Sabiq əmək və əhalinin sosial müdafiəsi naziri Səlim Müslümovun oğlu Turqay Müslümovun biznesi çökür.

DİA.AZ-ın qaynarinfo-ya istinadən məlumatına görə, "Orion Global" Məhdud Məsuliyyətli Cəmiyyətinin (MMC) hazırda İqtisadiyyat Nazirliyi yanında Dövlət Vergi Xidmətinin Bakı şəhəri Lokal Gəlirlər Baş İdarəsinə 82 min 551 manat 91 qəpik vergi borcu yaranıb.

Şirkətin tabeçiliyində fəaliyyət göstərən məşhur "Orion Palace”da aparılan vergi yoxlamaları zamanı həmin məbləğdə vergi borcu aşkarlanıb.

Restoran Səlim Müslümovun biznesində əhəmiyyətli yer tutur və sözügedən şirkət üzərindən idarə olunur.

Turqay Müslümovun adına olan "Orion Construction” və "Orion Cars” MMC-lər də müflis olmaq ərəfəsindədir. Qardaşı Asim Müslümlünün adına olan "Orion Creative Solutions” MMC də eyni vəziyyətdədir.

Xatırladaq ki, Səlim Müslümov 2021-ci ilin fevralında Dövlət Təhlükəsizliyi Xidməti (DTX) tərəfindən saxlanılıb. O, Dövlət Sosial Müdafiə Fondunun sədri (2002-2013) və nazir (2013-2018) işlədiyi dövrlərdə 27 milyon manatlıq rüşvətalma, mənimsəmə və israfetmə əməllərinə görə ittiham olunur. Sabiq nazir həmin puldan 20 milyon manatını istintaq dövründə ödəyib. 8 milyon manatlıq əmlakı üzərinə isə həbs qoyulub. Hazırda azadlıqda olan Səlim Müslümovun məhkəmə prossesi Bakı Ağır Cinayətlər Məhkəməsində hakim Faiq Qəniyevin sədrliyi ilə davam etdirilir.

Baş Prokurorluq Səfərbərlik və Hərbi Xidmətə Çağırış üzrə Dövlət Xidmətinin Xaçmaz Rayon Şöbəsinin saxlanılan rəisi Rahim Ağayevlə bağlı məlumat yayıb.

Qurumdan bildirilib ki, Baş prokuror yanında Korrupsiyaya qarşı Mübarizə Baş İdarəsi tərəfindən həyata keçirilmiş əməliyyat-axtarış tədbirləri ilə Səfərbərlik və Hərbi Xidmətə Çağırış üzrə Dövlət Xidmətinin Xaçmaz rayon şöbəsinin rəisi Ağayev Rahim Əlifağa oğlunun qanunsuz əməlləri ifşa olunub.

Əməliyyat-istintaq tədbirləri ilə Rahim Ağayevin həmin vəzifədə işləyərkən çağırışçının sağlamlıq vəziyyətilə əlaqədar həqiqi hərbi xidmətə yararsız hesab edilməsinə köməklik göstərilməsi müqabilində vətəndaşdan tələb etdiyi 8 min manat məbləğində pul vəsaitinin 5 min manatını rüşvət qismində almasına əsaslı şübhələr müəyyən edilib.

Rahim Ağayevin xidməti otağında axtarış aparılmaqla iş üçün əhəmiyyət kəsb edən sübutlar götürülüb.

Faktla bağlı başlanmış cinayət işi üzrə toplanmış ilkin sübutlar əsasında Rahim Ağayevə Cinayət Məcəlləsinin 311.3.3 (külli miqdarda rüşvət alma) və 308.2-ci (ağır nəticələrə səbəb olan vəzifə səlahiyyətlərindən sui-istifadə) maddələrilə ittiham elan edilərək barəsində məhkəmənin qərarı həbs qətimkan tədbiri seçilib.

Hazırda cinayət işi üzrə təqsirləndirilən şəxsin digər qanunazidd əməllərinin və cinayətə aidiyyəti olan şəxslərin dairəsinin müəyyən edilməsi istiqamətində istintaq-əməliyyat tədbirləri davam etdirilir.

Ağstafa Rayon İcra Hakimiyyətinin mayın 17-də “Ağstafa rayonunda abadlıq işlərinin satınalınması” üçün elan etdiyi tenderin nəticələri və qalibi açıqlanıb.

DİA.AZ Bizim.Media-ya istinadla xəbər verir ki, maliyyə dəyəri 195 880 manat olan tenderin qalibi “Topxana Layihə İnşaat” MMC (VÖEN - 2000157981) olub.

