Füzulidə 1987-ci il təvəllüdlü arvadı Ruhanə Qasımovanı qətlə yetirən 40 yaşlı Süleyman Qasımovun məhkəmə prosesi başa çatıb.

Lənkəran Ağır Cinayətlər Məhkəməsinin hökmünə əsasən, S.Qasımov 10 il 4 ay müddətinə azadlıqdan məhrum edilib.

Qeyd edək ki, hadisə ötən ilin sentyabrın 24-də Füzulinin Qayıdış-5 qəsəbəsində baş verib.

Təqsirləndirilən şəxs məhkəmədə ifadəsində bildirib ki, hadisədən bir gün öncə evlərinə qonaq gəlib. S.Qasımov qonaqlar üçün qaz ətindən kabab bişirib. Bu zaman arvadı da qonaqlarla birlikdə masaya əyləşərək kababdan yeyib. 

Maraqlıdır ki, Ruhanənin masaya əyləşməsi Süleymanın narazılığına səbəb olub. O, həyat yoldaşına “bəs sən gördün ki, qonaq sayı çoxdur, yemək azlıq edir, nəyə görə sən də oturub yedin?” deyərək irad tutub. Onun bu sözləri Ruhanənin xətrinə dəyib. 

Hadisənin baş verdiyi gün isə evə sərxoş vəziyyətdə gələn S.Qasımov Ruhanənin əşyalarını toplayaraq evdən ayrılmaq istədiyi görüb. Qadının atası evinə getməsi Süleymanı özündən çıxarıb və bunu qəbul edə bilməyib.

Nəticədə həyat yoldaşının arxasınca qayınatasıgilə gedən ər arvadını bir bıçaq zərbəsi ilə qətlə yetirib.

Hadisədən sonra S.Qasımov “102” xidmətinə zəng edərək arvadını öldürdüyünü deyib.

Qeyd edək ki, cütlüyün hazırda hərbi xidmətdə olan bir övladı var.(“Qafqazinfo”)

Səudiyyə Ərəbistanında alkoqollu içkilərin satıldığı ilk mağazanın açılması planlaşdırılır.

Bu barədə “Reuters” agentliyi məlumat yayıb.

“Səudiyyə Ərəbistanı paytaxt Ər-Riyadda sırf qeyri-müsəlman diplomatlara xidmət göstərəcək ilk içki mağazasını açmağa hazırlaşır”, - deyə agentlik bildirir.
Mağazaya baş çəkmək üçün diplomatlar xüsusi tətbiqdən qeydiyyatdan keçməli, Krallığın Xarici İşlər Nazirliyindən giriş kodu almalı və aylıq kvotalara əməl etməlidirlər.

Qeyd edək ki, Səudiyyə Ərəbistanı İslam dünyasının ən mühafizəkar ölkələrindən biridir. Burada həm ölkə vətəndaşları, həm də xarici vətəndaşlar tərəfindən spirtli içkilərin istifadəsi tamamilə qadağandır. Qanunun pozulması ölüm cəzası ilə nəticələnə bilər.

Azərbaycanın 2030-cu ilədək sosial-iqtisadi inkişafa dair milli prioritetlərindən birinin “Təmiz ətraf mühit və yaşıl artım ölkəsi” kimi müəyyən edilməsi, işğaldan azad edilmiş ərazilərin və Naxçıvan Muxtar Respublikasının yaşıl enerji zonası elan olunması, 2024-cü ilin “Yaşıl dünya naminə həmrəylik ili” elan edilməsi bu sahədə aparılan məqsədyönlü və ardıcıl dövlət siyasətinin təzahürüdür.

İqlim dəyişmələrinin qarşısının alınması sahəsində Azərbaycanın həyata keçirdiyi fəaliyyət beynəlxalq ictimaiyyət tərəfindən yüksək qiymətləndirilir. Məhz bu səbəbdən, iştirakçıların sayına və səviyyəsinə, müzakirəyə çıxarılan məsələlərin aktuallığına görə dünyada ən mötəbər tədbirlərdən biri hesab edilən Birləşmiş Millətlər Təşkilatının İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyası (COP29) dünya ölkələrinin yekdil qərarı ilə 2024-cü ildə Azərbaycanda keçiriləcəkdir.

