"AccessBank"ın illərdir yığılmış zərəri bitmək bilmir.

Kommersant.az xəbər verir ki, sözügedən bank yığılmış zərərdən canını qurtarıb mənfəət əldə edə bilmir. Belə ki, 2023-cü ilin sonunda "AccessBank"ın yığılmış zərəri 142 milyon 899 min manat olub. 2023-cü ilin sonunda zərərdən 22 milyon 323 min manat azaldan bankın bu azalmalarla başa çıxması üçün 2 ilə yaxın vaxt tələb olunur.

2 il ərzində bankın mənfəət əldə etməsi isə ehtimal olunur. Çünki, 2 il ərzində "AccessBank" zərər əldə etmədən mənfəət açıqlamalıdır. Bu isə 8 rüblük hesabatın müsbət nəticələnməsi deməkdir ki, sözügedən bankın bu qədər ayaqda dayana bilməsi şübhə doğurur.(Kommersant.az )

Tibbi Ərazi Bölmələrini İdarəetmə Birliyi (TƏBİB) və Səhiyyə Nazirliyinin Elmi-Tədqiqat Kardiologiya İnstitunu məhkəməyə verilib.

Qaynarinfo xəbər verir ki, iddiaçı Hacıyev Azad Bəhmən oğludur.

Onun iddiasına Nəsimi Rayon Məhkəməsində baxılacaq. Əfsanə Heydərova iş üzrə hakim təyin edilib.
Azad Hacıyevin iddia tələbi əmək haqqının ödənilməsi ilə bağlıdır.

Araşdırmalarımız zamanı məlum olub ki, Azad Hacıyev institutun əməkdaşı olub. Bir müddət əvvəl işdən çıxarılıb.

“Aprel döyüşləri” və 44 günlük savaşda ön cəbhənin maddi-texniki təminatını həyata keçirən Yevlax sakinlərindən Prezidentə müraciət

Yevlax rayonunun 72 nəfər sakini tərəfindən “Hürriyyət”in redaksiyasına şikayət məktubu daxil olub. Qəzetimiz vasitəsilə Prezident İlham Əliyevə və Müdafiə naziri Zakir Həsənova müraciət edən sakinlərin məktubunu olduğu kimi dərc edirik:

“Cənab Prezident!

Cənab Nazir!

Biz, 44 Günlük Vətən Müharibəsi dövründə N saylı hərbi hissənin mülki işçiləri, komandanlığın rəsmi göstərişi ilə maddi-texniki təminat taborunun tərkibində ön cəbhədə - döyüş bölgəsində 3000-5000 nəfərlik şəxsi heyətin təminat növlərinin yerinə yetirilməsində gecə-gündüz dayanmadan iştirak etmişik. Hərbi sursatların ağır artilleriya və top mərmilərinin yüklənməsi, daşınması, döyüş nöqtələrinə boşaldılması, ərazidən yığılması, vurulmuş hərbi texnikaların yüklənməsi və təmiri, geyimlərin daşınması və yuyulması, bütün növ ərzaqların daşınaraq təminat nöqtəsinə çatdırılması, çörək bişirilməsi və sair işləri yorulmadan, usanmadan həyata keçirmişik.

Ancaq ötən dövr ərzində bizim hüquqlarımız kobud şəkildə pozulub və biz “Vətən müharibəsi iştirakçısı” statusumuzu ala bilməmişik. Baxmayaraq ki, müharibədən sonrakı ilk vaxtlarda bizim müvafiq sənədlərimiz aidiyyəti üzrə Müdafiə Nazirliyinə, həmçinin Əmək və Əhalinin Sosial Müdafiəsi Nazirliyinə göndərilib. Hətta bizə veteranlar üçün ödənilən müavinata görə plastik kartlar belə, verilmişdir. Amma bizə bəlli olmayan səbəblərdən, kimlərinsə qanunsuz müdaxiləsindən sonra bizim “Vətən müharibəsi iştirakçısı” statusumuzun qarşısına xətt çəkdilər.

Belə ki, keçmiş korpus komandiri Hikmət Həsənovun vaxtında bu, təsdiqini tapsa da, sonrakı komandan Qiyas Abbasov bizə bəlli olmayan səbəblərdən buna imkan verməyib. Bu o deməkdir ki, Ali Baş Komandanın verdiyi qərarlara qarşı hörmətsizlik olunub.

N saylı hərbi hissənin komandiri İqbal Şərbətov isə bizim üzləşdiyimiz qanunsuzluğun aradan qaldırılması istiqamətində heç bir addım atmır.

Hörmətli Ali Baş Komandan!

