"Dəyirman Vahid” kimi tanınan iş adamı Vahid Həşimovun keçmiş ortağı Qərib İbadova qarşı iddiası təmin olunmayıb.

DİA.AZ Qaynarinfo-ya istinadla xəbər verir ki, Vahid Həşimov Sabunçu Rayon Məhkəməsində Qərib İbadova qarşı xüsusi ittiham qaydasında iddia qaldırıb. İş adamı Qərib İbadovun ona böhtan atdığını bildirərək, keçmiş ortağının Cinayət Məcəlləsinin 147.2-ci (Ağır və ya xüsusilə ağır cinayətdə ittiham etməklə böhtan atma) maddəsi ilə mühakimə olunaraq cəzalandırılmasını tələb edib.

Qərib İbadova qarşı 1998-ci ildə sui-qəsd təşkil edilib. O, ağız nahiyəsindən güllələnib. Qərib İbadovun iddiasına görə, sui-qəsd Vahid Həşimovun sifarişi ilə həyata keçirilib.

Vahid Həşimovun adı 2009-cu ildə gündəmə gəlib. Qərib İbadovun qardaşı Gülməmməd İbadov mediaya verdiyi açıqlamalarda bildirib ki, Vahid Həşimov onun qonşusu və dostu olub. Lakin sonradan müxtəlif üsullarla ona məxsus obyektləri ələ keçirib. Gülməmməd İbadov deyib ki, həmin vaxt Vahid Həşimovun Daxili İşlər Nazirliyinin (DİN) keçmiş baş əməliyyat müvəkkili, 2005-ci ildə MTN-nin keçirdiyi "Qara Kəmər” əməliyyatı nəticəsində həbs edilən Hacı Məmmədovla yaxın əlaqəsi olub.

Keçmiş milli təhlükəsizlik naziri Eldar Mahmudov vəzifəsindən kənarlaşdırıldıqdan sonra isə Gülməmməd İbadov Vahid Həşimovu onun adamı kimi təqdim edib.

Gülməmməd İbadov 2016-cı ildə verdiyi açıqlamarda deyib ki, Vahid Həşimovun qardaşı oğlu Tural Həşimov oğurlanandan sonra düşmənə çevriliblər. Bu hadisə 1997-ci ildə baş verib. Gülməmməd İbadovun sözlərinə görə, Vahid Həşimov bu cinayəti onun üzərinə yıxıb.

"Heç bir günahım olmadan 8 il həbsdə yatdım. Məni həbsə atdıran "Dəyirman” ləqəbli Vahid Həşimovla onun qardaşı Tofiq idi. Uzun illər yaxın qonşu, dost olmuşuq, şərikli biznesimiz olub. 1997-ci ildə Vahidin qardaşı oğlu Turalı oğurladılar. İki gün sonra isə məni həbs etdilər. İşgəncələrə dözməyib Ziya Bünyadovun qətlini boynuma götürməyə məcbur olsam da, uşaq oğurluğunu götürmədim. Bir müddət sonra Tural Həşimovun oğurluğunda əli olanların özlərini həbs etdilər.

Həbs edilənlərin hamısı ilə üzləşdirilmə keçirildi, cinayətdə əlimin olmadığı sübuta yetirildi. İttihamlar təsdiqini tapmayanda isə silah-sursatla, narkotiklə ittiham verdilər. Vahidin o vaxtlar Hacı Məmmədovla yaxın əlaqəsi vardı...

...Mən həbsdən çıxandan sonra əvvəlki münasibətlərin bərpa olunmasını istədi. Bizim iki obyektimizin əvəzinə Balakişiyev küçəsi, 23 və Məhsəti küçəsi, 9 ünvanda yerləşən obyektləri satıb pulunu verəcəyini dedi. Satdı, amma bizə pul vermədi. Onu Eldar Mahmudov himayə edirdi, deyirdi kimə istəyirsən, get şikayət elə, pulum da, adamım da var", deyə Gülməmməd İbadov bildirib.

Onun iddiasına görə, həbs ediləndən sonra Vahid Həşimov qardaşı Qərib İbadovu öldürtmək istəyib.

