Siyəzən rayonundan olan şəhid qardaşı Şirinov Tərlan Fərhad oğlu ilə, həmin rayonun sakini keçmiş hərbçi zabit Tağıyev Tural arasında yaşanan qalmaqal uzun müddətdir ki, öz həllini tapmır. Qeyd edək ki, Tağıyev Tural ordudan tərxis olunandan sonra Siyəzən rayon Mərkəzi Xəstəxanasında ictimaiyyətlə əlaqələr şöbəsinin mütəxəssisi kimi fəaliyyətini davam etdirib.

Foto: Şirinov Tərlan

Şirinov Tərlan iddia edir ki, o, xəstəxanaya müraciət edən zamam yaranan mübahisə zəmnində Tağıyev Tural tərəfindən döyülüb və bunun nəticəsində ona ciddi bədən xəsarəti dəyib. Şikayətçi deyir ki, bu yöndə etdiyi şikayətlər lazımınca araşdırılmır.

Tağıyev Tural isə Azinforum.az-a açıqlamasında bildirdi ki, Şirinov Tərlan və onun ailəsi ilə şəxsi arasında uzun müddətə təsadüf edən qarşıdurma var. Keçmiş hərbçi deyir ki, buna görə də Şirinovlar ailəsi qisas almaq üçün, onun ünvanına şər atır.

Foto : Tağıyev Tural

Sözügedən xəstəxananın baş həkimi Dadaş Hümbətov isə Azinforum.az-a açıqlamasında bildirdi ki, Tağıyev Tural adlı adam artıq onun rəhbərlik etdiyi tibb ocağında işləmir.

Foto: Dadaş Hümbətov

Azinforum.az Siyəzəndə baş verən bu kuryoz hadisəni ətraflı araşdırıb. Həmin videoreportajı təqdim edirik:

Azərbaycan Prezidenti, Ali Baş Komandan İlham Əliyevin dəfələrlə xəbərdarlıq etməsinə baxmayaraq, bəzi məmurlar hələ də vəzifə səlahiyyətlərindən istifadə etməyə davam edir.

Belə bir sui-istifadə halı barədə Busaat.az-ın redaksiyasına Zərdab Rayonu Qoşaoba kənd sakinləri tərəfindən şikayətlə müraciət daxil olub.
Kənd sakinləri müraciətdə Zərdab Rayon İcra Hakimiyyətinin Birinci Müavini Rəhman Feyzullayev, onun qardaşı oğlu Tapdıq Feyzullayev və ayrı-ayrı vaxtlarda Qoşaoba Kənd Bələdiyyəsinin sədri vəzifəsində çalışmış şəxslər barədə şikayətini dilə gətirib.

Belə ki, kənd sakinlərinin iddiasına görə, adı çəkilən şəxslər və bələdiyyə sədrləri birlikdə bələdiyyəyə aid örüş torpaqlarını saxta sənədlərlə özəlləşdirib və dövlət əmlakını məqsədli şəkildə istismar edib.

Bələdiyyə torpaqlarının qanunsuz şəkildə istifadə edilməsi və icarəyə verilməsi ilə qazanılan böyük məbləğdə pul vəsaiti isə, mənimsənilib.
İndi kənd sakinləri həmin mənimsənilmiş məbləğin bələdiyyə hesabına qaytarılmasını, məbləğin isə, kəndin ehtiyacları üçün istifadə edilməsini tələb edir.
Qoşaoba kənd sakinlərinin redaksiyamıza ünvanladığı şikayət məktubunun mətnini olduğu kimi təqdim edirik:
“Zərdab Bələdiyyəsinə aid olan əkin və örüş torpaqları Qoşaoba kəndi ərazisindədir. Mal-qara üçün ayrılmış örüş torpaqları müxtəlif vaxtlarda bələdiyyə sədri işləmiş şəxslər və uzun müddətdir ki kənd icra nümayəndəsi işləyən icra başçısının birinci müavini Feyzullayev Rəhmanın qardaşı oğlu Feyzullayev Tapdıq tərəfindən qeyri-qanuni yollarla, dolayısı ilə saxta sənədlərlə guya özəlləşdirilib. Arayışdan belə görünür ki, 600 ha örüş torpağı boşdur, istifadə edilmir. Camaat o torpağdan 1 ha belə istifadə edə bilmir. Boş torpaq yoxdur. Wikipediyada Qoşaoba kəndinin əhalisi 2492 nəfər göstərilməyinə baxmayaraq, arayışda əhali sayı 1800 nəfər göstərilib.