Bunlar Prezident İlham Əliyevin 7 yanvar 2024-cü ildə Ekologiya və Təbii Sərvətlər naziri Muxtar Babayevin COP29-un Prezidenti müəyyən ediliməsi ilə bağlı imzaladığı Sərəncamda yer alıb.

Məlum olduğu kimi ətraf mühit dedikdə ilk növbədə təmiz hava, təmiz su, təmiz ekologiya yada düşür. Ekologiyanın təmiz olması üçün də ilk növbədə yaşılıqların qorunması lazımdır. 2024-cü ilin “Yaşıl dünya naminə həmrəylik ili” elan edilmiş Azərbaycanda yaşıl dünyamız necə qorunur?

Bunun üçün internet axtarış sisteminin Azərbaycan seqmentində kiçik bir araşdırma aparılsa kifayət edər ki, ümumi mənzərə ortaya çıxsın. Son illər Azərbaycanın bütün bölgələrində meşələrin qırılması ilə bağlı geniş məlumatlar var. Bir neçə il öncə Qəbələ rayonu, Çuxur Qəbələ bələdiyyəsinin vəzifəli şəxslərinin işə vicdansız və ya laqeyd münasibəti nəticəsində öz xidməti vəzifəsini yerinə yetirməməsinin ağır nəticələrə, yəni Qəbələ rayonu, Çuxur Qəbələ bələdiyyəsinin mülkiyyətinə aid olan “Yeddi çinar” adlanan ərazidə 247 ədəd qızılağac, 101 ədəd yalanqoz, 09 ədəd ağcaqayın, 75 ədəd vələs, 03 ədəd palıd və 06 ədəd göyrüc ağaclarının, cəmi 441 ədəd yaş kök üstə, bioloji inkişafda olan ağacların qanunsuz kəsilməsinə, bununla da fiziki və ya hüquqi şəxslərin hüquqlarına və qanuni mənafelərinə, yaxud cəmiyyət və ya dövlətin qanunla qorunan mənafelərinə 127 min 310 manat məbləğində mühüm zərərin vurulmasına əsaslı şübhələr müəyyən edilib, CM-nin müvafiq maddələri ilə cinayət işi başlanmış və istintaqın aparılması Baş prokuror yanında Korrupsiyaya qarşı Mübarizə Baş İdarəsinə tapşırılmışdı. Xatırladaq ki, Baş prokurorluğun yaydığı inkaredilməz bu məlumat Qəbələnin yalnız bir kəndində baş verənlər idi. Görəsən rayonun gözdən uzaq digər kəndlərində bunun kimi nə qədər ağaclar kəsilir,cinayətlər törədilir. Baş prokurorluğun yaydığı bu məlumatdan hələ xeyli əvvəl Qəbələ Regional Meşə Təsərrüfatı Mərkəzinin keçmiş direktorunun həbsi daha böyük rezonansa, səs-küyə səbəb olmuşdu.

İnternetdə kiçik araşdırma aparsaq görərik ki, az qala hər həftə ölkənin hansısa regionunda meşə massivlərinin amansızcasına məhv edilməsinə dair materiallar verilib. Qəbələdə, Qaxda, Tovuzda, Bərdədə, Göygöldə və sair rayonlarda meşələrin ayrı-ayrı şəxslərin, məmurların himayəsində olan firmalar, sexlər tərəfindən qırılaraq daşındığı, parket, taxta-şalban istehsalında istifadə edildiyinə dair kifayət qədər fakt göstərmək olar. Hamısı da şəkillərlə, videolarla, yəni sübutlarla…

Amma Ekologiya və Təbii Sərvətlər Nazirliyinin rəsmiləri bütün bu yayılanlara sıfır reaksiya göstərir, yaşıllıqların məhv edilməsininqarşısını almır. Nazirliyin tabeçiliyində Meşələrin İnkişafı Departamenti üzərinə düşən işi yerinə yetirmir.

Yeri gəlmişkən, ətraf mühit mövzusu ilə bağlı bir vacib məsələyə də toxunmaq istərdik. Məlum olduğu kimi son illər xüsusəndə dağlıq rayonlarında 100 illər boyu mövcud olan meşəliklərin əraziləri əkin sahələrinə çevrilir. Buna Meşələrin İnkişafı Xidmətinə tabeli 1 saylı Lənkəran, Astara, Lerik, 2 saylı Tovuz, Qazax, Ağstafa, 5 saylı Xaçmaz, Qusar, Quba, 8 saylı Zaqatala, Balakən, 10 saylı Göygöl, Goranboy, 14 saylı Şəmkir, Gədəbəy, Daşkəsən, Samux meşələrinin ərazilərində rast gəlmək mümkündür.

