdə son söz deyən Fuad Cam da məhkəmədən bəraət istəyib.

Hakimlər müşavirəyə ayrılıb.

Qeyd edək ki, ittihama görə, ləğv edilmiş “RoyalBank” ASC-nin Müşahidə şurasının sədri Əli Cam və onun oğlu, bankın kredit departamentinin direktoru, İdarə heyətinin sədr müavini və baş direktor vəzifələrində işləmiş Fuad Cam tərəfindən vətəndaşların adlarına saxta kredit müqavilələri rəsmiləşdirilməklə pul vəsaitlərinin talanması və digər xüsusatlar üzrə Baş prokuror yanında Korrupsiyaya qarşı Mübarizə Baş İdarəsində cinayət işi başlanıb.

İstintaqla Əli Cam və Fuad Camın qabaqcadan əlbir olaraq öz qulluq mövqeyindən istifadə edərək Azərbaycan Respublikasının Kənd Təsərrüfatı Nazirliyi yanında Kənd Təsərrüfatı Kreditləri üzrə Dövlət Agentliyindən kənd təsərrüfatı kreditlərinin verilməsi üçün “RoyalBank” ASC-nin hesabına köçürülmüş pul vəsaitlərini 2007-2012-ci illər ərzində rəsmi sənədlərə bilə-bilə yalan məlumatlar daxil etməklə 31 müxtəlif hüquqi və fiziki şəxslərin adına sənədləşdirməklə krediti həmin şəxslərə verməyərək onlara etibar edilmiş 8.5 milyon manat məbləğində pul vəsaitlərini mənimsəmələrinə əsaslı şübhələr müəyyən edilib.

Bundan başqa, Əli və Fuad Camın qanunsuz rəsmiləşdirdikləri iri məbləğli kreditlər üzrə ümumilikdə 7.3 milyon manat məbləğində pul vəsaitini Hindistan, Fransa və digər ölkələr olmaqla, cəmi 19 ölkədə yerləşən bank hesablarına və şirkətlərə köçürüb həqiqi mənbəyini gizlətməklə leqallaşdırmalarına şübhələr üçün əsaslar müəyyən edilib.

Xatırladaq ki, keçirilmiş istintaq-əməliyyat tədbirləri nəticəsində Fuad Cam 24 iyun 2019-cu ildə Azərbaycan ərazisinə qayıdarkən tutulub, Əli Cam isə 6 iyul 2019-cu il tarixdə ölkəmizə ekstradisiya olunub.

Həmin şəxslərə Cinayət Məcəlləsinin 179.3.2 (külli miqdarda mənimsəmə və ya israf etmə), 313 (vəzifə saxtakarlığı), 308.2 (vəzifə səlahiyyətlərindən sui-istifadə ağır nəticələrə səbəb olduqda) və 193-1.3.2-ci (Cinayət yolu ilə əldə edilmiş külli miqdarda pul vəsaitlərini və ya digər əmlakı leqallaşdırma) maddələri ilə ittiham elan edilib.

“Azərsu”nun əməkdaşı silahla təhdid edilib.

Zamantv.az xəbər verir ki, 28 May qəsəbəsində bir abonent ərazidə xidmət edən “Abşeron Sukanal” İdarəsinin əməkdaşlarını odlu silahla təhdid edib.

Məlumata görə, 28 May qəsəbəsinin Paralellər adlanan küçəsində “Abşeron Sukanal” İdarəsinin əməkdaşları xidməti vəzifələrini yerinə yetirərkən Zülfüqar Mehdiyevə məxsus fərdi yaşayış evinin həyətində su çəninin dolub daşdığı, israfçılığa yol verildiyi, ev sahibinin isə buna heç bir reaksiya vermədiyini görüblər. Su israfının qarşısını almaq məqsədilə mənzil sahibindən tədbir görülməsini xahiş edən əməkdaşlar fərdi yaşayış evinin su təchizatı sisteminə baxış keçirmək istədikdə vətəndaşın kobud rəftarı və təhqirləri ilə üzləşiblər.
Sonra Z.Mehdiyev odlu silahla (ov tüfəngi) “Abşeron Sukanal” İdarəsinin əməkdaşlarını təhdid edib, ardınca hüquq-mühafizə orqanlarına müraciət edərək “Azərsu” əməkdaşlarının təzyiqlərinə məruz qalması barədə yalan məlumatlar verib.