Göstərilən 720 ha örüş torpağı vəzifəli şəxslər ətrəfindən öz aralarında bölüşdürülüb istifadə edilir. Hətta öz şəxsi mülkləri kimi başqalarına “icarəyə” verib pulunu mənimsəyirlər. Bu səbəbdən bələdiyyənin hesabına 1 manat da ödənilmir. Torpağın çox hissəsi, 500 ha hazırda icra başçısının birinci müavini işləyən Rəhman Feyzullayevin ixtiyarındadır. Sürət Hüseynovun komandası ilə vəzifəyə gələn R.Feyzullayev 30 ildir müavin, birinci müavin vəzifəsindədir. Beşinci kolonun rayon üzrə rəhbəri olan R.Feyzullayevin 68 yaşı olmasına baxmayaraq, vəzifədən kənarlaşdırılmır.
Çünki o vəzifədən getsə çox işlərin, saxtakarlıqların üstü açılacaq. R.Feyzullayevin torpaqdan qazancı 1 milyona yaxındır ki, bu məbləğ bələdiyyənin hesabına ödənilməli idi.

720 ha x 60,0 manat = 43,200 man.
43.200 manat x 25 il = 1.080.000 man.
Saxta arayışlardan birini sizə göndəririk:

Göründüyü kimi arayış qeydiyyat kitabından keçməyib, tarix yoxdur, nömrə yoxdur. Harada görünüb ki, iki idarə (dövlət və qeyri-dövlət) eyni arayışa imza atıb möhürlə təsdiq etsin?
Xahiş edirik, bələdiyyəyə aid olan torpaq və örüş sahələrinin kimlər tərəfindən istifadə olunduğu yoxlanılsın, mənimsənilmiş pullar bələdiyyə hesabına ödənilsin ki, bərbad olan yollarımız düzəlsin”.

Busaat.az

Veteranlıq ala bilməyən müharibə iştirakçıları Müdafiə Nazirliyi qarşısına toplaşıb.

Gundem.media yeniavaz.com-a istinadla xəbər verir ki, bir qrup müharibə iştirakçısı Müdafiə Nazirliyinin qarşısına gələrək onlara nə üçün veteranlıqlarının verilmədiyi haqda bir açıqlama verilməsini istəyib.

Quliyev Nazim müharibə iştirakçısı olsa da veteranlığını hələ də ala bilmədiyi üçün utandığını bildirib. O, dəfələrlə çıxış və tələbləri olsa da haqq və istəklərinin yerinə yetirilmədiyi qeyd edib.

Digər müharibə iştirakçısı Lətifov Ağayar isə ona verilən rəsmi cavab məktubunda bunların qeyd olunduğu deyib:
“Tamamlama hərbi hissələrində olduğunuza görə sizə veteranlıq verilməkdən imtina olunur”.

L. Ağayar onun haqqında verilən veteranlıqdan imtinanın əsasını öyrənmək istəyib. O veteranlıq stasutunun verilməsi ilə bağlı tələbini qeyd edərkən bunları deyib:

“Biz 80 manatın davasını etmirik. Yenə çağırılsaq, yenə də vətən uğrunda döyüşə gedəsiyik. Biz veteranlığımızı alaraq tarixə düşmək istəyirik. Bizə deyirlər “getdin iki ay döyüşdün nə verdilər?” Biz bu sözlədən utanırıq. Bizə sənəd versinlər ki, biz də səfərbərlikdə olmuşuq, Gəncədə olmuşuq, Goranda olmuşuq, Qubadlıda olmuşuq… Mən 80 manatdan imtina edirəm. Vətən məni çağırdı. Mən canımdan keçməyə hazır oldum. Ən azından bizə bir sənəd verilsin ki, biz də müharibə zamanı səfərbər olmuşuq. Özümüzdən başqa heç kimi inandıra bilmirik ki, biz də getmişik, Goranda da olmuşuq, Gəncədə də olmuşuq”.

