İqtisadiyyat Nazirliyi yanında Əmlak Məsələləri Dövlət Xidmətindin rəis müavini Elçin Yusubov Bakının Novxanı çimərliyi yaxınlığında, “Spring” oteldən bir kilometr uzaqlıqda yerləşən “Sarıqaya” yaşayış massivinin “Metallurq” düşərgəsində məcburi köçkünlərin məskunlaşdığı ərazinin bir hissəsini özünə yaxın iş adamının adına rəsmiəşdirib.

Məlum alqı-satqı Elçin Yusubova yaxınlığı ilə seçilən şöbə müdiri Taleh Bəşirovun bilavasitə iştriakı ilə həyata keçirilib. Düşərgədə sıx məskunlaşmanın mövcud olduğu, orada yaşayan qaçqınların öz dədə-baba torpaqlarına hələ köç etmədiyinə baxmayaraq, Elçin Yusubov düşərgənin bir hissəsini iş adamına satıb. Bununla bağlı Mediaxeberleri.Az-a verilən məlumata görə, məcburi köçkünlərin narazılığına yol verməmək üçün iddia edilir ki, guya Əmlak Məsələləri Dövlət Xidməti ərazidə park salır.

Yəni ərazidə heç bir tikinti işi aparılmayacaq. Lakin təbii ki, vətəndaşlar buna inanmır və onlar hesab edir ki, onların pərən-pərən salınmasında məqsəd hansısa məmurun, iş adamının maraqlarını təmin etməkdir. Kimin nə deməyindən asılı olmayaraq fakt budur ki, məcburi köçkün düşərgəsinin bir hissəsi zəbt edilib. Bir həftədədir ki, məlum ərazidə söküntü işləri həyata keçirən iş adamı məcburi köçkünlərə məxsus bir sıra yardımçı təsərrüfatı dağıdıb, həmin əraziləri ağır texnikanın vasitəsi ilə düzləyib. Düşərgədə məcburi köçkünlərin müalicəsi üçün nəzərdə tutulan tibb məntəqəsi belə sökülüb.

Elçin Yusubovun xeyir-duası, ərazini satın alan iş adamının göstərişi ilə məcburi köçkünlərin tibb məntəqəsinə sözün həqiqi mənasında şum vurulub, xəstələr və həkimlər pərən-pərən salınıb. İnzibati binası dağıdılan tibb məntəqəsindəki avadanlıqlar “Günəş” adlı məcbur köçkün düşərgəsində - boş bir mənzildə yerləşdirilib. Mənbənin Mediaxeberleri.Az-a bildirdiyinə görə, hazırda ərazidə geniş tikinti işləri həyata keçirilir. İşləri maksimim qısa zamanda yekunlaşdırmaq üçün hətta gecə saatlarında – prokejtor işıqları altında da tikinti prosesi davam etdirilir.

İş adamının ağına-bozuna baxmadan əl qoyduğu hər bir obyekti yerlə-yeksan etməsi məcburi köçkünlər arasında narazılıq yaradıb.

Onlar evlərinin söküləcəyindən, soyuq qış günlərində çöldə qalacaqlarından ehtiyat edir. Düşərgənin əsas magistrala açılan hissəsi Elçin Yusubov tərəfindən satıldığı üçün məcburi köçkünlərin istifadə etdiyi iki avtomobil yolunun biri bağlanıb və sakinlər ictimai nəqliyyatdan istifadə etmək üçün bir kilometrdən də çox əlavə məsafə qət etməlidir.

Qaçqınların təşvişi də əbəs deyil. Bununla bağlı Mediaxeberleri.Az-a verilən məlumata görə, 3 il öncə “metallurq” qaçqın düşərgəsinin qonşuluğunda yerləşən daha bir məcburi köçkün düşərgəsi – “Şəfəq” eyni aqibətlə üzləşib. Düşərgədə məskunlaşan vətəndaşlar Masazıra köçürülüb və onların yaşadığı torpaqlarda bahalı kotejlər inşa edilib. Maraqlıdır ki, həmin köçkün düşərgəsinin ərazisinin satışı da Elçin Yusubovun xeyir-duası, Əmlak Məsələləri Dövlət Xidmətinin şöbə müdiri Taleh Bəşirovun fəallığı ilə baş tutub.

