Sabunçu Rayon Məhkəməsinə bu ilin yayında "Sea Breeze"də oliqarx övladlarının iştirakı ilə baş verən kütləvi davayla bağlı cinayət dosyesi daxil olub.

Yenisoz.az musavat.com-a istinadən bildirir ki, hakim qarşısına təqsirləndirilən şəxs qismində 4 nəfər - Peyman Rəhman oğlu Vəlizadə, Elmir Üzeyir oğlu İsmayılov, Məhəmməd Natiq oğlu Həsənzadə və Murad Məzahir oğlu Əhmədli çıxarılır. Bu şəxslər xuliqanlıqda ittiham olunurlar.

İş üzrə iki zərərçəkən var - Cavad Vahid oğlu Muradov və Elnur Leysan oğlu Məmmədov.

Bu ilin yayında baş verən hadisə ilə bağlı həmin zaman yayılan rəsmi məlumatda qeyd olunurdu ki, iyunun 12-də "Sea Breeze Resort" istirahət mərkəzində kütləvi dava baş verib. 1 gün sonra xuliqanlıq hərəkətləri törədən şəxslər müəyyən olunub. Bakı şəhər Baş Polis İdarəsinin İstintaq və Təhqiqat İdarəsində faktla bağlı Cinayət Məcəlləsinin 221.3-cü (xuliqanlıq) maddəsi ilə cinayət işi başlanılıb. Hadisə iştirakçılarından bir qrupu saxlanılıb. Rəsmi məlumatda saxlanılanların kimliyi, dava tərəfləri haqda isə hər hansı bir bilgi verilməyib. Kütləvi davanın əsas tərəfləri kimi sabiq nazir Yavər Camalovun qardaşı oğlu Elmir Camalov və oliqarx Leysan Məmmədovun oğlu Elnur Məmmədov qeyd edilirdi.

Bildirilirdi ki, həmin axşam ərazidə Jah Khalib-in konserti və Çempionlar Liqasının onlayn translyasiyası keçirilib. Olay zamanı hətta Elmir Camalovun bıçaq xəsarəti alması xəbəri də vardı. Olaydan sonra bu iki şəxs də daxil olmaqla, 8 nəfər saxlanılmışdı.

Məhkəmə qarşısına çıxarılan təqsirləndirilən və zərərçəkənlər arasında Elmir Camalov yoxdur. Amma Camalovlarla qohumluq əlaqəsində olan Elmir İsmayılov təqsirləndirilən şəxs statusundadır. Elmir İsmayılov Müdafiə Sənayesi Nazirliyi Aparatının rəhbəri olmuş Üzeyir Ərəstun oğlu İsmayılovun oğludur. Üzeyir İsmayılov sabiq nazir Yavər Camalovun qardaşı, iş adamı Əlikram Camalovun kürəkənidir. Elmir İsmayılovun adı mətbuatda əvvəllər də hallanıb. 2020-ci ilin iyununda mətbuatda "Bakıda iki cangüdənlə gəzən tələbə kimdir?" sərlöhvəli yazı tirajlanmışdı. Həmin yazıda Elmir İsmayılovdan bəhs olunurdu. Bakı Dövlət Universitetinin hüquq fakültəsində təhsil alan və 2 maşın cangüdənlə gəzən Elmir İsmayılovun bahalı maşın həvəskarı olduğu, hətta Bakı küçələrində sürətlə avtomobil sürməkdə ad çıxardığı iddia edilirdi.

Bloger Həbib Müntəzir məmur oğlunun avtomobil kolleksiyasına daxil olan maşınların bir neçəsinin marka və dövlət qeydiyyat nişanları haqda da məlumat yaymışdı.