Bu yazını Respublika Klinik Xəstəxanasından yazıram. Belə bir alqış var ki, Allah heç kimin yolunu xəstəxanadan salmasın. Həqiqətən, Allah heç kimə xəstəlik verməsin, ancaq çürümüş səhiyyə sistemində, ümumiyyətlə, heç kəsin yolu xəstəxanadan düşməsin. Əgər yolunuz düşsə, bilin ki, xəstəliyinizə xəstəlik əlavə olunacaq, əsəb keçirəcək, stress yaşayacaq, həkim aşağılanmasına məruz qalacaqsınız.

Proses belədir ki, insanlar həkim qəbuluna düşmək üçün qeydiyyatdan keçməlidirlər. Qeydiyyat prosesinin özü isə başdan-başa rəzalətdir. Birinci, insanlarımızda növbə mədəniyyəti yoxdur, ikincisi, süründürməçilik var.

İnsan seli arasında növbəyə girmək, saatlarla gözləmək, qeydiyyatdan keçmək, anket açdırmaq (burada da eyni mənzərə), həkimin qəbuluna düşmək. Budur! Həkim də qayıdıb deyir ki, sizi səhv yönləndiriblər, indi canın çıxsın, get yenidən növbədə dur, qeydiyyatdan keç!

Bununla da bitmir. Bir həkimin qəbuluna girirsən, deyir ki, yox, başqa həkimin rəyini görmədən dəqiq müalicə edə bilmərəm, buna görə də get o həkim də baxsın, sonra yenidən qayıt bura. Yenidən getməlisənmi qeydiyyata?! Bəli! Sonra əvvəlki həkimin yanına getmək üçün təzədən çek almalısanmı? Bəli!

Allahın bir rentgenindən keçmək üçün saatların gedir, ortalıqda isə heç nə yoxdur.

Xəstəxanaya dərdinə dəva tapmağa gedirsən, ancaq bizdə xəstəxana koridorları qarğış edən insanlarla doludur. Biri qeydiyyat şöbəsindəkiləri qarğıyır, biri həkimi qarğıyır, biri asayişi qorumalı olduğu halda, vətəndaşlarla kobud danışan polis nəfərini qarğıyır.

Xəstəxana xəstəxana deyil. İnsanlarla heyvan kimi rəftar edilən bir məkana, sizi bilmirəm, ancaq mən xəstəxana deyə bilmərəm. Çünki bura şəfa üçün gəlirlər, biz isə xəstəlik tapıb ayrılırıq.

Hə, yadımdan çıxmamış yazım, söyülənlərin başında sığorta sistemsizliyinin baiskarları gəlir.
Aqil Bəkir
www.yenicag.az

Hər bir bir şeyin bədxassəli şişi (Məsələn, insanda xərçəng, torpaqda erroziya və s) olduğu kimi, Ekologoya və Təbii Sərvətlər Nazirliyinin bədxassəli şişi nazir Müavini Vüqar Kərimovdur.

Regionxəbər.tv saytı xəbər verir ki, artıq Vüqar Kərimovun şişi metastaz verərək Nazirliyin bütün qurumlarına yayılıb.
Bu şəxs ixtisaslı və ali təhsilli kadrları meşə təsərrüfatlarından şərtlətdirib çıxardır və yerlələrinə mütəxəssis olmayanları gətirir-
Hərbiçilər, komissar, bədən tərbiyə müəllimi, ixtisasçı və s gətirib Regional Meşə Təsərrüfatları Mərkəzlərində direktor və müavin vəzifələrinə təyin etdirir:

-Sabirabad Regional Meşə Təsərrüüftı Mərkəzinin direktoru ixtisasca meşəyə yad bir kadrdır və bir neçə il öncə Dövlət Sosial Müdafiə nazirliyinin yerli şöbələrinin birindən qovulanlardandır.

