“Bu küçənin yolları o qədər bərbad haldadır ki, yerimək mümkünsüz olub. Günlər əvvəl yağan qar, yağışın fəsadları hələ də qalıb. Yaranan su gölməçələri qurumayıb”.

Bu şikayətlə “Qafqazinfo”ya Binəqədi rayonu, Biləcəri qəsəbəsi Məlik Aslanov küçəsi 6 və 11-ci döngənin bir qrup sakini müraciət edib.

Buraya 4 ay əvvəl köçən vətəndaş Nərminə Hüseynova deyir ki, yolun bu vəziyyətdə olmağı yaşlı və uşaqların küçəyə çıxmasına mane olur: “Övladlarımı məktəbə aparıb-gətirə bilmirəm. Küçəyə çıxan kimi adam palçığa batır. Kələ-kötür yollarda yerimək mümkün deyil. Onları məktəbə servis maşını aparır. O da gərək yolu fırlanıb gəlib düz qapıda dayansın. Əks halda uşaqlar qapıdan çölə bir addım atsalar, palçığa batacaqlar. Küçədə kanalizasiya xətti də yoxdur. Dəfələrlə müraciət etmişik. Nə maraqlanan var, nə də gəlib çarə tapan”.

Sakinlərin sözlərinə görə, 1994-cü ildə şəhid olan Teymur Yaqubovun anası Cənnət Yaqubova da bu ərazidə yaşayır: “Cənnət xala, artıq 3 ildir burada yaşayır. Bir neçə gün əvvəl kələ-kötür yollarda yeriyərkən yıxılaraq ayağını əzib. O da şikayət edib”.

Binəqədi rayonunun Firdovsi Vəliyev küçəsinin sakinləri də eyni problemdən əziyyət çəkir. Belə ki, yollardakı bənzər mənzərəyə bu küçənin dalanlarında da rast gəlmək mümkündür. Sakinlər bildirir ki, yollar uzun müddətdir dağılıb: “Çox çətinlik çəkirik. Təxminən 7-8 ildir eyni problem davam edir. Yağış yağdıqda isə vəziyyət daha da acınacaqlı olur. İstəyirik ki, bu yollara asfalt çəkilsin”.

F.Vəliyev küçəsində yol problemi ilə yanaşı, məişət tullantılarının daşınması ilə bağlı da xoşagəlməz vəziyyət yaranıb. Ərazidə konteynerlərin yerləşdirilməməsi səbəbindən bir çox sakin tullantıları küçəyə atır. Bu da antisanitar vəziyyətə səbəb olur.

Hər üç məsələ ilə bağlı Binəqədi Rayon İcra Hakimiyyətinə sorğu ünvanladıq. Qurumdan müraciətimizə belə cavab verildi: “Məlumat üçün bildirək ki, qeyd edilən ünvanda yolların əsaslı təmir edilməsi Binəqədi rayonu ərazisində asfaltlanmasına ehtiyac duyulan qəsəbədaxili yolların tərəfimizdən tərtib edilən siyahısına daxil edilib, bu məqsədlə aidiyyəti qurumlara müraciət edilib. Eyni zamanda vətəndaşlara yolların mərhələli qaydada əsaslı təmir olunacağı ilə bağlı müvafiq izahat verilib.

Sözügedən ünvanda məişət tullantıları konteynerlərinin yerləşdirilməsi ilə bağlı bildirmək istəyirik ki, ərazidə yaxın ünvanlarda konteynerlər mövcuddur. Lakin qeyd etdiyiniz ünvana sakinlərin razılığı ilə münasib yer müəyyən edilərsə, konteynerlər deyilən ünvana yerləşdirilə bilər”.

Kanalizasiya xətlərinin çəkilməsi ilə bağlı isə İcra Hakimiyyətindən bildirildi ki, sakinlərin şikayətinə əsasən, “Azərsu” ASC-yə müraciət olunub: “Aidiyyəti qurum tərəfindən həmin ərazidə yeni xətlərin çəkilməsi məqsədilə layihələndirmə işlərinin başlanıldığı və problemin aradan qaldırılması istiqamətində işlərin görüləcəyi barədə məlumat verilib”.

