Mir Şahin Ağayev 1-ci dərəcəli “Vətənə xidmətə görə” ordeni ilə təltif edilib.

Bu barədə Prezident İlham Əliyev Sərəncam imzalayıb.

Sərəncama əsasən, Azərbaycan Respublikasında media sahəsində uzunmüddətli səmərəli fəaliyyətinə görə Mir Şahin Mirdilavər oğlu Ağayev 1-ci dərəcəli “Vətənə xidmətə görə” ordeni ilə təltif edilib.

Prezident İlham Əliyev Binəqədi və Abşeron rayonlarının bəzi ərazilərinin Sumqayıtın inzibati ərazisinə verilməsinə dair qanunu təsdiqləyib.

Bununla bağlı “Bakı şəhəri Binəqədi rayonunun, Sumqayıt şəhərinin və Abşeron rayonunun sərhədlərinin müəyyənləşdirilməsi haqqında” qanuna təklif olunan dəyişiklik qəbul edilib.

Qanunda qeyd edilib ki, Binəqədi qəsəbəsinin ərazisindən 1213 ha torpaq sahəsi, Abşeron rayonunun inzibati ərazisində yerləşən 375 ha və 2223,67 ha torpaq sahəsi Sumqayıt şəhərinin inzibati ərazisinə verilir.

Azərbaycan Respublikası “Hava gəmilərində törədilmiş cinayətlər və bəzi digər aktlar haqqında” Konvensiyada dəyişiklik edilməsinə dair 2014-cü il aprelin 4-də Monreal şəhərində imzalanmış Protokola qoşulub.
Prezident İlham Əliyev bununla bağlı qanunu imzalayıb.

Sabah səhər saat 8:00-dan axşam saat 17:00-dək Bakının Əbdülvahab Salamzadə küçəsinin Ceyhun Səlimov küçəsi ilə kəsişməsində yerləşən yoltürücüsündə təmir işləri aparılacaq.

Bu barədə Azərbaycan Avtomobil Yolları Dövlət Agentliyi məlumat yayıb.

Bildirilir ki, bununla əlaqədar olaraq qeyd olunan vaxt müddətində yolötürücüsünə giriş Xutor tuneli istiqamətində məhdudlaşdırılacaq.

Agentlik sürücülərə təmir işlərinin aparıldığı müddət ərzində müvəqqəti olaraq Əbdülvahab Salamzadə küçəsinin yan yolundan istifadə etmələrini tövsiyə edir.

“Deyirlər ki, Pərviz Qasımov bura pul xərcləyir, ora pul xərcləyir. Pərvizin nə biznesi var, nə də... Bu dəyirmanın suyu saytlardan gəlir. Başlıq yazırlar, xoşuma gəlmir. Xahiş edirəm, belə şeylər etməyin. Yazırlar ki, sabiq baş nazirin kürəkəni idman yarışında yer tutub. Bunun nə dəxli var? Mən əvvəl də yer tuturdum. Siyasəti musiqiyə qatmaq olmaz”.

Bu sözləri keçmiş baş nazir Novruz Məmmədovun kürəkəni, xanəndə Pərviz Qasımov ATV-də yayımlanan “Rəngarəng” verilişində deyib.

“Novruz Məmmədov Azərbaycanın dövlət xadimidir, gözəl insandır, amma məsələləri qarışdırırlar. Saytlara zəng edirsən ki, zəhmət olmasa, özüm haqqında yazın. İndiyə kimi nə etmişəmsə, vallah, özüm etmişəm. Qayınatamın burada heç bir rolu yoxdur”, - P.Qasımov bildirib.

Şimali Koreya Rusiya ilə dostluq münasibətlərinin daha da inkişaf edəcəyini açıqlayıb və ABŞ-ı “bu vəziyyətə öyrəşməyə” çağırıb.

