"Şikayətim "Şirin su" şirkətindəndir. Mən "Şirin su"nun ən azı 4 illik müştərisiyəm". DİA.AZ bildirir ki, bu barədə "Müştərinin Səsi" sosial qrupundakı paylaşımında Samir Əliyev adlı istifadəçi giley edir.

Daha sonra narazı vətəndaş bildirir: "Belə ki, 3.80 Azn olan 19 litrlik suyun qiymətini sifariş verəndə dedilər ki qiymət 4.40 Azn olub. Ancaq bunu yazdılar. Əlavə heç bir təklifsiz. Mən də bildirdim ki, onda sifarişimi qeyd etməyin mən bazardakı digər su şirkətlərinin də təkliflərini araşdırım. Bundan sonra mənə bildirildi ki, bizde belə kampaniya var ki, 7 ədəd su aldıqdan sonra 8-ci pulsuz olacaq. Bununla da 1 bidon suyun qiyməti 3.85 AZN olacaq. Həmin gün evdə su bidiyi üçün məcbur bunlardan 4.40 manatdan aldım suyu. Bir neçə gün sonra bunlara yazdım ki, bidonları qaytarıb depozitimi geri götürürəm. Mənə soruşdular ki, niyə müştərilikdən çıxırsız. İzah etdim ki, mən sizdən imtina etməyincə mənə demirsiniz ki bizdə belə kampaniya da var. Mənə bu dəfə xanım bildirdi ki, müştəri imtina etməyincə və bizdən endirim və ya kampaniya barədə soruşmayınca biz kampaniya barədə məlumat vermirik. Mən facebook səhifələrinə də test üçün yenə yazıb qiymət soruşdum. Yenə də 4.40 Azn yazdılar və kampaniya barədə də heç bir məlumat vermədilər.
Belə...
Artıq müştərilikdən də çıxmışam.
27 martdan da sifariş vermişəm ki, gəlib bidonları götürsünlər və depozitimi qaytarsınlar. artıq aprelin 11-dir. Hələ də gəlməyiblər. Koment də yazanda pozurlar komentlərimi. Nə badə bu şirkətin müştərisi olasınız".

İddia olunanlarla bağlı dia.az olaraq qarşı tərəfi də dinləməyə hazırıq...

Heydər Əliyevin 100 illiyi (1923-2023) ilə əlaqədar Azərbaycan Respublikasının yubiley medalı təsis edilib.

Milli Məclisin bu gün keçirilən iclasında “Azərbaycan Respublikasının orden və medallarının təsis edilməsi haqqında” qanuna dəyişiklik edilib.

Layihədə qeyd olunub ki, “Azərbaycan Respublikasının orden və medallarının təsis edilməsi haqqında” qanunun 2-ci maddəsinə “Vətən Müharibəsi Qəhrəmanı” medalı hissəsindən əvvəl “Heydər Əliyevin 100 illiyi (1923-2023)” Azərbaycan Respublikasının yubiley medalı məzmunda yeni hissə əlavə edilsin.

Layihə səsverməyə çıxarılaraq III oxunuşda qəbul olunub.

Ağsu dolaylarında olan avtomobil yolunun ləğv edilərək, Ağsu çayının kənarı ilə alternativ yolun çəkilməsi yenə də gündəmə çıxıb. Səbəbini də belə göstərirlər ki, guya Ağsu dolaylarında sürüşmə günü-gündən artır və bunun qarşısını ala bilmirlər. Boş və məntiqsiz bəhanədir.

Ağsu dolayları, Ağsu rayonunun iqtisadiyyatının ən əsas sütunlarından biridir. Ağsu rayonunun bazarı, əksər ərzaq dükanları, ət dükanları və digər ticarət obyektləri əsasən Ağsu dolaylarında yerləşən iaşə obyektlərinin sayəsində nisbətən ayaqda dura bilir. Dolaylarda olan iaşə obyektlərinin bağlanması rayonun iqtisadiyyatına çox ciddi ziyan vuracaq və onsuzda ölkənin ən kasıb rayonlarından birinə çevrilən Ağsuda rayonu bundan da çətin bir duruma düşəcək.
Ağsu dolaylarında ciddi bir sürüşmə yoxdur. Sadəcə uzun illərdir ki, dolaylarda olan avtomobil yolları təmir edilmir . Hər dəfə yalandan ora-bura yamaq vurmaqla dövlətin milyonlarla vəsaitini talayıb yeyiblər. Baxımsız olan yollarda - ən əsas da dağ yollarında kiçik sürüşmələrin olması təbiidir.

