“Unibank” kredit borcunu ödəyə bilməyən Vətən müharibəsi qazisini məhkəməyə verib.

Gununsesi.info xəbər verir ki, bank Yüzbaşov Şahin Şakir oğlu barədə Cəlilabad Rayon Məhkəməsində iddia qaldırıb.

İşin mahiyyəti müqavilələrdən əmələ gələn öhdəliklər üzrə mübahisələrlə (kredit müqaviləsi üzrə mübahisələr) bağlıdır.

İddia hakim Vüsal Cəbrayılovun sədrliyi ilə araşdırılacaq.

Qeyd edək ki, Cəlilabad rayon sakini olan Ş.Yüzbaşov Vətən müharibəsi qazisidir. O, Vətən müharibəsinə könüllü olaraq qatılıb və döyüşlərin birində yaralanıb. Evin tək övladı olan Ş.Yüzbaşov 3-cü qrup əlildir. Uşaq yaşlarında atasını itirən Ş.Yüzbaşovu anası böyüdüb. Amma onun anası indi ağır yataq xəstəsidir.

Xatırladaq ki, bu ilin əvvəlində “Azərbaycan Banklar Assosiasiyası”nın sədri Zakir Nuriyev Vətən müharibəsi qazilərinin kredit borclarının silinəcəyini bildirib.

Bu ilin ilk 2 ayı ərzində Azərbaycandan xarici ölkələrə 222,8 ton saflaşdırılmamış, əla növ birinci sıxma zeytun yağı ixrac olunub.
Yeniavaz.com xəbər verir ki, ixrac olunan zeytun yağının 1 litrinin orta gömrük dəyəri 5,6 dollar (9,5 manat) olub.
Qeyd edək ki, Azərbaycan zeytun yağını aşağıdakı ölkələrə satıb:
İspaniya – 110 ton (1 litri 9,4 manata)
Rusiya – 49,6 ton (1 litri 12,4 manata)
İsrail – 44 ton (1 litri 7,7 manata)
Türkiyə – 19,3 ton (1 litri 7,2 manata)
Tacikistan – 5,5 ton (1 litri 7,8 manata)
Məlumat üçün onu da bildirək ki, Azərbaycan xaricə satdığı saflaşdırılmamış, əla növ birinci sıxma zeytun yağının əvəzində xaricdən ölkəyə 312,2 ton zeytun yağı idxal edib. İdxal olunan zeytun yağının 1 litrinin orta gömrük dəyəri 3,5 dollar (6 manat) olub. İxracda olduğu kimi idxalda da ən çox pay İspaniyanın payına düşüb. Bu ilin ilk 2 ayında Azərbaycan İspaniyadan 147,5 ton zeytun yağı idxal edib. İspaniyadan gətirilən zeytun yağının 1 litrinin orta gömrük dəyəri 4 dollar (6,7 manat) olub.
Onu da qeyd edək ki, bu ilin mart ayında Azərbaycanda zeytun yağının pərakəndə satış qiyməti 16,2 manat olub. Açıqlanan məlumatlardan da göründüyü kimi, ölkə daxilində satılan zeytun yağının qiyməti həm ixrac, həm də idxal olunan zeytun yağının qiymətindən yüksəkdir.

"Əvvəllər qaz sayğacımızda vəsait bitəndə məcbur gedib on, onbeş manat ödəyirdik... Özbaşına söküb dəyişdilər, nə maraqları varsa... İki gündü, bağlayıblar... Nə az nə çox hardasa 400 manat borcumuz var... Qışda bir dəfə 100 manat ödəmisik... Bu qədər də qaz yazar?"

Pravda.az-ın xəbərinə görə, bunu yazıçı Aləmzər Sadıqqızı bildirib.

"İşıq bir yandan təhdid edir, su bir yandan... Nefti, qazı olan ölkənin 300 manat maaş alıb 500 manat ödəyən yazarından nə gözləyirsiz?" - o qeyd edib.