Vahid Həşimov isə Gülməmməd İbadovun dediklərini təkzib edib. O, mediaya açıqlamasında Gülməmməd İbadovun dələduz və narkotik aludəçisi olduğunu bildirib. Vahid Həşimov həmçinin qeyd edib ki, qardaşı oğlunun oğurlanmasında da Gülməmməd İbadovun rolu olub.
"Turalı oğurlayandan sonra qohum-qonşu gəlib bizə təsəlli verirdi. Gülməmmədlə küsülü olsaq və danışmasaq da, o da gəlib təsəlli verdi. Amma Gülməmməd bizə uşaq oğrularının nümayəndəsi kimi gəlmişdi. O, özünü apara bilmirdi, çox pis vəziyyətdə idi. Onun özünü itirdiyini görüb həyətə çıxardım. Dedim bəlkə bu işdə bizə kömək edəsən. Gülməmməd mənə deyəndə ki, bu işi kim edə bilər, başa düşdüm ki, onun da əli var. Bu məsələ ilə bağlı daxili işlər nazirinin o vaxtkı müavini, general Zahid Dünyamalıyevlə, 7-ci idarənin rəisi Ramiz Nağıyevlə və Daxili İşlər Nazirliyi Baş Cinayət-Axtarış İdarəsinin rəisi Zakir Nəsirovla məsləhətləşdim. Onlar demişdi ki, bu işdə Gülməmmədin əli var və ondan bərk yapışmaq lazımdır. Biz də Gülməmməddən yapışıb uşağı adam oğrularından aldıq. Gülməmməd kimdir ki, məndən pul alır, aparıb oğrulara verir? Hələ 1992-ci ildə Gülməmməd mənə demişdi ki, səni vurmaq istəyirlər. Mənsə bilirdim ki, o, yalan danışır, dələduzdur. Qardaşım oğlunu məktəbin qabağından oğurlamışdılar. O zaman general Dünyamalıyevin göstərişi ilə hərəkət edirdim. Gülməmməd Turalı oğurlayanlarla əlaqəli idi. Uşağı oğurlayanlar da qonşularımız olub. Onların biri hələ də axtarışdadır. Gülməmmədin bu işdə əlinin olmasını sonradan türmədə ölən bir nəfər demişdi. Uşağın azadlığı üçün Gülməmmədə 222 min dollar vermişdim. O isə bu pulun üstündən 20 min dollar götürmüşdü. Bu da onun adam oğruları ilə əlbir olmasını göstərir”, Vahid Həşimov deyib.

Vahid Həşimovun ittihamları təkzib etməsinə baxmayaraq, İbadov qardaşları onunla bağlı şikayətlərini davam etdirib. Hətta Qərib İbadov verdiyi açıqlamada Vahid Həşimovu qətldə ittiham edib. Onun iddiasına görə, sui-qəsd baş tutmadığına görə, Ramiz Nadirov adlı killer də aradan götürülüb.

Vahid Həşimov Qərib İbadovun bu iddiaları ilə bağlı məhkəməyə müraciət edib. İddiaya hakim Nigar İmanovun sədrliyi ilə baxılıb.

Məhkəmə qərara gəlib ki, Qərib İbadovun iddialarında böhtan, şərəf və ləyaqətin alçadılması yoxdur. "Qərib İbadovun niyyəti Vahid Həşimovun şərəf və ləyaqətini ləkələmək və ya nüfuzdan salmaq deyil, uzun illərdir həqiqət olduğuna inandığı və araşdırılmasını qanuni yollarla tələb etdiyi məsələnin həllini tapması, aidiyyəti dövlət orqanlarını iş üzrə araşdırma aparılaraq obyektiv həqiqətin üzə çıxarılmasına çağırışlar etmək, səsinin müvafiq dövlət orqanları tərəfindən duyulması olmuşdur”, deyə məhkəmə hökmündə qeyd edilir. Beləliklə, məhkəmə Qərib İbadova əməlində cinayət tərkibi olmadığını müəyyən edərək ona bəraət verib.

Onu da qeyd edək ki, Vahid Həşimovun hazırda ölkədə olmadığı bildirilir.

"Azərbaycandan kənarda yaşayan azərbaycanlıların təhlükəsizliyi, hüquqları, salamatlığı bizim üçün çox böyük əhəmiyyət kəsb edir".

Bunu Prezident İlham Əliyev oktyabrın 21-də Türk Dövlətləri Təşkilatının Baş katibi Bağdat Amreyevi qəbul edərkən deyib.

"Əlbəttə, Türk dünyası Türk Dövlətləri Təşkilatının üzvləri olan milli dövlətlərin sərhədlərindən qat-qat genişdir. Buna görə də əminəm ki, bizim humanitar əlaqələrimizə, insanlar arasında, geniş dünya coğrafiyasında yaşayan türkdilli xalqların nümayəndələri ilə əlaqələrə gələcəkdə də ehtiyac olacaq. Hər halda, Azərbaycanda öz tərəfimizdən bizim təşkilatımıza daxil olan ölkələrin birliyini möhkəmləndirmək üçün hər şeyi edəcəyik, dünyanın müxtəlif ölkələrində yaşayan qardaşlarımızı, - on milyonlarla qan qardaşlarımızı, - dəstəkləyəcəyik. Təkcə Azərbaycanın hüdudlarından kənarda yaşayan azərbaycanlıların sayı Azərbaycanda yaşayanlardan xeyli çoxdur, bir neçə dəfə çoxdur. Buna görə də, əlbəttə, onların təhlükəsizliyi, hüquqları, salamatlığı bizim üçün çox böyük əhəmiyyət kəsb edir. Biz taleyin hökmü ilə dövlətimizdən ayrı düşmüş azərbaycanlılara, həmçinin bizim qardaş türk dövlətlərinin digər xalqlarının dövlət sərhədlərinin hüdudlarından kənarda yaşayan çoxsaylı nümayəndələrinə kömək etmək, onların inkişafı, onların Azərbaycan dilini, Azərbaycan ənənələrini, Azərbaycan mədəniyyətini qoruyub saxlamaları, azərbaycançılıq prinsiplərinə sadiq olmaları və öz tarixi Vətəni ilə əlaqələri heç vaxt kəsməmələri üçün əlimizdən gələni edəcəyik. Həmçinin mən bunu da bilirəm ki, Türk dövlətlərinin bütün rəhbərləri bu və ya digər ölkələrdə onların qardaşlarının hüquqlarının necə təmin edilməsinə böyük əhəmiyyət verirlər.