Son günlər Ekologiya və Təbii Sərvətlər Nazirliyi yanında Meşələrin İnkişafı Xidmətinin 11 saylı Regional Meşə Təsərrüfatı Mərkəzinin tabeçiliyində olan Masallı, Yardımlı, Cəlilabad rayonlarında meşələrin kütləvi şəkildə qırılması, meşə fonduna aid olan torpaqların ayrı ayrı şəxslərə satılması ilə bağlı geniş məlumatlar yayılmaqdıdır.

Bir həftə əvvəl Masallı Regional Meşə Təsərrüfatı Mərkəzinin Cəlilabad üzrə mühafizə mühəndisi Fitat Ağayevin meşələrdə kütləvi qırıntılarla bağlı meşə gözətçisinin etdiyi inanılmaz saxtakarlıq faktını ifşa etməsi də bunlara bir sübutdu. Mətbuatda yayılan məlumatlara görə, Fitat Ağayev Cəlilabad meşəbəyliyinin 9 saylı meşə dolayında Qırmızı kitaba daxil olan agağların kütləvi şəkildə qırılmasının şahidi olub. Ağacların qanunsuz qırıldığını qeydə alan mühafizə mühəndisi kəsilən agacların hamısının damğalandığını görüb. Sözügedən damğaların meşəbəyi Elman Əliyevə məxsus olduğu məlum olub. Hər bir qanunsuz kəsilmiş agacların dib kötükləri üzərində bir yox, bir neçə damğanın vurulduğunu görən Fitat Ağayev edilən qanunsuzluqla bağlı Əlisahib adlı meşə gözətçisi ilə söhbət aparmışdır. Əlisahib açıq şəkildə etiraf edərək deyib ki, Elman Əliyevdən 100 manat müqabilində xidməti damğasını götürüb. Və iki gün müddətində qanunsuz kəsilmiş minə yaxın ağacları damğalamışdır.

Cəlilabad meşələrinin kütləvi şəkildə məhv edilməsi ilə bağlı 22 yanvar 2024-cü ildə çəkilmiş daha bir video da Aktualinfo.org redaksiyasına daxil olub. Videoda Cəlilabad rayonunda, Göytəpə meşəbəyliyinin 14 saylı meşə dolayında yüzlərlə palıd ağacını kəsildiyi göstərilir.

Ancaq nə yazıq ki, vəzifəsi meşələri qorumaq olan Ekologiya və Təbii Sərvətlər Nazirliyi nəinki bu faktları görməzdən gəlir, hətta qurumun rayon şöbələri bu YAŞIL SOYQIRIMDA birbaşa iştirak edir…

Aktualinfo.org

Yanvarın 29-dan fevralın 1-dək sərbəst və Yunan-Roma güləşi üzrə U-20 Azərbaycan çempionatı keçiriləcək.

Azərbaycan Güləş Federasiyasının Gənclər və İdman Nazirliyi ilə birgə təşkil edəcəyi yarışı beynəlxalq və milli dərəcəli hakimlər idarə edəcəklər.

Bakı İdman Sarayında baş tutacaq çempionatın ilk iki günündə sərbəst, növbəti iki gündə isə Yunan-Roma güləşi üzrə qaliblər müəyyənləşəcək.
Gənclərdən (U-20) ibarət milli komandalara seçim xarakteri daşıyan yarışın görüşləri hər gün saat 10:00-da başlayacaq.

Yeni ildən repetitorlar xidmət qiymətini qaldırıblar. Bu barədə valideynlər narazılıqlarını sosial şəbəkələr vasitəsilə bildiriblər. Tələbə olmaq istəyən şagirdlərin valideynləri son ayda hazırlıq pullarının təqribən 30 faizə qədər artırıldığını yazıblar. Valideynlərdən biri son ildə özünün əmək haqqında heç bir artım olmadığı halda müəllimlərin belə qərar verməsinin məntiqsiz olduğunu vurğulayıb. (Bizimmedia.az)

Üstəlik, repetitorların bu işlə rəsmi şəkildə məşğul olmadıqları, vergi vermədikləri də zaman-zaman müzakirə olunan mövzudur.

Bəs belə olduğu halda repetitorlar nəyə əsasən qiyməti qaldırırlar?

