"Şikayətim "Azəriqaz"dandır". Dia-az.info bildirir ki, bu barədə Şirvan sakini İlhan Paşayev giley edir.

Narazı vətəndaş daha sonra bildirir: "Şirvan Şəhəri M.Aydinov-72 ünvanında neçə ildir yanarqaz üzünə həsrətik. Uşaqlar soyuqdan donur evdə. Nə çimmək olur, nə də yemək bişirmək.

Konkret biabırçılıqdır. Nə vaxt qaz idarəsinə zəng edib qazın gəlməyini tələb edirsən, yalandan yola verirlər ki, şkafdı... nədi bilmirəm. Guya onda problem var. Adama deyərlər, problem var düzəldin də. Onu da gəlib biz düzəlməsi deyilik ki.

Qaz puluna gələndə 5 nəfər gəlirlər qapıya. Amma qaz tələb edəndə canları çıxır. Hər ay pulumuzu vaxtı-vaxtında ödəyirik qaz əvəzinə borudan gələn havaya pul veririk Allaha and olsun. Xahiş edirəm buna bir əncam qılın. Dərdimizi kimə deyək bilmirik..."

İsmayıllı Rayon İcra Hakimiyyəti “Azerbaijan Coca-Cola Bottlers” MMC-yə rayonun Topçu kəndi ərazisində istehsalat binasının tikintisinə icazə verib.

Yeniavaz.com xəbər verir ki, İcra Hakimiyyəti binanın tikintisinə 24 yanvar 2024-cü il tarixli 02/2024 saylı sənəd əsasında icazə verib.

Bundan başqa 19 may 2023-cü il tarixində şəhərsalma sənədlərinə uyğunluq barədə 3-35-2/2-1645/2023 saylı, həmçinin 25 avqust 2023-cü il tarixində tikinti layihəsinə dair 35792 saylı ekspertiza rəyləri verilib.

Tikintisinə icazə verilən istehsalat sahəsinin tikinti sahəsi 16 min 667,59 kv. metr, ümumi sahəsi 14 min 319,53 kv. metr, mərtəbələrinin sayı isə 1 olacaq.

Onu da qeyd edək ki, İcra Hakimiyyəti “Azerbaijan Coca-Cola Bottlers” MMC-yə tikinti ərazisində sahəsi 20,6 kv. metr olacaq zəhər təmizləyici çənin inşasına da icazə verib. Eyni zamanda ərazidə sahəsi 348 kv. metr olacaq tullantı sahəsi də tikiləcək.

Xatırladaq ki, 1 fevral 2021-ci il tarixdə İqtisadiyyat Nazirliyi ilə “Azərbaycan Coca-Cola Bottlers Limited” MMC arasında Azərbaycanda yeni zavodun tikintisi barədə Anlaşma Memorandumu imzalanıb.

Anlaşma Memorandumu imzalanan vaxt bildirilib ki, 30 milyon dollardan çox sərmayə qoyuluşunu nəzərdə tutan investisiya planına əsasən, “Azərbaycan Coca-Cola Bottlers” MMC İsmayıllı, Oğuz və ya Qəbələ rayonlarının birində beynəlxalq keyfiyyət və təhlükəsizlik standartlarına cavab verən yeni istehsal zavodu quracaq.

Daha sonra zavodun İsmayıllı rayonun Topçu kəndi ərazisində tikilməsi qərarı verilib.

Qeyd edək ki, 1996-cı ildən Azərbaycanda fəaliyyət göstərən “Azərbaycan Coca-Cola Bottlers” MMC məşhur “Coca-Cola” içkisinin ölkəmizdəki rəsmi təmsilçisidir.

“Xural” internet telekanalının həbsdə olan rəhbəri Əvəz Zeynallı və Elnur Şükürovun cinayət işi üzrə məhkəmə prosesi yekunlaşıb.