- "Mercedes GL-Class 63" markalı, 90-ZZ-009 avtomobil
- "Porsche Panamera" markalı, 90-ZZ-009 nömrəli avtomobil
- "Toyota Camry" markalı, 10-AD-011 nömrəli avtomobil

- "Mercedes S63 AMG" markalı, 90-ZZ-009 nömrəli avtomobil
- "Mercedes-Benz Gelandewagen" markalı, 90-OZ-009 nömrəli avtomobil.

Qeyd edək ki, yaxınlarda dəyəri 315 min dollar olan (537 min manat) olan Land Rover Range Rover markalı avtomobil alıb.

Blogerin yazdığına görə, Elmirin əmisi Üveysi İsmayılov Hava Nəqliyyatında Baş Gömrük İdarəsinin rəisinin müavinidir:

"Ölkədə mərmər monopoliyasına nəzarət edir. Üveysi İsmayılov Bakı şəhəri, Binəqədi rayonu, Ə.Naxçıvani küçəsi, 26 a saylı binanın yaxınlığında 3 mərtəbəli 260 kvadratmetrlik kommersiya obyekti tikdirib. O, keçmiş baş prokurorun müavini Rüstəm Usubovun kürəkənidir".

İş üzrə iki zərərçəkəndən biri olan Elnur Məmmədovun nə işlə məşğul olması barədə məlumat olmasa da, atası Leysan Məmmədovun son iş yeri Bakı şəhəri, Binəqədi Rayon İcra Hakimiyyəti başçısının birinci müavini postu olub. Leysan Məmmədov bu ilin aprelində vəzifəsindən ayrılıb.

Leysan Novruz oğlu Məmmədov 03.01.1963-cü ildə Tovuz rayonunda anadan olub. O, 2006-2021-ci illərdə Azərbaycan Respublikası Gənclər və İdman Nazirliyinin Tikilməkdə olan obyektlərin Müdiriyyətində direktor müavini, direktor, 2021-ci ildən 2022-ci ilin fevral ayına qədər Azərbaycan Respublikasının Minatəmizləmə Agentliyində Aparat rəhbəri kimi davam edib. Bakı şəhəri Binəqədi Rayon İcra Hakimiyyəti başçısının 14 fevral 2022-ci il tarixli 22 saylı sərəncamı ilə Binəqədi Rayon İcra Hakimiyyəti başçısının birinci müavini vəzifəsinə təyin edilib. 2010-cu ildə Azərbaycan Respublikası Prezidentinin müvafiq sərəncamı ilə "Əməkdar mühəndis" fəxri adı ilə, 2014-cü ildə isə Azərbaycan Respublikasında tikinti kompleksinin inkişafında xidmətlərinə görə "Tərəqqi" medalı ilə təltif edilib. Ailəlidir, üç övladı var.

Oliqarx övladlarının noyabrın 21-nə təyin olunmuş məhkəmə prosesi baş tutmayıb. Cinayət dosyesini araşdıran hakim Mirheydər Zeynalovun sədrlik etdiyi proses dövlət ittihamçısının qatılmaması səbəbindən təxirə salınıb.

Bəzi müəssisələr üzrə xalis mənfəət əldə edilsə də, büdcəyə dividend ödənişi həyata keçirilmir.
AFN.az xəbər verir ki, bu haqda məlumat “Azərbaycan Respublikasının 2022-ci il dövlət büdcəsinin icrası haqqında” Azərbaycan Respublikasının Qanun layihəsinə və Azərbaycan Respublikasının 2022-ci il dövlət büdcəsinin icrasına dair illik hesabata Azərbaycan Respublikası Hesablama Palatasının rəyində əksini tapıb.

Rəydə göstərilir ki, “Azərlotereya” ASC səhmlərində dövlətin payı olan müəssisə olaraq 2022-ci il üzrə dövlət büdcəsinə heç bir divident ödəməyib. Maraqlıdır ki, “Azərlotereya” ASC-nin 2022-ci il üzrə maliyyə hesabatında Hesablama Palatasının əksinə olaraq, müəssisənin ötən il üzrə 30,194,740 manat dividend ödədiyi qeyd edilib.