-Bərdə Regional Meşə Təsərrüfatı Mərkəzinin direktoru Qalıb Həsənov da həmçinin meşə yad bir kadr, ağacların cinsini belə tanımır.

--Şamaxı Regional Meşə Təsərrüfatı Mərkəzinin direktoru Rəsul Quliyev isə pensiyaya çıxmış komissardır, hansı ki, günlük hər 5 meşəbəyliyin meşəbəysinə 200 manat "tas" qoyub və onlara bildirib ki, yaydır və odun fəslidir, kim verməyəcək ərizəsin yazıb çıxacaq.

-Masallı Regional Meşə Təsərrüfatı Mərkəzinin direktoru Nəsimi Nəsirov da meşə yad bir ixtisaslı kadrdır və işçilərinin verdiyi məlumata görə, nə ağacların cinsini, nə də əkinin nə olduğunu bilir.

-Masallı Regional Meşə Təsərrüfatı Mərkəzinin direktor müavini Rahib Ağayev. Rahibi bu vəzifəyə əmisi oğlu Sərdar Ağayev gətizdirib. Sərdar Ağayev Vüqar Kərimovla dostudur və əvvəllər birlikdə çalışıblar.

Deyilənə görə, Rahib Ağayev 2017-ci ildə bir saxta aqronomluq diplomu alıb. Yaxşı bu şəxs neçə oldu ki, 45 yaşında ali təhsil aldı? hansı balla TQDK-dan keçərək Azərbaycan Dövlət Aqrar Universitetinə daxil oldu?

Rahib Ağayev ağacların cinsini belə tanımır. Əgər akt və ya tərcemeyi-hal yazmağı ona verilsə belə yaza bilməz.

Rahib Vüqar Kərimovun Masallıda kı, ən sadiq 2 "qara kassa"sından biridir.

-Lənkəran Regional Meşə Təsərrüfatı Mərkəzinin direktor müavini-baş meşəbəyisi Abturab Bağırov ixtisasca qeyri məşəçi və ali təhsili olmayan biri.
Bu insan düzgün bir cümlə yaza bilmir, hesaba gəldik də isə vurma cədvəli soruşulsa belə bilmir. Bunu haqqında çox yazıldığı üçün artıq şərhə ehtiyac yoxdur.

Yuxarıda adları çəkilən dırnaq arası məmurlar Vüqar Kərimovun kadrlarıdır.

Kərimov bir başa cənab Ölkə Başçısının siyasətinə qarşı çıxır. Çünki cənab Ölkə başçısı dəfələrlə öz çıxışlarında demişdi ki, peşəkar və kadrlar işlərə cəlb edilsin.

Bunlar isə ağacların cinslərin belə tanımayan və meşə nədir bilməyənləri gətirib meşə kimi bir ağır və mürəkkəb sahəyə rəhbər vəzifəyə təyin edirlər.

Qarşı tərəfi dinləməyə hazırıq. //Regionxəbər.tv//

Prezident İlham Əliyevin Azərbaycana gətirdiyi ASAN Xidmət modelinin ilk icraçı rəhbəri, islahatçı imici ilə bir sıra mühüm işlərə imza atan İnam Kərimov bu ilin sonlarına qədər kənd təsərrüfatı naziri postu ilə vidalaşacaq.

Kənd təsərrüfatı sektorunda böyük islahatlara və şəffaflıq mühitinin yaranmasına imza atan İnam Kərimovu bu dəfə islahatlara daha çox möhtacı olan bir sahəyə nazir təyin edəcəklər.

Bu barədə "Yeni Müsavat"ın müxbirinə mötəbər mənbələrdən məlumat daxil olub.

Azərbaycanın Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin 1-ci sədri, Azərbaycanın 5-ci Kənd təsərrüfatı naziri Prezident İlham Əliyevin islahat desantlarındandır. Ona göstərdiyi uğurlu xidmət səbəbindən yüksək etimad vardır. ASAN Xidmətdəki tarixi və uğurlu fəaliyyətinin ardınca kənd təsərrüfatı sektorundakı bərbad vəziyyəti düzəltməsi, bu sahəni dirçəltməsi bu etimadı daha da yüksəldib.