Mövzu ilə bağlı təhsil eksperti Kamran Əsədov “Yeni Müsavat”a danışıb. Ekspert qeyd edib ki, bu gün Azərbaycan təhsil sistemi, xüsusən ali təhsil müəssisələrinə bakalavr, hətta doktranturaya qəbul prosesi, müəllimlərin işə qəbulu, eyni zamanda dövlət qulluğuna qəbulun hamısı repetitorlardan, hazırlıq kurslarından asılı vəziyyətə düşüb:

“Bu gün orta və ya ali məktəblərin görməli olduğu işlərin hər birini repetitorlar, hazırlıq kursları görür. 10-11-ci sinif şagirdlərini demək olar ki, siniflərdə tapa bilmirik, onların böyük əksəriyyəti repetitor yanında və yaxud hazırlıq kurslarındadır. Bu da valideynlərin ailə büdcələrinə kifayət qədər böyük yükdür. Valideynlər ən böyük məbləğləri repetitorlara, hazırlıq kurslarına ödəyir.

Apardığımız monitorinqlər onu göstərir ki, pandemiyadan sonra repetitor müəllimlər xidmət haqlarında ciddi artım ediblər. Təbii ki, bunun bir neçə səbəbi var. Ölkədə baş verən müəyyən qədər inflyasiya, kommunal ödənişlərin artırılması buna təsir göstərir. Amma onu da unutmaq olmaz ki, valideynlərin gəlirləri artmayıb, bunun fonunda isə əksinə, repetitorlar qiymətləri artırıb. Bakı şəhərində orta statistik valideyn övladının ali məktəbə daxil olmasını istəyirsə, ay ərzində ən azı 350 manatdan başlayaraq repetitorlara pul xərcləyir. Bu gün repetitorlar riyaziyyat fənnini 100-120 manata, Azərbaycan dili və ədəbiyyat fənnini 160-180 manata, tarixi 100 manatdan başlayan qiymətlərə hazırlayır. Bakı şəhərində bu gün 80 manata uşaq hazırlaşdıran repetitora rast gəlmək mümkün deyil. Beləliklə, əvvəlki illərlə müqayisədə biz qiymətlərdə ən azı 30 faiz artım görə bilirik. Bu da valideynləri çox çətin vəziyyətə salır. Hesab edirəm ki, dövlət məktəbləri öz öhdəliklərini layiqincə yerinə yetirməlidir. Həmçinin ali məktəblər qəbul imtahanlarını sadələşdirməlidir. Ali məktəblərə qəbul imtahanlarında yalnız 10-11-ci sinif dərsliklərinə aid suallar salınmalıdır ki, valideynlər repetitorlara az pul xərcləsin, abituriyentlər məktəb bilgiləri ilə daxil ola bilsinlər".

Təhsil eksperti Elşən Qafarov qeyd edir ki, repetitorluq ölkədə qanuni fəaliyyət göstərən xidmət sektoru deyil. Ona görə də bu sahədə qiymətlər dövlət tərəfindən deyil, bazarla tənzimlənmir: “Ümumiyyətlə, bütün xidmət sektorunda qiymətlər bazarla, tələb-təklif amili ilə tənzimlənir. Adətən həmişə böyük şəhərlərdə, xüsusən də Bakı, Abşeron, Sumqayıt və Gəncədə xidmət sektorunda olan qiymətlər kiçik şəhərlər, qəsəbələr kəndlərlə müqayisədə nisbətən yüksək olub. O cümlədən repetitorluqda da belədir.

Bəli, sentyabrdan etibarən son 4-5 ayda repetitorluqla bağlı qiymətlərdə artımlar müşahidə olunmaqdadır. Bu, xüsusilə Bakı, Abşeron, Sumqayıtda özünü daha çox göstərməkdədir. Məsələ burasındadır ki, repetitorluqla məşğul olan müəllimlər əlavə mənzil kirayə edir və eyni zamanda bu mənzillərə görə də əlavə kommunal xərclər ödəyirlər. Mənzillərin də kirayə qiymətlərində təxminən 50 faizə qədər artım müşahidə olunur. Bu baxımdan, repetitorluqla məşğul olan müəllimlərin əlavə xərcləri artdığına görə qiymətlərə də öz təsirini göstərir. Burada məcburiyyət yoxdur, valideynlər ciblərinə uyğun olaraq repetitorlara müraciət edə bilərlər. Hazırda ayda 200-300 manata da, 50-60 manata da hazırlaşdıran müəllimlər var. Valideyn daha adlı-sanlı müəllimə müraciət etmək istəyirsə, daha çox xərc çəkməli olur".

