Sabah Azərbaycanda Ramazan ayının dördüncü günüdür.

Sabah üçün imsak saat 05:28, iftar isə 19:01-ə təyin olunub.

İmsak duası:

“Alahummə qəvvini fihi əla iqaməti əmrik. Və əziqni fihi həlavətə zikrik. Və əvzi-ni fihi li-ədai şükrik. Bikərəmikə vəhfəzni fihi bihifzikə və sətrik, ya əbsərən-nazirin”.

Tərcüməsi:

“İlahi, əmrlərini yerinə yetirməkdə mənə qüvvət ver, zikrinin şirinliyini mənə dadızdır. Sənə layiqincə şükr etmək üçün məni ilhamlandır. Kərəminə and verirəm, məni öz himayəndə gizlət və qoru, ey görənlərin ən bəsirətlisi!”.

İftar duası:

“Allahummə ləkə sumtu və əla rizqikə əftərtu və əleykə təvəkkəltu. Bismillahir-Rəhmanir-Rəhim. Ya vasiəl-məğfirəti iğfirli”.

Tərcüməsi:

“İlahi, səndən ötrü oruc tutdum, sənin verdiyin ruzi ilə iftar açdım və sənə təvəkkül etdim. Bağışlayan və mehriban Allahın adı ilə. Ey hüdudsuz bağışlama sahibi, mənim günahlarımı bağışla!”.

Allah orucunuzu qəbul etsin!

Azərbaycan Respublikasının Prezidenti İlham Əliyev martın 13-də Ümumdünya Səhiyyə Təşkilatının Baş direktoru Tedros Adhanom Qebreyesusu qəbul edib.

AZƏRTAC xəbər verir ki, Tedros Adhanom Qebreyesus İlham Əliyevi Prezident seçkilərində qələbə və COP29-un ölkəmizdə keçirilməsi münasibətilə təbrik etdi.

Dövlətimizin başçısı təbriklərə görə minnətdarlığını bildirdi.

Görüşdə XI Qlobal Bakı Forumunun əhəmiyyəti qeyd edildi, Tedros Adhanom Qebreyesusun bu tədbirdə iştirakının önəmi vurğulandı. Nizami Gəncəvi Beynəlxalq Mərkəzinin beynəlxalq aləmdə nüfuzunun artdığı bildirildi və bu forumda xeyli sayda qonağın iştirakı bunun yaxşı göstəricisi kimi dəyərləndirildi.

Qonaq Ümumdünya Səhiyyə Təşkilatı ilə Nizami Gəncəvi Beynəlxalq Mərkəzi arasında əməkdaşlıqdan məmnunluğunu bildirərək bu mərkəzin onun rəhbərlik etdiyi təşkilatın fəaliyyətinə göstərdiyi dəstəyi yüksək qiymətləndirdi və Mərkəzin İdarə Heyətinin üzvləri ilə mütəmadi olaraq görüşlər keçirdiyini qeyd etdi.

Prezident İlham Əliyev Nizami Gəncəvi Beynəlxalq Mərkəzinin beynəlxalq statuslu qeyri-hökumət təşkilatı olaraq müstəqil şəkildə fəaliyyət göstərdiyini və ölkəmizin də bu təşkilatın işinə dəstək verdiyini vurğuladı. Dövlətimizin başçısı hər il Bakının ev sahibliyi ilə keçirilən Qlobal Forumun beynəlxalq gündəlikdə duran məsələlərinin müzakirəsi və onların həlli yollarının tapılması baxımından əhəmiyyətli platformalardan biri olduğunu qeyd etdi.

Ölkəmizdə həyata keçirilən səhiyyə islahatlarının təqdirəlayiq olduğunu deyən Tedros Adhanom Qebreyesus Azərbaycanda yaradılan icbari tibbi sığorta sisteminin müsbət proses olduğunu və onun yaxşı nəticələrinin artıq özünü göstərdiyini dedi.

Görüşdə COP çərçivəsində Azərbaycan ilə ÜST arasında əməkdaşlıq məsələləri ilə bağlı fikir mübadiləsi aparıldı. İqlim dəyişmələrinin dünyada müxtəlif növ xəstəliklərin yayılmasına rəvac verdiyini və bilavasitə səhiyyə ilə bağlı olduğunu vurğulayan Ümumdünya Səhiyyə Təşkilatının Baş direktoru bu sahədə də Azərbaycan ilə əməkdaşlıq məsələlərinə toxundu.

16:40

Azərbaycan Respublikasının Prezidenti İlham Əliyev martın 13-də Ümumdünya Səhiyyə Təşkilatının Baş direktoru Tedros Adhanom Qebreyesusu qəbul edib.

Bununla bağlı President.az məlumat yayıb.

İspaniya milli polisi məşhur futbolçuların evlərində oğurluqla məşğul olan cinayətkar qrupun fəaliyyətini dayandırıb.

Bu barədə krallığın hüquq-mühafizə orqanlarının press-relizində deyilir.

Onların sözlərinə görə, 2022-ci ilin iyul ayından dəbdəbəli yaşayış komplekslərində səkkiz oğurluq hadisəsində əli olduğu güman edilən altı nəfər saxlanılıb. Hədəfləri seçmək üçün şübhəlilər sosial mediadan istifadə edərək, idmançıların ailə üzvləri və yaxınları tərəfindən yerləşdirilən fotoşəkilləri və videoları öyrəniblər.

İstintaq 2023-cü ilin may ayında Madrid əyalətindəki bir evdə baş vermiş soyğunçuluğa yönəldilib. Daha sonra cinayətkarlar təxminən 500 min avro dəyərində əşyalar oğurlaya biliblər. Polis zərərçəkmişin adını açıqlamayıb, lakin həmin müddət ərzində “Real Madrid”in hücumçusu Rodriqonun evi qarət edilib.