Yaponların bir atalar sözü var: yalan dörd nalla gedər, həqiqət isə addım-addım irəliləyər, lakin yenə də vaxtında çatar... Azərbaycanın Yaponiyadakı səfiri Gürsəl İsmayılzadə bilsəydi ki, bacısı Nigar İsmayılzadə dörd nalla hansı yalanların müəllifidir, amma yenə də reallıq gec-tez özünü yetişdirib, hər halda yaşadığı ölkədə utanardı. Ən tragik gerçəklik isə odur ki, Gürsəl bəyin səfir olduğu ölkənin təhsil keyfiyyəti ilə bacısı Nigar xanımın dekan müavini kimi təhsilə verdiyi "töhfə" arasında bir uçurum mövcuddur. Əgər onun yaşadığı ölkədə yaponlar bilsəydilər ki, səfirin bacısı BDU-da İlahiyyat fakültəsinin dekan müavini postunda rüşvət qalmaqalı ilə gündəmə gəlib, bir diplomata hansı münasibət sərgilənərdi?! Həyatın ironiyasına bax - adı İlahiyyat olan fakültənin dekan müavini rüşvətlə ad çıxarır. Maraqlıdır, ilahiyyatçılar buna necə qiymət verərdilər? Bu hadisəyə yalnız belə ad vermək olar - qardaşı "yaponski" səfir olan bacının BDU-da "kitayski" əməlləri...
Bəli, çoxuna məlumdur ki, Nigar İsmayılzadə yayılan səs yazısı ilə ölkədə və tələbələr arasında populyarlaşıb.

Sonra BDU İlahiyyat fakültəsinin dekan müavini Nigar İsmayılzadə tələbələrə yüksək səslə hədə-qorxu gələrək yazdıqları şikayət məktubunu geri götürmələrini tələb etmişdi. O zaman BDU rəhbərliyi tərəfindən rüşvət şikayətini yoxlamaq üçün komissiya təyin olunmuşdu. Amma ki nə fayda?! Hələ də öz işini davam etdirir. Yaponiyada belə skandal olsaydı, çoxdan dekan müavini də, onun vəzifə tutan qohumu da istefa verərdi. Çünki sivil ölkələrdə istefa mədəniyyəti var. Ancaq bizdə hərə "öz ayağından asılır" misalı var, hərçənd o da işləmir, İsmayılzadə sanki rüşvət tələb edən tərəf deyilmiş, özünü məsələyə "fransız" aparır.
Hətta Komissiya və BDU rəhbərliyinə Nigar İsmayılzadədən etirazını bildirən tələbələri yanına çağıran dekan müavini özünün lehinə ərizə məhkəməylə qorxudaraq, məqsədinə nail olmağa çalışırdı. Yeri gəlmişkən, xanım
İsmayılzadənin intihar etmiş keçmiş MTN zabiti İlqar Əliyevlə də əlaqələri haqda mətbuatda çox deyilib. Amma onun MTN zabiti ilə işbirliyi nədən ibarət olub bəlli deyil. Hətta bundan sonra da İsmayılzadə yoluna davam edib, bir ara daha yüksək post eşqinə düşüb. Görünür, baş verənlər adi hal imiş. Əvəzində məhkəməyə verdiyi tələbə ölkəni tərk etmək məcburiyyətində qaldı.Belə olduğu halda cənab səfirə sualımız yaranır:- Bu repressiv davranışlar Yaponiya təhsilində ola bilərmi, cənab səfir Gürsəl bəy?

Nişad Mehdiyev
Rubrika.Az

Naxçıvanda korrupsiyanın yeni forması kəşf olunub – “mirfırıldaq” növü.

Niyə məhz “mirfırıldaq”?

Çünki bir vaxtlar Vasif Talıbovun ən çox korrupsiya ilə məşğul olan, camaata fırıldaq gələn məmurlarının familiyası Seyidov idi, adlarının da başına “mir” əlavə olunurdu. Məsələn, keçmiş İqtisadiyyat naziri Famil Seyidov, Ali Məclis sədrinin müavini Mirhəşim Seyidov, Naxçıvan şəhər meri Mirsənani Seyidov və s. kimi.

Vasif Talıbov istefaya gedəndən sonra Naxçıvan əhalisi xeyli sevinmişdi ki, nəhayət bu seyid korrupsionerlərdən “mir fırıldağından” canımız qurtardı. Amma necə deyərlər, sən saydığını say, gör, “canişin” nə sayır? Məsələ burasındadır ki, “canişin” əfəndi də öz sələfinin bir çox siyasətini eynilə yerinə yetirməkdə pərgarlığını dəfələrlə nümayiş etdirib. “Mir korrupsionerlər” və “mir fırıldaq”lar sahəsində də ondan geri qalmır.

