Bakıda arvadını qətlə yetirməkdə təqsirləndirilən Ramil Səfərovun cinayət işi üzrə məhkəmə prosesi başa çatıb.

Zamantv.az- ın xəbərinə görə, Bakı Ağır Cinayətlər Məhkəməsində keçirilən prosesdə hökm oxunub.

Hökmə əsasən R.Səfərov 14 il azadlıqdan məhrum edilib.

Qeyd edək ki, keçən il oktyabrın 15-də saat 09:00 radələrində Binəqədi rayonu ərazisində 1984-cü il təvəllüdlü Sahilə Cəfərovanın öldürülməsi barədə rayon prokurorluğuna məlumat daxil olub.

Aparılan araşdırmalarla zərərçəkmişin əri, 1981-ci il təvəllüdlü Ramil Səfərovun şəxsi münasibətlər zəminində aralarında yaranmış mübahisə zamanı Sahilə Cəfərovaya bıçaqla çoxsaylı xəsarətlər yetirərək onu qəsdən öldürməsinə əsaslı şübhələr müəyyən edilib.

Faktla bağlı Binəqədi Rayon Prokurorluğunda Cinayət Məcəlləsinin 120.1-ci (qəsdən adam öldürmə) maddəsi ilə cinayət işi başlanıb.

Ramil Səfərov şübhəli şəxs qismində tutularaq istintaqa cəlb olunub.

Azərbaycanın tanınmış karateçisi Rafael Ağayevin Birləşmiş Ərəb Əmirliklərinin Fuceyrə şəhərindəki Premyer Liqa turnirində iştirak etməməsinin səbəbi açıqlanıb.

Bu barədə “Zamantv.az”a Azərbaycan Milli Karate Federasiyasının prezidenti Yaşar Bəşirov məlumat verib.

Federasiyası rəhbəri 5 qat dünya və 11 qat Avropa çempionunun öz istəyi ilə yarışa yollanmadığını bildirib: “Rafael Ağayev komandamızın üzvüdür. Zədə olmasa, bu il Avropa çempionatında və İslam Həmrəyliyi Oyunlarında iştirakı planlaşdırılır. O bildirdi ki, Premyer Liqa turnirinin onun üçün böyük əhəmiyyəti yoxdur, həm də tam hazır deyil. Ağayevin yüngül zədəsi də var”.

Qeyd edək ki, Rafael Ağayev 2021-ci ildə keçirilmiş Tokio Yay Olimpiya Oyunlarında 75 kq çəki dərəcəsində gümüş medal qazanıb.

Astarada ağacdan özünü asan şəxslə bağlı cinayət işi açılıb.

Bu barədə Baş Prokurorluğun Mətbuat Xidməti məlumat yayıb.

Bildirilib ki, 15 fevral 2022-ci il tarixində Astara rayon Toradi kənd sakini Sovqatov Zaur Məhərrəm oğlunun rayonun Taxtanakəran kəndində yolun kənarında dik yamacda yerləşən vələs ağacından asılmış vəziyyətdə meyiti aşkar edilib.

Faktla bağlı Cinayət Məcəlləsinin 125-ci maddəsi ilə cinayət işi başlanıb. Hazırda iş üzrə bütün halların araşdırılması məqsədilə istintaq hərəkətləri həyata keçirilir.

Qeyd edək ki, ölümündən bir neçə gün öncə mərhum Zaur Sovqatov aldadıldığını, onun adına bir neçə şirkət yaradıldığı və böyük məbləğdə vergi borcu yarandığı barədə hüquq-mühafizə orqanlarına və digər dövlət qurumlarına, eləcə də mətbuata müraciət edibmiş.

Bakının Suraxanı rayonunda bıçaqlanma hadisəsi baş verib.

Zamantv.az APA-ya istinadla xəbər verir ki, hadisə Yeni Suraxanı qəsəbəsində qeydə alınıb.