Mənbə: TASS

Bildiyiniz kimi, Vladimir İliç Leninin məşhur “Siz qətiyyətlə yadda saxlamalısınız ki, bizim üçün bütün sənət növlərində kino hər şeydən önəmlidir” ifadəsi Lunaçarskinin Boltyanskiyə 29 yanvar 1925-ci il tarixli məktubunda, 1922-ci ilin fevralında Leninlə söhbəti haqqında xatirələrinə əsaslanır. Kimin və nə vaxt deməsindən asılı olmayaraq, bu ifadə, daha doğrusu bu qənaətin əsas mesajı bu gün də aktuallığını qoruyub saxlayır.

Həqiqətən də, planetimizdə yaşayan milyardlarla insanın ağlı və qəlbi uğrunda döyüşlərin getdiyi böyük informasiya müharibəsində öz mövqeyini müdafiə edən ən mühüm təbliğat vasitəsi kinodur. Və rəqibin məğlubiyyətini etiraf etməsi üçün düşmən üzərində hərbi və siyasi qələbə qazanmağın kifayət etdiyi mövqe tamamilə səhvdir. Təcrübə göstərir ki, informasiya məkanında haqlı olduğunuzu sübut etmək heç də az əhəmiyyət kəsb etmir.

Və burada çox xoşagəlməz mənzərələrə şahid oluruq. Erməni mətbuatının yazdığı kimi, “1980-ci illərdə Azərbaycanda təqib olunan” erməni haqqında sənədli film ABŞ-ın 96-cı Akademiya Mükafatlarında “Oskar” qazanıb. Film "Sonuncu təmir sexi" adlanır və rejissor Ben Proudfoot və Chris Bowersdir.

Kino Sənəti və Elmləri Akademiyasının (A.M.P.A.S.) saytının məlumatına görə, “Sənədli qısametrajlı film” nominasiyasında “Sonuncu təmir sexi” qalib olub. Filmin süjeti Los-Ancelesdə cərəyan edir. Filmin təsvirində deyilir ki, söhbət Los-Ancelesin 80.000-dən çox musiqi alətinə qulluq edən, təmir edən və bərpa edən fədakar ustalardan gedir.

Onların əsas rəhbəri Azərbaycanda doğulub boya-başa çatmış erməni Stiv Baqmanyandır. Amma 80-ci illərdə “Sumqayıtda, Kirovabadda və Bakıda törədilən qırğınlar zamanı minlərlə erməni kimi etnik təqiblərə məruz qaldı”. Filmdə Bakıdakı erməni “poqromları” haqqında epizod yer alırdı. Ümumiyyətlə, orada anti-Azərbaycan təbliğatı tam şəkildə təqdim olunur.

Qeyd edək ki, “Ən yaxşı xarici tammetrajlı film” nominasiyasında “Oskar”a iddialıların qısa siyahısına ilk dəfə olaraq Ermənistandan olan rejissor Maykl Qurdjianın “Amerikalı” (Amerikasti) filmi də daxil edilib. Təəssüf ki, Azərbaycandan olan heç bir bədii film və ya sənədli film “Oskar” nominasiyasının şort-listinə belə, daxil edilməyib. Təəssüf ki, biz hələ heç bir kateqoriyada “Oskar” qazanmağı xəyal edə bilmərik.

Bu, həm yerli kino, həm də bütövlükdə məişət mədəniyyəti üçün yeni başlayan ilin acı nəticəsidir. Axı təkzibolunmaz fakt budur ki, müqəddəs yer heç vaxt boş qalmaz, Ermənistan-Azərbaycan münaqişəsinin yaxşı hazırlanmış sənədli və ya bədii film şəklində Azərbaycan versiyasının olmaması erməni tərəfinin boşluğu doldurmasına səbəb olur. Bütün bunlar dünya erməni icmasının amerikalı, fransız, rus və istənilən siyasətçi, jurnalist, ictimai xadimlə fəal işinə əsaslanır.

Nəticədə ABŞ və Avropa ölkələrində ictimaiyyət Ermənistanın işğalçı deyil, “işğalın qurbanı” olduğuna inanır. Amerikalılar və avropalılar Ermənistandan 300 000-dən çox azərbaycanlının qovulmasından, uzun illər ağır şəraitdə yaşayan 750 000-dən çox azərbaycanlı məcburi köçkünün qovulmasından tamamilə xəbərsiz olaraq, hesab edirlər ki, məhz azərbaycanlılar “etnik təmizləmə törədib”.

Onların Xocalıda azərbaycanlı dinc əhalinin soyqırımından, Ağdamın “Qafqaz Xirosimasına” çevrilməsindən xəbəri yoxdur. Onlar bilmirlər ki, 44 günlük müharibə zamanı Ermənistan Azərbaycanın dinc şəhərləri olan Gəncə, Bərdə və Mingəçeviri raket hücumlarına məruz qoyub, azərbaycanlı qocaları, qadınları, uşaqları qətl yetirib. Onlar ancaq hadisələrin erməni, yalan variantı ilə tanışdırlar.

Ermənistan-Azərbaycan münaqişəsinin səbəb və nəticələri, Birinci Qarabağ müharibəsi və ya 44 günlük müharibə haqqında, eləcə də azərbaycanlıların Şuşaya qayıtması haqqında “Oskar”ın qısa siyahısına düşməyə layiq yüksək keyfiyyətli sənədli və bədii filmin hələ də çəkilməməsi faktı milli kinomuzun və ümumən mədəniyyətimizin uğursuzluğudur.