Hadisə ilə əlaqədar “Abşeron Sukanal” İdarəsi hüquq-mühafizə orqanlarına rəsmi müraciət edib. Əraziyə gələn daxili işlər orqanlarının əməkdaşları Z.Mehdiyevi və “Abşeron Sukanal” İdarəsinin əməkdaşlarını araşdırma aparılması üçün polis bölməsinə dəvət ediblər.

İrpenə daxil olan Rusiya ordusunun hərbçiləri məşhur uşaq boks məşqçisi Aleksey Djunkivskini öldürüblər.

Zamantv.az xəbər verir ki, bu barədə Ukrayna Boks Federasiyası məlumat yayıb.

Mərhumun yaxınlarının dediyinə görə, A.Djunkivski məşq zamanı idman zalında güllələnib.
Qeyd edək ki, Aleksey Djunkivski 4 dəfə hərbi qulluqçular arasında dünya çempionatının qalibi olub.

Karyerasını başa vurduqdan sonra uşaq məşqçisi olub və bir çox məşhur boksçular yetişdirib.

Məktəblilər arasında 2016-cı il Avropa çempionu Oleq Laquta və 2015-ci il Avropa çempionatının gümüş mükafatçısı Vladislav Marçuk da onun yetirmələridir.

“Avropa İttifaqı ilə əməkdaşlıq məsələlərində bizi daim dəstəklədiyinə görə Polşaya minnətdarıq”.

Zamantv.az-ın xəbərinə görə, bunu Prezident İlham Əliyev martın 31-də Polşanın xarici işlər naziri, ATƏT-in fəaliyyətdə olan sədri Zbiqnev Rau ilə görüş zamanı deyib.

Dövlət başçısının sözünə görə, bu proses indi sürətlə gedir və artıq Avropa İttifaqı tərəfindən elan edilib ki, Prezident Şarl Mişelin təşkilatçılığı ilə Ermənistanın baş nazirinin mənimlə yeni görüşü olacaqdır: “Ümid edirəm ki, bu görüş məhsuldar olacaq. Çünki artıq bir neçə görüş olub və biz Azərbaycanla Ermənistan arasında sülhə doğru irəliləməliyik, mümkün olduğu qədər qısa müddətdə sülh sazişini imzalamalıyıq. Azərbaycan bizim baxışımıza uyğun olaraq bu razılaşmanın əsas prinsiplərini təqdim edib”.
Prezident münaqişənin artıq öz həllini tapdığını vurğulayıb: “Azərbaycan bunu özü etdi və indi də Azərbaycanla Ermənistan arasında münasibətləri nizamlamaq vaxtıdır. Bizə Ermənistan rəsmiləri tərəfindən müəyyən mesajlar daxil olur. Bu yaxınlarda mənə verilən məlumata görə, bu mesajlardan biri də ondan ibarətdir ki, onlar bizim təklifimizi məqbul hesab edirlər. Bu, çox yaxşı xəbərdir və mən ümid edirəm ki, Brüsseldəki görüşdə bu məsələyə daha çox aydınlıq gətiriləcək”.

Xarkov vilayətinin Çuquev şəhərinin sakini Yelena Kurilonun portreti hərraca çıxarılıb.

Zamantv.az xarici KİV-ə istinadən xəbər verir ki, yaralı müəllimənin rəsmi Amerikanın “Heritage Auctions” hərracında 100 min dollara satılıb.

Məlumata görə, əldə olunan vəsait Ukrayna ordusuna ayrılacaq.
Qeyd edək ki, həmin vaxt bu şəkil sosial şəbəkələrdə gündəm olmuşdu və fevralın 24-də dünya nəşrlərinin üz qabığında, birinci səhifələrində dərc edilmişdi.