Buna görə də düşünürəm ki, qarşıdakı illərdə biz Türk Dövlətləri Təşkilatı çərçivəsində bu mövzunu - taleyin hökmü ilə Türk Dövlətləri Təşkilatının üzvləri olan ölkələrin hüdudlarından kənarda yaşayan qardaşlarımızın hüquqları, təhlükəsizliyi, milli identikliyi məsələlərini çox ciddi müzakirə etməliyik", - dövlət başçısı bildirib.

"Turanbank" ASC-nin külli miqdarda vergi borcu üzə çıxıb.

Şirkətin borcu 300 min manatda çoxdur. (306561.67 AZN)

Nizamnamə kapitalı 80005244 AZN olan "Turanbank" ASC-nin qanuni təmsilçisi Fəzail Musayev Misgər oğludur.

Mətbuatdakı materiallarda Məmməd Musayevin "TuranBank"ın əsl sahibi olduğu, oğlu Fuad Musayev isə banka xüsusi nəzarət etdiyi bildirilir.

Deputat Mahir Abbaszadəyə məxsusluğu iddia edilən şirkət iri məbləğdə tender sifarişi əldə edib.

Bu barədə redaksiyamıza daxil olan məlumatda bildirilir.

Həmin məlumata görə, “Birinci sifarişin məbləği 9 milyon manata yaxındır. Yeri gəlmişkən, Mahir Abbaszadənin şəriki onun rəhbərlik etdiyi fondda müavini Vüqar İmranovdur”.

O daha sonra qeyd edib ki, “Məcburi Köçkünlərin Sosial İnkişaf Fondunun direktoru, deputat Mahir Abbaszadə çox ağıllı adamdır. 2 il əvvəl “Qaçqınkom”un 15 milyonluq sifarişini öz şirkətinə (“AZ.İNŞAAT-M.V.” MƏHDUD MƏSULİYYƏTLİ CƏMİYYƏTİ Gürcüstada da qeydiyyadan keçib) verdiyi haqqında sənədlər ortaya çıxanda abırlı davranıb susdu, ara sakitləşincə ağıllı tərpənib izi itirmək üçün şirkətin adını, qeydiyyat ünvanını və qanuni təmsilçisini dəyişdi.

Beləliklə, “AZ.İNŞAAT-M.V.” MƏHDUD MƏSULİYYƏTLİ CƏMİYYƏTİ “yoxa çıxdı”.

Lakin… Şirkət yeni adla öz qeydiyyat tarixini və VÖEN nömrəsini qoruyub saxlayır. “MERCURY CONSTRUCTİON” MƏHDUD MƏSULİYYƏTLİ CƏMİYYƏTİNİN qeydiyyat məlumatlarında onun VÖEN nömrəsinin 2901066351 saylı olduğu məlum olur. Bu nömrə “AZ.İNŞAAT-M.V.” MMC-nin VÖEN nömrəsidir. Hər iki şirkətin qeydiyyat tarixi 23.01.2007-ci il göstərilir. Dəyişikliklər reyestrdən bu il yanvarın 13-də verilmiş son çıxarışa əsasən aparılıb. “Qaçqınkom” indi bina tikə bilmir. Amma adını dəyişmiş 10 manatlıq şirkət artıq bu il ikinci dəfədir ki, MİDA-dan (Mənzil İnşaatı Dövlət Agentliyi) iri məbləğdə tender sifarişi əldə edib”.KONKRET.az

"Gəncə Şərab evi 1" i - 145 mindən çox vergi borcu yaranıbdır.

Belə ki, qanuni təmilçisi Mirməhəmməd Məmmədov Həmid oğludur, adına olan vergi borcu "VÖEN" daxilində 145454.52 (yüz qırx beş min dörd yüz əli dörd manat, əli iki qəpik) mövcuddur.

Böyük bir müəssisənin bu qədər vergi borcu yaranması çox müəmmalıdır.

AZƏRBAYCAN RESPUBLİKASININ İQTİSADİYYAT NAZİRLİYİ YANINDA DÖVLƏT VERGİ XİDMƏTİNİN- Gəncə Şəhər Ərazi vergilər 12 saylı Ərazi Vergilər Baş İdarəsinin məsuliyyətsizliyi bu qədər vergi borcunun yaranmasına, hüquqi baxımından çinayət xarakterli dövlət rüsumundan yayınma, külli miqdarda pulun mənimsənilməsi, Dövələt Xəzinadarlığına daxil olmaması çinayət deyilsə bəs nədir?

Bu halın nəyin ki, Gəncə Şərab evi 1" saylı Açıq Tipli Səhmdar Cəmiyyətin də yaranıb, o cümlədən Gəncə Şərab evi 2" saylı Açıq Tipli Səhmdar Cəmiyyətinin də 33 mindən çox vergi borcu var.