Zaqatala rayon İcra Hakimiyyətinin başçısı yaxın günlərdə vəzifəsindən azad ediləcək.

Bu barədə Qlobal.az-ın əldə etdiyi məlumatda deyilir.

Məlumata görə Zaqatala rayon İcra Hakimiyyətinin başçısı Mübariz Əhmədzadənin vəzifədən çıxarılmasına səbəb Zaqatala rayonunun sosial-iqtisadi inkişafdan geri qalmasıdır.

On beş ildir Zaqatalaya rəhbərlik edən Mübariz Əhmədzadənin ancaq öz biznes imperiyasının genişləndirdiyi deyilir.

Qaxda “El Resort” otel kompleksi, Qax İlisu kəndində “Yurd Hotel” istirahət kompleksi, İlisu kəndində “Yaşıl Park” otel kompleksi, “Səngər Qala” otel kompleksi, “Ulu Dag” oteli, Qax Fındıq Zavodu, Qax rayon taxıl məhsulları kombinatı, Eden Park Hotel Qax, Qaxbaş kəndində 54700 kv metrlik (5.5 hektar) ərazisi olan “Residence” ailəvi istirahət mərkəzi, Bakıda Koroğlu Rəhimov küçəsindəki “Növbahar” və “Zakura Yapon mətbəxi” restoranının Mübariz Əhmədova məxsus olduğu iddia edilir.

Hazırda 77 yaşı olan icra başçısının əhali ilə görüşə mütəmadi olaraq getmədiyi də xəbərlər arasında yer alır.

Qeyd edək ki, Mübariz Əhmədzadə Meliorasiya və Su Təsərrüfatı Açıq Səhmdar Cəmiyyətinin keçmiş sədri Əhməd Əhmədzadənin qardaşıdır.

Mediada yazılan xəbərlərə görə Əhmədzadələrin Avropada dəyəri on milyonlarla ölçülən biznes şəbəkələri var.

Ölkədə və Avropadakı biznesləri barədə yayılan məlumatlar Əhmədzadələr tərəfindən təkzib edilməyib.

Xatırladaq ki, Mübariz Əhmədzadə 2009-cu ildən Zaqatala rayon İcra Hakimiyyətinin başçısıdır.

 

“Elm və Təfəkkür Universiteti”nin prorektoru Tariyel Əhmədovun öldürülməsində təqsirləndirilən Müşviq Atakişiyev, Dəyanət Quliyev və Samir Quliyevin cinayət işi üzrə növbəti məhkəmə prosesi keçirilib.

Bu gün Bakı Ağır Cinayətlər Məhkəməsində hakim Siyavuş Hacıyevin sədrliyi ilə keçirilən prosesdə şahidlər ifadə verib. Təqsirləndirilən Samir Quliyevin anası Məlahət Quliyeva bildirib ki, oğlunun heç bir günahı yoxdur: “Samir oğlumdur. Dəyanət Quliyev isə yaxın qonşumuz olub. Mənim oğlum heç bir cinayət törətməyib. Təqsirləndirilən Dəyanət Quliyev tutulandan xeyli sonra Samirin narahat olduğunu gördüm. Səbəbini ondan soruşduqda dedi ki, bu hadisəni mən törətmişəm. Mənə hadisənin təfərrüatlarını danışdı. Öz növbəmdə onu tənbeh etdim. Bildirdi ki, Dəyanət bu işi törətməyə görə Samirə ev verəcəyini və həmişə maddi sıxıntılarını qarşılayacağını söz verib. Lakin Dəyanət Quliyev bu vədlərin heç birini yerinə yetirmədi".