Diqqətinizə çatdırım ki, Ağsu dolaylarında olan avtomobil yolluna ən böyük zərbəni Şamaxi Palas Şərədil hoteli vurub. Hotelin tikintisi zamanı ağır tonnajlı yük maşınları və torpağı sirkələyən yüksək vibrasiyalı texnikaların istifadəsi çox gözəl bir təbiəti olan Ağsu dolaylarında torpaq oynamasına və sürüşmələrə gətirib çıxardı. Hotelin tikintisindən sonra Ağsu dolaylarında zərər vurulan yollar təmir olunmadı.
Bir daha qeyd edirəm; bu günə qədər Ağsu dolaylarında olan avtomobil yoluna asvalt örtüyü çəkilməyib. Ancaq və ancaq keyfiyyətsiz yamaq vurmaqla kifayətlənirlər.

Gələk əsl məsələyə!

Uzun illərdir ki, Oliqarxlar Ağsu dolaylarını Ağsu sakinlərinin əllərindən almaq uğrunda mübarizə aparırlar. Demək olar ki, hər il Ağsu dolaylarında yerləşən iaşə obyektlərinin sahiblərinə təzyiqlər edilir, obyektləri sökülür, müxtəlif yollarla cərimələnir, onların işlədikləri obyektləri buraxıb getmələri üçün bütün vasitələrdən istifadə edilir.
Dəfələrlə dolaylarda yerləşən iaşə obyektləri məcburən sökdürülərək sahibkarlara külli miqdarda maddi ziyan vurublar. Axırıncı dəfə 2020- ci ildə guya turizm siyasətinə uyğunlaşdırmaq bəhanəsi ilə dolaylarda yerləşən iaşə obyektlərini sökdürərək yenidən tikilməsi üçün sahibkarlara 100 min manatlıq dəyəri olan layihələr verib, bu layihələr əsasında obyektlərini yenidən tikmələri ilə bağlı təzyiqlər etdiblər.

2020- ci ildə, sahibkarların külli miqdarda borca düşərək verilən bahalı layihələr əsasında iaşə obyeklərini tikib başa çatdırmaları məmurlarda təəccüb yaratdı. Görünür hesab edirdilər ki, bu boyda məbləğin qarşısında sahibkarlar çörək qazandıqları obyektləri məcbur olub atıb gedəcəklər.
Dövlətin verdiyi layihələr əsasında obyektlərin yenidən tikildiyini gördükdən sonra, başladılar iaşə obyektlərinin sahiblərini məhkəməyə verməyə ki, guya onlar qanunsuz torpaq zəbt edərək kafe və restoran tikiblər. Başladılar özlərinin verdikləri layihələri inkar etməyə. Hazırda Ağsu dolaylarında dövlət layihəsi çərçivəsində sahibkarların öz hesabına tikilən iaşə obyektlərini sənədlə təmin etmək az qala Qarabağ məsələsindən də çətin bir problemə çevrilibdir.
Adama deyərlər ki, alternativ yol cəkiləcəkdirsə, insanları bu boyda xərcə niyə salırdınız. Niyə onsuz da acınacaqlı durumda olan insanlar əlavə borca- xərcə düşməli idi?
İlin yağışlı fəsillərində aşıb-daşan , dəfələrlə hətta, bəndləri belə dağıdan Ağsu çayının kənarı ilə çəkilən yol, necə ola bilər ki, Ağsu dolaylarından daha rahat və daha təhlükəsiz olsun?
Ağsuda hər kəs bilir ki, Ağsu dolaylarının böyük bir qapalı istirahət zonasına çevrilməsi planı var. Oliqarxlar Ağsu dolaylarına göz tikiblər. Hətta, gəzən söhbətlərə görə, ərazidə olan bütün dağları hündür setkalarla qapayıb, ov heyvanları buraxaraq, əyləncə - ovçuluq məkanı edəcəklər. Yanı ki, məqsəd rayonu rahat avtomobil yolu ilə təmin etmək yox, Ağsu dolaylarını Ağsu sakinlərinin əlindən almaqdır.
Məqsəd rayonun rahatçilığıdırsa, Ağsu dolaylarında olan hazırkı yolu abadlaşdırmaq nə boyda problemdir ki? Yaxud, hansı dövlət büdcəsindən daha az xərc aparar?
Olmazmı ki, insanlar yol gedərkən gözəl təbiətin verdiyi gözəl hisslərdən yararlanıb, təbiətin gözəl havasını udsunlar? Yoxsa, gözəlliklərdən yararlanmaq ancaq məmurlara aiddir?