Bəs, “Azərlotereya” ASC dividendi hara və necə ödəyib? 30 milyon manatdan çox vəsaitin büdcədə əksini tapmamasına səbəb nədir? Mövzu ilə bağlı sualları ASC-nin mətbuat xidmətinə ünvanlasaq da, dəqiq cavab ala bilmədik. Belə ki, “Azərlotereya”dan verilən cavabda ölkə başçısının qurumun idarəetməyə verilməsilə bağlı sərəncamı xatırladılır: “Məlum olduğu kimi, ölkə başçısının 16.01.2021-ci il tarixli 2443 nömrəli Sərəncamına əsasən “Azərlotereya” ASC Türkiyə Respublikasının “Demirören Şans Oyunları Yatırımları A.Ş.” şirkətinin törəmə cəmiyyəti olan “YMT Sans B.V.” şirkətinə müqavilə əsasında idarəetməyə verilib. Şirkətin idarəetməyə verildikdən sonrakı dövrdə dövlətə olan ödənişləri sözügedən müqavilə əsasında həyata keçirilir. “Azərlotereya” ASC-nin 2022-ci il üzrə maliyyə hesabatı ilə daha ətraflı şirkətin saytından tanış ola bilərsiniz”.

“Azərlotereya”dan verilən cavabda həmçinin, mövzu ilə bağlı detallı məlumat əldə etmək üçün Əmlak Məsələləri üzrə Dövlət Xidmətinə müraciət etməyimiz tövsiyə edilir.

Cavabda birbaşa göstərilməsə də, aydın olur ki, ASC müvafiq ödənişi Əmlak Məsələləri üzrə Dövlət Xidmətinə ödəyib. Beləliklə, növbəti sorğularımızı adıçəkilən Xidmətə və Maliyyə Nazirliyinə ünvanlamaq məcburiyyətində qaldıq. Cavabları təqdim edəcəyik.

Mənbə: AFN.az

Bakı məktəbində direktorun doğum günü ilə bağlı pul yığıldığı iddia olunur.

Söhbət Xəzər rayonu Türkan qəsəbəsində yerləşən 262 saylı tam orta məktəbdən gedir.

Bu barədə Bizim.Media-ya Türkan qəsəbə sakini, “Yeni baxış ictimai nəzarət” təşkilatının mətbuat katibi Vüqar Əmirov məlumat verib.

Bildirdiyinə görə, məktəbin direktoru Kəmalə Babayevanın noyabrın 24-də doğum günü ilə bağlı müəllim heyəti və şagirdlər arasında pul yığılır:

“Ayın 24-ü direktorun ad günüdür. İbtidai siniflərdə hər şagirddən 2 manat, yuxarı siniflərdən 3-5 manat, hansısa məbləğdə isə müəllimlərdən pul yığılır”.

Məsələ ilə bağlı 262 saylı orta məktəblə əlaqə yaratdıq. Direktor Kəmalə Babayeva Bizim.Media-ya açıqlamasında məsələdən yeni xəbərdar olduğunu bildirib:

“Bunu sizdən eşidirəm. Zəhmət olmasa, Bakı şəhər Təhsil İdarəsi ilə əlaqə yaradın”.

Direktor doğum gününün noyabrın 24-də olub-olmaması sualımızı isə nə təsdiq, nə də inkar edib.

Məsələ ilə bağlı Bakı Şəhər Təhsil İdarəsindən sorğumuza cavab olaraq, məsələnin araşdırılacağı bildirilib.

Mövzunu diqqətdə saxlayacağıq...