“N” saylı hərbi hissədə çalışan Yevax rayonun bir qrup sakini (70 nəfətr) ölkə başçısı İlham Əliyevə kütləvi şəkildə videomüraciət ünvanlayıb.

Gununsesi.info-nun məlumatına görə, şikayətçilər iddia edirlər ki, onların qanunvericiliklə nəzərədə tutulan hüquqları Müdafiə Nazirliyi tərəfindən tanınmır.

Həmin müraciətin mətinini və videosunu təqdim edirik:

“Azərbaycan Respublikasının Prezidenti, Ali Baş komandan möhtərəm İlham Əliyevə 44 günlük Vətən müharibəsi dövründə arxa cəbhədə iştirak edən biri Şəhid anası, ikisi Şəhid ailəsi olmaqla 70 nəfər mülki şəxs tərəfindən

Ş İ K A Y Ə T Ə R İ Z Ə S İ

Möhtərəm cənab Prezident, yazıb sizə bildiririk ki, biz 44 günlük Vətən müharibəsi dövründə 033 saylı hərbi hissənin mülki işçiləri komandanlığın rəsmi göstərişi ilə Maddi-texniki təminat taborunun tərkibində ön cəbhədə – döyüş bölgəsində 3000-5000 nəfərlik şəxsi heyətin bütün təminat növlərinin yerinə yetirilməsində gecə-gündüz dayanmadan iştirak etmişik. Hərbi sursatların-ağır atrileyra və top mərmilərinin yüklənməsi, daşınması, döyüş nöqtələrinə boşaldılması, ərazidən yığılması, vurulmuş hərbi texinkaların yüklənməsi və təmiri, geyimlərin daşınması və yuyulması, bütün növ ərzaqların daşınaraq təminat nöqtəsinə çatdırlması, çörək bişirilməsi və s. işləri yorulmadan, usanmadan həyata keçirmişik. Ancaq ötən dövr ərzində bizim hüquqlarımız kobud şəkildə pozulub və biz “Vətən müharibəsi iştirakçısı” statusu ala bilməmişik.

Baxmayaraq ki, müharibədən sonrakı ilk vaxtlarda bizim müvafiq sənədlərimiz aidiyyatı üzrə Müdafiə Nazirliyinə, həmçinin Əmək və Əhalinin Sosial Müdafiəsi Nazirliyinə göndərilib. Hətta bizə veteranlar üçün ödənilən müavinətə görə plastik kartlar belə verilmişdi. Amma bizə bəlli olmayan səbəblərdən, kimlərinsə qanunsuz müdaxiləsindən sonra bizim “Vətən müharibəsi iştirakçısı” statusumuzun qarşısına sədd çəkdilər. Konkret desək, bu məsələ hərbi hissə tərəfindən müvafiq qaydada əmrləşdirilməyib. Bizə bildirilib ki, 1-ci Ordu Korpusun o zamankı rəhbərliyi Hikmət Həsənovun vaxtında təsdiqini tapsa da, sonrakı komandan Qiyas Abbasov bizə bəlli olmayan səbəblərdən buna imkan verməyib. 033 nömrəli hərbi hissənin komandiri İqbal Şərbətov isə bizim üzləşdiyimiz qanunsuzluğun aradan qaldırılması istiqamətində heç bir addım atmır. Deyir ki, mən heç kiməm, mənim heç bir səlahiyyətim yoxdur. Yuxarılar göstəriş versin, mən də aidiyyatı sənədləri korpusa və nazirliyə təqdim edim. Amma yenə də bir çox məqamlar bizə qaranlıqdır…