Tərəflər arasında bağlanacaq satınalma müqaviləsinin şərtlərinə əsasən şirkət Ağstafa rayonu ərazisində təmir və bərpa işlərini həyata keçirəcək. Bu işlər sırasına 410 metr sahədə beton-bort daşlarının quraşdırılması, 14,1 kubmetr sahədə qum-çınqıl qatışığından ibarət əsasların döşənək və hamarlayıcı qatlarının qurulması, və təbii qum-çınqıl qatışığının tökülməsi, 1 883 kvmetr sahədə sıx iri-dənəvər AB və ABV tipli asfalt-beton qatışığından qalınlığı 4 sm olan örtüyün qurulması, eləcə də örtüyün qalınlığı 0,5 sm dəyişdikdə əlavə etmək və ya çıxmaq və digər 76 adda təmir-tikinti işləri daxildir.

Qeyd edək ki, Əli Bayramovun rəhbərlik etdiyi "Topxana Layihə İnşaat" MMC 1996-cı ildə yaradılıb və İqtisadiyyat Nazirliyi yanında Dövlət Vergi Xidmətinin Bakı şəhəri Lokal Gəlirlər Baş İdarəsi tərəfindən qeydiyyatına alınıb.

Araşdırmalarımız zamanı məlum oldu ki, şirkət yarandığı vaxtdan bu günə qədər qalmaqallı tender layihələrində iştirak edib və hər dəfə dövlətə vergi borcunun olduğu ortaya çıxıb.

Belə ki, 2022-ci ilin oktyabr ayında 26 186.25 manat vergi borcunun olmasına baxmayaraq, Azərbaycan Meliorasiya və Su Təsərrüfatı ASC-nin Beyləqan Suvarma Sistemləri İdarəsinin 228 478 manatlıq tenderində qalib olub. Təkcə bu fakt sübut edir ki, həm şirkət, həm də ASC tender qanunvericiliyinin müddəalarını kobud şəkildə pozub.

Yəni, “Dövlət Satınalmaları haqqında” Qanunun 6.2.5-ci maddəsinin tələbləri vergi borcu olan şirkətlərin tenderdə iştirakını istisna edir.

Həmin ilin dekabr ayının sonlarına yaxın şirkət ilk dəfə Ağstafa RİH başçısının Ağstafa Şəhər İnzibati Ərazi Dairəsi Üzrə Nümayəndəliyi “Abadlıq işlərinin satınalınması” ilə bağlı elan etdiyi tenderin qalibi olub və tərəflər arasında 434 min 695 manat məbləğində müqavilə imzalanıb.

Bu fakt və yeni açıqlanan tender sübut edir ki, rayon ərazisində ötən ilin dekabr ayından başlayan abadlıq işləri hələ də başa çatmayıb və şirkətin bu işlərə davam etməsi üçün yeni maliyyə mənbələrinə ehtiyacı yaranıb.

Qeyd edək ki, şirkət ötən il ərzində Xızı Rayonu İcra Hakimiyyəti başçısının Xızı Şəhər İnzibati Ərazi Dairəsi üzrə Nümayəndəliyinin 349 min 516 manat dəyərində “Xızı şəhərində yolların əsaslı təmiri” (15.09.2020), “Bakı Konqres Mərkəzi" Məhdud Məsuliyyətli Cəmiyyətinin elan etdiyi 696 min 200 manat dəyərində “”Bakı Konqres Mərkəzi” MMC-nin 2022-ci il üçün mexanika, elektrik, santexnika, yanğından mühafizə sistemləri üçün texniki xidmətin, təmir işlərinin və bu sistemlər üçün ehtiyat hissələrinin satınalınması” (13.06.2022) və "Aqroservis" Açıq Səhmdar Cəmiyyətinin 298 min 540 AZN dəyərində “Müxtəlif obyektlərin layihə-smeta sənədlərinin hazırlanması işlərinin satınalınması” (23.02.2022) tenderlərinin də qalibi olub.

Bu tenderlərin ümumi dəyəri iki milyon manatdan artıqdır.

"Topxana Layihə İnşaat" MMC cari ilin yanvar və və mart aylarında Biləsuvar şəhər, Mübariz İbrahimov küçəsində iki dəfə asfaltlanma işlərini həyat keçirib. Belə ki, yanvar ayında döşənən asfalt yolunu mart ayında sökərək yenidən təmir ediblər. Çünki həmin yolun müəyyən hissələrində dağılmalar əmələ gəlib.

“Hüquqları Pozulmuş Məhkumların Müdafiəsi” İctimai Birliyinin təsisçilərindən biri, müdafiə nazirinin sabiq müavini Mehman Səlimov tərəfindən “Hürriyyət”in redaksiyasına növbəti məktub daxil olub. Qəzetimiz vasitəsilə Prezident İlham Əliyevə müraciət edən şikayətçinin məktubunu olduğu kimi dərc edirik:

“Hörmətli Prezident!