Bizim qənaətimizə görə, Prezident İlham Əliyevin vizionu bütün sahələr üzrə ASAN Xidmət modelinə uyğunlaşıb. O, bütün sahələri, o cümlədən və əsasən də yüksək icra qurumlarını islah etmək və ASAN-laşdırmaq istəyir. Bu istiqamətdə artıq xeyli iş də görülüb. Belə sahələrdən biri də məhkəmə-hüquq sistemidir. Ölkədə islahatlara və yenidən qurulmasına ən böyük ehtiyac olan sahə də məhz məhkəmə-hüquq sistemidir. Qaynağımız iddia edir ki, artıq bu sistemin də islahata cəlb olunması, şəffaflaşdırılması və korrupsiyadan arındırılmasının zamanı gəlib. Az müddət sonra bunu bütün ölkə biləcək.

Məsələnin maraqlı tərəfi də budur ki, "islahat desantı" İnam Kərimov ixtisasca məhz hüquqşünasdır. Bu dəfə o, baza ixtisası üzrə nazir olacaq.

İnam Kərimov:

- 1977-ci il iyunun 6-da Bakı şəhərində anadan olub. 1984-cü ildən 1994-cü ilə qədər S.C.Pişəvəri adına Humanitar Fənlər Gimnaziyasında təhsil alıb.

- 1994–1995-ci illərdə Amerika Birləşmiş Ştatlarının İndiana ştatında yerləşən Riçmond orta məktəbində təhsilini davam etdirib.

- 1995-ci ildə Bakı Dövlət Universitetinin beynəlxalq hüquq fakültəsinə qəbul olub.

- 1998-ci ildən 2000-ci ilə qədər Fransanın Strasburq Universitetində hüquq ixtisası üzrə bakalavr təhsili alıb.

- 2000–2002-ci illərdə isə Sorbonna Universitetində hüquq ixtisası üzrə magistr təhsili alıb.

- 2013-cü ildə Sorbonna Universitetində hüquq elmləri doktoru (docteur en droit) elmi dərəcəsi alıb.

İngilis, fransız, rus və fars dillərini bilir.

Bu model - bir şəxsin ən müxtəlif sahələr üzrə vəzifə daşıması və fərqli sahələrə rəhbər təyin edilməsi Qərb paytaxtlarındakı hakimiyyətlərdə baş verir. O cümlədən də qardaş Türkiyədə Ərdoğan iqtidarı belə addımlar atır. Rusiyada Putin komandasındakı bəzi tanınmışlar da zamanında fərqli sahələrə rəhbərlik ediblər.

Azərbaycanda isə bu cür kadrlar iqtisadiyyat naziri Mikayıl Cabbarov və kənd təsərrüfatı naziri İnam Kərimovdur.

Bu praktika nə dərəcədə özünü doğruldur və konkret İnam Kərimov nümunəsində faydalıdırmı? Bu sualın cavabı zamana bağlıdır. Eyni zamanda, oxucularımız bu barədə saytımızın telegram səhifəsində fikirlərini yaza bilərlər.

"Yeni Müsavat"

Füzuli rayonunun Araz Dilağarda kənd sakini Xəyyam Həsənov sahibkarlıq fəaliyyəti ilə məşğuldur. Daha doğrusu, məşğul idi. Ta ki məmur özbaşınalığı ilə qarşılaşana qədər.