Gələcəkdə vəziyyəti düzəldə biləcəyəkmi? Sənətin ən mühüm vasitələrindən istifadə edərək ağrımızdan, faciəmizdən, ümidlərimizdən, qələbəmizdən danışa biləcəyəkmi?

Bütün bunları zaman göstərəcək. Amma biz artıq təşəbbüsü itirmişik. Mühüm bir mövzuda erməni filmləri artıq çəkilib və artıq nümayiş etdirilir və dünyanın ən nüfuzlu kino mükafatlarını qazanırlar.

ayna.az

Kərəm Həsənovla Rüstəm Şahbazovun ortaq əməli: başqasının sənədli torpağını necə satılıb? • Cumhuriyyət
Bakı şəhəri, Nizami küçəsi, ev 53, mənzil 41-də yaşayan Amanova Kəmalə Balaş qızı tərəfindən redaksiyamıza daxil olan şikayət məktubunu ötən həftə saytımızda dərc etmişdik.
Qeyd edək ki, şikayətçi K.Amanova məktubunda Prezident İlham Əliyevə, Birinci vitse-prezident Mehriban Əliyevaya, Baş nazir Əli Əsədova, Prezident Administrasiyasının Hüquq mühafizə orqanları ilə iş şöbəsinin müdiri Fuad Ələsgərova, Birinci vitse-prezidentin katibliyinin rəisi Altay Məmmədova, İqtisadiyyat naziri Mikayıl Cabbarova müraciət edən şikayətçi 2015-ci ildə Əmlak Məsələləri Dövlət Komitəsinin rəhbərliyi tərəfindən törədilmiş cinayət hadisəsi barədə məlumat verirdi:
“Hörmətli Prezident!
Hörmətli Mehriban xanım!
Bildirirəm ki, 1988-ci ildə Bakı şəhəri, Hövsan qəsəbəsi, “İnturist” Bağçılıq Yoldaşlıq Cəmiyyətinə aid olan ərazidə tikilmiş 3/1294 nömrəli bağ evini almışam. Bağ evi 1993-cü ildən istifadəmdədir. 2005-ci ildən isə evi özəlləşdirmişəm.
Sözügedən Bağ evinə Bakı şəhəri İcra Hakimiyyətinin Mülkiyyət Hüquqlarının Qeydiyyatı İdarəsi tərəfindən BM seriyalı, 002771 №li QEYDİYYAT VƏSİQƏSİ (kupça) verilmişdir.
Xüsusi mülkiyyətimdə olan bağ evinə dair bütün hüquqverici və təsdiqedici sənədlər İqtisadiyyat Nazirliyi yanında Əmlak Məsələləri Dövlət Xidmətinin arxivində saxlanılır(Kupçanı və bütün hüquqverici və təsdiqedici sənədləri əlavə edirəm).

Cənab Prezident!
Hörmətli Mehriban xanım!
Yaxın keçmişdə məlum olmuşdur ki, istifadəmdə və xüsusi mülkiyyətimdə olan sözügedən bağ evimin altındaki torpaq sahəsi 2015-ci ildə qanunsuz olaraq, başqa bir şəxsin adına özgəninkiləşdirilmişdir. O dövrdə Əmlak Məsələri Dövlət Komitəsinin sədri Kərəm Həsənov olmuşdur. Bu cinayət həmin vaxt ƏMDK-nin rəhbərliyndə yer alan və hal-hazırda da ƏMDX-nin sədr müavini vəzifəsində işləyən Rüstəm Şahbazov tərəfindən törədilmişdir.
Xüsusilə vurğulamaq istəyirəm ki, Rüstəm Şahbazov bir qrup qanunsuz quruplaşmalarla qabaqcadan əlbir olaraq, törədilmiş və başa çatdırılmış bu cinayətin üstünü ört-basdır etmək və izi itirmək məqsədilə, sonradan həmin torpağa dair bir neçə dəfə özgəninkiləşdirmə əməliyyatı aparmışdır.

Kərəm Həsənov
Cənab Prezident!
Hörmətli Mehriban xanım!
Bir daha qeyd edirəm ki, bu cinayət o dövrdə Əmlak Məsələləri Dövlət Komitəsində sədr müavini vəzifəsində işləyən Rüstəm Şahbazovun rəhbərliyi və təşkilatçılığı altında törədilmişdir. Dəhşətlisi odur ki, Rüstəm Şahbazov hal-hazırda İqtisadiyyat Nazirliyi yanında Əmlak Məsələləri Dövlət Xidmətin sədr müavini vəzifəsində işlədiyi üçün, bu cinayətin üstünün açılmasına imkan vermir.
Torpaq İslahatı Haqqında Azərbaycan Respublikasının Qanununun müvafiq maddələrinin tələblərində bildirilir:
Maddə 9. Vətəndaşların qanuni istifadəsindəki torpaqların özəlləşdirilməsi zamanı vətəndaşların qanuni istifadəsindəki fərdi yaşayış evlərinin, həyətyanı sahələrin, fərdi, kollektiv və kooperativ bağların, dövlət bağçılıq təsərrüfatının idarəçiliyindəki bağların altında olan torpaqlar qanunvericiliklə müəyyən olunmuş qaydada əvəzsiz olaraq onların mülkiyyətinə verilir.
Qanunvericiliklə müəyyən olunmuş qaydada bağ evimin altında olan torpaq əvvəzsiz olaraq mənim mülkiyyətimə verilməli olduğu halda, o dövrdəki Əmlak Məsələləri Dövlət Komitəsinin rəhbərliyi - sədr müavini Rüstəm Şahbazov vəzifəsindən sui-istifadə edərək və vəzifə səlahiyyətlərinin hüdudlarından kənara çıxaraq, bir qrup qanunsuz qruplaşmalarla əlbir olub, mənim bağ evimin altındakı törpağı özgəninkiləşdirmiş və törətdikləri cinayətin üstünün gələcəkdə açılmaması üçün tez-tez digər şəxslərin adına özgəninkiləşdirmə əməliyyatı həyata keçirmişdir.
Bu faktları İqtisadiyyat Nazirliyi yanında Əmlak Məsələləri Dövlət Xidmətinin sədr müavini Rüstəm Şahbazovun, Azərbaycan Respublikasının Nazirlər Kobinetinin 22.11.2023-cü il tarixli, 3-21/1-A-7443-8/2023 saylı və 04.12.2023-cı il tarixli 3-21/2-A-7443/2-8/2023 saylı nömrələrlə İqtisadiyyat Nazirliyində qeydiyyata alınmış məktublarına verdiyi, 09 fevral 2024-cü il tarixli 3-21-3/2-A-1340/02-8/2023 nömrəli cavab məktub ilə təsdiq etmişdir. Belə ki, bağ evinin altında olan torpaq sahəsinin başqa-başqa şəxslərin adına özgəninkiləşdirildiyini bildirmişdir(Subut üçün məktubun ksersurətini əlavə edirəm).
Məlum məsələdir ki, Əmlak Məsələləri Dövlət Xidmətinin sədr müavini Rüstəm Şahbazov 30 ildən artıq mənim istifadəmdə və xüsusi mülkiyyətimdə olan bağ evinin altındakı torpağı ancaq maddi maraqları naminə, aldığı külli miqdarda rüşvətin müqabilində özgəninkiləşdirmişdir.