İlk öncə istərdim ki, özüm barədə qısaca da olsa məlumat verim.

Mən, Azərbaycan Respublikası Müdafiə nazirinin sabiq müavini olmuşam. Ulu Öndər Heydər Əliyevin Sərəncamı ilə Gəncə şəhərində dövlət çevrilişi cəhdinin qarşısının alınmasına rəhbərlik etmişəm və bununla bağlı H.Əliyevin Fərmanı ilə “Azərbaycan Bayrağı” ordeni ilə təltif olunmuşam.

1995-ci ilin mart hadisələrinin qarşısının alınmasında fəal iştirak etmişəm və buna görə mənə vaxtından əvvəl polkovnik hərbi rütbəsi verilmiş, həmçinin də Prezidentin Sərəncamı ilə Müdafiə nazirinin müavini vəzifəsinə təyin edilmişəm.

Bütün ömrümü dövlətə, dövlətçiliyə xidmət göstərməyə həsr etmişəm və bu gün də dövlətin, dövlətçiliyin və Sizin, Ali Baş Komandanın yanında olduğumu daim fəaliyyətimlə sübut edirəm.

Cənab Prezident!

Sizin korrupsiyaya və rüşvətxorluğa qarşı amansız mübarizə aparılması, cəmiyyətin bu məsələyə biganə qalmamağa səslənməsi, vətəndaşlara çağırışlar edilməsi və korrupsiyaya qarşı mübarizənin gücləndirilməsinə dair 2022-2026-cı illər üçün 4 aprel 2022-ci il tarixli Sərəncamınız, bir vətəndaş olaraq, məni bu sahədə də hərəkətə gətirmişdir. Elə bu amalla da çağrışınıza qoşularaq, “Hüquqları Pozulmuş Məhkumların Müdafiəsi” İctimai Birliyini təsis etdik və qanunvericiliyin tələblərini əsas götürüb, İctimai Birliyin təsis sənədlərini qeydiyyata alınması üçün Ədliyyə Nazirliyinə təqdim etdik. Düşündüm ki, Ədliyyə Nazirliyinin rəhbərliyi mənim cənab Prezidentin, dövlətin, dövlətçiliyin yanında olduğumu, keçmiş xidmətlərimi və əlbəttə, İctimai Birliyin qanunvericiliyin tələblərinə üyğunluğunu nəzərə alıb, İctimai Birliyi qeydiyyatdan keçirəcəklər.

Əfsuslar olsun ki, düşündüklərimizin tam əksi baş vermişdir. Belə ki, Ədliyyə Nazirliyi tərəfindən, nə bu gün Prezidentin çağrışına qoşulmağıma və Sizi dəstəkləməyimə, nə də mənim keçmiş xidmətlərimə qiymət verilməmişdir. Əksinə, Sizi dəstəklədiyimə görə Ədliyyə Nazirliyi tərəfindən aqressivlik nümayiş etdirilərək, müxtəlif bahanələr gətirilərək, İctimai Birliyin təsis sənədləri 5 dəfə geri qaytarılmışdır.

Ədliyyə Nazirliyində Prezidentə qarşı çıxan “3-cü qüvvə”…

Onu da bildirim ki, qarşılaşdığımız bu olaylar bizi amalımızdan döndərə və çəkindirə bilməyəcəkdir.

Hörmətli Prezident!

Məlumat üçün diqqətinizə çatdırım ki, bir ildə 6 dəfə İB-nin təsis sənədlərini qeydiyyatdan keçməsi üçün Ədliyyə Nazirliyinin Qeydiyyat və Notariat Baş İdarəsinə təqdim etmişik. Qeydiyyat İdarəsi əsassız bəhanələr gətirərək, sənədləri bir ildə 5 dəfə geri qaytarmışdır. Hal-hazırda İB-nin təsis sənədləri Ədliyyə Nazirliyinin Qeydiyyat və Notariat Baş İdarəsindədir.

Onu da diqqətinizə çatdırmaq istəyirəm ki, Ədliyyə Nazirliyinin vəzifəli şəxsləri tərəfindən gətirilən bəhanələrə son qoyulması üçün şəxsən Ədliyyə nazirinin müavini Toğrul Musayevin qəbulunda olmuşam. Toğrul Musayev mənim yanımda İB-nin qeydiyyata alınmasına şəxsən göstəriş versə də, bu günə kimi həmin sənədlər yalançı bəhanələrlə geriyə qaytarılmışdır.

Belə çıxır ki, Toğrul Musayev məni yola vermək üçün mənim yanımda tabeçiliyində olan əməkdaşa üzdə bir tapşırıq versə də, arxada başqa cür tapşırıq vermişdir.