Qeyd edək ki, həmin vaxt bu şəkil sosial şəbəkələrdə gündəm olmuşdu və fevralın 24-də dünya nəşrlərinin üz qabığında, birinci səhifələrində dərc edilmişdi.

Təhsil Nazirliyi Naxçıvan Muxtar Respublikasının Babək rayonu Nehrəm qəsəbə 3 nömrəli tam orta məktəb binasının çökməsi ilə bağlı məlumat yayıb.

Zamantv.az xəbər verir ki, məlumatda bildirilib ki, Naxçıvan Muxtar Respublikasının Babək rayonu Nehrəm qəsəbə 3 nömrəli tam orta məktəb binasının çökməsi nəticəsində şagird və müəllim kollektivi arasında çoxsaylı tələfatın, yaralıların olması ilə bağlı mediada yayılan xəbərlər tamamilə yanlışdır və heç bir əsası yoxdur:

"Aidiyyəti qurumlara istinadən bildiririk ki, həmin məktəbdə aparılan təmir-tikinti işləri ilə əlaqədar 1 mart 2022-ci il tarixindən məktəbin şagird kontingenti Nehrəm qəsəbə 1 nömrəli tam orta məktəbdə təhsillərini davam etdirirlər.
eyd olunan məsələ ilə bağlı ictimaiyyətə əlavə məlumat veriləcək".

Naxçıvan Muxtar Respublikası Babək rayonunun Nehrəm qəsəbəsində 3 saylı tam orta məktəb çöküb.

Zamantv.az APA-ya istinadən xəbər verir ki, hadisə məktəbdə inşaat işləri aparılan zaman baş verib.

Hadisə nəticəsində ölənlərin və yaralananların olduğu bildirilir.

Naxçıvan MR Xəstəxanasının qəbul şöbəsindən APA-ya bildirilib ki, xəstəxanaya 3 nəfərin meyiti və bir yaralı gətirilib.

Yaralı şəxs reanimasiyaya yerləşdirilib.

Qeyd edilib ki, ölənlər məktəbin inşaat işində çalışanlar olub.

“Azərbaycan Üçtərəfli Bəyanatın müddəalarına tam əməl edir”.

Bu sözləri Türkiyə Prezidenti Rəcəb Tayyib Ərdoğan Azərbaycanla Ermənistan arasında Qarabağdakı qarşıdurma, atəşkəsin pozulması ilə əlaqədar jurnalistlərin suallarını cavablandırarkən deyib.

“Azərbaycan tərəfindən heç bir pozuntu yoxdur. Burada Azərbaycana hücum olduğu üçün müdafiə reaksiyası da olub. Əsas odur ki, Üçtərəfli Bəyanatın müddəalarına uyğun olaraq, erməni silahlı ünsürlərinin Azərbaycanın beynəlxalq səviyyədə tanınmış ərazilərindən tamamilə çıxarılması təmin edilsin”.

Martın 30-da “Böyük Qayıdış” Gənclər Təşkilatı tərəfindən Milli Azərbaycan Tarixi Muzeyində 31 Mart - Azərbaycanlıların Soyqırımı Günü ilə əlaqədar “1918-ci il 31 mart soyqırımı gerçəkləri” adlı tədbir keçirilib. Tədbir tariximizin ən qanlı səhifələrindən biri olan ermənilərin azərbaycanlılara qarşı törətdiyi 31 Mart Soyqırımı qurbanlarının əziz xatirəsini yad etmək, baş vermiş qırğınlar və soyqırımı gerçəkləri haqqında məlumatları tarixi faktlarla gənclərə çatdırmaq məqsədilə təşkil olunub.

Dövlət himninin səsləndirilməsi, soyqırımı qurbanlarının və şəhidlərin əziz xatirəsinin bir dəqiqəlik sükutla yad edilməsi ilə başlayan tədbirdə Milli Azərbaycan Tarixi Muzeyinin rəhbərliyi və əməkdaşları, “Böyük Qayıdış” Gənclər Təşkilatının idarə heyətinin üzvləri, könüllülər və üzv gənclər iştirak ediblər.