Diqqətinizə çatdıraq ki, biz təkcə 44 Günlük Vətən Savaşında deyil, həm “Aprel döyüşləri”ndə, həm də 24 saatlıq anti-terror tədbirlərində də arxa cəbhədə tam gücümüzlə çalışmış və bütün növ təminatların çatdırılmasında iştirak etmişik. Ona görə də sizdən xahiş edirik ki, bizim pozulmuş hüquqlarımızın, yeyilmiş haqlarımızın bərpası üçün müvafiq və real addımların atılması üşün göstəriş verəsiniz.

Əvvəlcədən minnətdarlığımızı bildiririk”.

Redaksiyadan: Qarşı tərəfin mövqeyini dərc etməyə hazırıq.

Azərbaycan Prezidenti İlham Əliyev bu gün Dövlət Gömrük Komitəsi əməkdaşlarının təltif edilməsi haqqında sərəncam imzalayıb.

Gömrük orqanlarında səmərəli fəaliyyətinə görə təltif edilənlərdən biri də Dövlət Gömrük Komitəsi Akademiyasının rəkisi Qulu Novruzovdur.

O, “Tərəqqi” medalı ilə təltif edilib.

Qulu Novruzov 30 oktyabr 2018-ci il tarixində Dövlət Gömrük Komitəsinin Akademiyasına rəisi təyin edilib.

2021-ci ildə ona gömrük xidməti general-mayoru ali xüsusi rütbəsi verilib.

Bu gün XeberEkspress.az-a daxil olan növbəti müraciət.

"Mesa Graup" MMC sirkətindəndir. Qaradağ rayon müşviqabad qəsəbəsində yaşayan Bəkirzadə Səbuhi Cavanşir oğlu bildirir ki, "Avqust ayının 11də "Mesa Grup" MMC sirkətindən kredit vasitəsilə 30.000 manatlıq dəyərində Lazer aparatı aldım.Lakin aparat müştərilərin müxtəlif nahiyələrində yanıqlar və səpgilər əmələ gətirdiyi üçün əldə etdiyim məhsulu geri qaytarmaq üçün yenidən şikayətə müraciət etdim.Amma məni şirkət sahibi Məftun Xəlilov qəbul etmədi və Satıcı Jalə xanım bildirdi ki, müdiriyyət sizinlə görüşmək istəmir.Gedin ödənişin edin bizi birdə daha bununla bağlı narahat etmeyin ".
Mən Bəkirzadə Səbuhi Cavanşir oğlu sizdən xahiş edirəm bu işlə bağlı ciddi tədbirlər görünsün.

XeberEkspress.az

Qusarda irigövdəli, çoxillik ağacların olduğu meşə ərazisində ağaclar kəsilib.

Bu barədə “Ecofront” təşkilatı məlumat yayıb. Ağacların kəsildiyini lentə almaq istəyən rayon sakininin iradlarına cavab verən şəxs çıxarışı olduğunu bildirməklə çəkilişin aparılmasına imkan verməyib.

Görüntülərdə bir neçə ağacın kəsildiyi əksini tapıb. Kəsilən ağacların yerində tikinti aparılacağı güman edilir.

Qusar sakinləri Meydan TV-yə bildiriblər ki, ağacların kəsilməsi halları tez-tez baş verir. Kəsilən ağacların yerində evlər, kafe, restoranlar tikilir.

“Qaz olmayan kəndlərdə sakin öz həyətindəki ağacı kəsəndə belə cəzalandırılır, amma meşələrin, yaşıllıq zonalarının məhv edilməsinə göz yumurlar”,-sakinlərdən biri danışıb.

Qusar İcra Hakimiyyətindən Meydan TV-yə bildiriblər ki, sözügedən videogörüntülərdən xəbərdar deyillər. Yəqin ki, məsələ araşdırılacaq.

Bununla belə, rayon ərazisində icra hakimiyyəti tərəfindən daim ağac əkmə aksiyası keçirildiyinə dair qurumun rəsmi səhifəsində məlumatlar paylaşılır. Yol kənarında, mərkəzi küçələrdə, turizm obyektlərinin girişində, o cümlədən kəndlərə gedən yollarda yerli ağac növlərindən olan tinglər əkildiyi ilə bağlı məlumat yerləşdirilib.

Ekologiya və Təbii Sərvətlər Nazirliyindən isə suallar cavablandırılmayıb.