Hər halda Naxçıvan Dövlət Filarmoniyası işçilərinin redaksiyamıza göndərdiyi məktubdan belə anlaşılır. Musiqiçilərin iddiasına görə, onlara 8 aydır Naxçıvan MR Mədəniyyət naziri əvəzi Həsən Seyidov fırıldaq gəlir.

Necə? Gəlin, “canişin”sayağı “mir fırıldaq” hekayəsini şikayətçilərin öz dilindən dinləyək.

“8 ay ərzində 5 konsertimiz olub, hər konsertdə adımıza yazılan qonorarları Naxçıvan MR Mədəniyyət Nazirliyinin rəhbər şəxsləri mənimsəyirlər”.

Ovqat.com-a bu barədə redaksiyamıza məktub göndərən Naxçıvan Dövlət Konservatoriyasının işçiləri bildiriblər.

Şikayətçilərin bildirdiyinə görə, nazirlik onları Novruz bayramında da rahat buraxmayıb. Açıq havada 5 gün konsert verdiriblər. Konsertlərdən əvvəl musiqiçilərə yaxşı qonorar vəd edən Naxçıvan MR Mədəniyyət Nazirliyinin rəhbərliyi indi öz sözünü yerinə yetirmir:

“Novruz bayramında istirahətimizə haram qatıb çağırdılar açıq havada 5 gun konsert verməyə. Adımıza yazılan qonorarı isə vermədilər”.

Musiqiçilər üzləşdikləri problemlə bağlı “Gündəlik Naxçıvan” adlı sosial media orqanına müraciət ediblər. Şikayətləri dərc olunan kimi Naxçıvan MR Mədəniyyət Nazirliyinin Aparat rəhbəri Vəli Səfərov onlarla görüşə gəlib: “Vəli müəllim camaatı başına yığıb nağıl danışdı, sonra çıxıb getdi. Amma hələ də qonorarımızı vermək istəmirlər”.

Şikayətçilər onların pulunun nazirlik rəsmiləri tərəfindən mənimsəndiyinə inanırlar. Dediklərinə görə, ötən il də eyni problemlə qarşılaşmışdılar. Mətbuat vasitəsilə dərdlərini ictimailəşdirəndən sonra köhnə müdirləri işdən çıxarılıb və mənimsənilən qonorarlar verilib. İndi isə “köhnə hamam, köhnə tas” moduna keçən nazirlik rəsmiləri musiqiçilərin halal haqlarını özləri “mənimsəyirlər”:

“Köhnə müdirimizi işdən çıxardıqdan sonra yenisini verdilər. Yaxşı adamdır, işçilərin tərəfini tutur Amma yazığın biridir, Ona işləməyə imkan vermirlər. İndi qonorarlarımız birbaşa nazirlikdə mənimsənilir. Bu işə nazir əvəzi Həsən Seyidov rəhbərlik edir. Dəfələrlə şikayət etmişik, baxan yoxdur. Kimdən kimə şikayət edəsən? Axı, pulumuzu mənimsəyən özləridir. Bizi az qala hər ay konsert proqramlarına çıxmağa məcbur edirlər. Bir qəpik də vermirlər. Hər dəfə bizə 10 minlərlə manat pul atırlar”.

“Sabahın alimləri” XIII Respublika Müsabiqəsinin açılış mərasimi keçirilib.

Açılış mərasimində elm və təhsil naziri Emin Əmrullayev, millət vəkilləri, həmçinin dövlət qurumları, özəl müəssisələrinin rəhbər heyəti və digər qonaqlar iştirak ediblər.

Təhsil İnstitutunun direktor müavini, layihə direktoru Fuad Qarayev müsabiqənin statistik göstəriciləri ilə bağlı hesabat təqdim edib.

O, 8 istiqamət üzrə qeydiyyatdan keçən, qəbul olunan və qiymətləndirilən layihələr barədə ətraflı məlumat verib:

“Müsabiqə üzrə qeydiyyatdan keçən 652 layihədən 113-ü sərgidə iştirak hüququ qazanıb. Təqdim olunan layihələrin 46-sı rayon ümumtəhsil məktəblərinin payına düşür. 113 layihəni 200 şagird təqdim edəcək. 26 fərdi, 87 kollektiv layihədir".