Bu gün Bakı Ağır Cinayətlər Məhkəməsində hakim Əli Məmmədovun sədrliyi ilə keçirilən iclasda hökm elan edilib.

Hökmə əsasən, Əvəz Zeynallı 9 il, Elnur Şükürov isə 4 il azadlıqdan məhrum edilib.

Xatırladaq ki, prokuror Əvəz Zeynallının 10 il, Elnur Şükürovun isə 5 il azadlıqdan məhrum edilməsini istəyib.

Qeyd edək ki, Əvəz Zeynallı Cinayət Məcəlləsinin 178.2.1-ci (qabaqcadan əlbir olan şəxslər tərəfindən dələduzluq törətmək), 311.3.2-ci (rüşvət alma təkrar törədildikdə), 311.3.3-cü (rüşvət alma- təkrar və külli miqdarda törədildikdə), 311.3.4-cü (ağırlaşdırıcı hallarda rüşvət alma), 32.4, 312.2-ci (rüşvət verməyə təhrik etmə) və 312-1.1-ci (vəzifəli şəxsin qərarına qanunsuz təsir göstərmə - nüfuz alveri) və digər maddələri, Elnur Şükürova isə həmin Məcəllənin 178.2.1-ci (qabaqcadan əlbir olan şəxslər tərəfindən dələduzluq törətmək), 32.4, 312.2-ci (rüşvət verməyə təhrik etmə) və 312-1.1-ci (vəzifəli şəxsin qərarına qanunsuz təsir göstərmə - nüfuz alveri) və digər maddələri ilə ittiham irəli sürülüb.(“Report”)

"Dövlət mənə ev verib, amma hələ evə köçə bilməmişəm".

Bunu Qaynarinfo-ya açıqlamasında Xalq artisti Yasin Qarayev deyib.

Onun sözlərinə görə, problem dövlətin ona verdiyi evə qeydiyyata düşə bilməməsidir:

"Evə nə boyda xərc qoyulub, hələ bundan sonra da müəyyən işlər görülməlidir. Bu da xərc tələb edir. Binaya köçənlər var, yaşayırlar. Amma mən köçə bilmirəm. Buradan qeydiyyatan çıxıb, həmin evə düşməliyəm. Amma bina təhvil alınmadığından qeydiyyata düşə bilmirəm".

Aktyor qeyd edib ki, məsələnin həlli üçün bəzi aidiyyatı qurumlara müraciətlər edilməlidir:

"Mənim də səhhətim ona imkan vermir. Əməliyyat olundum, səhhətimdə problemlər yaranmışdı. İndi canımla əlləşirəm, ona görə fikir də vermirəm. Nasaz olduğumdan evin məsələsinənin həllinə diqqət ayıra bilmirəm".

Prezident İlham Əliyev və Xocalı rayon ictimaiyyətinin nümayəndələri Xankəndi şəhərində olublar.

Bu barədə Prezidentin mətbuat xidməti məlumat yayıb.

Fotoda gördüyünüz avtomobil Emin Uçara məxsusdur. Bu şəxsin kimliyi haqda dəyərli oxucularımıza məlumat verməzdən əvvəl onu qeyd edək ki, maşın Naxçıvan MR Ali Məclisinin binası qarşısında dayanıb. Üstəlik, bu avtomobilə həmin ərazidə tez-tez rast gəlmək olar.

Əlbəttə, ilk baxışdan oxucularımız elə düşünə bilər ki, yəqin bu Emin Uçar deyilən zat Ali Məclisin rəhbər şəxslərindən, yaxud da orada çalışan nüfuzlu məmurlardan biridir. Çünki Ali Məclisin binası qarşısında yalnız sözügedən şəxslərin maşını dayana bilər. Kənar bir vətəndaşın binanın önündə maşın saxlamasına mühafizəçilər heç 1 dəqiqə də imkan verməz. Təbii ki, bu da anlaşılandır. Çünki, ən azı təhlükəsizlik baxımından bütün dövlət binalarının qarşısında yalnız rəsmi şəxslərin, xüsusilə də orada çalışan vəzifəlilərin avtomobillərinin dayanmasına icazə verilir. Bu, Bakıda da, Naxçıvanda da belədir.