1998-ci il təvəllüdlü Vahabov Elşad Elnur oğlu tanışı ilə dava zamanı boyun və döş qəfəsindən bir neçə bıçaq xəsarəti alıb. Yaralı ağır vəziyyətdə xəstəxanaya yerləşdirilib.
Faktı Suraxanı Rayon Polis İdarəsinin 31-ci Polis Bölməsinin əməkdaşları araşdırma aparır.

“Tibbi Ərazi Bölmələrini İdarəetmə Birliyi” publik hüquqi şəxsin (TƏBİB) İctimaiyyətlə əlaqələr və tədbirlər şöbəsinə müdir təyin olunub.

Zamantv.az xəbər verir ki, bununla bağlı TƏBİB-in sədri vəzifəsini icra edən Vüqar Qurbanov əmr imzalayıb.

Əmrə əsasən, bu vəzifə Zamirə Ədilovaya həvalə olunub.
O, 14 fevral tarixindən etibarən vəzifəsinin icrasına başlayıb.

Qeyd edək ki, Z.Ədilova 2008-2019-cu illərdə indiki Rəqəmsal İnkişaf və Nəqliyyat Nazirliyində redaktor, ictimaiyyətlə əlaqələr (PR) üzrə menecer işləyib. 2019-2021-ci illərdə SOCAR-ın Bakı Ali Neft Məktəbinin İctimaiyyətlə əlaqələr şöbəsinin rəisi vəzifəsində çalışıb.

Fevralın 17-də gözlənilən hava şəraiti açıqlanıb.

Milli Hidrometeorologiya Xidmətindən Zamantv.az-a verilən məlumata görə, Bakıda və Abşeron yarımadasında hava şəraitinin dəyişkən buludlu olacağı, arabir tutulacağı, əsasən yağmursuz keçəcəyi gözlənilir. Səhər saatlarında zəif duman, çiskin olacaq. Cənub-şərq küləyi əsəcək.

Havanın temperaturu gecə 2-4° isti, gündüz 7-9° isti olacaq. Bakıda gecə 2-4° isti, gündüz 7-9° isti olacaq.
Atmosfer təzyiqi 770 mm civə sütunundan 765 mm civə sütununa enəcək. Nisbi rütubət 70-80 % olacaq.

Tibbi-meteoroloji proqnoz

Fevralın 17-də Abşeron yarımadasında meteoroloji amillərin mülayim tərəddüdü gözlənilir ki, bu da meteohəssas insanlar üçün əsasən əlverişlidir.


Azərbaycanın rayonlarında

Əsasən yağmursuz keçəcək. Lakin gecə və səhər bəzi yerlərdə yağıntılı olacağı, dağlıq ərazilərdə qar yağacağı ehtimalı var. Gecə və səhər saatlarında duman olacaq. Şərq küləyi əsəcək.

Havanın temperaturu gecə 0-5° isti, gündüz 7-12° isti, dağlarda gecə 7-12° şaxta, gündüz 0-5° şaxta olacaq.

Azərbaycanda itkin düşən iki nəfər canlı efirdə ailələrinə təhvil verilib.

Zamantv.az xəbər verir ki, bir müddət əvvəl Zaqatala rayonunda itən 21 yaşlı Qurban Mahmudov Xoşqədəm Hidayətqızının “Səni axtarıram” proqramında tapılıb.

O, canlı yayıma gələrək axtarış üçün efirə çıxan anası və nənəsi ilə görüşüb.
Digər şəxs isə paytaxtın Binəqədi rayonunda itkin düşüb. Fevralın 10-da rayon ərazisindəki yaşadıqları evdən çıxıb bir daha geri qayıtmayan yaşlı qadın dəmiryolu adlanan ərazidəki bazarda aşkarlanıb.

Həmin qadın da “ATV” kanalında yayımlanan “Bizimləsən” verilişi vasitəsilə tapılaraq, oğluna təhvil verilib.

Baş Dövlət Yol Polisi İdarəsi qadın sürücülərə müraciət edib.