Yenixeber.org  xarici mediaya istinadən xəbər verir ki, Pxenyan administrasiyası ABŞ dövlət katibi Antoni Blinkenin Cənubi Koreyaya səfəri zamanı verdiyi açıqlamalara cavab verib. Şimali Koreya Xarici İşlər Nazirliyindən verilən yazılı açıqlamada Blinkenin Şimali Koreya-Rusiya əlaqələrinin inkişafı ilə bağlı "narahatlığını" ifadə etdiyi və iki ölkəyə qarşı "əlavə sanksiyalar"dan danışdığı xatırladılıb. 

Əlavə edilib ki, ABŞ rəhbərliyi müstəqil suveren dövlətlər arasında münasibətlərin inkişafına xəstəlik dərəcəsində kin bəsləyir.

Açıqlamada Blinkenin “məsuliyyətsiz və təxribatçı” açıqlamalarının ABŞ-ın narahatlığını azaltmaq əvəzinə Koreya yarımadası və regionda təhlükəli siyasi və hərbi gərginliyi artırdığı qeyd edilib. ABŞ-ın suveren dövlət olan Şimali Koreyanın Rusiya ilə əlaqələri ilə bağlı narahatlığını aradan qaldırmağın tək yolu İki ölkəyə qarşı düşmənçilik siyasəti və soyuq müharibə zehniyyətindən əl çəkərək siyasi təxribatlara son qoymaqdır. 

Şimali Koreyanın digər dövlətlərlə əlaqələrinin əhəmiyyətinə toxunulan bəyanatda “Şimali Koreya, Rusiya Federasiyası, Çin Xalq Respublikası və digər müstəqil suveren dövlətlər arasında bərabər və qarşılıqlı əməkdaşlıq sülh və sabitliyin qorunmasında çox mühüm rol oynayır”, - deyilib. 

ABŞ-ın beynəlxalq ictimaiyyətin həmrəyliyi və birliyini lazımınca qiymətləndirməməsinin indiki “yazıq” xarici siyasətinin uğursuzluğunun əsas səbəbi olduğu iddia edilən bəyanatda deyilir: “Başqaları nə desə də, Şimali Koreya ilə Rusiya arasındakı münasibətlər müstəqillik, sülh və dostluq yolunda getdikcə möhkəmlənəcək, müstəqil və suveren dövlətlər bunun üçün ABŞ ilə əməkdaşlıq edəcəklər”. 

Bəyanatda vurğulanıb ki, “ABŞ Şimali Koreya-Rusiya münasibətlərinin yeni reallığına öyrəşməlidir”.

Xatırladaq ki, siyasi təmaslar üçün Cənubi Koreyaya səfər edən ABŞ dövlət katibi Antoni Blinken “Şimali Koreya Ukraynaya təcavüzünü davam etdirmək üçün Rusiyaya hərbi texnika verir, Rusiya isə Şimali Koreyaya hərbi proqramları üçün texnologiya və dəstək verir. Əsl narahatlıq da budur. Çinin Şimali Koreyanı məsuliyyətsiz və təhlükəli davranışdan xilas etmək üçün konstruktiv rol oynamasını gözləyirik" demişdi. 

Bakı Dövlət Universitetinin (BDU) Azərbaycan dili və nitq mədəniyyəti kafedrasının dosenti, filologiya elmləri üzrə fəlsəfə doktoru, Elmi-Tədqiqat Laboratoriyasının müdiri, Əməkdar müəllim Əliheydər Ağakişiyev vəfat edib.

Əliheydər Ağakişiyev, 66 yaşında dünyasını dəyişib.

Qeyd edək ki, Ə.Ağakişiyev 1957-ci il iyunun 29-da Bakıda anadan olub. 1964-1974-cü illərdə Bakı şəhəri 132 saylı orta məktəbdə təhsil alıb. 1975-1980-ci illərdə Azərbaycan Dövlət Universitetinin (indiki BDU) Filologiya fakültəsində təhsil alıb. 1990-cı ildən də həmin ali təhsil müəssisəsində çalışıb.

O, BDU-nun 100 illiyi münasibətilə və Azərbaycanda təhsilin və elmin inkişafındakı xidmətlərinə görə 2019-cu ildə Prezident İlham Əliyevin sərəncamı ilə Əməkdar müəllim adına layiq görülüb.