Qeyd edək ki, müsabiqədə növbəti 2 gün ərzində şagirdlərin 8 istiqamət (riyaziyyat, fizika və astronomiya, kimya, biologiya, tibb və sağlamlıq, ekologiya və ətraf mühitin idarə olunması, mühəndislik, kompüter elmləri) üzrə elmi-tədqiqat layihələri dəyərləndiriləcək. Bununla yanaşı, qaliblər sırasından seçilən məktəblilər ABŞ-də keçirilən sərgidə ölkəmizi təmsil edəcəklər.

Müsabiqənin keçirilməsində məqsəd elmi-tədqiqat və yaradıcılıq potensialı olan istedadlı şagirdləri aşkara çıxarmaq, onlarda tənqidi düşünmə, problem həlletmə, vaxtın idarə olunması, natiqlik və ünsiyyət kimi bacarıqları inkişaf etdirmək, ali təhsil müəssisələri və elmi təşkilatlarla ümumtəhsil məktəbləri arasında əlaqələri genişləndirmək, həmçinin şagirdlərin oxşar maraqları olan həmyaşıdları ilə şəbəkələşməsini təmin etməkdir.

Naxçıvan Beynəlxalq Hava Limanının direktoru vəzifəsindən azad edilib.

Bununla bağlı müvafiq əmr verilib.

Əmrə əsasən, Naxçıvan Beynəlxalq Hava Limanının direktoru Mənşur Gülməmmədli vəzifəsindən azad olunub.

Qeyd edək ki, o, 14 ildir bu vəzifədə çalışırdı.

Ovqat.com-un əldə etdiyi məlumata görə, Mənşur Gülməmmədlinin 14 illik fəaliyyəti müvafiq qurumlar tərəfindən təftiş olunur.

Maraqlıdır ki, Naxçıvan Beynəlxalq Hava Limanının direktoru bir neçə il əvvəl mülki aviasiyadakı xidmətlərinə görə “Şərəf” nişanı və pul mükafatı ilə təltif olunmuşdu. Təqdim etdiyimiz bu şəkillər o təltifin yadigarlarıdır.

Ağcabəd irayon Taxtakörpü ərazisindəki Canavarlı obasından Qara ağac oobasına 3 km uzunluğunda yol çəkilməliydi...

Biz çəkilməliydi, yazırıq, əslində sənədlərə görə bu yol çəkilib və 3 km-lik bu yola nə az, nə çox, 109000 pul ayrılıb. Amma şəkillərdən də görünür ki, bu yola 110 min manatın 10 faizi belə sərf edilməyib.

Ağcabədi rayonunun Taxtakörpü ərazisində Laçınlılar üçün salınan “Qayğı” qəsəbəsindən Poliqon-a daxil olan şikayət məktubunda bildirilir ki, Taxtakörpü ərazisindəki Canavarlı obasından Qara ağac oobasına 3 km uzunluğunda yol çəkilməliydi və bu yolun elan olunan tender satışından da məlum olur ki, yolun çəkilişi üçün 109 291 manat ayrılıb. Lakin Laçın rayon İcra Hakimiyyəti ancaq yolun bir hissəinə çınqıl tökməklə kifayətlənib.

Sakinlər bildirirlər ki, ayrılmış vəsaitə Qara ağac obasında cəmi 300 metr ara yol çəkiblər. Bunun üçünsə 4 gün ərzində yola 70 maşin çınqıl tökülüb.

Sakinlər qeyd edirlər ki, bir maşın çınqıl Ağcabədidə 130 manata satılır və bu halda yola çəkilən xərc də cəmi 9100 manat edir. Əlavə 300 metr xam yola da çınqıl tökülüb. İndi isə həmin ərazidə çınqıldan əsər belə qalmayıb.

Şikayətçilər həmçinin onu da bildirirlər ki, sakinlər qapılarına öz pullarıyla çınqıl tökdürüblər. Lakin icra hakimiyyəti həmin çınqılları da sənədləşdirərək öz adlarına çıxıblar.

Bununla bağlı sakinlər haqlı edərək sual edirlər ki, ilkin vəziyyətində olan yola ayrılan 110 min manat vəsait hara yoxa çıxıb?

Biz də bu sualla Laçın rayon İcra Hakimiyyətinə sorğu ilə müraciət etdik. Lakin sorğumuza cavab ala bilməmişik.