Vətəndaşların yeganə ümidi Prezident İlham Əliyevədir. Məcburi köçkünlər əmindir ki, etiraz və göz yaşına məhəl qoymadan onların 30 il ərzində min bir əziyyətlə qurub-yaratdığı təsərrüfatı dağıdanlar cəzalanacaqlar.

“Sipark İnşaat” məhkəməlik olub.

“Qafqazinfo”nun əldə etdiyi məlumata görə, tikinti şirkəti yaşıllıqların mühafizəsi haqqında qanunvericiliyi pozmaqda ittiham edilir və barəsində İnzibati Xətalar Məcəlləsinin 253.3.1-ci maddəsi ilə protokol tərtib edilib.

“Sipark İnşaat” şəhərlərdə və digər yaşayış məntəqələrində yerləşən yaşıllıq sahələrində tikinti və abadlaşdırma işləri aparılarkən lazımi icazə olmadan ağacların və ya kol əkililərinin zədələnməsində, məhv edilməsində, habelə qanunsuz kəsilməsində ittiham olunur.

Şirkətin təqsiri sübuta yetirilərsə, “Sipark İnşaat” rəhbərliyi 35 min manat cərimə olunacaq.

Qeyd edək ki, işə Nərimanov rayon məhkəməsində hakim Vüsal Qurbanovun sədrliyi ilə baxılacaq

Şamaxının mərkəzində yaşayan sakinlər çala-çuxurlu yollardan, palçıqlı küçələrdən şikayətçidirlər.

Onlar bildiriblər ki, 16 ildir müvafiq qurumlar tərəfindən təmir işləri ilə bağlı müəyyən vədlər verilsə də, problem hələ də həll olunmayıb:

“Yollar çökür, əhali əziyyət çəkir. Hər dəfə eyni cavabı verirlər. Növbəti ildə küçəniz asfaltlanacaq, təmir işləri aparılacaq. Ancaq bu 16 ildə 16 qəpiklik iş görülməyib”.

Aztoday.az

Bakı Dövlət Universitetinin (BDU) ərazisində yeni qazanxana tikiləcək.

Reportyor.info xəbər verir ki, BDU artıq yeni tikiləcək qazanxana üçün avadanlıqların alınması ilə bağlı tenderə yekun vurub. Tenderin qalibi “A.E.S – Trading” MMC seçilib. Şirkətin təklifi 2 498 018,7 AZN-dir.
Universitet bu məbləğə qaz detektetoru, drenaj nasosu, qazan, odluq, dövriyyə nasosu, isti su sistemi üçün resirkulyasiya nasosu, kimyəvi su təmizləmə qurğusu və s. avadanlıqlar alacaq.

İqtisadiyyat Nazirliyi yanında Dövlət Vergi Xidmətinin reyestr məlumatlarına görə “A.E.S-Trading” MMC 19 fevral 2-16-cı ildə qeydiyyata alınıb. Nizamnamə kapitalı 100 AZN olan şirkətin hüquqi ünvanı Bakı şəhəri Binəqədi rayonu, Biləcəri qəsəbəsi, Ə.Qasımov küçəsi, ev 25-də yerləşir. MMC-nin qanuni təmsilçisi Əhmədov Elvin Valeryeviçdir.

Açıq mənbələrdə şirkət haqqında heç bir məlumat yoxdur. Elvin Əhmədov barəsində də hər hansı qeydə rast gəlinmir.

BDU-nun tenderi ötən ilin noyabrında elan edilib. Oktyabr ayında isə “A.E.S-Trading” MMC barəsində inzibati iş başlanıb. Şirkət barəsində bu tenderin qalibi seçilməmişdən əvvəl, daha dəqiqi ötən ilin oktyabrında inzibati iş başlanıb. Şirkətə qarşı İnzibati Xətalar Məcəlləsinin 483-cü maddəsi ilə (Xarici iqtisadi fəaliyyətin həyata keçirilməsi nəticəsində əldə edilmiş və Azərbaycan Respublikasının müvəkkil olunmuş banklarının hesablarına məcburi qaydada köçürülməli olan az miqdarda xarici valyuta vəsaitlərinin xaricdən qaytarılmaması) maddəsi ilə ittiham irəli sürülüb.

Bu maddədə inzibati xətanın bilavasitə obyekti olan xarici valyutanın dəyərinin otuz faizindən əlli faizinədək məbləğdə cərimə edilir.

İş baxılması üçün Yasamal Rayon Məhkəməsinə göndərilib. Nəticə barədə açıq mənbələrdə heç bir bilgi yoxdur.
Bundan başqa, şirkətin hazırda 1936 manat vergi borcu var.