İrəvan meriyası Xankəndi yaxınlığındakı yanacaq anbarında baş vermiş partlayış nəticəsində həlak olanların ailələrinə 200 min dram (təxminən 500 dollar) ayrılması barədə qərar qəbul edib.

Musavat.com-un xəbərinə görə, bu barədə “Past” qəzeti öz mənbələrinə istinadən yazıb.

Ancaq nəşrdə ödənişlərin nə vaxt və necə bölüşdürüləcəyi göstərilməyib. Bildirilib ki, məsələ tezliklə həll olunacaq.

Qeyd edək ki, sentyabrın 25-də Qarabağda, Xankəndi yaxınlığındakı qaz anbarının yaxınlığında güclü partlayışın baş verməsi nəticəsində 200-dən çox erməni ölmüşdü. Ermənistan mətbuatı bunu da xüsusi qeyd edib ki, ölənlərin dəqiq sayı hələlik məlum deyil.

Ölkə ərazisində müşahidə olunan faktiki hava açıqlanıb.

Milli Hidrometeorologiya Xidməti xəbər verir ki, noyabrın 10-da ölkə ərazisində qeyri-sabit, küləkli, yağıntılı hava şəraiti müşahidə olunub, bəzi yerlərdə yağış, dağlıq ərazilərdə qar yağıb. Noyabrın 10-da axşam saatlarından güclü külək tədricən zəifləyib, 11-də səhər saatlarından yağıntılar kəsilib.

Düşən yağıntının miqdarı Astarada 45 mm (aylıq normanın 29%-i), Lənkəranda 24 mm (aylıq normanın 14%-i), Yardımlı, Xaltan, Altıağac, Lerik, Qəbələ, Zaqatala, Qax, Qrız, Naxçıvan, Oğuz, Şəki, Quba, Şamaxı, İsmayıllı, Biləsuvar, Ağsu, Şahdağ, Mingəçevir, Sabirabadda 6 mm-dək olub.

Qar örtüyünün hündürlüyü Qrızda 1 sm olub.

Şamaxı, Qrız, Lerik, Şəmkirdə duman müşahidə olunub.

Noyabrın 11-də və 12-də ölkə ərazisində hava şəraitinin nisbətən mülayim, gün ərzində əsasən yağmursuz keçəcəyi gözlənilir. Mülayim cənub küləyi əsəcək.

Azərbaycanın Böyük Britaniyadakı səfiri Elin Süleymanovun nüfuzlu “The Guardian” qəzetinə ünvanladığı məktubu dərc olunub.

Məktubda bu qəzet tərəfindən ölkəmizin əleyhinə son aylar dərc olunmuş məqalələrə cavab verilib.

Bildirilib ki, işğaldan azad edilmiş ərazilər birmənalı olaraq beynəlxalq səviyyədə Azərbaycanın tanınmış əraziləridir və bu fakt BMT Təhlükəsizlik Şurasının 4 qətnaməsi ilə də təsdiq edilib.

Həmçinin qeyd olunub ki, hər bir dövlətin öz ərazi bütövlüyünü müdafiə etməsi BMT nizamnəməsində qeyd olunduğu kimi onun ən əsas vəzifəsidir.

Bildirilib ki, Cənubi Qafqazda sülhə başlıca mane olan Ermənistanın Azərbaycan torpaqlarını işğalı məsələsi artıq ortadan qaldırılıb və hər iki ölkənin rəhbərliyi tərəfindən yaxın aylarda sülhün əldə oluna biləcəyi bəyan edilib.

Azərbaycanın beynəlxalq enerji tərəfdaşları ilə əməkdaşlıqdan əldə olunan gəlirlərinin səhiyyə, infrastruktur, təhsil və digər sahələrə yönəldiyi qeyd olunub, nəticədə Azərbaycanın Cənubi Qafqaz regionunda ən inkişaf etmiş ölkəyə çevrildiyi bildirilib. Ermənistan ilə sülh razılaşmasının isə bütövlükdə regiona sabitlik və iqtisadi inkişaf gətirəcəyi vurğulanıb.