Adı çəkilən Gəncə şərab evi 2" ASC -nin Qanuni təmsilçisi - Saleh Babazadə Nadir oğludur.

Onun adına olan "VÖENİN" vergi borcu rəqəmsal olaraq 33608.57 (üç yüz otuz altı min səkkiz manat, əli yeddi qəpik) rəsmi borc yaranması, vergidən yayınması Gəncə 12 saylı Ərazi Vergilər Baş İdarəsinin fəaliyyətinə ləkədən başqa bir şey deyil.

Yazıda qeyd olunan müəssisələrin hal-hazırda fəaliyyət göstərməsi, işçi sayının olması, "Şərab" istehsal etməsi mövcuddur.

Mövzuya qayıdacayıq.

Qarşı tərəfin mövqeyini dinləməyə hazırıq... //hurriyyet.az//

Göygöl rayonun Mollacəlilli kəndinin sakinləri kəndin təmirsiz yollarından narazıdırlar. Nəqliyyatın hərəkəti üçün tam yararsız olan yollara görə, kəndə gələn ictimai nəqliyyat vasitələrinin sayı günü-gündən azalır.

Hazırda kəndə cəmi bir marşrut avtobusu gəlir

Kənd sakini Maral Nəsibova deyir ki, “50 ildir bu kənddə yaşayıram, kəndin yolları elə həmişə belə olub. Hazırda cəmi bir marşrut gəlir. O da gecikir. Bəzi hallarda saatlarla avtobus gəlib çıxmır. Kəndin girişində avtobusu gözləyirəm. Avtobus bayaqdan kəndə keçib. Yollar elə vəziyyətdədir ki, avtobus kəndin içindən qayıdıb gələnə nə qədər vaxt keçir. Şoferləri də qınamalı deyil. Qışda uşaqlarımız palçığa bata-bata məktəbə gedir. Günümüz itin günüdür, kimsə buna çarə qılsın”.

Sürücülər avtomobillərini sıradan çıxaran Mollacəlilli kəndinin yollarında artıq sürücülük etmək istəmirlər.

Payız və qış aylarında vəziyyət daha acınacaqlı hal alır

Uşaqlarımız məktəbə belə çətin şərtlər altında gedir. Yağış suları yolları bataqlığa çevirib. Tərtəmiz evdən yola saldığımız uşaqlar palçığın içində evə dönürlər.

Kənd sakinlərinin həyat şəraitini çətinləşdirən avtomobil yolunun uzunluğu 4 km-dir. Kəndin 2300-ə yaxın sakini var. 2300 sakinin istifadə etdiyi yola laqeyd münasibət təəssüf doğurur.

Söz versələr də, düzəltməyiblər

Şikayətçi Seymur Nəbiyev deyir ki, “Hər dəfə seçki vaxtı yolları düzəldəcəklərinə söz versələr də, düzəltməyiblər. Bu günə qədər yollarımız bir dəfə də köklü təmir olunmayıb. Deputat seçiləndə də, söz verdilər, ancaq qaldı belə”.

Bələdiyyə sədri yolların asfaltlanacağı vaxtı bilmir

Sözügedən yolun gələcək taleyinə işıq tutmaq məqsədi ilə üz tutduq Mollacəlilli kənd bələdiyyəsinə. Bələdiyyə sədri Ramiz Tağıyev dedi ki, Mollacəlilli kəndi Göygöl rayonunun balansındadır. Kəndlərin investisiya layihəsi ilə müqavilə bağlamışıq. Layihə əsasında yola şebel tökürük. Kəndaxili yollarımız 12 km-dir. Onlar da mütəmadi olaraq yola şebel tökərək qreyderlə düzəldirlər. Lakin bu günə qədər yola asfalt vurulmayıb. Kəndaxili yolların asfaltlanması məsələsi gündəmdədir. Vəsait ayrılan kimi asfaltlanacaq.

Bələdiyyə sədri konkret vaxt deməsə də, yaxın zamanlarda, vəsait ayrılan kimi kənd yollarının asfaltlanacağını bildirdi.

DİA.AZ mövzu ilə bağlı Belediyye.net-in sujetini təqdim edir:

Azərbaycan Respublikasının Minatəmizləmə Agentliyi Laçında iki nəfərin minaya düşməsi ilə bağlı məlumat yayıb.

Agentlikdən verilən xəbərə görə, 2022-ci 21 oktyabr tarixində Laçın rayonunun Suarası kəndində minalardan təmizlənməmiş ərazidə piyada-əleyhinə minanın partlayışı baş verib.

İlkin məlumata əsasən hadisə nəticəsində Həmidov Elsəvər Sovet oğlu və Həsənov Səbuhi Telman oğlu xəsarət alıb.

Agentlik bildirib ki, hadisə ilə bağlı aparılan araşdırmanın nəticəsinə dair ictimaiyyətə əlavə məlumat veriləcək.

xxx

20:10

Laçında iki nəfər minaya düşüb.

Hadisə Suarası kəndində qeydə alınıb.
Kənddə 2 nəfər mina partlaması nəticəsində müxtəlif dərəcəli bədən xəsarətləri alıblar.