“A.E.S-Trading” MMC dövlət satınalmalarında da fəal deyil. Dövlət satınalmalarının elektron portalındakı elanlardan məlum olur ki, şirkət yalnız bu yazıda bəhs etdiyimiz tenderin qalibi seçilib.
Beləliklə, BDU-nun populyar olmayan, maddi-texniki bazasının hansı vəziyyətdə olduğu bilinməyən, bir şirkətə milyonluq layihə həvalə edib. Bu isə universitetlə şirkət arasındakı sövdələşmədə hansısa qaranlıq məqamların olduğuna .şübhələri artırır.

BDU-nun rektoru Elçin Babayevdir. O, 2019-cu ildən universitetə rəhbərlik edir.

Xəbər verdiyimiz kimi, Bakı Şəhər Təcili və Təxirəsalınmaz Tibbi Yardım Stansiyasının sabiq baş həkimi Rauf Nağıyev Tibbi Ərazi Bölmələrini İdarəetmə Birliyini (TƏBİB) məhkəməyə verib.
Səbəb isə R.Nağıyevin 2023-cü ilin dekabr ayında TƏBİB-in icraçı direktoru Vüqar Qurbanovun əmri ilə işdən çıxarılmasıdır. Bakı İnzibati Məhkəməsinə müraciət edən​ Rauf Nağıyev işə bərpa edilməsini tələb edir.
Məsələ ilə bağlı Bakupost.az-a danışan Rauf Nağıyev sensasion açıqlamalr verib. O bildirib ki,​ bir neçə dəfə TƏBİB-ə təcili yardımla bağlı problemlərin həll edilməsi üçün təkliflər verib. Həmin təklifləri nəzərə almaq əvəzinə, onun özünü vəzifədən uzaqlaşdırıblar:
"Bakıda əhalinin sayı artıb. Təbii olaraq, Bakı Şəhər Təcili və Təxirəsalınmaz Tibbi Yardım Stansiyasına edilən çağırışların da sayı artıb. Poliklinikalar düzgün işləmir, xəstəxanalar bərbad vəziyyətdədir. Bunları gücləndirmək lazımdır ki, bütün güc təcili yardıma düşməsin. Bütün bu çətinliklərə baxmayaraq, mən neçə vaxtdır ki, 140 briqada ilə bu qədər çətin işin öhdəsindən gəlirdim. Hətta pandemiya vaxtı da işimin öhdəsindən məharətlə gəldim. İkinci Qarabağ müharibəsi zamanı 38 briqadanı cəbhəyə göndərdilər. Orada da hər kəs bu briqadanın işindən danışdı. Mənim briqadama əsgərlər əl çalıblar ki, həkimlər gəliblər. Onların cəbhə bölgəsində yaralı əsgərlərə vaxtında tibbi yardımın göstərilməsində müstəsna xidmətləri var. Mən Əməkdar həkim, səhiyyə əlaçısı, Müdafiə Nazirliyinin təşəkkürnaməsini alan, Vətənə layiqincə xidmət edən həkiməm. Bütün bunlara baxmayaraq, bir aydır ki,​ məni Bakı Şəhər Təcili və Təxirəsalınmaz Tibbi Yardım Stansiyasındakı işimdən uzaqlaşdırıblar. Mənim əməyim niyə qiymətləndirilmədi? Bunlar nə edib, nə yaradıblar? Avtobazanı? 103-lə 113-ü birləşdiriblər, çabalıyırlar, hələ də bir iş görə bilməyiblər".