Penitersiar Xidmətin 15 saylı Cəzaçəkmə Müəssisəsində cəza çəkən Səmədov Əli Azər oğlunun qardaşı, Göyçay rayonu 1-ci Ərəbcəbirli kənd sakini, 1-ci qrup hərbi əlil Səmədov Məhəmmədəli Azər oğlu tərəfindən ölkə rəhbərliyin müraciət ünvanlanıb. Müraciətdə deyilir:

"Bildirmək istəyirəm ki, qardaşım 1996-cı il təvəllüdlü Səmədov Əli Azər oğlu Ədliyyə Nazirliyi Penitersiar Xidmətin 15 saylı Cəzaçəkmə Müəssisəsindədir. O, irsi xəstəlik səbəbilə 1-ci qrup əlildir. Xəstəliyi ilə əlaqədar müayinə və müalicə olunmalıdır. Lakin, Müalicə Müəssisəsinin rəis müavini Elxan İsgəndərov onun oraya köçürülməsin (etab) mane olur. Çünki, bundan öncə qardaşım Əli yuxarı instansiyalara yazılı ərizələrlə, kütləvi informasiya vasitələri üzərindən Elxan İsgəndərovun Müalicə Müəssisəsində qanunsuz əməllərlə məşğul olduğuna dair şikayətlər ünvanlamışdı. Elə ona görə də xəstə qardaşımla ədavət aparılır. Dəfələrlə Penitersiar Xidmətin qaynar xətt nömrəsinə zəng etmişəm, elektron məktublar göndərmişəm. Hətta vəzifəli şəxslərin qəbulunda da olmuşuq. Hamısı müxtəlif bəhanələr gətirir. Təəssüflər olsun ki, haqlı şikayətim Penitersiar Xidmətin rəisi Mirsaleh Seyidovdan gizlədilir, məsuliyyətsizlik edirlər, telefon zənglərim və məktublarım barədə Ona məlumat verilmir Hesab edirəm ki, cənab rəis böyük kadr dəyişikliyi aparmalıdır.
Xəstə və çarəsiz qardaşım Əli isə ağrılar içərisində qıvrıla-qıvrıla qalıb. O, təcili olaraq Müalicə Müəssisəsinə köçürülməli, oradan da mülki xəstəxanalarda müayinə olunmalıdır. Əks halda vəziyyəti daha da pisləşəcəkdir.
Mən mətbuat vasitəsilə ölkə başçısı cənab İlham Əliyevdən, Mehriban xanım Əliyevadan və Penitersiar Xidmətin rəisi cənab Mirsaleh Seyidovdan xahiş edirəm, qardaşım Əlinin Müalicə Müəssisəsinə köçürülməsinə, oradan da mülki xəstəxanalarda müayinə olunmasına köməklik göstərəsiniz. Öncədən təşəkkürlərimi bildirirəm".

Təqdim etdi: DİA-AZ.COM (Ərsoyun Bloqu)

Səhifəmiz bütün maraqlı tərəflərin rəyləri üçün açıqdır...

Binəqədi rayonu, Ziya Bünyadov prospektində inşaat materialları bazarında yanğın olub.

Bu barədə Fövqəladə Hallar Nazirliyi (FHN) məlumat yayıb.

Bildirilib ki, məlumatla əlaqədar FHN-nin Dövlət Yanğından Mühafizə Xidmətinin yanğından mühafizə bölmələri çağırış üzrə cəlb olunublar.

Hazırda yanğınsöndürmə işləri həyata keçirilir.

Əlavə məlumat veriləcək.

***

Hadisə ilə bağlı Fövqəladə Hallar Nazirliyi daha bir məlumat yayıb.


Bildirilib ki, havanın küləkli olması yanğının söndürülməsi işlərini mürəkkəbləşdirsə də hazırda yanğınla mübarizə tədbirləri davam etdirilir.

Əlavə məlumat veriləcək.


***

Fövqəladə Hallar Nazirliyindən verilən məlumata görə, hazırda yanğının söndürülməsi üçün əraziyə kifayət qədər texnika və canlı qüvvə cəlb olunub.

Əlavə məlumat veriləcək.