Minaya düşən şəxslər xəstəxanaya çatdırılıb. Hazırda onların müalicəsi davam etdirilir.

Daxili İşlər Nazirliyinin Mətbuat Xidmətinin Bərdə regional qrupundan faktı təsdiqləyiblər.

Azərbaycan Dövlət Neft və Sənaye Universitetinin sair torpaq, tikili və avadanlıqların satın alınması bağlı elan etdiyi açıq tenderə yekun vurub.

DİA.AZ bakıvaxtı.az-a istinadla bildirir ki, tenderin qalibi “İdeal Dizayn Office” MMC-dir.

Qalib şirkətə 199 min 429 manat ödəniləcək.

Tenderin şərtlərindən məlum olur ki, universitet təbii dəri, rəng qara, yükgötürmə minimum 200 kq, erqonomik söykənəcək, multi-tilt sistemli,aşağı və yuxarı hərəkətli, arxaya və önə hərəkətli, dik vəziyyətdə sabitlənən, mebel qol və mebel ulduz ayaq 1 ədəd rəhbər kürsüsü və digər mebel əşyalarını almağı planlaşdırır.

Prezident İlham Əliyev İtaliya–Azərbaycan Universiteti layihəsinin həyata keçirilməsi haqqında sərəncam imzalayıb.

Sərəncamda deyilir:

1. İtaliya–Azərbaycan Universiteti layihəsini həyata keçirən ADA Universitetinə Azərbaycan Respublikasının Dövlət İmtahan Mərkəzinin keçirdiyi qəbul imtahanlarının nəticələri əsasında tələbə seçimini müstəqil aparmaq hüququ verilsin.

2. Müəyyən edilsin ki, ADA Universiteti İtaliya–Azərbaycan Universiteti çərçivəsində tətbiq etdiyi təhsil proqramlarını İtaliya Respublikasının ali təhsil müəssisələrinin akademik standartlarına uyğun qurmaq və idarə etmək hüququna malikdir.

3. Azərbaycan Respublikasının Nazirlər Kabineti:

3.1. İtaliya–Azərbaycan Universiteti layihəsinə cəlb olunması ilə əlaqədar ADA Universitetinin maddi-texniki bazasının möhkəmləndirilməsi və əməliyyat xərclərinin maliyyələşdirilməsi məsələlərini həll etsin;

3.2. İtaliya–Azərbaycan Universiteti layihəsi çərçivəsində kadr hazırlığı aparılan ixtisasları və təhsil alan tələbələrin sayını hər il müəyyən etsin;

3.3. bu Sərəncamdan irəli gələn digər məsələləri həll etsin.

Prezident İlham Əliyev Şuşa Şəhəri Dövlət Qoruğu İdarəsinin fəaliyyətinin təkmilləşdirilməsi və “Şuşa Şəhəri Dövlət Qoruğu İdarəsinin yaradılması haqqında” Azərbaycan Respublikası Prezidentinin 2021-ci il 22 iyun tarixli 1375 nömrəli Fərmanında dəyişiklik edilməsi barədə Fərman imzalayıb.

Fərmanla müəyyən edilib ki, Şuşa Şəhəri Dövlət Qoruğu İdarəsinin fəaliyyətinə ümumi rəhbərliyi və nəzarəti həyata keçirmək üçün sədr də daxil olmaqla 5 (beş) üzvdən ibarət Müşahidə Şurası yaradılır;

1.2. Şuşa Şəhəri Dövlət Qoruğu İdarəsinin fəaliyyətinə cari rəhbərliyi İdarənin Müşahidə Şurasının vəzifəyə təyin və vəzifədən azad etdiyi İcraçı direktor həyata keçirir.

2. “Şuşa Şəhəri Dövlət Qoruğu İdarəsinin yaradılması haqqında” Azərbaycan Respublikası Prezidentinin 2021-ci il 22 iyun tarixli 1375 nömrəli Fərmanında (Azərbaycan Respublikasının Qanunvericilik Toplusu, 2021, № 6, maddə 590, № 12, maddə 1405) aşağıdakı dəyişikliklər edilsin:

2.1. aşağıdakı məzmunda 4.2-1-ci bənd əlavə edilsin:

“4.2-1. İdarənin fəaliyyətinə ümumi rəhbərliyi və nəzarəti sədr də daxil olmaqla 5 (beş) üzvdən ibarət Müşahidə Şurası həyata keçirir;”;

2.2. 4.3-cü bənd aşağıdakı redaksiyada verilsin:

“4.3. İdarənin fəaliyyətinə cari rəhbərliyi İdarənin Müşahidə Şurasının vəzifəyə təyin və vəzifədən azad etdiyi İcraçı direktor həyata keçirir.”;

2.3. 5-ci hissə üzrə:

2.3.1. 5.1.3-cü yarımbənd aşağıdakı redaksiyada verilsin:

“5.1.3. Müşahidə Şurasının üzvlərinin vəzifəyə təyin və vəzifədən azad edilməsi;”;

2.3.2. 5.1.4-cü yarımbənd və 5.2-ci bənd ləğv edilsin;