Gundemxeber.Az

Masallı Regional Meşə Təsərrüfatı Mərkəzinin xidməti ərazisində kütləvi ağac qırıntıları ilə bağlı Ekologiya və Təbii Sərvətlər Nazirliyinin Meşələrin İnkişafı Xidməti yoxlamalara başlayıb.

DİA.AZ bildirir ki, bu barədə AzToday.az-ı bilgiləndirən mənbənin sözlərinə görə, Masallı Regional Meşə Təsərrüfatı Mərkəzinin sabiq direktoru Mustafa Əhmədovun rəhbərliyi altında aparılan yoxlamalar biabırçılıqlarla müşaiyyət olunmaqdadır.

Belə ki, Masallı rayon Qəriblər meşəbəyliyində kütləvi qırıntılarla bağlı vətəndaşların məlumatı əsasında başlanan yoxlamalar daha çox şikayətçi tərəfi zərərsizləşdirməyə yönəlib. Meşələrin İnkişafı Xidmətinin rəhbəri Cabbar Qəribovun mediaya verdiyi açıqlama da bunu göstərir. Onun açıqlamasında bildirilir ki, 9 aprel tarixində, gecə saatlarında Masallı Regional Meşə Təsərrüfatı Mərkəzinin əməkdaşları tərəfindən Qəriblər meşəbəyliyinin 8 saylı dolayında qanunsuz olaraq kəsilmiş ağacların Mersedes markalı 99 TH 576 dövlət nömrə nişanlı nəqliyyat vasitəsi ilə daşınmasının qarşısı alınıb.

Xidmət rəisinin sözlərinə görə, ağac materialı yüklənmiş nəqliyyat vasitəsi Regional Meşə Təsərrüfatı Mərkəzinə gətirilərək boşaldılıb.

“Bununla bağlı rayon polis şöbəsinə məlumat verilib. Hazırda araşdırma aparılır”.

DİA.AZ AzToday.az-a istinadla xəbər verir ki, Masallı Regional Meşə Təsərrüfatı Mərkəzinin həyətinə gətirilən sözügedən maşın yükü ilə bərabər yoxa çıxıb. Maşının necə və kim tərəfindən idarənin həyətindən çıxarılması qalmaqala səbəb olub…

Qeyd edək ki, Meşələrin İnkişafı Xidmətinin başlatdığı yoxlamalar Qəriblər meşəbəyliyinin 8 saylı dolayında aparılır. Bu meşə sahəsində isə kütləvi ağac qırıntıları qeydə alınıb. Məlumatlara görə, Qəriblər meşəbəyliyinin meşəbəyisi Tariyel Ağayev Masallı Regional Meşə Təsərrüfatı Mərkəzinin direktoru Nəsimi Nəbiyevlə əlbir olaraq meşələrdən merkantil məqsədləri üçün yararlanırlar.