Mədəniyyət Nazirliyinin tabeliyində fəaliyyət göstərən “Əsaslı Tikinti və Təchizat” MMC tərəfindən keçirilən tender müsabiqəsinin qalibi məlum olub.
Yeniavaz.com açıqlanan rəsmi məlumatlara istinadən bildirir ki, Mədəniyyət Nazirliyinin keçirdiyi tender müsabiqəsinin qalibi “Banu” MMC (VÖEN – 1000212851) olub.
“Banu” MMC “Əsaslı Tikinti və Təchizat” MMC-nin sifarişi əsasında “İşğaldan azad edilmiş ərazilərdə erməni vandalizminə məruz qalmış məzarlıqlar və uçurulmuş qəbir abidələri” və “Məhv edilmiş mədəni irs və dağıdılmış abidələr” layihələri çərçivəsində iki kitabın nəşrə hazırlanması xidmətlərini həyata keçirəcək.
İki kitabın nəşrə hazırlanmasına görə “Banu” MMC-yə 225 min manat ödəniləcək. Kitabların bu ilin sonuna kimi hazırlanması nəzərdə tutulur.
Qeyd edək ki, tender müsabiqəsi dövlət satınalmalarının vahid internet portalı vasitəsi ilə həyata keçirilməyib. Qalib şirkət bir mənbədən satınalma metodu ilə müəyyən edilib.
Xatırladaq ki, 14 iyul 2023-cü il tarixində Prezident İlham Əliyev “Dövlət satınalmaları haqqında” yeni Qanunu (https://e-qanun.az/framework/54966) təsdiq edib. 1 yanvar 2024-cü ildən qüvvəyə minən yeni Qanunun 15.1 maddəsində göstərilir ki, məxfi məlumatlar istisana olmaqla bütün dövlət satınalmaları yalnız portal vasitəsilə həyata keçirilir.
Eyni zamanda Qanunun 49-cu maddəsində qeyd olunur ki, bir mənbədən satınalma metodu aşağıdakı hallarda tətbiq olunur:
- Satınalma predmeti yalnız hər hansı konkret təchizatçıda olduqda;
- Satınalma predmetinin əvəzedicisi və alternativi olmadıqda;
- Satınalma predmetinə təcili tələbat yarandıqda;
- Təbii fəlakətlər, texnoloji qəzalar, epidemiyalar baş verdikdə və fövqəladə xarakter daşıyan digər hallarda bilavasitə insanların həyat və sağlamlığına vurulan ziyanın qarşısının təcili alınması məqsədilə;
- Satınalma predmeti kəşfiyyat və əks-kəşfiyyat fəaliyyətini təmin edən tələbata aid olduqda.
Qeyd edək ki, Mədəniyyət Nazirliyinin kitab nəşri ilə bağlı tender müsabiqəsinin yuxarıda göstərilən hallardan hansına aid edildiyi barədə məlumat mövcud deyil.
Onu da bildirək ki, iki kitabı 225 min manata nəşrə hazırlayan “Banu” MMC barəsində açıq mənbələrdə heç bir məlumat mövcud deyil. MMC-nin nə rəsmi veb-saytı, nə də sosial şəbəkə hesabları mövcuddur. Daha əvvəl hansı sahədə fəaliyyət göstərdiyi də məlum deyil.
Vergilər Xidmətinin reyester məlumatlarında göstərilir ki, 2004-cü ildə dövlət qeydiyatına alınan və nizamnamə kapitalı 10 manat olan “Banu” MMC-nin hüqui ünvanı Səbail rayonu, Məmmədyarov, ev 29, m. 2-də yerləşir. MMC-nin qanuni təmsilçisi Sarieh Deghatidir.
Məlumat üçün onu da bildirək ki, məşhur azərbaycanlı fotoqraf Reza Deghatinin bacısı Pəriçöhrə Deghati tətəfindən Bakıda “Banu” adlı moda evi yaradılıb. Sarieh Deghatinin rəhbərlik etdiyi “Banu” MMC ilə Reza Deghatin bacısı tərəfindən yaradılan moda evi arasında bənzər ad (“Banu”) və bənəzər soyaddan (Deghati) əlavə hansısa əlaqənin olub-olmadığı barədə məlumat yoxdur.

Məlumdur ki, son vaxtlar ölkə gündəmini zəbt edən əsas mövzulardan biri də, ötən 12 il 6 ay ərzində SOCAR AQŞ-də baş direktor vəzifəsində çalışan, məşhur Harvard Universitetində ali təhsil alan və bu təhsil ocağını fərqlənmə diplomu ilə başa vuran Ramin İsayevin qanunsuz həbsdə saxlanması məsələsidir. Qeyd edək ki, bu şəxsin həbsdə saxlanmasının heç bir hüquqi əsası olmasa da, Ramin İsayevlə qərəzçilik edən bəzi şəxslərin verdikləri sifarişlər əsasında qeyd olunur ki, guya o, həmin vəzifəni daşıyarkən özünə yüksək məbləğdə maaş yazır. Belə bir səbəbdən də Ramin İsayev daşıdığı vəzifəsindən azad olunur.