Xəyyam Həsənov KİV-ə müraciət edərək bildirib ki, ona məxsus olan 20 hektar torpaq sahəsi əlindən alınaraq külli miqdarda ziyan vurulub: “Haramı ərazisində aqropark yaradılması ilə əlaqədar mənim fermamı, tikilimi dağıtdılar, ağaclarımı məhv elətdirdilər. Qoyun-quzum, mal-qaram tərk oldu. Təsərrüfatımı ərazidən köçürtdülər. 2016-cı ildə 7 hektar sahədə pambıq əkmiş, 16-17 ton maşınla yığılmış məhsul təhvil vermişdim. 2017-ci ildə 17 hektarda əkdiyim pambıq əkinini dağıtdılar. Bir elə vəsait sərf eləyib əziyyət çəkmişdim. “Füzuli Aqropark”ın məxsus olduğu “Natural – Aqro” MMC-nin direktoru İlham Hacıyev şumlatdırıb qatdı ərazisinə. O vaxt baş verənləri əks etdirən video-çəkilişlər, hal şahidləri var. Pambıq məhsulu batdı. Beyləqan pambıq zavodu (“MKT İstehsalat Kommersiya” MMC-nin Beyləqan filialı – red.) boynuma 7000 manat borc öhdəliyi yüklədi. Zavodun direktoru Rəşid müəllim mənə dedi ki, icra hakimiyyətindən zavoda məktub gəlib, mənə veriləsi vəsaitin dayandırılması tapşırılıb. Özüm cibimdən 3000 manatdan yuxarı fəhlələrə məvacib ödəmişdim. Torpağa görə 20 min manat kompensasiya hesablamışdılar, onun da yalnız 2 min manatını “Natural – Aqro” MMC-nin sabiq direktoru rəhmətlik Adil müəllimin idarəçiliyi vaxtında kartıma köçürmüşdülər. Qalanının nağd şəkildə ödəniləcəyini demişdi. Adil müəllim vəfat edəndən sonra vəzifəyə gələn İlham Hacıyev MMC-nin rəhbəri Natiq Quliyevin qohumu və həmyerlisidir. Füzuli rayon İcra Hakimiyyətinin başçısı Alı Alıyev mənə icazə verdi ki, hələlik mənə yer verilənənədək həmin o yerdə əkin əkə bilərəm. Mən də o dediyi kimi elədim. Başçının razılığını alandan sonra həmin yerə arx çəkdirib şumlatdım. İlham Hacıyev gəlib iş görməyimə mane oldu. Başçıdan icazə aldığımı dedim. Sahə inspektoru Sahib müəllimə zəng vurdum. Xeyri olmadı. İlham mənimlə aqressiv davrandı. Mənə və başçının ünvanına söyüş də söydü, hədə-qorxu gəldi…”

Hüquqları tapdalanmış, ziyana düşmüş sahibkarın başına gələnlər yalnız bundan ibarət deyil. Avqustun 4-nə keçən gecə saat 01:30 radələrində onun VAZ 21015 markalı maşını yanıb. Hesab edir ki, yandırılıb. Şübhələndiyi şəxs isə onunla konflikdə olan İlham Hacıyev və onun sifarişini yerinə yetirən əlaltılarıdır. Hadisə yerinə polis, sonra da FHN əməkdaşları gəlib.

Xəyyam Həsənov deyir ki, yuxarı instansiyalara çoxsaylı müraciətləri nəticə verməsə də, ən nəhayət, son günlərdə Prezident Administrasiyasında vəzifəli şəxslə görüşəndən sonra RİH başçısı Alı Alıyev və sahə inspektoru Sahib müəllim onu çağırıb vaxtilə pambıqçı qadınlara əmək haqqı xərci çəkdiyi 3500 manat pulu akt tərtib edərək veriblər. Amma zavoda borclu göstərildiyi 7000 manat və torpağın əvəzinə verilməli olan 18000 manatdan xəbər-ətər yoxdur.

Sahibkar həmçinin bildirib ki, adını çəkmək istəmədiyi bir nəfər ona İlham Hacıyevin onu təxribata çəkmək istədiyini, şərləyib tutdurmaq istədiyini deyib və ehtiyatlı olmağı məsləhət görüb. Xəyyamın verdiyi məlumata görə, Aqroparkın ərazisinə düşən torpaq sahiblərindən 4 nəfər məmur olduğu üçün kifayət qədər yuxarı məbləğdə kompensasiya alıb ərazini tərk ediblər: “Daha 6 nəfər də torpağını Aqroparka sərfəli qiymətə satmaq üçün dayanıblar. Aralarında yəqin məni zəif bənd hesab etdikləri üçün üstümə gəlirlər. Amma mən mübarizəmi sonadək davam etdirəcəyəm və inanıram ki, səsimi möhtərəm Prezidentimiz cənab İlham Əliyevə çatdıra biləcəyəm”.