Cənab Prezident!
Hörmətli Mehriban xanım!
Yuxarıda qeyd etdiklərimi nəzərə alıb, mənə məxsus, xüsusi mülkiyyətimdə olan bağ evinin altındakı törpağın satılması faktı ilə bağlı, vəzifəsindən sui-istifadə edərək, vəzifə səlahiyyətlərinin hüdudlarından kənara çıxaraq, maddi maraqlarının təmin olunması müqabilində, bir qrup qanunsuz qruplaşmalarla əlbir olub, bu cinayəti törətmiş Rüstəm Şahbazovun və diğərlərinin qanun qarşısında cəzalandırılmaları üçün aidiyyəti qurumlara göstəriş verməyinizi və bu işi sona qədər nəzarətinizdə saxlamağınızi Sizlərdən xahiş edirəm.
Onu da qeyd edim ki, bu günə kimi sözügedən məsələ ilə əlaqədar bütün aidiyyəti dövlət qurumlarına müraciət etsəm də, heç bir tədbir görülməmişdir.
Qabaqcadan öz minnətdarlığımızı bildirirəm”.

Rüstəm Şahbazov
Məlumat üçün bildirək ki, sözügedən yazı saytımızda dərc olunduqdan sonra şikayətçi xanımın ailə üzvlərinə təzyiqlər edilib. Kəmalə Amanova bu haqda “Hürriyyət”ə ünvanladığı növbəti müraciətində yazır:
“Cənab Prezident!
Hörmətli Mehriban xanım!
Sizlərə etdiyim çoxsaylı müraciətlərimdən və sonuncu dəfə 24.02.2024-cü il tarixdə internet üzərindən, “Kərəm Həsənovun adı hallanan rüşvət qalmaqalı: Rüstəm Şahbazov başqasının sənədli torpağını necə satıb…” başlığı altında yayımlanan şikayətimizdən sonra bəzi məmurlar tərəfindən himayədarlıq olunan mütəşşəkil birlik hərəkətə keçmiş, bizim 30 ildən artıq müddətdir istifadəmizdə və 2005-ci ildən xüsusi mülkiyyətimdə olan Suraxanı Rayonu Hövsan Qəsəbəsində yerləşən evim, evimin həyətində tikilmiş çardaq, evimin həyətində ayrıca tikilmiş mətbəx və maşın qarajı talan edilmişdir.
Təlimatlandırılmış cinayətkar dəstə əmlaklarımızi talan etdikdən sonra törətdikləri cinayətin izini itirmək məqsədilə sözügedən əmlaklarımızı üçürdaraq məhv etmişlər.
Cənab Prezident!
Hörmətli Mehriban xanım!
Hesab edirəm ki, bizə qarşı yuxarıda adları qeyd edilən məmurların qanunsuz hərəkətlərindən Sizlərə şikayət etməklə heç bir qanun pozuntusuna yol verməmişəm, dövlətə və dövlətçiliyə qarşı heç bir cinayət törətməmişəm. Təlimatlandırılmış birlik - dəstə tərəfindən əmlaklarımızın talan edilməsi və sonda da izi itirmək məqsədilə məhv edilməsi, mənə, ailəmə və əmlakımıza qarşı seçilmiş bu cür cəza növünün hansı niyyət və məqsədlə törədildiyi bizə məlum deyildir. Qeyd edilən bu cinayət hadisəsinin baş vermə səbəblərinin müəyyən edilməsinə, davam edən cinayətin qarşısının alınmasına və həmin şəxslərin qanunsuz əməllərinə hüquqi qiymət verilməsinə göstəriş verməyinizi Sizdən xahiş edirik.
Cənab Prezident!
Hörmətli Mehriban xanım!
Qeyd etdiyim kimi, mən Sizlərə olan müraciətlərimdə heç bir qanun pozuntusuna yol verməmişəm. Lakin hesab edirik ki, bu haqda Sizlərə məlumat verdiyimizə görə, əmlakımı talan və məhv etdirməklə bizi “cəzalandırırlar”. Məqsədləri haqqımızı tələb etməkdən, məmurların qanunsuz hərəkətləri barədə Sizlərə məlumat verməkdən bu cür qanunsuz yollarla qorxudub, çəkindirməkdirsə, bilsinlər və agah olsunlar ki, onlardan qorxmayacaq və qətiyyən çəkinməyəcəyik.
Cənab Prezident!
Hörmətli Mehriban xanım!
Törədilmiş cinayət barədə Azərbaycan Respublikası Daxili İşlər Nazirliyinə, Azərbaycan Respublikası Baş Prokurorluğuna və aidiyyəti dövlət qurumlarına teleqramlar vurmuşam və müraciət etmişəm. Cinayətin üstünün açılmasını, sifarişçilərin və cinayətin iştirakçılarının müəyyənləşdirilib cinayət məsuliyyətinə cəlb edilmələrini və əmlakıma vurulmuş zərərin ödənilməsini xahiş etmişəm.
Sizə etdiyimiz bu müraciətimizdən sonra ailəmə, mənə və əmlakıma qarşı daha nələr baş verəcək, hansı cinayət əməlləri törədiləcək, onu bilmirik! Sizlərdən xahiş edirəm ki, yuxarıda qeyd etdiklərimi nəzərə alıb, törədilmiş cinayətin sifarişçılərinin və icraçılarının müəyyənləşdirilib cinayət məsuliyyətinə cəlb edilmələrinə və mənə vurulmuş zərərin ödənilməsi ilə bağlı aidiyyəti qurumlara göstəriş verəsiniz və cinayət hadisəsinə ədalətli hüquqi qiymət verilənə qədər nəzarətinizdə saxlayasınız.
Qabaqcadan öz minnətdarlığımı bildirirəm”.
Hazırladı: KƏNAN
Redaksiyadan: Yazıda adları qeyd olunan şəxslərin və qurumların mövqeyini dərc etməyə hazırıq.