İdarədən Zamantv.az-a daxil olan müraciətdə deyilir:

"Yol hərəkəti günü-gündən artan iştirakçıları ilə mürəkkəb ictimai münasibətlər sisteminə malik bir prosesdir və bu prosesdə qadın sürücülərin sayı ilbəil artmaqdadır.
Belə ki, 2020-ci illə müqayisədə sürücülük vəsiqəsi alan qadınların sayı 2021-ci ildə 67 faiz artıb. Onu da qeyd etməliyik ki, nəzəri imtahanlar zamanı yol hərəkəti qaydaları ilə bağlı suallara daha tez və düzgün cavab verən, həmçinin təcrübi imtahanlarda yüksək nəticələr göstərən qadın sürücülərimiz də az deyil.

Əslində, qanunvericilikdə nəqliyyat vasitələri sürücülərinin cins fərqi, bu fərqin yaratdığı hüquq və ya vəzifələr, eləcə də məsuliyyətlə bağlı hər hansı norma nəzərdə tutulmayıb. Sadəcə, digər sahələrdə olduğu kimi, yol hərəkəti prosesində də qadın sürücülərə bəzi məqamlarda müəyyən güzəştlər edilməsi və ya onlara hansısa üstünlük verilməsi milli dəyərlərimizdən qaynaqlanır. Toxunduğumuz bu mövzuda məqsədimiz heç də qadın sürücülərə münasibətdə formalaşmış mövcud yanaşmanı müzakirə etmək deyil.

Təəssüf ki, aparılan təhlillər qadın sürücülər arasında qayda pozuntusuna meyilli şəxslərin az olmadığını göstərir. Elə özümüz də yollarda hərəkətdə olarkən bəzən sükan arxasında olduqlarını unudub güzgüyə baxa-baxa kosmetik vasitələrdən istifadə edən, saçını düzəldən, mobil telefona başı qarışan, yolun hərəkət hissəsinin sol zolağında aşağı sürətlə hərəkət edərək süni sıxlıq yaradan və başqa qayda pozuntularına yol verən qadın sürücülərin şahidi oluruq.

Statistik rəqəmlər də deyilənləri təsdiq edir. Məsələn, 2021-ci il ərzində yolda müəyyən edilmiş sürət həddini aşmağa görə xüsusi texniki vasitələrin köməyi ilə real vaxt rejimində 84 381 qadın sürücü barəsində elektron qərar çıxarılıb.

Bundan başqa, təhlükəsizlik kəmərini bağlamadan nəqliyyat vasitəsini idarə etməyə görə 5494, yolayrıcını keçmə qaydalarının pozulmasına görə 1 363, svetoforun və ya nizamlayıcının qadağanedici işarəsi verilərkən hərəkətin davam etdirilməsinə görə 1257, araməsafəsi qaydalarının pozulmasına görə 528, nəqliyyat vasitəsini tam olaraq əks istiqamətli nəqliyyat axınının hərəkət zolağına keçirərək nəqliyyat axınına əks istiqamətdə hərəkət etməyə görə 383, nəqliyyat vasitəsinin hərəkəti zamanı telefonu əldə saxlamaqla ondan istifadə etməyə görə 192, nəqliyyat vasitəsinin sərxoş vəziyyətdə idarə edilməsinə görə 40 nəfər qadın sürücü barəsində inzibati tənbeh tədbirləri tətbiq edilib.

Təkcə ötən il ərzində qadın sürücülər tərəfindən törədilən ümumilikdə 28 yol-nəqliyyat hadisəsi qeydə alınıb ki, həmin qəzalarda 17 nəfər həyatını itirib, 18 nəfər isə yaralanıb. Ölümlə nəticələnən qəzalardan cəmi 1-i sürücülük təcrübəsi 10 ildən yuxarı olan qadın sürücü tərəfindən törədilmişdirsə, digər hadisələr sürücülük təcrübəsi 9 ilədək olan qadın sürücülərin təqsiri səbəbindən baş verib.