Əslində bütün bunlar tamamilə cəfəng və böhtan xarakterli məlumatlardır ki, həmin məlumatlar bu şəxslə qərzçilik edən şəxslər tərəfindən dövriyyəyə buraxılır. Əldə etdiyimiz məlumatlara görə Ramin İsayevi kimsə işdən çıxartmayıb, əslində onun özü baş verən haqsızlıqlara etiraz əlaməti olaraq 16 oktyabr 2020-ci il tarixdə öz ərizəsi ilə işdən çıxır. Yəni, bu şəxs işdən çıxmaq barədə yazdığı ərizəsini müəssisənin baş hüquqşünasına təqdim edir. Baş hüquqşünas da Ramin İsayevin ərizəsini Direktorlar Şurasına təqdim edir və bununlada o, daşıdığı vəzifəsindən uzaqlaşır. Diqqət yetirmək lazımdır ki, Ramin İsayev məmur olmayıb, o, özəl müəssisə hesab olunan SOCAR AQŞ MMC-də baş direktor vəzifəsində çalışıb. Digər tərəfdən, bu şəxsin aldığı maaşın məbləğini SOCAR AQŞ-nin səhmdarları təyin edib və müvafiq sənədlərin imzalanması səlahiyyəti isə, bu gün də NEQSOL Holdinqin Baş İcraçı direktoru vəzifəsini daşıyan Yusif Cabbarova həvalə olunur. İndi isə sənədlərə və lazımi faktlara istinad etməklə bunları qeyd edə bilərik.

1. Ramin İsayevlə yeni əmək müqaviləsinin imzalanması səlahiyyətləri 15 iyul 2020-ci il tarixdə SOCAR AQŞ-nin səhmdarlarının ümumi yığıncağında Yusif Cabbarova həvalə olunur.
2. Ramin İsayevin əmək haqqının 9224 manatdan 54301 manata qaldırılması ilə bağlı 01 sentyabr 2020-ci il
tarixdə səlahiyyətli şəxs olan Yusif Cabbarov əmr imzalayır.
3. Qeyd edək ki, Ramin İsayev 2008-2020-ci illər ərzində NEQSOL Holdinqin ən iri müəssisəsinə rəhbərlik edirdi və o, digər müəssisə rəhbərləri ilə müqayisədə qat-qat aşağı maaş alır. Bir faktı da qeyd edək ki, Ramin İsayevin tabeliyində işləyən, amma Yusif Cabbarovun əsas adamlarından biri olan Fuad Behbudun maaşı, Ramin İsayevin aldığı maaşdan təxminən 3 (üç) dəfə çox olur.
4. Ramin Isayevin 1 022 785 manat məbləğində mükafatlandırılması, əslində onun 2017-ci ilin dekabr və 2020-ci ilin iyun ayları ərzində ödənilməmiş maaşı olur. Bunun sübutu olaraq Yusif Cabbarov tərəfindən ingilis və azərbaycan dillərində imzalanmış sənədlərin olmasıdır.
5. Ramin İsayevin 1 022 785 manat məbləğində mükafatlandırılması ilə bağlı 01 sentyabr 2020-ci il tarixdə səlahiyyətli şəxs olan Yusif Cabbarov tərəfindən əmr imzalanır.

Qeyd edək ki, əgər altı aydan çox müddət ərzində qanunsuz həbsdə saxlanan Ramin İsayevlə bağlı məlumatlar olduğu qaydada, düzgün formada ölkə rəhbərinə çatdırılarsa, yəqin ki, o halda o, dərhal həbsdən azad olunar. Bununla da haqq-ədalət öz yerini tapar. Ötən yazımızda, yəni “Sabiq baş direktor hansı səbəblərdən həbsdə saxlanır?- İDDİALAR TƏSDİQİNİ TAPMIR” başlığı altında yayımladığımız yazımızda onu da qeyd etmişdik ki, sabiq baş direktor həbs olunduğu vaxtdan bu günə kimi davam etdirilən istintaq araşdırmaları zamanı, Ramin İsayev barəsində 16 milyon manatlıq mənimsəmə faktı ilə bağlı ortaya heç bir dəlil-sübutu qoymaq mümkün olmamışdır. O halda sual oluna bilər ki, hal-hazırda bu şəxs hansı səbəbdən həbsdə saxlanır və nəyə görə də həbsdə saxlanmalıdı.(Gundemxeber.az)
Ardı var.
Mövzuya qayıdacağıq, bizi izləməyi unutmayın.