Cənab Ali Baş Komandan, bir sözlə, Sizin 26 noyabr 2020-ci il tarixli 204-VIQD nömrəli Qanunu ilə təsdiq edilmiş “Vətən müharibəsində arxa cəbhədə xidmətlərə görə” Azərbaycan Respublikasının medalı ilə Azərbaycan Respublikasının işğal edilmiş ərazilərinin azad olunması və dövlət sərhədlərinin mühafizəsi zamanı arxa cəbhədə döyüş təminatı tapşırıqlarının yerinə yetirilməsində fərqlənmiş Azərbaycan Respublikası Silahlı Qüvvələrinin hərbi qulluqçuları və mülki işçiləri, habelə fədakar əməyinə görə müvafiq icra hakimiyyəti orqanının müəyyən etdiyi orqanın (qurumun) əməkdaşlarının təltif edilməsi, eyni zamanda Azərbaycan Respublikasının Prezidenti İlham Əliyevin 10 fevral 2022-ci il tarxli sərəncamı ilə Azərbaycan Respublikasının 2020-ci il sentyabrın 27-dən noyabrın 10-dək olan dövrdə Vətən müharibəsində iştirak etmiş, aparılan döyüş əməliyyatlarının uğurla nəticələnməsinə töhfə vermiş Azərbaycan Respublikası Silahlı Qüvvələrinin hərbi qulluqçuları və mülki işçiləri, habelə ön cəbhədə fədakarlıq göstərmiş mərkəzi və yerli icra hakimiyyəti orqanlarının, Azərbaycan Respublikası Prezidentinin yaratdığı publik hüquqi şəxslərin və dövlətə məxsus digər hüquqi şəxslərin əməkdaşları və mülki işçiləri “Vətən müharibəsi iştirakçısı” medalı ilə təltif edilməsi qaydaları bizə şamil edilməyib (baxmayaraq ki, Bakıda komfortlu kabinetlərdə istirahət edənlərin bəziləri həm “veteran”, həm də “qəhrəman” statuslarına sahiblənib).

Möhtərəm cənab Prezident, onu da diqqətinizə çatdıraq ki, biz təkcə 44 günlük Vətən savaşında deyil, həm “Aprel döyüşləri”ndə, həm də 23 saatlıq anti-terror tədbirlərində arxa cəbhədə tam gücümüzlə çalışımışıq və bütün növ təminatların çatdırılmasında iştirak etmişik.

Cənab Ali Baş komandan, ona görə Sizdən xahiş edirk ki, bizim pozulmuş hüquqlarımızın, yeyilmiş haqlarımızın bərpa olunması üçün müvafiq qaydada göstəriş verəsiniz! Öncədən minnətdarlığımızı bildiririk!”

Müdafiə Nazirliyindən göndərilən cavab məktubunda isə yaradılmış vəziyyətin səbəbləri tam şəkildə aydınlaşdırılmır.

Kürdəmirin mərkəzi küçələrindən olan Mirzə Ələkbər Sabir küçəsinin sakinləri bir neçə problemlə üz-üzə qalıblar.

Belə ki, adıçəkilən küçədə yolun asfaltsız olması, kanalizasiya xəttinin və işıqlandırmanın olmaması onlara çətinliklər yaradır.

Sakinlər sözügedən problemlərin həll edilməsi üçün aidiyyəti qurumlar tərəfindən tədbir görülməməsindən şikayətçidirlər.

"Yolumuz, kanalizasiya xəttimiz, işığımız yoxdur. Gecə küçəyə çıxanda gözümüz ayağımızın altını görmür”, - deyə sakinlər narazılıqlarını bildiriblər.

Ətraflı Baku TV-nin süjetini təqdim edirik:

“Azərbaycan Respublikasının Medianın İnkişafı Agentliyi” publik hüquqi şəxsin Müşahidə Şurasının tərkibi təsdiq edilib.

Prezident İlham Əliyev bununla bağlı Sərəncam imzalayıb.

Sərəncama əsasən, MEDİA-nın Müşahidə Şurasının tərkibi aşağıdakı kimi təsdiq edilib:

Müşahidə Şurasının sədri

İsmayılov Dağbəyi Mirzəxan oğlu.

Müşahidə Şurasının üzvləri:

Əliyev Vüqar Zifər oğlu;

Mehrəliyeva Şəfəq Akif qızı;

Mikayılova Sevil Əlirazı qızı;

Şıxlinskiy Elçin İsmayıl oğlu.

Ölkədə faliyyət göstərən bəzi restoranlar var ki, süni qiymət artımı müştəri narazlıqından əlavə qəribə hadisələrə rast gəlirsən.Bu hala adətən gecə faliyyət göstərən müsiqili əyləncəli restoranlarda rast gəlnir. Hansısa məkan kimlərinsə sifarişi və istəyi ilə faliyyət göstərir. Hansısa dost tanışınla restorana gedirsən qapıda mühavizəçi səni içəri buraxmır.