Lakin, fotodan da göründüyü kimi, haqqında bəhs etdiyimiz Emin Uçar deyilən şəxs heç bir rəsmi vəzifə daşımasa da, onun öz avtomobilini Ali Məhkəmənin binası qarşısında saxlamasına kimsə etiraz etmir. Doğrusu, bu, indi bir qədər də təəccüb doğurur. Şübhəsiz, Vasif Talıbovun Ali Məclisə sədrliyi dönəmində Emin Uçarın həmin ərazidə maşın saxlamasına kimsə etiraz edə bilməzdi. Hətta o dövrdə E.Uçara Naxçıvanda “gözünün üstündə qaşın var” deyən də tapılmazdı. Çünki onun arxasında məhz Naxçıvan “xan”ı dayanırdı.

Emin Uçarın kimliyinə gəldikdə, oxucularımızı çox da intizarda saxlamadan bildirək ki, əslən qardaş Türkiyədən olan bu şəxs Naxçıvanda çox tanınan iş adamlarından və “xan ailəsi”nə məxsus olduğu bildirilən “Gəmiqaya Holding”in rəsmi ortaqlarından olub. Onun indi bu şirkətdə pay sahibi olub-olmadığı barədə informasiyamız olmasa da, məlumat üçün bildirək ki, Vasif Talıbovla yaxınlığı, biznes şərikliliyi sayəsində son illərədək Muxtar Respublikada ən böyük layihələrin icrası məhz E.Uçara həvalə edilib. Bu baxımdan, onun böyük sərvət sahibinə çevrildiyi haqda informasiyalar var.

Təbii ki, Vasif Talıbov Ali Məclis sədrliyindən uzaqlaşdırılandan sonra, onun qanunsuz biznes şəbəkəsinin ortaqlarının da “vurulacağı” gözlənilən idi. Lakin Emin Uçarın hələ də öz avtomobilini Ali Məclisin binası qarşısında saxlaması çoxları tərəfindən təəccüblə qarşılanıb. Kimsə düşünə bilər ki, bu şəxs yəqin Prezidentin Naxçıvan üzrə səlahiyyətli nümayəndəsi Fuad Nəcəfliyə də “yol tapıb”. Lakin əldə etdiyimiz məlumata əsasən, F.Nəcəfli Talıbov dönəmində qanunsuz yollarla Naxçıvanda “qaz vurub, qazan dolduran” digər iş adamları kimi, Emin Uçarı da yaxın buraxmır. O halda E.Uçar hazırda Ali Məclisə tez-tez kiminlə görüşə gedir? Bəlkə, o, Talıbovdan sonra özünə burada yeni “krışa” tapıb?! Hər halda, bu və digər suallara tezliklə cavab tapmağa çalışacağıq.

Hurriyyet.az

Gəncənin icra başçısı Niyazi Bayramovun oğlu Bəhram Bayramov bahalı avtomobilini ictimaiyyətdən gizlətmək üçün dövlət nömrə nişanını dəyişməyə əl atıb. Anaxeber.info məlumat verir ki, bu haqda bloger Mehman Hüseynov araşdırma aparıb. Məlum olub ki, başçı oğlunun 10 BB 904 nömrə nişanlı "Range Rover" markalı avtomobili var. Daha sonra eyni qarajda və eyni yerdə 10 ZZ 904 nömrə nişanlı "Mercedes S Class" markalı maşın görmək olar. Bu nömrə isə əvvəl "BMW X 6" markalı maşının üstündə olub. Lakin icra başçısının oğlu indi həmin nömrəni çıxarıb başqa avtomobilinə qoyub. Bildirilir ki, Gəncə İH rəhbərinin oğlunun avtomobil kolleksiyasında 6 maşın var. Bu da bir məmur oğlunun hansı vəsaitlə bahalı maşınlar aldığına dair suallar doğurur. Hər halda Niyazi Bayramovun icra başçısı kimi aldığı maaş buna çatmaz. Deməli, adi korrupsiya, mənimsəmə faktının nəticəsidir...(Anaxeber.info)