“Məhz Azərbaycanın razılığı əsasında Fransanın 25 ilə yaxın müddətdə vasitəçilik roluna baxmayaraq, bu ölkənin 2020-ci il Vətən müharibəsindən sonra açıq-aşkar anti-Azərbaycan addımları hər kəsə məlumdur”.

Bu barədə Xarici İşlər Nazirliyinin mətbuat katibi Ayxan Hacızadə Fransanın ölkəmizdəki səfirinin geri çağırılması ilə bağlı yerli mətbuatın sualına cavabında bildirib.

Onun sözlərinə görə, Fransa tərəfinin Azərbaycanı birtərəfli hərəkətlərdə təqsirləndirməsinə baxmayaraq, ölkəmizin Fransaya qarşı addımları və verdiyi rəsmi bəyanatlar yalnız bu ölkənin destruktiv fəaliyyətinə cavab xarakterli olub. Ölkəmizə qarşı qarayaxma kampaniyasına baxmayaraq, tərəfimizdən hər zaman dialoq qapıları açıq saxlanılıb.

“Fransa xüsusilə son 3 il yarım müddətdə atdığı addımlar ilə Azərbaycanla Ermənistan arasında suverenlik və ərazi bütövlüyü əsasında əlaqələrin normallaşdırılması səylərini ciddi şəkildə sual altına qoyub və vəziyyətin gərginləşməsinə rəvac verib.

Fransanın BMT Təhlükəsizlik Şurasında, Avropa İttifaqı, Frankofoniya kimi təşkilatlarda və digər beynəlxalq platformalarda dəfələrlə Azərbaycan əleyhinə sənəd layihələrinin təşəbbüskarı olması, bu ölkənin bitərəf vasitəçi iddialarının tamamilə əsassız olduğunu sübut edib.

Məhz Fransada hakim partiyanın nümayəndələrinin təşəbbüsü ilə Fransa Parlamentində ölkəmizə qarşı çoxsaylı əsassız ittihamların, təhqir və təhdidlərin əks olunduğu, Azərbaycanın ərazi bütövlüyü və suverenliyini sual altına qoyan və xələl gətirən, keçmiş qondarma rejimi tanıyan qərar və qətnamələr qəbul edildiyini xatırlatmaq istərdik.

Bu müddət ərzində Fransa ərazisində mövcud olan Azərbaycanofob mühitin nəticəsi olaraq səfirliyimizə qarşı dəfələrlə hücumların edilməsi və səfirliyin binasına zərər yetirilməsi, nəhayət ağlasığmaz addım kimi 19-cu əsr görkəmli Azərbaycan şairəsi Xurşidbanu Natəvanın büstünə qarşı vandallıq aktlarının törədilməsi və hökumət tərəfindən bunun qarşısının alınması üçün tədbirlər görülməməsi Fransanın Azərbaycan əleyhinə kampaniyasının tərkib hissələridir.

Eyni zamanda, Azərbaycanın BMT-nin İqlim Dəyişikliyi üzrə Çərçivə Konvensiyasının Tərəflər Konfransının 29-cu sessiyasına (COP29) sədrliyini və ev sahibliyini hədəf alan çağırışlar edən Fransanın Azərbaycanı birtərəfli addımlarda təqsirləndirməsi tam əsassızdır.

Bununla yanaşı, Ermənistanın geniş şəkildə silahlanmasını həyata keçirən, bölgədə militarizmi təşviq edən Fransanın addımlarının sülhə xidmət etmədiyi gün kimi aydındır.

Azərbaycan tərəfi dəfələrlə Fransaya təhdid və təzyiq dili ilə danışmağın heç bir nəticə verməyəcəyini bildirib və öz milli maraqlarının qorunması üçün bütün zəruri tədbirlər görəcəyini bir daha bəyan edir”, - XİN rəsmisi əlavə edib.

Qazax Rayon İcra Hakimiyyəti başçısı Rəcəb Babaşovun birinci müavini Məmməd Alıyev haqda ilginc məlumatlar var.

Dia-az.info Aztoday-a istinadən xəbər verir ki, bu barədə alfa.tv kanalı məlumat yayıb. Məlumatda qeyd edilir ki, rayon sakinləri Məmməd Alıyevin özbaşınalıqlarından təngə gəlib.