Sönuncu dəfə Ədliyyə Nazirliyinin sözçüsünün verdiyi məlumata görə, “Hüquqları Pozulmuş Məhkumların Müdafiəsi” İctimai Birliyinin qeydiyyatdan keçirilməməsinə maneəçilik törədən “3-cü qüvvə”nin olduğu bildirilmişdir. Dediyinə görə, həmin “3-cü qüvvə” İB-nin qeydiyyata alınmasının qarşısını ciddi-cəhdlə almaqdadır.

Cənab Prezident!

Bizi bu gün “Hüquqları Pozulmuş Məhkumların Müdafiəsi” İctimai Birliyinin qeydiyyatdan keçrilməsi nə qədər maraqlandırırsa, 100 dəfə də bundan artığı bizi maraqlandıran “3-cü qüvvə”dir. Hansı ki, Sizin siyası kursunuzu dəstələdiyimizə görə, bizə qarşı çıxırlar və İB-nin qeydiyyatdan keçməsinin qarşısını alırlar.

Bundan başqa, bizi maraqlandıran başlıca və əsas məsələ odur ki, Ədliyyə Nazirliyində cənab Prezidentin siyasi kursuna qarşı çıxan “3-cü qüvvə” kimlərdir? Bizi maraqlandıran məsələ odur ki, Ədliyyə Nazirliyində Sizə qarşı çıxan, nazir Fikrət Məmmədovun sözünün üstünə söz qoyan “3-cü qüvvə” kimlərdir?

Hörmətli Prezident!

Görünən odur ki, bütün ömrümü dövlətə, dövlətçiliyə xidmətə həsr etdiyim və bu gün dövlətin, dövlətçiliyin və Sizin yanınızda olduğumu, siyasi kursunuzu dəstəklədiyimi hər yerdə bəyan etdiyim üçün Ədliyyə Nazirliyinin rəhbərliyinin qəzəbinə tuş gəlmişəm və hüquqlarımız pozulmaqda davam edir.

Əgər belə deyilsə, onda nəyə görə, addımbaşı bizim hüquqlarımızı pozurlar?

Cənab Prezident!

Yuxarıda qeyd edilənləri nəzərə alaraq, Sizdən xahiş edirəm:

“Hüquqları Pozulmuş Məhkumların Müdafiəsi” İctimai Birliyinin qeydiyyatdan keçməsinə, həmçinin, Sizin siyasi kursunuzu dəstəkləyənlərə (bizlərə) qarşı çıxan “3-cü qüvvə”lərin kimliyi və İB-nin təsisçilərinə qarşı Ədliyyə Nazirliyinin rəhbərliyi tərəfindən həyata keçrilən repressiyaların qarşısının alınması barədə aidiyyəti üzrə göstəriş verməyinizi və bizlərə köməklik göstərməyinizi Sizdən xahiş edir və əvvəlcədən dərin minnətdarlığımızı bildiririk”.

Redaksiyadan: Qarşı tərəfin mövqeyini dərc etməyə hazırıq.

Azərbaycanda adı korrupsiya və rüşvətxorluq əməllərində hallanmış dövlət məmurları bir qayda olaraq tutduqları vəzifədən uzaqlaşdırıldıqdan sonra onların əməlləri araşdırılır, mənimsədiyi vəsaitlər geri qaytarılır. Lakin təəssüflər olsun ki, bəzi keçmiş məmurlar bu cür araşdırmalardan kənarda qalmağı, mənimsədikləri vəsaitin “sahibinə” çevrilməyi bacarıb.

Sfera.az saytı çoxlu sayda korrupsiya əməli törətməsi haqda əsaslı şübhələr olsa da, fəaliyyətinə hüquqi qiymət verilməyən keçmiş yüksək vəzifəli şəxslərlə bağlı araşdırmalara başlayıb.

Adı uzun müddət korrupsiya və rüşvətxorluq əməllərində hallandırılan, yüksək ranqlı dövlət işçilərindən biri də ləğv edilmiş Dövlət Dəniz Agentliyinin direktoru vəzifəsində çalışmış Qüdrət Qəmbər oğlu Qurbanovdur.

Dosye:

Qüdrət Qurbanov 1959-cu il oktyabrın 20-də Naxçıvan Muxtar Respublikasının Naxçıvan şəhərində anadan olub. Azərbaycan Prezidenti İlham Əliyevin 21 aprel 2006-cı il tarixli sərəncamı ilə Dövlət Dəniz Administrasiyasının rəhbəri vəzifəsinə təyin olunub.

Administrasiya 2018-ci ildən Dövlət Dəniz Agentliyi adlandırılıb, Q.Qurbanov yeni quruma rəhbər təyin edilib.