Abşeron rayon məktəblərində rüsvayçılıqlar baş verməkdədir. Anaxeber.info ötən gün məlumat vermişdi ki, onlardan biri rayonun 9 saylı tam orta məktəbində yaşanıb. Bu haqda vətəndaşlardan biri sosial mediada audio yazı yaymışdı. Həmin səsdə yuxarı sinif şagirdlərindən biri məktəbli qızı təhdid edir. Onu hədələyir ki, çılpaq fotolarını yayacaq. Sosial şəbəkədə həmin səsi yayan şəxs dövlət orqanlarına çağırış edir ki, Abşeron məktəblərində baş verən rəzilliklər barəsində ölçü götürülsün. Onun sözlərinə görə, məktəblərdə qruplaşmalar yaradılıb və şagirdlər şəbəkələşərək bir-birini votsap üzərindən biabır etməklə hədə-qorxu gəlirlər. Bu da göstərir ki, Abşeron təhsilində nizam-intizam yoxdur, tədris sıfırdır, şagirdlərə nəzarət edilmir, direktorların və Abşeron-Xızı Regional Təhsil idarəsi rəhbərinin başı ayrı işlərə qarışıb. Hətta təhsil şefinin qadın salonu açdığı iddiaları var. Ona görə də başı biznesdən açılmır və məktəblərdə vəziyyətlə maraqlanmır. Qeyd edək ki, bu günlərcə paytaxtın 156 saylı məktəbinin şagirdinə qarşı təhqiramiz hərəkətlərə yol verilmişdi və videosu yayılmışdı. İndisə Abşeronun 9 saylı məktəbində şagirdlərdən biri çılpaq fotolar yayacağı ilə həmcinsini təhdid edir. Bu da ciddi bir həyəcan təbili çalınmasını qaçılmaz edir. Anaxeber.info media üzərindən araşdırıb ki, ümumən Abşeron təhsilində anarxiya hökm sürür. Regional Təhsil İdarəsinin müdiri İlhamə Quliyevadır. O, 2022-ci ildə bu vəzifəyə təyin olunub. Lakin nə ondan əvvəlki rəhbər təhsilin keyfiyyətində, intizamda, rüşvət yığımında problemləri həll edib, nə İlhamə Abdullayeva özü...Son iki il ərzində vəziyyət olduğundan da pisdir. Bunun nəticəsidir ki, şagirdlər artıq şantajçı kimi yetişir. Fakt budur ki, bir məktəbli qız digərini lüt şəkillərini yayacağı ilə şantaj edir. Bu cür təhdid hallarının artması son dərəcə qorxuncdur. Abşeron məktəblərində nə baş verir ki, bu hallar yaşanır?! Görünür, İlhamə Abdullayeva tam başını buraxıb hər şeyin və işi biznes, gözəllik salonu, direktorlardan pul yığmaqdır. Bir müddət əvvəl istefada olan zabit Rzayev Vidadi Əsədulla oğlu Abşeron-Xızı Regional Təhsil İdarəsinin tayfabazlıq prinsipi ilə idarə olunmasından, ciddi korrupsiya faktlarından bəhs olununan yazı ilə çıxış etmişdi. Həmin materiallardan görünürdü ki, Abdullayeva Abşeron təhsilini hansı günə qoyub. Misal üçün Abşeron-Xızı Regional Təhsil idarəsin müdiri İlhamə Abdullayeva, Bakı şəhərindəki məktəblərdə direktor vəzifəsində çalışan yaxın qohumları Arifə Balakişiyevanı Xırdalan şəhəri 1 saylı orta məktəbə, Gülnaz Kərimovanı Xırdalan şəhəri 2 saylı orta məktəbə direktor vəzifəsinə yerdəyişmə edib. Sevinc Allahverdiyevanı (Arifə Balakişiyevanın doğma bacısı) da Sumqayıt şəhəri 36 saylı orta məktəbə direktor əvəzi təyin edib.
Sevinc xanımın Nicat adlı oğlunu da İlhamə xanım “öz idarəsində” təsərrüfat müdiri, yəni Abşeron rayonu üzrə TİQ-in rəisi vəzifəsinə təyin etmişdir. Sual olunur, bütün bu təyinatlar verilərkən, Korrupsiya haqqında Qanunvericiliyin, Maraqların toqquşması haqqında Prinsiplərin Tələbləri kobud şəkildə pozulmayıbmı?
Anaxeber.info zabitə istinadla bildirir ki, Abdullayevanın büdcə vəsaitlərini israf etməsi, həmkarlar birliyinin vəsaitlərini isə az qala şəxsi vəsaiti kimi, təyinatından kənar nəsnələrə sərf etməsi, onun bu əməllərindən əziyyət çəkən müəllim-işçi heyətinin də ciddi narazılığına səbəb olur. Abşeron-Xızı şəhər Təhsil İdarəsinin rəhbəri İlhamə Abdullayeva haqda yayılan məlumatlardan birində onun gözəllik salonu biznesinə girişməsidir. Xəbər yayılıb ki, regional təhsil idarəsinin rəhbəri Abşeron ərazisində gözəllik salonu işlədir. Bir sözlə, təhsili bazara çevirmək belə olur... Amma biz mediada yayılan bu xəbərlərə görə qarşı tərəfin mövqeyini dinləməyə hazırıq.