Şahid Mirdamət Tanrıverdiyev bildirib ki, Tariyel Əhmədovla çox yaxın münasibətləri olub: "Onunla sonuncu dəfə telefonla danışmışam. Həmişə bağ evinə gələrdi dərdləşərdik. O işindəki ab-hava ilə bağlı narazılıq edirdi. Deyirdi ki, sözümə baxmırlar. Hadisəni mənə mərhumun kürəkəni Babək məlumat verdi. Hadisə yerinə gəlib gördüm ki, bu yıxılmağa oxşamır, çünki üz-gözü qan içində idi ".

Proses fevralın 21-də davam etdiriləcək.

Azərbaycan böyük bir siyasi prosesi - növbədənkənar prezident seçkilərini geridə qoydu. İlham Əliyev növbəti müddətə ölkənin idarəetmə sükanının arxasına keçdi. İndi hamını maraqlandıran məsələ seçkidən sonra ölkədə hansı dəyişikliklərin baş verəcəyidir.
Əslində, bu dəyişikliklərin anonsu seçkidən xeyli əvvəl edilib. Özü də dövlət başçısı tərəfindən. 2022-ci ilin aprelində ADA Universitetində "Cənubi Qafqaz: İnkişaf və əməkdaşlıq" mövzusunda keçirilən beynəlxalq konfransdakı çıxışı zamanı mövcud idarəçilik sistemi haqqında danışan Prezident İlham Əliyev demişdi:
"Mənim Qarabağ və Şuşa üzrə xüsusi nümayəndələrim var. Digər ərazilər üçün də xüsusi nümayəndələr təyin ediləcək, onların hələlik təyin edilməməsinin səbəbi orada hələ ki, fəal yerləşmə prosesinin aparılmaması ilə əlaqədardır, amma bu da olacaq. Biz, bu yeni idarəçilik modelini sınaqdan keçiririk. Çünki mövcud regional idarəçilik sistemi Sovet İttifaqının çökməsindən sonra yaradılıb və fikirləşirəm ki, bu, o qədər də hərtərəfli düşünülməmişdir. Buna görə də çoxlu suallar var".

Yeni idarəçilik sisteminin tətbiq ediləməsinin səbəblərindən danışan dövlət başçısı bir neçə faktoru irəli çəkmişdi. Bunlar idarəçilik sistemini təkmilləşdirmək, rüşvət və korrupsiya hallarının qarşısını almaq, qərarların icrası vəziyyətini yaxşılaşdırmaqdan ibarət idi:
"Çoxlu, bəlkə də 10-dan çox regional rəhbər şəxslər rüşvət, səhv idarəçilik və digər yanlış hərəkətlərə görə həbs olunub. Bu proses ictimai şəkildə baş verib, rüşvət prosesi videoya çəkilib. Təəssüf ki, bu sahə korrupsiya ilə çirklənib. Beləliklə, Qarabağda sınaqdan keçirdiyimiz yeni sistem fərqli olacaq və düşünürəm ki, yekun sınaqlar bitəndən sonra bu sistemi Azərbaycanın digər ərazilərinə də tətbiq etmək və regionlarda dövlət idarəçiliyini təkmilləşdirmək mümkün olacaq. Çünki Bakıda qəbul etdiyimiz qərarların hamısı insanların həyat şəraitinin və infrastrukturun yaxşılaşdırılması, iqtisadi inkişaf məqsədi daşıyır, amma bəzən onlar regionlarda icra edilmir və insanlar bunu görmür".
Dövlət başçısının bu çıxışından idarəetmə sistemində ediləcək dəyişikliklərin konturları aydın görünür. Bəlli olur ki, dəyişikliklərin bir qismi yerli icra hakimiyyəti orqanları ilə bağlı olacaq. Başqa sözlə, mövcud icra hakimiyyətləri ləğv edilcək, onlar xüsusi nümayəndəliklərlə əvəz olunacaq. Xüsusi nümayəndəliklərdə isə Qarabağ variantında olduğu iqtisadi rayonlar üzrə yaradılacaq. Başqa sözlə, hər xüsusi nümayəndə 4-5 rayona nəzarət edəcək.
Eyni zamanda ləğv ediləcək mövcud rayon icra hakimiyyətlərinin bir sıra səlahiyyətlərinin yerli özünüidarəetmə orqanlarına veriləcəyi gözlənilir.
Sözsüz ki, icra hakimiyyəti sistemindəki dəyişikliklər yalnız regionlarla yekunlaşmayacaq. Bu baxımdan tez-tez gündəmə gələn Nazirlər Kabineti ilə bağlı məsələnin aktuallaşacağı da gözləniləndir. Başqa sözlə, hazırda bir çox səlahiyyətləri əlindən alınan Nazirlər Kabinetinin ləğvi çox da uzaq perspektivin hadisəsi olmayacaq. Əvəzində prezidentin səlahiyyətləri daha da genişlənəcək, nazirlər Baş nazirə deyil, birbaşa ölkə başçısına tabe olacaqlar. Qeyd edək ki, bu sistem 2018-ci ildən qardaş Türkiyədə də tətbiq olunur.