Azərbaycan Respublikası İpoteka və Kredit Zəmanət Fondunun İdarə Heyətinin sədri Fəxri Kazımov yaxın zamanlarda vəzifəsindən azad ediləcək...

Bu barədə AzFakt.com-un əldə etdiyi məlumatda bildirilir.

Məlumata görə Fəxri Kazımovun vəzifədən çıxarılmasına səbəb İpoteka və Kredit Zəmanət Fondunun fəaliyyətinin qənaətbəxş olmaması və qurumdan İqtisadiyyat nazirliyinə, Prezident Administrasiyasına ünvanlanan çoxsaylı şikayətlərdir.

İpoteka və Kredit Zəmanət Fondunun fəaliyyətindən Milli Bankın İdarə Heyətinin sədri Taleh Kazımovun da narazı olduğu bildirilir.

Taleh Kazımov formalaşdırdığı yeni sistemdə Fəxri Kazımovu görmək istəmir.

Məlumatda Fəxri Kazımovun vəzifədən çıxarılmaması üçün Fondun Himayəçilik Şurasının sədri, İqtisadiyyat nazirinin birinci müavini Elnur Əliyevə və Milli Bankın İdarə Heyətinin sədri Taleh Kazımova nüfuzlu şəxsləri minnətçi saldığı iddia edilir.

Qeyd edək ki, İpoteka və Kredit Zəmanət Fondundan əsas şikayətçi olan kateqoriya evsiz və aztəminatlı ailələrdir. Bu şəxslər əsasən “Elektron ipoteka və kredit zəmanət” sisteminin “kirayə mənzillərin” alışının elektron sistemindən narazılıq edirlər.

İpoteka və Kredit Zəmanət Fondu “Elektron ipoteka” sisteminin yaradılması üçün “CyberNet” və “GT Solution” şirkətinə indiyədək ümumilikdə 9 milyon manat ödəyib.

Xatırladaq ki, Fəxri Kazımov 2008-ci ildən İpoteka Fonduna rəhbərlik edir

Poliqon.info

2024-cü ilin fevral ayında istehlak qiymətləri indeksi 2023-cü ilin fevral ayına nisbətən 100,8 faiz, o cümlədən qida məhsulları, içkilər və tütün məmulatları üzrə 99,7 faiz, qeyri-qida məhsulları üzrə 101,4 faiz, əhaliyə göstərilmiş ödənişli xidmətlər üzrə 102,3 faiz təşkil edib.

Bu barədə Dövlət Statistika Komitəsi (DSK) məlumat yayıb.

Bildirilib ki, 2024-cü ilin fevral ayında istehlak qiymətləri indeksi əvvəlki aya nisbətən 100,6 faiz, yanvar-fevral aylarında isə əvvəlki ilin müvafiq dövrünə nisbətən 101,3 faiz təşkil edib.

2024-cü ilin fevral ayında qida məhsulları, içkilər və tütün məmulatları üzrə istehlak qiymətləri indeksi əvvəlki aya nisbətən 100,7 faiz, yanvar-fevral aylarında isə əvvəlki ilin müvafiq dövrünə nisbətən 100,2 faiz təşkil edib.

Cari ilin fevral ayında əvvəlki aya nisbətən ayrı-ayrı qida məhsullarından daha çox bahalaşma düyünün, qoyun ətinin, təzə balığın, kəsmiyin, kərə və zeytun yağının, naringinin, bananın, almanın, armudun, heyvanın, narın, kələmin, xiyarın, pomidorun, balqabağın, çuğundurun, sarımsağın, soğanın, şəkərin, arağın, ucuzlaşma isə əsasən qarabaşaq yarmasının, yumurtanın, süfrə marqarininin, günəbaxan və qarğıdalı yağlarının, portağalın, yerkökünün qiymətlərində müşahidə olunub.