Anaxeber.info

Azərbaycan Tibb Universitetinin onlarla kafedraları ilə bərabər bir neçə klinikaları da var. Universitetin özünün uzun və zəngin bir tarixi olsa da nəzdindəki klinikaların fəaliyyəti yaxın keçmişimizdən başlayıb. Klinikalar ən müasir, Avropa standartlarına uyğun zəruri tibbi avadanlıqlarla təchiz olunub. Bu klinikalardan biri də Stomatoloji Klinikadır. Universitetin Stomatoloji Klinikası 2002-ci ildə açılıb. Stomatoloji Klinikada 2014-cü ildə tədris mərkəzi açılıb, tədris-klinik binası əsaslı təmir olunduqdan sonra Yaponiya, Almaniya, Türkiyə, Slovakiya, Braziliya, Koreya və b. ölkələrdə istehsal olunan tibbi avadanlıqlar və stomatoloji qurğularla təchiz olunub.

Redaksiyamıza verilən məlumatlara görə rəsmi şəkildə Tibb Universitetinin Tədris Stomatoloji Klinikası olmasına baxmayaraq, demək olar ki, özəl klinika kimi işini davam etdirir. Klinikada həm də universitetin 4 kafedrası və xüsusi poliklinikası fəaliyyət göstərir. Amma bu kafedraların heç birində tədrisdən əsər-əlamət yoxdur, deyirlər. Burada tələbələrə hətta ən kiçik işləri belə görməyə icazə verilmir. Baxmayaraq bu kimi hallara tələbələr dəfələrlə narazılıq ediblər, onların etirazları eşidilməyib.