P.S. Füzuli də – Alı Alıyevin başçılıq etdiyi bir rayonda həngamə bitmir ki, bitmir.
Adları çəkilən şəxslərin mövqeyini dinləməyə və dərc etməyə hazırıq. //RealMedia.az//

"Ucar rayonu 20 Yanvar küçəsi ev 23 sakini Abdullayev Zaur Vaqif oğlu tərəfindən ölkə rəhbərliyinə müraciət ünvanlanıb. Bir nüsxəsi də DİA.AZ-a daxil olan müraciətdə deyilir:

"Bitki Mühafizəsi və Texniki Bitkilər Elmi Təhqiqat İnstutunun direktoru Elçin Xəlilov dövlətin ayırdığı küllü miqdarda vəsaiti talan etdiyinə görə Ucarda pambıq məhv olub.
Belə ki, Ucarda yerləşən Şirvan Təcrübə Stansiyasının balansında olan 18 hektar torpaq sahəsində 3 ildir ki, Çin pambıq sortu yetişdirilir.Birinci ili 60 sentner pambıq vermiş bunu prezident İlham Əliyevdə yüksək qiymətləndirmişdir.Həttda Kənd Təsərrüfatı Naziri İnam Kərimov 5 dəfə həmin ərazidə olub yaxından maraqlanmışdır.Şirvan Təcrübə Stansiyasında yetişdirilən Çin pambıq sortu respublikanın digər rayonlarında da tətbiq edilməsi nəzərdə tutulmuşdur.
Ancaq bu il üçün Şirvan Təcürbə Stansiyasında 18 hektarda Çin toxumu adı ilə türk toxumu əkilmiş, aqrotexniki qulluq edilmədiyi üçün pambıq alağın işində batdığı üçün ot kimi biçilmişdir.

Dünyada bəlkədə 1-ci dəfədir ki, pambıq yığılmadan ot kimi biçilmişdir.Bunu isə Bitki Mühafizəsi və Texniki Bitkilər Elmi Təhqiqat İnstutunun direktoru Elçin Xəlilov etmişdir.Şirvan Təcrübə Stansiyasında 10 hektardan çox pambığı qanunsuz akt tərtib edib ot kimi biçiblər.Ancaq qanuna əsasən o halda akt tərtib edilir ki, təbii fəlakət baş vermiş olsun.Bu il isə Ucar rayonunda təbii fəlakət baş verməyib.
Son 7 ayda Şirvan Təcrübə Stansiyasının dirktoru vəzifəsinə 4 nəfər təyin edilib qısa müddət ərizndə işdən çxarılmışdır.Zaman Səfərov, Elman Nifətliyev, Natiqə Əliyeva və sonuncu Qəhrəman Tağıyev.Hər bir şəxsdən pul alaraq bu vəzifəyə təyin edən Elçin Xəlilov özü kənd təsərrüfütı üzrə mütəxəsis deyil adi bir dələduzdur.
Bitki Mühafizəsi və Texniki Bitkilər Elmi Təhqiqat İnstutunun direktoru Elçin Xəlilovun sinif yoldaşı olan Qəhrəman Tağıyev əvvələr məhkum olub.
Kənd Təsərrüfatı Naziri İnam Kərimov kadr siyasətinə ciddi nəzər etmədiyi üçün belə talançılıqla dövlətimizə küllü miqdarda ziyanlar dəyir.
Prezident İlham Əliyev pambıqçılığın inkişaf etdirilməsi üçün sərəncamlar imzalayıb dövlət büdcəsindən buna görə küllü miqdarda ayırdığı pulları isə Bitki Mühafizəsi və Texniki Bitkilər Elmi Təhqiqat İnstutunun direktoru Elçin Xəlilov talan edir".

İddia olunanlarla bağlı dia.az olaraq bütün maraqlı tərəfləri dinləməyə hazırıq...