2.3.3. 5.3.2-ci yarımbənd aşağıdakı redaksiyada verilsin:

“5.3.2. bu Fərmanın 5.1-ci bəndində qeyd edilənlər istisna olunmaqla, “Publik hüquqi şəxslər haqqında” Azərbaycan Respublikası Qanununun 8.2-ci maddəsində publik hüquqi şəxsin təsisçisinin səlahiyyətlərinə aid edilmiş digər məsələlərin həlli.”;

2.4. 7-ci hissə ləğv edilsin;

2.5. həmin Fərmanla təsdiq edilmiş “Şuşa Şəhəri Dövlət Qoruğu İdarəsinin Nizamnaməsi” üzrə:

2.5.1. 3.2.18-ci yarımbənddən “Azərbaycan Respublikası Prezidentinin razılığı ilə” sözləri çıxarılsın;

2.5.2. 4-cü hissə aşağıdakı redaksiyada verilsin:

“4. İdarənin idarə olunması

4.1. İdarə öz fəaliyyətində və idarəetmədə mütərəqqi korporativ idarəetmə standartlarını tətbiq edir.

4.2. İdarənin idarəetmə orqanları Müşahidə Şurası və İcraçı direktordur.

4.3. Müşahidə Şurası (bundan sonra – Şura) İdarənin fəaliyyətinə ümumi rəhbərliyi və nəzarəti həyata keçirir.

4.4. Şura Azərbaycan Respublikası Prezidentinin vəzifəyə təyin və vəzifədən azad etdiyi 5 (beş) üzvdən – Şuranın sədrindən və digər 4 (dörd) üzvdən ibarətdir.

4.5. Şura ictimai (ödənişsiz) əsaslarla fəaliyyət göstərir.

4.6. Şura qərar qəbul etməkdə müstəqildir.

4.7. Şuranın vəzifələri aşağıdakılardır:

4.7.1. təsisçi səlahiyyətlərinin həyata keçirilməsi üçün Azərbaycan Respublikasının Prezidentinə təkliflər vermək və müvafiq sənədlər (o cümlədən İdarənin maliyyə hesabatını və fəaliyyətinə dair illik hesabatı) təqdim etmək;

4.7.2. İdarənin inkişaf istiqamətlərini, strateji məqsədlərini və planlarını müəyyən etmək;

4.7.3. İdarənin fəaliyyətinə nəzarət etmək;

4.7.4. Azərbaycan Respublikasının Prezidenti ilə razılaşdırmaqla İdarənin strukturunu, əməyin ödənişi fondunu, işçilərin say həddini və onların əməkhaqlarının (vəzifə maaşının, vəzifə maaşına əlavələrin, mükafatların və digər ödənişlərin) məbləğini təsdiq etmək, o cümlədən İdarənin əldə etdiyi vəsait (dövlət büdcəsindən və dövlətə məxsus digər fondlardan ayrılan vəsait istisna olmaqla) hesabına işçilərə əlavə ödənilən həvəsləndirmə sistemini müəyyənləşdirmək;

4.7.5. İdarənin təsərrüfat cəmiyyətlərinin yaradılması və onlarda iştirak barədə, həmçinin İdarənin idarə, filial və nümayəndəliklərinin yaradılması barədə qərar qəbul etmək;

4.7.6. İdarənin maliyyə planlaşdırmasını və büdcəsini təsdiq etmək;

4.7.7. İdarənin fəaliyyətinə dair daxili qaydaları (o cümlədən maraqlar münaqişəsinin istisna olunması qaydasını), habelə İdarənin idarə, filial və nümayəndəliklərinin əsasnamələrini, təsərrüfat cəmiyyətlərinin nizamnamələrini təsdiq etmək;

4.7.8. İcraçı direktorun fəaliyyətinə nəzarət etmək və onun fəaliyyətini yoxlamaq;

4.7.9. Şura üzvlərinin və İcraçı direktorun müraciətlərinə baxmaq və qərar qəbul etmək;

4.7.10. İdarənin fəaliyyətinə dair illik hesabatı dinləmək;

4.7.11. İdarənin kənar auditorunu təyin etmək və audit hesabatını qəbul etmək;

4.7.12. kənar auditorun yoxlamalarının, habelə digər yoxlamaların nəticələrinə dair tədbirlər görmək;

4.7.13. İdarədə daxili audit bölməsinin fəaliyyətinə nəzarət etmək və fəaliyyətinə dair hesabatlar almaq, habelə onun üzvlərini vəzifəyə təyin və vəzifədən azad etmək;

4.7.14. İdarənin xalis aktivlərinin dəyərinin 25 (iyirmi beş) faizindən artıq məbləğdə olan əqdin (xüsusi əhəmiyyətli əqdin) və aidiyyəti şəxslə dəyəri İdarənin aktivlərinin 5 (beş) faizini və daha çox hissəsini təşkil edən əqdin bağlanması haqqında qərar qəbul etmək;

4.7.15. bu Nizamnamə ilə müəyyən edilmiş digər vəzifələri yerinə yetirmək.