2021-ci ilin oktyabrında isə Agentlik ləğv edilib və Q.Qurbanov vəzifəsindən azad olunub. Bu agentliyin, habelə Dövlət Dəniz Agentliyinin tabeliyində olmuş Dəniz Üzgüçülüyünün Təhlükəsizliyi Mərkəzi, eləcə də Nəqliyyat və Texniki-Təminat İdarəsinin əsasında Nəqliyyat, Rabitə və Yüksək Texnologiyalar Nazirliyi yanında Dövlət Dəniz və Liman Agentliyi yaradılıb.

Q.Qurbanovun rəhbərliyi dövründə həm administrasiyanın, həm də agentliyin böyük səlahiyyətləri olub. Qurumlar dəniz nəqliyyatı sahəsində dövlət siyasətinin həyata keçirilməsində və inkişafında iştirak edib, bu sahədə tənzimləməni və nəzarəti həyata keçirib.

Dəniz üzgüçülüyünün təhlükəsizliyi, dənizdə insan həyatının və sağlamlığının qorunması, dəniz ətraf mühitinin mühafizəsi, habelə dənizçilərin hazırlanması sahəsində tədbirlər görüb.

Dəniz limanlarında fəaliyyətin dövlət tənzimlənməsində iştirak edib və dəniz üzgüçülüyünün təhlükəsizliyi ilə bağlı xidmətlər (naviqasiya və mayak, bələdçi, kanal, lövbər və gəmi yığımı) göstərib.

Onun korrupsiya əməlləri haqqında yazılanlar...

Media üzərindən apardığımız araşdırmalar da göstərir ki, Qurbanov vəzifədə olduğu illərdə səlahiyyətlərin genişliyindən istifadə edərək çoxlu sayda korrupsiya və rüşvət əməlləri törədib, müxtəlif şəxslərə aid olan əmlakları mənimsəyib.

On beş il ərzində Dövlət Dəniz Administrasiyasına və Agentliyinə rəhbərlik etməsi Q.Qurbanovu zəngin məmurlardan birinə çevirib.

İddialara görə Q.Qurbanov qurumlara rəhbərlik etdiyi dövrdə dənizçilərə sertifikatları 120-150 min manata satıb.

Q.Qurbanov və adamları sertifikatla yanaşı, diplom alveri ilə də məşğul olub.

İddialara əsasən administrasiya rəhbərliyi matros diplomunu 2500-3000, bosman diplomunu 4000-5000 manata satıblar. Üstəlik bu diplomların dəyişdirilməsi zamanı da dənizçilərdən müəyyən məbləğ alınıb.

Ölkə xaricində qurduğu biznes şəbəkəsi...

Külli miqdarda qeyri-qanuni gəlir əldə edən Qurbanov vəsaitinin önəmli hissəsini Türkiyəyə yönəldib. O, Türkiyədə biznes şəbəkəsi qurub və bu şəbəkəni müntəzəm şəkildə genişləndirib. Keçmiş direktorun Türkiyədə yaratdığı biznesə oğlu Orxan Qurbanovun nəzarət etdiyi bildirilir. Biznesi inkşaf etdirmək üçün O.Qubanovun İstanbul şəhərində dəbdəbəli ofis-mərkəz aldığı deyilir. Həmçinin Qurbanovların öz bizneslərini Türkiyədən Şərqi Avropaya köçürmək üçün müxtəlif layihələrə başladıqları da qeyd olunur.

Q.Qurbanovun qızıl biznesi ilə məşğul olduğu da iddia edilir. Keçmiş agentliyin rəisi qızıl binzesinə sərmayə qoyub və bu işdə əsas şəxslər onun qardaşı və oğludur. Hətta məlumatlarda Q.Qubanovun qızıl biznesini Türkiyəyə köçürtməsi və orda bu işlərə qardaşının nəzarət etdiyi qeyd edilir.

Niyə araşdırma aparılmır?

Mediada Q.Qurbanovun haqqında irəli sürülən iddialar apardığımız araşdırmalara görə əsassız deyil. Keçmiş agentlik rəhbəri Azərbaycanda və xaricdə çoxlu sayda bahalı daşınmaz əmlaka, oğlu isə hətta bahalı maşın kolleksiyasına malikdir.

Bu faktlara hüquq-mühafizə orqanlarının diqqət yetirməsi, Q.Qurbanovun rəhbər vəzifədə çalışdığı dövrdə hüquqi qiymət verilməsi vacibdir.

Ümidvarıq ki, istər Q.Qurbanov, istərsə onun kimi digər keçmiş məmurların vəsaitləri Qarabağın və Şərqi Zəngəzurun dirçəldilməsinə sərf ediləcəkdir. Çünki Q.Qurbanovun elə İstanbulda olan 3 əmlakın dəyəri ən az 3 kəndin inşa edilməsinə bəs edəcək qədərdir.