“Kiber dələduzlar tərəfindən Kapital bank kartımdan 6400 manat “Tiktok”a ödəniş olunub, komissiya haqqı ilə birlikdə isə 7500 manata yaxın pul gedib. Bundan əlavə, kartı tranzit olaraqda istifadə ediblər. Əməliyyatlar gecə yarısı və səhər, 4,5,6 arası olub”. Tribunainfo.az xəbər verir ki, bankın müştərisi Murad Məmmədov başına gələni açıqlayıb. Onun sözlərinə görə, Kapital Banka bildirdikdə “sizə 3 D kodu göndərildiyi üçün bizlik heç nə yoxdur” deyiblər: “Halbuki pul çıxılandan sonra mesaj bölməsinə baxdım, gələn kodlar oxunmamışdı. Hansı yolla 3 D kodu olmadan ödəniş ediblər maraqlıdır. Bank Hüquq Mühafizə Orqanlarının üzərinə atır məsələni, Polisə şikayət edilib artıq araşdırmalar gedir. Nəticə nə olacaq məchuldur, amma ortaya bir sual çıxır – Kapital Bank hansı səviyyədə şəxsi məlumatlarımızı qoruya bilir?
Bu dələduzlar Bank sistemlərinə daxil ola bilirmi? Yaxud cihazlarımıza müdaxilə edə bilirmi? Nə hikmətdirsə, son 1 həftədə bu dələduzlar yalnız Kapital Bank kartlarına qənim kəsiliblər. Bu yolla əldə etdikləri məbləği təsəvvür edə bilmirəm. Kimlərə bu kibercinayətkar dəstə tərəfindən ziyan dəyibsə zəhmət olmasa yazsın. Ziyana uğrayan hər kəs Polisə şikayət etsin, DİN-in bu şəbəkəni çökdürəcəyinə inamım tamdır”.

Azərbaycanda son vaxtlar valideynlər övladlarının tərbiyəsi ilə məşğul olan şəxslərə xarici dil biliyinin olması tələbi qoyurlar. Elan saytlarında dayə axtaran valideynlərin bəzisi rusdilli, ingilisdilli dayələrə üstünlük verəcəklərini qeyd edirlər.

Bəzi elanlarda isə dayənin başqa millətdən və ya xarici ölkə vətəndaşı olması şərti də qoyulur.

Elə bu günlərdə dayə kimi Bakıya çağırılan afrikalı qadın kimi…

Sadəcə, bu nümunənin pis tərəfi qadının ölkəyə gətirilib, sonra ondan imtina edilməsidir. Belə ki, internet vasitəsilə Bakıdakı dayə axtarışı ilə bağlı elana müraciət edərək paytaxta gələn qadın sonradan ailənin onunla işləməkdən imtina etdiyini deyib. Hazırda o, Bakıdakı “Təmiz Dünya” Qadınlara Yardım İctimai Birliyinin qadın sığınacağında yerləşdirilib.

Birlik rəhbəri Mehriban Zeynalova Bizim.Media-ya açıqlamasında deyib ki, hazırda qadın iş axtarır, əgər qanuni şəkildə işə düzələ bilsə, qalıb işləyəcək:

“Əgər alınmasa dövlət qurumları qadını öz ölkəsinə qaytaracaq. Onunla əslində Dubay şəhərinə aid nömrə ilə əlaqə saxlanılıb, danışıqlar aparılıb, bura göndərilib. Burada isə qarşılayan qadın onu çağırmadığını deyib”.

Bu hadisə azərbaycanlıların niyə əcnəbi dayələrə üstünlük verməsini gündəmə gətirib. Hazırda ölkədə qadınların da işgüzarlığını, ictimiyyətdəki fəallığını nəzərə alsaq dayəyə tələbat yüksəkdir. Elan saytlarında həm dayə axtaranların, həm də dayə işləmək istəyənlərin sayı kifayət qədərdir.

Bəs əcnəbi dayə arzulamaqda məqsəd nədir?

Mövzu ilə bağlı Bizim.Media-ya danışan deputat Musa Quliyev bildirib ki, bu, ailənin öz seçimidir:

“Əcnəbi və xaricidilli dayələrin seçimi valideynlərin istəyinə bağlıdır. Burada qanun pozuntusu da yoxdur. Ailələr bu cür seçimlərində azaddır”.