Digər qida məhsullarının qiymətlərində ciddi dəyişikliklər baş verməyib.

2024-cü ilin fevral ayında qeyri-qida malları üzrə istehlak qiymətləri indeksi əvvəlki aya nisbətən 100,1 faiz, yanvar-fevral aylarında isə əvvəlki ilin müvafiq dövrünə nisbətən 101,6 faiz təşkil edib.

Fevral ayında əvvəlki ayla müqayisədə qeyri-qida məhsullarından bahalaşma əsasən plastik pəncərələrin, kəsilmiş taxtaların, ucuzlaşma isə mobil telefonların və yazı kağızlarının qiymətlərində müşahidə olunub. Digər qeyri-qida məhsullarının qiymətlərində ciddi dəyişikliklər baş verməyib.

Maraqlıdır, Novruz bayramında bu məhsulların qiyməti yenidən artacaq?

Mövzu ilə bağlı iqtisadçı-ekspert Vüqar Qocayev açıqlamasında bildirib ki, bəzi ərzaq məhsulların qiyməti süni şəkildə artırılır:

“Bura tütün məmulatlarını və spirtli içkiləri əlavə etmək olar. Zərərli vərdişlərə səbəb olan məhsulların qiyməti bilərəkdən artırılır ki, istifadəçi sayında azalma baş versin. Lakin bu praktika indiyədək özünü doğrultmayıb. Çünki zərərli vərdişləri olan şəxs və ya şəxslər qiymətindən aslı olmayaraq o məhsuldan istifadə edəcəklər. Hazırda qiymət artımının əsas səbəbi insarçılıqdır. İnsarçılığın yaranma səbəbi azad rəqəbat mühitinin olmamasıdır”.

Ekpert vurğulayıb ki, ən çox qiyməti yüksələn məhsuldan biri də ət və ət məhsullarıdır:

“Son bir il ərzində istehlak bazarında quzu və dana ətinin qiyməti rekord həddə artıb. Hər ay ətin qiymətində 50 qəpik və ya 1 manat arasında dəyişiklik olur. Bunun da səbəbi heyvandarlığın yem bazasının azalmasıdır. Məhz Azərbaycanda heyvandarlığın inkişafı üçün zəruri heç bir addım atlımır.

Ekspert qeyd edib ki, gömrük güzəştləri olmasa, ərzaq məhsulların qiymətləri yenidən artacaq:

“Ölkədə bahalaşmanın əsas səbəblərində biri də gömrükdə vergi güzəştinin aşağı səviyyədə olmasıdır. Sahibkarlar ödənilən vergi məbləğinin yüksək olmasından narazıdır. Hazırda bu sahədə hansısa bir vergi güzəştləri gözlənilmir”.(Cebhe)

Respublika Diaqnostika Mərkəzi" ASC-nin direktoru Oqtay Şirəliyev səhiyyə nazirinin sabiq müavininə vəzifə verib.

Qaynarinfo-nun əldə etdiyi məlumata görə, Oqtay Şirəliyevin müaviq əmri ilə Viktor Qasımov "Respublika Diaqnostika Mərkəzi" ASC-nin ümumi şöbəsinin müdiri və direktorun köməkçisi təyin edilib.

Viktor Qasımov saytımıza açıqlamasında xəbəri təsdiqləyib: "Təqaüddəyəm. Həm də tibb sahəsində - "Respublika Diaqnostika Mərkəzi" ASC-də fəaliyyətimi davam etdirirəm".

Qeyd edək ki, Oqtay Şirəliyev 2005-2021-ci illər səhiyyə naziri olub. Viktor Qasımov isə 2020-2022-ci illərdə nazir müavini vəzifəsini tutub.

Bakı Hərbi Məhkəməsində hakim Camal Ramazanovun sədrliyi ilə Müdafiə Nazirliyinin Hərbi Polis İdarəsinin və bir neçə hərbi hissənin maliyyə-xidmət rəisi işləmiş Sadiq Hacıyevin cinayət işi üzrə məhkəmə prosesi keçirilir.

Musavat.com xəbər verir ki, prosesdə prokuror təqsirləndirilən şəxsin barəsində seçilmiş qətimkan tədbirinin qüvvədə saxlanılmasını, işin baxışa təyin edilməsini istəyib.

Təqsirləndirilən şəxs və onun müdafiəçi işin məhkəmə baxışına verilməsinə razı olduqlarını deyiblər. Hakimlər cinayət işinin məhkəmə baxışına verilməsi barədə qərar qəbul ediblər. Maliyyə Nazirliyinin apardığı yoxlamalar zamanı Sadiq Hacıyevin 1.5 milyon manat mənimsədiyi məlum olub . Ona qarşı Cinayət Məcəlləsinin 179.4-cü (xüsusilə külli miqdarda mənimsəmə) maddəsi ilə ittiham verilib.

Xatırladaq ki, Sadiq Hacıyev Maliyyə və Büdcə İdarəsinin sabiq rəisi general Nizami Məmmədov və digərləri barəsində olan 143 milyon manatlıq mənimsəmə ilə bağlı keçirilən məhkəmədə şahid qismində keçir. O, həmin iş üzrə prosesdə dindirilərkən bildirib ki, işlədiyi müddətdə maliyyə hesabatına köçürülən şişirdilmiş məbləğlərin 40 faizini özünə götürüb, 60 faizini isə rəhbərliyə verib. Məhkəmə ifadə verərkən Sadiq Hacıyev qanunsuz tapşırıqları işlədiyi hərbi hissənin tabe olduğu korpusun maliyyə şöbəsinin rəisindən aldığını gizlətməmişdi.