Mövzunu nəzarətdə saxlayacağıq.

Sfera.az

İmişli Suvarma Sistemləri İdarəsi nəqliyyat vasitələri, maşın və mexanizmlər üçün sürtgü materiallarının satın alınması ilə bağlı kotirovka soruğusuna yekun vurub.

DİA.AZ Valyuta.az-a istinadla xəbər verir ki, sorğunun qalibi "Technoil” MMC olub.

İdarə ilə şirkət arasında bağlanacaq müqavilənin maliyyə dəyəri 24.265,05 AZN-dir.

İqtisadiyyat Nazirliyi yanından Dövlət Vergi Xidmətinin reyestr məlumatlarına görə, "Technoil” MMC 10 mart 2015-ci ildə qeydiyyata alınıb.

Nizamnamə kapitalı 11 688 495 AZN şirkətin hüquqi ünvanı Bakı şəhəri Nərimanov rayonu, Əhməd Rəcəbli küçəsi, ev 33, mənzil 4-də yerləşir. MMC-nin qanuni təmsilçisi Zeynalova Rumadə Ağabəy qızıdır.

Şirkətin həmtəsisçilərindən biri Hacıyev Elvin Orucəli oğludur. O, fövqəladə hallar nazirinin müavini Orucəli Hacıyevin oğludur.

Elvin Hacıyev müsahibələrinin birində "Technoil” MMC-dən danışarkən bildirib ki, bu şirkət ailəsindən gələn layihədir: "Restoran biznesi mənim öz təşəbbüsüm ilə formalaşıb, ancaq "Babylon Agro" və "Technol" bizim ailədən gələn layihələrdir. "Tecnol"da sadəcə biz iştirak etmirik, tərəflərdən biriyik”.

Azərbaycanın mənzil tikintisi sahəsində boşluqlar və özbaşınalıqlar saysız-hesabsızdır. Rəsmi qurumlar tərəfindən ciddi tədbirlər görüləcəyi barədə tez-tez məlumatlar verilməsinə baxmayaraq, tikinti şirkətləri və MTK-lar tərəfindən sakinlərdən sayğaclara görə qanunsuz ödənişlərin yığılması, onların aldadılması, işlərin natamam görülməsi (tikinti norma və qaydalarına əməl edilmir) və s. kimi problemlər davam edir.

Mənzil mülkiyyətçiləri müştərək cəmiyyətlərinin təşkili ilə binaların tikinti şirkətlərinin nəzarətindən çıxacağı gözlənilsə də, mexanizm effektli olmadı. Bakıda əksər binalarda yaradılmış mənzil mülkiyyətçiləri müştərək cəmiyyətləri faktiki olaraq tikinti şirkətlərinin və ya mənzil tikinti kooperativlərinin (MTK) nəzarətindədir, sakinlərin ödədiyi kommunal haqların necə xərcləndiyinin hesabatı verilmir.

18 MƏRTƏBƏLİ BİNADA LİFT ÇƏTİNLİYİ

Bakıda bir yaşayış kompleksi var ki, 20 ilə yaxındır istifadəyə verilsə də əsas lifti istifadəyə verilməyib. Binanın yuxarı mərtəbələrində yaşayan sakinlər həyətə düşmək və mənzilə qayıtmaq lazım gələdikdə zülüm çəkirlər.

DİA.AZ bildirir ki, söhbət Bakı şəhəri, Nəsimi rayonu, Xətai pr 38 ünvanında yerləşən və "Hüquq" MTK-nın çoxdan inşa etdiyi yaşayış kompleksindən gedir. Kompleksin 18 mərtəbəli C1 girişində yaşayan Osmanov Yunis Xalid oğlu sakinlər adından Marja-ya müraciətində bildirib ki, rəsmi qurumlara 17 dəfə müraciət etməsinə baxmayaraq, heç bir nəticəsi yoxdur:

"Mən təxminən 15 ildir bu binada yaşayıram. C1 girişində iki lift nəzərdə tutulsa da yardımçı lift işləyir, əsas lift istifadəyə verilməyib. 18 mərtəbəli bir bina üçün kiçik bir lift kifayət etmir, düşüb qalxmaqda çox əziyyət çəkirik. Burada 30 ailənin 100-dən çox üzvü yaşayır. Əsas liftin işləməməsi barədə çoxsaylı müraciətlərimizin nəticəsi yoxdur. Prezident İlham Əliyevin 2019-cu ildə imzaladığı "Bəzi çoxmənzilli binaların istismarına icazə verilməsinin sadələşdirilməsi haqqında” Fərmanından sonra bu binadakı qüsurlardan bəziləri aradan qaldırıldı, amma tam şəkildə deyil, hazırda bir sıra problemlər qalmaqdadır, əksər sakinlər çıxarış (kupça) ala bilmirlər".