Səbəbin soruşanda isə restoran rəhbərliyi tərəfindən bu qadağanın qoyulduğu cavabı alırsan, hələ bu azmış kimi üstəlik restoranlarda proqramla çıxış edən mügənni və onun köməyçilərinədə bu qadağanın qoyulduğu hala rast gəlmək olur.

"Azərbaycan Reallığı"na müraciət edən əvvələr mügənni Ziba Osmanlı hal-hazirda isə mügənni Aynur Nəbiyevanın pradüseri olan Kənan Məmmədov bildirir ki, bir neçə gün bundan əvvəl mügənni Ziba Osmanlı ilə aralarında yaranan iş narazlıqı ilə bağlı sözün əsil mənasında problemlər yaşayır.

Kənan Məmmədov iddia edir ki, mügənni ona bir neçə restorana girişinə qabağa qoydurub, onun işinə əngəllər törədir. Mən öz əlaqələrim vastəsi ilə o restoranların bir neçə rəhbərləri ilə danışıb məsələni yoluna qoydum. Amma Sahra restoranı mənə qarşı bu qadağanı aradan qaldırmayıb, çünki Ziba Osmanlı özü mənə bildirmişdi ki, səni o restorana buraxdırmayacam, dediyi kimdə oldu.

Restoran rəhbəri Elçin Allahverdiyev mənim restoran səhnəsinə çıxmağıma qadağa qoyub.Hal-hazırda əməkdaşlıq etdiyim mügənni Aynur Nəbiyevaya restoran admestratoru zəng edib deyir ki, Bura Kənansız gəl Kənan bu səhnəyə buraxılmayacaq, səbəbin soruşanda isə bu qadağanı restoranın hazırda rəhbəri olan Elçin Allahverdiyev tərəfindən qoyulduğun deyirlər. Elçindən səbəbin soruşanda isə normal cavab eşitmək əvəzinə təhqir eşidirik deyə Kənan Məmmədov bildirir.

Məsələ ilə bağlı Elçin Allahverdiyevlə əlaqə saxladıq o deyilənlərin həqiqətə uyğun olmadığını bildirir. Düzünü bilmək istəsəz o restoran heç mənimdə deyil bizim isə adnı çəkdiyniz şəxslə heç bir problemimiz yoxdur, istədiyi vaxt gəlib restoranda otura bilər amma səhnəyə çıxmaq qadağan olunub.

Əməkdaşlıq etdiyi mügəninin hansısa mahnısı varsa öncədən təqdim etsin restoran sahiblərinə köməklik göstərsinlər amma səhnədə şəxsən özünün işdrakına icazə verilmir. Mügənni Ziba Osmanlı isə onun haqqında bizə heçnə deməyib biz bu restoranda kimlərinsə sifarişi ilə hansısa qadağalarda qoymuruq deyə Elçin Allahverdiyev bildirib.

Nərimanov rayonu Ağa Nemətulla küçəsində yerləşən 26 saylı yaşayış binasını su basıb.

Bu barədə Qaynarinfo-ya binanın sakinləri bildirib.

Sakinlərdən Mehman Məmmədovun sözlərinə görə, zirzəmidəki su artıq binanın 1 və 2-ci bloklarına qədər çatıb. "Vəziyyət dözülməz həddədir. Təsəvvür edin, üfunət iyindən evdə oturmaq olmur. Su artıq bloklara çatıb və antisanitariya, xəstəlik mənbəyinə çevrilib", deyə Mehman Məmmədov bildirib.

Onun sözlərinə görə, problemlə əlaqədar müvafiq qurumlara müraciət etsələr də, nəticəsi olmayıb.

Nərimanovun RİH başçısından GİLEY...

"Nərimanov Rayon İcra Hakimiyyətinə və digər müvafiq qurumlara müraciət etmişik. Amma tədbir görülmür. Heç gəlib baxan da yoxdur. Problem bir müddətdir ki, mövcuddur. Bilmirik hara şikayət edək", deyə şikayətçi əlavə edib.

Qaynarinfo məsələ ilə əlaqədar Nərimanov Rayon İcra Hakimiyyətinə dəfələrlə zəng vursa da, nəticəsi olmayıb. Qurumdan zənglərə cavab verilməyib.

Nərimanov rayonunun icra başçısı Elgin Həbibullayevdir.