Masallı Regional Meşə Təsərrüfatı Mərkəzinin xidməti ərazisindəki kütləvi qırıntılar artıq idarənin işçilərini belə narazı salıb. Şikayətçilər əvvəllər bisnesmen olan və meşəçilik sahəsində ixtisas təhsili olmayan Nəsimi Nəsibovun meşələri məhv etdiyini bildirirlər. Meşələrin İnkişafı Xidmətinin rəhbəri Cabbar Qəribovdan tələb edirlər ki, Nəsimi Nəsibovun direktor olduğu müddət obyektiv şəkildə araşdırılsın…

“Fövqəladə vəziyyət haqqında” Azərbaycan Respublikasının Qanununda dəyişiklik edilib.

Bununla bağlı Prezident İlham Əliyev müvafiq qanunu imzalayıb.

Dəyişikliyə əsasən, qanuna aşağıdakı məzmunda 2-1-ci maddə və I-I fəsil əlavə edilir:

“Maddə 2-1. Bu Qanunun tətbiq dairəsi

Bu Qanun Azərbaycan Respublikası Konstitusiyasının 94-cü maddəsinin I hissəsinin 1-ci, 8-ci və 20-ci bəndlərinə uyğun olaraq, fövqəladə vəziyyətin tətbiq edilməsinin əsaslarını və qaydasını, həmçinin sosial xarakterli fövqəladə mühit rejiminin hüquqi əsaslarını müəyyən edir.

I-I fəsil

Sosial xarakterli fövqəladə mühit rejimi

Maddə 2-2. Sosial xarakterli fövqəladə mühit

2-2.1. Sosial xarakterli fövqəladə mühit Azərbaycan Respublikasının bütün ərazisində və ya ayrı-ayrı yerlərində əhalinin həyat fəaliyyəti şəraitinin pozulmasına, o cümlədən insanların ölümünə, əhalinin sağlamlığına, əmlaka və ya ətraf mühitə əhəmiyyətli dərəcədə zərərin vurulmasına səbəb olan və ya səbəb ola bilən fövqəladə halların nəticəsində yaranan, lakin fövqəladə vəziyyətin tətbiq edilməsinə əsas hesab edilməyən mühitdir.

2-2.2. Sosial xarakterli fövqəladə mühit rejimi insan və vətəndaş hüquqlarının və azadlıqlarının həyata keçirilməsi məhdudlaşdırılmadan belə fövqəladə mühitin aradan qaldırılması ilə bağlı dövlət orqanları (qurumları) tərəfindən təxirəsalınmadan və qarşılıqlı əlaqəli şəkildə tədbirlərin həyata keçirilməsini təmin edən xüsusi hüquqi rejimdir.

2-2.3. Sosial xarakterli fövqəladə mühit rejimi müvafiq icra hakimiyyəti orqanının normativ hüquqi aktı ilə Azərbaycan Respublikasının bütün ərazisində və ya ayrı-ayrı yerlərində tətbiq edilir. Sosial xarakterli fövqəladə mühit rejiminin tətbiq edilməsi barədə normativ hüquqi akt dərhal mediada elan olunmalı, o cümlədən 24 saat müddətində rəsmi dərc edilməlidir.

2-2.4. Sosial xarakterli fövqəladə mühit rejiminin tətbiq müddəti bu rejimin tətbiqinə əsas olmuş fövqəladə halların aradan qaldırılması müddətindən artıq ola bilməz.

Maddə 2-3. Sosial xarakterli fövqəladə mühitin aradan qaldırılması üzrə tədbirlər

2-3.1. İnsan və vətəndaş hüquqlarının və azadlıqlarının həyata keçirilməsini məhdudlaşdıran tədbirlər istisna olmaqla, sosial xarakterli fövqəladə mühit rejiminin tətbiqi zamanı həmin fövqəladə mühitin aradan qaldırılması, o cümlədən zərər çəkmiş şəxslərə köməklik göstərilməsi üçün bütün zəruri tədbirlər həyata keçirilir.