MKT DÖVLƏT AGENTLİYİNİN TƏLƏBİNƏ ƏMƏL ETMƏYİB

2022-ci ildə Osmanov Yunisin müraciətlərinə Azərbaycan Respublikası Fövqəladə Hallar Nazirliyinin Sənayedə İşlərin Təhlükəsiz Görülməsi və Dağ-mədən Nəzarəti Dövlət Agentliyindən verilən cavablarda bildirilir ki, həqiqətən "Hüquq" MKT tərəfindən inşa edilmiş binanın C1 girişində 2-ci liftin istismara verilmədiyi, qüsurlar olduğu aşkar edilib. Agentlik tərəfindən 15 gün ərzində nöqsanın aradan qaldırılması və liftin istismara verilməsi barədə "Hüquq" MKT-nın rəhbərliyindən tələb olunub.Həmin tələblərdən xeyli vaxt keçməsinə baxmayaraq "Hüquq" MKT liftin istifadəyə verilməsini təmin etməyib.

"Bir sıra vəzifəli şəxslər öz vəzifələrini düzgün və ya ciddi icra etmirlər. Tikinti şirkəti göstərişləri və tələbləri yerinə yetirmir. Bəs vəzifəli şəxslər müraciətlərə laqeyd yanaşdıqda vətəndaş nə etsin?!", - Yunis Osmanov deyib.

Əlavə edək ki, mətbuatda çıxan məlumata görə, "Hüquq" Mənzil-Tikinti Kooperativi icra sənədindəki tələbin üzrsüz səbəbdən icra məmuru tərəfindən müəyyən olunmuş müddətdə icra edilməməsinə və ya icra məmurunun məhkəmə və ya başqa dövlət orqanlarının qərarlarının icrası ilə əlaqədar digər qanuni tələblərinin yerinə yetirilməməsinə görə məhkəməyə verilib.

Sakinlərin müraciətilə əlaqədar "Hüquq" MKT ilə əlaqə saxlamağa cəhd etdik. MTK-da soğumuza və telefon zənglərimizə cavab verən olmadı. Qarşı tərəfin mövqeyini dərc etməyə hazırıq.

DİA.AZ

Bir neçə ay əvvəl Səfərbərlik və Hərbi Xidmətə Çağırış üzrə Dövlət Xidmətinə sürpriz rəis təyinatı bu qurumun fəaliyyətində mənfi fəsadlar verəcəyinə dair proqnozlar özünü doğrultdu.

Belə ki, bu sahədə bir gün də olsun təcrübəsi olmayan Mürsəl İbrahimov dövlət üçün strateji sahə olan bu orqanda yaratdığı boşluqlar özünün mənfi fəsadlarını verdi.

Dünən Baş Prokurorluq Yanında Korrupsiyaya Qarşı Baş Mübarizə İdarəsi Səfərbərlik və Hərbi Xidmətə Çağırış üzrə Dövlət Xidmətinin bir sıra rayon -şəhər bölmələrindəki qanunazidd fəaliyyəti ifşa edib.

Söhbət Səfərbərlik və Hərbi Xidmətə Çağırış üzrə Dövlət Xidmətinin Cəlilabad və Laçın rayon şöbələrindən gedir.

Göründüyü kimi bu əməliyyat konket bir rayon, yaxud da bir şəxsə aid deyil, ona görə də bütün bu qanunazidd əməllərin məsuliyyətini Mürsəl İbrahimov daşımalıdır.

Çünki, onun tabeçiliyində olan bir neçə şəxsin vəzifə cinayətlərindən söhbət gedir.

Mürsəl İbrahimov ondan icazəsiz toya gedən komissarın kimliyini öyrənib töhmət verirsə, ola bilməz ki, bu cinayətlərdən də xəbəri olmasın.

Ona görə də Baş Prokurorluğun apardığı əməliyyat və istintaq tədbirlərinin əhatə dairəsi tam müəyyən olunmalı və əsas günahkar şəxslər məsuliyyətə alınmalıdır.

Görünür, uzun illər Eldar Mahmudovun əlinin altında çalışan Mürsəl İbrahimov keçmiş şefi kimi özünün də cəzasızlıq mühitində olduğunu hesab edir.

Gununsesi.info

Bir neçə gün öncə, Rəşad Nəbiyevin və Tahir Mirkişilinin gözündən uzaq, gözəl Bakımızın çiçəklənən yollarına istəmədən daha bir maşın əlavə etmək məcburiyyətində qalıb, taksi çağırdım. Gəldi: köhnə, yamaqlı, içi tozlu, bərbad gündə...