Açılış nitqləri ilə çıxış edən Milli Azərbaycan Tarixi Muzeyinin baş direktoru akademik Nailə Vəlixanlı və “Böyük Qayıdış” Gənclər Təşkilatının icraçı direktoru Nail Şükürov tarixən erməni vandalları tərəfindən azərbaycanlılara qarşı məqsədyönlü şəkildə həyata keçirilmiş etnik təmizləmə siyasətindən, xalqımızın soyqırımına və deportasiyaya məruz qalmasından danışıblar.

Bildirilib ki, gənclərin bu tarixi gerçəklikləri dərindən öyrənərək həm yerli, həm də beynəlxalq platformalarda, müxtəlif internet resurslarında, qlobal sosial şəbəkələrdə geniş təbliği zəruridir. 31 Mart Soyqırımı faciəsinin araşdırılması və həqiqətlərin dünyaya yayılmasında ümummilli lider Heydər Əliyevin müstəsna xidmətləri xüsusilə qeyd edilərək, məhz ulu öndərin 1998-ci il martın 26-da imzaladığı “Azərbaycanlıların soyqırımı haqqında” Fərmanla 1918-ci il martın 31-nin “Azərbaycanlıların Soyqırımı Günü” elan edildiyi vurğulanıb.

Tədbirin qonağı, Milli Məclisin deputatı, AMEA-nın müxbir üzvü, professor Musa Qasımlı tərəfindən 31 Mart Soyqırımının səbəbləri, həyata keçirilməsi üsulları, nəticələri haqqında tarixi faktlarla ətraflı məlumat diqqətə çatdırılıb və gənclərin mövzu ilə bağlı sualları cavablandırılıb.

Bu gün Bakı Ağır Cinayətlər Məhkəməsində Faiq Qəniyevin sədrliyi ilə Ukraynada tutularaq Azərbaycana gətirilən iş adamı Maqsud Mahmudovun barəsindəki cinayət işi üzrə növbəti məhkəmə prosesi keçirilib.

Zamantv.az xəbər verir ki, prosesdə zərərçəkmişlər ifadə veriblər.

Zərərçəkmiş Leyla Yusifova bildirib ki, Maqsud Mahmudovu heç vaxt görməmişəm:
“Ana məbləği ödədim. Qızılı götürmək üçün getdim. Gördüm ki, çoxlu insanlar toplaşıb. Hamı gedib ərizə yazanda, mən də yazdım. Qoyduğum qızılın dəyəri yüksək idi. Təlaşdan nə edəcəyimi bilmirdim. Şikayətdən 7-10 gün sonra qızıllarım geri qaytarıldı. Heç bir şikayətim yoxdur.
Mədinə İsrafilova, Maqsud Mahmudov və ya başqası heç kimi tanımırdım. Sadəcə, verilən çeklərin üzərində Mədinə İsrafilovanın adı yazılmışdı. Sadəcə Maqsud Mahmudovu bir dəfə görmüşəm”.

Vəkilin suallarını cavablandıran zərərçəkmiş deyib ki, qızıllarını ödəyəndə bildiriblər ki, qızıllar bankdadır:

"Mənə dedilər ki, qızıllar bankda girovdur. Mən də dedim ki, mən banka girov qızıl qoymamışam. Lombardda Maqsudu tanımamışam, onunla heç bir söhbətim olmayıb. Fikirləşməmişəm ki, bu lombard kimindir, orada qızlar otururdu. Onlarla iş görürdüm. Vaxtında faizlərimi ödəmişəm".

Zərərçəkmiş Rəna Məmmədova isə qeyd edib ki, 5500 manat dəyərində qızılım hələ də geri qaytarılmayıb:

“Mənim pula ehtiyacım olduğu üçün 70 qramlıq qızıl lombarda qoyub, pul götürdüm. Daha sonra əsas məbləği ödədim və qızıllarımı götürmək üçün lombarda yaxınlaşdım. Problem olduğunu, 10 gün sonra yenidən yaxınlaşmağımı istədilər. Daha sonra anam xəstələndi, rəhmətə getdi deyə başım qarışdı.