2-3.2. Sosial xarakterli fövqəladə mühitin aradan qaldırılması üzrə tədbirlər Azərbaycan Respublikasının Konstitusiyasına, bu Qanuna, digər normativ hüquqi aktlara və Azərbaycan Respublikasının tərəfdar çıxdığı beynəlxalq müqavilələrə uyğun olaraq, yaranmış fövqəladə mühitin kəskinliyindən irəli gələn hədlər çərçivəsində həyata keçirilir.

2-3.3. Sosial xarakterli fövqəladə mühitin aradan qaldırılması üzrə tədbirlərin təxirəsalınmadan və qarşılıqlı əlaqəli şəkildə həyata keçirilməsi üçün müvafiq icra hakimiyyəti orqanı tərəfindən aidiyyəti dövlət orqanlarının (qurumlarının) nümayəndələrindən ibarət komissiya (qərargah) yaradılır. Sosial xarakterli fövqəladə mühitin aradan qaldırılması üzrə komissiyanın (qərargahın) fəaliyyəti qaydasını müvafiq icra hakimiyyəti orqanı müəyyən edir.

2-3.4. Azərbaycan Respublikasının dövlət orqanlarının (qurumlarının), yerli özünüidarə orqanlarının, mülkiyyət formasından asılı olmayaraq bütün hüquqi şəxslərin vəzifəli şəxsləri, Azərbaycan Respublikası vətəndaşları, Azərbaycan Respublikasında olan əcnəbilər və vətəndaşlığı olmayan şəxslər sosial xarakterli fövqəladə mühit rejiminin tətbiq edildiyi zaman müəyyən edilmiş davranış qaydalarına riayət etməli, onlara tapşırılmış vəzifələri vaxtında yerinə yetirməli və sosial xarakterli fövqəladə mühitin aradan qaldırılması üçün görülən qəza-xilasetmə və digər təxirəsalınmaz işlərin həyata keçirilməsinə zəruri hallarda yardım göstərməlidirlər.

2-3.5. Azərbaycan Respublikası vətəndaşlarının, Azərbaycan Respublikasında olan əcnəbilər və vətəndaşlığı olmayan şəxslərin sosial xarakterli fövqəladə mühit rejimi tətbiq edilən ərazidə görülən zəruri təhlükəsizlik tədbirləri haqqında tam və obyektiv məlumat almaq hüququ vardır.

2-3.6. Sosial xarakterli fövqəladə mühit rejiminin tətbiqi zamanı həmin fövqəladə mühitin aradan qaldırılması üzrə tədbirlərin növləri və həyata keçirilməsi qaydası və dövlət ehtiyatlarının yaradılması, istifadə edilməsi və bərpası qaydası müvafiq icra hakimiyyəti orqanı tərəfindən müəyyən olunur.

2-3.7. Sosial xarakterli fövqəladə mühit aradan qaldırıldıqdan sonra əhalinin normal həyat fəaliyyətinin bərpa edilməsi nümayəndələri bu Qanunun 2-3.3-cü maddəsində nəzərdə tutulan komissiyanın (qərargahın) tərkibinə daxil olan aidiyyəti dövlət orqanları (qurumları) tərəfindən təmin edilir. Sosial xarakterli fövqəladə mühit aradan qaldırıldıqdan dərhal sonra bu Qanunun 2-2.3-cü maddəsində nəzərdə tutulan normativ hüquqi akt ləğv edilir”.

“Mover” MMC express logistika şirkətinin müştəriləri narazıdırlar.

Onlarla Azərbaycan vətəndaşı zərər çəkib.

Qeyd edək ki, “Mover” MMC yükləri (bağlamaları) müxtəlif xarici ölkələrdən Azərbaycana gətirib sahiblərinə təslim edir.

Şirkətin müştərilərinin etdikləri müraciətlərə və onların sosial mediada paylaşdıqları məlumatlara görə, “Mover” şirkəti 6 aydan çoxdur bir çox vətəndaşın ABŞ-da olan bağlamalarını gətirib təhvil vermir.

Milyarder Əhmədovun “AZNAR”nın rəhbəri dəyişdi – Qardaşı oğlunu iş adamı əvəz edir - FOTO

Digər məlumata görə, martın 15-dən Türkiyə anbarında olan bağlamalar da gəlmir.