“Mən özbaşına qanunsuzluq etməmişəm. 1 milyondan çox vəsaiti mənimsədiyim iddia olunur. Bu rəqəmlə razı deyiləm. Çünki bu qədər pulu görməmişəm. Maliyyə sənədləri məhv edilib, təəssüf ki, bunu yoxlama aparan şəxslərə sübut edə bilməmişəm. Evini, maşınımı satışa qoymuşam. Hələ ki, satış baş tutmayıb deyə, ziyanı ödəyə bilmirəm”, – deyə bildirmişdi.

Proses martın 18-də davam etdiriləcək.

“Naxçıvandakı siyasi dəyişiklikdən sonra son bir ildə 51 min nəfər öz iş yerini itirib. Dövlət Statistika Komitəsinin rəsmi rəqəmlərindən bu nəticəyə gəlmək olar. Bağlanan iş yerlərinin demək olar ki, hamısı vaxtilə keçmiş hakim ailə Talıbovlara məxsus olmuş özəl sektorun payına düşür. 2023-cü ilin əvvəlində Naxçıvanda baş verən siyasi dəyişiklikdən sonra Talıbovlara məxsus bütün müəssisələr ailənin əlindən alındı və tədricən fəaliyyətini dayandırdı. Yeni iş yerləri haqda isə düşünən olmadı”. Bu barədə “Gündəlik Naxçıvan” yazır.

Bildirilir ki, daxili intriqalardan ən çox əziyyət çəkən yerli əhalidir. İş yerini itirmiş 51 min nəfərin az qala yarısı vətəndən didərgin düşüb, Bakıda, Türkiyədə, yaxud da başqa xarici ölkələrdə iş axtarmağa məcbur olub.

Şərur rayon sakini Rafiq İbrahimov deyib ki, son bir ildə təkcə onun tanıdığı 10-larla şəxs iş axtarmaq üçün Naxçıvanı tərk edib. Köçənlər arasında onun qardaşı da var: “Qardaşım "Nəqşicahan Holdinq"də fəhlə işləyirdi. Siyasi dəyişiklikdən 2 ay sonra iş yoxdur deyib, ixtisara saldılar. Haraya üz tutdusa, işlə təmin olunmadı, şikayətinə baxan olmadı. 7 ay işsiz qaldı və əlacsızlıqdan, ailəsinə çörəkpulu qazanmaq üçün bir ay əvvəl Türkiyəyə işləmək üçün getdi".

Vaxtilə “Gəmiqaya Holdinq”də fəhlə işləmiş Babək rayon sakini Nəcəf Qasımlı da işsizlikdən Naxçıvanı tərk etməyə məcbur olduğunu deyib. Onun sözlərinə görə, son aylarda 500 nəfərə yaxın nehrəmli Türkiyəyə iş axtarmağa gedib.

Hesablamalara görə, sayı 500 min olan Naxçıvan əhalisinin təxminən yarısı 30 ilə yaxın davam etmiş Talıbov idarəçiliyindən qaçaraq, vətənini tərk etmişdi. Siyasi dəyişiklikdən sonra belə bir ümid yaranmışdı ki, iqtisadi rəqabət mühiti yaxşılaşacaq, siyasi yumşalma olacaq və əhali geri dönəcək.

Lakin qeyd olunanlardan belə görünür ki, bu ümidlər hələ ki doğrulmur. O zaman çıxış yolu nədir? Nələr edilməlidir?

Naxçıvanlı siyasətçi, Milli Dirçəliş Hərəkatı Partiyasının sədri Fərəc Quliyev “Yeni Müsavat”a bildirdi ki, Vasif Talıbovun zamanında qurulmuş sistemin dəyişdirilməsi müəyyən zaman tələb edir və həmin sistemin dəyişməsi prosesi istər-istəməz problemlər meydana çıxarmalı idi: “Əsas məsələ odur ki, həmin problemlər mümkün qədər tez həll edilsin. Naxçıvanda çox dərin bir böhran yaradılmışdı. Mən indiyə qədər də təəccüblənirəm ki, Vasif Talıbov və onun çevrəsi layiq olduğu hüquqi cəzasını niyə almayıb. Ən azından belə fikirlər var idi ki, 3 milyard dollar civarında Suriyadakı Kürdüstan bölgəsində neftayırma zavodlarına vəsait qoyulmuşdu. Bu, təbii ki, oğurluq vəsait idi. İranda müştərək müəssisələr yaradılmışdı. Oraya da çox nəhəng məbləğdə pullar sərf edilmişdi. Bütün bu milyardlarla vəsait Naxçıvanın inkişafına yönəldilmək əvəzinə, kənar yerlərə yerləşdirilmişdi. Naxçıvanın daxilində isə monopoliya o həddə idi ki, Talıbovlar və yaxın ətraflarından başqa heç kim orada müəssisə-filan aça bilmirdi. Bir zamanlar açılan müəssisələri isə bağlamışdılar. Heç kim sərbəst şəkildə fəaliyyət göstərə bilmirdi. İndi bütün bu qanunsuzluqların araşdırılması şübhəsiz ki, getməlidir. Və bu zaman qanunsuz fəaliyyət göstərən hansısa müəssisələrin müəyyən müddətdə fəaliyyətinin dayandırılması normaldır. Ancaq bununla paralel olaraq insanların iş yerləri ilə təminatı istiqamətində ciddi addımlar atılmalıdır. Naxçıvan əslində blokadadır. Zəngəzur dəhlizi məsələsi həll olunsaydı, Naxçıvanın inkişafı, əhalisinin iqtisadi vəziyyətinin yaxşılaşdırılması istiqamətində işlər sürətlə gedərdi. Naxçıvanın potensialı var və bu potensialdan istifadə edilməsi üçün yerli hakimiyyətin proqramları var. Yaxşı fikirləri, ideyaları var, vizion doğrudur. Amma bu ideyaların, proqramların praktiki həyata keçirilməsində müəyyən gecikmələr var. Çox ciddi potensial var ki, dərhal istifadə eləmək mümkündür. Ordubadda qızıl mədənləri var və fəaliyyət göstərirdi. Vasif Talıbov oranı bağlatdırmışdı. Bu cür yerləri işə salmaq mümkündür. Naxçıvanın hər rayonunda emal zavodları açılsa, xeyli insanların məşğulluğu təmin edilmiş olar. Eləcə də dondurucu anbarlar yaradılsa, əhalinin kənd təsərrüfatı ilə məşğul olması üçün imkanlar açılar. Camaat məhsul istehsal etməkdə maraqlı olar və qazanc əldə edər. Nəticədə Naxçıvanda bolluq yaranar, ixracat imkanları da meydana gələr. Gömrük tariflərinə də baxıla bilər. İş qurmaq istəyən sahibkarlara, xüsusən də kiçik və orta bizneslə məşğul olmaq istəyənlərə vergi güzəştləri tətbiq edilməlidir. Uyğun şərtlərlə kreditlər verilməlidir. Naxçıvanın turizm imkanları işə salınmalıdır”.