Hər bir ailənin doğma üzvü, cəmiyyətin təkanverici qüvvəsi olan neçə-neçə qadının məsuliyyətə cəlb olunaraq ailəsindən, doğmalarından ayrı, bəzən hətta azyaşlı övladları ilə birlikdə məhkumluq həyatı yaşamasını təsəvvür etmək belə olduqca ağrılıdır".

Gördüyünüz bu kadrları Bakının Binəqədi rayonu Biləcəri qəsəbəsində lentə almışıq.

Vətən Müharibəsi şəhidi Mayıl Mais oğlu Qurbanovun ailəsi və valideynlərinin yaşadığı bu məhəllə gözdən uzaq olmasa da, çoxdandır ki, könüllərdən iraqdır...

“Binəqədi rayonu Biləcəri qəsəbəsi 12 döngə deyilən ünvandayıq. Burda şəhidin xatirəsinin əbədiləşdirilməsi üçün valideynləri və məhəllə sakinlərinin şəxsi vəsaitləri hesabına bulaq-abidə kompleksi ucaldılıb. Mayıl 1996-cı ildə İmişlidə anadan olub. 2020-ci ilin dekabrın 3-də isə Qubadlı və Cəbrayıl istiqamətindəki döyüşlərdə qəhrəmancasına şəhid olub. Ailəsinin də, boya-başa çatdığı məhəllə sakinlərinin də bir arzusu var. Şəhid abidəsinin ətrafının, yaşadığı məhəllənin abadlaşdırılması və küçənin Şəhid Mayıl Qurbanovun adına verilməsi.
Şəhidin atası Mayıs Qurbanov deyir ki, abidənin ətrafındakı yolu düzəltmək üçün iki maşın asfalt gətirdilər: “Sonra maşının birini qaytardılar dala. Mən hansı qurum tərəfindən gətirildiyini dəqiq bilmirəm, amma İcra Hakimiyyətindən Osman və Səməndər müəllimlə görüşüb, xahiş eləmişdim. Onu da bax belə, yarımçıq qoyub getdilər. İstəyirəm ki, küçə boyu asfaltlansın məhəllə, bunu belə də xahiş etmişdim. Amma... Körpə uşaqları qalıb oğlumun, gəlib-getmək yağışlı-qarlı havalarda çətin olur. Aidiyyəti üzrə müraciət edəndə də deyirlər ki, sən İmişli qeydiyyatındasan. Başqa bir şey istəmirəm, sadəcə küçənin asfaltlanması və kücəyə oğlumun adının verilməsini istəyirəm. Bu bulağı öz xərcimlə tikmişəm”.

Problemlə bağlı Binəqədi rayon İcra Hakimiyyətinin Vətən Müharibəsi iştirakçıları və Şəhid ailələri ilə iş üzrə şöbəsinin müdiri Səməndər Mənəfovla görüşdük. Bildirdi ki, sözügedən ünvanda yaşayan Vətən Müharibəsi şəhidi Mail Qurbanovun valideyni ilə görüşüb, onu dinləyiblər.

Onun sözlərinə görə, şəhidin xatirəsinin əbədiləşdirilməsi məqsədilə ucaldılmış xatirə bulağının ətrafının, yəni təxminən 50 kvadrat metr sahənin abadlaşdırılması ilə bağlı Rayon İcra Hakimiyyətinə müraciət edilib.

Sevinc Vaqifqızı,

Kamran Namazov,

APA TV

Xalq artisti Naibə Allahverdiyeva ona edilən şantajdan danışıb. Zamantv.az-ın məlumatına görə, aktrisa "Onun sirri" verilişində bildirib ki, adını açıqlamaq istəmədiyi Xalq artisti onu şantaj edib:
"Allah hər şeyi görür, əgər günahım varsa, mənim cəzamı verir. Əgər onun günahı varsa, onun da cəzasını verir. Mənim də səhvlərim olub, amma bilmədən etmişəm. Xalq artisti məni çılpaq şəkillərimlə şantaj edib.

Bunu edən aktrisa artıq dünyasını dəyişib, adını çəkmək istəmirəm. Sevilən aktrisa və Xalq artisti olub. Allah onun günahlarını bağışlasın".