4.8. Şuranın sədri rübdə azı bir dəfə Şuranın iclaslarını çağırır və iclaslara sədrlik edir. Şuranın iclaslarının keçirilməsi təşəbbüsü ilə Şuranın üzvü və ya İcraçı direktor çıxış edir. Şuranın iclasları Şura üzvlərinin yarıdan çoxu iştirak etdikdə səlahiyyətlidir. Şuranın iclasında, hər üzvün bir səsi olmaqla, qərarlar açıq səsvermə yolu ilə sadə səs çoxluğu ilə qəbul edilir. Səsvermə zamanı üzvlərin bitərəf qalmasına icazə verilmir. Səslər bərabər olduqda, iclasa sədrlik edənin səsi həlledicidir.

4.9. Şuranın üzvlərinə, İcraçı direktora və Şuranın iclaslarına dəvət olunan şəxslərə Şuranın iclaslarının keçiriləcəyi yer və vaxt, habelə gündəliyə daxil edilmiş məsələlər barədə iclasa azı 3 (üç) iş günü qalmış, zəruri sənədlər əlavə edilməklə yazılı məlumat verilir.

4.10. Şuranın iclasında İcraçı direktor da iştirak edə bilər.

4.11. İclasın gündəliyinə Şuranın hər hansı üzvünün maraqlarına toxunan məsələ çıxarıldıqda, həmin üzv bununla bağlı maraqları haqqında ətraflı məlumat verməli, bu məsələnin müzakirəsində və həmin məsələyə dair səsvermədə iştirak etməməlidir.

4.12. Gündəliyə daxil edilməmiş və ya tələb olunan aidiyyəti sənədləri iclasdan qabaq təqdim edilməmiş məsələlər barədə, bütün iştirakçı üzvlərin razılıq verdiyi hallar istisna olmaqla, qərar qəbul edilə bilməz.

4.13. Şuranın iclaslarının nəticəsi Şura üzvlərinin və Şuranın katibinin imzaladıqları iclas protokolunda əks olunmaqla rəsmiləşdirilir. Şuranın katibi Şuranın iclasında iştirak edə bilmədikdə, Şuranın sədri onu əvəz edəcək şəxsi təyin edir. Protokol Şura tərəfindən təsdiq edilərək İcraçı direktora göndərilir.

4.14. Şuranın katibini Şuranın sədri Şura üzvü olmayan əməkdaşlar sırasından təyin edir və katib Şuranın sədrinə hesabat verir.

4.15. Şuranın katibi:

4.15.1. Şuranın iclaslarını təşkil edir;

4.15.2. bu Nizamnamənin 4.9-cu bəndində nəzərdə tutulan vəzifəni icra edir;

4.15.3. Şuranın iclaslarının protokolunu tərtib edir və imzalanmaq üçün Şuranın üzvlərinə təqdim edir;

4.15.4. Şuranın qərarlarının layihələrini hazırlayır, baxılmaq və imzalanmaq üçün Şuranın sədrinə təqdim edir;

4.15.5. Şuranın qəbul etdiyi qərarların aidiyyəti üzrə göndərilməsini təmin edir.

4.16. Şuranın sədri:

4.16.1. Şuranın işini təşkil edir və onun fəaliyyətinə rəhbərlik edir, habelə özünün və İcraçı direktorun qanunvericiliyə zidd olan qərarlarını ləğv edir;

4.16.2. Şuranın iclaslarının gündəliyini müəyyənləşdirir, iclaslar çağırır və iclaslara sədrlik edir;

4.16.3. öz təşəbbüsü ilə, habelə Şuranın hər hansı digər üzvünün və ya İcraçı direktorun xahişi əsasında digər şəxsləri Şuranın iclasında iştirak etməyə dəvət edir;

4.16.4. Şuranın fəaliyyətinin təşkili ilə bağlı digər tədbirlər görür.

4.17. Şura sədri müvəqqəti olmadıqda, onun səlahiyyətlərini müvafiq əmrlə Şuranın üzvləri arasından sədrin müəyyən etdiyi şəxs icra edir.

4.18. Şuranın üzvləri:

4.18.1. Şuranın səlahiyyətlərinə aid olan məsələlərin həllində iştirak edirlər;

4.18.2. Şuranın iclasının gündəliyi ilə və baxılması nəzərdə tutulmuş materiallarla əvvəlcədən tanış olurlar;

4.18.3. Şurada qəbul ediləcək qərarlara dair fikir bildirirlər;

4.18.4. Şuranın səlahiyyətlərinə aid məsələlərə Şuranın iclaslarında baxılmaq barədə təkliflər verirlər;

4.18.5. Şuranın qərarları, iclas protokolları ilə və digər sənədlərlə tanış olurlar.

4.19. Şura üzvləri Şuranın iclaslarında baxılan məsələlərə qərəzsiz yanaşmalı, Şura üzvünün adına xələl gətirə biləcək hərəkətlərə və çıxışlara yol verməməlidirlər, həmçinin Azərbaycan Respublikası Mülki Məcəlləsinin 49-cu maddəsində müəyyən edilmiş digər tələbləri yerinə yetirməlidirlər.