Rəsmi olaraq Klinikanın direktoru tibb üzrə fəlsəfə doktoru Mahir Səfərovdur. O, Tibb Universitetinin rektoru Gəray Gəraybəylinin ən yaxın adamlarından biri hesab olunur. Məlumata görə Mahir Səfərov burada rektor Gəray Gəraybəyliyə göstərişlərinə uyğun qaydalar qoyub. Klinikaya girən hər pasientdən kimi 5 manat tələb olunur. Qapıya xüsusi nəzarətçi təyin edib ki, klinikaya daxil olan pasientlərin dəqiq sayını hesablayır. Hətta pullu pasientləri birbaşa Mahir Səfərovun yanına aparırlar. Mahir Səfərov da diroktor olduğu xidməti otağında diş kabineti yaradaraq pasientləri müalicə edir. Bizə verilən ən son məlumatlara görə burada şəxsi stomatoloji kabinetlər fəaliyyət göstərir. Nə mənada? Dövlət tərəfindən vəsait ayırmasına baxmayaraq kabinetlərin bütün avadanlıqları, təmiri həkimlər tərəfindən toplanan pullar hesabına həyata keçirilir. Burada hər bir həkimə, diş texnikinə aylıq 500-100o manat civarında “stavka” müəyyən edilib. Klinikanın direktoru Mahir Səfərov heç kimdən çəkinməyərək, bu “stavka”ni yuxarıların, yəni Gəray Gəraybəylinin göstərişi ilə təyin edildiyini bildirir.

Məlumatlara görə klinikada tədris müəssisəsi ilə əlaqəsi olmayan qanunsuz stomatoloji sektor yerləşir ki, gün ərzində yüzlərlə pasient müraciət edir. Lakin pasientlərin klinikaya ödədiyi pulların cüzi hissəsi rəsmiləşdirilir, vergidən yayınma hallarına yol verilir. Dövlət Vergi Xidmətinin kommersiya qurumunun hüquqi şəxslərin dövlət reyestrinə daxil edilmiş məlumatları üzərindən apardığımız araşdırmada məlum oldu ki, Stamatoliki Klinika 23.06.2017-ci il tarixdə dövlət qeydiyyatına alınıb. Tibb Universitetinin rəsmi portalında isə Stomatoloji Klinikanın 2002-ci ildə açıldığı göstərilir. İndi təsəvvür edin klinika fəaliyyətə başladığı ilə dövlət qeydiyyatına alındığı gün arasında, yəni 15 il ərzində nə qədər vergidən yayınıb. Əvvəllər bu pulların kimlərin cibinə getməsi bəlli olmasa da, indi bəllidi.

Əldə etdiyimiz məlumatlara görə bir müddət əvvəl bununla bağlı hətta nazirliklər səviyyəsində danışıqlar aparılıb. İqtisadiyyat Nazirliyinin Dövlət Vergi Xidməti İlə Səhiyyə Nazirliyi arasında aparılan danışıqlardan sonra Tibb Universitetinin Tədris Stomatoloji Klinikasında yaranmış külli miqdarda vergi borcunun müəyyən hissəsi ödətdirilib. Dövlət Vergi Xidmətinin rəsmi portalında Klinikanın hazırki günə isə 11 940.27 manat vergi borcu qalmaqdadır.

Redaksiyamıza verilən ən son məlumatlara görə Səhiyyə Nazirliyi xüsusi komissiyası Tibb Universitetinin Tədris Stomatoloji Klinikasında yoxlamalara başlayıb. Bu yoxlamaların bir başında Klinikada olan malliyyə pozuntularının araşdırılması durursa, digər başında Səhiyyə naziri Teymur Musayevin şəxsi maraqları dayanır.

Bəs burada Səhiyyə naziri Teymur Musayevin nə kimi maraqları var?