R.Nağıyev qeyd edib ki, o, işdən uzaqlaşdırdığı müddət ərzində təcili yardımın işi çöküb:
"Bir-iki aya əhali bunun nəticəsini görəcək. Tədricən təcili yardımın işi tamam çökəcək. Çünki texniki bazası yoxdur, köhnə bazanın üstündə işləyir. Artıq orada zəncir qırılıb. Hər kəs işə müdaxilə edir. İş qalıb qıraqda, bunlar çək-çevirlə məşğuldurlar. Təsərrüfat işi ilə məşğul olmaq işin təşkili deyil. İşin təşkili briqadaların sayının artırılması və əhaliəyə vaxtında keyfiyyətli xidmətin göstərilməsidir. Dəfələrlə təkliflər yazıb təqdim etmişəm ki, hansı tədbirlər görülməlidir. Ancaq qəbul olunmayıb. Nə deyirdim, cavab bu olurdu ki, olacaq, eləyəcəyik. Axı bununla iş getmir. Bir gün orada hansısa qəza baş versə, necə olacaq, vəziyyətdən necə çıxacaqlar?”
Sabiq baş həkim deyir ki, o, heç bir əsas olmadan vəzifəsindən uzaqlaşdırılıb:
“Mənin 63 yaşım var. 70 yaşına kimi işləyə bilərdim. Amma məni "əmək müqaviləsinin müddəti bitib" bəhanəsi ilə işdən uzaqlaşdırdılar. Ayın 14-ü işimə xitam verib, 15-i ünvanıma göndəriblər, 20-­si də məktub mənə çatıb. Bildiriblər ki, gəlib əmək kitabçamı götürüm. Əmək Məcəlləsinə görə, mən hələ fəaliyyətimi davam etdirməliydim. Əgər müqavilənin müddəti bitmişdisə və mən işdən azad olunacaqdımsa, iki ay öncədən mənə məlumat verilməliydi. İkincisi, mənə işdən azad olunmağımın səbəbi deyilməli idi. Əsas göstərilməliydi ki, məni hansı səbəbdən işdən azad ediblər. Əmək müqaviləsinin müddətinin uzadılmamasının səbəbi də deyilməli idi. ​ Mənim kifayət qədər iş stajım var. Hansı əsasla mənə iş stajı müddəti qoyulur? Onların mənə müddət qoymağa heç bir ixtiyarları yoxdur axı. 2015-ci ildən mən bu işdə çalışıram. Nə olsun ki, müəssisənin tabeçiliyi dəyişdirilib. Axı o həmin müəssisədir, mən həmin işdə və həmin işçilərlə çalışıram. Onların etdikləri qanunsuzluqdur, məmur özbaşınalığıdır. Qanunları bilmirlər. Müəssisəni Müşahidə Şurasının qərarı ilə birləşdiriblər. Bütün bunlar Baş nazirin müvafiq əmri, Ədliyyə Nazirliyi və Maliyyə Nazirliyinin razılığı ilə həyata keçirilməlidir. Belə-belə insanları məhv edirlər. Həkimi işə götürür, müddət qoyrlar, istədiklərinə iş verir, istədiklərini çıxarırlar. Mən hazırda işsizəm”.

Rauf Nağıyevin dediyinə görə, ölkənin pandemiyadan çıxmasında Bakı Şəhər Təcili və Təxirəsalınmaz Tibbi Yardım Stansiyasının böyük xidmətləri olub:
“Pandemiya vaxtı qapıları bağlayırdılar, xəstələri götürmürdülər. Amma biz həmin dövürdə əhalini vəziyyətdən çıxarmaq üçün rayonlardan xəstə daşıyırdıq. O dövrdə xəstəxanalardan nələr baş verdi, kimlər tutuldu, hamınız gördük, amma bizim heç bir qüsurumuz olmadı. Saatlara xəstə qalırdı maşında, oksigen balonları daşıyırdım ki, xəstələr boğulmasın. Hələ o zaman min problem yaradırdılar. Azərbaycan dövlətinin qanunları qalıb kənarda, bunlar öz “qanunları” ilə işləyirlər. Əgər ​ TƏBİB­in icraçı direktoru Vüqar Qurbanov öz işini qiymətləndirsəydi, mənim işimə toxunmazdı”.
Rauf Nağıyev qeyd edib ki, o, illər öncə 20 Yanvar hadisələri,​ 1994-cü il martın 19-u və iyulun 3-də Bakı metropolitenində baş verən partlayış, Binəqədi rayonu ərazisində binanın yanması, Birinci və İkinci Qarabağ müharibələri zamanı xidmət göstərib:
“Hətta bir neçə dəfə Prezident öz çıxışlarında təcili yardımın işindən, səmərəli fəaliyyətindən danışıb. Bizim briqada ölkədə təşkil olunan mötəbər yarışlar, olimpiadalar, tədbirlər zamanı səmərəli fəaliyyət göstərib. O vaxt mən Bakı Baş Səhiyyə İdarəsində müavin işləyəndə nazir məni çağırıb dedi ki, ölkədə olimpiada keçiriləcək, təcili yardım pis vəziyyətdədir. Get oranı toparla, biabır olmayaq. Mən cəmi bir aya təcili yardımı qaydasına saldım. Bir aya mən orada az qala hərbi qayda-qanun yaratdım. O boyda işlərin öhdəsindən gəldim. Əgər işim, fəaliyyətim pis idisə, niyə o vaxt TƏBİB-in icraçı direktoru Vüqar Qurbanov yeni təyin olunanda məni işdən çıxarmadı. Üstündən bu qədər müddət keçdikdən sonra çıxardı. Mən bu adamı əvvəldən tanıyırdım. Kiminsə kimdən xoşu gəlmir, dostudur, dostu deyil, şəxsən bəyənmir, müsbət və ya mənfi tərəfə fikirləri var, bu, şəxsi məsələlərdir. Şəxsi məsələləri işə qatmaq düzgün deyil. Şəxsi münasibətlər başqa, iş münasibətləri başqadır. Bunları bir-birinə qatmaq olmaz. Mənim də çox adamla dostluğum var, çox adamla gərginliyim olub. O başqa məsələdir, onun işə dəxli yoxdur. İşdə qanunlar, Əmək Məcəlləsi işləməlidir, şəxsi maraqlar yox. Ancaq bunlar özbaşına işlər görürlər. Ona görə də haqqımı məhkəmə qaydasında müdafiə edəcəyəm”.