Nazirlər Kabinetinin ləğvi hazırda onun rəhbərliyində təmsil olunan bir sıra şəxslərin öz vəzifələri ilə vidalaşmasına səbəb olacaq. Sözsüz ki, söhbət ilk növbədə hazırkı baş nazir Əli Əsədov, onun müavinləri Şahin Mustafayev, Əli Əhmədov və Yaqub Eyyubovdan gedir. Adi çəkilənlərin bəziləri təqaüdə göndəriləcək, Əli Əhmədov və Şahin Mustafayevin isə digər vəzifələrə təyin olunacağı ehtimal edilir.
Hazırki İqtisadiyyat naziri Mikayıl Cabbarovun isə vitse-prezident və ya iqtisadi məsələlər üzrə xüsusi nümayəndə təyin olunacağı gözlənilir.
Dəyişikliklərin eyni zamanda qanunverici hakimiyyət orqanında - Milli Məclisdə də aparılacağı söylənilir. Belə ki, parlamentin tərkibinin genişləndiriləcəyi, millət vəkili mandatının sayının 200-dən çox olacağı bildirilir. Həmçinin seçkilərin iki - həm proporsional, həm də majoritar qayda üzrə keçiriləcəyi gözlənilir.

Bütün bunlar əlbəttə, böyük siyasi dəyişikliklərdir və bunları həyata keçirmək üçün öncə ümumxalq səsverməsi - referendum keçirilməlidir. Nəzərə alsaq ki, payızda həm parlament, həm də bələdiyyə seçkiləri keçiriləcək, o zaman referendumun yaz aylarında keçiriləcəyi xeyli real görünür.

BakuPost

Cəlilabad rayon sakini Məmmədov Fərid Oqtay oğlu tərəfindən “Hürriyyət”in redaksiyasına şikayət məktubu daxil olub. Şikayətçi iddia edir ki, anasını saxta sənədlərlə aldadıb, torpağını əlindən alıblar:

“Mən, Məmmədov Fərid Oqtay oğlu, yazaraq sizdən xahiş edirəm ki, problemimi işıqlandırasınız.

Cəlilabad rayonu Qarazəncir, Ocaqlı kənd İnzibati ərazi dairəsi üzrə sabiq nümayəndə Bayramov Məhərrəm Ağabala oğlu, Cəlilabad rayon İcra Hakimiyyətinin Arxitektura Şöbəsi ilə əlbir olaraq, anam Məmmədova Nüşabə Sabir qızına məxsus olan fərdi yaşayış evinin tikintisi üçün ayrılmış 0,12 ha torpaq sahəsini ələ keçiriblər.

Belə ki, Bayramov Məhərrəm Ağabala oğlu vəzifə səlahiyyətlərindən sui-istifadə etməklə, həmin torpaq sahəsini saxta sənədlərlə yeznəsi Ağayev Həbib Ağacəfər oğlunun adına sənədləşdiriblər.