Bir qrup Cəlilabad sakini azinfo.tv xəbər saytı vasitəsi ilə Ölkə başçısı cənab İlham Əliyevə müraciət ünvanlayıb:

Hörmətli cənab Prezident, biz ilk öncə sözə Sizin mərhum Atanız, həmişə ruhun ehtiramla andığımız Ulu Öndərin gözəl bir kəlamı ilə başlamaq istərdik:
"Bir ağacı kəsən sanki mənim bir qolumu kəsir".

Amma buna baxmayaraq Planetimizin "ağ ciyəri" adlanan meşələrimiz bu günki gün bəzi işbazların gəlir mənbəyinə çevrilib.

Hazırda meşələrimizin qiymətli, adları "Qırmızı Kitab"a düşmüş ağacları kəsilərək mebel sexi və kustar üsulla hazırlanan kömürxanalara daşınır.

Cəlilabad və Göytəpə meşəbəyliklərinin dolaylarını görən adama sanki mənfur qonşularımızın Qarabağ meşələrində törətdiyi "soyqırımlar"ı xatırladır.

Hörmətli Ali Baş Komandan, Xalıqverdi Hüseynov Meşələrin İnkişafı Xidməti rəisi vəzifəsinə təyin olunandan sonra bizim meşələrin "fatiəsi" birdəfəlik verildi. Çünki o, əvvəllər ekologiya sahəsində rəis və digər vəzifələrdə çalışdığı zaman biz bunun əyani şahidi olmuşduq.

Aramızdan meşələr barədə şikayət verəni meşə işçiləri və yaxud da 1 saylı Regional Ekologiya və Təbii Sərvətlər Idarəsinin baş müfəttişi Talıb Kərimovun vasitəsilə ələ alıb susdurmağa çalışırlar-şikayətçilərə "get meşədən odun, çilə daşı ( yəni qır, dağıt meşəni ) , dolan və s., amma şikayət etmə" deyirlər !
Talıb Kərimov meşədən çıxan maşınların hər birindən aylıq haqq alır və odunçu, kömürçü və meşələrdən sexlərə işlik material daşıyanlara münbit şərait yaradır.

Bu dırnaq arası ekoloq və işbazlar harda materiallıq ağaclar var onu sanitar qırma adıyla nömrələyib, sonra isə onu kəsdirib material kimi satırlar. Meşələrimizdən olan təbii bərpa kütləvi şəkildə məhv olur- qiymətli ağaclar (azat, dəmirağac və s) paya formasında kəsilərək
Masallı və Cəlilabad ərazilərində çiyələk əkdirən sahibkarlara satılır.

Sözügedən meşəbəyliklərdə 300 hektara yaxın meşə əkini və aqrobağ bataraq məhv oldu və buna görə heç kim cəzalanmadı, dövlətə dəymiş 200.000 manat qədər vəsait hələ də ödənilmədi.
Artıq biz aidiyyatı qurumlara meşə barədə şikayət verməkdən yorulmuşuq.

Hörmətli cənab Prezident, artıq biz ömrümüzün əksər hissəsini sürmüşük, sadəcə olaraq bizi gələcək övladlarımız düşündürür. Qoy heç olmasa onlar gələcəkdə meşənin nə olduğun realda görsünlər, daha meşə görmək üçün qonşu ölkələrə üz tutmasınlar.

Xahiş edirik bizim haqq səsimizə səs verəsiniz.

10 sentyabr 2022-ci il. //azinfo.tv//

Sentyabrın 11-də əsasən gecə və səhər saatlarında duman ilə əlaqədar olaraq Füzuli-Cəbrayıl-Mahmudlu, Naxçıvan-Şahbuz, Quba-Qusar, Quba-Xaçmaz, Xankəndi-Xocavənd, Gəncə-Kəlbəcər-Laçın, Şuşa-Füzuli, Yevlax-Xocalı-Laçın, Gəncə-Daşkəsən, Ağdam-Füzuli-Horadiz, Həkəri-Zəngilan, Ağdam-Ağdərə magistral avtomobil yollarının bəzi hissələrində görmə məsafəsi 300-800 metrədək məhdudlaşacaq.

Bu barədə Ekologiya və Təbii Sərvətlər Nazirliyinin Milli Hidrometeorologiya Xidməti məlumat yayıb.