Bakının Suraxanı rayonunda yerləşən “Antalya” restoranının sahibi və mühafizəçilərini döyən mərhum iş adamının oğluna hökm oxunub.

Qaynarinfo-nun məlumatına görə, hadisə Suraxanı rayonu, Hövsan qəsəbəsi, Hövsan-Türkan yolunda yerləşən “Antalya” restoranının çimərlik hissəsindəki 200×50 metr ölçülü əraziyə görə baş verib.

Belə ki, həmin ərazi 1998-ci ildə Suraxanı İcra Hakimiyyətinin sabiq başçısı olan, sonradan uzun illər Bakı Şəhər İcra Hakimiyyətinə başçılıq edən Hacıbala Abutalıbovun 23 iyul 1998-ci il tarixli 1221 saylı sərəncamı ilə sahibkar Hacımurad Rzayevə hədiyyə edilib. Hacıbala Abutalıbov bunun əvəzində sahibkardan Hövsan qəsəbəsindəki çimərliyin bir hissəsini abadlaşdırmağı xahiş edib.

Sərəncamın qərar verilmiş hissəsinə əsasən, Hövsan Bağları sahəsinin şimal hissəsində dənizkənarı sahədə 200×50 metr ölçüdə torpaq sahəsini abadlaşdırmaq və əhalinin rahatlığını təmin etmək üçün təqdim olunmuş çizgi əsasında təhkim olunub. Həmçinin sahədə kapital tikintinin aparılmasının qadağan edilməsi, Hacımurad Rzayevə çimərlikdə göstərilən bütün xidmət növlərinin pulsuz olması tapşırılıb. İş adam həmin ərazidə sahibkarlıq fəaliyyəti ilə məşğul olub, ərazidə kafe, mağaza, o cümlədən turistlər üçün kiçik qayıqlar fəaliyyət göstərib.

Hacıbala Abutalıbov icra başçısı vəzifəsindən getdikdən sonra qanuni təmsilçisi Mehdiyev Qalib Tücarət oğlu olan “Mars-M” Çoxsahəli Kommersiya Firması tərəfindən “Antalya” restoranı tikilib. 2019-cu ildə həmin ərazidə olan obyektlər də sökülərək restoranın ərzisinə daxil edilib.

Bundan sonra Hacımurad Rzayev ilə “Mars-M” şirkəti arasında mübahisələr baş verib. Bakı Apellyasiya Məhkəməsinin qətnaməsi ilə “Antalya” restoranın qarşısındakı 50×200 metr ərazidəki çimərlik sahəsi möhürlənməklə, mübahisə tərəflərinin istifadəsinə qadağa qoyulub.

20 avqust 2021-ci il tarixdə Hacımurad Rzayevin vəfatından sonra şirkətin qeyri-rəsmi sahibi Qadir Mehdiyev sözügedən ərazini mərhum iş adamından aldığını iddia edib. Hacımurad Rzayevin oğlu, 1984-cü il təvəllüdlü Samir Rzayev ərazidə məhkəmənin qərarı pozularaq Qadir Mehdiyev tərəfindən iş aparıldığını görüb. O, qardaşları Zaur Rzayev və Əlifağa Rzayev ilə əraziyə gedərək, “Mars-M” şirkətinin sahibi Qadir Mehdiyev ilə mübahisə edib. Samir Rzayev əvvəllər hüquq-mühafizə orqanlarında çalışmış və hazırda təqaüddə olan Qadir Mehdiyev və restoranın mühafizəçilərini döyüb.