Maraqlı faktlar onan ibarətdir ki, Ağayev Həbib Ağacəfər oğluna saxta sənədləşmələr əsasında verilən sənəd üzərində olan möhür, ştamp, öz zamanına görə 2000-2005-ci il arxivində olmalıdır. Lakin sənəddə 2000-2005-ci ilin möhürü vurulub.

1995-ci il tarixində anama məxsus olan torpaq sahəsini Ağayev Həbib Ağacəfər Oğluna satırlar. Əlimdə əsaslı faktlar olmasına baxmayaraq, Cəlilabad rayon prokuroru Vahid Məmmədov, Cəlilabad rayon Polis Şöbəsi şikayətimə ətraflı baxmayarq, başlarından ediblər. 7 dəfə qeyri -obyektiv araşdırma aparıldığından, həmin qərar rədd edilmişdir.

16.01.2024-cü ildə yenidən araşdırmanın davam etdirilməsi üçün Baş Prokurorluğun yazlı göstərişləri əsasında, 8-ci dəfə Cəlilabad rayon Polis Şöbəsinin istintaqına verilmişdir. Dəfələrlə araşdırma getməsinə baxmayaraq, polis bildirir ki, vəzifə səlahiyyətlərinən sui-istifadə halları var, amma bizim səlahiyyətmiz buna imkan vermir ki, cinayət işi açılsın, bu, Cəlilabad Rayon Prokurorluğunun səlahiyyətlərinə aid məsələdir. Yəni Prokurorluq bu işi başından edir, bizim üstümüzə atır.

Cəlilabad Rayon İcra Hakimiyyəti də saxta sənədləşmələrin ortaya çıxmamasına görə, prokurora, polisə təzyiq göstərir. Sözügedən məsələ ilə bağlı əlimdə əsaslı faktlar var. Səlahiyyətli dövlət orqanlarından xahiş edirəm ki, mənə kömək etsinlər”.

İranın guya Azərbaycanda yerləşən mərkəzdən idarə olunan casus şəbəksini ifşa etməsi barədə iddiası dövlətimizə qarşı qərəzdir. Tehran Azərbaycanı antiiran mərkəzi kimi təqdim etmək istəyir. Hətta bu, Azərbaycana qarşı müxtəlif aksiyaların başlaması üçün “zəmin hazırlanması” da ola bilər.

Bu sözləri Axar.az-a açıqlamasında Orta Doğu Araşdırmalar Mərkəzinin rəhbəri, siyasi şərhçi Sədrəddin Soltan İranın casus iddiası ilə bağlı danışarkən deyib.

“İran mediası iddia edir ki, guya Azərbaycanda casus yuvası var və burda yetişən casuslar İrana göndərlir. Bu cür yanaşma Azərbaycan-İran münasibətlərinə ciddi zərər verir. Təəssüf ki, hakimiyyətə qarşı etiraz edənləri hansısa ölkələrin kəşfiyyatına bağlamaq İran hökumətinin ənənəvi davranışıdır. Hökumət öz vətəndaşlarının tələblərini qarşılamaq, konstitusion hüquqlarını həyata keçirməkdənsə, bu cür üsullara əl atır. Güneydə Azərbaycan türklərinin milli hüquqlarını tələb edənləri Türkiyə, Azərbaycan, ABŞ və İsrail kəşfiyyat orqanlarına bağlamaq klassik variantdır”, - o bildirib.

Ekspert İranın bu cür addımlarını həm də ölkəmizə qarşı şantaj adlandırıb:

“Azərbaycanın regiondakı nüfuzu, təhlükəsizlik çərçivəsində attığı addımlar, Ermənistanla münasbətləri normallaşdırmağa çalışması və regional layihələrdə aparıcı mövqedə olması İranın qısqanclığına səbəb olur. Tehran Cənubi Qafqazda Azərbaycanın güclənməsini həzm edə bilmir. Çünki bu güclənmə orada yaşayan türklərin Azərbaycanı örnək almasına səbəb ola bilər”.