Şirkətin müştəriləri bildirirlər ki, “Mover”ə zəng çatmır, zənglərə və müraciətlərə cavab verilmir. Eyni zamanda şirkətin saytı da düzgün işləmir.

Şirkətin müştəriləri iddia edirlər ki, “Mover” şirkəti fəaliyyətini dayandırmaqdadır. Digər bir iddiaya görə, əməkdaşları belə Şirkətin rəhbərliyi ilə əlaqə saxlaya bilmirlər.

Bakıda "Mover"in məntəqəsində bağlamasının itdiyini də idda edən var.

Şirkətin müştəriləri İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidmətinə müraciət etdiklərini və cavab gözlədiklərini qeyd ediblər.

“Mover” MMC gecikən Amerika bağlamaları ilə bağlı açıqlama da yayıb.

Açıqlamasında Şirkət etiraf edib ki, bir müddətdir ABŞ anbarına daxil olan bağlamaların müştərilərə vaxtında çatdırılmasında problemlərlə (gecikmə) üzləşib və bunu “Silk Way” şirkətinin “Mover”-ə aid bağlamaları daşımasından imtina etməsilə əlaqələndirib. Sözügedən şirkətin məhsul şəxsi tərəfindən “Silk Way” ilə “Mover” arasında hüquqi problemin olduğu bildirilib. “Mover” isə “Silk Way” ilə arasında heç bir hüquqi münasibət - birbaşa və dolayı müqavilə olmadığını bəyan edib. Həmçinin, “Mover” “Silk Way” şirkətilə müqavilə bağlamağa da hazırdır.

"Bildirmək istəyirik ki, bizim “Silk Way” ilə ”əməkdaşlıq” etdiyimiz dövr ərzində sözügedən şirkət ilə heç bir mübahisəmiz, o cümlədən indiki münasibətə səbəb olacaq heç bir hərəkətimiz olmamışdır. Bu problemin həlli istiqamətində tərəfimizdən yüksək səviyyədə danışıqlar aparılır. Odur ki, dəyərli müştərilərimizdən bu məsələdə səbirli və anlayışlı olmağı xahiş edirik!",- Şirkətin məlumatında bildirilir.

“Mover” ABŞ-da yerləşən anbarın fəaliyyətini dayandırıb.

“Mover” şirkəti əlavə olaraq qeyd edib: "Biz ABŞ-dan daşımaları ilin müxtəlif aylarında Türk Hava Yolları vasitəsilə etsək də, ilin digər ayları Türk Hava Yolları təyyarələrinin yük həcminin az olduğu, daşımaların həyata keçirilməsinin mümkünsüz olduğu səbəbilə daşımalar zamanı “Silk Way” ilə əməkdaşlıq etməli olurduq. Sizdən Mover tətbiqi və sayt vasitəsi ilə ABŞ anbarına sifarişləri dayandırmağınızı xahiş edir və bildirmək istəyirik ki, ABŞ anbarına 15.01.2023-ci il tarixindən sonra daxil olan bağlamalar üçün “Mover” MMC məsuliyyət daşımayacaqdır!

Bir daha nəzərinizə çatdırmaq istəyirik ki, siz müştərilərimiz qarşısında öhdəliklərimizi tam formada qəbul edirik və ən qısa zamanda Amerika anbarımızda olan bütün bağlamalar mümkün bütün variantlar ilə sizə çatdıracayıq".

Qeyd edək ki, şirkət bu açıqlamasını ötən ilin dekabr ayının 12-də yayıb. Həmin vaxtdan 4 ay keçməsinə baxmayaraq bu gün də müştərilər bağlamalarını qəbul edə bilməyiblər.

Müştərilər qeyd edirlər ki, şirkət öncədən gözlənilən problemlər barədə onları məlumatlandırmalı idi.

Əlavə edək ki, “Mover” şirkəti artıq 3 aydır sosial media səhifələrində paylaşımlar da etmir. //Marja.az//