F.Quliyev hesab edir ki, Vasif Talıbova aid olduğu deyilən böyük müəssisələri uzun müddətə bağlamaq lazım deyil. Onlar qanuni formada fəaliyyət göstərməlidir: “Həmin müəssisələr dövlətdən əldə edilmiş qanunsuz vəsaitlərlə yaradılıb. Ona görə də həmin müəssisələr dövlətin əmlakı olaraq sənədləşdirilməlidir və həmin müəssisələr fəaliyyət göstərməlidir ki, insanlar orada işləsinlər. Zatən Naxçıvanda əhali az idi. Elə etmək lazımdır ki, əhalinin sayı daha da azalmasın, insanlar Naxçıvandan köçməsinlər, gedənlər isə geri qayıtsınlar. Prezidentin Naxçıvana təyin etdiyi xüsusi nümayəndə və onun ətrafındakı komanda dürüst insanlardır. Sadəcə, bir az tələsmək, işləri sürətləndirmək lazımdır. Hara imkan varsa, dərhal oraya əl atmaq lazımdır. Naxçıvanın böyük potensialı işə salınsa, heç kim iş üçün kənara getməz”.

“Bakı xəbər” qəzetinin baş redaktoru Aydın Quliyev isə bildirdi ki, Talıbovdan sonra iş yerlərinin ixtusara düşməsi əsasən tikinti sektorundakı proseslə bağlıdır. İşləyənlərin mütləq çoxu tukintilərdə fəhlə işləyirdi. Talıbovdan sonra tikintilər dayandı, çünki tukintilərə vəsait ayrılmadı: “Bu sadə izahı Naxçıvanda hər kəs bilir. Niyə vəsait ayrılmadı? Bunu Naxçıvanın indiki rəhbərliyi bilir və bilməlidir.
Naxçıvandan bir nəfər dövlət məmuru iş dalınca Türkiyəyə köçməyib, oturub dövlət təşkilatında əvvəlki kimi maaşını alır. Ancaq zərbə büsbütün Talıbovların inşaat meydançalarında işləyən fəhlə qisminə dəydi. İxtisara düşmüş 52 min iş yerinin mütləq çoxunda bu adamlar işləyirdi.

Naxçıvanda 500 min əhalinin yaşadığı barədə qeyd olunan rəqəm yanlış rəqəmdir. Kim hardan alıb bu rəqəmi? Sovet dövründə orada əhali 360 mindən çox deyildi. Sonra əhali artsa da, bu artımdan 10 dəfələrlə çox adam Naxçıvanı tərk etdi. İndi orada 500 min adam necə qala bilər?! Bu tam yanlışdır. Naxçıvanda işləyən əhali ən çoxu 100-110 min nəfər olardı-olmazdı. İndi bunun 52 mininin işi bağlanıb. Talıbovların dövründə bu 52 minin 35- 40 mini yəqin ki, tikintilərdə fəhləlik edirdi, qalanları isə şirkətlərin ofislərində inzibati heyəti təmsil edirdilər.

Vəziyət ürəkaçan deyil. Naxçıvanın indiki rəhbərliyi təşəbbüskarlığı artırmalıdır, müvafiq instansiyalar qarşısında məsələ qaldırmalıdır. Oradakı bütün məsuliyyət onun üzərindədir. Naxçıvanda bir yanlış mülahizə dolaşır. Görünür ki, kimlərsə fikir yayır ki, Naxçıvanın builki büdcəsinin dotasiya hissəsi 100 milyon manatdan çox ixtisar edildiyi üçün ağır vəziyyət və işsizlik buradan qaynaqlanır. Dotasiyadan 100 milyon hissə həqiqətən kəsilib. Ancaq problemi bunun üstünə atmaq olmaz. Hamı bilir ki, bu 100 milyonluq hissə təxminən Talıbovların şişirtdiyi hissə idi. Bunu nə üçün şişirtmişdilər, bəllidir .

Yerdə qalan hissə ilə də Naxçıvan üçün böyük iş görmək olar. Heç kim məsuliyyəti başqalarının üsrünə atmasın. O camaat ağır dövrlərdə Heydər Əliyevin yanından çəkilməyən toplum olub. Onlara qarşı düşünülmüş laqeydlik etmək olmaz”.