Xatırladaq ki, Məmməd Aliyev pandemiya dövründə oğluna çal-çağırlı toy etməsi, bələdiyyə sədri olan bacısı oğluna xəstəxanada əlavə iş verdirməsi və oğlu Elnur Alıyevə 120 min dollarlıq “Land Cruiser” avtomobili alması ilə gündəm olmuşdu. O, əvvəllər polis oqranlarında çalışıb. 1991-ci ildə ermənilərlə üzbəüz Əskipara kəndinin mühafizəsində yerli əhali ilə birlikdə rayon polisinin əməkdaşları bütün döyüşlərdə gerçəkdən çox böyük qəhrəmanlıqlar göstəriblər. Elə bu döyüşlərin birində qəflətən polis məmuru Məmməd Alıyev “ürək keçmə” xəstəliyinə tutulur və beləcə polisdən uzaqlaşır. Onu yaxından tanıyan polis işçiləri aralarında ona “Dezertir Mamed” ayamasını verib. Aradan illər keçsə də, Məmməd Alıyevin ürək xəstəsi olmasını bir nəfər də olsun müşahidə etməmişdir.

Rayon icra hakimiyyətində işləmək ən böyük arzusu olan Məmməd Alıyevin əsil soyadı Dəlibaşov olub. Ancaq, həyatında ilk dəfə uzun illər arzu etdiyi vəzifəyə təyin olunduqdan sonra, soyadını dəyişdirərərək dönüb olub Alıyev. İlk əvvəl Məmməd Alıyev icra hakimiyyəti başçısının heç olmasa humanitar məsələlər üzrə müavini olmaq sevdasına düşüb. Dərhal həmin sahəni peşəkarcasına idarə edən Gülayə Həsənovanı yerindən dəbərtməyə çalışıb. Bu dəyərli, savadlı və zəkalı xanıma gücü çatmadığı üçün, məcbur olub onun həyat yoldaşı Natiq Həsənova ilişib və Natiq müəllim üçün bürokratik əngəllər yaratmaqla yanaşı, həm də tələ quraraq, ən azından onu işdən uzaqlaşdırmağa nail ola bilib. Məmməd Alıyev Qazağın keçmiş İcra başcısı, Rauf Hüseynovun birbaşa kadrıdır və məhz onun təşəbbüsü vəzifəyə təyin olunmuşdur. Rauf Hüseynovun ən fəal pul yığanlarından olub. Indi isə, Məmməd Alıyev Qazax şəhərində məşhur Gidi ləqəbi ilə tanınan narkobaronun bacanağı ilə iş birliyi qurmuşdur. Keçmişdə benzin daşıyan Qaz-53 şoferi olan Mamed bacanağı Gidinin hesabına Qazaxın mərkəzində – “Akasiya” restoranının qarşısında və Qazaxın birinci Şıxlı kəndi ərazisində, yolun kənarında nəhəng yanacaqdoldurma məntəqəsi açmışdır. Bu yanacaq doldurma məntəqəsinin istifadəçiləri Avropaya çıxışı olan Tır avtomobilləridir. Hər gün 100 ədəddən çox tir orda yanacaq doldurur. Hər bir tirin doldurduğu yanacağın qiyməti isə, 700-800 dollar civarındadır. Yanacaq doldurma məntəqələrinin hər ikisinin adı “Turan”dır. Mamed öz qızının adına bu yanacaq doldurma məntəqəsini qoyub. Hər iki yanacaqdoldurma məntəqəsinin qiyməti on miliyon dollar dəyərindədir.

Məmməd Alıyevin harada və necə ali təhsil alması, “polisdə sıravi nəfər olan və sonradan dezertir ayaması ilə tanınan” Məmməd Alıyev hansı sahə üzrə ali təhsili alması da müəmmalıdır. Bir də onun icra hakimiyyətində şöbə müdiri olandan sonra, Xanlıqlar kəndindəki villası, rayon mərkəzindəki dəbdəbəli imarəti, Bakıdakı çoxsaylı mənzilləri, bir sıra “obyektləri” hansı vəsaitlə tikdirməsi də mübhəm sualların yaranmasına səbəb olub. Yəni dolayı yolla o bu gün qazaxlı məmurların siyahısında öndə gedən oliqarxa çevrilib.