Mərhum iş adamının oğlu iki gün həbsdə saxlanıldıqdan sonra barəsində Cinayət Məcəlləsinin 128 və 221.3-cü maddələri cinayət işi açılıb və iş məhkəməyə göndərilib. Məhkəmənin hökmü ilə Samir Rzayevə 9 ay 26 gün müddətə azadlığın məhdudlaşdırılması cəzası təyin edilib. Təqsirləndirilən şəxsin üzərinə cəza çəkdiyi müddətdə daimi yaşayış yerini hər gün saat 23:00-dan növbəti gün saat 07:00-dək tərk etməmək, elektron nəzarət vasitəsini gəzdirmək vəzifəsi qoyulub.

Bakı Sağlamlıq Mərkəzi ilə Dövlət Əmək Müfəttişliyi Xidməti arasında qalmaqal yaranıb.

Qaynarinfo xəbər verir ki, qalmaqalın səbəbi Xidmətin Bakı Sağlamlıq Mərkəzinə cərimə yazması ilə bağlıdır.

Məlumat üçün deyək ki, qurum Mərkəzi İnzibati Xətalar Məcəlləsinin 198.1.5-ci və 192.4-cü maddələri ilə cərimələnib. 198.1.5-ci maddə normal əmək və istirahət rejiminə riayət edilməməsi, 192.4-cü maddə isə işçinin əmək və məzuniyyət haqlarının hesablanmasında və ödənilməsində, riyazi hesablamalar nəticəsində yol verilən nöqsanlar istisna olmaqla, qanun pozuntularına yol verilməsi barədədir.

Birinci maddədə 500 manatdan 1000 manatadək, ikinci maddədə isə vəzifəli şəxslərin 700 manatdan 1500 manatadək məbləğdə cərimə edilməsi nəzərdə tutulur.

Bakı Sağlamlıq Mərkəzi bu qərarla razılaşmayaraq məhkəməyə müraciət edib. İş Nəsimi Rayon Məhkəməsinin hakimi Solmaz Mustafayevanın icraatındadır.

Bakı Sağlamlıq Mərkəzinin direktoru Asiman Həsənovdur. O, 2019-cu ildən bu vəzifədədir. Asiman Həsənov Bakı Sağlamlıq Mərkəzinin direktoru təyin edilməmişdən əvvəl Tibbi Ərazilərin İdarəedilməsi Birliyinin (TƏBİB) sədri vəzifəsində çalışıb.