Məlumatlara görə 2022-ci ilin yanvarından Səhiyyə naziri təyin edilmiş Teymur Musayevin əsas maraqlarından biri, və ya birincisi Tibb Universitetinin nəzdindəki klinikalara axan pullardır. Məlum olduğu kimi dövlət tərəfindən Tibb Universitetin nəzdindəki klinikalar müasir tibbi avadanlıqlarla təchiz olunub, yüksək ixtisaslı tibb personal çalışır. Bu baxımdan buraya müraciət edən pasientlərin sayı da çoxdur. Buradakı cərrahiyyə əməliyyatlarının qiymətləri də yüksəkdir. Pasientlərin sayı çox olduğundan, pullar da çox gəlir. Amma Tibb Universitetinin klinikaları rəsmi qurumların da qeyd etdiyi kimi daim problem içindədir. Yəni, Klinikalara daxil olan vəsaitlərin çoxluğuna baxmayaraq tibb müəssisələri yenə də dövlət vəsaitləri hesabına yaşayır. Teymur Musayevin başçılığı ilə Səhiyyə Nazirliyi də bütün bunları əsas gətirək Tibb Universitetinin nəzdindəki klinikalara nəzarəti ələ almaq istəyir.

Məlumatlara görə Teymur Musayev Tədris Terapevtik Klinikasına və Tədris Cərrahiyyə Klinikasına öz adamlarını yerləşdirməklə buna qismən nail olub. Lakin Tibb Universitetinin rektoru Gəray Gəraybəyli də şəxsi kanallarını işə salaraq Stomatoloji Klinikaya nəzarəti əldən vermək istəmir. Odur ki, Səhiyyə Nazirliyinin xüsusi komissiyası Tədris Stomatoloji Klinikasında yoxlamaları uzadır.

Bütün bu məlumatlardan da göründüyü kimi bu gün Səhiyyə Nazirliyi ilə Tibb Universiteti arasında bir gərginlik yaşanmaqdadır. Bu gərginlk heç də ölkəmizin tibb sahəsinə yeniliklər gətirmək, tibb elminin inkişafı ilə bağlı olan məsələlər üstündə deyil. Bu iki şəxsin, Səhiyyə naziri Teymur Musayevin və Tibb Universitetinin rektoru Gəray Gəraybəylini şəxsi maraqları üzərində yaranmış bir gərginlikdir. Yəni burada mübarizə pullar üstündə gedir. Həm də elə belə pullar üstündə deyil, böyük pullar üstündə.

Odur ki, anunsunu veririk. Yaxın günlərdə Stomatoloji Klinikası ilə geniş məlumatlar tirajlanacaq. Bu da Klinikanın direktoru Mahir Səfərovun yol verdiyi nöqsanlara görə tutduğu vəzifəfə ilə vidalaşmasına səbəb olacaq.

Əyalətmedia.az

Yeni Suraxanı rayonu, 14 İyul küçəsindəki sakinlər yol problemindən əziyyət çəkirlər. Dia-az.info-ya sakinlər adından daxil olan şikayət məktubunda bildirilir ki, sözügedən ərazidə bütün məhəllələrə asfalt örtüyü döşənsə də, 4-cü məhəllə asfaltlanmayıb. Sakinlər deyirlər ki, təxminən 500 metr məsafəni palçıqlı yolla getmək məcburiyyətində qalırlar.

Onların sözlərinə görə, yağışlı havalarda vəziyyət daha bərbad olur:

"Bütün küçələr, hətta yaşayış olmayan yerlər də asfaltlandı, amma bizim küçəmiz qaldı. Dəfələrlə aidiyyəti qurumlara müraciət etdik, şikayətlərimizi bildirdik. Amma bizim şikayətlərə baxılmadı".

AAYDA sədrinin müavini Əvəz Qocayev

Sakinlər iddia edir ki, hələ ərazilərinə asfalt çəkilərkən onlar öz küçələrinin də asfaltlanması məqsədilə Avtomobil Yolları Dövlət Agentliyinin (AAYDA) rəhbərliyi ilə görüşüblər.

Sakinlər bildirir: "Konkret olaraq, sədr müavini Əvəz Qocayevlə görüşdük. Bizi işçisinə yönəltdi, o da quru vəd verdi. Sonradan məlum oldu ki, pul umurlar... Biz niyə dövlət adından görülməli olan işə pul verməliyik ki?"(Dia-az.info)