4.20. İdarənin cari fəaliyyətinə rəhbərliyi İcraçı direktor həyata keçirir. İcraçı direktor Şura tərəfindən vəzifəyə təyin və vəzifədən azad edilir. İcraçı direktorun Şura tərəfindən vəzifəyə təyin və vəzifədən azad edilən iki müavini vardır.

4.21. İcraçı direktor müvəqqəti olmadıqda, onun səlahiyyətlərini müvafiq əmrlə müavinlərindən biri icra edir.

4.22. İcraçı direktor və onun müavinləri adlarına xələl gətirə biləcək hərəkətlərə və çıxışlara yol verməməlidirlər, həmçinin Azərbaycan Respublikası Mülki Məcəlləsinin 49-cu maddəsində müəyyən edilmiş digər tələbləri yerinə yetirməlidirlər.

4.23. İcraçı direktorun vəzifələri aşağıdakılardır:

4.23.1. İdarənin fəaliyyətini təşkil etmək;

4.23.2. bu Nizamnamə ilə müəyyən edilmiş vəzifələrin yerinə yetirilməsi üçün Şuraya təkliflər vermək və sənədlər təqdim etmək;

4.23.3. Şuranın qərarlarını icra etmək;

4.23.4. aidiyyəti şəxslə dəyəri İdarənin aktivlərinin 5 (beş) faizədək hissəsini təşkil edən əqdin bağlanması haqqında qərar qəbul etmək;

4.23.5. İdarənin strateji məqsədlərinin və planlarının, habelə büdcəsinin icrasına nəzarət etmək;

4.23.6. bu Nizamnamənin 3.1.34-cü yarımbəndində nəzərdə tutulan vəsaitdən təyinatı üzrə səmərəli istifadə olunmasını təmin etmək;

4.23.7. cari və operativ məsələlər barədə Şuranı məlumatlandırmaq;

4.23.8. bu Nizamnamənin 3.1.28-ci və 3.2.1-ci yarımbəndlərində nəzərdə tutulmuş məsələlərin həlli üçün tədbirlər görmək;

4.23.9. İdarənin cari fəaliyyətinə rəhbərlik etmək və onu təmsil etmək;

4.23.10. İdarənin fəaliyyətinin təşkili ilə əlaqədar icrası məcburi olan daxili sərəncam və əmrlər vermək;

4.23.11. İdarənin fəaliyyət istiqamətlərinə dair qəbul olunmuş aktların icrasını təşkil etmək, yoxlamaq və buna nəzarəti həyata keçirmək;

4.23.12. özünün və İdarənin struktur bölmələrinin qanunvericiliyə zidd olan qərarlarını ləğv etmək;

4.23.13. müəyyən edilmiş struktur, əməyin ödənişi fondu və işçilərin say həddi daxilində İdarənin Aparatının və digər struktur bölmələrinin strukturunu, ştat cədvəlini və xərclər smetasını təsdiq etmək;

4.23.14. İdarənin işçilərinin vəzifə maaşlarının, vəzifə maaşlarına əlavələrin, mükafatların və digər ödənişlərin verilməsini əməyin ödənişi fondu çərçivəsində təşkil etmək;

4.23.15. bu Nizamnamədə müəyyən edilmiş hallar istisna olmaqla, İdarənin, o cümlədən onun idarə, filial və nümayəndəliklərinin, habelə tabeliyindəki digər qurumların işçilərinin (təsərrüfat cəmiyyətlərində isə yalnız rəhbərlərin) vəzifəyə təyin və vəzifədən azad edilməsi, onlar barəsində həvəsləndirmə və intizam tənbehi tədbirləri görülməsi barədə qərarlar qəbul etmək;

4.23.16. İdarənin əmlakından bu Nizamnamədə nəzərdə tutulmuş məqsədlərə uyğun istifadə olunmasına nəzarət etmək;

4.23.17. bu Nizamnamə ilə müəyyən edilmiş səlahiyyətlər çərçivəsində İdarənin adından əməliyyatlar aparmaq, müqavilələr bağlamaq və onların yerinə yetirilməsini təmin etmək;

4.23.18. İdarənin fəaliyyət istiqamətləri ilə bağlı məşvərətçi komitələr və işçi qruplar yaratmaq;

4.23.19. İdarənin fəaliyyət istiqamətləri üzrə dövlət sirrinin və məxfilik rejiminin, habelə qanunla qorunan digər məlumatların mühafizəsi üçün zəruri tədbirlər görmək;

4.23.20. İdarədə kargüzarlıq və arxiv işinin aparılmasını təmin etmək;

4.23.21. İdarədə müraciətlərə baxılmanı və vətəndaşların qəbulunu təmin etmək;

4.23.22. Şuranın səlahiyyətlərinə aid edilməyən bütün digər məsələlər barədə qərar vermək.”;

2.5.3. 6.1-ci bənd aşağıdakı redaksiyada verilsin:

“6.1. İdarənin fəaliyyətinə nəzarəti Azərbaycan Respublikasının Prezidenti, həmçinin bu Nizamnamə ilə müəyyən olunmuş qaydada İdarənin idarəetmə orqanları həyata keçirirlər.”.