“Azsığorta” ASC tanınmış iş adamı Azay Möhnətov və onun oğlu Aqil Möhnətov, həmçinin “EuroHome” MMC-yə qarşı məhkəmə iddiası qaldırıb.
Yeniavaz.com xəbər verir ki, məhkəmə iddiası Bakı Kommersiya Məhkəməsinin hakimi Günay Namazovanın icraatına verilib.
Məhkəmə iddiası hüquqi şəxsin müflis olması işi ilə əlaqədar qaldırılıb.
Məlumat üçün bildirək ki, cəmi bir həftə əvvəl Təhsil Tələbə Krediti Fondu Möhnətov Aqil Azay oğlu ilə 96 min manatlıq, Möhnətov Azay Xasay oğlu ilə isə 56 min manatlıq icarə müqaviləsi imzalayıb.
Məlumat üçün bildirək ki, Azay Möhnətov “AF Holdinq” şirkətlər qrupunun prezidentidir.
Holdinqin rəsmi səhifəsində qeyd olunur ki, 1989-cu ildə təsis olunan “AF General Trading” şirkəti ixrac-idxal əməliyyatları ilə məşğul olub. Bildirilir ki, holdinqin baş ofisi Bakıda yerləşir, Frankfurt və Londonda da filialları var.
Aşağıda adları qeyd olunan şirkətlər də “AF Holdinq”ə daxildir:
- “Everton”
- “Uğur-97”
- “AFSAN Plastik”
- “AF Business House”
- “AF City”
- “AF Mall”
- “AF Com Plaza”
- “AF Com Center”
- “Aqua Park Baku”
- “Aqua Park Shikhov”
- “AF Hotel Aqua Park”
Bundan başqa, “AF-Holdinq”in rəsmi veb-səhifəsində yer alan məlumatda göstərilir ki, 2000-ci ildə “AF Bank” təsis edilib. Sonradan bu bank Rusiyanın VTB bankına satılıb.
Bakı-Sumqayıt yolunun kənarında yerləşən “EuroHome” inşaat materialları bazarının da əvvəllər Azay Möhnətova məxsus olduğu bildirilirdi. 2019-cu ildə bazarda baş verən güclü yanğın zamanı Holdinqin rəsmi saytında “AF Euro Home”un şirkətlər qrupuna daxil olduğu qeyd olunub. Daha sonra “EuroHome”un adı şirkətlər qrupunun rəsmi saytından çıxarılıb.
Azay Möhnətov ilə bağlı diqqət çəkən məqmlardan biri də odur ki, “EuroHome” da yanğının baş verməsindən qısa müddət əvvəl Rusiyanın “Vedomosti” qəzeti yazıb ki, “AF-Holdinq”in rəhbəri Azay və İlyas Möhnətovlar Moskvada “Safmar” şirkətinə məxsus 21,7 hektar torpaq sahəsini və 111 min kvadratmetrlik ofis-anbar kompleksini satın alıb. İddia olunub ki, “Safmar” şirkəti qeyd olunan ərazinin səhmlərini özündə cəmləşdirən “Rusinkom” şirkətini əvvəlcə 2,6 milyard rubla (40 milyon dollar) satmağı planlaşdırıb. Lakin, sonradan yekun qiymət onların istədiyindən də yüksək olub. Aktivin neçəyə satıldığı açıqlanmayıb. “Vedomosti” qəzeti yazıb ki, iki mənbə aktivlərin Azərbaycanın “AF Holdinq” şirkətlər qrupuna satıldığını açıqlayıb və məlumt bu günə kimi təkzib olunmayıb.
Məlumat üçün bildirək ki, “Safmar” şirkətinin Baş direktoru milliyətçə erməni olan Avet Mirakyandır. Şirkətlər qrupunun sahibi isə Dövlət Neft Şirkətinin (SOCAR) əsas ortaqlarından biri olan “RussNeft” şirkətinin sahibi inquş əsilli milyarder Mixail Qutseriyevdir.
Onu da bildirək ki, Azay Möhnətov barəsində iddia qaldıran “Azsığorta” ASC-nin səhmlərinin 100%-nin Hikmət Əbuzər oğlu İsmayılova məxsus olduğu bildirilir. Mətbuatda “Azsığorta” ASC-nin səhmdarı Hikmət İsmayılovun fövqəladə hallar naziri Kəmaləddin Heydərovun bacanağı olduğu barədə çoxsaylı məlumat yayılıb və bu günə kimi təkzib olunmayıb.

Naxçıvan şəhəri, Şərur rayonu, Qarahəsənli kənd sakini Məmmədov Samur Akif oğlu tərəfindən Hurriyyet.az saytının redaksiyasına şikayət məktubu daxil olub. Şikayətçi iddia edir ki, çalışdığı bazarın rəhbərliyi hüquqlarını tapdalayır:

“Mən, Məmmədov Samur Akif oğlu, yazaraq sizdən xahiş edirəm ki, problemimi işıqlandırasınız.

22.10.2023-cü il tarixdə Şərur rayonundakı ticarət mərkəzində baş verən yanğın nəticəsində mən və daha 67 nəfər sahibkarın malları tamamı ilə yanmışdır. Bununla bağlı müxtəlif dövlət orqanlarına şikayət etsək də, heç bir nəticə olmadı. Mağazalar sığortalı olmadığı üçün dövlət tərəfindən bizə pul ödənilmədi. Nəticədə, sığorta haqqı ödəmədiyim üçün özümü günahlandırdım.

Bazarın müdiri Məmmədov Qasım Müslüm oğlu məlum yanğın hadisəsindən sonra birmərtəbəli olan bazarı iki mərtəbə olaraq yenidən bərpa etdirdi və hər kəsi obyektlə təmin etdi. Mənə isə yer vermədi. Səbrlə gözlədim ki, bəlkə ikinci mərtəbədən yer verər, amma vermədi. Dükanların bəziləri satıldı.