Bu hələ hamısı deyil – qapısı bağlanmırdı, daha doğrusu, qapı açılan kimi 10 sm aşağı düşürdü, bağlananda isə söykənməmək lazım gəlirdi...

Maşın yerindən tərpənəndə 8 balllıq zəlzələ baş verdi, yol boyu içində yırğalanmaqdan başım fırlanırdı: təkərlərin balansı deyil, bütün mərkəzləşmə pozulmuşdu. Əlbəttə ki, belə maşında kondisionerdən, normal oturacaqdan danışmağa dəyməz.

Texniki baxışdan keçib-keçmədiyini soruşdum – bal kimi keçibmiş. Təəccübləndim və dostlardan maraqlanmağa çalışdım.

Məlum oldu ki, dostlardan biri texniki baxış üçün yenicə müraciət edib: xarici maşındır, 5-6 ilin, yüksək səviyyədə də saxlanılır; dövlət rüsumunu verib, texniki baxışdan keçməsini istəyib. Maşına ilk baxışdaca dərman qutusunda bəlli dərmanların çatmadığını deyiblər. Siyahı istəyib və tənbəllik etməyib, verilən 10 adda dərmanı apteklərdən almaq üçün gəzib. Bahalı dərmanlar deyil, biri 50-60 qəpikdir, ancaq hər aptekdə də tapılan deyilmiş.

Dərman boğçasını hazırlayandan sonra təkrar “Binə” TM sarıda yerləşən texniki baxış mərkəzinə yollanıb. Burda isə maşına bir də göz atılıb və deyiblər ki, əyləc sistemində qüsur var.

Xarici maşını olanlar yaxşı bilir: əyləc sistemində hər hansı qüsur olarsa, avtomatik xəbərdarlıq işığı yanır, diaqinostika tələb edilir. Bunu əsas gətirib, hansı əsasla, gözəyarı baxmaqla, maşını heç işə salmadan əyləc sistemində qüsur olduğu qənaətinə gəldiklərini soruşub dostumuz...

Uzun-uzadı müzakirədən sonra bəlli olub ki, xeyri yoxdur, qət-təzə maşını belə texniki baxışdan keçirməmək üçün bəhanə tapa bilirlər. Səbəb isə odur ki, texniki baxışın dövlət rüsumu 30 manatdır, 80-100 manat verirsən, heç maşını boksa salmağa da ehtiyac yoxdur, dərhal texniki baxışdan keçmə sənədini alırsan.

Yəqin ki, son model xarici maşında “problem” tapan həmin “mütəxəssislər” mənim getdiyim taksini də görmədən, pul alaraq texniki baxışdan keçiriblər.

İnsanlara əziyyət verməyə heç bir ehtiyac yoxdur: elə texniki baxış rüsumunu 100 manat təyin edin, insanlar zəhmət çəkib gəlməsinlər də - onlayn qaydada rüsumu köçürüb, “texniki baxış” sənədini alsınlar. Bu, dövlətə də onmilyonlarla xeyir gətirər.

Yoxsa cənab nazir Rəşad Nəbiyevlə millət vəkili Tahir Mirkişili də başlayıblar ki, “tələblərə cavab verməyən” taksi belə gəldi, elə getdi...

Tələblərə cavab verməyən maşına Bakı yollarında şütümək üçün sənəd verən sadə vətəndaşlardır, yoxsa taksi şirkətləri?

Yenipress.az

“National Prime” klinikasına müraciət edən pasiyentlərdən göstərilən xidmət üçün ödənişi nağd formada həyata keçirmələri tələb olunur.

Bu barədə Yenicag.az-a sözügedən klinikada əməliyyat olunmuş vətəndaşlardan biri məlumat verib. Onun sözlərinə görə, “National Prime” klinikasında əməliyyat olunan pasiyent kart vasitəsilə ödəniş etmək istəsə də, səhiyyə müəssisəsinin kassasında bunun mümkünsüz olduğu, ödənişlərin yalnız nağd şəkildə aparıldığı bildirilib.

Pasiyent klinika əməkdaşlarına nağdsız ödənişlərlə bağlı Prezidentin müvafiq sərəncamını xatırlatsa da, “sağlamlıq keşikçiləri” bu məsələnin onların problemi olmadığını deyiblər.

Şikayətlə bağlı “National Prime” klinikası ilə əlaqə saxlasaq da, zəngimizi cavablandıran klinika əməkdaşı kobud danışmaqdan əlavə, məsələni az qala dövlət sirri səviyyəsinə qaldıraraq bu barədə hər hansı açıqlama verməməkdə sona qədər israrlı oldu.

Qeyd edək ki, “National Prime” klinikasının Azərbaycanın keçmiş əmək və əhalinin sosial müdafiəsi naziri Füzuli Ələkbərovun qızına məxsus olduğuna dair iddialar geniş yayılıb.