Mədinə İsrafilova ilə bir dəfə danışdım, o, heç nə bilmədiyini dedi. Ondan sonra əlaqə kəsildi. Hazırda həmin ziyan qalmaqdadır. Səhhətimdə də problem yarandı. Qızıllarımı geri qaytarmırlar.

Mədinə dedi ki, Maqsud qızılları götürüb gedib. Hazırda da 70 qrama yaxın qızılı ala bilmirəm. Hamının qızıllarını qaytarıb, mənim yox. Ümumilikdə 5 min manatdan artıq ziyan vurulub mənə".

Zərərçəkən Firəngiz Dadaşova deyib ki, özümün qızıllarımın borcunu ödəyə bilmədiyim üçün götürə bilmədim:

“Baldızımın qızıllarını lombarda qoymuşduq. Əsas məbləği ödəyib, qızılları götürə bilmədik. Dedilər ki, Maqsud Mahmudov qızılları götürüb, qaçıb. Hamımız polisə ərizə yazdıq. Ərizədən sonra pulunu ödədiyim qızılları geri qaytardılar.
Mən illərlə Mədinə İsrafilova ilə işləmişəm. Lombardın sahibi kimi də Mədinə İsrafilovanı tanıyırdım”.

Zərərçəkmiş Pərvanə Babayeva borcu Mədinə İsrafilovaya ödədiyini deyib:

“Hər ay faiz borcumu ödəyirdim. Polisə şikayət etdikdə əsas məbləği ödəməmişdim. Ərizə yazandan sonra borcumu tam ödəyib, qızıllarımı Mədinə İsrafilovadan götürdüm”.

Maqsud Mahmudov yenidən hakim Faiq Qəniyevə zərərçəkənlərin yönləndirildiyi üçün narazılıq edib.

Zərərçəkmiş Muxtar Qədimov deyib ki, Maqsud Mahmudovu heç zaman görməmişəm:

“Mən illərlə lombarda qızıl qoyub, pul götürmüşəm. Hamı ərizə yazırdı deyə, mən də yazdım. Şikayət etdiyim zaman əsas məbləği ödəmişdim. Maqsud Mahmudovu heç zaman görməmişəm”.

Sonra Emin Kərimov ifadə verdi. O dedi ki, şikayətimdən sonra qızıllarım geri qaytarılıb:

“Əsas məbləği ödəyib, qızılı götürmək üçün getdim. Gəlib gördüm ki, lombard bağlıdır. Hamı ilə birgə gedib ərizə yazdım. Şikayətdən təxminən 10 gün sonra məni lombarda dəvət edib, qızılları qaytardılar. Maqsud Mahmudovu birinci dəfədir ki, indi görürəm”.

Zərərçəkən Taleh Süleymanov qızılların aldığını, heç bir şikayətinin olmadığını bildirib:

“Ana məbləği ödədim qızıllarımı götürmək alınmadı. Dedilər ki, Maqsud Mahmudov qızılları götürüb, qaçıb. Polisə şikayət etdim, evə qayıtdım. Sonra qızıllarımı dəvət edib verdilər. Maqsud Mahmudovu heç vaxt görməmişəm”.

Məhkəmənin növbəti iclası aprelin 4-ə təyin edildi.

Qeyd edək ki, Cinayət Məcəlləsinin 178.3.2 (dələduzluq külli miqdarda ziyan vurmaqla törədildikdə) maddəsi ilə Daxili İşlər Nazirliyi tərəfindən beynəlxalq axtarışa verilmiş Mahmudov Maqsud Soltan oğlu 2021-ci ilin iyul ayında Ukrayna ərazisində tutulub.
O, sentyabrın 18-də Ukraynadan Azərbaycana gətirilərək istintaqa təhvil verilib.
İstintaq dövründə onun barəsində xüsusi dəyəri olan əşyaları talama maddəsi ilə ittiham irəli sürülüb.

İş üzrə 90 nəfər zərərçəkmiş var.