Mən məsələ ilə bağlı işi üzərinə götürən Şərur rayon Baş prokurorunun yanına getdim. Qəbul etdi, görüşdük və mənə bildirdi ki, sənin adına yer yoxdur. Mən ona bildirdim ki, ola bilməz, iki nəfər dərzi kimi işləyirdik, iki “polka”mız varıydı, biri mənim, biri də digər adamın idi. Onu da əlavə etdim ki, bəlkə sənəddə mənim adımı yox, digər dərzinin adı qeyd olunub. Dedim ki, bunun günahkarı mən deyiləm, mənim kimi iki “polka”lıq yerdə işləyənlər hər ikisinə də dükan verilib. Prokuror bazarın müdürinə zəng edib danışandan sonra mənə dedi ki, onun yanına get.

Müdirin yanına getdim, məni qəzəbli qarşıladı və dedi ki, sənin yerin yoxdur, bil. Ona izah etdim ki, iki nəfər işləyirdik, amma məni dinləmədi. Sonra isə “yaxşı edib sənə yer vermədim, başqalarının adlarını çəkmə, “rədd ol”get, sənə yer yoxdur”, - deəy məni qovdu.

Yenidən prokurorun yanına getdim. O, mənə dedi ki, gözlə, sənə xəbər edəcəm, İcra Hakimiyyəti ilə görüşərsən. Gözlədim, xəbər çıxmadı. Bir müddət sonra təkrar prokurorluğa getdim. Mənə dedilər ki, səni unutmuşuq, get İcra Hakimiyyətinə şikayət elə.

İcra Hakimiyyətinə şikayətə getdim, onlar da “biz bazara qarışa bilmərik”, - dedilər.

Onu da qeyd edim ki, bazar müdirinin məni təhqir etməsi, “yaxşı edib sənə yer vermirəm” deməsini sübüt edə bilərəm.

Mənim adım orada yoxdursa, necə olur ki, məhkəmə orada yerimin olduğu haqda qərar verib?! Sadəcə, özbaşınalıq baş alıb gedir. Vəzifəli şəxslərə güvənib, mənim kimi vətəndaşları əzirlər. Yanan avadanlıqların da hamısını sübüt etməyə hazıram”.

Barat Yusubov “Yeni Klinika”ya rəhbər gələndən bəri müəssisədən “EGE Hospital”a yönləndirmələr çoxalıb.
Bununla bağlı AFN.az-a danışan mənbə iddia edir ki, demək olar, hər gün dövlət xəstəxanasından adıçəkilən özəl xəstəxanaya “müştəri” göndərilir: “EGE Hospital”a hazırda Barat Yusubovun xanımı Gültəkin Yusubova rəhbərlik edir. Barat Yusubov “Yeni Klinika”ya rəhbər təyin ediləndən bəri xəstələrin bir çox prosedurlar üçün – sığortalı-sığortasız “EGE Hospital”a yönləndirməsi halları çoxalıb. Belə çıxır ki, Barat Yusubov dövlət müəssisəsi olan “Yeni Klinika”dan öz şəxsi biznesini “çiçəkləndirmək” üçün istifadə edir”.
Qeyd edilənlərlə bağlı “Yeni Klinika”nın mətbuat xidmətindən AFN.az-a bildirildi ki, müəssisədə icbari tibbi sığortanın Xidmətlər Zərfi daxilində tibbi xidmətlər təklif olunur: “Azərbaycan Respublikasının hər bir vətəndaşı tək şəxsiyyət vəsiqəsi ilə (qeydiyyat yeri nəzərə alınmadan) və ya göndərişlə tibb müəssisəsinə yaxınlaşaraq növbə götürməklə tibbi xidmətlərdən yararlana bilər.
Müraciət edən pasiyentə Xidmətlər Zərfi daxilində ehtiyac olan tibbi xidmət “Yeni Klinika”da mövcud deyilsə (bu çox məhdud sayda xidmətlərlə bağlıdır) müvafiq qaydaya uyğun olaraq həmin xidmətin təqdim olunduğu digər dövlət xəstəxanalarına göndəriş verilir. Göndərişin verildiyi tibb müəssisəsi imtina verdiyi təqdirdə isə ölkədə fəaliyyət göstərən özəl klinikalara göndərişlərin verilməsi təmin olunur.
Qeyd edək ki, özəl tibb müəssisələrində də Xidmətlər Zərfi daxilində göstərilən xidmətlər vətəndaş üçün tam ödənişsiz həyata keçirilir.(AFN)